പ്രവാചക സന്നിധിയില്‍ ആ അന്ധന്‍ ആഗതനായതിനാല്‍ അവിടന്ന് മുഖംചുളിച്ചു പിന്തിരിഞ്ഞുകളഞ്ഞു1
നബീ, അങ്ങേക്ക് അതുസംബന്ധിച്ച് എന്തറിയാം?-അദ്ദേഹം പാപവിശുദ്ധി നേടുകയോ ഉപദേശം സ്വീകരിച്ചിട്ട് അതദ്ദേഹത്തിന് ഫലപ്രദമാവുകയോ ചെയ്‌തേക്കാമല്ലോ. എന്നാല്‍, സ്വയം പര്യാപ്തത നടിച്ചവനാകട്ടെ, അവന്റെ നേരെയാണ് അങ്ങ് തിരിയുന്നത്. അവന്‍ പാപവിശുദ്ധി കൈവരിക്കാത്തതില്‍ താങ്കള്‍ക്ക് കുറ്റമൊന്നുമില്ല. എന്നാല്‍ അല്ലാഹുവിനെ ഭയന്ന് അങ്ങയുടെയടുത്തേക്ക് ധൃതിപ്പെട്ട് വന്നയാളുടെ വിഷയത്തില്‍ നിന്ന് അങ്ങ് ശ്രദ്ധതിരിച്ചു കളയുകയാണ്.
1 വിശദീകരണം കാണുക
1. തിരുനബി(സ്വ) ഒരിക്കല്‍ മക്കയില്‍ വെച്ച് ഖുറൈശിലെ ഒന്നാംനിര നേതാക്കളുമായി സംഭാഷണത്തിലായിരിക്കവേ, അബ്ദുല്ലാഹിബ്‌നുഉമ്മിമക്തൂം എന്ന കണ്ണുകാണാത്ത സ്വഹാബിശ്രേഷ്ഠന്‍ വന്ന് നബി(സ്വ)യെ വിളിക്കുകയും 'അല്ലാഹു അങ്ങേക്കു പഠിപ്പിച്ചു തന്നതില്‍ നിന്ന് എനിക്ക് പറഞ്ഞുതരൂ' എന്ന് അപേക്ഷിക്കുകയും ചെയ്തു. നേതാക്കളെ ഖുര്‍ആന്‍ പരിചയപ്പെടുത്തുകയും ഇസ്‌ലാമിലേക്ക് ക്ഷണിക്കുകയും ചെയ്തുകൊണ്ടുള്ള സംസാരമാണ് നബി(സ്വ) നിര്‍വഹിച്ചുകൊണ്ടിരുന്നത്. ഇവരുടെ ഇസ്‌ലാമാശ്ലേഷണത്തില്‍ പ്രത്യാശപൂണ്ട് ഇബ്‌നുഉമ്മിമക്തൂമിനെ നബി(സ്വ) പരിഗണിച്ചില്ല; മുഖത്ത് അസംതൃപ്തി പ്രകടമായി. ഈ പശ്ചാത്തലത്തിലാണ് ഈ വചനങ്ങള്‍ അവതരിച്ചത്.
മുഖം ചുളിച്ചത് നബി(സ്വ)യും ആഗതനായ അന്ധന്‍ മേല്‍പറഞ്ഞ സ്വഹാബിയുമാണെന്നാണ് ഖുര്‍ആന്‍ വ്യാഖ്യാതാക്കളുടെ ഏകകണ്ഠപക്ഷം. ഒന്നും രണ്ടും സൂക്തങ്ങളില്‍ മധ്യമപുരുഷപ്രയോഗം (ഘിത്ത്വാബ്) ഒഴിവാക്കി പ്രഥമ പുരുഷ പ്രയോഗം (ഗൈബത്ത്) സ്വീകരിച്ചത് നബി(സ്വ)യോടുള്ള ആര്‍ദ്രതാ പ്രകടനത്തിനു വേണ്ടിയാണ്; മൂന്നാം വചനം മുതല്‍ മധ്യമപുരുഷ പ്രയോഗം തന്നെയാണുള്ളത് എന്നതും പ്രത്യേകം ശ്രദ്ധേയമായിരിക്കുന്നു.
ഏതായാലും, വീട്ടിലേക്കുള്ള വഴിയില്‍ മറ്റാരുമറിയാതെ അവതരിച്ച ഈ സൂക്തങ്ങളും നബി(സ്വ) അപ്പടി സമൂഹമധ്യേ പാരായണം ചെയ്തുകൊടുത്തു. സ്വന്തത്തെ ആക്ഷേപിക്കുന്ന കാര്യങ്ങള്‍ മറ്റാരും അങ്ങനെ ചെയ്യാറില്ലല്ലോ. വഹ്‌യില്‍ നിന്ന് ഏതെങ്കിലും ഭാഗം നബി(സ്വ) ഒളിപ്പിച്ചുവെക്കുമായിരുന്നുവെങ്കില്‍ അത് ഈ വചനങ്ങളായിരിക്കും എന്ന് ഹസ്രത്ത് ഇബ്‌നുസൈദ്(റ)വിനെ പോലുള്ള പലരും വിലയിരുത്തിയിട്ടുണ്ട്. തന്നെയുമല്ല, സംഭവാനന്തരം അബ്ദുല്ലാ(റ)വിനെ കാണുമ്പോഴൊക്കെ നബി(സ്വ) വല്ലാതെ ബഹുമാനിക്കുകയും 'നാഥന്‍ എന്നെ ആക്ഷേപിച്ചതിന്റെ കാരണക്കാരനു സ്വാഗതം' എന്നു പറഞ്ഞ് അദ്ദേഹത്തെ സ്വീകരിക്കുകയും ചെയ്തിരുന്നു. നബി(സ്വ) മദീനയുടെ പുറത്തുപോയ ചില സന്ദര്‍ഭങ്ങളില്‍ മുന്‍നിര മുഹാജിറുകളില്‍ പെട്ട ഇദ്ദേഹത്തെ പകരക്കാരനാക്കുകയും ചെയ്തിട്ടുണ്ട്.