അശ്ശൂറാ - الشورى - Ash-Shura

ഹാ മീം ഐന്‍ സീന്‍ ഖാഫ്. ഇങ്ങനെ താങ്കള്‍ക്കും പൂര്‍വിക ദൂതന്മാര്‍ക്കും അജയ്യനും യുക്തിമാനുമായ അല്ലാഹു ദിവ്യസന്ദേശം നല്‍കുന്നു. ഭുവന-വാനങ്ങളിലുള്ളതൊക്കെയും അവന്റേതാണ്. അത്യുന്നതനും മഹാനുമാണവന്‍; അവനെക്കുറിച്ച ഭയത്താല്‍ വാനങ്ങള്‍ മുകളില്‍ നിന്ന് പൊട്ടിപ്പിളരുമാറാകുന്നുണ്ട്. മലക്കുകള്‍ തങ്ങളുടെ നാഥനെ സ്തുതിക്കുന്നതോടൊപ്പം പ്രകീര്‍ത്തിക്കുകയും ഭൂനിവാസികള്‍ക്ക് പാപമോചനമര്‍ഥിക്കുകയും ചെയ്യുന്നു. നിശ്ചയം, അല്ലാഹു തന്നെയാണ് ഏറെ മാപ്പരുളുന്നവനും കരുണാമയനുമെന്നറിയുക. അവനെ വിട്ട് മറ്റു രക്ഷാധികാരികളെ വരിച്ചവരെ അവന്‍ നിരീക്ഷിച്ചുകൊണ്ടിരിക്കുന്നവനാണ്; അവരെക്കുറിച്ച ചുമതലയൊന്നും താങ്കള്‍ക്കില്ല.¹

അങ്ങനെ, മക്കക്കാരെയും അതിനുചുറ്റുമുള്ളവരെയും താക്കീത് ചെയ്യാനും സംശയരഹിതമായ സംഗമനാളിനെപ്പറ്റി മുന്നറിയിപ്പു നല്‍കാനും വേണ്ടി താങ്കള്‍ക്കു നാം അറബി ഭാഷയിലുള്ള ഈ ഖുര്‍ആന്‍ ദിവ്യസന്ദേശമായി നല്‍കിയിരിക്കുകയാണ്.²
അന്ന് ഒരുപക്ഷം സ്വര്‍ഗത്തിലും മറ്റൊരുപക്ഷം നരകത്തിലുമായിരിക്കും. അല്ലാഹു ഉദ്ദേശിച്ചിരുന്നുവെങ്കില്‍ അവരെയൊക്കെയും ഒറ്റസമുദായമാക്കിയിരുന്നേനെ. എന്നാല്‍ ഉദ്ദേശിക്കുന്നവരെ തന്റെ അനുഗ്രഹത്തില്‍ അവന്‍ പ്രവേശിപ്പിക്കുന്നു; അക്രമികള്‍ക്ക് ഒരുവിധ സംരക്ഷകനും സഹായിയും ഉണ്ടാകുന്നതല്ല.³
അതല്ല, അവനെ വിട്ട് ചില സംരക്ഷകരെ വരിച്ചിട്ടുണ്ടോ അവര്‍? എന്നാല്‍ അല്ലാഹു തന്നെയാണ് രക്ഷാധികാരി. അവനാണ് മരിച്ചവരെ ജീവിപ്പിക്കുക, സര്‍വ കാര്യങ്ങള്‍ക്കും കഴിവുറ്റവനാണവന്‍.

നിങ്ങള്‍ ഭിന്നപക്ഷരായിട്ടുള്ളത് ഏതു വിഷയത്തിലായാലും അതിലെ വിധികര്‍തൃത്വം അല്ലാഹുവിനുള്ളതാണ്. എന്റെ നാഥനായ അല്ലാഹു അവനാകുന്നു. അവങ്കലേക്കു ഞാന്‍ കാര്യങ്ങള്‍ ഭരമേല്‍പിക്കുകയും വിനയാന്വിതനായി മടങ്ങുകയുമാണ്.⁴
ഭുവന-വാനങ്ങളുടെ സ്രഷ്ടാവാണവന്‍. നിങ്ങള്‍ക്കായി സ്വന്തം വര്‍ഗത്തില്‍ നിന്നുതന്നെയുള്ള ഇണകളെ -കാലികളില്‍ നിന്നുള്ള ജോഡികളെയും- അവനുണ്ടാക്കി. അതുവഴി നിങ്ങളുടെ അംഗസംഖ്യ അവന്‍ വര്‍ധിപ്പിക്കുന്നു. അവനെപ്പോലെ വേറെ യാതൊന്നും തന്നെയില്ല. എല്ലാം കേള്‍ക്കുന്നവനും നന്നായി കാണുന്നവനുമാണവന്‍. ഭുവന-വാനങ്ങളുടെ താക്കോലുകള്‍ അവനുള്ളതാണ്. താനുദ്ദേശിക്കുന്നവര്‍ക്ക് അവന്‍ ഉപജീവനം വിശാലമാക്കുന്നു; മറ്റു ചിലര്‍ക്ക് സങ്കുചിതവുമാക്കും. ഏതുകാര്യവും നന്നായറിയുന്നവനാണവന്‍.

നൂഹ് നബി, ഇബ്‌റാഹീം നബി, മൂസാ നബി, ഈസാ നബി എന്നിവരോട് നാം അനുശാസിച്ചതും താങ്കള്‍ക്കു നാം സന്ദേശം നല്‍കിയതുമായ ഒരു സംഹിത -നേരായ രീതിയില്‍ മതനിഷ്ഠ നിലനിറുത്തുകയും അതില്‍ പക്ഷാന്തരമുണ്ടാകാതിരിക്കുകയും വേണമെന്ന്- നിങ്ങള്‍ക്കവന്‍ നിയമമാക്കിയിരിക്കുന്നു. ബഹുദൈവ വിശ്വാസികളെ ഏതൊരാശയത്തിലേക്ക് നിങ്ങള്‍ ക്ഷണിക്കുന്നുവോ അതവര്‍ക്ക് ദുഷ്‌ക്കരമായിട്ടുണ്ട്.⁵
ഉദ്ദേശിക്കുന്നവരെ അല്ലാഹു തന്റെയടുത്തേക്ക് തെരഞ്ഞെടുക്കുകയും വിധേയത്വമുള്ളവരെ തന്നിലേക്കവന്‍ വഴികാട്ടുകയും ചെയ്യുന്നു. പൂര്‍വവേദക്കാര്‍ -പരസ്പര വിരോധത്താല്‍- ഭിന്നപക്ഷക്കാരായത് തങ്ങള്‍ക്ക് വേദജ്ഞാനം വന്നുകിട്ടിയ ശേഷം തന്നെയായിരുന്നു. ഒരു നിശ്ചിത അവധി വരെയുള്ള താങ്കളുടെ നാഥന്റെ കല്‍പന മുന്‍കടന്നിട്ടില്ലായിരുന്നുവെങ്കില്‍ അവര്‍ക്കിടയിലുള്ള തീര്‍പ്പ് തല്‍ക്ഷണം നടന്നേനെ. അവര്‍ക്കു ശേഷം വേദാനന്തരവരായി വന്നവര്‍ അതിനെക്കുറിച്ച് രൂക്ഷമായ സന്ദേഹത്തില്‍ തന്നെയാകുന്നു.⁶

അതുകൊണ്ട് മതത്തിലേക്കുള്ള പ്രബോധനം നിര്‍വഹിക്കുകയും ശാസനാനുസൃതം ഋജുവായി നിലകൊള്ളുകയും ചെയ്യുക; അവരുടെ സ്വേച്ഛകള്‍ പിന്‍പറ്റരുത്. താങ്കള്‍ പ്രഖ്യാപിക്കുക: അല്ലാഹു അവതരിപ്പിച്ച ഏതു വേദത്തിലും ഞാന്‍ വിശ്വസിക്കുകയും നിങ്ങള്‍ക്കു മധ്യേ നീതി പ്രവര്‍ത്തിക്കാന്‍ ഞാന്‍ ശാസിക്കപ്പെടുകയും ചെയ്തിരിക്കുന്നു. ഞങ്ങളുടെയും നിങ്ങളുടെയും നാഥന്‍ അല്ലാഹുവാണ്. ഞങ്ങള്‍ക്ക് ഞങ്ങളുടെയും നിങ്ങള്‍ക്ക് നിങ്ങളുടെയും കര്‍മങ്ങളുണ്ടായിരിക്കും. ഞങ്ങള്‍ക്കും നിങ്ങള്‍ക്കുമിടയില്‍ ഒരുവിധ തര്‍ക്കത്തിന്റെയുമാവശ്യമില്ല.⁷
അല്ലാഹു നമ്മെ സംഗമിപ്പിക്കുന്നതാണ്. അവങ്കലേക്കു തന്നെയാണ് മടങ്ങിച്ചെല്ലുക. അല്ലാഹുവിന്റെ ക്ഷണം സ്വീകരിച്ച ശേഷം അവന്റെ മതകാര്യത്തില്‍ കുതര്‍ക്കങ്ങള്‍ നടത്തുന്നവരുടെ പ്രമാണം തങ്ങളുടെ നാഥങ്കല്‍ ഫലശൂന്യമായിപ്പോകുന്നതാണ്. ദൈവകോപവും കഠിനശിക്ഷയും അവര്‍ക്കുണ്ടാകും.

സത്യസന്ധതയുടെ വേദവും നീതിയുടെ ത്രാസും അവതരിപ്പിച്ചത് അല്ലാഹുവാകുന്നു. താങ്കള്‍ എന്തറിഞ്ഞു? അന്ത്യനാള്‍ സമീപസ്ഥമായേക്കാം; അതില്‍ വിശ്വാസമില്ലാത്തവര്‍ അതിനു ധൃതികാട്ടുന്നു, വിശ്വസിച്ചവരോ? ഭയവിഹ്വലരും. അത് സത്യം തന്നെയാണെന്ന് അവര്‍ക്കറിയാം. അന്ത്യനാളിനെപ്പറ്റി വാഗ്വാദം നടത്തുന്നവര്‍ വിദൂരമായ ദുര്‍മാര്‍ഗത്തില്‍ തന്നെയാണെന്നു ഗ്രഹിക്കുക. തന്റെ അടിമകളോട് കനിവാര്‍ന്നവനാണ് അല്ലാഹു. താനുദ്ദേശിക്കുന്നവര്‍ക്ക് അവന്‍ ഉപജീവനം നല്‍കുന്നു; കരുത്തനും അജയ്യനുമാണവന്‍.⁸

പാരത്രിക ലോകത്തെ പ്രതിഫലമാണ് ഒരാളുടെ കര്‍മലക്ഷ്യമെങ്കില്‍ അവന്റെ കൃഷിയില്‍ നാം ആധിക്യമേകുന്നതാണ്. ഇനി, ഇഹലോകഫലമാണ് ഒരാള്‍ക്ക് ഉദ്ദേശ്യമെങ്കില്‍ അതില്‍ നിന്ന് നാം നല്‍കും, പരലോകത്ത് അവന്ന് വിഹിതമൊന്നുമുണ്ടാവില്ല.⁹
അതല്ല, അല്ലാഹുവിന്റെ അനുമതിയില്ലാത്ത വല്ലതും പങ്കുകാര്‍ അവര്‍ക്ക് മതമായി അനുവദിച്ചു കൊടുത്തിട്ടുണ്ടോ? അല്ലാഹുവിന്റെ നിശ്ചിത കല്‍പനാവചനമില്ലായിരുന്നുവെങ്കില്‍ അവര്‍ക്കിടയില്‍ ഉടനെ തീര്‍പ്പു കല്‍പിക്കപ്പെട്ടിരുന്നേനെ. അതിക്രമകാരികള്‍ക്ക് വേദനയുറ്റ ശിക്ഷയുണ്ടായിരിക്കും, തീര്‍ച്ച. തങ്ങള്‍ അനുവര്‍ത്തിച്ചിരുന്നതിനെക്കുറിച്ച് അതിക്രമികള്‍ ഭയപ്പാടിലായിക്കഴിയുന്നത് താങ്കള്‍ക്കു കാണാം; ആ ശിക്ഷ അവരില്‍ വന്നെത്തുക തന്നെ ചെയ്യും. സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ സ്വര്‍ഗീയാരാമങ്ങളിലായിരിക്കും. തങ്ങള്‍ ഇച്ഛിക്കുന്നതെന്തും നാഥങ്കല്‍ അവര്‍ക്കുണ്ടായിരിക്കും. മഹാ ഔദാര്യമത്രേ അത്. വിശ്വസിക്കുകയും സല്‍കര്‍മങ്ങളനുവര്‍ത്തിക്കുകയും ചെയ്ത തന്റെ അടിമകള്‍ക്ക് അല്ലാഹു ശുഭവാര്‍ത്ത നല്‍കുന്നതത്രേ ഈ സ്വര്‍ഗം!¹⁰
നബീ, പ്രഖ്യാപിക്കുക: ഈ പ്രബോധനത്തിന്ന് യാതൊരു പ്രതിഫലവും നിങ്ങളോടു ഞാന്‍ ചോദിക്കുന്നില്ല; കുടുംബ ബന്ധത്തിന്റെ പേരിലുള്ള സ്‌നേഹമല്ലാതെ. ഒരാള്‍ ഒരു നന്മയനുവര്‍ത്തിക്കുന്നുവെങ്കില്‍ അവനു നാം ഗുണം അധികരിപ്പിക്കുന്നതാണ്. അല്ലാഹു ഏറെ മാപ്പരുളുന്നവനും ഉദാത്ത കര്‍മങ്ങള്‍ സ്വീകരിക്കുന്നവനുമത്രേ.

അതല്ല, നബി അല്ലാഹുവിന്റെ പേരില്‍ വ്യാജനിര്‍മിതി നടത്തി എന്നാണോ മുശ്‌രിക്കുകള്‍ ജല്‍പിക്കുന്നത്? എന്നാല്‍, അല്ലാഹു ഉദ്ദേശിച്ചിരുന്നെങ്കില്‍ താങ്കളുടെ ഹൃദയത്തിന്മേല്‍ മുദ്രയടിക്കുമായിരുന്നു. അവന്‍ അസത്യം നിര്‍മാര്‍ജനം ചെയ്യുകയും തന്റെ വചനങ്ങള്‍ കൊണ്ട് സത്യം സാക്ഷാല്‍ക്കരിക്കുകയും ചെയ്യും. ഹൃദയങ്ങളിലുള്ളതിനെക്കുറിച്ച് അവന്‍ നന്നായി അറിയുന്നവന്‍ തന്നെയാണ്. അവന്‍ തന്റെ അടിമകളില്‍ നിന്ന് പശ്ചാത്താപം സ്വീകരിക്കുകയും കുറ്റകൃത്യങ്ങള്‍ക്ക് മാപ്പരുളുകയും നിങ്ങള്‍ പ്രവര്‍ത്തിക്കുന്നതെല്ലാം അറിയുകയും ചെയ്യുന്നു. വിശ്വസിക്കുകയും സല്‍കര്‍മങ്ങളനുഷ്ഠിക്കുകയും ചെയ്യുന്നവരുടെ പ്രാര്‍ത്ഥനകള്‍ക്ക് അവന്‍ ഉത്തരം നല്‍കുകയും തന്റെ കാരുണ്യത്തില്‍ നിന്ന് അവര്‍ക്ക് കൂടുതല്‍ കൊടുക്കുകയും ചെയ്യും. സത്യനിഷേധികള്‍ക്ക് കഠിനമായ ശിക്ഷയാണുള്ളത്. തന്റെ അടിമകള്‍ക്ക് അല്ലാഹു ഉപജീവന മാര്‍ഗങ്ങള്‍ പ്രവിശാലമാക്കിയിരുന്നെങ്കില്‍ അവര്‍ ഭൂമിയില്‍ അതിക്രമം കാട്ടിയേനെ.¹¹
എന്നാല്‍ താനുദ്ദേശിക്കുന്നത് ഒരു നിര്‍ണയ പ്രകാരം അവന്‍ നല്‍കുന്നു. തന്റെ അടിമകളെ കുറിച്ച് അവന്‍ സൂക്ഷ്മജ്ഞാനിയും നന്നായി കണ്ടറിയുന്നവനുമത്രേ. ആളുകള്‍ക്ക് ആശമുറിഞ്ഞതില്‍ പിന്നെ മഴ പെയ്യിക്കുന്നതും തന്റെ അനുഗ്രഹം വ്യാപിപ്പിക്കുന്നതും അവന്‍ തന്നെ. ശ്ലാഘനീയനായ സംരക്ഷകനാണവന്‍.

ഭുവന-വാനങ്ങള്‍ പടച്ചതും അവ രണ്ടിലും ജീവജാലങ്ങള്‍ വിന്യസിച്ചതും അവന്റെ ദൃഷ്ടാന്തങ്ങളില്‍ പെട്ടതാകുന്നു.¹²
താനുദ്ദേശിക്കുമ്പോള്‍ അവയെ സംഗമിപ്പിക്കുന്നതിന് കഴിവുറ്റവനത്രേ അവന്‍. നിങ്ങളെ എന്തെങ്കിലും ഒരാപത്ത് പിടികൂടിയിട്ടുണ്ടെങ്കില്‍ നിങ്ങളുടെ സ്വയംകൃതാനര്‍ത്ഥങ്ങളാലത്രേ അത്; ഒട്ടേറെ അവന്‍ മാപ്പാക്കുന്നുമുണ്ട്.¹³
ഈ ഭൂമിയില്‍ എവിടെയും അല്ലാഹുവിനെ പരാജയപ്പെടുത്താന്‍ നിങ്ങള്‍ക്ക് കഴിയില്ല; അവനല്ലാതെ മറ്റൊരു സംരക്ഷകനും സഹായിയും നിങ്ങള്‍ക്കില്ല താനും.

സമുദ്രങ്ങളിലൂടെ പര്‍വതതുല്യം സഞ്ചരിക്കുന്ന ജലയാനങ്ങളും -അല്ലാഹു ഉദ്ദേശിച്ചാല്‍ കാറ്റിനെ അടക്കി നിറുത്തുന്നതും അപ്പോഴവ ജലനിരപ്പില്‍ നിശ്ചലമായി നിന്നുപോവുന്നതുമാണ്- അവന്റെ ദൃഷ്ടാന്തങ്ങളില്‍ പെട്ടതത്രേ. ഏറെ ക്ഷമയും നന്ദിയുമുള്ള എല്ലാവര്‍ക്കും ഇതില്‍ ദൃഷ്ടാന്തങ്ങളുണ്ട്; അല്ലെങ്കില്‍ അവരുടെ ദുഷ്‌ചെയ്തികള്‍ നിമിത്തം ആ ജലയാനങ്ങളവന്‍ തകര്‍ത്തുകളയും. മിക്കതും അവന്‍ മാപ്പാക്കുകയാണ്.¹⁴
നമ്മുടെ ദൃഷ്ടാന്തങ്ങളെക്കുറിച്ച് വാഗ്വാദങ്ങള്‍ നടത്തുന്നവര്‍ തങ്ങള്‍ക്ക് കടലില്‍ നിന്നു രക്ഷ നേടാന്‍ മറ്റൊരിടവുമില്ല എന്ന് മനസ്സിലാക്കേണ്ടതിനു കൂടിയാണിത്.

നിങ്ങള്‍ക്ക് നല്‍കപ്പെട്ടിട്ടുള്ളത് എന്തുതന്നെയാണെങ്കിലും അത് ഐഹിക ജീവിത വിഭവങ്ങള്‍ മാത്രമാകുന്നു. അല്ലാഹുവിങ്കലുള്ളതാകട്ടെ-വിശ്വസിക്കുകയും നാഥങ്കല്‍ ഭരമേല്‍പിക്കുകയും ചെയ്യുന്നവര്‍ക്ക്-ഏറെ ഉദാത്തവും കൂടുതല്‍ ശേഷിക്കുന്നതുമാകുന്നു. മഹാപാതകങ്ങളും മ്ലേച്ഛവൃത്തികളും കൈവെടിയുന്നവരും ക്രോധം വന്നാല്‍ മാപ്പാക്കുന്നവരും നാഥന്റെ ശാസനകള്‍ക്കുത്തരം നല്‍കുന്നവരും നമസ്‌കാരം കൃത്യമായി നിര്‍വഹിക്കുന്നവരും തങ്ങളുടെ വിഷയങ്ങള്‍ കൂടിയാലോചനയിലൂടെ തീരുമാനിക്കുന്നവരും നാം കൊടുത്തതില്‍ നിന്ന് ചെലവഴിക്കുന്നവരും തങ്ങള്‍ക്കു നേരെ അതിക്രമമുണ്ടായാല്‍ ചെറുക്കുന്നവരുമാകും അവര്‍.¹⁵

ഒരു തിന്മയുടെ പ്രതിഫലം തത്തുല്യമായൊരു തിന്മതന്നെ. എന്നാല്‍ ഒരാള്‍ മാപ്പരുളുകയും സന്ധിയുണ്ടാക്കുകയുമാണെങ്കില്‍ അവന്റെ കൂലി അല്ലാഹുവിങ്കലാണ്. അക്രമകാരികളെ അവന്‍ ഇഷ്ടപ്പെടുന്നതേയല്ല. അക്രമവിധേയനായ ശേഷം ഒരാള്‍ സുരക്ഷാമുറ സ്വീകരിക്കുന്നുവെങ്കില്‍ അയാള്‍ക്കെതിരെ നടപടിയെടുക്കാന്‍ വഴിയൊന്നുമില്ല. എന്നാല്‍ ജനങ്ങളോട് അനീതി പ്രവര്‍ത്തിക്കുകയും അനര്‍ഹമായി നാട്ടില്‍ അതിക്രമം കാട്ടുകയും ചെയ്യുന്നവര്‍ക്കെതിരില്‍ മാത്രമേ നടപടിയെടുക്കാവൂ. അവര്‍ക്ക് വേദനാജനകമായ ശിക്ഷയുണ്ടായിരിക്കുന്നതാണ്. ആരെങ്കിലും ക്ഷമ കൈക്കൊള്ളുകയും മാപ്പാക്കുകയും ചെയ്യുന്നുവെങ്കില്‍ അത് ദൃഢ മനസ്‌കതയോടെയുള്ള നടപടി തന്നെയത്രേ.¹⁶

അല്ലാഹു ഒരാളെ ദുര്‍മാര്‍ഗിയാക്കിയാല്‍ പിന്നീട് ഒരു സംരക്ഷകനും അവനുണ്ടാവില്ല. ശിക്ഷ ഗോചരീഭവിക്കുമ്പോള്‍ ഒരു മടക്കത്തിന് എന്തെങ്കിലും വഴിയുണ്ടോ എന്ന് അതിക്രമികള്‍ അന്വേഷിക്കുന്നതും അപമാനത്താല്‍ പൂര്‍ണവിധേയത്വമുള്ളവരായി നരകത്തിനുമുമ്പില്‍ അവര്‍ പ്രദര്‍ശിപ്പിക്കപ്പെടുന്നതും നിങ്ങള്‍ക്കു കാണാം; ഒളിക്കണ്ണിട്ടാണ് അവര്‍ നോക്കുക.¹⁷
സത്യവിശ്വാസികള്‍ ഇങ്ങനെ പറയുന്നതാണ്: പുനരുത്ഥാനദിവസം സ്വന്തം ദേഹങ്ങളും സ്വന്തക്കാരായവരും നഷ്ടപ്പെട്ടവരാണ് സാക്ഷാല്‍ പരാജിതര്‍. അറിയുക, അതിക്രമകാരികള്‍ സ്ഥിരമായ ശിക്ഷയിലായിരിക്കും. അല്ലാഹുവിനു പുറമെ തങ്ങളെ സഹായിക്കുന്ന സംരക്ഷകരാരും അവര്‍ക്കുണ്ടാവില്ല. ഒരാളെ അല്ലാഹു വഴിതെറ്റിച്ചാല്‍ രക്ഷയുടെ ഒരു മാര്‍ഗവും അവനുണ്ടാകുന്നതല്ല.

നിഷേധികളേ, അല്ലാഹുവിങ്കല്‍ നിന്നുള്ള അപ്രതിരോധ്യമായ ഒരു ദിവസം വന്നെത്തും മുമ്പേ നിങ്ങളുടെ നാഥന്റെ ശാസനകള്‍ക്കുത്തരം നല്‍കുക. അന്നു ഒരഭയകേന്ദ്രവും നിങ്ങള്‍ക്കുണ്ടാവില്ല; കുറ്റം നിഷേധിക്കാനുമാകില്ല.¹⁸
ഇനി, അവര്‍ അവഗണിക്കുകയാണെങ്കില്‍, നബീ, അവരുടെ ചുമതലക്കാരനായൊന്നും അങ്ങയെ നാം അയച്ചിട്ടില്ല. പ്രബോധനച്ചുമതലയേ അങ്ങേക്കുള്ളൂ. മനുഷ്യന് നമ്മുടെ പക്കല്‍ നിന്നുള്ള ഒരനുഗ്രഹം നാം ആസ്വദിപ്പിച്ചാല്‍ അവന്‍ ആഹ്ലാദ ഭരിതനാകുന്നതും സ്വയംകൃതാനര്‍ത്ഥങ്ങളാല്‍ വല്ല തിന്മയും ബാധിച്ചാല്‍, നിശ്ചയം തത്സമയമവന്‍ കൃതഘ്‌നനായിത്തീരുന്നതുമാണ്.¹⁹

ഭുവന-വാനങ്ങളുടെ രാജാധിപത്യം അല്ലാഹുവിന്നാണ്; താനുദ്ദേശിക്കുന്നത് അവന്‍ സൃഷ്ടിക്കുന്നു. താനുദ്ദേശിക്കുന്നവര്‍ക്ക് അവന്‍ പെണ്‍മക്കളെയും മറ്റു ചിലര്‍ക്ക് ആണ്‍മക്കളെയും കനിഞ്ഞേകുന്നു; അല്ലെങ്കില്‍ ആണും പെണ്ണും കലര്‍ത്തിക്കൊടുക്കും; ഉദ്ദേശിക്കുന്നവരെ വന്ധ്യരുമാക്കും. അവന്‍ എല്ലാം അറിയുന്നവനും സര്‍വശക്തനുമാകുന്നു.²⁰

ദിവ്യബോധനമായോ ഒരു മറയുടെ പിന്നിലായോ ഒരു ദൂതനെ അയച്ചോ-എന്നിട്ടവനുദ്ദേശിക്കുന്നത് ദൂതന്‍ ബോധനം നല്‍കും-അല്ലാതെ ഒരു മനുഷ്യനോട് അല്ലാഹു സംസാരിക്കയില്ല. നിശ്ചയം അവന്‍ സമുന്നതനും യുക്തിമാനുമാകുന്നു.²¹

മുന്‍പ്രവാചകര്‍ക്കെന്ന പോലെ താങ്കള്‍ക്ക് നമ്മുടെ കല്‍പനകളില്‍ നിന്നുള്ള ചൈതന്യവത്തായ ഖുര്‍ആന്‍ നാം ബോധനം നല്‍കിയിരിക്കുന്നു. വേദമോ സത്യവിശ്വാസമോ എന്താണെന്ന് താങ്കള്‍ക്ക് അറിയുമായിരുന്നില്ല. എങ്കിലും അതിനെ നമ്മുടെ അടിമകളില്‍ നിന്ന് നാമുദ്ദേശിക്കുന്നവരെ സന്മാര്‍ഗ ദര്‍ശനം ചെയ്യുന്ന ഒരു പ്രകാശമാക്കി. നിശ്ചയം ഋജുവായ പന്ഥാവിലേക്ക്-ഭുവന-വാനങ്ങളിലുള്ളതിന്റെ ഉടമയായ അല്ലാഹുവിന്റെ വഴിയിലേക്ക്-ആണ് താങ്കള്‍ മാര്‍ഗദര്‍ശനം നല്‍കുന്നത്. അറിയുക, കാര്യങ്ങള്‍ ചെന്നെത്തുന്നത് അല്ലാഹുവിങ്കലേക്കാകുന്നു.²²