ഫുസ്സിലത്ത് - فصلت - Fussilat

ഹാ മീം. പരമ കാരുണികനും കരുണാനിധിയുമായ അല്ലാഹുവില്‍ നിന്ന് അവതീര്‍ണമത്രേ ഇത്. സൂക്തങ്ങള്‍ പ്രതിപാദിക്കപ്പെട്ടതും വിവരമുള്ളവര്‍ക്കായി അറബി ഭാഷയില്‍ പാരായണം ചെയ്യപ്പെടുന്നതും ശുഭവാര്‍ത്ത അറിയിക്കുന്നതും താക്കീതു നല്‍കുന്നതുമായ ഗ്രന്ഥം. എന്നാല്‍ അവരില്‍ മിക്കവരും അതവഗണിക്കുകയാണുണ്ടായത്, സത്യം ശ്രവിക്കുന്നില്ല.¹

അവര്‍ ജല്‍പിച്ചു: നീ ഏതൊരാശയത്തിലേക്ക് ഞങ്ങളെ ക്ഷണിക്കുന്നുവോ, അതു ഗ്രഹിക്കാന്‍ കഴിയാത്ത വിധം ഞങ്ങളുടെ ഹൃദയങ്ങള്‍ മൂടികളിലാണ്; കാതുകള്‍ക്ക് ബധിരതയുണ്ട് താനും. ഞങ്ങള്‍ക്കും നിനക്കും മധ്യേ ഒരു പ്രതിരോധവുമുണ്ട്. അതുകൊണ്ട് നീ പ്രവര്‍ത്തിക്കുക, ഞങ്ങളും പ്രവര്‍ത്തിക്കുന്നവരാണ്.²

നബീ, പ്രതികരിക്കുക: നിങ്ങളെപ്പോലെ ഒരു മനുഷ്യന്‍ തന്നെയാണു ഞാന്‍.³
നിങ്ങളുടെ ആരാധ്യന്‍ ഒരേയൊരുവന്‍ മാത്രമാണെന്ന് എനിക്ക് ദിവ്യസന്ദേശം ലഭിക്കുന്നുണ്ട്. അതുകൊണ്ട് നിങ്ങള്‍ അവനെ അഭിമുഖീകരിച്ച് ഋജുവായി നിലകൊള്ളുകയും അവനോടു പാപമോചനമര്‍ത്ഥിക്കുകയും ചെയ്യുക. സകാത്ത് നല്‍കാതിരിക്കുകയും പാരത്രിക ജീവിതത്തെ നിഷേധിക്കുകയും ചെയ്യുന്ന ബഹുദൈവ വിശ്വാസികള്‍ക്കാണ് നരകം. നബീ, ചോദിക്കുക: രണ്ടു നാളുകളിലായി ഭൂമിയെ സൃഷ്ടിച്ചവനെ നിങ്ങള്‍ നിഷേധിക്കുകയും അവനു പങ്കാളികളെ സ്ഥാപിക്കുകയുമാണോ? സര്‍വലോക സംരക്ഷകനാണവന്‍. നാലുനാളുകള്‍ക്കകം അതിന്റെ ഉപരിതലത്തില്‍ ഉറച്ച മലകളുണ്ടാക്കുകയും അതിലനുഗ്രഹം ചൊരിയുകയും അന്നപാനാദികള്‍ വ്യവസ്ഥപ്പെടുത്തുകയുമുണ്ടായി- അന്വേഷകര്‍ക്ക് ശരിയായി അറിയാനാണിപ്പറയുന്നത്. തുടര്‍ന്ന്, ആകാശ സൃഷ്ടിക്ക് അവനുദ്ദേശിച്ചു. അതൊരു പുകയായിരുന്നു. അങ്ങനെ അതിനോടും ഭൂമിയോടുമായി 'നിങ്ങളിരുവരും അനുസരണയോടെയോ നിര്‍ബന്ധിതമായോ വരിക' എന്ന് അവന്‍ അരുളി. അവ പ്രതികരിച്ചു: അനുസരണയോടെ തന്നെ ഞങ്ങളിതാ സമാഗതരായിരിക്കുന്നു! അങ്ങനെ രണ്ടു ദിവസങ്ങളിലായി അവ ഏഴാകാശമാക്കി പടച്ചു.⁴
ഓരോന്നിലും വേണ്ട നിര്‍ദേശങ്ങള്‍ കൊടുത്തു. ഏറ്റം സമീപസ്ഥ വാനം ചില വിളക്കുകളാല്‍ നാം അലങ്കരിച്ചു, സുരക്ഷയേര്‍പ്പെടുത്തി. അജയ്യനും സര്‍വജ്ഞനുമായവന്റെ ക്രമീകരണങ്ങളാണിത്.

ഇനി, അവര്‍ അവഗണിച്ചു പോകുന്ന പക്ഷം താങ്കള്‍ പറയുക: ആദും സമൂദും അഭിമുഖീകരിച്ച കഠോര ശിക്ഷ പോലുള്ളത് ഞാനിതാ നിങ്ങള്‍ക്ക് മുന്നറിയിപ്പു തരുന്നു!⁵
അല്ലാഹുവിനെയല്ലാതെ നിങ്ങള്‍ ആരാധിക്കരുതെന്ന് നാനാമാര്‍ഗേണ നിര്‍ദേശിച്ചു കൊണ്ട് ദൈവദൂതന്മാര്‍ ചെന്നപ്പോള്‍ അവര്‍ പ്രതികരിച്ചു: ഞങ്ങളുടെ നാഥന്‍ ഉദ്ദേശിച്ചിരുന്നുവെങ്കില്‍ മലക്കുകളെയായിരുന്നു നിയോഗിക്കുക. അതുകൊണ്ട് നിങ്ങള്‍ അയക്കപ്പെട്ട ഈ ദൗത്യം ഞങ്ങള്‍ നിഷേധിച്ചിരിക്കുന്നു. എന്നാല്‍ ആദ് സമൂഹം അന്യായമായി നാട്ടില്‍ അഹംഭാവം നടിക്കുകയും ഞങ്ങളെക്കാള്‍ കരുത്തുറ്റവര്‍ ആരുണ്ട് എന്ന് ഊറ്റംകൊള്ളുകയുമാണുണ്ടായത്! തങ്ങളെ പടച്ച അല്ലാഹു തന്നെയാണ് കൂടുതല്‍ പ്രബലനെന്ന് അവര്‍ക്ക് കണ്ടുകൂടേ? നമ്മുടെ ദൃഷ്ടാന്തങ്ങള്‍ നിഷേധിക്കുകയാണവര്‍ ചെയ്തത്.⁶
അങ്ങനെ ചില ദുഃശകുന ദിനങ്ങളില്‍ ഐഹിക ജീവിതത്തില്‍ തന്നെ ഹീന ശിക്ഷ ആസ്വദിപ്പിക്കാനായി അവര്‍ക്കു നേരെ കഠോരമായ ശീതക്കാറ്റ് നാം അടിപ്പിച്ചു. പാരത്രികലോക ശിക്ഷ തന്നെയാണ് ഏറെ നിന്ദ്യം; ഒരുവിധ സഹായവും അവര്‍ക്കു നല്‍കപ്പെടുന്നതല്ല.

എന്നാല്‍ സമൂദ് ഗോത്രമോ? അവര്‍ക്കു നാം സല്‍പന്ഥാവ് കാട്ടിക്കൊടുത്തപ്പോള്‍ അന്ധതയാണവര്‍ പ്രിയങ്കരമായി കണ്ടത്. അങ്ങനെ തങ്ങളുടെ കര്‍മഫലമായി നിന്ദ്യമായ കഠിനദണ്ഡനം അവരെ പിടികൂടുകയും, സത്യവിശ്വാസം കൈക്കൊള്ളുകയും ജീവിതത്തില്‍ സൂക്ഷ്മത പുലര്‍ത്തുകയും ചെയ്തവരെ നാം സുരക്ഷിതരാക്കുകയും ചെയ്തു.

അല്ലാഹുവിന്റെ ശത്രുക്കളെ നരകത്തിലേക്ക് കൊണ്ടുപോകാനായി മഹ്ശറില്‍ സംഗമിപ്പിക്കുകയും എന്നിട്ടവരെ തെളിച്ചു കൊണ്ടുപോവുകയും ചെയ്യുന്ന ദിനം സ്മരണീയമത്രേ. അങ്ങനെ, നരകത്തിലെത്തിയാല്‍ സ്വന്തം കാതുകളും കണ്ണുകളും ചര്‍മങ്ങളും അവരുടെ ചെയ്തികളെക്കുറിച്ച് സാക്ഷ്യം വഹിക്കുന്നതാണ്. ചര്‍മങ്ങളോടവര്‍ ചോദിക്കും: ഞങ്ങള്‍ക്കെതിരെ നിങ്ങളെന്തിനാണ് സാക്ഷ്യം വഹിച്ചത്? അവ മറുപടി നല്‍കും: എല്ലാ വസ്തുക്കളെയും സംസാരിപ്പിച്ച അല്ലാഹു ഞങ്ങളെയും സംസാരിപ്പിച്ചതാകുന്നു!⁷
ആദ്യവട്ടം നിങ്ങളെ പടച്ചിരുന്നത് അവനാണല്ലോ. നിങ്ങള്‍ മടക്കപ്പെടുന്നത് അവങ്കലേക്കു തന്നെയായിരിക്കും. സ്വന്തം കണ്ണുകളും കാതുകളും ചര്‍മങ്ങളും പ്രതികൂല സാക്ഷ്യം വഹിക്കുമെന്ന് വിചാരിച്ച് ഒഴിഞ്ഞിരിക്കാറുണ്ടായിരുന്നില്ലല്ലോ നിങ്ങള്‍.⁸
എങ്കിലും സ്വന്തം കര്‍മങ്ങളിലധികവും അല്ലാഹു അറിയില്ലെന്നാണ് നിങ്ങള്‍ ധരിച്ചുവശായത്. രക്ഷിതാവിനെപ്പറ്റി വെച്ചുപുലര്‍ത്തിയ ആ ധാരണയത്രേ നിങ്ങളെ നശിപ്പിച്ചത്; അങ്ങനെ നിങ്ങള്‍ പരാജിതരിലകപ്പെട്ടുപോയി. ഇനിയവര്‍ സഹനം കൈക്കൊള്ളുന്നുവെങ്കില്‍ ആ നരകം തന്നെയാണവരുടെ ആവാസഗേഹം; ദുന്‍യാവിലേക്ക് മടക്കാനാവശ്യപ്പെട്ടാലോ, തിരിച്ചയക്കപ്പെടുന്നവരില്‍ അവരാകുന്നതുമല്ല!

ഈ നിഷേധികള്‍ക്ക് ചില ചങ്ങാതിമാരെ നാം ഏര്‍പ്പെടുത്തിക്കൊടുത്തിട്ടുണ്ടായിരുന്നു. എന്നിട്ട് ഇവര്‍ക്ക് മുന്നിലുള്ളതും പിന്നിലുള്ളതും അവര്‍ അലംകൃതമായി കാണിച്ചുകൊടുത്തു. അങ്ങനെ ജിന്നുകളിലും മനുഷ്യരിലും നിന്ന് മുമ്പേ നടന്നവരുടെ കൂട്ടത്തില്‍ ഇവര്‍ക്കും ശിക്ഷാവചനം കടപ്പെട്ടു. അവര്‍ പരാജിതര്‍ തന്നെയായിരുന്നു, തീര്‍ച്ച⁹

നിങ്ങള്‍ ഈ ഖുര്‍ആന്‍ ശ്രവിക്കരുത്, അത് ഓതപ്പെടുമ്പോള്‍ അപശബ്ദമുണ്ടാക്കുക, എങ്കില്‍ നിങ്ങള്‍ ജേതാക്കളായേക്കാം എന്ന് നിഷേധികള്‍ ജല്‍പിച്ചു.¹⁰
എന്നാല്‍ ആ നിഷേധികളെ നാം കഠോര ശിക്ഷയാസ്വദിപ്പിക്കുന്നതും തങ്ങളുടെ ഹീനമായ ചെയ്തികള്‍ക്കുള്ള കൂലി തീര്‍ച്ചയായും അവര്‍ക്ക് നല്‍കുന്നതുമാണ്. അതാണ് അല്ലാഹുവിന്റെ ശത്രുക്കളുടെ പ്രതിഫലമായ നരകം! അവര്‍ക്ക് ശാശ്വതനിവാസത്തിനുള്ള ഭവനം അതാണ്. നമ്മുടെ സൂക്തങ്ങള്‍ വ്യാജമാക്കിയിരുന്നതിനുള്ള കൂലിയാണത്. നിഷേധികള്‍ പറയും: നാഥാ, ജിന്നിലും മനുഷ്യരിലും നിന്ന് ഞങ്ങളെ ദുര്‍മാര്‍ഗത്തിലാക്കിയ രണ്ടു കക്ഷികളെ കാണിച്ചു തരേണമേ. അവര്‍ ഏറ്റം തരം താഴ്ന്നവരിലാകത്തക്ക വിധം കാല്‍ക്കീഴിലിട്ട് ഞങ്ങളവരെ ചവിട്ടട്ടെ.¹¹

ഞങ്ങളുടെ നാഥന്‍ അല്ലാഹുവാണ് എന്ന് പ്രഖ്യാപിക്കുകയും ആ നിലപാടില്‍ ഋജുവായി നിലകൊള്ളുകയും ചെയ്തവരിലേക്ക് മരണ സമയം മലക്കുകള്‍ ഇറങ്ങിവന്ന് ഇങ്ങനെ ശുഭവാര്‍ത്തയറിയിക്കും: നിങ്ങള്‍ ഭയപ്പെടുകയോ ദുഃഖിക്കുകയോ അരുത്; നിങ്ങള്‍ക്കുള്ള വാഗ്ദത്ത സ്വര്‍ഗം കൊണ്ട് സന്തുഷ്ടരായിക്കൊള്ളുക. ഐഹിക ജീവിതത്തിലും പരലോകത്തും നിങ്ങളുടെ സംരക്ഷകരാണ് ഞങ്ങള്‍. പരലോകത്ത് നിങ്ങള്‍ അഭിലഷിക്കുന്നതും ആവശ്യപ്പെടുന്നതുമത്രയും ഉണ്ട്. ഏറെ മാപ്പരുളുന്നവനും കരുണാമയനുമായവന്റെ ആതിഥ്യമത്രേ അത്.¹²

അല്ലാഹുവിന്റെ പന്ഥാവിലേക്കുള്ള ക്ഷണം നിര്‍വഹിക്കുകയും സല്‍കര്‍മങ്ങളനുഷ്ഠിക്കുകയും ഞാന്‍ മുസ്‌ലിം തന്നെയാണ് എന്ന് പ്രഖ്യാപിക്കുകയും ചെയ്യുന്നവനെക്കാള്‍ ഉത്തമഭാഷിയായി മറ്റാരുണ്ട്!¹³
നല്ലതും ചീത്തയും തുല്യമാകില്ല; അത്യുത്തമമായതുകൊണ്ട് തിന്മ തടയുക. തത്സമയം ഏതൊരു വ്യക്തിയും നീയും തമ്മില്‍ ശാത്രവമുണ്ടോ അവന്‍ ആത്മമിത്രമായി തീരുന്നതാണ്. ക്ഷമാശീലര്‍ക്കു മാത്രമേ ഈ നിലപാട് കൈവരിക്കാനാകൂ; മഹാസൗഭാഗ്യവാനല്ലാതെ അതിനുള്ള അവസരം ലഭിക്കുകയില്ല.¹⁴
പിശാചില്‍ നിന്നുള്ള എന്തെങ്കിലും ദുര്‍ബോധനം നിനക്കു മാര്‍ഗഭ്രംശം വരുത്തുന്നുണ്ടെങ്കില്‍ തല്‍ക്ഷണം അല്ലാഹുവില്‍ അഭയം തേടണം. അവന്‍ എല്ലാം കേള്‍ക്കുന്നവനും സൂക്ഷ്മമായി അറിയുന്നവനും തന്നെയത്രേ.

രാപ്പകലുകളും സൂര്യ-ചന്ദ്രന്മാരും അല്ലാഹുവിന്റെ ദൃഷ്ടാന്തങ്ങളില്‍ പെട്ടതാകുന്നു. എന്നാല്‍ സൂര്യനെയോ ചന്ദ്രനെയോ നിങ്ങള്‍ പ്രണമിക്കരുത്, അവയെ പടച്ച അല്ലാഹുവിന്നു സാഷ്ടാംഗം ചെയ്യുക-അവനെയാണ് നിങ്ങളാരാധിക്കുന്നതെങ്കില്‍. ഇനി മനുഷ്യര്‍ അഹംഭാവം നടിക്കുന്നുവെങ്കില്‍ താങ്കളുടെ നാഥന്റെയടുത്തുള്ള മലക്കുകള്‍ രാപ്പകലില്ലാതെ അവന്റെ മഹത്ത്വ പ്രകീര്‍ത്തനം നിര്‍വഹിക്കുന്നുണ്ട്; അവര്‍ക്ക് അശേഷം മടുപ്പില്ല. ഇതും അവന്റെ ദൃഷ്ടാന്തങ്ങളില്‍ പെട്ടതാണ്: ഭൂമി വരള്‍ച്ചക്കു വിധേയമായി നീ കാണുന്നു, എന്നിട്ട് നാം അതില്‍ പേമാരി വര്‍ഷിച്ചാല്‍ അത് ചലനാത്മകമാവുകയും സസ്യങ്ങള്‍ വളരുകയും ചെയ്യുകയായി. അതിനെ സചേതനമാക്കിയവന്‍ മരിച്ചവരെ പുനര്‍ജീവിപ്പിക്കുന്നവന്‍ തന്നെയാണ്. സര്‍വകാര്യങ്ങള്‍ക്കും കഴിവുറ്റവനാണവന്‍.

നിശ്ചയം, നമ്മുടെ സൂക്തങ്ങളില്‍ വക്രീകരണം നടത്തുന്നവര്‍ നമ്മില്‍ നിന്നു തിരോഭവിക്കുന്നില്ല.¹⁵
അപ്പോള്‍, നരകത്തില്‍ എറിയപ്പെടുന്നവനാണോ ഉദാത്തന്‍, അതോ പുനരുത്ഥാന ദിനം വിശ്വസ്തനായി വന്നെത്തുന്നവനോ? ഉദ്ദേശിച്ചതെന്തോ, അതു നിങ്ങള്‍ പ്രവര്‍ത്തിച്ചുകൊള്ളുക. നിങ്ങളുടെ ചെയ്തികള്‍ അവന്‍ നന്നായി കണ്ടറിയുന്നുണ്ട്. ഈ ദിവ്യസന്ദേശം ലഭ്യമായപ്പോള്‍ അവിശ്വാസം വെച്ചുപുലര്‍ത്തിയവര്‍ പരാജിതര്‍ തന്നെ; മുന്നിലും പിന്നിലും നിന്ന് യാതൊരു ശൈഥില്യവുമേശാത്തതും യുക്തിമാനും സ്തുത്യര്‍ഹനുമായവന്റെ പക്കല്‍ നിന്ന് അവതീര്‍ണമായതുമായ ഒരജയ്യ വേദമത്രേ അത്.¹⁶

നബീ, പൂര്‍വിക ദൂതന്മാര്‍ക്ക് കിട്ടിയ അതേ പ്രതികരണമേ അങ്ങേയ്ക്കു ലഭിക്കുന്നുള്ളു. നിശ്ചയം, അങ്ങയുടെ നാഥന്‍ ദോഷങ്ങള്‍ പൊറുക്കുന്നവനും വേദനാജനകമായ ശിക്ഷ നല്‍കുന്നവനുമാകുന്നു. ഈ വേദം നാം അറബിയല്ലാത്ത ഒരു ഖുര്‍ആന്‍ ആക്കിയിരുന്നുവെങ്കില്‍, 'ഇതിലെ സൂക്തങ്ങള്‍ എന്തുകൊണ്ട് പ്രതിപാദന വിധേയമായില്ല, അനറബി ഗ്രന്ഥവും അറബി പ്രവാചകനുമോ' എന്ന് അവര്‍ ചോദിക്കുമായിരുന്നു! താങ്കള്‍ പ്രതികരിക്കുക: ഈ വേദം സത്യവിശ്വാസികള്‍ക്ക് വഴികാട്ടിയും രോഗവിമുക്തിയുമത്രേ. ഇതില്‍ വിശ്വാസമര്‍പ്പിക്കാത്തവര്‍ക്കാകട്ടെ, ശ്രവണപുടങ്ങളില്‍ ബധിരതയുണ്ട്, അവര്‍ക്കതൊരു അന്ധതയുമാണ്. അതിവിദൂരതയില്‍ നിന്ന് വിളിക്കപ്പെടുന്നതുപോലെയാണവര്‍.¹⁷

മൂസാ നബിക്കു നാം വേദം നല്‍കിയിരുന്നു. എന്നിട്ട്, അതിലും പക്ഷാന്തരമുണ്ടായി. താങ്കളുടെ നാഥന്റെ കല്‍പന മുന്‍കടന്നിരുന്നില്ലെങ്കില്‍ അവര്‍ക്കിടയിലുള്ള തീര്‍പ്പ് തല്‍ക്ഷണം നടന്നേനെ.¹⁸
അവര്‍ ഈ ഖുര്‍ആനെപ്പറ്റി രൂക്ഷമായ സന്ദേഹത്തില്‍ തന്നെയാണ്. ആരെങ്കിലും ഉദാത്ത കര്‍മങ്ങളനുഷ്ഠിച്ചാല്‍ അതിന്റെ ഗുണഫലവും തിന്മ ചെയ്താല്‍ അതിന്റെ ദൂഷ്യവും അവനുതന്നെ. താങ്കളുടെ നാഥന്‍ അടിമകളോട് ഒട്ടുമേ അനീതി കാട്ടുന്നവനല്ല.¹⁹

അന്ത്യദിനത്തെ സംബന്ധിച്ചുള്ള ജ്ഞാനം അല്ലാഹുവിങ്കലേക്കാണ് മടക്കപ്പെടുക. ഏതു പഴവും കൂമ്പുകളില്‍ നിന്ന് പുറത്തുവരുന്നതും ഏതൊരു പെണ്ണും ഗര്‍ഭം ധരിക്കുകയോ പ്രസവിക്കുകയോ ചെയ്യുന്നതും അവന്റെ അറിവോടെ മാത്രമാണ്. എന്റെ പങ്കാളികള്‍ എവിടെ എന്ന് അല്ലാഹു ചോദിക്കുന്ന ദിനം അവര്‍ പ്രതികരിക്കും: നീയല്ലാത്ത ഒരാരാധ്യനുണ്ടെന്നതിനു ഞങ്ങളുടെ കൂട്ടത്തില്‍ ഒരൊറ്റ സാക്ഷിയുമില്ലെന്ന് ഇതാ നിന്നെ അറിയിക്കുന്നു! മുമ്പ് അവര്‍ ആരാധനകളര്‍പ്പിച്ചിരുന്നവയൊക്കെയും അപ്രത്യക്ഷമാവുകയും തങ്ങള്‍ക്ക് യാതൊരു അഭയസ്ഥാനവുമില്ല എന്ന് അവര്‍ക്ക് ബോധ്യപ്പെടുകയും ചെയ്യും.²⁰

നന്മക്കു വേണ്ടി പ്രാര്‍ത്ഥിക്കുമ്പോള്‍ മനുഷ്യന്ന് യാതൊരു മടുപ്പുമില്ല; തിന്മ പിടികൂടുമ്പോള്‍ മനം മടുത്തവനും ഭഗ്നാശനുമാവുകയാണവന്‍. കഷ്ടപ്പാടുണ്ടായതിനു ശേഷം നമ്മുടെ അനുഗ്രഹമാസ്വദിപ്പിച്ചാല്‍ ഇതെനിക്ക് അര്‍ഹതപ്പെട്ടതാണെന്നവന്‍ പറയും: അന്ത്യനാള്‍ വന്നെത്തുമെന്ന് ഞാന്‍ ധരിക്കുന്നില്ല; ഇനി, നാഥങ്കലേക്ക് മടക്കിയയക്കപ്പെടുകയാണെങ്കില്‍ തന്നെ അവങ്കല്‍ അതി വിശിഷ്ടമായ പദവി തന്നെയാണ് എനിക്കുണ്ടാവുക!²¹
അപ്പോള്‍, നിഷേധികളായവര്‍ക്ക് അവരുടെ കര്‍മങ്ങളെക്കുറിച്ച് നാം അറിയിച്ചു കൊടുക്കുന്നതും കഠോര ശിക്ഷ അവരെ ആസ്വദിപ്പിക്കുന്നതുമാണ്. മനുഷ്യന്ന് നാം അനുഗ്രഹം ചെയ്താല്‍ അവനത് അവഗണിച്ചു കളയുകയും അഹങ്കാരം നടിച്ച് ദൂരെ പോവുകയും ചെയ്യുന്നു. പ്രത്യുത, അവനെ ദൂഷ്യം ബാധിച്ചാലോ, വര്‍ദ്ധിച്ച പ്രാര്‍ത്ഥനക്കാരനായിത്തീരുന്നു!²²

നബീ, പ്രഖ്യാപിക്കുക: ഈ ഖുര്‍ആന്‍ അല്ലാഹുവിങ്കല്‍ നിന്നുള്ളതാവുകയും നിങ്ങള്‍ അതിനെ നിഷേധിക്കുകയുമാണെങ്കില്‍, സത്യത്തില്‍ നിന്നു ബഹുദൂരം അകന്ന ഈ കടുത്ത മത്സരമനസ്‌കനെക്കാള്‍ വലിയ ദുര്‍മാര്‍ഗി മറ്റാരുണ്ട്?- ഒന്ന് പറഞ്ഞു തരാമോ?²³
ഇതു സത്യം തന്നെയാണെന്ന് അവര്‍ക്ക് സ്പഷ്ടമാകും വിധം ചക്രവാളങ്ങളിലും അവരില്‍ തന്നെയും പിന്നീട് നമ്മുടെ ദൃഷ്ടാന്തങ്ങള്‍ അവര്‍ക്കു നാം ഗോചരീഭവിപ്പിക്കുന്നതാണ്. ഏതു കാര്യത്തിനും സാക്ഷിയായി താങ്കളുടെ നാഥന്‍ തന്നെ പോരേ? അറിയുക, താങ്കളുടെ നാഥനെ അഭിമുഖീകരിക്കേണ്ടി വരുമെന്നതിനെപ്പറ്റി സന്ദേഹത്തില്‍ തന്നെയാണവര്‍. ഏതൊരു വസ്തുവിനെ കുറിച്ചും സമഗ്രമായറിയുന്നവനാണവന്‍ എന്ന് നിങ്ങള്‍ മനസ്സിലാക്കണം.²⁴