അൽ ഹാഖ്ഖ - الحاقة - Al-Haqqah

ആ യഥാര്‍ഥ സമയം!

യഥാര്‍ഥ സമയമെന്നാല്‍ എന്താണ്?

യഥാര്‍ഥ സമയമെന്നാല്‍ എന്ത് എന്ന് താങ്കള്‍ക്ക് അറിവ് നല്‍കിയതെന്താണ്?

സമൂദും ആദും ആ ഞെട്ടിക്കുന്ന സമയത്തെ (ഖിയാമനാളിനെ) നിഷേധിച്ചു.

അപ്പോള്‍ സമൂദ് സമുദായത്തെ ആ അതിരുവിട്ട സംഭവം മൂലം നശിപ്പിക്കപ്പെട്ടു.

ആദ് സമുദായത്തെ ഊക്കേറിയ (ഇരമ്പിയടിക്കുന്ന) ഒരു ഉഗ്രമായ കാറ്റുകൊണ്ടും നശിപ്പിക്കപ്പെടുകയുണ്ടായി.

ഏഴ് രാവും എട്ട് പകലും തുടര്‍ച്ചയായി അവരുടെ മേല്‍ അതിനെ അവന്‍ (അല്ലാഹു) നിയോഗിച്ചു. അപ്പോള്‍ ആ ജനതയെ കടപുഴകി വീണുകിടക്കുന്ന ഈത്തപ്പനത്തടികളെന്ന പോലെ നിനക്ക് കാണാമായിരുന്നു.

ഇനി അവര്‍ക്ക് വല്ല അവശിഷ്ടവും നീ കാണുമോ?

ഫിര്‍ഔനും അവന്റെ മുമ്പുള്ളവരും അടിമേലായി മറിഞ്ഞ നാട്ടുകാരും തെറ്റായ പ്രവര്‍ത്തനം ചെയ്തു.

അങ്ങനെ അവര്‍ തങ്ങളുടെ രക്ഷിതാവിന്റെ റസൂലിനോട് അനുസരണക്കേട് കാണിച്ചു. തന്നിമിത്തം അവന്‍ അവരെ ശക്തിയായ ഒരു പിടിത്തം പിടിച്ചു (ശിക്ഷിച്ചു).

നിശ്ചയമായും വെള്ളം അതിരുവിട്ട സമയം നിങ്ങളെ നാം കപ്പലില്‍ കയറ്റി (രക്ഷിച്ചു).

നിങ്ങള്‍ക്ക് അവയെ നാം ഒരു സ്മരണയാക്കുവാനും ഓര്‍മിച്ച് സൂക്ഷിക്കുന്ന ചെവികള്‍ അതോര്‍മിച്ച് സൂക്ഷിക്കുവാനും വേണ്ടി.

എന്നാല്‍, കാഹളത്തില്‍ ഓരൊറ്റ ഊത്ത് ഊതപ്പെടുകയും,

ഭൂമിയെയും പര്‍വതങ്ങളെയും പൊക്കിയെടുക്കപ്പെടുകയും എന്നിട്ട് അവ രണ്ടും ഒരൊറ്റ ഇടിച്ചുതകര്‍ക്കല്‍ തകര്‍ക്കപ്പെടുകയും ചെയ്താല്‍,

അന്ന് ആ സംഭവം സംഭവിക്കുന്നതാണ്.

ആകാശം പൊട്ടിപ്പിളരുകയും ചെയ്യും. എന്നിട്ടത് അന്ന് ബലഹീനമായിരിക്കുന്നതാണ്.

മലക്കുകള്‍ അതിന്റെ എല്ലാ ഭാഗങ്ങളിലുമുണ്ടായിരിക്കും. താങ്കളുടെ റബ്ബിന്റെ അര്‍ശ് അവരുടെ മീതെയായ നിലയില്‍ അന്ന് എട്ടു കൂട്ടര്‍ വഹിക്കുന്നതാണ്.

അന്ന് നിങ്ങള്‍ (അല്ലാഹുവിന്റെ സന്നിധിയില്‍) ഹാജറാക്കപ്പെടും. (രഹസ്യമായി) മറഞ്ഞുകിടക്കുന്ന ഒന്നും തന്നെ (അന്ന്) നിങ്ങളില്‍ നിന്ന് മറഞ്ഞുപോകുന്നതല്ല.

എന്നാല്‍, ആരുടെ വലതുകൈയില്‍ (അന്ന്) തന്റെ ഗ്രന്ഥം (കര്‍മരേഖ) കൊടുക്കപ്പെട്ടുവോ അവന്‍ പറയും: ഇതാ എന്റെ കര്‍മരേഖ ഒന്നു എടുത്തുവായിക്കുക!

നിശ്ചയമായും വിചാരണയെ കണ്ടുമുട്ടുമെന്ന് (മുമ്പുതന്നെ) ഞാന്‍ ഉറപ്പിച്ചുവെച്ചിരിക്കുന്നു.

അങ്ങനെ അവന്‍ തൃപ്തികരമായ ജീവിതത്തിലായിരിക്കും.

അതായത് ഉന്നതമായ സ്വര്‍ഗത്തില്‍.

അതിലെ പറിച്ചെടുക്കപ്പെടുന്ന പഴങ്ങള്‍ (വേഗം പറിക്കത്തക്ക വിധം) അടുത്തതായിരിക്കും.

കഴിഞ്ഞുപോയ ദിവസങ്ങളില്‍ മുന്‍കൂട്ടി ചെയ്തുവെച്ച സല്‍ക്കര്‍മഫലമായി നിങ്ങള്‍ ആനന്ദപൂര്‍വം തിന്നുകയും കുടിക്കുകയും ചെയ്തുകൊളളുക (എന്ന് അവരോട് പറയപ്പെടും).

ഇടതുകൈയില്‍ കര്‍മരേഖ നല്‍കപ്പെട്ടവന്‍ പറയും: 'ഹാ, എന്റെ കര്‍മരേഖ എനിക്ക് നല്‍കപ്പെട്ടില്ലായിരുന്നെങ്കില്‍ എത്ര നന്നായിരുന്നേനെ,

എന്റെ വിചാരണ എന്താണെന്ന് ഞാന്‍ അറിയുകയും (ചെയ്തിരുന്നില്ലെങ്കില്‍ എത്ര നന്നായിരുന്നേനെ!)'

'ഹാ! അത് (മരണം) തീരുമാനം വരുത്തുന്നത് (അതോടെ എല്ലാം അവസാനിക്കുന്നത്) ആയിരുന്നെങ്കില്‍ നന്നായിരുന്നു!'

'എന്റെ ധനം എനിക്ക് ഉപകരിച്ചില്ല.

എന്റെ സ്വാധീനശക്തി എനിക്ക് നഷ്ടപ്പെട്ടുകഴിഞ്ഞു.'

(മലക്കുകളോട് അല്ലാഹു കല്‍പിക്കും:) 'നിങ്ങള്‍ അവനെ പിടിച്ചിട്ട് ചങ്ങലക്ക് വെക്കുകയും

എന്നിട്ട് ജ്വലിക്കുന്ന നരകത്തില്‍ കടത്തുകയും,

പിന്നീട് എഴുപത് മുഴം അളവുള്ള ചങ്ങലയില്‍ അവനെ പ്രവേശിപ്പിക്കുകയും ചെയ്യുക.'

'(കാരണം) അവന്‍ മഹാനായ അല്ലാഹുവില്‍ വിശ്വസിക്കാത്തവന്‍ തന്നെയായിരുന്നു.'

'പാവപ്പെട്ടവന് ഭക്ഷണം നല്‍കുന്നതില്‍ അവന്‍ പ്രോത്സാഹനം കാണിച്ചിരുന്നതുമില്ല.'

അതുകൊണ്ട് ഇന്ന് അവനിവിടെ ഒരു ഉറ്റ ബന്ധുവോ,

'ഗിസ്‌ലീനി'ല്‍ നിന്നല്ലാതെ ഭക്ഷണമോ ഇല്ല.

'കുറ്റം ചെയ്തവരേ അത് ഭക്ഷിക്കൂ.'

എന്നാല്‍, നിങ്ങള്‍ കാണുന്നവയെക്കൊണ്ട് ഞാന്‍ സത്യം ചെയ്തു പറയുന്നു:

നിങ്ങള്‍ കാണാത്തവയെക്കൊണ്ടും (ഞാന്‍ സത്യം ചെയ്തു പറയുന്നു:)

നിശ്ചയമായും അത് (ഖുര്‍ആന്‍) ആദരണീയനായ ഒരു ദൂതന്‍ (അല്ലാഹുവിങ്കല്‍ നിന്നുള്ള സന്ദേശമായി) ഓതിത്തരുന്ന വാക്കുകള്‍ തന്നെയാണ്.

അതൊരു കവിയുടെ വാക്കല്ല. അല്‍പം മാത്രമേ നിങ്ങള്‍ വിശ്വസിക്കുന്നുള്ളൂ.

അതൊരു പ്രശ്‌നക്കാരന്റെ വാക്കുമല്ല. നിങ്ങള്‍ അല്‍പം മാത്രമേ ചിന്തിക്കുന്നുള്ളൂ.

ലോകരക്ഷിതാവായ അല്ലാഹുവിങ്കല്‍ നിന്ന് അവതരിച്ചതാണത്.

അദ്ദേഹം (നബി) നമ്മുടെ പേരില്‍ വല്ല വാക്കുകളും കെട്ടിപ്പറഞ്ഞുവെങ്കില്‍,

അദ്ദേഹത്തെ നാം ശക്തിയോടെ പിടിക്കുമായിരുന്നു.

പിന്നെ അദ്ദേഹത്തിന്റെ (ഹൃദയത്തിലെ) ജീവനാഡിയെ നാം മുറിക്കുകയും ചെയ്യുമായിരുന്നു.

അപ്പോള്‍ നിങ്ങളില്‍ ആരും തന്നെ അദ്ദേഹത്തില്‍ നിന്ന് (അത്) തടയുന്നവരായി ഉണ്ടാകുന്നതല്ല.

നിശ്ചയമായും ഖുര്‍ആന്‍ ഭയഭക്തന്മാരെ ഓര്‍മപ്പെടുത്തുന്നതാണ്.

നിശ്ചയമായും നമുക്കറിയാം. നിങ്ങളില്‍ (ഈ ഖുര്‍ആനെ) നിഷേധിക്കുന്ന ചിലരുണ്ടെന്ന്.

നിശ്ചയമായും ഇത് സത്യനിഷേധികളുടെ മേല്‍ ഒരു വമ്പിച്ച ഖേദ(കാരണ)വുമാണ്.

നിശ്ചയമായും ഇത് ദൃഢമായ യാഥാര്‍ഥ്യമാകുന്നു.

അതുകൊണ്ട് താങ്കളുടെ മഹാനായ റബ്ബിന്റെ പരിശുദ്ധിയെ താങ്കള്‍ പ്രകീര്‍ത്തനം ചെയ്യുക.