സൂറത്ത് അൽ മുതഫ്ഫിഫീൻ (Al-Mutaffifin), ഖുർആൻ അധ്യായം 83 — അറബി ആയത്തുകളും മലയാളം വിവർത്തനവും ഉൾപ്പെടെ 36 ആയത്തുകൾ വായിക്കുക. Read Surah Al-Mutaffifin with Arabic text and മലയാളം translation.
(അളവിലും തൂക്കത്തിലും) കമ്മി വരുത്തുന്നവര്‍ക്കാണ് വമ്പിച്ച നാശം.
അതായത് അവര്‍ ജനങ്ങളോട് അളന്നു വാങ്ങുമ്പോള്‍ പൂര്‍ത്തിയാക്കി വാങ്ങുകയും,
അളന്നോ തൂക്കിയോ കൊടുക്കുമ്പോള്‍ കമ്മി വരുത്തുകയും ചെയ്യും.
തങ്ങള്‍ മരണാനന്തരം എഴുന്നേല്‍പിക്കപ്പെടുക തന്നെ ചെയ്യുമെന്നു അക്കൂട്ടര്‍ വിചാരിക്കുന്നില്ലേ?
ഗൗരവതരമായ ഒരു ദിവസത്തില്‍.
അതായത് ലോക രക്ഷിതാവിങ്കലേക്ക് ജനങ്ങള്‍ (ഖബ്‌റുകളില്‍ നിന്നു) എഴുന്നേറ്റു വരുന്ന ദിവസം!
വേണ്ട, നിശ്ചയമായും ദുര്‍മാര്‍ഗികളുടെ രേഖ സിജ്ജീനില്‍ തന്നെയാകുന്നു.
സിജ്ജീന്‍ എന്നാലെന്താണെന്ന് താങ്കള്‍ക്ക് അറിവു നല്‍കിയതെന്ത്?
എഴുതപ്പെട്ട ഒരു ഏടാണ്(അത്).
സത്യ നിഷേധികള്‍ക്കാണ് അന്നു വമ്പിച്ച നാശം.
പ്രതിഫലദാന ദിവസത്തെ വ്യാജമാക്കുന്നവരായ.
എല്ലാ അതിക്രമികളും മഹാപാപികളുമല്ലാതെ അതിനെ നിഷേധിക്കുകയില്ല തന്നെ.
നമ്മുടെ ആയത്തുകള്‍ അവന് ഓതിക്കേള്‍പ്പിക്കപ്പെട്ടാല്‍, ഇതു പൂര്‍വ്വികരുടെ പഴങ്കഥകളാണ് എന്നവന്‍ പറയും.
വേണ്ട, പക്ഷേ, അവര്‍ പ്രവര്‍ത്തിച്ചുകൊണ്ടിരിക്കുന്നതു അവരുടെ ഹൃദയങ്ങളില്‍ കറപിടിച്ചിരിക്കുന്നു.
വേണ്ടാ, നിശ്ചയമായും അന്നത്തെ ദിവസം അവര്‍ തങ്ങളുടെ റബ്ബില്‍ നിന്നു മറയിടപ്പെടുന്നവര്‍ തന്നെയായിരിക്കും.
അനന്തരം അവര്‍ നരകത്തില്‍ പ്രവേശിക്കുന്നവര്‍ തന്നെയാണ്, തീര്‍ച്ച.
പിന്നെ അവരോട് പറയപ്പെടും: നിങ്ങള്‍ നിഷേധിച്ചുകൊണ്ടിരുന്നത് ഇതാകുന്നു.
അത് (നിഷേധം) വേണ്ടാ, നിശ്ചയമായും പുണ്യവാന്‍മാരുടെ രേഖ ഇല്ലിയ്യീനില്‍ തന്നെയാകുന്നു.
ഇല്ലിയ്യൂന്‍ എന്താണെന്നു താങ്കള്‍ക്കു അറിവു നല്‍കിയതെന്ത്?
എഴുതപ്പെട്ട ഒരു ഏടാണ്.
അല്ലാഹുവിന്റെ സാമീപ്യം സിദ്ധിച്ചവര്‍ അതിന്റെ അടുത്ത് സന്നിഹിതരാകുന്നതാണ്.
നിശ്ചയമായും പുണ്യവാന്‍മാര്‍ സുഖാനുഗ്രഹങ്ങളില്‍ തന്നെയാകുന്നു.
അലംകൃത കട്ടിലുകളിലായി അവര്‍ നോക്കിക്കാണും.
അവരുടെ മുഖങ്ങളില്‍ സുഖാനുഭൂതിയുടെ തേജസ്സ് നീ കണ്ടറിയും.
സീല്‍ വെക്കപ്പെട്ട ശുദ്ധമായ കള്ളില്‍ നിന്നു അവര്‍ക്കു കുടിക്കാന്‍ നല്‍കപ്പെടുന്നതാണ്.
അതിന്റെ സീല്‍ കസ്തൂരിയായിരിക്കും. കിടമല്‍സരം നടത്തുന്നവര്‍ അതില്‍ കിടമത്സരം നടത്തിക്കൊള്ളട്ടെ.
അതിന്റെ ചേരുവ 'തസ്‌നീമി'ല്‍ നിന്നാണ്.
എന്നുവെച്ചാല്‍ ഒരു ഉറവു ജലം. അല്ലാഹുവിന്റെ സാമീപ്യം സിദ്ധിച്ചവര്‍ അതില്‍ നിന്നു കുടിക്കുന്നതാണ്.
നിശ്ചയമായും കുറ്റം ചെയ്തവര്‍ സത്യവിശ്വാസികളെക്കുറിച്ചു(പരിഹസിച്ചു)ചിരിച്ചുകൊണ്ടിരിക്കുന്നവരായിരുന്നു.
തങ്ങളുടെ അടുത്തുകൂടി സത്യവിശ്യാസികള്‍ നടന്നുപോകുമ്പോള്‍ അവര്‍ പരസ്പരം കണ്ണുകൊണ്ട് ഗോഷ്ടി കാട്ടുകയും ചെയ്തിരുന്നു.
തങ്ങളുടെ ബന്ധുക്കളിലേക്കു തിരിച്ചുചെല്ലുമ്പോള്‍ രസിച്ചുകൊണ്ടാണ് അവര്‍ മടങ്ങിച്ചെന്നിരിക്കുന്നത്.
ഇവര്‍ പിഴച്ചവര്‍ തന്നെയാണ് എന്നു സത്യവിശ്വാസികളെ കാണുമ്പോള്‍ അവര്‍ പറയുകയും ചെയ്തിരുന്നു.
സത്യവിശ്വാസികളുടെ മേല്‍നോട്ടം വഹിക്കുന്നവരായി അവര്‍ അയക്കപ്പെട്ടിട്ടില്ല.
എന്നാല്‍ അന്ന് (ഖിയാമ നാളില്‍) സത്യവിശ്വാസികള്‍ സത്യനിഷേധികളെക്കുറിച്ചു ചിരിക്കുന്നതാണ്.
അലംകൃത കട്ടിലുകളിലായി അവര്‍ (സത്യനിഷേധികളെ) നോക്കിക്കാണും.
സത്യനിഷേധികള്‍ക്ക് അവര്‍ ചെയ്തു കൊണ്ടിരിക്കുന്നതിന് പ്രതിഫലം നല്‍കപ്പെട്ടുവോ?