സൂറത്ത് അൽ അലഖ് (Al-Alaq), ഖുർആൻ അധ്യായം 96 — അറബി ആയത്തുകളും മലയാളം വിവർത്തനവും ഉൾപ്പെടെ 19 ആയത്തുകൾ വായിക്കുക. Read Surah Al-Alaq with Arabic text and മലയാളം translation.
സൃഷ്ടിച്ചവനായ താങ്കളുടെ രക്ഷിതാവിന്റെ നാമത്തില്‍ ഓതുക.
അവന്‍ മനുഷ്യനെ രക്തപിണ്ഡത്തില്‍ നിന്ന് സൃഷ്ടിച്ചിരിക്കുന്നു.
ഓതുക, താങ്കളുടെ റബ്ബ് അത്യുദാരനാകുന്നു.
അവന്‍ പേന കൊണ്ട് (എഴുത്ത്) പഠിപ്പിച്ചവനാണ്.
തനിക്കറിയാത്തത് മനുഷ്യനവന്‍ പഠിപ്പിച്ചിരിക്കുന്നു.
അറിയുക, നിശ്ചയമായും മനുഷ്യന്‍ അതിരുവിട്ടുപോകുന്നു.
താന്‍ സ്വയംപര്യാപ്തനാണെന്ന് വിചാരിച്ചതുകൊണ്ട്,
(മനുഷ്യാ,) നിന്റെ റബ്ബിങ്കലേക്കു തന്നെയാണ് നിന്റെ മടക്കം.
അദ്ദേഹത്തെ തടയുന്നവനെ നീ കണ്ടുവോ?
ഒരു അടിമ നമസ്‌കരിക്കുമ്പോള്‍
നീ കണ്ടുവോ, ആ അടിമ സന്മാര്‍ഗത്തിലാവുകയും
തഖ്‌വാ കൊണ്ട് കല്‍പിക്കുകയുമാണെങ്കില്‍,
നീ കണ്ടുവോ, ആ തടയുന്നവന്‍ സത്യനിഷേധിയും (അതില്‍ നിന്ന്) തിരിഞ്ഞുപോന്നവനും ആണെങ്കില്‍ (എന്തായിരിക്കും അവസ്ഥ?)
നിശ്ചയമായും അല്ലാഹു കാണുന്നുണ്ടെന്ന് അവന്‍ അറിഞ്ഞിട്ടില്ലേ?
വേണ്ടാ, അവന്‍ വിരമിക്കുന്നില്ലെങ്കില്‍ നിശ്ചയമായും ആ കുടുമ നാം പിടിച്ചുവലിക്കുകതന്നെ ചെയ്യും.
കള്ളവാദിയും കുറ്റക്കാരിയുമായ കുടുമ.
എന്നിട്ട് അവന്‍ തന്റെ സഭക്കാരെ വിളിച്ചുകൊള്ളട്ടെ;
സബാനിയാക്കളെ നാമും വിളിച്ചുകൊള്ളാം.
വേണ്ടാ, (നബിയേ,) താങ്കള്‍ അവനെ അനുസരിക്കരുത്. താങ്കള്‍ സുജൂദ് ചെയ്യുകയും (അല്ലാഹുവിങ്കലേക്ക്) അടുക്കുകയും ചെയ്തുകൊള്ളുക.