അർ റഹ്മാൻ - الرحمن - Ar-Rahman

കരുണാനിധി (അറ്റമില്ലാത്ത കരുണയുള്ള അല്ലാഹു).

അവന്‍ ഖുര്‍ആന്‍ പഠിപ്പിച്ചു.

അവന്‍ മനുഷ്യരെ സൃഷ്ടിച്ചു;

അവന് വിവരണം (ഉച്ചാരണം) പഠിപ്പിച്ചു.

സൂര്യനും ചന്ദ്രനും ഒരു നിശ്ചിത കണക്കനുസരിച്ചാകുന്നു (നിലകൊള്ളുന്നത്).

വള്ളികളും വൃക്ഷങ്ങളും (അല്ലാഹുവിന്റെ നിയമങ്ങള്‍ക്ക് മുമ്പില്‍) സുജൂദ് ചെയ്യുന്നു.

ആകാശത്തെ അവന്‍ ഉയര്‍ത്തി. അവന്‍ നീതി സ്ഥാപിക്കുകയും ചെയ്തിരിക്കുന്നു.

നിങ്ങള്‍ തുലാസില്‍ (തൂക്കത്തില്‍) ക്രമം തെറ്റാതിരിക്കുവാന്‍ വേണ്ടി.

നിങ്ങള്‍ നീതിയനുസരിച്ച് തൂക്കം നില നിറുത്തുക; തൂക്കം കമ്മി വരുത്തരുത്.

സൃഷ്ടികള്‍ക്കുവേണ്ടി അവന്‍ ഭൂമിയെ സ്ഥാപിച്ചിരിക്കുന്നു.

അതില്‍ പഴവര്‍ഗങ്ങളും കൂമ്പാളകളുള്ള ഈത്തപ്പനകളുമുണ്ട്.

വൈക്കോലുള്ള ധാന്യവര്‍ഗവും സുഗന്ധച്ചെടികളുമുണ്ട്.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

കലം പോലെ മുട്ടിയാല്‍ ശബ്ദിക്കുന്ന ഉണങ്ങിയ കളിമണ്ണിനാല്‍ മനുഷ്യനെ അവന്‍ സൃഷ്ടിച്ചിരിക്കുന്നു.

ജിന്നുകളെ അഗ്നിയില്‍ നിന്നുള്ള (പുക കലരാത്ത) ജ്വാലയാലും അവന്‍ സൃഷ്ടിച്ചു.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

രണ്ട് ഉദയസ്ഥാനങ്ങളുടെ നാഥനും രണ്ട് അസ്തമനസ്ഥാനങ്ങളുടെ നാഥനുമാണ് (അവന്‍).

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

രണ്ട് സമുദ്രങ്ങളെ, അവ പരസ്പരം കൂട്ടിമുട്ടുന്ന വിധം അവന്‍ അയച്ചുവിട്ടിരിക്കുന്നു.

അവ രണ്ടിനുമിടയില്‍ ഒരു മറയുണ്ട്. (തന്നിമിത്തം) അവ തമ്മില്‍ അതിക്രമിക്കുന്നില്ല.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടില്‍ നിന്നും മുത്തും പവിഴവും പുറത്തുവരുന്നു.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

മലകളെപ്പോലെ പൊക്കിയുണ്ടാക്കപ്പെട്ട സമുദ്രങ്ങളില്‍ സഞ്ചരിക്കുന്ന കപ്പലുകളും അവനുള്ളതാകുന്നു.

അപ്പോള്‍ നിങ്ങള്‍ രണ്ടു കൂട്ടരും നിങ്ങളുടെ രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിഷേധിക്കുന്നത്?

അതില്‍ (ഭൂമിയില്‍) ഉള്ളതെല്ലാം നശിച്ചുപോകുന്നതാണ്.

മഹാനും ഉദാരനുമായ താങ്കളുടെ രക്ഷിതാവ് ശേഷിക്കുകയും ചെയ്യും.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ആകാശഭൂമികളിലുള്ളവരെല്ലാം അവനോട് യാചിക്കുന്നു. എല്ലാ ദിവസവും അവന്‍ ഓരോ കാര്യത്തിലാണ്.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ഹേ (കനത്ത) രണ്ട് സമൂഹമേ, നിങ്ങളെ അടുത്ത് നാം വിചാരണ ചെയ്യുന്നതാണ്.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ജിന്നുകളുടെയും മനുഷ്യരുടെയും സമൂഹമേ, ആകാശഭൂമികളുടെ മേഖലകളില്‍ നിന്ന് പുറത്തുപോകുവാന്‍ നിങ്ങള്‍ക്ക് സാധ്യമാകുന്ന പക്ഷം പുറത്തുപോവുക. വമ്പിച്ച ശക്തി കൂടാതെ നിങ്ങള്‍ പുറത്തുപോകുന്നതല്ല.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

നിങ്ങള്‍ ഇരുവിഭാഗത്തിന്റെയും നേരെ തീജ്വാലയും പുകയും അയക്കപ്പെടുന്നതാണ്. അപ്പോള്‍ അത് ചെറുത്തുനില്‍ക്കുവാന്‍ നിങ്ങള്‍ക്ക് കഴിയുന്നതല്ല.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ആകാശം പൊട്ടിപ്പിളരുകയും അത് പനിനീര്‍ (അഥവാ ചെമപ്പ്) വര്‍ണമുള്ളതും എണ്ണ പോലെയും ആയിത്തീരുകയും ചെയ്താല്‍ (അതെന്തൊരു ഭയങ്കരാവസ്ഥയായിരിക്കും?)

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അന്നത്തെ ദിവസം ഒരു മനുഷ്യനോടാവട്ടെ ജിന്നിനോടാവട്ടെ തന്റെ കുറ്റത്തെക്കുറിച്ച് ചോദിക്കപ്പെടുകയില്ല.

അപ്പോള്‍ നിങ്ങള്‍ ഇരുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

കുറ്റവാളികള്‍ അവരുടെ അടയാളങ്ങള്‍ മുഖേന അറിയപ്പെടുന്നതായിരിക്കും. അപ്പോള്‍ അവരുടെ നെറുന്തലകളും പാദങ്ങളും (കൂട്ടി) പിടിക്കപ്പെടുന്നതായിരിക്കും.

അപ്പോള്‍ നിങ്ങള്‍ ഇരുവിഭാഗത്തിന്റെയും റബ്ബിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

കുറ്റവാളികള്‍ നിഷേധിച്ചുകൊണ്ടിരുന്ന നരകമിതാണ് എന്ന് അവരോട് പറയപ്പെടും.

അതിന്റെയും ചൂടേറിയ ചുട്ടുതിളക്കുന്ന വെള്ളത്തിന്റെയും ഇടയില്‍ അവര്‍ ചുറ്റിത്തിരിയുന്നതാകുന്നു.

അപ്പോള്‍ നിങ്ങള്‍ രണ്ടു കൂട്ടരുടെയും നാഥന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

തന്റെ രക്ഷിതാവിന്റെ സ്ഥാനത്തെ (അഥവാ അവന്റെ സന്നിധിയില്‍ നില്‍ക്കുന്നതിനെ) ഭയപ്പെട്ടവന് രണ്ട് സ്വര്‍ഗത്തോപ്പുകളുണ്ട്.

അപ്പോള്‍ നിങ്ങള്‍ രണ്ട് കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

പല വകുപ്പുകളുള്ളതായ രണ്ടെണ്ണം.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടിലും ഒഴുകിക്കൊണ്ടിരിക്കുന്ന രണ്ട് അരുവികളുണ്ട്.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടിലും എല്ലാ പഴവര്‍ഗങ്ങളില്‍ നിന്നും ഇണകളുണ്ട്.

അപ്പോള്‍ നിങ്ങള്‍ രണ്ടുകൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ഉള്‍ഭാഗം തടിച്ച പട്ടുകൊണ്ടുള്ള വിരിപ്പുകളില്‍ അവര്‍ കിടക്കുന്നവരായുംകൊണ്ട് (സുഖം കൊള്ളും). രണ്ട് തോപ്പുകളിലെയും പഴങ്ങള്‍ (വേഗം പറിച്ചെടുക്കത്തക്കവണ്ണം) താഴ്ന്നു നില്‍ക്കുന്നതായിരിക്കും.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവയില്‍ കണ്ണുകളെ (നോട്ടത്തെ) നിയന്ത്രിക്കുന്ന തരുണികളുണ്ട്. ഇവര്‍ക്കുമുമ്പ് അവരെ ഒരു മനുഷ്യനോ ജിന്നോ സ്പര്‍ശിച്ചിട്ടില്ല.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ആ തരുണികള്‍ മാണിക്യം പോലെയും പവിഴം പോലെയുമിരിക്കുന്നതാണ്.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

നന്മ ചെയ്തതിന്റെ പ്രതിഫലം നന്മ ചെയ്തുകൊടുക്കല്‍ അല്ലാതെ മറ്റെന്താണ്?

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടിനു പുറമെ (വേറെയും) രണ്ട് സ്വര്‍ഗത്തോപ്പുകളുണ്ട്.

അപ്പോള്‍ നിങ്ങള്‍ ഇരുകൂട്ടരുടെയും റബ്ബിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

കടുംപച്ചയായ രണ്ടെണ്ണം.

പ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടിലും മന്ദമായി ഒഴുകുന്ന രണ്ട് അരുവികളുണ്ട്.

അപ്പോള്‍ നിങ്ങള്‍ രണ്ടുകൂട്ടരുടെയും റബ്ബിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവ രണ്ടിലും പഴവര്‍ഗങ്ങളും ഈത്തപ്പനയും ഉറുമാന്‍ പഴവുമുണ്ട്.

അപ്പോള്‍ നിങ്ങള്‍ രണ്ടുകൂട്ടരുടെയും നാഥന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അവയില്‍ സുന്ദരികളായ ഉല്‍കൃഷ്ട സ്ത്രീകളുണ്ട്.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

അതായത് കൂടാരങ്ങളില്‍ നിയന്ത്രിക്കപ്പെട്ട വെളുത്ത സുന്ദരികള്‍!

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

ഇവര്‍ക്കുമുമ്പ് ഒരു മനുഷ്യനോ ജിന്നോ അവരെ സ്പര്‍ശിച്ചിട്ടില്ല.

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

പച്ചത്തലയണകളിലും അഴകേറിയ പരവതാനികളിലും ചാരി ഇരിക്കുന്നവരായുംകൊണ്ട് (അവര്‍ സുഖം കൊള്ളും).

അപ്പോള്‍ നിങ്ങള്‍ രണ്ടു കൂട്ടരുടെയും രക്ഷിതാവിന്റെ അനുഗ്രഹങ്ങളില്‍ ഏതൊന്നിനെയാണ് നിങ്ങള്‍ നിഷേധിക്കുന്നത്?

മഹത്ത്വവും ആദരവുമുള്ള താങ്കളുടെ രക്ഷിതാവിന്റെ നാമം വളരെ മേന്മയേറിയതുതന്നെ.(18)