ഗാഫിർ - غافر - Ghafir

ഹാ മീം. ഈ വേദത്തിന്റെ അവതരണം പ്രതാപശാലിയും സര്‍വജ്ഞനുമായ അല്ലാഹുവിങ്കല്‍ നിന്നാകുന്നു. അവന്‍ ദോഷങ്ങള്‍ മാപ്പാക്കുന്നവനും പശ്ചാത്താപം സ്വീകരിക്കുന്നവനും കഠിനമായി ശിക്ഷിക്കുന്നവനും അനുഗ്രഹദാതാവുമാണ്. അവനല്ലാതെ യാതൊരു ആരാധ്യനുമില്ല. സര്‍വരുടെയും മടക്കം അവങ്കലേക്കു തന്നെ.¹
സത്യനിഷേധികളായവര്‍ മാത്രമേ അല്ലാഹുവിന്റെ ദൃഷ്ടാന്തങ്ങളില്‍ കുതര്‍ക്കങ്ങള്‍ നടത്തൂ. അതുകൊണ്ട് നാടുകളിലൂടെയുള്ള അവരുടെ സഞ്ചാരം താങ്കളെ വഞ്ചനയിലകപ്പെടുത്താതിരിക്കട്ടെ.²
അവര്‍ക്കു മുമ്പ് നൂഹ് നബിയുടെ ജനതയും അവരുടെ ശേഷം വന്ന സമൂഹങ്ങളും സത്യത്തെ വ്യാജമാക്കിയിട്ടുണ്ട്. ഓരോ ജനപഥവും തങ്ങളുടെ ദൂതനെ പിടികൂടാനുദ്ദേശിക്കുകയും അസത്യം കൊണ്ട് സത്യത്തെ ശിഥിലമാക്കാനായി കുതര്‍ക്കങ്ങള്‍ നടത്തുകയുമുണ്ടായി. തത്സമയം ഞാനവരെ പിടികൂടി. എങ്ങനെയുണ്ടായിരുന്നു എന്റെ ശിക്ഷ! സത്യത്തെ നിഷേധിച്ചവര്‍ക്കുമേല്‍, അവര്‍ നരകക്കാരാണെന്നുള്ള താങ്കളുടെ നാഥന്റെ വചനം സുസ്ഥിരമായിക്കഴിഞ്ഞിരിക്കുകയാണ്.

എന്നാല്‍ ദൈവിക സിംഹാസനം വഹിച്ചു കൊണ്ടിരിക്കുന്നവരും അവര്‍ക്കു ചുറ്റുമുള്ളവരുമായ മാലാഖമാര്‍ തങ്ങളുടെ നാഥന്ന് സ്തുതികീര്‍ത്തനങ്ങളര്‍പ്പിക്കുകയും അല്ലാഹുവില്‍ വിശ്വസിക്കുകയും വിശ്വാസികള്‍ക്ക് പാപമോചനമര്‍ഥിച്ചുകൊണ്ട് ഇങ്ങനെ പ്രാര്‍ത്ഥിക്കുകയും ചെയ്യുന്നുണ്ട്: നാഥാ, നിന്റെ അനുഗ്രഹവും വിജ്ഞാനവും സര്‍വവസ്തുക്കള്‍ക്കും പ്രവിശാലമായിരിക്കുന്നു; അതുകൊണ്ട്, പാപമോചനമര്‍ത്ഥിക്കുകയും നിന്റെ വഴി പിന്‍പറ്റുകയും ചെയ്യുന്നവര്‍ക്ക് നീ മാപ്പരുളുകയും നരകശിക്ഷയില്‍ നിന്ന് അവരെ സംരക്ഷിക്കുകയും ചെയ്യേണമേ. നാഥാ, അവരെയും അവരുടെ മാതാപിതാക്കള്‍, ഭാര്യാസന്തതികള്‍ എന്നിവരില്‍ സദ്‌വൃത്തരെയും ശാശ്വതനിവാസത്തിനുള്ള വാഗ്ദത്ത സ്വര്‍ഗങ്ങളില്‍ നീ പ്രവേശിപ്പിക്കേണമേ- നിശ്ചയം, നീ തന്നെയാണ് അജയ്യനും യുക്തിമാനും-തിന്മകളില്‍ നിന്ന് അവരെ നീ കാക്കേണമേ. ആ ദിനം ഏതൊരാള്‍ക്ക് നീ തിന്മകളില്‍ നിന്നുള്ള സുരക്ഷയേകുന്നുവോ അവനു നീ അനുഗ്രഹം ചൊരിയുക തന്നെ ചെയ്തിരിക്കുന്നു. അതുതന്നെയാണ് മഹാഭാഗ്യം.

സത്യനിഷേധികളോട് വിളിച്ചു പറയപ്പെടും: നിങ്ങള്‍ വിശ്വാസത്തിലേക്ക് ക്ഷണിക്കപ്പെടുകയും എന്നിട്ട് അവിശ്വസിക്കുകയും ചെയ്തിരുന്നപ്പോള്‍ അല്ലാഹുവിനുണ്ടായിരുന്ന ക്രോധം നിങ്ങളിപ്പോള്‍ പരസ്പരമുള്ളതിനേക്കാള്‍ ഗൗരവതരമത്രേ.³
അവര്‍ അപേക്ഷിക്കും: നാഥാ, രണ്ടു വട്ടം വീതം നീ ഞങ്ങളെ മൃതാവസ്ഥയിലും സജീവാവസ്ഥയിലുമാക്കി. അതുകൊണ്ട് ഞങ്ങള്‍ സ്വന്തം പാപങ്ങളിതാ ഏറ്റു പറയുന്നു. അതിനാല്‍ പുറത്തുകടക്കാന്‍ എന്തെങ്കിലും വഴിയുണ്ടോ?⁴
അതു എന്തുകൊണ്ടെന്നാല്‍ അല്ലാഹുവിനോട് മാത്രമായി പ്രാര്‍ത്ഥനകള്‍ നിര്‍വഹിക്കപ്പെടുമ്പോള്‍ നിങ്ങള്‍ അവിശ്വസിക്കും; അവനു പങ്കാളികള്‍ സ്ഥാപിതമായാലോ, നിങ്ങള്‍ വിശ്വസിക്കുകയും ചെയ്യും എന്നതിനാലത്രേ. എന്നാല്‍ ഉന്നതനും മഹാനുമായ അല്ലാഹുവിനാണ് ഇന്നത്തെ വിധി.

അവനാണ് തന്റെ ദൃഷ്ടാന്തങ്ങള്‍ നിങ്ങള്‍ക്ക് കാണിച്ചുതരുന്നത്. അന്തരീക്ഷത്തില്‍ നിന്ന് നിങ്ങള്‍ക്കവന്‍ ഉപജീവനം ഇറക്കിത്തരുന്നുമുണ്ട്. അവങ്കലേക്കു മടങ്ങുന്നവരേ ചിന്തിച്ചു പാഠമുള്‍ക്കൊള്ളുകയുള്ളു; അതുകൊണ്ട്, വിധേയത്വം അല്ലാഹുവിന് ആത്മാര്‍ത്ഥമാക്കിക്കൊണ്ട് അവനോട് പ്രാര്‍ത്ഥിക്കുക; സത്യനിഷേധികള്‍ അനിഷ്ടപ്പെട്ടാലും. സമുന്നത പദവികളുള്ളവനും സിംഹാസനസ്ഥനുമാണവന്‍. തന്റെ അടിമകളില്‍ താനുദ്ദേശിക്കുന്നവര്‍ക്ക്-അന്ത്യനാളിനെപ്പറ്റി മുന്നറിയിപ്പ് നല്‍കാനായി -ദിവ്യസന്ദേശചൈതന്യം അവന്‍ നിക്ഷേപിക്കുന്നു. സൃഷ്ടികള്‍ പുറത്തുവരുന്ന ദിനമത്രേ അന്ന്. അവരെക്കുറിച്ച യാതൊരു കാര്യവും അല്ലാഹുവിന്ന് അപ്രത്യക്ഷമാകയില്ല. 'ഇന്ന് ആര്‍ക്കാണ് രാജാധിപത്യം? ഏകനും അധൃഷ്യനുമായ അല്ലാഹുവിന്ന്!'⁵
ഓരോ വ്യക്തിക്കും ഇന്നേ ദിവസം താന്‍ പ്രവര്‍ത്തിച്ചതിനുള്ള പ്രതിഫലം നല്‍കപ്പെടുന്നതാണ്. ഇന്ന് അതിക്രമമില്ല. അല്ലാഹു അതിദ്രുതം വിചാരണ ചെയ്യുന്നവന്‍ തന്നെ, തീര്‍ച്ച.

ആസന്ന വിപത്തിന്റെ നാളിനെക്കുറിച്ച് അവര്‍ക്ക് താങ്കള്‍ മുന്നറിയിപ്പ് നല്‍കുക- ശ്വാസമടക്കി ഹൃദയങ്ങള്‍ തൊണ്ടക്കുഴിയിലെത്തുന്ന സന്ദര്‍ഭം! അതിക്രമികള്‍ക്ക് ആത്മമിത്രമോ സ്വീകാര്യശുപാര്‍ശകനോ ആയി ആരുമുണ്ടാകില്ല.⁶
കണ്ണുകളുടെ കട്ടുനോട്ടവും മനസ്സുകള്‍ ഒളിച്ചുവെക്കുന്നതും അല്ലാഹു അറിയുന്നു. അവന്‍ സത്യസമേതമാണ് വിധികല്‍പിക്കുക. അവനെ വിട്ട് നിഷേധികള്‍ പ്രാര്‍ത്ഥിക്കുന്നവയാകട്ടെ, യാതൊരു കാര്യത്തിലും വിധി കല്‍പിക്കുന്നതല്ല. അല്ലാഹു എല്ലാം കേള്‍ക്കുകയും കണ്ടറിയുകയും ചെയ്യുന്നവന്‍ തന്നെ.

ഇവര്‍ ഭൂമിയില്‍ സഞ്ചരിക്കുകയും പൂര്‍വികരുടെ പരിണതി എങ്ങനെയായിരുന്നു എന്ന് നോക്കുകയും ചെയ്യുന്നില്ലേ? കരുത്തു കൊണ്ടും ഭൂമിയിലെ അവശിഷ്ടങ്ങള്‍കൊണ്ടും ഇവരെക്കാള്‍ ശക്തരായിരുന്നു അവര്‍. എന്നിട്ട് തങ്ങളുടെ കുറ്റകൃത്യങ്ങളാല്‍ അവരെ അല്ലാഹു പിടികൂടി. അവന്റെ ശിക്ഷയില്‍ നിന്ന് സുരക്ഷയേകാന്‍ ആരും അവര്‍ക്കുണ്ടായില്ല. അവരിലേക്കുള്ള ദൂതന്മാര്‍ സ്പഷ്ടമായ പ്രമാണങ്ങളുമായി അവരുടെയടുത്തു ചെല്ലുകയും എന്നിട്ടവര്‍ അവിശ്വസിക്കുകയും തന്മൂലം അല്ലാഹു അവരെ ശിക്ഷിക്കുകയും ചെയ്തു എന്നതിനാലാണത്. അവന്‍ കരുത്തനും തീക്ഷ്ണമായി ശിക്ഷിക്കുന്നവനും തന്നെയാകുന്നു.⁷

നമ്മുടെ ദൃഷ്ടാന്തങ്ങളും സ്പഷ്ട പ്രമാണങ്ങളുമായി ഫിര്‍ഔന്‍, ഹാമാന്‍, ഖാറൂന്‍ എന്നിവരിലേക്ക് മൂസാ നബിയെ നാം നിയോഗിക്കുകയുണ്ടായി. 'ഇവന്‍ നുണയനായ ഒരു ആഭിചാരകനാണ്' എന്ന് അവര്‍ ജല്‍പിച്ചു. അങ്ങനെ, നമ്മുടെ പക്കല്‍ നിന്നുള്ള സത്യവുമായി അവരുടെയടുത്ത് അദ്ദേഹം ചെന്നപ്പോള്‍ 'ഇവനൊന്നിച്ച് വിശ്വസിച്ചവരുടെ ആണ്‍ശിശുക്കളെ വധിക്കുകയും പെണ്‍ശിശുക്കളെ ജീവിക്കാന്‍ വിടുകയും ചെയ്യുക' എന്നവര്‍ ഉത്തരവിട്ടു. നിഷേധികളുടെ കുതന്ത്രങ്ങള്‍ പരാജയപ്പെടുകയേ ചെയ്യൂ.⁸
ഫിര്‍ഔന്‍ ആക്രോശിച്ചു: എന്നെ വിടൂ, മൂസായെ കൊല്ലും ഞാന്‍! തന്റെ നാഥനെയവന്‍ വിളിക്കട്ടെ. അവന്‍ നിങ്ങളുടെ മതം ഭേദഗതി ചെയ്യുകയോ ഇന്നാട്ടില്‍ കുഴപ്പമുണ്ടാക്കുകയോ ചെയ്യുമെന്നാണ് എനിക്കു പേടി.⁹
മൂസാ നബി പ്രതികരിച്ചു: എന്റെയും നിങ്ങളുടെയും നാഥനായിട്ടുള്ളവനോട് വിചാരണാദിനത്തെ വിശ്വസിക്കാത്ത സകല അഹങ്കാരികളില്‍ നിന്നും ഞാന്‍ കാവല്‍ തേടുന്നു.

തന്റെ വിശ്വാസം ഒളിച്ചു വെക്കുകയായിരുന്ന ഫിര്‍ഔന്റെ ആളുകളില്‍ പെട്ട സത്യവിശ്വാസിയായൊരു വ്യക്തി ഇടപെട്ടു ചോദിച്ചു:¹⁰
എന്റെ നാഥന്‍ അല്ലാഹുവാണ് എന്ന് പ്രസ്താവിക്കുന്നതിനാല്‍ ഒരാളെ നിങ്ങള്‍ വധിക്കുകയോ? നിങ്ങളുടെ നാഥങ്കല്‍ നിന്നുള്ള സ്പഷ്ടമായ ദൃഷ്ടാന്തങ്ങള്‍ അദ്ദേഹം ഹാജറാക്കിയിട്ടുണ്ട് താനും. വ്യാജവാദിയാണിയാളെങ്കില്‍ അതിന്റെ ദൂഷ്യം അദ്ദേഹത്തിനു തന്നെയാണ്. ഇനി സത്യമാണ് പറയുന്നതെങ്കില്‍, താന്‍ മുന്നറിയിപ്പു തരുന്ന കാര്യങ്ങള്‍ നിങ്ങള്‍ക്ക് വന്നുഭവിക്കുന്നതുമായിരിക്കും. പരിധിവിട്ടു കടക്കുന്നവനും വ്യാജവാദിയുമായ ഒരാളെ അല്ലാഹു മാര്‍ഗദര്‍ശനം ചെയ്യുകയേയില്ല.¹¹
എന്റെ ജനമേ, ഇന്നാട്ടില്‍ ജേതാക്കളെന്നനിലക്ക് നിങ്ങള്‍ക്ക് തന്നെയാണിന്ന് രാജാധിപത്യം. എന്നാല്‍ അല്ലാഹുവിന്റെ ദണ്ഡനം വന്നെത്തുകയാണെങ്കില്‍ നമ്മെ സഹായിക്കാന്‍ ആരുണ്ടാകും?¹²
ഫറോവ വ്യക്തമാക്കി: എനിക്ക് ശരിയെന്ന് തോന്നുന്ന മാര്‍ഗം മാത്രമാണ് നിങ്ങള്‍ക്കു ഞാന്‍ കാണിച്ചുതരുന്നത്; നേരായ വഴിയിലേക്കേ ഞാന്‍ നിങ്ങളെ നയിക്കൂ.

ആ വിശ്വാസി പ്രഖ്യാപിച്ചു: എന്റെ ജനമേ, പൂര്‍വകാല നിഷേധീവിഭാഗങ്ങളുടെ ഉന്മൂലന ദിനം പോലുള്ള ഒന്ന് നിങ്ങള്‍ക്ക് വരിക തന്നെ ചെയ്യുമെന്ന് ഞാന്‍ ഭയപ്പെടുകയാണ്-നൂഹ് നബിയുടെ ജനതയുടെയും ആദിന്റെയും സമൂദിന്റെയും അവരുടെ പിന്‍ഗാമികളുടെയും രീതിക്കു സദൃശ്യമായത്.¹³
അടിമകളോട് ഒരുതരം അതിക്രമമനുവര്‍ത്തിക്കാനും അല്ലാഹു ഉദ്ദേശിക്കില്ല. എന്റെ ജനമേ, നിങ്ങള്‍ അന്യോന്യം വിളിച്ചു സഹായമര്‍ത്ഥിക്കുന്ന-പിന്തിരിഞ്ഞോടുന്ന-ദിവസം നിങ്ങളെപ്പറ്റി ഞാന്‍ ഭയപ്പെടുക തന്നെ ചെയ്യുന്നു. അന്ന് അല്ലാഹുവിന്റെ ശിക്ഷയില്‍ നിന്ന് ഒരാളും അഭയം തരില്ല. അല്ലാഹു വഴിതെറ്റിക്കുന്നവന്ന് സന്മാര്‍ഗം കാണിച്ചുകൊടുക്കാന്‍ ഒരാളും ഇല്ലതന്നെ.

സ്പഷ്ടമായ പ്രമാണങ്ങളുമായി നേരത്തെ യൂസുഫ് നബി നിങ്ങളിലേക്ക് വരികയുണ്ടായി. അദ്ദേഹത്തിന്റെ സിദ്ധാന്തങ്ങളിലും സന്ദേഹികളായിരുന്നു നിങ്ങള്‍. അങ്ങനെ, അദ്ദേഹം നിര്യാതനായപ്പോള്‍ 'ഇദ്ദേഹത്തിനു ശേഷം ഇനി, അല്ലാഹു ഒരു ദൂതനെയും അയക്കുകയേയില്ല' എന്ന് നിങ്ങള്‍ ജല്‍പിക്കുകയുണ്ടായി.¹⁴
ഇങ്ങനെ പരിധിവിട്ടവനും സന്ദേഹിയുമായവനെ-യാതൊരു തെളിവും ലഭിക്കാതെ അല്ലാഹുവിന്റെ ദൃഷ്ടാന്തങ്ങളില്‍ തര്‍ക്കിക്കുന്നവരെ-യാണ് അല്ലാഹു വഴിതെറ്റിക്കുക. അല്ലാഹുവിങ്കലും സത്യവിശ്വാസികളുടെയടുത്തും വലിയ കോപത്തിനു നിമിത്തമാകും അത്. അഹംഭാവിയും സ്വേച്ഛാധിപതിയുമായ സര്‍വരുടെ ഹൃദയത്തിലും ഇങ്ങനെ അല്ലാഹു മുദ്രചാര്‍ത്തുന്നു.

ഫിര്‍ഔന്‍ ഉത്തരവിട്ടു: 'ഓ ഹാമാന്‍, എനിക്ക് വാനസരണികളിലെത്താനും എന്നിട്ടു മൂസാനബിയുടെ ദൈവത്തിലേക്ക് എത്തിനോക്കാനുമായി ഒരു ഉന്നതസൗധം നിര്‍മിക്കുക! അവന്‍ നുണപറയുകയാണെന്നുതന്നെയാണ് ഞാന്‍ മനസ്സിലാക്കുന്നത്.'¹⁵
ഇങ്ങനെ ഫിര്‍ഔന്ന് തന്റെ ഹീനചെയ്തി ആകര്‍ഷകമായി തോന്നുകയും നേര്‍വഴിയില്‍ നിന്ന് അവന്‍ പ്രതിരോധിക്കപ്പെടുകയുമുണ്ടായി. ഫിര്‍ഔന്റെ ഗൂഢാലോചന നാശത്തിലേ കലാശിച്ചുള്ളൂ.

ആ വിശ്വാസി പ്രഖ്യാപിച്ചു: എന്റെ ജനമേ, നിങ്ങള്‍ എന്നെ പിന്തുടരൂ. ഞാന്‍ നിങ്ങള്‍ക്ക് നേര്‍മാര്‍ഗം കാട്ടിത്തരാം. ഈ ഐഹിക ജീവിതം ഒരു നശ്വരവിഭവം മാത്രമാണ്; പരലോകം തന്നെയത്രേ സ്ഥിരതാമസഗേഹം. ഒരാള്‍ ഒരു തിന്മ ചെയ്താല്‍ തത്തുല്യപ്രതിഫലമേ നല്‍കപ്പെടൂ; സത്യവിശ്വാസിയായി സല്‍കര്‍മമനുഷ്ഠിക്കുന്നത് ആരോ -പുരുഷനോ സ്ത്രീയോ ആകട്ടെ- അവര്‍ സ്വര്‍ഗപ്രാപ്തരാകുന്നതും അവര്‍ക്കവിടെ കണക്കില്ലാത്ത ഉപജീവനം നല്‍കപ്പെടുന്നതുമാകുന്നു.¹⁶
എന്റെ ജനമേ, എന്തൊരു വൈചിത്ര്യമാണിത്: ഞാന്‍ നിങ്ങളെ സുരക്ഷിതത്വത്തിലേക്ക് ക്ഷണിക്കുന്നു; നിങ്ങള്‍ എന്നെ വിളിക്കുന്നതോ നരകത്തിലേക്ക്, ഞാന്‍ അല്ലാഹുവിനെ നിഷേധിക്കാനും എനിക്കറിവില്ലാത്തത് അവനോട് പങ്കുചേര്‍ക്കാനും! ഞാന്‍ നിങ്ങളെ ക്ഷണിക്കുന്നത് അജയ്യനും ഏറെ പൊറുക്കുന്നവനുമായ അല്ലാഹുവിലേക്കാകുന്നു.¹⁷
ഒട്ടുമേ സംശയമില്ല: 'ഏതൊരു വ്യാജസരണിയിലേക്ക് നിങ്ങളെന്നെ വിളിക്കുന്നുവോ അതിന്ന് ഇഹലോകത്തോ പരലോകത്തോ ഒരുവിധ സന്ദേശവുമില്ല; നമ്മുടെ മടക്കം അല്ലാഹുങ്കവിലേക്കാണ്; അതിക്രമികള്‍ തന്നെയാണ് നരകക്കാര്‍.' ഞാന്‍ ഇപ്പറയുന്നത് വഴിയെ നിങ്ങള്‍ അനുസ്മരിക്കുന്നതാണ്; എന്റെ കാര്യം ഞാന്‍ അല്ലാഹുവിനെ ഭരമേല്‍പിക്കുന്നു. അടിമകളെ നന്നായി കണ്ടറിയുന്നവനാണവന്‍.¹⁸

അങ്ങനെ അവരുടെ ഗൂഢാലോചനയുടെ ദൂഷ്യങ്ങളില്‍ നിന്ന് അല്ലാഹു അദ്ദേഹത്തെ സംരക്ഷിച്ചു. ഫറോവസംഘത്തെ ഹീനശിക്ഷ ആവരണം ചെയ്യുകയുണ്ടായി-പ്രഭാത-പ്രദോഷങ്ങളില്‍ അവര്‍ നരകത്തിനു മുമ്പാകെ പ്രദര്‍ശനവിധേയരാകും! അന്ത്യനാള്‍ ആഗതമാകുമ്പോള്‍ വിളംബരമുണ്ടാകും: ഫിര്‍ഔന്‍ സംഘത്തെ ഏറ്റവും കഠോരമായ ശിക്ഷയിലേക്ക് തള്ളിവിടുക!¹⁹

നരകക്കാര്‍ പരസ്പരം കുതര്‍ക്കങ്ങള്‍ നടത്തുന്നത് സ്മരണീയമത്രേ- ബലഹീനരായിരുന്നവര്‍ അഹന്തനടിച്ചിരുന്ന നേതാക്കളോട് ബോധിപ്പിക്കും: ഞങ്ങള്‍ നിങ്ങളെ പിന്തുടര്‍ന്നവര്‍ തന്നെയായിരുന്നു; അതുകൊണ്ട് നരകശിക്ഷയില്‍ നിന്ന് ഒരംശമെങ്കിലും ഞങ്ങളില്‍ നിന്നൊഴിവാക്കിത്തരാന്‍ നിങ്ങള്‍ക്കാകുമോ? അഹങ്കാര നാട്യക്കാര്‍ പ്രതികരിക്കും: നാമൊക്കെയും ഈ നരകബന്ധനത്തില്‍ തന്നെയാണല്ലോ; നിശ്ചയം, അല്ലാഹു അടിമകള്‍ക്കിടയില്‍ വിധികല്‍പിച്ചു കഴിഞ്ഞിരിക്കുന്നു! നരകക്കാര്‍ അതിന്റെ പാറാവുകാരോട് അപേക്ഷിക്കും: ഞങ്ങള്‍ക്ക് ഒരു ദിവസത്തെ ശിക്ഷയെങ്കിലും ലഘൂകരിച്ചുകിട്ടാന്‍ ഞങ്ങളുടെ നാഥനോട് ഒന്ന് പ്രാര്‍ത്ഥിച്ചു നോക്കുമോ? അവര്‍ ചോദിക്കും: നിങ്ങളുടെ ദൈവദൂതന്മാര്‍ സ്പഷ്ടമായ തെളിവുകളുമായി നിങ്ങളെ സമീപിച്ചിരുന്നില്ലേ? 'അതെ' എന്നവര്‍ പ്രതികരിക്കും. പാറാവുകാര്‍ പറയും: നിങ്ങള്‍ തന്നെ പ്രാര്‍ത്ഥിക്കുക; നിഷേധികളുടെ അപേക്ഷ വൃഥാവിലാവുക മാത്രമേ ചെയ്യൂ.²⁰

നമ്മുടെ ദൂതന്മാരെയും സത്യവിശ്വാസം കൈവരിച്ചവരെയും ഐഹിക ജീവിതത്തിലും സാക്ഷികള്‍ വന്നെത്തുന്ന അന്ത്യനാളിലും നാം സഹായിക്കുക തന്നെ ചെയ്യും, തീര്‍ച്ച- അതായത്, അതിക്രമകാരികള്‍ക്ക് തങ്ങളുടെ ഒഴികഴിവ് ഫലപ്രദമാകാത്ത ദിവസം. ശാപവും ഹീനമായ സങ്കേതവുമാണ് അവര്‍ക്കുണ്ടാവുക.

മൂസാ നബിക്കു നാം നേര്‍വഴി കാട്ടിക്കൊടുക്കുകയും ബുദ്ധിമാന്മാര്‍ക്ക് മാര്‍ഗദര്‍ശനവും ഉദ്‌ബോധനവുമായി ഇസ്രയേല്യരെ വേദാവകാശികളാക്കുകയുമുണ്ടായി. അതുകൊണ്ട്, താങ്കള്‍ ക്ഷമയവലംബിക്കുക. അല്ലാഹുവിന്റെ വാഗ്ദാനം സത്യം തന്നെയാണ്, തീര്‍ച്ച. താങ്കളുടെ വീഴ്ചക്ക് മാപ്പപേക്ഷിക്കുകയും പ്രഭാത-പ്രദോഷങ്ങളില്‍ നാഥനെ സ്തുതിക്കുന്നതോടൊപ്പം അവന്റെ മഹത്ത്വം വാഴ്ത്തുകയും ചെയ്യുക.²¹
യാതൊരു പ്രമാണവുമില്ലാതെ അല്ലാഹുവിന്റെ സൂക്തങ്ങളില്‍ കുതര്‍ക്കങ്ങള്‍ നടത്തുന്നവരുടെ ഹൃദയങ്ങളില്‍ അഹംഭാവമേയുള്ളൂ; ലക്ഷ്യം നേടാന്‍ അവര്‍ക്കാകുന്നതേയല്ല. അതുകൊണ്ട് അല്ലാഹുവിനോട് താങ്കള്‍ കാവല്‍ തേടുക. എല്ലാം കേള്‍ക്കുന്നവനും കാണുന്നവനും തന്നെയാണവന്‍.²²

ഭുവന-വാനങ്ങള്‍ പടച്ചുണ്ടാക്കുന്നതു തന്നെയാണ് മനുഷ്യനെ സൃഷ്ടിക്കുന്നതിനേക്കാള്‍ വലിയത്; പക്ഷേ, അവരില്‍ മിക്കവരും വസ്തുതകള്‍ ഗ്രഹിക്കുന്നില്ല. അന്ധനും കാഴ്ചയുള്ളവനുമോ, വിശ്വസിച്ച് സല്‍കര്‍മങ്ങളനുഷ്ഠിച്ചവരും പാപകൃത്യങ്ങള്‍ ചെയ്തവരുമോ തുല്യരാകില്ല; വളരെ കുറച്ചു മാത്രമേ നിങ്ങള്‍ ചിന്തിക്കുന്നുള്ളൂ.²³
നിശ്ചയം, അന്ത്യദിനം-സംശയം ഒട്ടുമില്ല- വന്നെത്തുക തന്നെ ചെയ്യും. പക്ഷേ, മിക്ക മനുഷ്യരും സത്യവിശ്വാസം വരിക്കുന്നില്ല.

എന്നോട് പ്രാര്‍ത്ഥിക്കൂ, ഞാന്‍ നിങ്ങള്‍ക്ക് ഉത്തരം തരാം എന്ന് നിങ്ങളുടെ നാഥന്‍ അരുളിയിരിക്കുന്നു. എനിക്ക് ആരാധനകളര്‍പ്പിക്കാതെ അഹംഭാവം കാട്ടുന്നവര്‍ വഴിയെ ഹീനരായി നരകത്തില്‍ പ്രവേശിക്കുക തന്നെ ചെയ്യുന്നതാണ്. നിങ്ങള്‍ക്കായി രാത്രിയെ സ്വസ്ഥമായി വസിക്കാവുന്നതും പകലിനെ പ്രകാശമാനമായും ആക്കിയത് അല്ലാഹുവാകുന്നു. ജനങ്ങളോട് മഹത്തായ ഔദാര്യമുള്ളവനാണവന്‍; പക്ഷേ, മനുഷ്യരില്‍ മിക്കവരും കൃതജ്ഞത പ്രകാശിപ്പിക്കുന്നില്ല. നിങ്ങളുടെ രക്ഷാകര്‍ത്താവും സകല വസ്തുക്കളുടെയും സ്രഷ്ടാവുമാണവന്‍. അവനല്ലാതെ ഒരാരാധ്യനും ഇല്ല. എന്നിട്ടും സത്യത്തെ വിട്ട് നിങ്ങളെങ്ങനെ വ്യതിചലിപ്പിക്കപ്പെടുന്നു? അല്ലാഹുവിന്റെ സൂക്തങ്ങളെ നിഷേധിച്ചിരുന്നവര്‍ ഇങ്ങനെത്തന്നെയാണ് വഴിതെറ്റിക്കപ്പെട്ടിരുന്നത്.²⁴

അല്ലാഹുവാണ് നിങ്ങള്‍ക്കായി ഭൂമിയെ ആവാസസ്ഥലവും ആകാശത്തെ മേല്‍ക്കൂരയുമാക്കുകയും മെച്ചപ്പെട്ട ആകാര സൗഷ്ഠവം നല്‍കുകയും വിശിഷ്ട ഭോജ്യങ്ങളില്‍ നിന്ന് ഉപജീവനം തരികയും ചെയ്തത്. അവനാണ് നിങ്ങളുടെ നാഥനായ അല്ലാഹു. പ്രപഞ്ച നാഥനായ അല്ലാഹു അനുഗ്രഹ സമ്പൂര്‍ണനത്രേ. എന്നും ജീവിച്ചിരിക്കുന്നവന്‍ അവനാണ്; അവനല്ലാതെ ഒരാരാധ്യനുമില്ല. അതുകൊണ്ട്, ആത്മാര്‍ത്ഥരായി നിങ്ങള്‍ അവനോടു പ്രാര്‍ത്ഥിക്കുക. സര്‍വലോക സംരക്ഷകനായ അല്ലാഹുവിനത്രേ സ്‌തോത്രങ്ങളഖിലവും.²⁵

നബീ, പ്രഖ്യാപിക്കുക: എന്റെ നാഥങ്കല്‍ നിന്ന് പ്രമാണം ലഭ്യമായതുകൊണ്ട്, അവനെ വിട്ട് നിങ്ങള്‍ ധ്യാനിച്ചുകൊണ്ടിരിക്കുന്നവക്ക് ആരാധനകളര്‍പ്പിക്കുന്നതില്‍ നിന്ന് എനിക്ക് നിരോധം വരികയും പ്രപഞ്ച നാഥനോടാകണം വിധേയത്വമെന്ന് ഞാന്‍ അനുശാസിക്കപ്പെടുകയും ചെയ്തിരിക്കുന്നു. മണ്ണിലും പിന്നെ രേതസ്‌കണത്തിലും പിന്നെ ഭ്രൂണത്തിലും നിന്ന് നിങ്ങളെ പടച്ചത് അവനാണ്; പിന്നീട് ഒരു കുഞ്ഞായി നിങ്ങളെയവന്‍ പുറത്തുകൊണ്ടുവന്നു; ശേഷം പൂര്‍ണയൗവനത്തിലെത്താനും പിന്നെ വൃദ്ധരായിത്തീരാനും വേണ്ടി. നിങ്ങളില്‍ ചിലര്‍ നേരത്തെ നിര്യാതരാകും. നിശ്ചയിക്കപ്പെട്ട ഒരവധി നിങ്ങള്‍ പ്രാപിക്കാനും ചിന്തിക്കാനും വേണ്ടിയത്രേ ഇതൊക്കെയും. ജീവിപ്പിക്കുന്നതും മരിപ്പിക്കുന്നതും അവനാണ്. അവനൊരു തീരുമാനമെടുത്താല്‍ 'ഉണ്ടാവുക' എന്ന് പറയുകയേ വേണ്ടൂ- അത് രൂപപ്പെട്ടു കഴിയുന്നു.²⁶

അല്ലാഹുവിന്റെ സൂക്തങ്ങളില്‍ തര്‍ക്കവിതര്‍ക്കങ്ങള്‍ നടത്തുന്നവരെ -ദൂതന്മാരെ ഏതൊരു ദൗത്യവുമായി നാം അയച്ചുവോ അതും വേദവും വ്യാജമാക്കിയവരെ- താങ്കള്‍ കണ്ടില്ലേ? എങ്ങനെയാണവര്‍ക്ക് സത്യവ്യതിയാനം വരുന്നത്. തിക്തഫലം വഴിയെ അവരറിഞ്ഞുകൊള്ളും. കണ്ഠങ്ങളില്‍ കുരുക്കുകളും ചങ്ങലകളുമായി ചുട്ടുപൊള്ളുന്ന വെള്ളത്തിലൂടെ അവര്‍ വലിച്ചിഴക്കപ്പെടുകയും നരകാഗ്നിയില്‍ ജ്വലിപ്പിക്കപ്പെടുകയും ചെയ്യുന്ന സന്ദര്‍ഭം സ്മരണീയമത്രേ. അല്ലാഹുവിനെ വിട്ട് നിങ്ങള്‍ പങ്കാളികളാക്കിയിരുന്നവയെവിടെ എന്ന് അവരോട് ചോദിക്കപ്പെടുന്നതും 'അവ ഞങ്ങളില്‍ നിന്ന് അഗോചരമായിരിക്കുന്നു; എന്നല്ല, യാതൊന്നിനോടുമായിരുന്നില്ല ഞങ്ങളുടെ പ്രാര്‍ത്ഥന' എന്ന് അവര്‍ പ്രതികരിക്കുന്നതുമാണ്. ഇങ്ങനെ, സത്യനിഷേധികളെ അല്ലാഹു വഴിതെറ്റിക്കുന്നു. അവരോടിങ്ങനെ ഉത്തരവുണ്ടാകും: 'അന്യായമായി നിങ്ങള്‍ ഭൂമിയില്‍ അഭിരമിക്കുകയും അഹന്തനടിക്കുകയും ചെയ്തിരുന്നതുമൂലമത്രേ അത്. നരകവാതായനങ്ങളിലൂടെ ശാശ്വതനിവാസികളെന്ന നിലക്ക് നിങ്ങള്‍ കടന്നോളൂ; അഹങ്കാരികളുടെ ആവാസസ്ഥലം എത്ര ഹീനം!' അതുകൊണ്ട്, നബീ, താങ്കള്‍ ക്ഷമിക്കുക. അല്ലാഹുവിന്റെ വാഗ്ദാനം സത്യം തന്നെ. നാമവര്‍ക്കു നല്‍കുന്ന താക്കീതുകളില്‍ ചിലത് ഒരുപക്ഷെ താങ്കള്‍ക്ക് കാണിച്ചു തരികയോ അല്ലെങ്കിലതിനു മുമ്പ് അങ്ങയെ മരിപ്പിക്കുകയോ ചെയ്‌തേക്കാം; എങ്ങനെയായാലും അവരുടെ മടക്കം നമ്മിലേക്ക് തന്നെയായിരിക്കും.²⁷

അങ്ങേയ്ക്കു മുമ്പ് പല ദൂതന്മാരെയും നാം നിയോഗിച്ചിട്ടുണ്ട്; അവരില്‍ ചിലരെപ്പറ്റി താങ്കള്‍ക്ക് നാം വിവരിച്ചു തരികയും മറ്റു ചിലരെപ്പറ്റി പ്രതിപാദിച്ചു തരാതിരിക്കുകയും ചെയ്തു. ഒരു ദൂതന്നും അല്ലാഹുവിന്റെ സമ്മതത്തോടെയല്ലാതെ ഒരു ദൃഷ്ടാന്തവും അവതരിപ്പിക്കാന്‍ കഴിയില്ല. എന്നാല്‍ അവന്റെ നിര്‍ദേശം വന്നാല്‍ സത്യനിഷ്ഠമായി വിധി കല്‍പിക്കപ്പെടുന്നതും അസത്യവാദികള്‍ നഷ്ടത്തിലാകുന്നതുമാകുന്നു.²⁸
നിങ്ങള്‍ക്ക് സവാരി ചെയ്യാനും ആഹരിക്കാനുമായി കാലികളെ സൃഷ്ടിച്ചുതന്നത് അല്ലാഹുവാണ്. മറ്റു പല പ്രയോജനങ്ങളും നിങ്ങള്‍ക്കവയിലുണ്ട്. നിങ്ങളുടെ മനസ്സിലുള്ള ആവശ്യങ്ങള്‍ പ്രാപിക്കുന്നതിനും അവ ഫലപ്രദമാകുന്നു. അവയുടെ പുറത്തും ജലയാനങ്ങളിലും നിങ്ങള്‍ വഹിക്കപ്പെടുകയും അവന്‍ തന്റെ ദൃഷ്ടാന്തങ്ങള്‍ നിങ്ങളെ കാണിക്കുകയും ചെയ്യുന്നു. എന്നിട്ട് അവന്റെ ഏതു ദൃഷ്ടാന്തങ്ങളാണ് നിങ്ങള്‍ നിഷേധിക്കുന്നത്?²⁹

അവര്‍ ഭൂമിയില്‍ സഞ്ചരിക്കുകയും തങ്ങളുടെ പൂര്‍വികരുടെ പരിണതി എങ്ങനെയായിരുന്നു എന്നു നോക്കുകയും ചെയ്യുന്നില്ലേ? അവര്‍ ഇവരെക്കാള്‍ സംഖ്യാധിക്യമുള്ളവരും കരുത്തുകൊണ്ടും നാട്ടിലിട്ടേച്ചുപോയ അവശിഷ്ടങ്ങള്‍ കൊണ്ടും ഏറ്റം ശക്തരുമായിരുന്നു. എന്നിട്ട്, തങ്ങള്‍ ആര്‍ജിച്ചുവെച്ചതൊന്നും അവര്‍ക്ക് ഫലദായകമായില്ല. അങ്ങനെ, ദൂതന്മാര്‍ സ്പഷ്ടമായ തെളിവുകളുമായി അവരുടെ സമീപം ചെന്നപ്പോള്‍ തങ്ങളുടെ വശമുള്ള ജ്ഞാനം കൊണ്ട് സംതൃപ്തരാവുകയാണവര്‍ ചെയ്തത്.³⁰
തങ്ങള്‍ പരിഹാസ പാത്രമാക്കിയിരുന്ന ദൈവികശിക്ഷ അവരെ ആവരണം ചെയ്യുകയുമുണ്ടായി.

അങ്ങനെ നമ്മുടെ ശിക്ഷ ഗോചരീഭവിച്ചപ്പോള്‍ 'ഞങ്ങള്‍ അല്ലാഹുവില്‍ മാത്രം വിശ്വാസം വെച്ചുപുലര്‍ത്തുകയും അവന്റെ പങ്കാളികളാക്കിയിരുന്നവയെ നിഷേധിക്കുകയും ചെയ്തിരിക്കുന്നു' എന്ന് അവര്‍ വിലപിച്ചു പറഞ്ഞു. എന്നാല്‍ നമ്മുടെ ശിക്ഷ നേരില്‍ കണ്ടപ്പോഴത്തെ ആ വിശ്വാസം അവര്‍ക്കു പ്രയോജകീഭവിച്ചില്ല. തന്റെ അടിമകളുടെ കാര്യത്തില്‍ അല്ലാഹു പണ്ടേ നടപ്പിലാക്കിയ നടപടിയാണത്. ശിക്ഷവന്നിടത്ത് സത്യനിഷേധികള്‍ പരാജയപ്പെടുകയുമുണ്ടായി.³¹