അന്നാസിആത്ത് - النازعات - An-Naziat

നിഷേധികളുടെ ആത്മാക്കളെ പരുഷമായി വലിച്ചെടുക്കുകയും വിശ്വാസികളുടേത് മൃദുലമായി ഊരിയെടുക്കുകയും ചെയ്യുന്ന മലക്കുകളെയും, ആകാശത്തുനിന്ന് അതിദ്രുതം വന്നെത്തുന്നവരും വിശ്വാസികളുടെ ആത്മാക്കളുമായി സ്വര്‍ഗത്തിലേക്ക് കുതിക്കുന്നവരും പ്രാപഞ്ചിക വ്യവസ്ഥിതികള്‍ നിയന്ത്രിക്കുന്നവരുമായ മലക്കുകളെയും കൊണ്ട് ശപഥം, പുനരുത്ഥാനം ഉണ്ടായേ തീരൂ-ഭീകര പ്രകമ്പനം സംഭവിക്കുകയും അടുത്തത് തുടര്‍ന്നു വരികയും ചെയ്യുന്ന നാളില്‍¹

ചില ഹൃദയങ്ങള്‍ അന്ന് വിറകൊള്ളുകയും നയനങ്ങള്‍ വിനയാന്വിതമായിരിക്കുകയും ചെയ്യും. അവര്‍ പരസ്പരം ചോദിക്കുകയാണ്: ദ്രവിച്ച അസ്ഥികളായിക്കഴിഞ്ഞുപോയാലും നാം പൂര്‍വാവസ്ഥയിലേക്ക് തിരിച്ചു കൊണ്ടുവരപ്പെടുമെന്നോ? എങ്കിലത് മഹാനഷ്ടകരമായ ഒരു മടക്കം തന്നെ! ഒരൊറ്റ ഘോര ഗര്‍ജ്ജനം മാത്രമാണുണ്ടാവുക; തത്സമയമതാ, അവര്‍ മഹ്ശറിന്റെ സമതലത്തിലെത്തി²

മൂസാനബിയെ ഥുവാ താഴ്‌വരയില്‍ തന്റെ രക്ഷിതാവ് വിളിച്ച് ഇപ്രകാരം അരുളിയ വൃത്താന്തം അങ്ങേയ്ക്ക് ലഭിച്ചിട്ടുണ്ടോ? ഫിര്‍ഔന്റെയടുത്തേക്ക് നിങ്ങള്‍ പോവുക; അവന്‍ അഹങ്കാരിയായിരിക്കുന്നു. എന്നിട്ട് ഇങ്ങനെ ചോദിക്കുക: 'നീ ഉല്‍കൃഷ്ടനാവുകയും ഞാന്‍ നിന്റെ നാഥങ്കലേക്ക് മാര്‍ഗദര്‍ശനം ചെയ്തിട്ട് അവനെ നീ ഭയപ്പെടുകയും ചെയ്യേണ്ടതില്ലേ?' അങ്ങനെ മൂസാനബി ഫിര്‍ഔന്ന് വന്‍ദൃഷ്ടാന്തം കാണിച്ചു കൊടുത്തു. തത്സമയം, അവന്‍ തള്ളിക്കളയുകയും ധിക്കരിക്കുകയും ചെയ്തു. എന്നിട്ട് കുപ്രചാരണത്തിനായി പിന്തിരിഞ്ഞു പോവുകയും ജനങ്ങളെ സംഗമിപ്പിച്ച് 'ഞാനാണ് നിങ്ങളുടെ പരമോന്നതനായ രക്ഷിതാവ്' എന്ന് വിളംബരപ്പെടുത്തുകയുമുണ്ടായി. അപ്പോള്‍, ഇഹ-പര ലോകങ്ങളിലെ ശിക്ഷക്കു വേണ്ടി അല്ലാഹു അവനെ പിടികൂടി. ദൈവഭയമുള്ളവര്‍ക്ക് അതില്‍ വലിയ ഗുണപാഠമുണ്ട്³

സൃഷ്ടിക്കപ്പെടാന്‍ ഏറെ കാഠിന്യമുള്ളത് നിങ്ങളോ ആകാശമോ? അതിനെ വിതാനം ഉയര്‍ത്തുകയും വ്യവസ്ഥാപിതമാക്കുകയും ചെയ്ത് അവന്‍ പടച്ചുണ്ടാക്കി; രാത്രിയെ അന്ധകാരമാക്കുകയും പകലിനെ പ്രത്യക്ഷീഭവിപ്പിക്കുകയും തദനന്തരം ഭൂമിയെ പ്രവിശാലമാക്കുകയും അതില്‍ നിന്ന് ജലവും സസ്യ-ലതാദികളും ബഹിര്‍ഗമിപ്പിക്കുകയും പര്‍വതങ്ങള്‍ ദൃഢീകരിച്ച് നിര്‍ത്തുകയും ചെയ്തിരിക്കുന്നു-നിങ്ങള്‍ക്കും കാലികള്‍ക്കുമുള്ള വിഭവങ്ങളായി⁴

അപ്പോള്‍ ആ ഗുരുതര വിപത്ത് സംജാതമാകുമ്പോള്‍, തന്റെ പ്രവര്‍ത്തനങ്ങളെ സംബന്ധിച്ച് മനുഷ്യന്‍ അനുസ്മരിക്കുകയും നോക്കുന്നവര്‍ക്കായി നരകം വെളിപ്പെടുത്തപ്പെടുകയും ചെയ്യുന്ന ദിവസം, ധിക്കാരം കാട്ടുകയും ഭൗതിക ജീവിതത്തിന് മുന്‍ഗണന നല്‍കുകയും ചെയ്തിരുന്നവര്‍ ആരോ, അവര്‍ക്കന്ന് നരകം തന്നെയാണ് സങ്കേതം. എന്നാല്‍, തന്റെ നാഥന്റെ പദവി ഭയപ്പെടുകയും മനസ്സിനെ സ്വേച്ഛകളില്‍ നിന്നു ഉപരോധിച്ചു നിര്‍ത്തുകയും ചെയ്തതാരോ, അവന്റെ അഭയകേന്ദ്രം സ്വര്‍ഗമാണ്⁵

അന്ത്യനാളിനെ കുറിച്ച്, എപ്പോഴാണതിന്റെ ആഗമമെന്ന് താങ്കളോടവര്‍ കളിയാക്കിച്ചോദിക്കുന്നു! താങ്കളത് സംബന്ധമായി എന്തുപ്രതികരിക്കാന്‍? അതിന്റെ പരിജ്ഞാനം അങ്ങയുടെ നാഥങ്കലത്രേ. ആര് അതിനെ ഭയപ്പെടുന്നവരായുണ്ടോ, അവര്‍ക്കൊരു മുന്നറിയിപ്പുകാരന്‍ മാത്രമാണ് താങ്കള്‍. അവരതിനെ അഭിമുഖീകരിക്കുന്ന നാള്‍ ഒരു പ്രദോഷമോ പ്രഭാതമോ മാത്രമേ ഭൗതിക ലോകത്ത് കഴിച്ചുകൂട്ടിയിട്ടുള്ളൂ എന്നതുപോലെയുണ്ടാകും⁶