അദ്ദുഖാൻ - الدخان - Ad-Dukhan

ഹാ മീം.¹
വ്യക്തമായ ഈ വേദം തന്നെ ശപഥം, നിശ്ചയം, ഒരു അനുഗൃഹീത നിശയിലാണ് നാം അതവതരിപ്പിച്ചിരിക്കുന്നത്; നാം മുന്നറിയിപ്പ് നല്‍കുന്നവരാണ്. ആ നിശയിലാണ് തത്ത്വാധിഷ്ഠിതമായ എല്ലാ വിഷയങ്ങളും-നമ്മുടെ പക്കല്‍ നിന്നുള്ള ഉത്തരവെന്ന നിലക്ക്-വേര്‍തിരിക്കപ്പെടുന്നത്.²
നാഥങ്കല്‍ നിന്നുള്ള കാരുണ്യമായി നാം ദൂതന്മാരെ നിയോഗിച്ചു കൊണ്ടിരിക്കുന്നവരാകുന്നു. നിശ്ചയം അവന്‍ നന്നായി കേള്‍ക്കുന്നവനും സര്‍വജ്ഞനുമാണ്, ഭുവന-വാനങ്ങളുടെയും അവയ്ക്കിടയിലുള്ളതിന്റെയും നാഥന്‍- നിങ്ങള്‍ ദൃഢവിശ്വാസമുള്ളവരാണെങ്കില്‍. അവനല്ലാതെ മറ്റൊരാരാധ്യനുമില്ല. അവന്‍ ജീവിപ്പിക്കുകയും മരിപ്പിക്കുകയും ചെയ്യും. നിങ്ങളുടെയും പൂര്‍വപിതാക്കളുടെയും നാഥനാണ് അവന്‍.

എന്നാല്‍ നിഷേധികള്‍ സന്ദേഹത്തില്‍ വിഹരിക്കുകയാണ്. അതുകൊണ്ട്, ജനങ്ങളെ ആവരണം ചെയ്യുന്ന വ്യക്തമായ ഒരു പുകയുമായി ആകാശം വരുന്ന ദിനം താങ്കള്‍ പ്രതീക്ഷിച്ചു കൊള്ളുക. വേദനാജനകമായ ഒരു ശിക്ഷയായിരിക്കും അത്. 'നാഥാ, ഈ ശിക്ഷ ഞങ്ങളില്‍ നിന്നകറ്റേണമേ, ഞങ്ങള്‍ സത്യവിശ്വാസം സ്വീകരിച്ചുകൊള്ളാം' എന്ന് അവര്‍ കേണപേക്ഷിക്കും.³
അവര്‍ക്ക് എങ്ങനെയാണ് ഉദ്‌ബോധനം സഫലമാവുക? വസ്തുതകള്‍ സ്പഷ്ടമാക്കുന്ന ഒരു ദൂതന്‍ അവര്‍ക്ക് വന്നെത്തിയിരുന്നല്ലോ; എന്നിട്ട് അദ്ദേഹത്തെയവര്‍ അവഗണിക്കുകയും ആരാലോ അഭ്യസിപ്പിക്കപ്പെട്ടവന്‍, ഭ്രാന്തന്‍ എന്നൊക്കെ ഭര്‍ത്സിക്കുകയുമുണ്ടായി. ശിക്ഷ അല്‍പകാലത്തേക്ക് നാം ഒഴിവാക്കിത്തരാം, എന്നാലും പഴയ അവസ്ഥയിലേക്കുതന്നെ നിങ്ങള്‍ തീര്‍ച്ചയായും തിരിച്ചുപോകും. കഠോര ശിക്ഷയുമായി നിഷേധികളെ പിടികൂടുന്ന ആ ദിവസമാണ് നാം പ്രതികാരം ചെയ്യുക.⁴

ഇവര്‍ക്കു മുമ്പ് ഫറോവാ സംഘത്തെ നാം പരീക്ഷണവിധേയരാക്കി. 'അല്ലാഹുവിന്റെ അടിമകളെ എനിക്കു വിട്ടുതരണം, അവനെതിരെ നിങ്ങള്‍ ആഢ്യത്വം കാട്ടരുത്, ഞാന്‍ നിങ്ങളിലേക്കുള്ള വിശ്വസ്ത ദൂതനാണ്, സ്പഷ്ടമായ തെളിവ് നിങ്ങള്‍ക്ക് ഞാന്‍ ഹാജറാക്കാം' എന്ന സന്ദേശവുമായി സമാദരണീയനായ ഒരു ദൂതന്‍ അവരെ സമീപിക്കുകയുണ്ടായി.⁵
നിങ്ങളെന്നെ എറിഞ്ഞുകൊല്ലാതിരിക്കാന്‍ എന്റെയും നിങ്ങളുടെയും നാഥനായവനോട് ഞാന്‍ കാവല്‍ തേടിയിരിക്കുന്നു, നിങ്ങളെന്നെ അംഗീകരിക്കുന്നില്ലെങ്കില്‍ കൈയേറ്റത്തില്‍ നിന്ന് ഒഴിവാക്കുക.⁶

അവര്‍ അധര്‍മകാരികളായ ജനപഥമാണെന്നതിനാല്‍ അദ്ദേഹം നാഥനോട് സഹായം തേടി പ്രാര്‍ത്ഥിച്ചു. ഉത്തരവുണ്ടായി: 'എന്റെ അടിമകളുമായി രാത്രി പ്രയാണം ചെയ്യണം, നിങ്ങള്‍ പിന്തുടരപ്പെടുന്നവര്‍ തന്നെയായിരിക്കും. ചെങ്കടലിനെ പ്രശാന്തമായി വിട്ടേക്കുക. അവര്‍ മുക്കിക്കൊല്ലപ്പെടുന്ന ഒരു സേനാവ്യൂഹം തന്നെയാകുന്നു!'⁷
എത്രയെത്ര ഉദ്യാനങ്ങളും അരുവികളും കാര്‍ഷിക വിഭവങ്ങളും വിശിഷ്ട സൗധങ്ങളും സാമോദം അനുഭവിക്കുകയായിരുന്ന സൗഭാഗ്യങ്ങളുമാണവര്‍ ഉപേക്ഷിച്ചത്. അങ്ങനെയായിരുന്നു അതിന്റെ പരിണതി! എന്നിട്ട് മറ്റൊരു ജനപഥത്തിന്ന് നാമത് അവകാശപ്പെടുത്തി. അവരെയോര്‍ത്ത് ആകാശമോ ഭൂമിയോ കരഞ്ഞില്ല; അവധി നല്‍കപ്പെട്ടവരായതുമില്ല അവര്‍.⁸

ഇസ്രയേല്യരെ ഹീനമായ ശിക്ഷയില്‍ -ഫിര്‍ഔനില്‍- നിന്നു നാം രക്ഷപ്പെടുത്തുക തന്നെ ചെയ്തു. അവന്‍ അഹങ്കാരിയും അധര്‍മകാരികളില്‍ പെട്ടവനുമായിരുന്നു. അറിഞ്ഞുകൊണ്ടു തന്നെ ഇസ്രയേല്യരെ ലോക ജനതയില്‍ നിന്ന് പ്രത്യേകം നാം തെരഞ്ഞെടുക്കുകയും സ്പഷ്ടമായ പരീക്ഷണമുള്‍ക്കൊള്ളുന്ന ചില ദൃഷ്ടാന്തങ്ങള്‍ അവര്‍ക്കു നല്‍കുകയും ചെയ്തു.⁹
'ആദ്യമരണമല്ലാതെ മറ്റൊന്നും നമുക്കുണ്ടാവില്ല, ഉയിര്‍ത്തെഴുന്നേല്‍പിക്കപ്പെടുന്നതുമല്ല നാം; ഇനി, നേരാണു നിങ്ങള്‍ പറയുന്നതെങ്കില്‍ ഞങ്ങളുടെ പൂര്‍വികരെ പുനര്‍ജനിപ്പിച്ചു കൊണ്ടുവരൂ' എന്ന് അവര്‍ ജല്‍പിച്ചു. ഇവരാണോ ഏറെ ശ്രേഷ്ഠര്‍ അതോ തുബ്ബഇന്റെയാളുകളും പൂര്‍വികരുമോ? അവരെയെല്ലാം നാം സംഹരിക്കുകയുണ്ടായി. അധര്‍മകാരികള്‍ തന്നെയായിരുന്നു അവര്‍.¹⁰

ഭുവന-വാനങ്ങളും അവയ്ക്കിടയിലുള്ളതും നാം വിനോദമായി പടച്ചതല്ല; സത്യനിഷ്ഠമായി തന്നെയാണതു രണ്ടും സൃഷ്ടിച്ചിട്ടുള്ളത്. പക്ഷേ, ജനങ്ങളില്‍ മിക്കവരും അത് മനസ്സിലാക്കുന്നില്ല. ആ നിര്‍ണായക വിധിയുടെ ദിനം തന്നെയാണ്-ഒരു മിത്രം മറ്റൊരു മിത്രത്തിനു ഒരുവിധ ഉപകാരവും ചെയ്യാത്ത, ഒരുതരം സഹായവും ആര്‍ക്കും ലഭിക്കാത്ത ദിവസം-അവര്‍ക്കെല്ലാവര്‍ക്കുമുള്ള നിശ്ചിത സമയം- അല്ലാഹു കാരുണ്യം ചൊരിഞ്ഞവരൊഴികെ; അവന്‍ അജയ്യനും പരമദയാലുവുമത്രേ.

നിശ്ചയം, ഉരുകിയ ലോഹം പോലുള്ള സഖ്ഖൂം വൃക്ഷഫലമാണ് കുറ്റവാളിയുടെ നരകഭോജ്യം. തിളക്കുന്ന ജലതുല്യം വയറുകളില്‍ അതു തിളച്ചുമറിയും. 'ഇവനെപ്പിടിച്ച് ജ്വലിക്കുന്ന നരകത്തിലേക്ക് കൊണ്ടുപോവുകയും അവന്റെ ശിരസ്സില്‍ അഗ്നിജലം കോരിയൊഴിക്കുകയും ചെയ്യുക!' 'ആസ്വദിക്കുക, നീ വലിയ അജയ്യനും സംപൂജ്യനുമായിരുന്നല്ലോ'. നിങ്ങള്‍ സംശയഗ്രസ്തരായിരുന്ന നരകശിക്ഷയാണിത്.¹¹

ജീവിതത്തില്‍ സൂക്ഷ്മത പുലര്‍ത്തിയിരുന്നവര്‍ ഉദ്യാനങ്ങളിലും അരുവികളിലുമായി വിശ്വസ്തമായ വാസഗേഹത്തിലാണ്. നേര്‍മയായതും കട്ടിയുള്ളതുമായ പട്ടുവസ്ത്രങ്ങള്‍ അവര്‍ ധരിക്കുന്നതും മുഖാമുഖം ഇരിക്കുന്നതുമാണ്; അങ്ങനെ വിശാലാക്ഷികളായ വെളുത്ത സുന്ദരികളെ അവര്‍ക്കു നാം ഇണകളാക്കും. സുരക്ഷിതരായി, എല്ലാതരം പഴങ്ങളും അവരാവശ്യപ്പെടും. ആദ്യത്തേതല്ലാതെ മറ്റൊരു മരണം അവര്‍ക്കവിടെ ആസ്വദിക്കേണ്ടതില്ല.¹²
അല്ലാഹു അവരെ നരകശിക്ഷയില്‍ നിന്നു സംരക്ഷിക്കുകയും ചെയ്യും- നാഥന്റെ ഔദാര്യമാണത്. മഹത്തായ വിജയമത്രേ അത്. നബീ, ഈ ഖുര്‍ആന്‍ അങ്ങയുടെ ഭാഷയില്‍ നാം അതീവ ലളിതമാക്കിയത് അവര്‍ ആലോചിച്ചു മനസ്സിലാക്കാനാണ്; അതുകൊണ്ട് താങ്കള്‍ പ്രതീക്ഷിക്കുക, അവരും പ്രതീക്ഷിക്കുന്നവര്‍ തന്നെ.¹³