അശ്ശുഅറാഅ് - الشعراء - Ash-Shuara

ഥാ സീന്‍ മീം

മഹത്തായ ഈ അധ്യായത്തിലെ വാക്യങ്ങള്‍ സുവ്യക്തമായ ഖുര്‍ആനിലെ സൂക്തങ്ങളാകുന്നു.

അവര്‍ സത്യവിശ്വാസികളാകാത്തതിനാല്‍ സ്വന്തം ജീവനെ താങ്കള്‍ അപകടപ്പെടുത്തുന്നത്‌ ഭയപ്പെട്ടുകൊള്ളുക!

നാം ഉദ്ദേശിക്കുന്നപക്ഷം ആകാശത്തുനിന്ന്‌ ഒരു ദൃഷ്ടാന്തം അവര്‍ക്കു നാം ഇറക്കുകയും അങ്ങനെ അവരുടെ പിരടികള്‍ അതിന്ന്‌ കീഴൊതുങ്ങുകയും ചെയ്യും. (പക്ഷേ, അത്‌ നാം ഉദ്ദേശിക്കുന്നില്ല.)

കരുണാനിധിയായ അല്ലാഹുവിങ്കല്‍ നിന്നു പുതുതായി ഏതൊരു സന്ദേശം വന്നുകിട്ടുമ്പോഴും അവരതിനെ അഗണ്യമാക്കി തിരിഞ്ഞുകളയുന്നവരാവുക തന്നെയാണ്‌.

അങ്ങനെ അവരതു നിഷേധിച്ചു. എന്നാല്‍ ഏതൊന്നിനെ അവര്‍ പരിസഹിച്ചുകൊണ്ടിരിക്കുന്നുവോ അതിന്റെ പ്രത്യാഘാതം അവര്‍ക്കു വന്നുകൊള്ളും.

അവര്‍ ഭൂമിയിലേക്കു നോക്കുന്നില്ലേ? എല്ലാ തരം ഉല്‍കൃഷ്ടമായ ഇണകളില്‍ നിന്നും എത്രയെത്ര വസ്‌തുക്കളെയാണ്‌ നാം അതില്‍ മുളപ്പിച്ചിട്ടുള്ളതെന്ന്‌.

തീര്‍ച്ചയായും അതില്‍ വമ്പിച്ച ദൃഷ്ടാന്തമുണ്ട്‌. പക്ഷേ, അവരില്‍ അധികമാളുകളും സത്യവിശ്വാസികളാകുന്നില്ല.

നിശ്ചയമായും താങ്കളുടെ രക്ഷിതാവ്‌ തന്നെയാണ്‌ പ്രതാപവാനും പരമകാരുണികനും.

(നബിയേ,) താങ്കളുടെ രക്ഷിതാവ് മൂസാനബിയോട് വിളിച്ചുപറഞ്ഞ സന്ദര്‍ഭം (ഓര്‍ക്കുക); നിങ്ങള്‍ അക്രമികളായ ആ ജനതയുടെ അടുത്ത് ചെല്ലുക.

(അതായത്) ഫിര്‍ഔന്റെ ജനതയുടെ (അടുക്കല്‍). അവര്‍ അല്ലാഹുവിനെ ഭയപ്പെടുന്നില്ലേ (എന്ന് ചോദിക്കുകയും ചെയ്യുക).

അദ്ദേഹം പറഞ്ഞു: എന്റെ രക്ഷിതാവേ, തീര്‍ച്ചയായും അവരെന്നെ നിഷേധിക്കുമെന്ന്‌ ഞാന്‍ ഭയപ്പെടുന്നുണ്ട്‌.

എന്റെ ഹൃദയം ഇടുങ്ങിപ്പോകും; എനിക്കു സംസാരവൈഭവം ഉണ്ടാവുകയുമില്ല. അതുകൊണ്ട്‌ ഹാറൂന്റെ അടുക്കലേക്ക്‌ നീ (ദൂതനെ) അയച്ചാലും.

മാത്രമല്ല എന്റെ മേല്‍ അവര്‍ക്കൊരു കുറ്റവും ആരോപിക്കാനുണ്ട്‌. അതിനാല്‍ അവരെന്നെ കൊല്ലുമെന്നു ഞാന്‍ ഭയപ്പെടുന്നു.

. അല്ലാഹു പറഞ്ഞു: `അതൊരിക്കലും ഉണ്ടാവില്ല.അതുകൊണ്ട്‌ നിങ്ങള്‍ രണ്ടുപേരും നമ്മുടെ ദൃഷ്ടാന്തങ്ങളുമായി പോയിക്കൊള്ളുക. നിശ്ചയമായും നാം നിങ്ങളോടൊപ്പമുണ്ട്‌; സംഭവിക്കുന്നതെല്ലാം ശരിക്ക്‌ കേള്‍ക്കുന്നതുമാണ്‌'.

`അങ്ങനെ നിങ്ങള്‍ രണ്ടുപേരും ഫിര്‍ഔന്റെ അടുത്തുചെല്ലണം. എന്നിട്ട്‌ ഞങ്ങള്‍ ഓരോരുത്തരും ലോകരക്ഷിതാവിന്റെ ദൂതനാണെന്ന്‌ പറയുക.

ഇസ്രാഈല്യരെ ഞങ്ങളോടൊപ്പം നീ വിട്ടയച്ചുതരണം (എന്നതാണ്‌ ഞങ്ങളുടെ ദൗത്യം എന്നും പറയണം)'.

ഫിര്‍ഔന്‍ പറഞ്ഞു: `നീ ശിശുവായിരുന്നപ്പോള്‍ ഞങ്ങളോടു കൂടെ നിന്നെ ഞങ്ങള്‍ താമസിപ്പിച്ചു പോറ്റിവളര്‍ത്തുകയും നിന്റെ വയസ്സില്‍ കുറേ കൊല്ലങ്ങള്‍ നീ ഞങ്ങളൊന്നിച്ചു താമസിക്കുകയും ചെയ്‌തില്ലേ?

(എന്നിട്ട്‌) നീ ചെയ്‌തതൊക്കെ നീ ചെയ്‌തു. നന്ദിയില്ലാത്തവരില്‍ പെട്ടവനാണ്‌ നീ'.

മൂസാനബി പറഞ്ഞു: ഞാന്‍ അന്നത്‌ ചെയ്‌തു. എനിക്ക്‌ അല്ലാഹു പിന്നീട്‌ നല്‍കിയ വിജ്ഞാനം ലഭിക്കാത്തവരില്‍ പെട്ടവനായിരുന്നു ഞാന്‍.

അങ്ങനെ നിങ്ങളെ ഭയപ്പെട്ടപ്പോള്‍ നിങ്ങളില്‍ നിന്ന്‌ ഞാന്‍ ഓടിപ്പോയി. അപ്പോള്‍ എന്റെ രക്ഷിതാവ്‌ എനിക്ക്‌ വിജ്ഞാനം പ്രദാനം ചെയ്യുകയും എന്നെ മുര്‍സലുകളില്‍ ഉള്‍പെടുത്തുകയും ചെയ്‌തു.

ആ പോറ്റിവളര്‍ത്തല്‍ ഇസ്രാഈല്യരെ നീ അടിമകളാക്കി വെച്ചതിനാല്‍ എന്റെ മേല്‍ എടുത്തു പറയുന്ന ഒരു അനുഗ്രഹമാണ്‌.

ഫിര്‍ഔന്‍ ചോദിച്ചു: ലോകരക്ഷിതാവ്‌ എന്ന്‌ പറയുന്നത്‌ എന്താണ്‌?

അദ്ദേഹം പറഞ്ഞു: ആകാശഭൂമികളുടെയും അവക്കിടയിലുള്ള അഖില വസ്‌തുക്കളുടെയും രക്ഷിതാവാണ്‌; നിങ്ങള്‍ ദൃഢവിശ്വാസമുള്ളവരാണെങ്കില്‍!

അവന്‍ തന്റെ ചുറ്റുമുള്ള പ്രധാനികളോട്‌ ചോദിച്ചു: ഇവന്‍ പറയുന്നത്‌ നിങ്ങള്‍ ശരിക്ക്‌ കേള്‍ക്കുന്നില്ലേ?

അദ്ദേഹം പ്രസ്‌താവിച്ചു: നിങ്ങളുടെ രക്ഷിതാവും നിങ്ങളുടെ പൂര്‍വപിതാക്കളുടെ രക്ഷിതാവും തന്നെ.

അവന്‍ ജനങ്ങളോട്‌ പറഞ്ഞു: നിങ്ങളുടെ അടുത്തേക്കയക്കപ്പെട്ട ദൂതന്‍ നിശ്ചയമായും ഒരു ഭ്രാന്തന്‍ തന്നെയാണ്‌.

അദ്ദേഹം പ്രതിവചിച്ചു: അവന്‍ ഉദയസ്ഥാനത്തിന്റെയും അസ്‌തമയസ്ഥാനത്തിന്റെയും അവക്കിടയിലുള്ളതിന്റെയും രക്ഷിതാവാണ്‌; നിങ്ങള്‍ ബുദ്ധിയുള്ളവരാണെങ്കില്‍.

അവന്‍ പറഞ്ഞു: ഞാനല്ലാത്തൊരു ഇലാഹിനെ നീ സ്വീകരിച്ചാല്‍ നിശ്ചയമായും നിന്നെ ഞാന്‍ തടവുകാരുടെ കൂട്ടത്തിലാക്കും.

അദ്ദേഹം ചോദിച്ചു: നിനക്ക്‌ ഞാന്‍ വ്യക്തമായ ഒരു ദൃഷ്ടാന്തം കൊണ്ടുവന്നാലും (നീ സമ്മതിക്കുകയില്ലേ?)

അവന്‍ പറഞ്ഞു: എന്നാല്‍ അതുകൊണ്ടുവന്നാട്ടെ. നീ സത്യവാദികളില്‍ പെട്ടവനാണെങ്കില്‍.

അപ്പോള്‍ അദ്ദേഹം തന്റെ വടി നിലത്തിട്ടു. അപ്പോഴതാ അതൊരു സ്‌പഷ്ടമായ സര്‍പ്പമായിരിക്കുന്നു!

അദ്ദേഹം തന്റെ കൈ (കക്ഷത്തുനിന്നു) പുറത്തെടുത്തു. അപ്പോഴതാ, നോക്കുന്നവര്‍ക്ക്‌ അത്‌ പ്രകാശമുള്ളതായിരിക്കുന്നു!

തന്റെ ചുറ്റുമുണ്ടായിരുന്ന പ്രധാനികളോട്‌ ഫിര്‍ഔന്‍ പറഞ്ഞു: നിശ്ചയമായും ഇവന്‍ വള രെ വിദഗ്‌ദനായ ഒരു ജാലവിദ്യക്കാരനാണ്‌.

തന്റെ ജാലവിദ്യകൊണ്ട്‌ നാട്ടില്‍ നിന്ന്‌ നിങ്ങളെ പുറത്താക്കുവാനാണ്‌ അവനുദ്ദേശിക്കുന്നത്‌. അതുകൊണ്ട്‌ അവന്റെ കാര്യത്തില്‍ നിങ്ങളെന്തു നിര്‍ദ്ദേശിക്കുന്നു?

അവര്‍ പ്രതികരിച്ചു: അവന്നും അവന്റെ സഹോദരന്നും അങ്ങുന്ന്‌ ഇടകൊടുക്കുക. എന്നിട്ട്‌ അങ്ങയുടെ അധികാരത്തില്‍ പെട്ട എല്ലാ നാടുകളിലേക്കും (ജാലവിദ്യക്കാരെ) ശേഖരിച്ചുകൊണ്ടുവരുന്ന ആളുകളെ പറഞ്ഞയക്കുക;

എന്നാല്‍ അവര്‍ നിപുണന്മാരായ എല്ലാ ജാലവിദ്യക്കാരെയും അങ്ങയുടെ അടുക്കല്‍ കൊണ്ടുവരുന്നതാണ്‌.

അങ്ങനെ അറിയപ്പെട്ട ഒരു ദിവസം നിശ്ചിത സമയത്തേക്ക്‌ ജാലവിദ്യക്കാരെല്ലാം ഒരുമിച്ചുകൂട്ടപ്പെട്ടു.

നിങ്ങള്‍ സമ്മേളിക്കുന്നുണ്ടോ എന്ന്‌ പൊതുജനങ്ങളോട്‌ (രാജകീയ വിളംബരംമൂലം) ചോദിക്കപ്പെട്ടു.

ജാലവിദ്യക്കാര്‍ തന്നെയാണ്‌ വിജയികളാകുന്നതെങ്കില്‍ നമുക്കവരെ പിന്‍പറ്റാമല്ലോ (എന്നും അവരോട്‌ പറയപ്പെട്ടു).

അങ്ങനെ ജാലവിദ്യക്കാര്‍ വന്നപ്പോള്‍ അവര്‍ ഫിര്‍ഔനോട്‌ ചോദിച്ചു: ഞങ്ങള്‍ തന്നെയാണ്‌ വിജയികളാകുന്നതെങ്കില്‍ നിശ്ചയമായും ഞങ്ങള്‍ക്ക്‌ പ്രതിഫലമുണ്ടാകുമോ?

ഫിര്‍ഔന്‍ പറഞ്ഞു: അതെ; മാത്രമല്ല, അന്നേരം നിങ്ങള്‍ നമ്മുടെ സന്നിധിയില്‍ സാമീപ്യം സിദ്ധിച്ചവരില്‍ പെട്ടവരുമായിരിക്കും.

മൂസാനബി അവരോട്‌ നിര്‍ദ്ദേശിച്ചു: നിങ്ങള്‍ക്ക്‌ ഇടുവാനുള്ളത്‌ ഇട്ടുകൊള്ളുക.

അപ്പോള്‍ അവര്‍ തങ്ങളുടെ കയറുകളും വടികളും താഴെയിടുകയും ഇങ്ങനെ പറയുകയും ചെയ്‌തു: ഫിര്‍ഔന്റെ അന്തസ്സ്‌ കൊണ്ട്‌ സത്യം, നിശ്ചയമായും ഞങ്ങള്‍ തന്നെയാണ്‌ വിജയികളാവുക.

അങ്ങനെ മൂസാനബിയും തന്റെ വടി നിലത്തിട്ടു. അപ്പോഴതാ അവര്‍ പകിട്ടാക്കിക്കാണിച്ചിരുന്നതിനെയെല്ലാം അത്‌ വിഴുങ്ങിക്കളയുന്നു!

ഉടനെ ജാലവിദ്യക്കാര്‍ സുജൂദ്‌ ചെയ്യുന്നവരായി നിലംപതിച്ചു.

അവര്‍ പറഞ്ഞു: ലോക രക്ഷിതാവില്‍ ഞങ്ങള്‍ ഇതാ വിശ്വസിച്ചിരിക്കുന്നു.

മൂസാനബിയുടെയും ഹാറൂന്‍ നബിയുടെയും രക്ഷിതാവില്‍.

ഫിര്‍ഔന്‍ ആക്രോശിച്ചു: ഞാന്‍ സമ്മതം നല്‍കുന്നതിന്നു മുമ്പ്‌ നിങ്ങള്‍ അവനെ വിശ്വസിച്ചുവോ? നിശ്ചയമായും അവന്‍ നിങ്ങള്‍ ക്കു ജാലവിദ്യ പഠിപ്പിച്ചുതന്ന വലിയ ഗുരുവാണ്‌. അതിനാല്‍ ഇതിന്റെ ഫലം നിങ്ങളിതാ മനസ്സിലാക്കാന്‍ പോകയാണ്‌. നിശ്ചയമായും നിങ്ങളുടെ കൈകളും കാലുകളും വ്യത്യസ്‌ത നിലയില്‍ ഞാന്‍ മുറിച്ചുകളയും. നിങ്ങള്‍ എല്ലാവരെയും ഞാന്‍ ക്രൂശിക്കുകയും ചെയ്യുന്നതാണ്‌.

അവര്‍ പറഞ്ഞു: വിരോധമൊന്നുമില്ല. നിശ്ചയമായും ഞങ്ങളുടെ രക്ഷിതാവിങ്കലേക്ക്‌ ഞങ്ങള്‍ മടങ്ങിച്ചെല്ലുന്നവരാകുന്നു.

ഞങ്ങള്‍ (ഫിര്‍ഔന്റെ അനുയായികളില്‍) ആദ്യത്തെ സത്യവിശ്വാസികളായതുകൊണ്ട്‌ ഞങ്ങളുടെ തെറ്റുകള്‍ രക്ഷിതാവ്‌ പൊറുത്തുതരുമെന്നു നിശ്ചയമായും ഞങ്ങളാശിക്കുന്നു.

എന്റെ അടിമകളെയും കൊണ്ട്‌ താങ്കള്‍ രാത്രി പോയിക്കൊള്ളുക; നിശ്ചയമായും (ഫിര്‍ഔനും കൂട്ടരും) നിങ്ങളെ പിന്തുടരുന്നതാണ്‌ എന്ന്‌ മൂസാനബിക്ക്‌ നാം സന്ദേശം നല്‍കി.

അപ്പോള്‍ (അവര്‍ പോയ വിവരം അറിഞ്ഞ്‌) ഫിര്‍ഔന്‍ സൈന്യങ്ങളെ ശേഖരിക്കുന്നവരെ പട്ടണങ്ങളില്‍ അയച്ചു. (അവര്‍ ഇങ്ങനെ പ്രചാരണം നടത്തി:)

നിശ്ചയമായും ഇവര്‍(ഇസ്രാഈല്യര്‍) കുറഞ്ഞ ആളുകളുള്ള ഒരു സംഘവും,

നമ്മെ അരിശം കൊള്ളിച്ചവരും,

നാം ജാഗരൂകരായ ഒരു സംഘവുമാണ്.

അങ്ങനെ അവരെ ചില തോപ്പുകളില്‍ നിന്നും അരുവികളില്‍ നിന്നും നാം പുറത്താക്കി.

ഭണ്ഡാരങ്ങളില്‍ നിന്നും മേത്തരം സ്ഥാനങ്ങളില്‍ നിന്നും (നാം പുറത്താക്കി).

അപ്രകാരമാണ്‌ (നമ്മുടെ പ്രവൃത്തി). എന്നിട്ട്‌ ഇസ്രാഈല്യര്‍ക്ക്‌ അതിനെ നാം അനന്തരാവകാശമായി നല്‍കുകയും ചെയ്‌തു.

എന്നിട്ട്‌ ഫിര്‍ഔനും സൈന്യവും സൂര്യോദയ സമയത്തായികൊണ്ട്‌ ഇസ്രാഈല്യരുടെ അടുത്ത്‌ എത്തിച്ചേര്‍ന്നു.

അങ്ങനെ ഇരുസംഘവും പരസ്‌പരം കണ്ടപ്പോള്‍ മൂസാനബിയുടെ കൂട്ടുകാര്‍ പറഞ്ഞു: നിശ്ചയമായും നാം പിടിക്കപ്പെടുന്നവര്‍ തന്നെയാണല്ലോ.

അദ്ദേഹം(മൂസാനബി) പറഞ്ഞു: ഇല്ല; എന്റെ രക്ഷിതാവ്‌ എന്റെ കൂടെത്തന്നെയുണ്ട്‌. അവന്‍ എനിക്ക്‌ മാര്‍ഗദര്‍ശനം ചെയ്യും.

തല്‍സമയം, `താങ്കളുടെ വടികൊണ്ട്‌ സമുദ്രത്തില്‍ അടിക്കുക' എന്ന്‌ മൂസാനബിക്ക്‌ നാം സന്ദേശം നല്‍കി. (അദ്ദേഹം അടിച്ചു). അപ്പോഴത്‌ പിളര്‍ന്നു. എന്നിട്ട്‌ ഓരോ പിളര്‍പ്പും വലിയ പര്‍വതം പോലെയായി.

അവിടേക്ക്‌ മറ്റേകൂട്ടരെ (ഫിര്‍ഔനെയും കൂട്ടുകാരെയും) നാം അടുപ്പിച്ചു.

മൂസാനബിയെയും അദ്ദേഹത്തോടൊപ്പമുള്ള മുഴുവന്‍ പേരെയും നാം രക്ഷപ്പെടുത്തുകയും ചെയ്‌തു.

പിന്നെ മറ്റേകൂട്ടരെ നാം വെള്ളത്തില്‍ മുക്കി നശിപ്പിച്ചു.

നിശ്ചയമായും അതില്‍ ഒരു വലിയ ദൃഷ്ടാന്തമുണ്ട്‌. പക്ഷേ അവരില്‍ അധികമാളുകളും വിശ്വസിക്കുന്നവരായിട്ടില്ല.

താങ്കളുടെ രക്ഷിതാവ്‌ തന്നെയാണ്‌ പ്രതാപവാനും പരമകാരുണികനും, തീര്‍ച്ച.

ഇബ്രാഹീം നബിയുടെ ചരിത്രം അവര്‍ക്കു താങ്കള്‍ ഓതിക്കേള്‍പ്പിക്കുക.

അതായത്‌ തന്റെ പിതാവിനോടും ജനതയോടും, `നിങ്ങള്‍ എന്തിനെയാണ്‌ ആരാധിക്കുന്നത്‌' എന്നദ്ദേഹം ചോദിച്ച സന്ദര്‍ഭം.

അവര്‍ പറഞ്ഞു: ഞങ്ങള്‍ ബിംബങ്ങളെയാണ്‌ ആരാധിക്കുന്നത്‌; അവക്കു മുമ്പില്‍ എപ്പോഴും ഭജനമിരിക്കയും ചെയ്യുന്നുണ്ട്‌.

അദ്ദേഹം ചോദിച്ചു: നിങ്ങള്‍ വിളിക്കുമ്പോള്‍ അവ വിളികേള്‍ക്കുന്നുണ്ടോ?

വല്ല ഉപകാരമോ ഉപദ്രവമോ നിങ്ങള്‍ക്കവ ഉണ്ടാക്കുകയോ ചെയ്യുന്നുണ്ടോ?

അവര്‍ മറുപടി നല്‍കി: അതൊന്നുമില്ല; പക്ഷെ ഞങ്ങളുടെ പിതാക്കള്‍ അപ്രകാരം ചെയ്യുന്നതായി ഞങ്ങള്‍ കണ്ടു. (അവരെ ഞങ്ങള്‍ പിന്‍പറ്റുകയും ചെയ്‌തു എന്നുമാത്രം.)

അദ്ദേഹം ചോദിച്ചു: എന്നാല്‍ നിങ്ങള്‍ ആരാധിച്ചു വരുന്ന വസ്തുക്കളെ നിങ്ങള്‍ കണ്ടുമനസ്സിലാക്കിയോ?

76. നിങ്ങളും പൂര്‍വപിതാക്കളും (ആരാധിച്ച് വരുന്ന).

അവര്‍ എനിക്ക്‌ ശത്രുക്കള്‍ തന്നെയാണ്‌; പക്ഷേ, ലോകരക്ഷിതാവ്‌ അങ്ങനെയല്ല.

അവന്‍ എന്നെ സൃഷ്ടിക്കുകയും എന്നിട്ട്‌ എന്നെ നേര്‍വഴിയിലാക്കുകയും ചെയ്‌തിരിക്കുന്നു.

അവന്‍ എനിക്ക് ആഹാരവും പാനീയവും നല്‍കുകയും,

രോഗം ബാധിച്ചാല്‍ സുഖപ്പെടുത്തുകയും,

എന്നെ മരണപ്പെടുത്തുകയും അനന്തരം ജീവിപ്പിക്കുകയും ചെയ്യുന്നു.

പ്രതിഫലം നല്‍കുന്ന ദിവസം(അന്ത്യനാളില്‍) അവന്‍ എന്റെ പാപം പൊറുത്തുതരുമെന്ന്‌ ഞാനാശിക്കുകയും ചെയ്യുന്നു. (ഇങ്ങനെയെല്ലാമുള്ളവനാണ്‌ ലോകരക്ഷിതാവ്‌. അതുകൊണ്ട്‌ അവനെ ഞാന്‍ സ്‌നേഹിക്കുകയും ആരാധിക്കുകയും ചെയ്യുന്നു.)

എന്റെ രക്ഷിതാവേ, എനിക്ക്‌ നീ വിജ്ഞാനം പ്രദാനം ചെയ്യുകയും എന്നെ സജ്ജനങ്ങളോട്‌ ചേര്‍ത്തി തരികയും ചെയ്യേണമേ!

എനിക്ക് നീ പിന്‍തലമുറകളില്‍ സല്‍കീര്‍ത്തി ഉണ്ടാക്കിത്തരികയും,

അനുഗ്രഹങ്ങള്‍ നിറഞ്ഞ സ്വര്‍ഗം അനന്തരാവകാശമെടുക്കുന്നവരില്‍ എന്നെ നീ ഉള്‍പെടുത്തുകയും ചെയ്യേണമേ!

എന്റെ പിതാവിന്ന്‌ പൊറുത്തു കൊടുക്കേണമേ! നിശ്ചയമായും അദ്ദേഹം വഴിതെറ്റിയവരില്‍ പെട്ടുപോയിരിക്കുകയാണ്‌.

ജനങ്ങള്‍ ഉയിര്‍ത്തെഴുന്നേല്‍പിക്കപ്പെടുന്ന ദിവസം എന്നെ നീ അപമാനത്തിലാക്കരുതേ!

ധനവും സന്താനങ്ങളും ഉപകരിക്കാത്ത നാള്‍,

എല്ലാവിധ മാലിന്യങ്ങളില്‍ നിന്നും ശുദ്ധമായ ഹൃദയത്തോടുകൂടി അല്ലാഹുവിങ്കല്‍ ചെല്ലുന്നവര്‍ ഒഴികെ. (അവര്‍ക്കത്‌ ഉപകരിക്കും.)

(ആ ദിവസം) ദോഷബാധയെ സൂക്ഷിച്ചവര്‍ക്ക് സ്വര്‍ഗം അടുപ്പിക്കപ്പെടുകയും,

വഴിപിഴച്ചവര്‍ക്ക് നരകം വെളിവാക്കപ്പെടുകയും ചെയ്യും.

അവരോട് ചോദിക്കപ്പെടും: അല്ലാഹുവിന്നു പുറമെ നിങ്ങള്‍ ഇബാദത്ത് ചെയ്തുവന്നിരുന്നവ എവിടെ?

അവര്‍ നിങ്ങളെ സഹായിക്കുന്നുണ്ടോ അതോ സ്വന്തം കാര്യത്തില്‍ സഹായം തേടുന്നുണ്ടോ?

അങ്ങനെ ആ ആരാധ്യവസ്തുക്കളെയും അവരെ ആരാധിച്ചു വഴിതെറ്റിയവരെയും നരകത്തില്‍ മുഖം കുത്തി തള്ളിയിടപ്പെടും.

ഇബ്‌ലീസിന്റെ സൈന്യങ്ങളെ മുഴുവനും (നരകത്തില്‍ മുഖം കുത്തി തള്ളിയിടപ്പെടും)

അതില്‍ വഴക്കടിച്ചുകൊണ്ട്‌ ആരാധകര്‍ ആരാധ്യരോടു പറയും:

അല്ലാഹു തന്നെ സത്യം, നിശ്ചയമായും ഞങ്ങള്‍ പ്രത്യക്ഷമായ ദുര്‍മാര്‍ഗത്തിലായിരിക്കുന്നു;

സര്‍വലോക രക്ഷിതാവിനോട്‌ തുല്യമായ സ്ഥാനം നിങ്ങള്‍ക്ക്‌ ഞങ്ങള്‍ കല്‍പിച്ചപ്പോള്‍.

ആ കുറ്റവാളികള്‍ തന്നെയാണ്‌ ഞങ്ങളെ വഴിപിഴപ്പിച്ചത്‌.

ഞങ്ങള്‍ക്കിപ്പോള്‍ ഒരു ശുപാര്‍ശക്കാരനുമില്ല.

അനുകമ്പയുള്ള ചങ്ങാതിയുമില്ല.

ഇനി ഞങ്ങള്‍ക്ക്‌ (ഇഹലോകത്തേക്ക്‌) ഒരു മടക്കം കിട്ടിയിരുന്നെങ്കില്‍ എത്ര നന്നായിരുന്നേനെ! എന്നാല്‍ ഞങ്ങള്‍ സത്യവിശ്വാസികളില്‍ ഉള്‍പെടുമായിരുന്നു.

നിശ്ചയമായും ഈ പറഞ്ഞതില്‍ വലിയ ദൃഷ്ടാന്തമുണ്ട്‌. പക്ഷേ, അവരില്‍ അധികപേരും വിശ്വസിക്കുന്നവരായിട്ടില്ല.

നിശ്ചയമായും താങ്കളുടെ രക്ഷിതാവ്‌ പ്രതാപവാനും പരമകാരുണികനും തന്നെയാകുന്നു.

നൂഹ്‌നബിയുടെ ജനത മുര്‍സലുകളെ നിഷേധിച്ചു.

നിങ്ങള്‍ അല്ലാഹുവിനെ സൂക്ഷിക്കുന്നില്ലേ എന്ന്‌ തങ്ങളുടെ സഹോദരന്‍ നൂഹ്‌ അവരോട്‌ ചോദിച്ച സന്ദര്‍ഭത്തില്‍.

`നിശ്ചയമായും ഞാന്‍ നിങ്ങളുടെ അടുത്തേക്ക്‌ വന്ന വിശ്വസ്‌തനായ ഒരു റസൂലാണ്‌' (എന്നദ്ദേഹം പറഞ്ഞു).

`അതുകൊണ്ട്‌ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

അതിന്റെ പേരില്‍ ഞാന്‍ നിങ്ങളോട്‌ യാതൊരു പ്രതിഫലവും ആവശ്യപ്പെടുന്നില്ല. എനിക്കുള്ള പ്രതിഫലം ലോകരക്ഷിതാവായ അല്ലാഹുവിന്റെ മേല്‍ മാത്രമാണ്‌.

അതുകൊണ്ട്‌ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക'.

അവര്‍ ചോദിച്ചു: ഈ നിസ്സാരന്മാരായ ആളുകള്‍ നിന്നെ പിന്തുടര്‍ന്നിരിക്കെ ഞങ്ങള്‍ നിന്നെ വിശ്വസിക്കുകയോ?

അദ്ദേഹം പറഞ്ഞു: അവരുടെ പ്രവൃത്തിയെ പ്പറ്റി എനിക്കെന്തറിവാണുള്ളത്‌?

`അവരെ വിചാരണ ചെയ്യുവാനുള്ള ഉത്തരവാദിത്വം എന്റെ രക്ഷിതാവിന്നു മാത്രമാണ്‌. നിങ്ങള്‍ കാര്യബോധമുള്ളവരായിരുന്നുവെങ്കില്‍!

`ഞാന്‍ സത്യവിശ്വാസികളെ ആട്ടിക്കളയുന്നവനല്ല തന്നെ.

`ഞാന്‍ പ്രത്യക്ഷമായ ഒരു താക്കീതുകാരന്‍ മാത്രമാണ്‌'.

അവര്‍ പറഞ്ഞു: നൂഹേ, ഇതില്‍ നിന്ന്‌ വിരമിക്കുന്നില്ലെങ്കില്‍ നീ എറിഞ്ഞുകൊല്ലപ്പെടുന്നവരില്‍ ഉള്‍പെട്ടവനായിത്തീരും.

അദ്ദേഹം പറഞ്ഞു: `എന്റെ രക്ഷിതാവേ, നിശ്ചയമായും എന്റെ ജനത എന്നെ നിഷേധിച്ചുകളഞ്ഞിരിക്കുന്നു.'

`അതുകൊണ്ട്‌ എനിക്കും അവര്‍ക്കുമിടയില്‍ നീ വ്യക്തമായ ഒരു വിധി നല്‍കുകയും എന്നെയും എന്റെയൊന്നിച്ചുള്ള സത്യവിശ്വാസികളെയും നീ രക്ഷപ്പെടുത്തുകയും ചെയ്യേണമേ!

അപ്പോള്‍ അദ്ദേഹത്തെയും കൂടെയുള്ളവരെയും നിറക്കപ്പെട്ട കപ്പലില്‍ നാം രക്ഷപ്പെടുത്തി.

പിന്നെ ബാക്കിയുള്ളവരെ അതിനുശേഷം നാം വെള്ളത്തില്‍ മുക്കിക്കൊല്ലുകയും ചെയ്‌തു.

നിശ്ചയമായും അതില്‍ ഒരു വലിയ ദൃഷ്ടാന്തമുണ്ട്‌. പക്ഷേ അവരില്‍ അധികമാളുകളും വിശ്വസിക്കുന്നവരായിട്ടില്ല.

നിശ്ചയമായും താങ്കളുടെ രക്ഷിതാവ്‌ പ്രതാപവാനും പരമകാരുണികനും തന്നെയാകുന്നു.

ആദ്‌ ഗോത്രം മുര്‍സലുകളെ നിഷേധിച്ചു.

തങ്ങളുടെ സഹോദരന്‍ ഹൂദ്‌നബി അവരോട്‌ പറഞ്ഞ സന്ദര്‍ഭത്തില്‍: നിങ്ങള്‍ അല്ലാഹുവിനെ സൂക്ഷിക്കുന്നില്ലേ?

നിശ്ചയമായും ഞാന്‍ നിങ്ങളുടെ അടുക്കലേക്കുവന്ന വിശ്വസ്‌തനായ ഒരു റസൂലാണ്‌.

`അതുകൊണ്ട്‌ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക

അതിന്റെ പേരില്‍ നിങ്ങളോട്‌ യാതൊരു പ്രതിഫലവും ഞാന്‍ ആവശ്യപ്പെടുന്നില്ല. എനിക്കുള്ള പ്രതിഫലം ലോകരക്ഷിതാവായ അല്ലാഹുവിങ്കല്‍ മാത്രമാണ്‌.

നിങ്ങള്‍ വിനോദിക്കുന്നവരായിക്കൊണ്ട്‌ എല്ലാ കുന്നുകളിലും അടയാളം (ആയി കെട്ടിടം) നിര്‍മിച്ചു വരികയാണോ?

`നിങ്ങളിവിടെ നിത്യവാസികളായി തീര്‍ന്നേക്കുമെന്ന ഭാവേന പ്രബലമന്ദിരങ്ങള്‍ ഉണ്ടാക്കുകയുമാണോ?

`നിങ്ങള്‍ വല്ലവരെയും ഊക്കോടെ പിടികൂടുകയാണെങ്കില്‍ നിഷ്‌ഠുരന്മാരായി പിടികൂടുകയും ചെയ്യുന്നു.

`ആകയാല്‍ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

`നിങ്ങള്‍ക്കറിയാവുന്ന അനുഗ്രഹങ്ങള്‍ ചെയ്‌തുതന്നുകൊണ്ട്‌ നിങ്ങളെ സഹായിച്ച അല്ലാഹുവിനെ സൂക്ഷിച്ചുകൊള്ളുക.

നാല്‍കാലികളെയും സന്താനങ്ങളെയും നല്‍കിക്കൊണ്ട് നിങ്ങളെ അവന്‍ സഹായിച്ചു.

തോട്ടങ്ങളും നദികളും (നല്‍കിക്കൊണ്ടും നിങ്ങളെ അവന്‍ സഹായിച്ചു.)

`നിശ്ചയമായും ഒരു വമ്പിച്ച ദിവസത്തിലെ ശിക്ഷ നിങ്ങളുടെ മേല്‍ ഞാന്‍ ഭയപ്പെടുകയാണ്‌.

അവര്‍ പറഞ്ഞു: ഹൂദേ, നീ സദുപദേശം ചെയ്യലും സദുപദേശം ചെയ്യുന്നവരില്‍ പെടാതിരിക്കലും ഞങ്ങള്‍ക്ക്‌ സമമാണ്‌.

`ഇത്‌ പൂര്‍വികന്മാരുടെ നടപടി സമ്പ്രദായം മാത്രമാകുന്നു.

`ഞങ്ങള്‍ (മരണാനന്തരം) ശിക്ഷിക്കപ്പെടുന്നവരല്ല തന്നെ.'

അങ്ങനെ അവരദ്ദേഹത്തെ നിഷേധിച്ചു. അപ്പോള്‍ അവരെ നാം നശിപ്പിച്ചു. നിശ്ചയമായും അതില്‍ വലിയ ദൃഷ്ടാന്തമുണ്ട്‌. പക്ഷേ, അവരില്‍ അധികമാളുകളും വിശ്വസിക്കുന്നവരായിട്ടില്ല.

നിശ്ചയമായും താങ്കളുടെ രക്ഷിതാവ്‌ പ്രതാപവാനും പരമകാരുണികനും തന്നെയാകുന്നു.

സമൂദ്‌ സമുദായം മുര്‍സലുകളെ നിഷേധിച്ചു.

താങ്കളുടെ സഹോദരന്‍ സ്വാലിഹ്‌ നബി അവരോട്‌ പറഞ്ഞപ്പോള്‍-`നിങ്ങള്‍ അല്ലാഹുവിനെ സൂക്ഷിക്കുന്നില്ലേ?

`നിശ്ചയമായും ഞാന്‍ നിങ്ങള്‍ക്ക്‌ വിശ്വസ്‌തനായ റസൂലാണ്‌.

അതുകൊണ്ട്‌ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

അതിന്റെ പേരില്‍ നിങ്ങളോട്‌ ഞാന്‍ യാതൊരു പ്രതിഫലവും ചോദിക്കുന്നില്ല; എനിക്കുള്ള പ്രതിഫലം ലോകരക്ഷിതാവായ അല്ലാഹുവിന്റെ മേല്‍ മാത്രമാണ്‌.

ഇവിടെയുള്ള ഭൗതിക സുഖങ്ങളില്‍ നിങ്ങള്‍ നിര്‍ഭയരായിക്കൊണ്ട്‌ വിട്ടേക്കപ്പെടുമോ?

അതായത്‌, തോട്ടങ്ങളിലും നദികളിലും വയലുകളിലും പഴങ്ങളുടെ ഭാരത്താല്‍ കുല തൂങ്ങിനില്‍ക്കുന്ന ഈത്തപ്പന(ത്തോട്ട)ങ്ങളിലും.

അമിതാഹ്ലാദഭരിതരായി മലകള്‍ തുരന്നുനിങ്ങള്‍ വീടുകളുണ്ടാക്കുകയും ചെയ്യുന്നു.

ആകയാല്‍ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

ആകയാല്‍ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

അതിക്രമികളുടെ കല്‍പന നിങ്ങള്‍ അനുസരിക്കരുത്.

ഭൂമിയില്‍ കുഴപ്പമുണ്ടാക്കുകയും നന്മയുണ്ടാക്കാതിരിക്കുകയും ചെയ്യുന്നവരായ.

അവര്‍ പറഞ്ഞു: `നീ മാരണബാധിതരില്‍ പെട്ടവന്‍ തന്നെയാകുന്നു.

നീ ഞങ്ങളെപ്പോലെയുള്ള ഒരു മനുഷ്യന്‍ തന്നെയാണ്‌. അതുകൊണ്ട്‌ സത്യവാദികളില്‍ പെട്ടവനാണെങ്കില്‍ ഒരു ദൃഷ്ടാന്തം നീ കൊണ്ടുവരണം.

അദ്ദേഹം പറഞ്ഞു: ഇതാ ദൃഷ്ടാന്തമായ ഒട്ടകം. ഒരു നിശ്ചിത ദിവസത്തെ ജലപാനം അതിനും ഒരു നിശ്ചിത ദിവസത്തെ ജലപാനം നിങ്ങള്‍ക്കുമാണ്‌.

`ഒരു വിധ തിന്മകൊണ്ടും നിങ്ങള്‍ അതിനെ തൊട്ടുപോകരുത്‌. തൊട്ടാല്‍ ഒരു വലിയ ആപല്‍കരമായ ശിക്ഷ നിങ്ങളെ പിടികൂടുന്നതാണ്‌.

എന്നാല്‍ അവരതിനെ അറുത്തുകളഞ്ഞു. എന്നിട്ടവര്‍ ഖേദിച്ചു.

അപ്പോള്‍ ശിക്ഷ അവരെ പിടികൂടി. നിശ്ചയമായും അതില്‍ വലിയ ദൃഷ്ടാന്തമുണ്ട്‌. പക്ഷേ, അവരില്‍ അധികമാളുകളും വിശ്വസിക്കുന്നവരായില്ല.

താങ്കളുടെ രക്ഷിതാവ്‌ പ്രതാപവാനും പരമകാരുണികനും തന്നെയാണ്‌, തീര്‍ച്ച.

ലൂഥ് നബിയുടെ ജനത മുര്‍സലുകളെ നിഷേധിച്ചു.

തങ്ങളുടെ സഹോദരന്‍ ലൂഥ് അവരോട് പറഞ്ഞപ്പോള്‍: 'നിങ്ങള്‍ അല്ലാഹുവിനെ സൂക്ഷിക്കുന്നില്ലേ?

നിശ്ചയമായും ഞാന്‍ നിങ്ങള്‍ക്ക് വിശ്വസ്തനായ റസൂലാകുന്നു.

അതുകൊണ്ട് നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

അതിന്റെ പേരില്‍ യാതൊരു പ്രതിഫലവും നിങ്ങളോട്‌ ഞാന്‍ ആവശ്യപ്പെടുന്നില്ല. എനിക്കുള്ള പ്രതിഫലം ലോകരക്ഷിതാവായ അല്ലാഹുവിന്റെ മേല്‍ മാത്രമാണ്‌.

ലോകജനതയില്‍ നിങ്ങള്‍ മാത്രം (കാമനിര്‍വൃതിക്കായി) പുരുഷന്മാരുടെ അടുക്കല്‍ ചെല്ലുകയും,

രക്ഷിതാവ് നിങ്ങള്‍ക്കായി സൃഷ്ടിച്ചുതന്ന ഇണകളെ വിട്ടുകളയുകയുമാണോ?എന്നാല്‍ നിങ്ങള്‍ അതിക്രമികളായ ഒരു ജനത തന്നെയാണ്.'

അവര്‍ പറഞ്ഞു: `ഓ ലൂഥ്‌, നീ ഇതില്‍ നിന്ന്‌ വിരമിക്കാത്ത പക്ഷം നിശ്ചയമായും നീ പുറത്താക്കപ്പെടുന്നവരില്‍ പെട്ടുപോകും'.

അദ്ദേഹം പറഞ്ഞു: `നിശ്ചയമായും ഞാന്‍ നിങ്ങളുടെ ഈ പ്രവൃത്തിയോട്‌ കഠിനകോപമുള്ളവരില്‍ പെട്ടവനാണ്‌.'

`എന്റെ രക്ഷിതാവേ, എന്നെയും എന്റെ സ്വന്തക്കാരെയും ഇവരുടെ പ്രവര്‍ത്തനങ്ങളില്‍ നിന്ന്‌ നീ രക്ഷിക്കേണമേ!'

അപ്പോള്‍ അദ്ദേഹത്തെയും തന്റെ സ്വന്തക്കാരെയുമെല്ലാം നാം രക്ഷപ്പെടുത്തി;

ഒരു വൃദ്ധസ്‌ത്രീ ഒഴികെ. അവള്‍ ബാക്കിയുള്ളവരില്‍ പെട്ടവളായിരുന്നു.

പിന്നെ മറ്റുള്ളവരെ നാം നിശ്ശേഷം നശിപ്പിച്ചുകളഞ്ഞു.

അവരുടെ മീതെ നാം ഒരു പ്രത്യേകതരം മഴ വര്‍ഷിപ്പിച്ചു. മുന്നറിയിപ്പ്‌ നല്‍കപ്പെട്ടവര്‍ക്ക്‌ കിട്ടിയ മഴ വളരെ ചീത്ത!

നിശ്ചയമായും അതില്‍ വലിയ ദൃഷ്ടാന്തമുണ്ട്‌. പക്ഷേ അവരില്‍ അധികമാളുകളും വിശ്വസിക്കുന്നവരായില്ല.

നിശ്ചയമായും താങ്കളുടെ രക്ഷിതാവ്‌ പ്രതാപവാനും പരമകാരുണികനുമാണ്‌.

ഐക്കത്തുകാര്‍ മുര്‍സലുകളെ നിഷേധിച്ചു.

അവരോട്‌ ശുഐബ്‌ നബി പറഞ്ഞ സന്ദര്‍ഭത്തില്‍: നിങ്ങള്‍ അല്ലാഹുവിനെ സൂക്ഷിക്കുന്നില്ലേ?

നിശ്ചയമായും ഞാന്‍ നിങ്ങള്‍ക്ക്‌ വിശ്വസ്‌തനായ റസൂലാണ്‌.

അതുകൊണ്ട്‌ നിങ്ങള്‍ അല്ലാഹുവിനെ സൂക്ഷിക്കുകയും എന്നെ അനുസരിക്കുകയും ചെയ്യുക.

അതിന്റെ പേരില്‍ യാതൊരു പ്രതിഫലവും നിങ്ങളോട്‌ ഞാന്‍ ചോദിക്കുന്നില്ല. എനിക്കുള്ള പ്രതിഫലം ലോകരക്ഷിതാവായ അല്ലാഹുവിന്റെ മേല്‍ മാത്രമാണ്‌.

നിങ്ങള്‍ അളവ് പൂര്‍ത്തിയാക്കിക്കൊടുക്കുക; അതില്‍ കമ്മിവരുത്തുന്നവരില്‍ പെട്ടുപോകരുത്;

നിങ്ങള്‍ ശരിയായ തുലാസ് കൊണ്ട് തൂക്കുകയും ചെയ്യുക.

നിങ്ങള്‍ ജനങ്ങള്‍ക്ക്‌ അവരുടെ സാധനങ്ങള്‍ നഷ്ടപ്പെടുത്തുകയും നാട്ടില്‍ നാശം ചെയ്യുന്നവരായിക്കൊണ്ട്‌ കുഴപ്പമുണ്ടാക്കുകയുമരുത്‌.

നിങ്ങളെയും പൂര്‍വജനങ്ങളെയും സൃഷ്ടിച്ച അല്ലാഹുവിനെ നിങ്ങള്‍ സൂക്ഷിക്കുകയും ചെയ്യുക.

അവര്‍ പറഞ്ഞു: നിശ്ചയമായും നീ മാരണബാധിതരില്‍ പെട്ടവന്‍ തന്നെയാകുന്നു.

നീ ഞങ്ങളെ പോലെയുള്ള ഒരു മനുഷ്യന്‍ മാത്രമാണ്‌. നിശ്ചയമായും നീ അസത്യവാദികളില്‍ പെട്ടവന്‍ തന്നെയാണെന്നാണ്‌ ഞങ്ങള്‍ ധരിക്കുന്നത്‌.

`അതുകൊണ്ട്‌ നീ സത്യവാദികളില്‍ പെട്ടവനാണെങ്കില്‍ ആകാശത്തുനിന്ന്‌ ചില കഷ്‌ണങ്ങള്‍ ഞങ്ങളുടെ മേല്‍ വീഴ്‌ത്തുക.'

അദ്ദേഹം പറഞ്ഞു: നിങ്ങളുടെ പ്രവര്‍ത്തനങ്ങളെ പറ്റി എന്റെ രക്ഷിതാവ്‌ നല്ലവണ്ണം അറിയുന്നവനാകുന്നു. (അവന്‍ യുക്തമായത്‌ പ്രവര്‍ത്തിക്കും.)

അങ്ങനെ അവര്‍ അദ്ദേഹത്തെ നിഷേധിച്ചു. അതിനാല്‍ മേഘത്തണലിന്റെ ദിവസത്തെ ശിക്ഷ അവരെ പിടികൂടി. നിശ്ചയമായും അത്‌ വമ്പിച്ച ആപല്‍കരമായ ഒരു ദിവസത്തിലെ ശിക്ഷയായിരുന്നു.

നിശ്ചയമായും അതില്‍ വലിയ ദൃഷ്ടാന്തമുണ്ട്‌. പക്ഷേ, അവരില്‍ അധികമാളുകളും വിശ്വസിക്കുന്നവരായില്ല.

താങ്കളുടെ രക്ഷിതാവ്‌ പ്രതാപവാനും പരമകാരുണികനുമാണ്‌, തീര്‍ച്ച.

നിശ്ചയമായും ഖുര്‍ആന്‍ ലോകരക്ഷിതാവായ അല്ലാഹു അവതരിപ്പിച്ചത്‌ തന്നെയാണ്‌.

ജിബ്‌രീല്എന്ന മലക്കാണ് അത്‌കൊണ്ട് താങ്കളുടെ ഹൃദയത്തില്‍ ഇറക്കിയത്.

താക്കീതു നല്‍കുന്നവരുടെ കൂട്ടത്തില്‍ താങ്കള്‍ ആയിരിക്കേണ്ടതിനുവേണ്ടി.

സ്‌പഷ്ടമായ അറബി ഭാഷയിലാണ്‌ (ഇത്‌ അവതരിപ്പിച്ചിട്ടുള്ളത്‌).

നിശ്ചയമായും ഈ ഖുര്‍ആന്‍ പൂര്‍വികരുടെ വേദഗ്രന്ഥങ്ങളിലുള്ളതാണ്‌.

ഇസ്രാഈല്യരിലുള്ള പണ്ഡിതന്മാര്‍ക്ക്‌ ഇതിനെ സംബന്ധിച്ച്‌ അറിയാമെന്നത്‌ ഇവര്‍ക്ക്‌ (സത്യനിഷേധികള്‍ക്ക്‌) ഒരു ലക്ഷ്യമാകുന്നില്ലേ?

198. അനറബികളില്‍ ആര്‍ക്കെങ്കിലും ഈ ഖുര്‍ആനെ നാം അവതരിപ്പിക്കുകയും,

199. എന്നിട്ട് അദ്ദേഹമിത് ഇക്കൂട്ടര്‍ക്ക് ഓതിക്കേള്‍പിച്ച് കൊടുക്കുകയും ചെയ്തിരുന്നെങ്കിലും അവരതില്‍ വിശ്വസിക്കുന്നവരാകുകയില്ല.

അപ്രകാരം ആ കുറ്റവാളികളുടെ ഹൃദയങ്ങളില്‍ നാം സത്യനിഷേധത്തെ കടത്തി.

വേദനാജനകമായ ശിക്ഷ കാണുന്നത്‌ വരെ അവര്‍ ഖുര്‍ആനില്‍ വിശ്വസിക്കുകയില്ല.

അവര്‍ ഓര്‍ക്കാത്തനിലയില്‍ പെട്ടെന്നാണ്‌ ആ ശിക്ഷ വന്നെത്തുക-

അപ്പോള്‍ `ഞങ്ങള്‍ കുറച്ചു താമസം നല്‍കപ്പെടുന്നവരാകുമോ' എന്ന്‌ അവര്‍ ചോദിക്കും.

എന്നിട്ട്‌ (അങ്ങനെയുള്ള) നമ്മുടെ ശിക്ഷയെക്കുറിച്ചാണോ അവര്‍ ധൃതികൂട്ടിക്കൊണ്ടിരിക്കുന്നത്‌?

താങ്കള്‍ ചിന്തിച്ചു നോക്കുക: അവര്‍ക്ക് നാം കുറേ കൊല്ലം ക്ഷേമൈശ്വര്യം നല്‍കുകയും,

തദനന്തരം, താക്കീതു നല്‍കപ്പെട്ടിരുന്ന ശിക്ഷ അവര്‍ക്കു വന്നെത്തുകയും ചെയ്താല്‍,

തങ്ങള്‍ക്ക് നല്‍കപ്പെട്ടിരുന്ന ക്ഷേമൈശ്വര്യങ്ങള്‍ (ആ ശിക്ഷ തടഞ്ഞു നിറുത്തുന്നതില്‍) അവര്‍ക്കു വല്ല പ്രയോജനവും ചെയ്യുമോ? (ഒന്നും തന്നെ ചെയ്യുകയില്ല.)

താക്കീതു നല്‍കുന്നവരെ (പ്രവാചകന്മാരെ) അയക്കാതെ ഒരു നാടിനെയും നാം നശിപ്പിച്ചിട്ടില്ല.

അവരെ ഓര്‍മപ്പെടുത്തുവാനായിട്ടാണ്‌ (അങ്ങനെ താക്കീതു നല്‍കുന്നവരെ നാം അയക്കുന്നത്‌). അക്രമം ചെയ്യുന്ന സമ്പ്രദായം നമുക്കില്ല.

ഈ ഖുര്‍ആനുമായി പിശാചുക്കള്‍ ഇറങ്ങിയിട്ടില്ല;

അതവര്‍ക്ക് യോജിച്ചതുമല്ല; അവര്‍ക്കതിന് കഴിവുമില്ല.

നിശ്ചയമായും അവര്‍ അത്‌ കേള്‍ക്കുന്നതില്‍ നിന്ന്‌ അകറ്റപ്പെട്ടവര്‍ തന്നെയാണ്‌.

അതുകൊണ്ട്‌ അല്ലാഹുവിനോടുകൂടെ മറ്റൊരു ഇലാഹിന്നു താങ്കള്‍ ആരാധന ചെയ്യരുത്‌. എങ്കില്‍ ശിക്ഷിക്കപ്പെടുന്നവരുടെ കൂട്ടത്തില്‍ താങ്കള്‍ പെട്ടുപോകും.

അടുത്ത ബന്ധുക്കള്‍ക്ക്‌ താങ്കള്‍ ശിക്ഷയെക്കുറിച്ച്‌ മുന്നറിയിപ്പ്‌ നല്‍കുക.

താങ്കളെ പിന്തുടര്‍ന്ന സത്യവിശ്വാസികളോട്‌ വളരെ സൗമ്യമായി പെരുമാറുകയും ചെയ്യുക.

ഇനി അവര്‍ താങ്കളോട്‌ അനുസരണക്കേട്‌ കാണിക്കുകയാണെങ്കില്‍, നിങ്ങള്‍ പ്രവര്‍ത്തിക്കുന്നതിനെപറ്റി നിശ്ചയമായും ഞാന്‍ നിരുത്തരവാദിയാകുന്നു എന്ന്‌ താങ്കള്‍ പറഞ്ഞേക്കണം.

പ്രതാപവാനും പരമകാരുണികനുമായ അല്ലാഹുവിങ്കലേക്ക്‌ താങ്കള്‍ (സര്‍വവും) ഭരമേല്‍പിക്കുക.

താങ്കള്‍ നിന്നു നമസ്‌കരിക്കുന്ന സമയം അവന്‍ താങ്കളെ കാണുന്നുണ്ട്‌.

നമസ്‌കരിക്കുന്നവരുടെ കൂട്ടത്തില്‍ താങ്കളുടെ ചലനത്തെയും (അവന്‍ കാണുന്നുണ്ട്‌).

നിശ്ചയമായും അവന്‍ തന്നെയാണ്‌ എല്ലാം കേള്‍ക്കുന്നവനും എല്ലാം അറിയുന്നവനും.

ആരുടെയടുത്താണ്‌ പിശാചുക്കള്‍ ഇറങ്ങുകയെന്ന്‌ ഞാന്‍ നിങ്ങള്‍ക്ക്‌ അറിയിച്ചുതരട്ടെയോ?

ധാരാളം വ്യാജം പറയുകയും വളരെ കുറ്റം പ്രവര്‍ത്തിക്കുകയും ചെയ്യുന്ന എല്ലാവരുടെ മേലുമാണ്‌ അവരിറങ്ങുക.

തങ്ങള്‍ കേട്ടത്‌ മറ്റുചിലര്‍ക്ക്‌ അവര്‍ പറഞ്ഞുകൊടുക്കുന്നതാണ്‌. മിക്ക വാര്‍ത്തകളിലും അവര്‍ കള്ളം പറയുന്നവരാകുന്നു.

കവികളെ പിന്തുടരുന്നത്‌ ദുര്‍മാര്‍ഗികളാണ്‌.

താങ്കള്‍ കണ്ടില്ലേ: അവര്‍ (ഭാവനയുടെ) എല്ലാ വകുപ്പുകളിലും അലഞ്ഞു നടക്കുകയും,

പ്രവര്‍ത്തിക്കാത്തത് പറയുകയും ചെയ്യുന്നതെങ്ങനെയാകുന്നു?

സത്യവിശ്വാസം കൈക്കൊള്ളുകയും സല്‍ക്കര്‍മങ്ങള്‍ അനുഷ്‌ഠിക്കുകയും അല്ലാഹുവിനെ ധാരാളം സ്‌മരിക്കുകയും തങ്ങള്‍ അക്രമിക്കപ്പെട്ട ശേഷം പ്രതികാരനടപടി എടുക്കുകയും ചെയ്‌തവരൊഴികെ. (അവരതില്‍ പെടുകയില്ല.) തങ്ങള്‍ എങ്ങോട്ടാണ്‌ തിരിച്ചു ചെല്ലുക എന്ന്‌ അക്രമികള്‍ക്ക്‌ പിന്നീട്‌ മനസ്സിലാകും.