അന്നബഅ് - النبأ - An-Naba

1. ചോദ്യോത്തര രൂപത്തില്‍ അധ്യായമാരംഭിക്കുന്നത് ശ്രോതാവിന്റെ ശ്രദ്ധയാകര്‍ഷിക്കാനാണ്. പുനരുത്ഥാനം സംബന്ധിച്ചാണ് തര്‍ക്കവും വാഗ്വാദവും-മുസ്‌ലിംകള്‍ അതു വിശ്വസിക്കുന്നു, എന്നല്ല, ആ വിശ്വാസമവര്‍ക്ക് നിര്‍ബന്ധം തന്നെയാണ്. എന്നാല്‍ ബഹുദൈവ വിശ്വാസികള്‍ അതു പാടേ തള്ളിക്കളയുന്നു. ഏതായാലും അന്ത്യനാളും വിചാരണയും സ്വര്‍ഗ-നരകവും അനിവാര്യമായും നിങ്ങള്‍ കണ്ടെത്തുക തന്നെ ചെയ്യുമെന്നാണ് പറയുന്നത്.

2. സര്‍വശക്തനായ അല്ലാഹുവിന്റെ സൃഷ്ടിവൈഭവം ഗ്രഹിക്കാന്‍ പര്യാപ്തമായ ഒമ്പത് കാര്യങ്ങള്‍ ഇവിടെ എടുത്തു പറയുകയാണ്. ഉരുണ്ട ഭൂമി മനുഷ്യന്റെ സുഗമമായ ഉപയോഗാര്‍ത്ഥം നിരന്നു നീണ്ടതാക്കിയത്, പര്‍വതങ്ങളെ ഭൂമിക്ക് ആണികള്‍ പോലെ, ഇളകുന്നതിനെ പ്രതിരോധിക്കാന്‍ സജ്ജീകരിച്ചത്, വംശസുരക്ഷക്കായി മനുഷ്യന്‍ സ്ത്രീ-പുരുഷ ബന്ധത്തിലൂടെ പെറ്റുപെരുകുന്നത്, അധ്വാനിക്കുന്ന മനുഷ്യന്ന് അനിവാര്യമായ വിശ്രമത്തിന്ന് ഉറക്കത്തെ പാകപ്പെടുത്തിയത്, പകലിനോടു സന്തുലിതത്വം പുലര്‍ത്താനും മറ്റു ബഹുമുഖാവശ്യങ്ങള്‍ക്കുമായി രാത്രിയെ മറ പോലെയാക്കിയത്, ജീവസന്ധാരണാര്‍ത്ഥം പകലിനെ ആവിഷ്‌കരിച്ചത്, തൂണുകളില്ലാതെ ബലിഷ്ഠമായ ആകാശം സൃഷ്ടിച്ചത്, കൃത്യമായ അളവിലുള്ള ഭ്രമണപഥത്തിലൂടെ സഞ്ചരിക്കുന്ന അത്യദ്ഭുതകരമായ സൂര്യനെ സൃഷ്ടിച്ചത്, മനുഷ്യരുടെയും ജന്തുജാലങ്ങളുടെയും വൃക്ഷ-സസ്യ-ലതാദികളുടെയും നിലനില്‍പിനായി മഴ വര്‍ഷിക്കുന്നത് എന്നിവയാണവ. ഓരോന്നും ദീര്‍ഘകാലം ചിന്തിക്കാനും പഠിക്കാനും പാഠമുള്‍ക്കൊള്ളാനും പര്യാപ്തമാണല്ലോ.

3. നരകക്കാരെ സംബന്ധിച്ചിടത്തോളം ഏറ്റം അപകടകരവും ഭീഷണവുമായ സൂക്തമാണിത്- ഓരോ ശിക്ഷയെപ്പറ്റിയും വേവലാതിയും സങ്കടവും വേദനയുമൊക്കെ ബോധിപ്പിക്കുമ്പോള്‍ അതിനേക്കാള്‍ തീക്ഷ്ണമായ ശിക്ഷയാണവര്‍ക്ക് നല്‍കപ്പെടുക. അല്ലാഹു നമ്മെ കാക്കട്ടെ.

4. ജീവിതത്തില്‍ സൂക്ഷ്മത പാലിക്കുകയും കല്‍പനകള്‍ പ്രായോഗികമാക്കുകയും നിഷിദ്ധ കാര്യങ്ങള്‍ ദൂരീകരിക്കുകയും ചെയ്ത പുണ്യവാന്മാരുടെ സ്വര്‍ഗീയ ജീവിതത്തിന്റെ ചില ഏടുകളാണിത്. ഖുര്‍ആനില്‍ അങ്ങിങ്ങായി വിശദീകരിക്കപ്പെട്ട സ്വര്‍ഗം സമഗ്രമായി സങ്കല്‍പിച്ചു നോക്കിയാല്‍ വ്യതിരിക്തമായ ഒരു പ്രവിശാല ലോകമാണതെന്നു കാണാം. കാലാകാലത്തേക്കും മതിയായ സുദീര്‍ഘമായ അജണ്ടകള്‍ അനായാസേന പ്രയോഗവല്‍ക്കരിക്കാന്‍ പര്യാപ്തമായ ഒരു മഹാലോകം. സ്വര്‍ഗീയ ലോകങ്ങളില്‍ കഴിയുന്നവരെ ഇടക്കിടെ സന്ദര്‍ശിച്ചു സൗഹൃദം പുതുക്കുക എന്ന മധുരാനുഭൂതി തന്നെ ഓന്നാലോചിച്ചു നോക്കൂ. നിരന്തരമായ സ്തുതികീര്‍ത്തനങ്ങളും അവര്‍ കൈവിടില്ല. 39:74 നോക്കുക.

5. അനിവാര്യമായി സാക്ഷാത്കൃതമാകുന്ന ദിനമാണ് പുനരുത്ഥാന ദിനം. ഭൂതലത്തില്‍ ജനിച്ചു മരിച്ചു പോയ മുഴുവന്‍ മനുഷ്യരും സന്നിഹിതരാകുന്ന ഒരു കൂട്ടായ്മയുടെ ഭയാനകത എത്രമാത്രമായിരിക്കും; കൂടാതെ മലക്കുകളും അണിനിരക്കുന്നു-താങ്കളുടെ നാഥന്റെ സൈന്യങ്ങളെ അവനു മാത്രമേ അറിയൂ- 74:31. അല്ലാഹു അനുമതി നല്‍കുന്നവര്‍ക്ക് മാത്രമേ അന്നെന്തെങ്കിലും ഉരിയാടാന്‍ കഴിയൂ- 2:255, 11:105, 20:109 നോക്കുക.

6. ഭിന്ന രീതികളിലും ശൈലികളിലുമായി ഖിയാമ നാളും പുനരുത്ഥാനവും വിചാരണയും ശിക്ഷയുമെല്ലാം അല്ലാഹു പറയുന്നത് മോക്ഷമാര്‍ഗം മനുഷ്യന്‍ കണ്ടുപിടിക്കാന്‍ വേണ്ടിയാണ്. അതിന്റെ സമയം അവസാനിച്ച ശേഷം പിന്നെ പരിഭവിച്ചിട്ട് യാതൊരു ഫലവുമുണ്ടാവില്ലല്ലോ. അല്ലാഹു കര്‍ക്കശമായ നീതി നടപ്പാക്കുന്ന ദിവസമാണത്. മറ്റു ജീവികളെപ്പോലും പുനര്‍ജനിപ്പിച്ച് പ്രതിക്രിയ നടപ്പാക്കും. തിരുനബി(സ്വ) പ്രസ്താവിച്ചു: നല്‍കപ്പെടാത്ത അവകാശങ്ങള്‍ അന്ത്യനാളില്‍ നിങ്ങള്‍ വീട്ടിയേ തീരൂ. കൊമ്പില്ലാത്ത ആടിനെ കുത്തിയതിന്ന് കൊമ്പുള്ളതില്‍ നിന്ന് പ്രതിക്രിയ ചെയ്യപ്പെടുക തന്നെ ചെയ്യും (മുസ്‌ലിം). തദനന്തരം അവയോട് മണ്ണായിപ്പോയി നശിക്കാന്‍ കല്‍പിക്കും. ഇതു കാണുമ്പോഴാണ്, താനും മണ്ണായിപ്പോയാല്‍ നന്നായിരുന്നു എന്ന ബോധം നിഷേധിക്കു ഉദിക്കുന്നത്. പക്ഷേ, അവന്‍ മൃഗങ്ങളെ പോലെയായിരുന്നില്ലല്ലോ....