അസ്സുഖ്റുഫ് - الزخرف - Az-Zukhruf

ഹാ മീം. സ്പഷ്ടമാക്കുന്ന ഈ വേദഗ്രന്ഥം തന്നെ ശപഥം. നാമിതിനെ അറബി ഭാഷയില്‍ പാരായണം ചെയ്യപ്പെടുന്നതാക്കിയത് നിങ്ങള്‍ ചിന്തിച്ചു ഗ്രഹിക്കാന്‍ തന്നെയാണ്, തീര്‍ച്ച;¹
നമ്മുടെ പക്കല്‍ അത് മൂലഗ്രന്ഥത്തിലുള്ളതും ഉയര്‍ന്നതും തത്ത്വപൂര്‍ണവുമത്രേ. നിങ്ങള്‍ പരിധി വിട്ടുകടന്ന ഒരു ജനപഥമാണ് എന്നതിനാല്‍ ഈ ഖുര്‍ആന്‍ നിങ്ങളില്‍ നിന്ന് പിന്‍വലിച്ചുകളയുകയോ?²

പൂര്‍വിക സമൂഹങ്ങളില്‍ എത്രയെത്ര ദൂതരെ നാം നിയോഗിച്ചു. ഏതൊരു പ്രവാചകന്‍ തങ്ങളുടെയടുത്തു വന്നാലും അവര്‍ അദ്ദേഹത്തെ കളിയാക്കിവിടാതിരുന്നിട്ടില്ല. അങ്ങനെ, ഇവരെക്കാള്‍ കൈക്കരുത്തുണ്ടായിരുന്നവരെ നാം സംഹരിച്ചു കളഞ്ഞു. ആദിമ സമൂഹങ്ങളുടെ ഉപമകള്‍ കഴിഞ്ഞുപോയിട്ടുണ്ട്.³

ഭുവന-വാനങ്ങള്‍ പടച്ചുണ്ടാക്കിയത് ആരാണ് എന്ന് താങ്കള്‍ ചോദിച്ചാല്‍, അജയ്യനും സര്‍വജ്ഞനുമായ അല്ലാഹുവാണ് അവ സൃഷ്ടിച്ചത് എന്ന് അവര്‍ പ്രതികരിക്കും. ഭൂമിയെ നിങ്ങള്‍ക്കൊരു തൊട്ടില്‍ സമാനമാക്കിത്തന്നതും ഉദ്ദിഷ്ട സ്ഥലത്തെത്താന്‍ വേണ്ടി അതില്‍ ഭിന്നമാര്‍ഗങ്ങളുണ്ടാക്കിയതും⁴
അന്തരീക്ഷത്തില്‍ നിന്ന് നിര്‍ണിത അളവില്‍ മഴ വര്‍ഷിച്ചതും അവനാണ്- എന്നിട്ടതുകൊണ്ട് നിര്‍ജീവ ദേശത്തെ അവന്‍ സചേതനമാക്കി; അതുപോലെ ശ്മശാനങ്ങളില്‍ നിന്ന് നിങ്ങളും പുറത്തുകൊണ്ടുവരപ്പെടും-എല്ലാ ഇണകളെയും പടച്ചുണ്ടാക്കിയതും നിങ്ങള്‍ക്കു യാത്ര ചെയ്യാനുള്ള ജലയാനങ്ങളും കാലികളെയും ഏര്‍പ്പെടുത്തിയതും അവനാണ്.⁵
നിങ്ങളവയുടെ പുറത്തു കയറാനും ഇരിപ്പുറപ്പിച്ചാല്‍ നാഥന്റെ കാരുണ്യം അനുസ്മരിക്കാനും ഇങ്ങനെ പറയാനും വേണ്ടി: ഇത് ഞങ്ങള്‍ക്കു കീഴ്‌പ്പെടുത്തിയവന്‍ മഹോന്നതന്‍ തന്നെ! ഞങ്ങള്‍ക്കിത് വിധേയമാക്കാനാകുമായിരുന്നില്ല. ഞങ്ങള്‍ നാഥങ്കലേക്ക് തിരിച്ചുപോകുന്നവര്‍ തന്നെയാകുന്നു.

അല്ലാഹുവിന് തന്റെ അടിമകളില്‍ പെട്ട സന്താനങ്ങളെ മുശ്‌രിക്കുകള്‍ വരിച്ചിരിക്കുന്നു! വ്യക്തമായും നന്ദികെട്ടവന്‍ തന്നെയാണ് മനുഷ്യന്‍. അതല്ല, താന്‍ സൃഷ്ടിക്കുന്നതില്‍ ചിലരെ അല്ലാഹു സ്വപുത്രിമാരാക്കുകയും ആണ്‍മക്കളെ നിങ്ങള്‍ക്ക് പ്രത്യേകമായി തരികയും ചെയ്തതാണോ? ഇനി, കരുണാമയനായ അല്ലാഹുവിന്ന് ഉദാഹരിച്ച ആ പെണ്‍കുട്ടി തനിക്ക് പിറന്നിരിക്കുന്നു എന്ന് അവരിലൊരാള്‍ക്ക് ശുഭവാര്‍ത്ത നല്‍കപ്പെട്ടാല്‍ ദുഃഖിതനായി അവന്റെ മുഖം കറുത്തിരുണ്ടു പോകുന്നു. ആഭരണമണിയിച്ച് വളര്‍ത്തപ്പെടുകയും സ്പഷ്ടമായി സംവദിക്കാന്‍ കഴിയാതിരിക്കുകയും ചെയ്യുന്നവരെയാണോ അവന്റെ മക്കളാക്കുന്നത്?⁶

കരുണാവാരിധിയുടെ അടിമകളായ മലക്കുകള്‍ പെണ്ണുങ്ങളാണെന്നിവര്‍ ജല്‍പിക്കുന്നു! അവരെ സൃഷ്ടിക്കുന്നിടത്ത് ഇവര്‍ സന്നിഹിതരായിരുന്നോ? ഇവര്‍ സാക്ഷ്യം വഹിക്കുന്നത് ഉല്ലേഖിതമാകുന്നതും ചോദ്യം ചെയ്യപ്പെടുന്നതുമാണ്. പരമകാരുണികന്‍ ഉദ്ദേശിച്ചിരുന്നുവെങ്കില്‍ ഞങ്ങള്‍ മലക്കുകളെ ആരാധിക്കുമായിരുന്നില്ല എന്നവര്‍ തട്ടിവിട്ടു. അതിനെക്കുറിച്ച് യാതൊരു ജ്ഞാനവും അവര്‍ക്കില്ല; ഊഹിച്ചു പറയുകയാണവര്‍. അതല്ല, നേരത്തെ വല്ല വേദവും നാം കൊടുത്തിട്ട് അതുമുറുകെ പിടിച്ചിരിക്കയാണോ ഇവര്‍? അല്ല, 'പൂര്‍വികരെ ഞങ്ങള്‍ ഒരു പന്ഥാവിലായി കണ്ടെത്തി; അവരുടെ കാല്‍പാടുകളിലായി ഞങ്ങള്‍ സന്മാര്‍ഗ പ്രാപ്തരാവുക തന്നെ ചെയ്യും' എന്നവര്‍ ജല്‍പിക്കയുണ്ടായി.⁷

ഇങ്ങനെ, താങ്കള്‍ക്കു മുമ്പ് ഏതൊരു ദേശത്ത് നാം മുന്നറിയിപ്പുകാരെ നിയോഗിച്ചപ്പോഴും അവിടത്തെ ആഡംബരപ്രിയന്മാര്‍ ഇങ്ങനെയേ പ്രതികരിച്ചിട്ടുള്ളു: 'പൂര്‍വികരെ ഞങ്ങള്‍ ഒരു മാര്‍ഗത്തിലായി കണ്ടിരിക്കുന്നു; അവരുടെ കാലടികള്‍ പിന്തുടരുക തന്നെയാണ് ഞങ്ങള്‍.' ദൈവദൂതന്‍ ചോദിച്ചു: നിങ്ങള്‍ പൂര്‍വികരെ ഏതൊരു മാര്‍ഗത്തില്‍ കണ്ടെത്തിയോ, അതിനേക്കാള്‍ സന്മാര്‍ഗ ദര്‍ശകമായ സന്ദേശവുമായാണ് ഞാന്‍ ആഗതനായിട്ടുള്ളതെങ്കിലും അവരെത്തന്നെ പിന്തുടരുമോ? നിഷേധികള്‍ പ്രതികരിച്ചു: ഏതൊരു മതവുമായി നിങ്ങള്‍ നിയുക്തരായിരിക്കുന്നുവോ ഞങ്ങള്‍ അത് നിഷേധിക്കുന്നവര്‍ തന്നെയാകുന്നു!⁸
അപ്പോള്‍ അവരെ നാം ശിക്ഷിച്ചു. ആ നിഷേധികളുടെ പരിണതി എങ്ങനെയുണ്ടായിരുന്നു എന്ന് നിരീക്ഷിക്കുക.

ഇബ്‌റാഹീം നബി തന്റെ പിതാവിനോടും ജനതയോടും 'നിങ്ങളാരാധിക്കുന്നതില്‍ നിന്ന് ഞാന്‍ നിര്‍മുക്തനാകുന്നു' എന്നു പറഞ്ഞ സന്ദര്‍ഭം സ്മരണീയമത്രേ: 'എന്നാല്‍ എന്നെ സൃഷ്ടിച്ചവന്‍ എനിക്കു മാര്‍ഗദര്‍ശനം നല്‍കുന്നതാണ്'. അദ്ദേഹമത് തന്റെ സന്തതികളില്‍ ഒരനശ്വര മുദ്രാവാക്യമാക്കി, അവര്‍ സത്യത്തിലേക്ക് മടങ്ങാന്‍. പക്ഷേ, ഇവര്‍ക്കും പിതാക്കള്‍ക്കും ഞാന്‍ ജീവിത സൗഖ്യമേകി; അങ്ങനെ സത്യസിദ്ധാന്തവും അത് പ്രതിപാദിക്കുന്ന ഒരു ദൂതനും അവര്‍ക്ക് സമാഗതമായി. സത്യം വന്നെത്തിയപ്പോഴാകട്ടെ, അവര്‍ ജല്‍പിച്ചു: ഇതു മാരണമാകുന്നു; ഞങ്ങളിതു നിഷേധിക്കുക തന്നെയാണ്.⁹

മക്ക, ഥാഇഫ് എന്നീ രണ്ട് നഗരങ്ങളിലെ ഒരു ഉന്നത നേതാവിന്ന് എന്തുകൊണ്ട് ഈ ഖുര്‍ആന്‍ അവതീര്‍ണമായില്ല എന്ന് നിഷേധികള്‍ ചോദിക്കുകയാണ്- താങ്കളുടെ നാഥന്റെ കാരുണ്യം അവരാണോ വിഹിതം വെക്കുക? ഐഹിക ലോകത്ത് അവര്‍ക്കിടയിലെ ജീവിത മാര്‍ഗങ്ങള്‍ ഓഹരി ചെയ്തതും ചിലര്‍ മറ്റു ചിലരെ ആശ്രിതരാക്കും വിധം ഒരു പക്ഷത്തെ മറ്റൊരു പക്ഷത്തെക്കാള്‍ പല പദവികളുയര്‍ത്തിയതും നാമാണ്. അവര്‍ ശേഖരിച്ചു വെക്കുന്ന ഭൗതിക വിഭവങ്ങളെക്കാള്‍ ഉദാത്തമായത് താങ്കളുടെ നാഥന്റെ അനുഗ്രഹമത്രേ.¹⁰
മനുഷ്യര്‍ ഒറ്റ നിഷേധീ സമൂഹമാവുകയില്ലായിരുന്നുവെങ്കില്‍ കരുണാമയനായ അല്ലാഹുവിനെ അവിശ്വസിക്കുന്നവരുടെ ഗൃഹങ്ങള്‍ക്ക് വെള്ളികൊണ്ടുള്ള മേല്‍പുരകളും കയറാനുള്ള ഗോവണികളും വാതിലുകളും ചാരിയിരിക്കാവുന്ന കട്ടിലുകളും മറ്റു സ്വര്‍ണാലങ്കാരങ്ങളും നാം കൊടുക്കുമായിരുന്നേനെ. എന്നാല്‍, ഐഹിക ജീവിതത്തിന്റെ സുഖഭോഗങ്ങള്‍ മാത്രമാണിവയൊക്കെയും; താങ്കളുടെ നാഥങ്കല്‍, ജീവിതത്തില്‍ സൂക്ഷ്മത പുലര്‍ത്തുന്നവര്‍ക്കുള്ളതത്രേ പാരത്രിക നേട്ടം.¹¹

ആരൊരാള്‍ കരുണാമയനായ അല്ലാഹുവിന്റെ സ്മരണയില്‍ നിന്ന് വ്യതിചലിക്കുന്നുവോ, അവനൊരു പിശാചിനെ നാം ഏര്‍പ്പാടാക്കുന്നതും ആ ചെകുത്താന്‍ അവന്റെ സന്തത സഹചാരിയായിരിക്കുന്നതുമാകുന്നു. നിശ്ചയം, ആ പിശാചുക്കള്‍ അവരെ സന്മാര്‍ഗത്തില്‍ നിന്ന് പ്രതിരോധിക്കുന്നതാണ്; എന്നാല്‍ തങ്ങള്‍ നേര്‍മാര്‍ഗ പ്രാപ്തരാണെന്നാണ് അവര്‍ ധരിക്കുക. അങ്ങനെ, നമ്മുടെ സന്നിധിയിലെത്തുമ്പോള്‍ അവന്‍ പറയും: എനിക്കും നിനക്കുമിടയില്‍ ഉദയാസ്തമന ചക്രവാളങ്ങളുടെ ദൈര്‍ഘ്യമുണ്ടായിരുന്നെങ്കില്‍ എത്ര നന്നായിരുന്നു! എത്ര ഹീനനാണ് ആ സന്തത സഹചാരി! അതിക്രമം ചെയ്തിരുന്നതിനാല്‍ ശിക്ഷയില്‍ പങ്കാളികളാണ് എന്നത് നിങ്ങള്‍ക്ക് ഒട്ടുമേ പ്രയോജനദായകമല്ലതന്നെ.¹²

നബീ, ബധിരരെ ശ്രവിപ്പിക്കാനും അന്ധരെയും സ്പഷ്ടമായി വഴിതെറ്റിയവരെയും മാര്‍ഗദര്‍ശനം ചെയ്യാനും അങ്ങേക്കാകുമോ? ഇനി, അങ്ങയെ നിര്യാതനാക്കുന്നുവെങ്കില്‍ അവര്‍ക്കു നേരെ നാം ശിക്ഷാനടപടിയെടുക്കുക തന്നെ ചെയ്യും. അതല്ല, അവര്‍ക്കുള്ള വാഗ്ദത്ത ശിക്ഷ അങ്ങേക്കു കാട്ടിത്തരാനുദ്ദേശിച്ചാല്‍ അതിനും നാം കരുത്തുറ്റവനാണ്. അതുകൊണ്ട് ലഭ്യമായ ദിവ്യസന്ദേശം മുറുകെ പിടിക്കുക; അങ്ങ് ഋജുവായ പന്ഥാവില്‍ തന്നെയാകുന്നു. നിശ്ചയം, ഈ ഖുര്‍ആന്‍ താങ്കള്‍ക്കും സ്വജനതക്കുമുള്ള ഒരു ഉദ്‌ബോധനം തന്നെ; അതു സംബന്ധിച്ച് പിന്നീട് നിങ്ങള്‍ ചോദ്യം ചെയ്യപ്പെടുന്നതാണ്.¹³

പരമകാരുണികനായ അല്ലാഹുവിനു പുറമെ ആരാധനയര്‍പിക്കപ്പെടേണ്ട ഏതെങ്കിലും ദൈവങ്ങളെ നാം നിര്‍ണയിച്ചിട്ടുണ്ടോ എന്ന് നേരത്തെ നാമയച്ച ദൂതന്മാരോട് താങ്കള്‍ അന്വേഷിക്കുക.¹⁴
നമ്മുടെ ദൃഷ്ടാന്തങ്ങളുമായി മൂസാ നബിയെ ഫറോവയുടെയും തന്റെ പ്രമുഖരുടെയുമടുത്തേക്ക് നാമയക്കുകയും ഞാന്‍ പ്രപഞ്ച സംരക്ഷകന്റെ ദൂതനാണ് എന്ന് അദ്ദേഹം പ്രസ്താവിക്കുകയുമുണ്ടായി. അങ്ങനെ നമ്മുടെ ദൃഷ്ടാന്തങ്ങളുമായി മൂസാ നബി ചെന്നപ്പോള്‍ അവരതാ പരിഹസിച്ചു ചിരിക്കുന്നു! മുമ്പത്തേതിനെക്കാള്‍ ഗൗരവതരമായിക്കൊണ്ട് മാത്രമാണ് ഓരോ ദൃഷ്ടാന്തവും അവര്‍ക്കു നാം കാണിച്ചത്. പശ്ചാത്തപിച്ചു മടങ്ങാനായി അവരെ നാം ശിക്ഷ കൊണ്ട് പിടികൂടുകയുമുണ്ടായി.

അവര്‍ ജല്‍പിച്ചു: ഹേ മാരണക്കാരാ, നിന്റെ നാഥന്റെ വാഗ്ദത്ത ശിക്ഷ ഞങ്ങളില്‍ നിന്നകറ്റാന്‍ അവനോടു പ്രാര്‍ത്ഥിക്കൂ; ഞങ്ങള്‍ സന്മാര്‍ഗ പ്രാപ്തരാവുക തന്നെ ചെയ്യാം. എന്നിട്ട് അവരില്‍ നിന്ന് ശിക്ഷ ദൂരീകരിച്ചപ്പോള്‍ അവരതാ കരാര്‍ലംഘകരായിരിക്കുന്നു!¹⁵
ഫറോവ തന്റെ ജനങ്ങളില്‍ വിളംബരപ്പെടുത്തി: എന്റെ ജനമേ, ഈജിപ്തിന്റെ രാജാധിപത്യവും എനിക്കു താഴെ ഒഴുകിക്കൊണ്ടിരിക്കുന്ന ഈ നദികളും എന്റേതല്ലേ? ഇതൊന്നും നിങ്ങള്‍ കാണുന്നില്ലേ? അല്ല, അധമനും സ്പഷ്ടഭാഷണത്തിനാകാത്തവനുമായ ഇവനെക്കാള്‍ ശ്രേഷ്ഠന്‍ ഞാന്‍ തന്നെയാണ്. ഇവന്ന് എന്തുകൊണ്ടാണ് സ്വര്‍ണവളകളണിയിക്കപ്പെടുകയോ കൂട്ടാളികളായി മലക്കുകള്‍ വരികയോ ചെയ്യാത്തത്?¹⁶

അങ്ങനെ ഫിര്‍ഔന്‍ തന്റെ ജനത്തെ പോഴന്മാരാക്കുകയും അവര്‍ അവനെ അനുസരിക്കുകയും ചെയ്തു. അധര്‍മകാരികളായ ഒരു ജനസഞ്ചയം തന്നെയായിരുന്നു അവര്‍. അങ്ങനെ നമ്മെ പ്രകോപിതരാക്കിയപ്പോള്‍ ഒന്നടങ്കം മുക്കിക്കൊന്ന് അവരെ നാം ശിക്ഷിക്കുകയും പില്‍ക്കാലക്കാര്‍ക്ക് ഉപമയും ആദിമ മാതൃകയുമാക്കുകയും ചെയ്തു.¹⁷

ഈസബ്‌നുമര്‍യം ഒരു ഉപമയായി അവതരിപ്പിക്കപ്പെട്ടപ്പോള്‍ താങ്കളുടെ ജനമതാ ജയഭേരി മുഴക്കുന്നു; ഞങ്ങളുടെ ദൈവങ്ങളാണോ ശ്രേഷ്ഠം അതോ അദ്ദേഹമോ എന്ന് അവര്‍ ചോദിക്കയുമുണ്ടായി.¹⁸
ഒരു കുതര്‍ക്കത്തിനായി മാത്രമാണ് താങ്കളോടവര്‍ അതെടുത്തുകാട്ടിയത്. ദുര്‍വാശിക്കാരായൊരു വിഭാഗമാണവര്‍. നാം അനുഗ്രഹം ചൊരിയുകയും ഇസ്രയേല്യര്‍ക്ക് മാതൃകയാക്കുകയും ചെയ്ത നമ്മുടെ ഒരടിമ മാത്രമാണദ്ദേഹം. നാമുദ്ദേശിച്ചിരുന്നുവെങ്കില്‍ നിങ്ങള്‍ക്ക് പകരമായി മലക്കുകളെ സൃഷ്ടിക്കുമായിരുന്നു. ഈസാ നബി അന്ത്യനാളിന്റെ ഒരു വിജ്ഞാപനമാണ്.¹⁹
അതുകൊണ്ട് അന്ത്യദിനത്തെക്കുറിച്ച് നിങ്ങള്‍ സന്ദേഹിക്കേണ്ടതില്ല, എന്നെ അനുധാവനം ചെയ്യുക-അതാണ് ഋജുവായ പന്ഥാവ്. അതില്‍ നിന്ന് പിശാച് നിങ്ങളെ പ്രതിരോധിക്കാതിരിക്കട്ടെ. അവന്‍ നിങ്ങളുടെ വ്യക്തമായ പ്രതിയോഗി തന്നെയാണ്. സ്പഷ്ടമായ പ്രമാണങ്ങളുമായി വന്ന് ഈസാ നബി പ്രസ്താവിച്ചു: തത്ത്വജ്ഞാനസമേതവും നിങ്ങള്‍ ഭിന്നപക്ഷരായിരുന്ന ചിലത് പ്രതിപാദിച്ചു തരാനുമാണ് ഞാന്‍ വന്നിരിക്കുന്നത്. അതുകൊണ്ട് നിങ്ങള്‍ അല്ലാഹുവിനെ സൂക്ഷിച്ചും എന്നെ അനുസരിച്ചും ജീവിക്കുക. എന്റെയും നിങ്ങളുടെയും നാഥന്‍ അല്ലാഹു തന്നെയാണ്, അതുകൊണ്ട് അവനെ ആരാധിക്കുക-അതാണ് ഋജുവായ പന്ഥാവ്.

എന്നാല്‍ പരസ്പരം പല ചേരികളായി ഭിന്നിക്കയാണവര്‍ ചെയ്തത്.²⁰
അങ്ങനെ വേദനാജനകമായ ഒരു ദിവസത്തെ ശിക്ഷയാല്‍ അതിക്രമികള്‍ക്ക് മഹാനാശമുണ്ട്. നിനച്ചിരിക്കാതെ, യാദൃച്ഛികമായി അന്ത്യനാളിന്റെ ആഗമമല്ലാതെ മറ്റെന്തുണ്ടവര്‍ക്ക് കാത്തിരിക്കാന്‍? മിത്രങ്ങളന്ന് പരസ്പരം ശത്രുക്കളായിരിക്കും; സൂക്ഷ്മാലുക്കളൊഴിച്ച്.

സത്യവിശ്വാസം കൈക്കൊള്ളുകയും കീഴ്‌പ്പെട്ട് ജീവിക്കുകയും ചെയ്തിരുന്ന എന്റെ അടിമകളേ, നിങ്ങള്‍ക്കിന്ന് ഒരുവിധ ഭയവും സങ്കടവും വേണ്ടതില്ല. നിങ്ങളും ഇണകളും ആഹ്ലാദ നിര്‍ഭരരായി സ്വര്‍ഗപ്രാപ്തരായിക്കൊള്ളുക. സ്വര്‍ണത്തിന്റെ തളികകളും കോപ്പകളുമായി അവര്‍ വലംവെക്കപ്പെടും. മനസ്സുകള്‍ ആഗ്രഹിക്കുന്നതും നയനങ്ങള്‍ക്ക് ആസ്വാദ്യകരവുമായതൊക്കെയും അവിടെയുണ്ടാകും. നിങ്ങളവിടെ ശാശ്വത നിവാസികളായിരിക്കുന്നതാണ്. അനുഷ്ഠിച്ചുകൊണ്ടിരുന്ന കര്‍മങ്ങളുടെ ഫലമായി നിങ്ങള്‍ക്ക് അവകാശമായി നല്‍കപ്പെട്ട സ്വര്‍ഗമാണിത്. നിങ്ങള്‍ക്കവിടെ സുലഭമായി പഴങ്ങളുണ്ടാകുന്നതും നിങ്ങള്‍ അതു തിന്നുകൊണ്ടിരിക്കുന്നതുമാകുന്നു .²¹

അധര്‍മകാരികള്‍ നരകശിക്ഷയില്‍ -അത് ലഘൂകൃതമാകില്ല- ശാശ്വതരും ഭഗ്നാശരുമായിരിക്കും. നാമവരോട് അതിക്രമം കാട്ടിയിട്ടില്ല; പ്രത്യുത, അക്രമികള്‍ അവര്‍ തന്നെയായിരുന്നു.²²
അവര്‍ വിളിച്ചു കേഴും: 'ഹേ മാലിക്, താങ്കളുടെ നാഥന്‍ ഞങ്ങളെയൊന്ന് മരിപ്പിച്ചു തരട്ടെ.' അദ്ദേഹം പ്രതികരിക്കും. നിശ്ചയം നിങ്ങള്‍ ഇവിടെത്തന്നെ താമസിക്കേണ്ടവരാകുന്നു; നിങ്ങള്‍ക്കു നാം സത്യവുമായി വന്നു; പക്ഷേ, നിങ്ങളില്‍ മിക്കവരും അതിനെ വെറുക്കുന്നവരായിരുന്നു.²³
അതല്ല, അവരെന്തെങ്കിലും തീരുമാനിച്ചുറച്ചിട്ടുണ്ടോ? നാമും ഖണ്ഡിത തീരുമാനമെടുത്തിരിക്കുന്നു. അതോ അവരുടെ രഹസ്യ-നിഗൂഢ ചിന്തകള്‍ നാമറിയുന്നില്ലെന്നാണോ അവരുടെ ധാരണ? അതെ, നമ്മുടെ മലക്കുകള്‍ അതു രേഖപ്പെടുത്തിവെക്കുന്നുണ്ട്.²⁴

നബീ, പ്രഖ്യാപിക്കുക: കരുണാനിധിയായ അല്ലാഹുവിന് സന്താനമുണ്ടായിരുന്നെങ്കില്‍ ഞാനാണതിനെ ആദ്യമാരാധിക്കുക. എന്നാല്‍ ഭുവന-വാനങ്ങളുടെയും സിംഹാസനത്തിന്റെയും നാഥന്‍ അവരുടെ വിശേഷണങ്ങളില്‍ നിന്ന് എത്രയോ മഹോന്നതനത്രേ. അതിനാല്‍ അവരെ താങ്കള്‍ വിട്ടേക്കുക. മുന്നറിയിപ്പ് നല്‍കപ്പെടുന്ന ദിവസത്തെ അഭിമുഖീകരിക്കുന്നതുവരെയും അവര്‍ വിനോദങ്ങളിലേര്‍പ്പെടുകയും ഫലശൂന്യവൃത്താന്തങ്ങളില്‍ രമിക്കുകയും ചെയ്യട്ടെ. ഭൂമിയിലും ആകാശത്തും ദൈവമായിട്ടുള്ള അവന്‍ യുക്തിമാനും സര്‍വജ്ഞനുമാകുന്നു.²⁵
ഭുവന-വാനങ്ങളുടെയും അവയ്ക്കിടയിലുള്ളതിന്റെയും അധിപന്‍ അനുഗ്രഹ സമ്പൂര്‍ണനത്രേ. അന്ത്യനാളിനെക്കുറിച്ച ജ്ഞാനം അവങ്കലാണ്; അവങ്കലേക്കു തന്നെയാണ് നിങ്ങള്‍ മടക്കപ്പെടുക. അവനെ വിട്ട് ബഹുദൈവ വിശ്വാസികള്‍ ആരെ ആരാധിക്കുന്നുവോ അവ ശുപാര്‍ശാധികാരം സ്വായത്തമാക്കുന്നില്ല, ബോധപൂര്‍വം സത്യസാക്ഷികളായവരൊഴികെ.²⁶

അവരെ പടച്ചുണ്ടാക്കിയത് ആരാണെന്ന് താങ്കളവരോട് ചോദിച്ചാല്‍ അല്ലാഹുവാണെന്നുതന്നെയാണവര്‍ പ്രതികരിക്കുക; എന്നിട്ട്, എങ്ങോട്ടാണവര്‍ വ്യതിചലിപ്പിക്കപ്പെടുന്നത്? എന്റെ നാഥാ, ഇവര്‍ വിശ്വസിക്കുകയേ ചെയ്യാത്തൊരു വിഭാഗമാകുന്നു എന്ന് പ്രവാചകന്‍ പരിഭവിക്കുന്നതും അല്ലാഹുവിന്നറിയാം. അതുകൊണ്ട് താങ്കള്‍ അവരെ അവഗണിക്കുകയും 'സലാം' എന്ന് പറയുകയും ചെയ്യുക. പിന്നീട് യാഥാര്‍ത്ഥ്യം അവരറിയുന്നതാകുന്നു!²⁷