സൂറത്ത് അൽ മആരിജ് (Al-Maarij), ഖുർആൻ അധ്യായം 70 — അറബി ആയത്തുകളും മലയാളം വിവർത്തനവും ഉൾപ്പെടെ 44 ആയത്തുകൾ വായിക്കുക. Read Surah Al-Maarij with Arabic text and മലയാളം translation.
സത്യനിഷേധികള്‍ക്ക് സംഭവിക്കുവാനിരിക്കുന്ന ശിക്ഷ ആവശ്യപ്പെടുന്ന ഒരാള്‍ ആവശ്യപ്പെടുകയാണ്.
അത് തട്ടിനീക്കുവാന്‍ ആര്‍ക്കും കഴിയുന്നതല്ല തന്നെ.
കയറിപ്പോകുന്ന സ്ഥലങ്ങളുടെ അധിപനായ അല്ലാഹുവിങ്കല്‍ നിന്നാണ് (അത് സംഭവിക്കുക).
മലക്കുകളും റൂഹും അവങ്കലേക്ക് കയറിപ്പോകുന്നു. അമ്പതിനായിരം കൊല്ലത്തെ ദൈര്‍ഘ്യമുള്ള ഒരു ദിവസത്തില്‍ (ആ ശിക്ഷ സംഭവിക്കുന്നതാണ്).
ആയതുകൊണ്ട് (നബിയേ,) താങ്കള്‍ ഭംഗിയായ ക്ഷമ കൈക്കൊള്ളുക.
നിശ്ചയമായും അവരത് വിദൂരമായി കാണുന്നു.
നാം അത് അടുത്തതായും കാണുന്നു.
ആകാശം എണ്ണക്കീടം പോലെ ആയിത്തീരുന്ന ദിവസം.
പര്‍വതങ്ങള്‍ കടഞ്ഞ രോമം പോലെയും (-അന്നാണ് ആ ശിക്ഷ സംഭവിക്കുക).
ഒരു സ്‌നേഹിതനും മറ്റു സ്‌നേഹിതനോട് (ഒന്നും) ചോദിക്കയില്ല.
അവര്‍ക്ക് അവരെ (പരസ്പരം) കാണിച്ചുകൊടുക്കപ്പെടും. (എന്നാലും അവര്‍ തമ്മതമ്മില്‍ അന്വേഷിക്കയില്ല.) കുറ്റവാളി ആഗ്രഹിക്കും, തന്റെ സന്താനങ്ങളെ പ്രായശ്ചിത്തം നല്‍കി ആ ദിവസത്തെ ശിക്ഷയില്‍ നിന്ന് (മോചനം നേടിയിരുന്നെങ്കില്‍ നന്നായേനെ എന്ന്).
സഹധര്‍മിണിയെയും, സഹോദരനെയും (പ്രായശ്ചിത്തം നല്‍കിയും)
തനിക്കഭയം നല്‍കുന്ന കുടുംബത്തെയും
(മാത്രമല്ല) ഭൂമിയിലുള്ള മുഴുവന്‍ പേര്‍ എന്നിവരെയും (പ്രായശ്ചിത്തം നല്‍കി) മോചനം നേടിയിരുന്നെങ്കില്‍ നന്നായേനെ എന്ന്.
അത് (ആ കൊതി) വേണ്ട. നിശ്ചയമായും അത് ആളിക്കത്തുന്ന നരകമാണ്.
അത് (മനുഷ്യന്റെ) തൊലി പൊളിച്ചുനീക്കിക്കളയും.
(സത്യത്തില്‍ നിന്ന്) പിന്നോട്ട് പോകുകയും തിരിഞ്ഞുകളയുകയും ചെയ്തവരെ അത് വിളിക്കും.
(ധനം) ഒരുമിച്ചുകൂട്ടുകയും എന്നിട്ട് (ചെലവ് ചെയ്യാതെ) സൂക്ഷിച്ചുവെക്കുകയും ചെയ്തവരെയും.
നിശ്ചയമായും അങ്ങേയറ്റത്തെ അക്ഷമനും അത്യാഗ്രഹിയുമായി മനുഷ്യന്‍ സൃഷ്ടിക്കപ്പെട്ടിരിക്കുന്നു.
അതായത് വല്ല വിപത്തും ബാധിച്ചാല്‍ വളരെ അക്ഷമനായിട്ടും,
നന്മ കൈവന്നാല്‍ വളരെ മുടക്കം കാണിക്കുന്നവനായിട്ടും.
നമസ്‌കരിക്കുന്നവര്‍ ഒഴികെ.
അതായത് തങ്ങളുടെ നമസ്‌കാരത്തിന്റെ മേല്‍ കൃത്യനിഷ്ഠയുള്ള ആളുകള്‍.
തങ്ങളുടെ സ്വത്തുക്കളില്‍ നിശ്ചിത അവകാശമുള്ളവരും,
ചോദിക്കുന്നവനും (ചോദിക്കുന്നതിന്) മുടക്കം ബാധിച്ചവനും,
പ്രതിഫലം നല്‍കുന്ന ദിവസത്തെപ്പറ്റി വിശ്വസിക്കുന്നവരും,
രക്ഷിതാവിന്റെ ശിക്ഷയെക്കുറിച്ച് ഭയപ്പെടുന്നവരും (ഒഴികെ).
(കാരണം) അവരുടെ രക്ഷിതാവിന്റെ ശിക്ഷ (വരികയില്ലെന്ന്) സമാധാനിച്ചിരിക്കാവതേയല്ല.
ഗുഹ്യസ്ഥാനങ്ങളെ കാത്തുസൂക്ഷിക്കുന്നവരും (ഒഴികെ).
തങ്ങളുടെ ഭാര്യമാരെയോ വലംകൈകള്‍ ഉടമയാക്കിയവരെയോ സംബന്ധിച്ചല്ലാതെ. കാരണം, അവര്‍ ആക്ഷേപാര്‍ഹരേയല്ല.
എന്നാല്‍, അതിനപ്പുറം ആരെങ്കിലും തേടുന്ന പക്ഷം അവര്‍ തന്നെയാണ് അതിക്രമികള്‍.
തങ്ങളെ വിശ്വസിച്ചേല്‍പിക്കപ്പെട്ട കാര്യങ്ങളെയും തങ്ങളുടെ ഉടമ്പടികളെയും പാലിക്കുന്നവരും.
തങ്ങളുടെ സാക്ഷ്യം ശരിക്ക് നിര്‍വഹിക്കുന്നവരും.
തങ്ങളുടെ നമസ്‌കാരങ്ങളില്‍ കൃത്യനിഷ്ഠ പാലിക്കുന്നവരും (ഒഴികെ).(9)
അവര്‍ (എല്ലാം) സ്വര്‍ഗങ്ങളിലാണ്. അവര്‍ ആദരിക്കപ്പെടുന്നവരുമാകുന്നു.
അപ്പോള്‍ സത്യനിഷേധികള്‍ക്കെന്തായിപ്പോയി? താങ്കളുടെ നേരെ അവര്‍ കഴുത്തുനീട്ടി നോക്കിക്കൊണ്ടിരിക്കുന്നു!
വലഭാഗത്തും ഇടഭാഗത്തും സംഘംസംഘമായ നിലയില്‍.
അവരില്‍ ഓരോ മനുഷ്യനും ആഗ്രഹിക്കുന്നുണ്ടോ താന്‍ സുഖാനുഭൂതിയുടെ സ്വര്‍ഗത്തില്‍ പ്രവേശിപ്പിക്കപ്പെടുമെന്ന്?
അതില്ലതന്നെ. അവര്‍ക്കറിയാവുന്ന ഒരു വസ്തുവില്‍ നിന്നാണ് നിശ്ചയമായും അവരെ നാം സൃഷ്ടിച്ചിരിക്കുന്നത്.
എന്നാല്‍, ഉദയസ്ഥാനങ്ങളുടെയും അസ്തമനസ്ഥാനങ്ങളുടെയും റബ്ബിനെക്കൊണ്ട് ഞാന്‍ സത്യം ചെയ്യുന്നു: നാം കഴിവുള്ളവര്‍ തന്നെയാണ്, തീര്‍ച്ച.
അവരെക്കാള്‍ ഉത്തമമായവരെ അവര്‍ക്ക് പകരം കൊണ്ടുവരാന്‍ നാം പരാജയപ്പെട്ടുപോകുന്നവരല്ലതന്നെ.
അതുകൊണ്ട് (നബിയേ,) അവരെ താങ്കള്‍ വിട്ടേക്കുക. അവര്‍ (ദുര്‍വൃത്തികളില്‍) മുഴുകിയും വിനോദിച്ചും കൊണ്ടിരിക്കട്ടെ; അവരോട് താക്കീത് ചെയ്യപ്പെടുന്ന ആ ദിവസം അവര്‍ കണ്ടുമുട്ടുന്നതുവരെ.
അതായത് ഖബ്‌റുകളില്‍ നിന്ന് ബദ്ധപ്പെട്ടവരായി അവര്‍ പുറത്തുവരുന്ന ദിവസം. അവര്‍ ഒരു നാട്ടക്കുറിയിലേക്ക് ധൃതിപ്പെട്ട് ഓടുന്നതുപോലെ.
അവരുടെ കണ്ണുകള്‍ താഴ്മ കാണിച്ചുകൊണ്ട്. അപമാനം അവരെ ആവരണം ചെയ്യുന്നതാണ്. അവരോട് താക്കീത് ചെയ്യപ്പെട്ടുകൊണ്ടിരുന്ന ദിവസം അതാകുന്നു.