നിരന്തരമായി അയക്കപ്പെടുന്നതും ശക്തിയായി അടിച്ചുവീശുന്നതുമായ കാറ്റുകളെയും മേഘങ്ങള്‍ വിന്യസിപ്പിക്കുകയും സത്യാസത്യങ്ങള്‍ വിവേചിക്കുകയും ഒഴികഴിവായോ മുന്നറിയിപ്പായോ പ്രവാചകന്മാര്ക്ക് ദിവ്യസന്ദേശം അവതരിപ്പിക്കുകയും ചെയ്യുന്ന മാലാഖമാരെയും തന്നെ ശപഥം, നിങ്ങള്ക്ക്ാ താക്കീത് ചെയ്യപ്പെടുന്ന അന്ത്യനാള്‍ സംഭവിക്കുന്നത് തന്നെയാണ്, തീര്ച്ച!1
1 വിശദീകരണം കാണുക
1. വളരെ ശ്രദ്ധേയവും ചിന്തോദ്ദീപകവുമായ അഞ്ചു കാര്യങ്ങളെടുത്ത് സത്യം ചെയ്തുപറഞ്ഞുകൊണ്ടാണ് ഈ അധ്യായം ആരംഭിക്കുന്നത്. ഭൂതലത്തില്‍ നിരന്തരമായി കാറ്റടിച്ചു വീശുന്നുണ്ടെന്നു എല്ലാവര്‍ക്കുമറിയാം. അവ വ്യത്യസ്ത രീതിയിലും ശക്തിയിലുമുള്ളതായിരിക്കും. അല്ലാഹുവാണവ അയച്ചുവിടുന്നത്, വീശുന്നത്. മന്ദമാരുതനും ഇളംതെന്നലും മുതല്‍ അതിഭയങ്കരമായ കൊടുങ്കാറ്റുകള്‍ വരെ അവയിലുണ്ടാകും. ശപഥത്തിലെ ഒന്നും രണ്ടും പദങ്ങള്‍ വ്യത്യസ്ത കാറ്റുകളെ കൊണ്ടാണ്. അന്തരീക്ഷത്തിലെ മേഘങ്ങള്‍ ശ്രദ്ധിച്ചാല്‍ വ്യത്യസ്താനുപാതങ്ങളില്‍ ഭിന്ന വര്‍ണങ്ങളില്‍ അവയുണ്ടാകും. പലപ്പോഴും അവ സഞ്ചരിക്കുന്നത് മനുഷ്യന്ന് കാണാം. ഈ മേഘവിന്യാസം നടത്തുന്ന മലക്കുകളാണ് മൂന്നാം ശപഥവാക്ക്. സത്യവും അസത്യവും തമ്മില്‍ വേര്‍തിരിക്കുന്ന വേദവാക്യങ്ങളവതരിപ്പിക്കുന്ന മലക്കുകളെ നാലാമതായും പ്രവാചകന്മാര്ക്ക് വഹ്‌യ് നല്‍കുന്ന മലക്കുകളെ അഞ്ചാമതായും പറഞ്ഞിരിക്കുന്നു. ശപഥം ചെയ്തു പറയുന്ന കാര്യം അതീവ ഗൗരവതരമാണ്: മുശ്‌രിക്കുകളും ദൈവനിഷേധികളും വ്യാജമാക്കുന്ന അന്ത്യനാള്‍ സംഭവിക്കുക തന്നെ ചെയ്യും.