സൂറത്ത് അൽ വാഖിഅ (Al-Waqiah), ഖുർആൻ അധ്യായം 56 — അറബി ആയത്തുകളും മലയാളം വിവർത്തനവും ഉൾപ്പെടെ 96 ആയത്തുകൾ വായിക്കുക. Read Surah Al-Waqiah with Arabic text and മലയാളം translation.
ഖിയാമനാള്‍ സംഭവിച്ചാല്‍ (അതിഭയങ്കരം തന്നെ)!
അത് സംഭവിക്കുന്ന സമയം അതിനെ നിഷേധിക്കുന്ന ഒന്നുമുണ്ടായിരിക്കില്ല.
അത് (ചിലരെ) താഴ്ത്തുന്നതും (ചിലരെ) ഉയര്‍ത്തുന്നതുമാണ്.
അതായത് ഭൂമി കിടുകിടാ വിറപ്പിക്കപ്പെടുകയും,
പര്‍വതങ്ങള്‍ പൊടിച്ചുതരിപ്പണമാക്കപ്പെടുകയും,
അങ്ങനെ അത് ചിതറിയ ധൂളിയായിത്തീരുകയും,
നിങ്ങള്‍ മൂന്ന് വിഭാഗക്കാരായിത്തീരുകയും ചെയ്താല്‍...!
എന്നു വെച്ചാല്‍ (സൗഭാഗ്യത്തിന്റെ) വലതുപക്ഷക്കാര്‍. എന്താണ് ഈ വലതുപക്ഷക്കാര്‍? (അവരുടെ നില ആശ്ചര്യം തന്നെ).
(ദൗര്‍ഭാഗ്യത്തിന്റെ) ഇടതുപക്ഷക്കാരും; എന്താണ് ഈ ഇടതുപക്ഷക്കാര്‍? (അവരുടെ നിലയും ആശ്ചര്യം തന്നെ).
മുന്‍കടന്നവര്‍ മുന്‍കടന്നവര്‍ തന്നെയാകുന്നു!
അവര്‍ അല്ലാഹുവിന്റെ സാമീപ്യം സിദ്ധിച്ചവരാണ്.
സുഖാനുഭൂതിയുടെ സ്വര്‍ഗങ്ങളിലാണവര്‍.
പൂര്‍വികരില്‍ നിന്ന് ഒരു വലിയ വിഭാഗവും,
പിന്‍ഗാമികളില്‍ നിന്ന് ഒരു ചെറിയ വിഭാഗവും.
(സ്വര്‍ണനൂലുകളാല്‍) മെടഞ്ഞുണ്ടാക്കപ്പെട്ട കട്ടിലുകളില്‍ (അവര്‍ സുഖിക്കുന്നതാണ്).
അവയില്‍ അന്യോന്യം അഭിമുഖരായി ചാരിയിരിക്കുന്നവരായുംകൊണ്ട്.
സ്ഥിരവാസികളായ ബാലന്മാര്‍ (സേവനത്തിനായി) അവരില്‍ ചുറ്റി സഞ്ചരിച്ചുകൊണ്ടിരിക്കും.
ചില കോപ്പകളും കൂജകളും കള്ളിന്റെ പാനപാത്രവും കൊണ്ട്.
അവ മൂലം അവര്‍ക്ക് തലവേദനയുണ്ടാകുന്നതല്ല. ലഹരി ബാധിക്കുന്നതുമല്ല.
അവര്‍ തെരഞ്ഞെടുക്കുന്ന വര്‍ഗത്തില്‍ പെട്ട പഴങ്ങള്‍ കൊണ്ടും.
അവര്‍ ആഗ്രഹിക്കുന്ന തരത്തില്‍ പെട്ട പക്ഷിമാംസം കൊണ്ടും (ആ ബാലന്മാര്‍ ചുറ്റി സഞ്ചരിക്കുന്നതാണ്.)
വിശാലാക്ഷികളായ വെളുത്ത സുന്ദരികളുമുണ്ടായിരിക്കും.
ചിപ്പികളില്‍ ഒളിച്ചുസൂക്ഷിക്കപ്പെട്ട മുത്തു പോലെയിരിക്കും (അവര്‍).
അവര്‍ പ്രവര്‍ത്തിച്ചുകൊണ്ടിരുന്നതിന് പ്രതിഫലമായിട്ടാണ് (ഇതെല്ലാം നല്‍കപ്പെടുന്നത്).
അവര്‍ അവിടെ അനാവശ്യമോ കുറ്റകരമോ ആയ ഒന്നും കേള്‍ക്കുകയില്ല.
സലാം സലാം എന്ന വാക്കല്ലാതെ.
വലതുപക്ഷക്കാര്‍-എന്താണ് വലതുപക്ഷക്കാര്‍? (അവരുടെ നില സമുന്നതം തന്നെ!)
മുള്ളില്ലാത്ത ഇലന്തമരങ്ങളിലും,
പഴങ്ങള്‍ മേല്‍ക്കുമേല്‍ അട്ടിയാക്കപ്പെട്ട വാഴകളിലും,
വിശാലമായി നീണ്ടുകിടക്കുന്ന നിഴലുകളിലും,
ഒഴുകിക്കൊണ്ടിരിക്കുന്ന വെള്ളത്തിലും,
സമൃദ്ധിയായുള്ള പഴവര്‍ഗങ്ങളിലും,
(ഒരു കാലത്തും) അവസാനിപ്പിക്കപ്പെടാത്തതും തടയപ്പെടാത്തതുമായ (പഴങ്ങള്‍)
ഉയര്‍ന്ന തരം വിരിപ്പുകളിലും (ആയിരിക്കും അവര്‍ ജീവിക്കുക).
നിശ്ചയമായും ആ തരുണികളെ (ഒരു പ്രത്യേക നിലയില്‍) നാം സൃഷ്ടിച്ചിരിക്കുന്നു.
അങ്ങനെ അവരെ നാം കന്യകകളും,
ഭര്‍ത്താക്കളെ പ്രേമിക്കുന്നവരും തുല്യപ്രായക്കാരുമാക്കിയിരിക്കുന്നു.
(ഇതെല്ലാം) വലതുപക്ഷക്കാര്‍ക്കുള്ളതാണ്.
പൂര്‍വികരില്‍ നിന്ന് ഒരു വലിയ വിഭാഗവും
പിന്‍ഗാമികളില്‍ നിന്ന് ഒരു വലിയ വിഭാഗവുമായിരിക്കും (അവര്‍).
ഇടതുപക്ഷക്കാര്‍-എന്താണ് ഈ ഇടതുപക്ഷക്കാര്‍? (അവരുടെ നില വളരെ അപകടകരം തന്നെ!)
(രോമക്കുഴികളില്‍ കൂടി തുളച്ചുകയറുന്ന) കഠിന ചൂടുള്ള കാറ്റിലും ചുട്ടുതിളക്കുന്ന വെള്ളത്തിലും,
ഇരുണ്ട പുക കൊണ്ടുള്ള നിഴലിലും,
തണുപ്പുള്ളതോ സുഖപ്രദമോ അല്ലാത്ത (നിഴല്‍), (ആയിരിക്കും അവര്‍).
നിശ്ചയമായും അതിനു മുമ്പ് (ഇഹലോകത്തില്‍) അവര്‍ സുഖലോലുപന്മാരായിരുന്നു.
വമ്പിച്ച കുറ്റങ്ങളില്‍ അവര്‍ ഉറച്ചുനില്‍ക്കുന്നവരുമായിരുന്നു.
അവര്‍ പറയുകയും ചെയ്തിരുന്നു: ഞങ്ങള്‍ മരിക്കുകയും എന്നിട്ട് മണ്ണും എല്ലുകളുമായിട്ട് (പിന്നെ) ഞങ്ങള്‍ എഴുന്നേല്‍പിക്കപ്പെടുന്നവരാകുമോ?
ഞങ്ങളുടെ പൂര്‍വപിതാക്കളും (എഴുന്നേല്‍പിക്കപ്പെടുന്നവരാകുമോ?)
(നബിയേ,) താങ്കള്‍ പറയുക: നിശ്ചയമായും മുന്‍ഗാമികളും പിന്‍ഗാമികളും-,
ഒരു നിര്‍ണിത ദിവസമാകുന്ന സമയം അവരെല്ലാവരും ഒരുമിച്ചുകൂട്ടപ്പെടുന്നവര്‍ തന്നെയാകുന്നു.
(അത്രയുമല്ല) പിന്നീട്, സത്യനിഷേധികളായ വഴി പിഴച്ചവരേ,
നിങ്ങള്‍ സഖ്ഖൂം എന്ന ഒരു (തരം) വൃക്ഷത്തില്‍ നിന്ന് തിന്നുന്നവരായിരിക്കും, തീര്‍ച്ച.
അങ്ങനെ അതില്‍ നിന്ന് നിങ്ങള്‍ വയറു നിറക്കുന്നവരും,
എന്നിട്ട് അതിന്റെ മീതെ ചുട്ടുതിളക്കുന്ന വെള്ളത്തില്‍ നിന്ന് കുടിക്കുന്നവരുമായിരിക്കും.
ദാഹിച്ചുപൊരിഞ്ഞ ഒട്ടകം കുടിക്കുന്നതുപോലെ നിങ്ങള്‍ കുടിക്കുന്നവരായിരിക്കും.
ഇതാണ് പ്രതിഫലം നല്‍കുന്ന ദിവസം ഇടതുപക്ഷക്കാര്‍ക്ക് നല്‍കുന്ന സല്‍ക്കാരം!
നാമാണ് നിങ്ങളെ സൃഷ്ടിച്ചിരിക്കുന്നത്. അപ്പോള്‍ എന്തുകൊണ്ട് നിങ്ങള്‍ സത്യമാക്കുന്നില്ല?
(സ്ത്രീകളുടെ ഗര്‍ഭാശയങ്ങളില്‍) നിങ്ങള്‍ ചൊരിക്കുന്ന ഇന്ദ്രിയത്തെക്കുറിച്ച് നിങ്ങള്‍ ചിന്തിച്ചിട്ടുണ്ടോ?
നിങ്ങളാണോ അതിനെ (മനുഷ്യനായി) സൃഷ്ടിക്കുന്നത്, അതല്ല നാമാണോ സൃഷ്ടിക്കുന്നത്?
നിങ്ങള്‍ക്കിടയില്‍ മരണം നിശ്ചയിച്ചതും നാം തന്നെ. നാം ഒരിക്കലും പരാജിതരാവുകയില്ല;
നിങ്ങളെപ്പോലെയുള്ളവരെ പകരം കൊണ്ടുവരികയും നിങ്ങള്‍ക്കറിയാത്ത വിധത്തിലൂടെ നിങ്ങളെ (വളര്‍ത്തി) ഉണ്ടാക്കുകയും ചെയ്യുന്നതില്‍.
ഒന്നാമത്തെ സൃഷ്ടിപ്പിനെപ്പറ്റി നിങ്ങള്‍ക്കറിയുക തന്നെ ചെയ്യാം; എന്നിരിക്കെ നിങ്ങള്‍ എന്തുകൊണ്ട് ചിന്തിക്കുന്നില്ല?
എന്നാല്‍, നിങ്ങള്‍ വിളയിറക്കുന്നതിനെപ്പറ്റി നിങ്ങള്‍ ചിന്തിച്ചിട്ടുണ്ടോ?
നിങ്ങളാണോ അതിനെ മുളപ്പിച്ചു വളര്‍ത്തുന്നത്. അതല്ല, നാമാണോ അതിനെ മുളപ്പിച്ചു വളര്‍ത്തുന്നവര്‍?
നാം ഉദ്ദേശിക്കുന്ന പക്ഷം അതിനെ ഉണക്കി വൈക്കോലാക്കിക്കളയുകയും അപ്പോള്‍ നിങ്ങള്‍ ദുഃഖിച്ച് (ഇങ്ങനെ) പറയുകയും ചെയ്യുമായിരുന്നു:
നിശ്ചയമായും ഞങ്ങള്‍ (വിള നിഷ്ടപ്പെട്ട്) കടബാധിതരായല്ലോ.
മാത്രമല്ല, നാം (ആഹാരമാര്‍ഗം) തടയപ്പെട്ടവരായിരിക്കുന്നു.
നിങ്ങള്‍ കുടിക്കുന്ന വെള്ളത്തെപ്പറ്റി നിങ്ങള്‍ ചിന്തിച്ചിട്ടുണ്ടോ?
നിങ്ങളാണോ അത് മേഘത്തില്‍ നിന്ന് ഇറക്കിയത്? അതല്ല, നാമാണോ ഇറക്കിയവര്‍?
നാം ഉദ്ദേശിക്കുന്ന പക്ഷം അതിനെ നാം ഉപ്പുവെള്ളമാക്കുമായിരുന്നു. എന്നിരിക്കെ നിങ്ങള്‍ നന്ദി കാട്ടാത്തതെന്താണ്?
ഇനി നിങ്ങള്‍ (ഉരസി) കത്തിക്കുന്ന തീയിനെപ്പറ്റി നിങ്ങള്‍ ചിന്തിച്ചിട്ടുണ്ടോ?
അതിന്റെ മരം (സൃഷ്ടിച്ച്) ഉണ്ടാക്കിയത് നിങ്ങളാണോ, അതല്ല നാമാണോ ഉണ്ടാക്കിയവര്‍?
അതിനെ നാം ഒരു സ്മരണയും സഞ്ചാരികള്‍ക്ക് ഒരു ഉപകരണവും ആക്കിയിരിക്കുന്നു.
അതുകൊണ്ട് മഹാനായ റബ്ബിന്റെ നാമത്തിന്റെ പരിശുദ്ധിയെ താങ്കള്‍ പ്രകീര്‍ത്തിക്കുക.
എന്നാല്‍ നക്ഷത്രങ്ങള്‍ അസ്തമിക്കുന്ന സ്ഥാനങ്ങള്‍ കൊണ്ട് നിശ്ചയമായും ഞാന്‍ സത്യം ചെയ്തുപറയുന്നു,
അതൊരു മഹത്തായ സത്യം തന്നെയാണ്. നിങ്ങള്‍ ബോധമുള്ളവരാണെങ്കില്‍ (ഇതിന്റെ മഹത്ത്വം ഗ്രഹിക്കുമായിരുന്നു.)
ഇത് ആദരണീയമായ ഖുര്‍ആന്‍ ആകുന്നു'
സുരക്ഷിതമായ ഒരു ഗ്രന്ഥത്തിലാണ് (ഇത് സ്ഥിതി ചെയ്യുന്നത്).
ശുദ്ധിയാക്കപ്പെട്ടവരല്ലാതെ ഇതിനെ സ്പര്‍ശിക്കരുത്.
ഇത് ലോകരക്ഷിതാവിങ്കല്‍ നിന്ന് അവതരിച്ചതാണ്.
എന്നിരിക്കെ ഈ വാര്‍ത്തയാണോ നിങ്ങള്‍ (നിസ്സാരമാക്കി) നിഷേധിക്കുന്നത്?
നിങ്ങളുടെ ആഹാരത്തെ (അതിനുള്ള നന്ദിയെ) നിങ്ങള്‍ കള്ളം പറയലാക്കുന്നതും?
എന്നാല്‍ അത് (ജീവന്‍) തൊണ്ടക്കുഴിയില്‍ എത്തുമ്പോള്‍.
നിങ്ങളാവട്ടെ അന്നേരം നോക്കിനില്‍ക്കുന്നവരാകുന്നു.
നാമാവട്ടെ അവനോട് നിങ്ങളേക്കാള്‍ (അവന്റെ സ്ഥിതിഗതികള്‍ അറിയുന്നതില്‍) അടുത്തവനാണ്. പക്ഷേ, നിങ്ങള്‍ അത് അറിയുന്നില്ല.
എന്നാല്‍, നിങ്ങള്‍ പ്രതിഫലനടപടിക്ക് വിധേയരാക്കപ്പെടാത്തവരാണെങ്കില്‍,
എന്തുകൊണ്ട് ആ ജീവനെ (അതിന്റെ മുന്‍സ്ഥാനങ്ങളിലേക്ക്) നിങ്ങള്‍ മടക്കുന്നില്ല? (മരണാനന്തര ജീവിതം നിഷേധിക്കുന്നതില്‍) നിങ്ങള്‍ സത്യവാദികളാണെങ്കില്‍!
അപ്പോള്‍ അവന് (മരണപ്പെടുന്നവന്‍ അല്ലാഹുവിന്റെ) സാമീപ്യം സിദ്ധിച്ചവരില്‍ പെട്ടവനാണെങ്കില്‍
അവന് ആശ്വാസവും വിശിഷ്ട ആഹാരവും സുഖാനുഭൂതിയുടെ സ്വര്‍ഗവുമാണ് ലഭിക്കുക.
ഇനി അവന് വലതുപക്ഷക്കാരില്‍ പെട്ടവനാണെങ്കിലോ,
നീ വലതുപക്ഷക്കാരനായതുകൊണ്ട് നിനക്ക് സമാധാനം (എന്ന് അവനോട് പറയപ്പെടും).
ഇനി അവന് ദുര്‍മാര്‍ഗികളായ കള്ളവാദികളില്‍ പെട്ടവനായിരുന്നെങ്കിലോ,
എന്നാല്‍ ചുട്ടുതിളക്കുന്ന വെള്ളം കൊണ്ടുള്ള സല്‍ക്കാരവും,
ജ്വലിക്കുന്ന നരകത്തിന്റെ കരിക്കലും (ആയിരിക്കും അവന് ലഭിക്കുക).
നിശ്ചയമായും ഇതെല്ലാം ഉറപ്പായ സത്യം തന്നെയാണ്.
അതുകൊണ്ട് താങ്കളുടെ മഹാനായ റബ്ബിന്റെ നാമത്തിന്റെ പരിശുദ്ധിയെ പ്രകീര്‍ത്തിക്കുക.