വിശുദ്ധ ഖുർആൻ

മനുഷ്യരാശിക്ക് അല്ലാഹു നൽകിയ അന്തിമവും സമ്പൂർണവുമായ മാർഗദർശനമാണ് വിശുദ്ധ ഖുർആൻ. ജിബ്‌രീൽ (അ) മുഖേന മുഹമ്മദ് നബി ﷺ യിലേക്ക് അവതരിപ്പിച്ച വഹ്‌യാണത്. അല്ലാഹുവിന്റെ ഏകത്വവും കാരുണ്യവും അത് നമ്മെ അറിയിക്കുന്നു. സ്വന്തം പ്രവൃത്തികൾക്ക് ഉത്തരം പറയേണ്ട ഒരു ദിവസം വരാനുണ്ടെന്നും ഓർമ്മിപ്പിക്കുന്നു.

നമസ്കാരത്തിൽ പതിവായി ഓതുന്ന ഒരു ആയത്ത്, അതിന്റെ അർത്ഥം അറിഞ്ഞശേഷം വീണ്ടും ഓതുമ്പോൾ നാം കൂടുതൽ ശ്രദ്ധിച്ചേക്കാം. അറിഞ്ഞത് അവിടെ അവസാനിക്കരുത്. സത്യസന്ധതയിലും നീതിയിലും മറ്റുള്ളവരോടുള്ള പെരുമാറ്റത്തിലും ആ അറിവ് തെളിയണം.

ഖുർആന്റെ അവതരണം ഒരേ ദിവസത്തിൽ പൂർത്തിയായതല്ല. വർഷങ്ങളിലായി ആയത്തുകൾ അവതരിച്ചു. നബി ﷺ അവ സ്വഹാബികൾക്ക് ഓതിക്കേൾപ്പിച്ചു. അവർ മനഃപാഠമാക്കി; എഴുതിവെക്കുകയും ചെയ്തു. പിന്നീട് വചനങ്ങൾ മുസ്ഹഫിൽ ഒന്നിച്ചു സൂക്ഷിക്കപ്പെട്ടു.

ഇന്ന് നാം തുറക്കുന്ന പേജിനു പിന്നിൽ ഓതിയും പഠിച്ചും കാത്തുവെച്ചും കടന്നുവന്ന ആ ചരിത്രമുണ്ട്. ഖുർആൻ എങ്ങനെ അവതരിച്ചു, എങ്ങനെ നമ്മിലേക്ക് എത്തി എന്ന ചോദ്യങ്ങൾ അതിനോടുള്ള ആദരവ് കുറയ്ക്കുന്നില്ല. മൂലപാഠത്തെ കൂടുതൽ ശ്രദ്ധയോടെ സമീപിക്കാനാണ് അവ നമ്മെ പഠിപ്പിക്കുന്നത്.

അച്ചടിച്ച മലയാള പരിഭാഷകൾ വരുന്നതിനുമുമ്പും കേരളത്തിൽ ആളുകൾ ഖുർആൻ പഠിച്ചിരുന്നു. പള്ളികളിലും പഠനവേദികളിലും ഉസ്താദുമാർ വചനങ്ങളുടെ അർത്ഥം പറഞ്ഞുകൊടുത്തു. അറബി-മലയാളം രചനകളും പിന്നീട് മലയാളത്തിലുള്ള ആശയവിവർത്തനങ്ങളും ആ വഴിയിൽ ചേർന്നു. ആ അധ്വാനത്തോടുള്ള കടപ്പാട് ഈ പ്രവർത്തനത്തിനുമുണ്ട്.

ഖുർആൻ അറബിയിലാണ്. മലയാള പരിഭാഷ അതിന്റെ അർത്ഥം ഗ്രഹിക്കാനുള്ള സഹായമാണ്; മൂലവചനം തന്നെയല്ല. അറബിയിലെ ഒരു പദത്തിന്റെ എല്ലാ സൂക്ഷ്മതകളും ഒറ്റ മലയാള വാക്കിൽ ഒതുങ്ങണമെന്നില്ല. പരിഭാഷകൻ വചനത്തിന്റെ സന്ദർഭവും ഭാഷയും മുൻകാല വിശദീകരണങ്ങളും പരിഗണിച്ചാണ് ആശയം അവതരിപ്പിക്കുന്നത്. അതുകൊണ്ട് ഒരേ ആയത്തിന്റെ മലയാളം പല പരിഭാഷകളിൽ വ്യത്യസ്തമായി കാണാം. ഏതു പരിഭാഷയാണ് വായിക്കുന്നതെന്ന് അറിയേണ്ടത് അതിനാലാണ്.

ഖുർആന്റെ ഭാഷാഭംഗിയെയും അതുല്യതയെയും കുറിച്ച് പറയുമ്പോഴും വിശ്വാസിയുടെ മുന്നിൽ ഒരു ചോദ്യം ബാക്കിയുണ്ട്: അല്ലാഹു ഈ വചനത്തിലൂടെ എന്നെ എന്താണ് പഠിപ്പിക്കുന്നത്?

അല്ലാഹുവിന്റെ നാമങ്ങളും ഗുണങ്ങളും അറിയുമ്പോൾ അവനോടുള്ള ഭയഭക്തിക്കൊപ്പം അവന്റെ കാരുണ്യത്തിലുള്ള പ്രതീക്ഷയും വളരുന്നു. സൃഷ്ടിയിലെ ദൃഷ്ടാന്തങ്ങളെക്കുറിച്ച് വായിക്കുമ്പോൾ നന്ദിയോടെ നോക്കാൻ പഠിക്കുന്നു. നീതിയെയും മറ്റുള്ളവരുടെ അവകാശങ്ങളെയും കുറിച്ച് വായിക്കുമ്പോൾ സ്വന്തം പെരുമാറ്റം പരിശോധിക്കേണ്ടിവരുന്നു. ഇങ്ങനെ ചിന്തിക്കുമ്പോഴാണ് പാരായണത്തിൽ അറിഞ്ഞത് ഇബാദത്തിലും ജീവിതത്തിലും ഇടം നേടുന്നത്.

ഒരു ആയത്തിന്റെ പശ്ചാത്തലമോ അർത്ഥമോ വ്യക്തമല്ലെങ്കിൽ സ്വന്തം ധാരണയിൽ മാത്രം നിൽക്കേണ്ടതില്ല. കൂടുതൽ പഠിക്കാനും യോഗ്യരായവരോട് ചോദിക്കാനും തഫ്സീർ പരിശോധിക്കാനും ഇടമുണ്ട്. ഈ വേദി ഒരു പണ്ഡിതന്റെ സ്ഥാനത്ത് നിൽക്കുന്നില്ല; പഠനത്തിലേക്ക് വഴി കാണിക്കുന്ന സഹായം മാത്രമാണ്.

മലയാളത്തിൽ ഒന്നിലധികം പരിഭാഷകൾ ഇവിടെ വായിക്കാം. വായനപ്പേജിൽ ഏതു പരിഭാഷയാണ് തുറന്നിരിക്കുന്നതെന്ന് കാണാനും ഇഷ്ടമുള്ളത് തിരഞ്ഞെടുക്കാനും കഴിയും. താഴെ കൊടുത്തിരിക്കുന്ന പേരുകൾ അതിന് സഹായിക്കും.

മലയാളത്തിനു പുറമെ മറ്റു ഭാഷകളിലെ പരിഭാഷകളും ലഭ്യമാണ്. ഓരോ ഭാഷയ്ക്കൊപ്പവും അതിന്റെ വിവർത്തകന്റെ പേര് നൽകിയിരിക്കുന്നു. തഫ്സീർ വായിക്കുമ്പോൾ അതിന്റെ ഉറവിടവും കാണാം.

അഹ്‌ലുസ്സുന്നത്തി വൽജമാഅത്തിന്റെ വിശ്വാസവും ആശയാദർശങ്ങളും പിന്തുടരുന്ന ഒരു മുസ്ലിമാണ് ഈ വേദിക്കു പിന്നിൽ. സാങ്കേതിക രംഗത്ത് പ്രൊഫഷണൽ പരിചയമില്ലാതെയാണ് ഞാൻ ഇതിന് തുടക്കമിട്ടത്. പഠിച്ചും തിരുത്തിയും അല്ലാഹുവിന്റെ സഹായത്തിൽ ആശ്രയിച്ചുമാണ് മുന്നോട്ടുപോകുന്നത്.

ഏതെങ്കിലും സംഘടനയോടോ രാഷ്ട്രീയ പ്രസ്ഥാനത്തോടോ ഈ പ്രവർത്തനത്തിന് ബന്ധമില്ല. സാമ്പത്തിക ലാഭവും ലക്ഷ്യമല്ല. ഖുർആൻ പഠിക്കാൻ ആഗ്രഹിക്കുന്ന ഒരാൾക്ക് ഇതിൽനിന്ന് ഉപകാരം ലഭിച്ചാൽ, അല്ലാഹു ഈ പ്രവർത്തനം സ്വീകരിച്ചാൽ, അതാണ് പ്രതീക്ഷിക്കുന്നത്. എന്റെ അറിവിനും കഴിവിനും പരിധിയുണ്ടെന്ന ബോധവും കൂടെയുണ്ട്.