അൽ ഫാതിഹ - الفاتحة - Al-Fatihah

1. എല്ലാവിധ സ്‌തോത്രങ്ങള്‍ക്കും സ്തുതികീര്‍ത്തനങ്ങള്‍ക്കും ശരിയായവിധം അര്‍ഹതപ്പെട്ടവന്‍ സര്‍വലോകങ്ങളുടെയും സ്രഷ്ടാവും സംരക്ഷകനും നിയന്താവും അധിപനുമായ അല്ലാഹുവാണ്. ഈ വിശാലാര്‍ത്ഥത്തിലാണിവിടെ നാഥന്‍ (റബ്ബ്) എന്ന് ഉപയോഗിച്ചിരിക്കുന്നത്.

2. അല്ലാഹുവിന്റെ രണ്ടു സുപ്രധാനവിശേഷണങ്ങളാണ് ഇവിടെ പരാമര്‍ശിച്ചിട്ടുള്ളത്. ഒന്നാം സൂക്തമായ 'ബിസ്മി'യിലും ഇവ കാണാം. അവന്റെ കനിവിനും കാരുണ്യത്തിനും ദയാവായ്പിനും കൈയും കണക്കുമില്ല. തീരങ്ങളും ആഴങ്ങളും കാണാനാകാത്ത മഹാസാഗരമാണത്. കടുത്ത ധിക്കാരികള്‍ക്കും നിഷേധികള്‍ക്കും വരെ പരിധിയില്ലാതെ അവന്‍ അനുഗ്രഹങ്ങള്‍ നല്‍കുന്നത് സുജ്ഞാതമല്ലേ? സത്യവിശ്വാസികളും സല്‍കര്‍മികളുമായ പ്രജകള്‍ പരലോകത്ത് അവന്റെ സവിശേഷ കാരുണ്യത്തിനു വിധേയരാകുന്നു.

3. പ്രതിഫല ദിനം കൊണ്ട് ഉദ്ദേശ്യം ഖിയാമനാള്‍ ആണ്. അന്ത്യനാളില്‍ മാത്രമല്ല എല്ലാകാലത്തും ലോകത്തും അല്ലാഹു തന്നെയാണ് അധിപനും രാജാവും. പക്ഷെ ഇഹലോകത്ത് മറ്റുപലരും അതവകാശപ്പെടുന്നുണ്ട്. പരലോകത്താകട്ടെ, ആരുമതിനു മുതിരായ്കയാല്‍ സര്‍വാംഗീകൃതനായ അധിപനായിരിക്കും അല്ലാഹു. ഖുര്‍ആന്‍ 40:16ല്‍ ഇതു സ്പഷ്ടമാക്കിയിട്ടുണ്ട്.

4. മുസ്‌ലിംകള്‍ അല്ലാഹുവിനെ മാത്രമാണ് ആരാധിക്കുക. മറ്റു ദൈവങ്ങളെ ആരാധിക്കുവാന്‍ ഇസ്‌ലാം മതം സ്വീകരിക്കേണ്ടതില്ലല്ലോ. ആ മൗലികകാര്യം ഇവിടെ പ്രഖ്യാപിക്കുകയാണ്. ഒരു വസ്തുവിനെ അങ്ങേയറ്റം ബഹുമാനിക്കുകയും അതിനു മുന്നില്‍ പരമമായ താഴ്മയും അത്യധികമായ എളിമത്വവും കാണിക്കുകയും ചെയ്യുന്നതിന്നാണ് ഇബാദത്ത് എന്നു പറയുന്നത്. ഈ ഇബാദത്ത് അല്ലാഹുവിനു മാത്രമേ ചെയ്യാവൂ. അവന്‍ ആരാധ്യനും റബ്ബുമാണ് എന്നതിനാല്‍ സഹായാര്‍ത്ഥനയും അവനോടു മാത്രമേ ആകാവൂ. കുഴിയില്‍ വീണ ഒരാള്‍ സ്‌നേഹിതാ, എന്നെ രക്ഷിക്കണേ എന്നപേക്ഷിക്കുന്നതും ഒരു രോഗി ഡോക്റ്ററേ, താങ്കള്‍ എന്റെ രോഗം സുഖപ്പെടുത്തിത്തരണേ എന്നു പറയുന്നതും, പടച്ചവനേ, തിരുനബി(സ്വ)യുടെ മഹത്ത്വം കൊണ്ടു എന്റെ അസുഖം ഭേദപ്പെടുത്തണേ എന്നു തവസ്സുല്‍ ചെയ്യുന്നതും ഇപ്പറഞ്ഞതിന്ന് എതിരല്ല. കാരണം, അവയെല്ലാം അല്ലാഹു നല്‍കുന്ന കഴിവുകൊണ്ടു തന്നെയാണ് സാധിക്കുന്നത്. ആ കഴിവിനു ജീവിച്ചിരിക്കുന്നവരെന്നോ മരിച്ചവരെന്നോ ഉള്ള വ്യത്യാസമില്ല.

5. എന്തൊക്കെ ഭൗതിക സൗകര്യങ്ങള്‍ കൊണ്ട് അനുഗൃഹീതനാണെങ്കിലും സന്മാര്‍ഗപ്രാപ്തി കൊണ്ടു മാത്രമേ ഒരാള്‍ ശരിയായ വിജയം കൈവരിച്ചവനാകൂ. അതുകൊണ്ടാണ് അല്ലാഹുവിനോട് സന്മാര്‍ഗത്തില്‍ നയിക്കാനപേക്ഷിക്കുന്നത്.

6. നേരായ മാര്‍ഗം എന്നതുകൊണ്ടു താന്‍ വിവക്ഷിക്കുന്നത് ആരുടെ വഴിയാണ് എന്ന് അടിമതന്നെ വിശദീകരിക്കുകയാണ്. നബിമാര്‍, സ്വിദ്ദീഖുകള്‍, ശുഹദാഅ്, സ്വാലിഹുകള്‍ എന്നിവരാണവര്‍ (ഖുര്‍ആന്‍ 4:99). അല്ലാഹുവിന്റെ അനുഗ്രഹത്തിന്നു പാത്രീഭൂതരായവര്‍ ഇവരാണെന്ന് അവിടെ സ്പഷ്ടമാക്കിയിട്ടുണ്ട്. അല്ലാഹുവിന്റെ കോപത്തിനു വിധേയരായവര്‍ ജൂതന്മാരും (2:61; 3:111) വഴി പിഴച്ചു പോയവര്‍ ക്രിസ്ത്യാനികളുമാണ്. (5:77). കുറ്റകൃത്യങ്ങളും ദുര്‍മാര്‍ഗജീവിതവും വഴി സത്യമാര്‍ഗത്തില്‍ നിന്നു വ്യതിചലിക്കുകയും തന്മൂലം ദൈവകോപത്തിന്നു വിധേയമാവുകയും ചെയ്ത മറ്റേതു ജനവിഭാഗവും ഇതിലുള്‍പ്പെടും. ഫാതിഹ ഓതിക്കഴിഞ്ഞാല്‍ ആമീന്‍ (ഞങ്ങളുടെ പ്രാര്‍ത്ഥനക്ക് ഉത്തരം നല്‍കേണമേ) എന്നു ചൊല്ലല്‍ സുന്നത്തുണ്ട്. ഖുര്‍ആനില്‍ ഉള്‍പ്പെട്ടതാണെന്ന തെറ്റിദ്ധാരണ വരാതിരിക്കാനാണ് മുസ്വ്ഹഫിലെ എഴുത്തില്‍ ഒഴിവാക്കുന്നത്.