അദ്ദുഖാൻ - الدخان - Ad-Dukhan

ഹാമീം

സ്പഷ്ടമാക്കുന്ന വേദഗ്രന്ഥം തന്നെയാണ് (സത്യം),

നിശ്ചയമായും ഒരു അനുഗൃഹീത രാത്രിയില്‍ നാം അത് അവതരിപ്പിച്ചു. (കാരണം) നാം താക്കീത് നല്‍കുന്നവര്‍ തന്നെയാകുന്നു.

ബലവത്തായ എല്ലാ കാര്യങ്ങളും ആ രാത്രിയില്‍ വേര്‍തിരിച്ചുവിവരിക്കപ്പെടുന്നുണ്ട്.

നമ്മുടെ പക്കല്‍നിന്നുള്ള ഒരു കല്‍പനയായിക്കൊണ്ട്. (കാരണം) നിശ്ചയമായും നാം റസൂലുകളെ അയക്കുന്നവരാകുന്നു;

താങ്കളുടെ രക്ഷിതാവിങ്കല്‍ നിന്നുള്ള കാരുണ്യമായിക്കൊണ്ട്. അവന്‍ തന്നെയാണ് എല്ലാം കേള്‍ക്കുന്നവനും അറിയുന്നവനും, തീര്‍ച്ച.

അതായത് ആകാശഭൂമികളുടെയും അവക്കിടയിലുള്ളതിന്റെയും നാഥന്റെ (കാരുണ്യം). നിങ്ങള്‍ ദൃഢവിശ്വാസമുള്ളവരായിട്ടുണ്ടെങ്കില്‍.

അവനല്ലാതെ ഒരു ഇലാഹുമില്ല. അവന്‍ ജീവിപ്പിക്കുകയും മരണപ്പെടുത്തുകയും ചെയ്യുന്നു. (അവന്‍) നിങ്ങളുടെയും നിങ്ങളുടെ പൂര്‍വപിതാക്കളുടെയും രക്ഷിതാവാകുന്നു.

പക്ഷേ, വിനോദത്തിലായിക്കൊണ്ട് അവര്‍ സംശയത്തിലാണ്.

അതിനാല്‍, ആകാശം സ്പഷ്ടമായ ഒരു പുക കൊണ്ടുവരുന്ന ദിവസത്തെ താങ്കള്‍ പ്രതീക്ഷിക്കുക.

അത് മനുഷ്യരെ പൊതിയും. ഇത് വേദനാജനകമായ ഒരു ശിക്ഷയായിരിക്കുന്നതാണ്.

(അവര്‍ പറയും:) ഞങ്ങളുടെ രക്ഷിതാവേ, ഈ ശിക്ഷ ഞങ്ങളില്‍ നിന്ന് നീ ഒഴിവാക്കിത്തരേണമേ! നിശ്ചയമായും ഞങ്ങള്‍ വിശ്വസിക്കുന്നവരാണ്.

അവര്‍ക്ക് എങ്ങനെ ബോധോദയം ഉണ്ടാകാനാണ്! നിശ്ചയമായും അവരുടെ അടുക്കല്‍ സ്പഷ്ടമായ ഒരു റസൂല്‍ (ദൈവദൂതന്‍) ചെന്നു.

എന്നിട്ട് അവര്‍ അദ്ദേഹത്തില്‍ നിന്ന് പിന്മാറിക്കളയുകയാണ് ചെയ്തത്. (അവര്‍ക്ക് യാതൊരു ബോധോദയവുമുണ്ടായില്ല. മാത്രമല്ല,) അദ്ദേഹം അഭ്യസിപ്പിക്കപ്പെട്ടവനാണ്, ഭ്രാന്തനാണ് എന്നവര്‍ പറയുകയും ചെയ്തു.

നിശ്ചയമായും ശിക്ഷ അല്‍പകാലം നാം ഒഴിവാക്കിനിറുത്താം. (എന്നാലും സത്യനിഷേധികളേ,) നിങ്ങള്‍ വീണ്ടും (ആ പഴയ നടപടിയിലേക്ക്) മടങ്ങുന്നവര്‍ തന്നെയാണ്.

ഏറ്റവും വലിയ പിടിത്തം നാം പിടിക്കുന്ന ദിവസം (ഓര്‍ക്കുക!) (അന്ന്) നാം പ്രതികാരനടപടി എടുക്കുന്നവരാകുന്നു, തീര്‍ച്ച.

നിശ്ചയമായും ഇവര്‍ക്കുമുമ്പ് ഫിര്‍ഔന്റെ ജനതയെ നാം പരീക്ഷിച്ചു. ആദരണീയനായ ഒരു റസൂല്‍ അവരുടെ അടുക്കല്‍ ചെല്ലുകയും ചെയ്തു.

(ദൗത്യം ഇവയാണ്:) അല്ലാഹുവിന്റെ അടിമകളെ എനിക്ക് നിങ്ങള്‍ വിട്ടുതരണം. ഞാന്‍ നിങ്ങള്‍ക്ക് വിശ്വസ്തനായ റസൂല്‍ തന്നെയാണ്.

നിങ്ങള്‍ അല്ലാഹുവിനെതിരില്‍ പൊങ്ങച്ചം കാണിക്കരുത്. നിശ്ചയമായും ഞാന്‍ നിങ്ങള്‍ക്ക് സ്പഷ്ടമായ ലക്ഷ്യങ്ങള്‍ കൊണ്ടുവരുന്നുണ്ട്.

എന്നെ നിങ്ങള്‍ എറിഞ്ഞുകൊല്ലുന്നതിനെപ്പറ്റി എന്റെയും നിങ്ങളുടെയും രക്ഷിതാവില്‍ ഞാന്‍ ശരണം പ്രാപിക്കുന്നു.

എന്നെ വിശ്വസിക്കുന്നില്ലെങ്കില്‍ നിങ്ങളെന്നെ വിട്ടകന്നുപോയിക്കൊള്ളുക.

അങ്ങനെ അദ്ദേഹം തന്റെ റബ്ബിനോട് പ്രാര്‍ഥിച്ചു: ഇവര്‍ കുറ്റവാളികളായ ജനത തന്നെയാണേ! (അതിനാല്‍ വേണ്ട നടപടി എടുക്കണേ!)

(അല്ലാഹു മറുപടി നല്‍കി:) എന്നാല്‍, താങ്കള്‍ എന്റെ അടിമകളെ (ഇസ്രാഈല്യരെ)യും കൊണ്ട് രാത്രിയില്‍ പ്രയാണം ചെയ്യുക. തീര്‍ച്ചയായും നിങ്ങള്‍ പിന്തുടരപ്പെടുന്നവരാണ്.

തുറന്നുവിശാലമായ നിലയില്‍ സമുദ്രത്തെ താങ്കള്‍ വിട്ടുപോകുക. നിശ്ചയമായും അവര്‍ (വെള്ളത്തില്‍) മുക്കിനശിപ്പിക്കപ്പെടുന്ന ഒരു സൈന്യമാകുന്നു.

എത്ര തോട്ടങ്ങളെയും അരുവികളെയുമാണവര്‍ വിട്ടുപോയത്?

കൃഷികളെയും മനോഹരങ്ങളായ വാസസ്ഥലങ്ങളെയും,

അവര്‍ സുഖിച്ചാനന്ദം കൊള്ളുന്നവരായിരുന്ന എത്ര സുഖസൗകര്യങ്ങളെയുമാണവര്‍ (വിട്ടുപോയത്?)

അങ്ങനെയാണ് (അവരുടെ അവസാനം). മറ്റൊരു ജനതക്ക് അവയെല്ലാം നാം അനന്തരാവകാശമായി നല്‍കുകയും ചെയ്തു.

എന്നിട്ട് അവരുടെ പേരില്‍ ആകാശവും ഭൂമിയും കരഞ്ഞില്ല. അവര്‍ കാലതാമസം നല്‍കപ്പെട്ടവരായതുമില്ല.

നിശ്ചയമായും ഇസ്രാഈല്‍ സന്തതികളെ അപമാനകരമായ ശിക്ഷയില്‍ നിന്ന് നാം രക്ഷപ്പെടുത്തി.

അതായത് ഫിര്‍ഔനില്‍ നിന്ന്. അവന്‍ അതിക്രമികളില്‍ പെട്ട ഒരു അഹങ്കാരി തന്നെയായിരുന്നു.

അറിഞ്ഞുകൊണ്ടുതന്നെ ലോകരെക്കാള്‍ ഇസ്രാഈല്യരെ നാം ഉല്‍കൃഷ്ടരായി തെരഞ്ഞെടുക്കുകയും,

വ്യക്തമായ പരീക്ഷണം ഉള്‍ക്കൊള്ളുന്ന ദൃഷ്ടാന്തങ്ങള്‍ അവര്‍ക്ക് നാം നല്‍കുകയും ചെയ്തു.

നിശ്ചയമായും ഇവര്‍ പറയുന്നു,

സ്ഥിതി (ഇതാണ്): നമ്മുടെ ആദ്യത്തെ മരണമല്ലാതെ മറ്റൊന്നുമില്ല; നാം ഉയിര്‍ത്തെഴുന്നേല്‍പിക്കപ്പെടുന്നവരുമല്ല എന്ന് .

എന്നാല്‍ (അങ്ങനെയുണ്ടെങ്കില്‍) നമ്മുടെ പിതാക്കളെ നിങ്ങള്‍ കൊണ്ടുവരുവീന്‍-നിങ്ങള്‍ സത്യവാദികളാണെങ്കില്‍!

ഇവരാണോ (ശക്തിയില്‍) ഉത്തമന്മാര്‍? അതല്ല തുബ്ബഇന്റെ ജനതയും അവരുടെ മുമ്പുണ്ടായിരുന്നവരുമോ? അവരെ നാം നശിപ്പിച്ചു. കാരണം, അവര്‍ കുറ്റവാളികള്‍ തന്നെയായിരുന്നു.

ആകാശഭൂമികളും അവക്കിടയിലുള്ളവയും നാം വിനോദിച്ചുകൊണ്ട് (വൃഥാ) സൃഷ്ടിച്ചിരിക്കയല്ല.

അവ രണ്ടും ന്യായമായ കാര്യത്തോടുകൂടിത്തന്നെയാണ് നാം സൃഷ്ടിച്ചിരിക്കുന്നത്. പക്ഷേ, അവരില്‍ അധികമാളുകളും ഗ്രഹിക്കുന്നില്ല.

അന്ത്യതീരുമാനത്തിന്റെ ദിവസം അവരെല്ലാവരുടെയും നിര്‍ണായകസമയമാണ്, തീര്‍ച്ച.

അതായത് ഒരു ബന്ധുവും മറ്റൊരു ബന്ധുവിന് ഒട്ടും ഉപകരിക്കാത്ത ദിവസം. അവര്‍ സഹായിക്കപ്പെടുന്നതുമല്ല.

അല്ലാഹു കരുണ ചെയ്തവര്‍ ഒഴികെ. നിശ്ചയമായും അവന്‍ തന്നെയാണ് പ്രതാപശാലിയും പരമകാരുണികനും.

നിശ്ചയമായും സഖ്ഖൂം വൃക്ഷം

മഹാപാപികളുടെ ഭക്ഷണമാകുന്നു.

ചുടുവെള്ളം തിളച്ചുമറിയുംവിധം അത് വയറുകളില്‍ തിളച്ചുമറിയുന്നതാണ്.

അത് ഉരുകിയ ലോഹം പോലെയിരിക്കും.

(അവിടെവെച്ച് പറയപ്പെടും:) അവനെ പിടിക്കുക. എന്നിട്ട് ജ്വലിക്കുന്ന നരകത്തിന്റെ നടുവിലേക്ക് അവനെ വലിച്ചിഴച്ചുകൊണ്ടുപോകുക.

പിന്നീട് അവന്റെ തലക്കുമീതെ ചുട്ടുതിളക്കുന്ന വെള്ളമാകുന്ന ശിക്ഷയില്‍ നിന്ന് ഒഴിച്ചുകൊടുക്കുക.

(അവനോട് പറയപ്പെടും:) നീ ഇതൊന്ന് രുചിച്ചുനോക്കൂ. നിശ്ചയമായും നീ തന്നെയാണ് പ്രതാപശാലിയും മാന്യനും!

ഇത് നിങ്ങള്‍ സംശയിച്ചുകൊണ്ടിരുന്ന ശിക്ഷ തന്നെയാണ്.

നിശ്ചയമായും ദോഷബാധയെ സൂക്ഷിക്കുന്നവര്‍ നിര്‍ഭയമായ ഒരു വാസസ്ഥലത്തായിരിക്കും.

അതായത് ചില സ്വര്‍ഗത്തോപ്പുകളിലും അരുവികളിലും.

നേര്‍മപ്പട്ടും കനത്ത പട്ടും അവര്‍ ധരിക്കുന്നതാണ്.പരസ്പരം അഭിമുഖരായിക്കൊണ്ടാണവര്‍ (ഇരിക്കുക).

അപ്രകാരമാണ് (കാര്യം). വിശാലനേത്രകളായ വെള്ളനിറമുള്ള തരുണികളെ അവര്‍ക്ക് നാം ഇണ ചേര്‍ത്തുകൊടുക്കുന്നതുമാണ്.

അവിടെ നിര്‍ഭയരായിക്കൊണ്ട് അവര്‍ എല്ലാതരം പഴങ്ങളും ആവശ്യപ്പെടുന്നതാണ്.

ആദ്യമരണമല്ലാതെ അവിടെ വെച്ച് മറ്റൊരു മരണം അവര്‍ അനുഭവിക്കയില്ല. ജ്വലിക്കുന്ന നരകശിക്ഷയെ അല്ലാഹു അവര്‍ക്ക് കാക്കുകയും ചെയ്തിരിക്കുന്നു.

താങ്കളുടെ രക്ഷിതാവിങ്കല്‍ നിന്നുള്ള ഒരു അനുഗ്രഹമായിട്ടാണ് (ഇതെല്ലാം ലഭിക്കുക). അതുതന്നെയാണ് മഹത്തായ ഭാഗ്യം!

എന്നാല്‍ (നബിയേ,) നാം ഇതിനെ (ഖുര്‍ആനെ) താങ്കളുടെ ഭാഷയില്‍ എളുപ്പമാക്കിത്തന്നിരിക്കുന്നത് അവര്‍ ചിന്തിച്ചുഗ്രഹിക്കുവാന്‍ വേണ്ടിമാത്രമാണ്.

അതിനാല്‍ താങ്കള്‍ പ്രതീക്ഷിച്ചുകൊണ്ടിരിക്കുക. നിശ്ചയമായും അവരും പ്രതീക്ഷിച്ചുകൊണ്ടിരിക്കുന്നവരാണ്.