അൽ ഇൻസാൻ - الإنسان - Al-Insan

ഒട്ടുമേ പ്രസ്താവ്യമല്ലാതിരുന്ന ഒരു കാലഘട്ടം മനുഷ്യനില്‍ സംജാതമായിക്കഴിഞ്ഞിട്ടില്ലേ? വ്യത്യസ്ത ഘടകങ്ങള്‍ സംഗമിച്ച ഒരു ശുക്ലബിന്ദുവില്‍ നിന്നാണ്-പരീക്ഷിക്കാനായി-അവനെ നാം സൃഷ്ടിച്ചത്¹
എന്നിട്ട് അവനെ നാം കേള്‍വിയും കാഴ്ചയുമുള്ളവനാക്കുകയും വഴി കാണിച്ചു കൊടുക്കുകയും ചെയ്തു-ഒന്നുകില്‍ കൃതജ്ഞനായി, അല്ലങ്കില്‍ കൃതഘ്‌നനായി. സത്യനിഷേധികള്‍ക്ക് കാല്‍ച്ചങ്ങലകളും കൈയാമങ്ങളും കത്തിജ്ജ്വലിക്കുന്ന നരകാഗ്നിയും നാം സജ്ജീകരിച്ചിട്ടുണ്ട്.

നിശ്ചയം, സജ്ജനങ്ങള്‍ ഒരു സ്വര്‍ഗീയ ചഷകത്തില്‍ നിന്ന്-അതിന്റെ മിശ്രിതം കര്‍പ്പൂരമായിരിക്കും-പാനം ചെയ്യുന്നതാണ്. അല്ലാഹുവിന്റെ അടിമകള്‍ കുടിക്കുന്ന ഒരു നീരുറവയാണത്. അവരത് യഥേഷ്ടം പ്രവഹിപ്പിച്ചു കൊണ്ടിരിക്കും. ദുന്‍യാവില്‍, നേര്‍ച്ചകള്‍ പൂര്‍ത്തീകരിക്കുകയും വിനാശ വ്യാപകമായ പാരത്രിക ദിനം ഭയപ്പെടുകയും അഗതിക്കും അനാഥക്കും തടവുകാരനും ആഹാരം-തങ്ങള്‍ക്കതില്‍ പ്രതിപത്തിയുളളതോടൊപ്പം തന്നെ-നല്‍കുകയും ചെയ്യുന്നവരായിരുന്നു അവര്‍²
ഇതാണവരുടെ നിലപാട്: അല്ലാഹുവിന്റെ പ്രീതി മാത്രം ലക്ഷ്യം വെച്ചാണ് ഞങ്ങള്‍ നിങ്ങള്‍ക്ക് ഭക്ഷണം തരുന്നത്; ഒരു പ്രതിഫലവും കൃതജ്ഞതയും നിങ്ങളില്‍ നിന്ന് ഞങ്ങളുദ്ദേശിക്കുന്നില്ല; നെറ്റിയും മുഖവും ചുളിഞ്ഞു പോകുന്നതും അസഹനീയവുമായ ഒരു നാളിനെ നാഥനില്‍ നിന്ന് ഞങ്ങള്‍ ഭയപ്പെടുന്നു³

തന്മൂലം ആ നാളിന്റെ ദൂഷ്യങ്ങളില്‍ നിന്ന് അല്ലാഹു അവരെ പ്രതിരോധിക്കുകയും മുഖപ്രസന്നതയും ആഹ്ലാദവും നല്‍കുകയും ക്ഷമ കൈക്കൊണ്ടത്മൂലം സ്വര്‍ഗീയാരാമങ്ങളും പട്ടുടയാടകളും പ്രതിഫലമേകുകയും ചെയ്യുന്നതാണ്. കട്ടിലുകളില്‍ ചാരിയിരിക്കുകയാവും അവര്‍. വെയിലോ തീക്ഷ്ണ ശൈത്യമോ അവര്‍ക്കവിടെയുണ്ടാവില്ല. തണലുകള്‍ അടുത്തു വന്നുനില്‍ക്കും. സുഗമമായി പറിച്ചെടുക്കാനാകുംവിധം പഴങ്ങള്‍ താഴ്ന്നു കിടക്കുന്നതാണ്. അളവു നിര്‍ണയിച്ച വെള്ളിപ്പാത്രങ്ങളും രജതസമാനമായ സ്ഫടികക്കോപ്പകളുമായി അവര്‍ക്കിടയില്‍ ചുറ്റപ്പെട്ടുകൊണ്ടിരിക്കും⁴
ഇഞ്ചിനീര്‍ മിശ്രിതമായ സല്‍സബീല്‍ ഉറവയിലെ ദ്രാവകക്കോപ്പകള്‍ അവര്‍ക്കവിടെ കുടിക്കാന്‍ നല്‍കപ്പെടുന്നതും അനശ്വരത്വം നല്‍കപ്പെട്ട ബാലന്മാര്‍ അവിടെ ചുറ്റിനടക്കുന്നതുമാണ്. വിതറപ്പെട്ട മുത്തുകളാണവരെന്ന് നിനക്ക് കാഴ്ചയില്‍ തോന്നും. സുഖാനുഭൂതികളും വലിയൊരു സാമ്രാജ്യവുമാണ് അവിടെ നീ കാണുക⁵
ഉള്ളില്‍ നേര്‍ത്തപട്ടും പുറത്തു കട്ടിപ്പട്ടുമായുള്ള പച്ച വസ്ത്രമാണവര്‍ക്കുണ്ടാവുക; വെള്ളി വളകളണിയിക്കപ്പെടുന്നതുമാണ്. നാഥന്‍ അവര്‍ക്ക് വിശുദ്ധപാനീയം കുടിപ്പിക്കുന്നതാകുന്നു. അരുളപ്പെടും: നിങ്ങള്‍ക്കുള്ള പ്രതിഫലമാണിത്. നിങ്ങളുടെ ദുന്‍യാവിലെ കര്‍മങ്ങള്‍ സ്വീകരിക്കപ്പെട്ടിരിക്കുന്നു.

നിശ്ചയം, ഈ ഖുര്‍ആന്‍ നാമാണ് അങ്ങേയ്ക്ക് അവതരിപ്പിച്ചു തരുന്നത്; അതുകൊണ്ട് നാഥന്റെ വിധിക്ക് ക്ഷമാപൂര്‍വം കാത്തിരിക്കുക. അവരില്‍ പെട്ട ഒരു കുറ്റവാളിക്കും കൃതഘ്‌നന്നും താങ്കള്‍ വഴങ്ങിപ്പോകരുത്⁶
പ്രഭാത-പ്രദോഷങ്ങളില്‍ നാഥന്റെ നാമം വാഴ്ത്തുകയും നിശാ നമസ്‌കാരം നിര്‍വഹിക്കുകയും രാത്രിയില്‍ നീണ്ട സമയം അവന്റെ മഹത്ത്വം പ്രകീര്‍ത്തിക്കുകയും ചെയ്യുക.

നിശ്ചയം, ക്ഷണികമായ ഐഹിക ജീവിതമാണ് നിഷേധികള്‍ ആഗ്രഹിക്കുന്നത്; വരാന്‍ പോകുന്ന ദുര്‍വഹമായ അന്ത്യനാളിന്റെ കാര്യം അവര്‍ വിട്ടുകളയുകയും ചെയ്യുന്നു. നാമാണ് അവരെ പടച്ചുണ്ടാക്കിയതും അവരുടെ സൃഷ്ടിപ്പ് ദൃഢീകരിച്ചതും⁷
നാം വിചാരിക്കുകയാണെങ്കില്‍ അവര്‍ക്കു പകരം തത്തുല്യരെ കൊണ്ടുവരുന്നതാകുന്നു. നിശ്ചയം, ഈ ഖുര്‍ആന്‍ ഒരു ഉദ്‌ബോധനമാണ്; അതുകൊണ്ട്, ആരെങ്കിലും ഉദ്ദേശിക്കുന്നുവെങ്കില്‍ തന്റെ നാഥങ്കലേക്കുള്ള ഒരു വഴി ഉണ്ടാക്കിക്കൊള്ളട്ടെ. അല്ലാഹു ഉദ്ദേശിച്ചാല്‍ മാത്രമേ നിങ്ങള്‍ക്ക് ഉദ്ദേശിക്കാന്‍ കഴിയൂ; നിശ്ചയം അവന്‍ എല്ലാം അറിയുന്നവനും യുക്തിമാനുമാകുന്നു. ഉദ്ദേശിക്കുന്നവരെ തന്റെ കാരുണ്യത്തില്‍ അവന്‍ പ്രവേശിപ്പിക്കുന്നതാണ്. അതിക്രമകാരികള്‍ക്ക് വേദനാനിര്‍ഭരമായ ശിക്ഷ അവന്‍ സജ്ജീകരിച്ചിരിക്കുന്നു⁸