അദ്ദാരിയാത്ത് - الذاريات - Adh-Dhariyat

(ശക്തിയായി മണ്ണിനെ) പാറ്റുന്ന കാറ്റുകളെയും,

ഭാരം വഹി(ച്ചുനട)ക്കുന്ന മേഘങ്ങളെയും,

നിഷ്പ്രയാസം നടക്കുന്ന കപ്പലുകളെയും,

കാര്യങ്ങള്‍ ഭാഗിച്ചുകൊടുക്കുന്ന മലക്കുകളെയും തന്നെയാണ് (സത്യം).

നിശ്ചയമായും നിങ്ങള്‍ക്ക് താക്കീത് നല്‍കപ്പെടുന്നത് സത്യമായതു തന്നെയാണ്.

നിശ്ചയമായും പ്രവര്‍ത്തനങ്ങള്‍ക്കുള്ള പ്രതിഫലം ലഭിക്കുന്നതുമാകുന്നു.

ഭംഗിയുള്ള ആകാശത്തെത്തന്നെയാണ് (സത്യം).

നിശ്ചയം നിങ്ങള്‍ ഭിന്നാഭിപ്രായത്തിലാണുള്ളത്.

തെറ്റിക്കപ്പെടുന്നവര്‍ അതില്‍ നിന്ന് തെറ്റിക്കപ്പെടുന്നു.

കള്ളം പറയുന്നവര്‍ ശപിക്കപ്പെടട്ടെ!

അതായത് വിഡ്ഢിത്വത്തില്‍ മുഴുകി അശ്രദ്ധരായവര്‍.

എപ്പോഴാണ് പ്രതിഫല നടപടിയുടെ ദിവസമെന്നവര്‍ ചോദിക്കുന്നു.

നരകത്തില്‍ അവര്‍ ശിക്ഷിക്കപ്പെടുന്ന ദിവസമാണ് (അതുണ്ടാവുക).

(അന്ന് അവരോട് പറയപ്പെടും:) നിങ്ങളുടെ ശിക്ഷ ആസ്വദിക്കുക; നിങ്ങള്‍ ധൃതി കൂട്ടി (ആവശ്യപ്പെട്ടു)കൊണ്ടിരുന്നത് ഇതാണ്.

നിശ്ചയമായും ഭക്തന്മാര്‍ (സ്വര്‍ഗ) തോട്ടങ്ങളിലും അരുവികളിലുമായിരിക്കുന്നതാണ്.

തങ്ങളുടെ രക്ഷിതാവ് തങ്ങള്‍ക്ക് നല്‍കിയതിനെ സ്വീകരിച്ചവരായുംകൊണ്ട്. നിശ്ചയമായും അതിനുമുമ്പ് അവര്‍ സുകൃതം ചെയ്യുന്നവരായിരുന്നു.

രാത്രിയില്‍ നിന്ന് അല്‍പസമയമായിരുന്നു അവര്‍ ഉറങ്ങിയിരുന്നത്.

രാത്രിയുടെ അന്ത്യദശകളില്‍ അവര്‍ പാപമോചനം തേടുന്നവരുമായിരുന്നു.

അവരുടെ സ്വത്തുക്കളില്‍ ചോദിക്കുന്നവര്‍ക്കും (ചോദ്യത്തിന്) തടസ്സം ബാധിച്ചവര്‍ക്കും അവകാശമുണ്ടായിരിക്കും.

ദൃഢമായി വിശ്വസിക്കുന്നവര്‍ക്ക് ഭൂമിയില്‍ അനേകം ദൃഷ്ടാന്തങ്ങളുണ്ട്.

നിങ്ങളുടെ ദേഹങ്ങളില്‍ തന്നെയുമുണ്ട് (അനേകം ദൃഷ്ടാന്തങ്ങള്‍). എന്നിട്ട് (അതൊന്നും) നിങ്ങള്‍ കണ്ടറിയുന്നില്ലേ?

ആകാശത്ത് നിങ്ങളുടെ ആഹാരമുണ്ട്; നിങ്ങളോട് വാഗ്ദാനം ചെയ്യപ്പെടുന്നതും.

ആകാശഭൂമികളുടെ രക്ഷിതാവിനെ തന്നെയാണ, നിശ്ചയമായും ഇത് സത്യമാണ്; നിങ്ങള്‍ സംസാരിക്കുന്നുവെന്നത് (സത്യമായതു) പോലെ.

ഇബ്‌റാഹീമിന്റെ മാന്യാതിഥികളുടെ വാര്‍ത്ത താങ്കള്‍ക്ക് കിട്ടിയിട്ടുണ്ടോ?

അതായത് അദ്ദേഹത്തിന്റെ അടുത്ത് അവര്‍ കടന്നുചെന്ന അവസരം. എന്നിട്ട് അവര്‍ സലാം പറഞ്ഞു. അദ്ദേഹം പറഞ്ഞു: സലാം. അപരിചിതരായ ആളുകള്‍.

ഉടനെ അദ്ദേഹം തന്റെ വീട്ടുകാരുടെ അടുത്തേക്ക് പതുങ്ങിച്ചെന്നു. എന്നിട്ട് തടിച്ചുകൊഴുത്ത ഒരു പശുക്കുട്ടിയെ (വേവിച്ചു) കൊണ്ടുവന്നു.

അങ്ങനെ അത് അവരുടെ അടുക്കല്‍ അടുപ്പിച്ചുവെച്ചിട്ടദ്ദേഹം ചോദിച്ചു: നിങ്ങള്‍ തിന്നുകയല്ലേ?

(എന്നാല്‍ അവര്‍ തിന്നില്ല.) അപ്പോള്‍ അദ്ദേഹത്തിന് അവരെക്കുറിച്ച് ഒരു പേടി തോന്നി. താങ്കള്‍ പേടിക്കേണ്ടാ എന്നവര്‍ പറഞ്ഞു. നല്ല ജ്ഞാനിയായ ഒരാണ്‍കുട്ടിയെക്കുറിച്ച് അവര്‍ അദ്ദേഹത്തിന് സന്തോഷവാര്‍ത്ത അറിയിക്കയും ചെയ്തു.

അപ്പോള്‍ അദ്ദേഹത്തിന്റെ ഭാര്യ ഒരു ശബ്ദം മുഴക്കി മുമ്പോട്ടുവരികയും മുഖത്തടിച്ച്, വന്ധ്യയായ ഒരു കിഴവി (ഞാന്‍ ഇനി പ്രസവിക്കുമോ?) എന്ന് പറയുകയും ചെയ്തു.

അവര്‍ പറഞ്ഞു: അപ്രകാരമാണ് നിന്റെ റബ്ബ് തീരുമാനിച്ചിട്ടുള്ളത്. അവന്‍ യുക്തിയുക്തം പ്രവര്‍ത്തിക്കുന്നവനും സര്‍വജ്ഞനും തന്നെയാകുന്നു.

അദ്ദേഹം ചോദിച്ചു: ഹേ ദൂതന്മാരേ, എന്നാല്‍ നിങ്ങളുടെ കാര്യമെന്താണ്?

അവര്‍ പറഞ്ഞു: നിശ്ചയമായും കുറ്റവാളികളായ ഒരു ജനതയുടെ അടുക്കലേക്ക് ഞങ്ങള്‍ അയക്കപ്പെട്ടിരിക്കുകയാണ്.

കളിമണ്ണിന്റെ കല്ലുകള്‍ അവരുടെ മേല്‍ ഞങ്ങള്‍ വീഴ്ത്തുവാന്‍ വേണ്ടി;

അതിര് കവിഞ്ഞവര്‍ക്കുവേണ്ടി താങ്കളുടെ രക്ഷിതാവിങ്കല്‍ അടയാളപ്പെടുത്തപ്പെട്ട (കല്ലുകള്‍).

അങ്ങനെ അവിടെ ഉണ്ടായിരുന്ന സത്യവിശ്വാസികളെ (എല്ലാവരെയും) നാം പുറത്തേക്ക് കൊണ്ടുപോയി.

എന്നാല്‍, മുസ്‌ലിംകളില്‍ നിന്നുള്ള ഒരൊറ്റ വീടല്ലാതെ നാം അവിടെ കണ്ടെത്തിച്ചില്ല.

വേദനാജനകമായ ശിക്ഷയെ ഭയപ്പെടുന്നവര്‍ക്ക് ഒരു ദൃഷ്ടാന്തം നാം അതില്‍ അവശേഷിപ്പിക്കുകയും ചെയ്തു.

മൂസായിലുമുണ്ട് (ദൃഷ്ടാന്തം). സ്പഷ്ടമായ ദൃഷ്ടാന്തത്തോടുകൂടി അദ്ദേഹത്തെ ഫിര്‍ഔന്റെ അടുക്കലേക്ക് നാം അയച്ച സന്ദര്‍ഭം.

എന്നിട്ട് അവന്‍ തന്റെ സൈന്യസമേതം തിരിഞ്ഞുകളഞ്ഞു. മൂസാ ഒരു ജാലവിദ്യക്കാരനോ ഒരു ഭ്രാന്തനോ ആണ് എന്നവന്‍ പറയുകയും ചെയ്തു.

അതുകൊണ്ട് അവനെയും അവന്റെ സൈന്യങ്ങളെയും നാം പിടിച്ചു. എന്നിട്ട് അവരെ നാം കടലില്‍ എറിഞ്ഞുകളഞ്ഞു. അവന്‍ ആക്ഷേപകരമായത് പ്രവര്‍ത്തിക്കുന്നവനായിരുന്നു.

ആദ് സമുദായത്തിലുമുണ്ട് (ദൃഷ്ടാന്തം). അവരുടെ മേല്‍ ഒട്ടും ഗുണകരമല്ലാത്ത കാറ്റ് നാം അയച്ച സന്ദര്‍ഭം.

അത് ഏതൊരു സാധനത്തിന്മേല്‍ ചെന്നെത്തിയാലും അതിനെ തുരുമ്പ്‌പോലെ ആക്കാതെ വിട്ടുകളഞ്ഞിരുന്നില്ല.

സമൂദ് സമുദായത്തിലുമുണ്ട് (ദൃഷ്ടാന്തം). ഒരു (നിശ്ചിത) സമയം വരെ നിങ്ങള്‍ ജീവിതസുഖം അനുഭവിച്ചുകൊള്ളുക എന്ന് അവരോട് പറയപ്പെട്ട സന്ദര്‍ഭം.

എന്നിട്ട് അവര്‍ തങ്ങളുടെ രക്ഷിതാവിന്റെ കല്‍പന വിട്ട് ധിക്കരിച്ചു. തന്നിമിത്തം അവര്‍ നോക്കിക്കൊണ്ടിരിക്കെ ഒരു ഭയങ്കര ശബ്ദം അവരെ പിടികൂടി.

അപ്പോള്‍ അവര്‍ക്ക് എഴുന്നേല്‍ക്കുവാന്‍ (രക്ഷപ്പെടുവാന്‍) കഴിവുണ്ടായില്ല. അവര്‍ സ്വയം രക്ഷാനടപടി കൈക്കൊള്ളുന്നവരുമായിരുന്നില്ല.

ഇവര്‍ക്കു മുമ്പ് നൂഹിന്റെ ജനതയെയും (നാം നശിപ്പിക്കയുണ്ടായി). നിശ്ചയമായും അവര്‍ ദുര്‍നടപ്പുകാരായ ഒരു ജനതയായിരുന്നു.

ആകാശത്തെ (നമ്മുടെ) ശക്തി കൊണ്ട് നാം സ്ഥാപിച്ചു. നിശ്ചയമായും നാം വിശാലമായ കഴിവുള്ളവര്‍ തന്നെയാണ്.

ഭൂമിയെ നാം പരത്തുകയും ചെയ്തിരിക്കുന്നു. അപ്പോള്‍ ആ വിരിപ്പ് വിരിച്ചവര്‍ എത്ര നല്ല വിദഗ്ദര്‍!

നിങ്ങള്‍ ചിന്തിക്കുവാന്‍ വേണ്ടി എല്ലാ വസ്തുക്കളില്‍ നിന്നും നാം ഇണകളെ സൃഷ്ടിക്കുകയും ചെയ്തു.

(പ്രഖ്യാപിക്കുക:) ആകയാല്‍ (ജനങ്ങളേ,) നിങ്ങള്‍ അല്ലാഹുവിങ്കലേക്ക് ഓടിപ്പോവുക. നിശ്ചയമായും ഞാന്‍ നിങ്ങള്‍ക്ക് അവങ്കല്‍ നിന്നുള്ള വ്യക്തമായ ഒരു താക്കീതുകാരനാകുന്നു.

നിങ്ങള്‍ അല്ലാഹുവിനോടുകൂടി മറ്റൊരു ഇലാഹിനെ സ്വീകരിക്കരുത്. ഞാന്‍ നിങ്ങള്‍ക്ക് അവങ്കല്‍ നിന്നുള്ള വ്യക്തമായ ഒരു താക്കീതുകാരന്‍ തന്നെയാകുന്നു.

അപ്രകാരം, ഇവരുടെ മുമ്പുണ്ടായിരുന്നവര്‍ക്ക് ഒരു റസൂലും വന്നിരുന്നില്ല, ഇവന്‍ ഒരുജാലവിദ്യക്കാരനോ ഭ്രാന്തനോ ആണെന്ന് അവര്‍ പറഞ്ഞിട്ടല്ലാതെ.

ഇതിനെപ്പറ്റി അവര്‍ പരസ്പരം വസ്വിയ്യത്ത് ചെയ്തിരിക്കയാണോ? (അതൊന്നുമല്ല,) പക്ഷേ, അവര്‍ അതിക്രമികളായ ജനതയാണ്.

അതുകൊണ്ട് താങ്കള്‍ അവരെ വിട്ട് തിരിഞ്ഞുകളയുക. താങ്കള്‍ (അതില്‍) ആക്ഷേപാര്‍ഹനല്ല.

താങ്കള്‍ അവരെ (ഉപദേശിച്ച്) ഓര്‍മപ്പെടുത്തുക. ഓര്‍മപ്പെടുത്തല്‍ സത്യവിശ്വാസികള്‍ക്ക് ഫലപ്രദമാവുകതന്നെ ചെയ്യും.

എനിക്ക് ഇബാദത്ത് ചെയ്യുവാന്‍ വേണ്ടി മാത്രമാണ് ജിന്നുകളെയും മനുഷ്യരെയും ഞാന്‍ സൃഷ്ടിച്ചിട്ടുള്ളത്.

അവരില്‍ നിന്ന് യാതൊരു ഉപജീവനവും ഞാന്‍ ഉദ്ദേശിക്കുന്നില്ല. അവരെനിക്ക് ആഹാരം നല്‍കുവാനും ഞാന്‍ ഉദ്ദേശിക്കുന്നില്ല.

നിശ്ചയമായും പ്രബലമായ ശക്തിയുള്ള അല്ലാഹു തന്നെയാണ് ഉപജീവനം നല്‍കുന്നവന്‍.

എന്നാല്‍, നിശ്ചയമായും അക്രമം പ്രവര്‍ത്തിച്ചവര്‍ക്ക് തങ്ങളുടെ (പൂര്‍വികരായ) കൂട്ടാളികളുടെ ഓഹരിപോലെ (ശിക്ഷയില്‍ നിന്നുള്ള) ഓഹരിയുണ്ട്. അതിനാല്‍ (അതിനുവേണ്ടി) എന്നോടവര്‍ ധൃതി കൂട്ടാതിരിക്കട്ടെ!

സത്യനിഷേധികള്‍ക്ക് തങ്ങളോട് താക്കീത് നല്‍കപ്പെടുന്ന ആ ദിവസം മൂലം വമ്പിച്ച നാശം!