അത്തൂർ - الطور - At-Tur

പര്‍വതവും,

വിരുത്തി(തുറന്നു)വെക്കപ്പെട്ട ഗ്രന്ഥവും,

തോലില്‍ ക്രമീകരിച്ച് എഴുതപ്പെട്ടതായ,

(ധാരാളം) പെരുമാറ്റമുള്ള മന്ദിരവും,

ഉയര്‍ത്തപ്പെട്ട മേല്‍തട്ടും

നിറഞ്ഞുനില്‍ക്കുന്ന സമുദ്രവും തന്നെയാണ് (സത്യം).

നിശ്ചയമായും താങ്കളുടെ രക്ഷിതാവിന്റെ ശിക്ഷ സംഭവിക്കുന്നത് തന്നെയാണ്.

അതിനെ തടയുന്ന ആരുമില്ല.

ആകാശം കിടുകിടാ വിറക്കുന്ന ദിവസം,

പര്‍വതങ്ങള്‍ (ശക്തിയായി) ചലിക്കുകയും ചെയ്യുന്ന ദിവസം (അതുണ്ടാകും).

എന്നാല്‍, സത്യനിഷേധികള്‍ക്കാണ് അന്നത്തെ ദിവസം വമ്പിച്ച നാശം!

അതായത് അനാവശ്യത്തില്‍ മുഴുകി വിനോദിക്കുന്നവര്‍ക്ക്.

(അതെ,) നരകത്തിലേക്ക് അവരെ (ഊക്കോടെ) ഒരു പിടിച്ചുതള്ളല്‍ തള്ളപ്പെടുന്ന ദിവസം!

(അന്ന് അവരോട് പറയപ്പെടും:) ഇത് നിങ്ങള്‍ നിഷേധിച്ചുകൊണ്ടിരുന്ന ആ നരകമാണ്.

അപ്പോള്‍, ഇതൊരു ജാലമാണോ അതല്ല ഇത് നിങ്ങള്‍ കാണുന്നില്ല എന്നുണ്ടോ?

നിങ്ങള്‍ ഇതില്‍ കടന്നുകൊള്ളുക; എന്നിട്ട് ക്ഷമിക്കുകയോ ക്ഷമിക്കാതിരിക്കുകയോ ചെയ്യുക. രണ്ടും നിങ്ങള്‍ക്ക് സമമാണ്. നിങ്ങള്‍ പ്രവര്‍ത്തിച്ചുകൊണ്ടിരുന്നതിന് മാത്രമാണ് പ്രതിഫലം നല്‍കപ്പെടുന്നത്.

നിശ്ചയമായും ഭയഭക്തിയുള്ളവര്‍ സ്വര്‍ഗങ്ങളിലും സുഖാനുഭൂതിയിലുമാകുന്നു.

തങ്ങളുടെ രക്ഷിതാവ് അവര്‍ക്ക് നല്‍കിയതില്‍ ആനന്ദം കൊള്ളുന്നവരായുംകൊണ്ട്. അവരുടെ രക്ഷിതാവ് കത്തിജ്വലിക്കുന്ന (നരക)ശിക്ഷയില്‍ നിന്ന് അവരെ രക്ഷിക്കുകയും ചെയ്തിരിക്കുന്നു.

നിങ്ങള്‍ പ്രവര്‍ത്തിച്ചുകൊണ്ടിരുന്നതിന് പ്രതിഫലമായി സന്തുഷ്ടരായുംകൊണ്ട് നിങ്ങള്‍ തിന്നുകയും കുടിക്കുകയും ചെയ്തുകൊള്ളുക (എന്ന് അവരോട് പറയപ്പെടും).

അണിയണിയായി (നിരത്തി) വെക്കപ്പെട്ട കട്ടിലുകളില്‍ ചാരി ഇരിക്കുന്നവരായി (അവര്‍ ആനന്ദം കൊള്ളും). വെളുത്തവരും വിശാലാക്ഷികളുമായ ഇണകളെ നാം അവര്‍ക്ക് ഇണ ചേര്‍ത്തുകൊടുക്കുകയും ചെയ്തിരിക്കുന്നു.

സത്യത്തില്‍ വിശ്വസിക്കുകയും തങ്ങളുടെ സന്താനങ്ങളെ സത്യത്തില്‍ വിശ്വസിച്ചവരായതുംകൊണ്ട് നാം അവരോട് പിന്തുടര്‍ത്തുകയും ചെയ്തവരാകട്ടെ, അവരുടെ സന്താനങ്ങളെ (സ്വര്‍ഗത്തില്‍) അവരോട് നാം ചേര്‍ത്തുകൊടുക്കുന്നതാണ്. അവരുടെ കര്‍മ(ഫല)ത്തില്‍ നിന്നും ഒന്നും തന്നെ നാം ചുരുക്കുന്നതുമല്ല. എല്ലാ മനുഷ്യനും അവന്‍ സമ്പാദിച്ചതിന് പണയം വെക്കപ്പെട്ടവനാകുന്നു.

അവരാഗ്രഹിക്കുന്നതില്‍ നിന്നുള്ള പഴങ്ങളും മാംസവും നാം അവര്‍ക്ക് വിശാലമാക്കിക്കൊടുക്കുന്നതാണ്.

അവര്‍ അതില്‍ മദ്യക്കോപ്പകള്‍ കൈമാറും. യാതൊരു അനാവശ്യവും അതില്‍ ഇല്ല. കുറ്റകരമായതുമില്ല.

അവരുടെ ബാലന്മാര്‍ അവര്‍ക്കിടയില്‍ (സേവനത്തിനായി) ചുറ്റിത്തിരിഞ്ഞുകൊണ്ടിരിക്കുന്നതാണ്. അവര്‍ മറച്ചുവെക്കപ്പെട്ട മുത്തു പോലെയിരിക്കും.

അവര്‍ പരസ്പരം (പലതും) ചോദിക്കുന്നതിനായി തമ്മതമ്മില്‍ അഭിമുഖമായിരിക്കും.

അവര്‍ പറയും: നാം ഇതിനു മുമ്പ് നമ്മുടെ കുടുംബത്തിലായിരിക്കെ (അല്ലാഹുവിനെ) ഭയപ്പെടുന്നവരായിരുന്നു.

അതിനാല്‍ അല്ലാഹു നമ്മളോട് ദാക്ഷിണ്യം കാണിച്ചു. നരകശിക്ഷയില്‍ നിന്ന് അവന്‍ നമ്മെ കാക്കുകയും ചെയ്തു.

നിശ്ചയമായും ഇതിനു മുമ്പ് നാം അവനോട് പ്രാര്‍ഥിക്കുന്നവരായിരുന്നു. അവന്‍ നന്മ ചെയ്യുന്നവനും പരമകാരുണികനും തന്നെയാകുന്നു.

ആകയാല്‍ (നബിയേ,) താങ്കള്‍ ഉല്‍ബോധിപ്പിക്കുക. താങ്കളുടെ രക്ഷിതാവിന്റെ അനുഗ്രഹത്താല്‍ താങ്കള്‍ ഒരു പ്രശ്‌നം വെക്കുന്ന ആളല്ല; ഒരു ഭ്രാന്തനുമല്ല.

അതല്ല, (അദ്ദേഹം) ഒരു കവിയാണ്; വല്ല കാലവിപത്തും അദ്ദേഹത്തിന് ബാധിക്കുന്നത് നമുക്ക് കാത്തിരിക്കാം എന്ന് അവര്‍ പറയുന്നുവോ?

താങ്കള്‍ പറയുക: നിങ്ങള്‍ കാത്തിരുന്നുകൊള്ളുക; എന്നാല്‍, നിശ്ചയമായും ഞാനും നിങ്ങളോടൊപ്പം കാത്തിരിക്കുന്നവരില്‍ പെട്ടവനാകുന്നു.

അതല്ലെങ്കില്‍ അവരുടെ ബുദ്ധികള്‍ ഇതുകൊണ്ട് (ഇങ്ങനെ പറയുവാന്‍) അവരോട് കല്‍പിക്കുകയാണോ? അതല്ല പക്ഷേ അവര്‍ ധിക്കാരികളായ ഒരു ജനതയാണ്.

അതല്ലെങ്കില്‍ അദ്ദേഹം (മുഹമ്മദ് നബി) ഇത് (ഖുര്‍ആന്‍) സ്വയം കെട്ടിയുണ്ടാക്കിയതാണെന്ന് അവര്‍ പറയുന്നുവോ? പക്ഷേ, അവര്‍ (അഹങ്കാരം മൂലം) വിശ്വസിക്കുന്നില്ല; (അതാണിതിനെല്ലാം കാരണം).

എങ്കില്‍ ഇതുപോലെയുള്ള ഒരു സന്ദേശം അവര്‍ കൊണ്ടുവരട്ടെ-അവര്‍ സത്യവാദികളാണെങ്കില്‍!

അതുമല്ല, ഒരു വസ്തുവുമില്ലാതെ അവരങ്ങ് സൃഷ്ടിക്കപ്പെട്ടിരിക്കയാണോ? അതോ അവര്‍ തന്നെയാണോ സ്രഷ്ടാക്കള്‍?

അതല്ല, അവരാണോ ആകാശഭൂമികളെ സൃഷ്ടിച്ചിരിക്കുന്നത്? പക്ഷേ, അവര്‍ ഒന്നും ദൃഢമാക്കുന്നില്ല.

അതല്ല, അവരുടെ പക്കലാണോ താങ്കളുടെ രക്ഷിതാവിന്റെ ഖജനാവുകള്‍? അതോ അവരാണോ അധികാരം നടത്തുന്നവര്‍?

അതല്ല, കയറിച്ചെന്ന് ശ്രദ്ധിച്ചുകേള്‍ക്കാവുന്ന വല്ല കോണിയും അവര്‍ക്കുണ്ടോ? എങ്കില്‍ അവരില്‍ ശ്രദ്ധിച്ചുകേള്‍ക്കുന്നവന്‍ ഒരു വ്യക്തമായ ലക്ഷ്യം കൊണ്ടുവരട്ടെ!

അതല്ല, പെണ്‍മക്കള്‍ അല്ലാഹുവിനും ആണ്‍മക്കള്‍ നിങ്ങള്‍ക്കുമാണോ?

അല്ലെങ്കില്‍ (നബിയേ,) താങ്കള്‍ അവരോട് വല്ല പ്രതിഫലവും ആവശ്യപ്പെടുകയും അതുമൂലം അവര്‍ എന്തെങ്കിലും കടബാധ്യതയാല്‍ വിഷമം അനുഭവിക്കുന്നവരാവുകയും ചെയ്യുന്നുണ്ടോ?

അതുമല്ലെങ്കില്‍ അവരുടെ അടുക്കല്‍ വല്ല അദൃശ്യജ്ഞാനവും ഉണ്ടായിരിക്കുകയും എന്നിട്ട് അതവര്‍ എഴുതുകയും ചെയ്യുന്നുണ്ടോ? (അതിന്റെ അടിസ്ഥാനത്തിലാണോ അവര്‍ നബിയെ എതിര്‍ക്കുന്നത്?)

അതല്ല, അവര്‍ വല്ല കുതന്ത്രവും ഉദ്ദേശിക്കുന്നുണ്ടോ? എങ്കില്‍ ആ സത്യനിഷേധികള്‍ തന്നെയാണ് പരാജയപ്പെടുത്തപ്പെടുന്നവര്‍.

അതല്ല, അല്ലാഹു ഒഴികെ അവര്‍ക്ക് വല്ല ഇലാഹുമുണ്ടോ? അവര്‍ പങ്ക് ചേര്‍ക്കുന്നതില്‍ നിന്ന് അല്ലാഹു എത്ര പരിശുദ്ധന്‍!

ആകാശത്തു നിന്ന് ഒരു കഷ്ണം വീഴുന്നതായി കണ്ടാലും അവര്‍ പറയും, ഇത് അട്ടിയാക്കപ്പെട്ട മേഘമാണ് എന്ന്.

ആകയാല്‍ അവര്‍ മരണമടയുന്ന ആ ദിവസത്തെ കണ്ടുമുട്ടുന്നതുവരെ (നബിയേ,) താങ്കള്‍ അവരെ വിട്ടേക്കുക.

അതായത് അവരുടെ കുതന്ത്രമൊന്നും അവര്‍ക്ക് ഒട്ടും പ്രയോജനപ്പെടാത്ത, അവര്‍ സഹായിക്കപ്പെടാത്ത ആ ദിവസം!

നിശ്ചയമായും അക്രമം പ്രവര്‍ത്തിച്ചവര്‍ക്ക് അതല്ലാത്ത ശിക്ഷയുമുണ്ട്. പക്ഷേ, അവരില്‍ അധികമാളുകളും അറിയുന്നില്ല.

(നബിയേ,) താങ്കളുടെ രക്ഷിതാവിന്റെ വിധി (അവരെ സംബന്ധിച്ച്) ഉണ്ടാകുന്നതുവരെ താങ്കള്‍ ക്ഷമിക്കുക. താങ്കളെ നാം കാത്തുരക്ഷിക്കുക തന്നെ ചെയ്യും. എഴുന്നേല്‍ക്കുന്ന സമയത്ത് താങ്കളുടെ രക്ഷിതാവിനെ സ്തുതിക്കുന്നതോടൊപ്പം അവന്റെ പരിശുദ്ധിയെ പ്രകീര്‍ത്തിക്കുകയും ചെയ്യുക.

രാത്രിയില്‍ നിന്നും (അല്‍പസമയവും) നക്ഷത്രങ്ങള്‍ അസ്തമിക്കുമ്പോഴും അവന് തസ്ബീഹ് നടത്തുക.