അസ് സുമർ - الزمر - Az-Zumar

ഈ വേദാവതരണം അജയ്യനും യുക്തിമാനുമായ അല്ലാഹുവിങ്കല്‍ നിന്നാണ്. അങ്ങേക്ക് നാം ഇതവതരിപ്പിച്ചു തന്നത് സത്യസന്ധമായിത്തന്നെയാകുന്നു; അതുകൊണ്ട് ആത്മാര്‍ത്ഥമായി അല്ലാഹുവിന്ന് വിധേയത്വം കാണിച്ച് അവനെ ആരാധിക്കുക. അറിയണം, ആത്മാര്‍ത്ഥ വിധേയത്വമെന്നത് അല്ലാഹുവിന്ന് മാത്രം അവകാശപ്പെട്ടതാണ്. അവനെ വിട്ട് മറ്റു സംരക്ഷകരെ വരിച്ചവര്‍ ജല്‍പിക്കുന്നത് 'അല്ലാഹുവുമായി കൂടുതല്‍ സാമീപ്യമുണ്ടാക്കിത്തരാന്‍ മാത്രമാണ് ഞങ്ങള്‍ അവയെ ആരാധിക്കുന്നത്' എന്നത്രേ.¹
ഏതൊരു വിഷയത്തില്‍ അവര്‍ അഭിപ്രായ ഭിന്നരാണോ അതില്‍ അവന്‍ തീര്‍പ്പുകല്‍പിക്കുക തന്നെ ചെയ്യുന്നതാണ്. കടുത്ത നിഷേധിയും വ്യാജനും ആരോ, അവനെ അല്ലാഹു മാര്‍ഗദര്‍ശനം ചെയ്യുന്നതേയല്ല.

ഒരു സന്താനത്തെ വരിക്കണമെന്ന് അല്ലാഹുവിന്ന് ഉദ്ദേശ്യമുണ്ടായിരുന്നുവെങ്കില്‍ താന്‍ പടച്ചുണ്ടാക്കുന്നതില്‍ നിന്ന് ഇഷ്ടപ്പെട്ടത് തെരഞ്ഞെടുത്തേനെ; അവന്‍ എത്ര പരിശുദ്ധന്‍! സര്‍വവും അടക്കിബ്ഭരിക്കുന്നവനും ഏകനുമായ അല്ലാഹുവാണ് അവന്‍.²
ഭുവന-വാനങ്ങള്‍ സത്യനിഷ്ഠമായി അവന്‍ സൃഷ്ടിച്ചു. രാത്രിയെ പകലിന്മേലും പകലിനെ രാത്രിയുടെ മേലും അവന്‍ ആവരണം ചെയ്യുകയും സൂര്യനെയും ചന്ദ്രനെയും-ഓരോന്നും നിശ്ചിത അവധി വരെ സഞ്ചരിക്കുന്നു- നിയന്ത്രണ വിധേയമാക്കുകയും ചെയ്തു.³
അറിയുക, അവന്‍ അജയ്യനും ഏറെ മാപ്പരുളുന്നവനുമത്രേ. ഒരേയൊരു ശരീരത്തില്‍ നിന്ന് നിങ്ങളെ അവന്‍ സൃഷ്ടിക്കുകയും അതില്‍ നിന്നുതന്നെ അതിന്റെ ഇണയെ ഉണ്ടാക്കുകയും ചെയ്തു. കാലികളില്‍ നിന്നു എട്ടു ജോടികളും അവനവതരിപ്പിച്ചു. മൂന്ന് അന്ധകാരങ്ങള്‍ക്കുള്ളിലായി സൃഷ്ടിയുടെ ഒരു ഘട്ടം കഴിഞ്ഞ് മറ്റൊന്ന് എന്ന നിലയില്‍ മാതാക്കളുടെ ഗര്‍ഭാശയങ്ങളില്‍ നിങ്ങളെയവന്‍ സൃഷ്ടിക്കുകയാണ്. അവനാണ് നിങ്ങളുടെ നാഥനായ അല്ലാഹു; സര്‍വാധിപത്യവും അവന്നാകുന്നു. അവനല്ലാതെ വേറെ യാതൊരു ദൈവവും ഇല്ല. വസ്തുത ഇതൊക്കെയായിട്ട് നിങ്ങളെങ്ങനെയാണ് സത്യത്തില്‍ നിന്ന് വ്യതിചലിപ്പിക്കപ്പെടുന്നത്!⁴

നിങ്ങള്‍ കൃതഘ്‌നത കാട്ടുന്നുവെങ്കില്‍, അല്ലാഹു നിങ്ങളില്‍ നിന്നു പര്യാപ്തനത്രേ. തന്റെ അടിമകള്‍ നന്ദികേട് കാണിക്കുന്നത് അവന്നിഷ്ടമല്ല. നിങ്ങള്‍ കൃതജ്ഞത പ്രകാശിപ്പിക്കുന്നുവെങ്കില്‍ അവന്‍ സംതൃപ്തനാകും. കുറ്റം പേറുന്ന യാതൊരാളും മറ്റൊരാളുടെ പാപം ചുമക്കുന്നതല്ല. പിന്നീട് നാഥങ്കലേക്കായിരിക്കും നിങ്ങളുടെ മടക്കം. തത്സമയം സ്വന്തം ചെയ്തികളെക്കുറിച്ച് നിങ്ങള്‍ക്ക് അവനറിയിച്ചുതരും. ഹൃദയങ്ങളിലുള്ളവയെ സംബന്ധിച്ച് നന്നായറിയുന്നവനാണവന്‍, തീര്‍ച്ച. വല്ല പ്രതിസന്ധിയും അഭിമുഖീകരിക്കുമ്പോള്‍ മനുഷ്യന്‍ താഴ്മയോടെ തന്റെ നാഥങ്കലേക്ക് മടങ്ങി പ്രാര്‍ത്ഥിക്കും. പിന്നീട് തന്റെ പക്കല്‍ നിന്നുള്ള എന്തെങ്കിലും അനുഗ്രഹം അവന്‍ നല്‍കിയാല്‍, മുമ്പ് ആരോടു പ്രാര്‍ത്ഥിച്ചിരുന്നോ അവനെ ഇവന്‍ വിസ്മരിക്കുകയും അല്ലാഹുവിന്റെ പന്ഥാവില്‍ നിന്ന് മറ്റുള്ളവരെ വ്യതിചലിപ്പിക്കാനായി അവനു പങ്കാളികളെ ഉണ്ടാക്കുകയും ചെയ്യുന്നു! നബീ, പറയുക: ഈ നിഷേധവുമായി കുറഞ്ഞ സമയം നീ ആസ്വദിച്ചു കൊള്ളുക; നിശ്ചയം, നീ നരകക്കാരില്‍ പെട്ടവനാകുന്നു.⁵

പാരത്രിക ജീവിതത്തെക്കുറിച്ച് ഭയപ്പാട് പുലര്‍ത്തുകയും തന്റെ നാഥന്റെ അനുഗ്രഹം പ്രത്യാശിക്കുകയും ചെയ്തുകൊണ്ട് നമസ്‌കരിച്ചും സാഷ്ടാംഗം ചെയ്തും നിശയുടെ മുഹൂര്‍ത്തങ്ങളില്‍ ആരാധനാ നിമഗ്നനായവനോ അതോ സത്യനിഷേധിയോ ശ്രേഷ്ഠന്‍? പറയുക: അറിവുള്ളവരും അറിവില്ലാത്തവരും തുല്യരാകുമോ? ബുദ്ധിമാന്മാര്‍ മാത്രമേ ചിന്തിച്ചു കാര്യങ്ങള്‍ ഗ്രഹിക്കൂ.⁶

പറയുക: സത്യവിശ്വാസം വരിച്ച എന്റെ അടിമകളേ, നിങ്ങളുടെ നാഥനെ സൂക്ഷിക്കുക. ഈ ഭൗതിക ജീവിതത്തില്‍ നന്മയനുവര്‍ത്തിച്ചവര്‍ക്കാണ് ഉദാത്തമായ പ്രതിഫലമുള്ളത്; അല്ലാഹുവിന്റെ ഭൂമിയാകട്ടെ, പ്രവിശാലമാണ് താനും. ക്ഷമാശീലര്‍ക്ക് തങ്ങളുടെ പ്രതിഫലം കണക്കില്ലാതെ നല്‍കപ്പെടുന്നതാണ്.⁷
ആത്മാര്‍ത്ഥ വിധേയത്വം അല്ലാഹുവിന് സമര്‍പ്പിച്ചുകൊണ്ട് അവനെ ആരാധിക്കാനും അവനു കീഴ്‌പ്പെടുന്നവരില്‍ ഒന്നാമനായിരിക്കാനുമാണ് ഞാന്‍ അനുശാസിക്കപ്പെട്ടിരിക്കുന്നത്.⁸
നാഥനെ ധിക്കരിക്കുകയാണെങ്കില്‍ ഒരു ഗുരുതര നാളിലെ ശിക്ഷ ഞാന്‍ പേടിക്കുക തന്നെ ചെയ്യുന്നു. ആത്മാര്‍ത്ഥമായി അല്ലാഹുവിനോട് വിധേയത്വം കാട്ടി അവനെ മാത്രമാണ് ഞാന്‍ ആരാധിക്കുന്നത്; എന്നാല്‍ അവനെ വിട്ട് നിങ്ങള്‍ ഉദ്ദേശിക്കുന്നവയെ നിങ്ങളാരാധിച്ചോളൂ. പ്രഖ്യാപിക്കുക: പുനരുത്ഥാനത്തിന്റെ നാളില്‍ സ്വദേഹങ്ങള്‍ക്കും സ്വന്തക്കാര്‍ക്കും നഷ്ടം വരുത്തിവെച്ചവര്‍ ആരോ അവര്‍ തന്നെയാണ് സാക്ഷാല്‍ നഷ്ടക്കാര്‍. അറിയുക, അതുതന്നെയാണ് സ്പഷ്ടമായ പരാജയം.⁹
അവര്‍ക്ക് ഉപരിഭാഗത്തും താഴെയും അഗ്നിയുടെ കുടകളുണ്ട്. അല്ലാഹു തന്റെ അടിമകളെ ഭയപ്പെടുത്തുന്നത് ഈ ശിക്ഷയെക്കുറിച്ചാണ്. അതുകൊണ്ട് എന്റെ അടിമകളേ, നിങ്ങള്‍ എന്നെ സൂക്ഷിക്കുക.

പിശാചിനെ ആരാധിക്കുന്നത് വര്‍ജിക്കുകയും വിനയാന്വിതരായി അല്ലാഹുവിങ്കലേക്ക് മടങ്ങുകയും ചെയ്തവര്‍ക്കാണ് ശുഭവൃത്താന്തം.¹⁰
അതുകൊണ്ട്, വാക്കുകള്‍ സശ്രദ്ധം ശ്രവിക്കുകയും അതിലേറ്റവും ഉദാത്തമായത് പിന്തുടരുകയും ചെയ്യുന്ന എന്റെ അടിമകള്‍ക്ക് താങ്കള്‍ ശുഭവാര്‍ത്തയറിയിക്കുക. അവര്‍ക്കാണ് അല്ലാഹു നേര്‍മാര്‍ഗം കാണിച്ചിട്ടുള്ളത്; ബുദ്ധിമാന്മാരും അവര്‍ തന്നെ. അപ്പോള്‍, ശിക്ഷയുടെ വചനം സ്ഥിരപ്പെട്ടു കഴിയുകയോ നരകത്തില്‍ നിപതിച്ചു പോവുകയോ ചെയ്ത ഒരാളെ താങ്കള്‍ക്ക് രക്ഷപ്പെടുത്താനാകുമോ?¹¹
എന്നാല്‍ തങ്ങളുടെ നാഥനെ സൂക്ഷിച്ചവര്‍ക്ക് ചുവട്ടിലൂടെ ആറുകളൊഴുകുന്നതും മേല്‍ക്കുമേല്‍ തട്ടുകളായി പണിതതുമായ മണിമേടകളുണ്ട്. അല്ലാഹുവിന്റെ വാഗ്ദാനമാണിത്; അവന്‍ കരാറുകള്‍ ലംഘിക്കുന്നതല്ല.

നിങ്ങള്‍ ചിന്തിച്ചു നോക്കുന്നില്ലേ: അല്ലാഹു അന്തരീക്ഷത്തില്‍ നിന്ന് മഴ വര്‍ഷിക്കുകയും ഭൂമിയിലെ സ്രോതസ്സുകളിലേക്കത് കടത്തിവിടുകയും പിന്നീടതുവഴി ഭിന്നവര്‍ണങ്ങളിലുള്ള വിളകളുല്‍പാദിപ്പിക്കുകയും ചെയ്യുന്നു. അനന്തരം അത് ഉണങ്ങുകയും മഞ്ഞനിറമുള്ളതായി നീ കാണുകയും തദനന്തരം അവനത് വൈക്കോലാക്കുകയും ചെയ്യുന്നു. ബുദ്ധിമാന്മാര്‍ക്ക് ഇതില്‍ ഗുണപാഠമുണ്ടെന്ന് തീര്‍ച്ച. അപ്പോള്‍, ഇസ്‌ലാമാശ്ലേഷത്തിന്ന് ഒരാളുടെ ഹൃദയം അല്ലാഹു വിശാലമാക്കുകയും അങ്ങനെയവന്‍ തന്റെ നാഥങ്കല്‍ നിന്നുള്ള പ്രകാശത്തിലാവുകയും ചെയ്താല്‍ (ഒരു കഠിനഹൃദയനെപ്പോലെയാകുമോ അവന്‍?) അല്ലാഹുവിനെ കുറിച്ച ഓര്‍മയില്‍ നിന്ന് ഹൃദയങ്ങള്‍ കടുത്തുപോയവര്‍ക്കാണ് മഹാനാശം. അവര്‍ സ്പഷ്ടമായ വഴികേടിലത്രേ¹²

ഏറ്റം ഉദാത്തമായ വൃത്താന്തം-പരസ്പര സദൃശവും ആവര്‍ത്തിക്കപ്പെടുന്നതുമായ സൂക്തങ്ങളുള്ള ഗ്രന്ഥം-അവതരിപ്പിച്ചിരിക്കുന്നത് അല്ലാഹുവാകുന്നു. തങ്ങളുടെ നാഥനെ ഭയപ്പെടുന്നവരുടെ ചര്‍മങ്ങള്‍ക്ക് അവമൂലം രോമാഞ്ചമുണ്ടാകുന്നതും അവരുടെ തൊലികളും ഹൃദയങ്ങളും ദൈവസ്മരണക്കായി വിധേയമാകുന്നതുമാണ്. അല്ലാഹുവിങ്കല്‍ നിന്നുള്ള മാര്‍ഗദര്‍ശനമായാണത്; അതുവഴി താനുദ്ദേശിക്കുന്നവരെ അവന്‍ ഋജുവായ പന്ഥാവിലേക്കു നയിക്കുന്നു. ആരെയെങ്കിലും അല്ലാഹു ദുര്‍മാര്‍ഗത്തിലാക്കുന്നുവെങ്കില്‍ അവനെ സന്മാര്‍ഗത്തിലാക്കാന്‍ ഒരാളും തന്നെയുണ്ടാവില്ല.¹³

അന്ത്യനാളില്‍ ഹീനമായ നരകശിക്ഷ സ്വന്തം മുഖം കൊണ്ടു പ്രതിരോധിക്കേണ്ടിവരുന്ന ഒരാള്‍ (സ്വര്‍ഗക്കാരനെ പോലെയാണോ)? സ്വയം കര്‍മങ്ങളുടെ ഫലം നിങ്ങള്‍ ആസ്വദിച്ചുകൊള്ളുക എന്ന് അക്രമികളോട് പറയപ്പെടുന്നതാണ്.¹⁴
അവരുടെ മുന്‍ഗാമികളും സത്യത്തെ വ്യാജമാക്കിയിരുന്നു; നിനച്ചിരിക്കാത്ത വിധം അവര്‍ക്കു ശിക്ഷ വന്നെത്തുകയുണ്ടായി. അങ്ങനെയവര്‍ക്ക് ഐഹിക ജീവിതത്തില്‍ അല്ലാഹു അപമാനമുണ്ടാക്കി; പാരത്രിക ശിക്ഷ തന്നെയാണ് അതീവ ഗൗരവതരം! അവരത് ഗ്രഹിച്ചിരുന്നെങ്കില്‍...!¹⁵

ഈ ഖുര്‍ആനില്‍ സര്‍വ വിധ ഉപമകളും ജനങ്ങള്‍ക്കായി നാം പ്രതിപാദിച്ചിരിക്കുന്നു, അവര്‍ ചിന്തിച്ചു ഗ്രഹിക്കാന്‍ വേണ്ടി-വക്രതാരഹിതവും അറബിയിലുള്ളതുമായ വായിക്കപ്പെടുന്ന ഗ്രന്ഥം; അവര്‍ സൂക്ഷ്മത പുലര്‍ത്തി ജീവിക്കാന്‍.

അന്യോന്യം കലഹിക്കുന്ന ഏതാനും പങ്കുകാര്‍ യജമാനരായ ഒരടിമയെയും ഒരു ഉടമക്ക് മാത്രം കീഴ്‌പെടേണ്ട മറ്റൊരടിമയെയും അല്ലാഹു ഇതാ ഉദാഹരിക്കുന്നു. ഉപമയില്‍ അവരിരുവരും സമന്മാരാകുമോ?¹⁶
അല്ലാഹുവിനാണ് സര്‍വ സ്തുതികളും. എന്നാല്‍ അവരില്‍ മിക്കവരും യാഥാര്‍ത്ഥ്യം മനസ്സിലാക്കുന്നില്ല. നിശ്ചയം, താങ്കള്‍ മരണത്തിനു വിധേയനാകും; അവരും മരിച്ചുപോവുക തന്നെ ചെയ്യുന്നതാണ്. ശേഷം പുനരുത്ഥാന ദിനം നിങ്ങളുടെ നാഥന്റെ സന്നിധിയില്‍ നിങ്ങള്‍ തര്‍ക്കിക്കുന്നതാണ്.¹⁷

അല്ലാഹുവിന്റെ പേരില്‍ നുണ പറയുകയും സത്യം വന്നെത്തിയപ്പോള്‍ അത് വ്യാജമാക്കിക്കളയുകയും ചെയ്തവനെക്കാള്‍ വലിയ അക്രമി ആരുണ്ട്? നരകമല്ലേ സത്യനിഷേധികളുടെ ആവാസകേന്ദ്രം? സത്യസന്ദേശവുമായി സമാഗതരാവുകയും അത് അംഗീകരിക്കുകയും ചെയ്തവര്‍ തന്നെയാണ് ജീവിതത്തില്‍ സുക്ഷ്മത പുലര്‍ത്തിയവര്‍. തങ്ങള്‍ ഇച്ഛിക്കുന്നത് നാഥങ്കല്‍ അവര്‍ക്കുണ്ടാകും; പുണ്യവാന്മാരുടെ പ്രതിഫലം അതത്രേ. തങ്ങളുടെ കര്‍മങ്ങളില്‍ ഏറ്റം ദുഷിച്ചത് പോലും അല്ലാഹു അവര്‍ക്ക് മാപ്പാക്കുകയും അവരുടെ അനുഷ്ഠാനങ്ങളില്‍ ഉദാത്തമായവക്ക് തക്ക പ്രതിഫലം നല്‍കുകയും ചെയ്യും. അല്ലാഹുവിന്ന് പുറമെയുള്ള ദൈവങ്ങളെക്കുറിച്ച് താങ്കളെയവര്‍ ഭീഷണിപ്പെടുത്തുകയാണ്; എന്നാല്‍ തന്റെ അടിമയ്ക്ക് അല്ലാഹു തന്നെ പര്യാപ്തനല്ലേ?¹⁸
ആരെയെങ്കിലും അല്ലാഹു ദുര്‍മാര്‍ഗത്തിലാക്കുന്നുവെങ്കില്‍ അവനു വഴികാട്ടിയായി മറ്റാരുമില്ല; ഒരാളെയവന്‍ ഋജുവായ പന്ഥാവിലാക്കുന്നുവെങ്കില്‍ അവനെ മാര്‍ഗഭ്രംശനാക്കാനും ആരുമുണ്ടാവില്ല. അവന്‍ അജയ്യനും ശിക്ഷാനടപടി സ്വീകരിക്കുന്നവനും അല്ലയോ?

ഭുവന-വാനങ്ങള്‍ പടച്ചുണ്ടാക്കിയതാരാണെന്ന് താങ്കള്‍ ചോദിക്കുകയാണെങ്കില്‍ അല്ലാഹുവാണ് എന്ന് അവര്‍ പ്രതികരിക്കും. ചോദിക്കുക: എങ്കില്‍ അവനെ വിട്ട് നിങ്ങള്‍ ആരാധിക്കുന്ന ബിംബങ്ങളെ ക്കുറിച്ച് ആലോചിച്ചു നോക്കിയിട്ടുണ്ടോ നിങ്ങള്‍? എനിക്കെന്തെങ്കിലും ബുദ്ധിമുട്ടുണ്ടാക്കാന്‍ അല്ലാഹു വിചാരിച്ചാല്‍ അത് നീക്കം ചെയ്യാന്‍ അവയ്ക്ക് സാധിക്കുമോ? മറിച്ച്, അവന്‍ എനിക്ക് എന്തെങ്കിലും കാരുണ്യം ചെയ്യാന്‍ വിചാരിച്ചാല്‍ അത് തടഞ്ഞുവെക്കാന്‍ അവയ്ക്കു കഴിയുമോ? താങ്കള്‍ പ്രഖ്യാപിക്കുക: എനിക്ക് അല്ലാഹു മതി! കാര്യങ്ങള്‍ ഭരമേല്‍പിക്കുന്നവര്‍ അവനെയാണ് ഏല്‍പിക്കുക.¹⁹

താങ്കള്‍ പറയുക: എന്റെ ജനമേ, നിങ്ങളുടെ നിലപാടുപോലെ നിങ്ങള്‍ കര്‍മങ്ങളനുഷ്ഠിച്ചോളൂ; ഞാനും അങ്ങനെ ചെയ്യാം. നിന്ദ്യമായ ദണ്ഡനം വന്നെത്തുന്നതും ശാശ്വതമായ ശിക്ഷ ലഭ്യമാകുന്നതും ആര്‍ക്കാണെന്ന് വഴിയെ നിങ്ങളറിഞ്ഞുകൊള്ളും. മാനുഷ്യകത്തിനായി സത്യനിഷ്ഠവേദം താങ്കള്‍ക്കു നാം അവതരിപ്പിച്ചു. അതുകൊണ്ട്, ആരെങ്കിലും നേര്‍മാര്‍ഗം വരിക്കുന്നുവെങ്കില്‍ അതവന്റെ ക്ഷേമത്തിനു തന്നെ; ദുര്‍മാര്‍ഗിയായാലോ, അവന്‍ വഴിപിഴച്ചു പോകുന്നതിന്റെ ദൂഷ്യവും അവനു തന്നെ. അങ്ങേയ്ക്കു അവരുടെ ബാധ്യതയേതുമില്ല.²⁰

മരണവേളയില്‍ ആത്മാക്കളെ അല്ലാഹു സമ്പൂര്‍ണമായി ഏറ്റെടുക്കുന്നു; ഇതുവരെയും മരിക്കാത്തവയെ അവയുടെ നിദ്രാവേളയിലും.²¹
അങ്ങനെ, മരണം വരിച്ച ആത്മാക്കള്‍ അവന്‍ പിടിച്ചുവെക്കുകയും മറ്റുള്ളവയെ ഒരു നിര്‍ണിതാവധി വരെ വിട്ടയക്കുകയും ചെയ്യുന്നു. ചിന്തിക്കുന്ന ജനത്തിന് ഇതില്‍ തീര്‍ച്ചയായും ദൃഷ്ടാന്തങ്ങളുണ്ട്. അതല്ല, അല്ലാഹുവിനെ വിട്ട് അവര്‍ ചില ശുപാര്‍ശക്കാരെ-യാതൊന്നും ഉടമപ്പെടുത്താത്തവയും ഗ്രഹിക്കാത്തവയുമാണെങ്കിലും-വരിച്ചിട്ടുണ്ടോ?²²
താങ്കള്‍ പ്രഖ്യാപിക്കുക: എല്ലാ ശുപാര്‍ശയും അല്ലാഹുവിന്നവകാശപ്പെട്ടതാണ്. ഭുവന-വാനങ്ങളുടെ ആധിപത്യം അവന്നാകുന്നു. വഴിയെ നിങ്ങള്‍ തിരിച്ചയക്കപ്പെടുന്നതു അവങ്കലേക്കുതന്നെയാണ്. അല്ലാഹുവിനെ മാത്രമായനുസ്മരിക്കപ്പെട്ടാല്‍ പാരത്രിക വിശ്വാസമില്ലാത്തവരുടെ മനസ്സുകള്‍ വെറുത്ത് സങ്കുചിതമാകും; അവനല്ലാത്ത ദൈവങ്ങളെ കുറിച്ച് പ്രസ്താവിക്കപ്പെടുമ്പോള്‍ അവരതാ ആഹ്‌ളാദഭരിതരാകുന്നു.²³
നബീ, പറയുക: ഭുവന-വാനങ്ങളുടെ സ്രഷ്ടാവും ദൃശ്യാദൃശ്യങ്ങള്‍ അറിയുന്നവനുമായ അല്ലാഹുവേ, നിന്റെ അടിമകള്‍ ഭിന്നാഭിപ്രായക്കാരായിരുന്ന വിഷയങ്ങളില്‍ അവര്‍ക്കിടയില്‍ നീ തന്നെയാണ് വിധി കല്‍പിക്കുന്നത്.

അക്രമ പ്രവര്‍ത്തനങ്ങള്‍ ചെയ്തിരുന്നവര്‍, ഭൂമിയിലുള്ളത് മുഴുക്കെയും അതോടൊപ്പം അത്രകൂടിയും ഉണ്ടായിരുന്നെങ്കില്‍ പോലും പുനരുത്ഥാന ദിവസത്തെ ഹീനശിക്ഷയില്‍ നിന്നു രക്ഷപ്പെടാന്‍ പ്രായശ്ചിത്തം നല്‍കിയേനെ. തങ്ങളുടെ നിഗമനത്തിലില്ലാത്ത പലതും അല്ലാഹുവിങ്കല്‍ നിന്നു അവര്‍ക്ക് പ്രത്യക്ഷീഭവിക്കുന്നതുമാകുന്നു. തങ്ങളുടെ കര്‍മങ്ങളുടെ ദൂഷ്യഫലങ്ങള്‍ അവര്‍ക്കവിടെ വെളിപ്പെടുന്നതും ഏതൊരു പാരത്രിക ശിക്ഷയെ പരിഹസിച്ചിരുന്നുവോ അതവരെ ആവരണം ചെയ്യുന്നതുമാണ്.

എന്തെങ്കിലും വിപത്തു വരികയാണെങ്കില്‍ നമ്മോടാണ് മനുഷ്യന്‍ പ്രാര്‍ത്ഥിക്കുക; അനന്തരം നമ്മുടെ പക്കല്‍ നിന്നുള്ള എന്തെങ്കിലും അനുഗ്രഹം ചെയ്തുകൊടുത്താലോ, 'തന്റെ പരിജ്ഞാനം മൂലമാണത് നല്‍കപ്പെട്ടിരിക്കുന്നത്' എന്നവന്‍ തട്ടിവിടും. എന്നാല്‍ അതൊരു പരീക്ഷണമാണ്;²⁴
പക്ഷെ, അവരില്‍ മിക്കവരും അത് ഗ്രഹിക്കുന്നില്ല. ഇവരുടെ മുന്‍ഗാമികളും ഇങ്ങനെ ജല്‍പിച്ചിട്ടുണ്ട്; എന്നാല്‍ തങ്ങളുടെ സമ്പാദ്യങ്ങളൊന്നും അവര്‍ക്ക് ഫലപ്രദമായില്ല. അങ്ങനെ തങ്ങളുടെ സമ്പാദ്യങ്ങളുടെ ദൂഷ്യഫലങ്ങള്‍ അവരെ ബാധിക്കയുണ്ടായി. ഈ മക്കാ മുശ്‌രിക്കുളില്‍ നിന്നുള്ള അതിക്രമകാരികള്‍ക്കും തങ്ങള്‍ സമ്പാദിച്ചു വെച്ചതിന്റെ അനര്‍ത്ഥങ്ങള്‍ വന്നുഭവിക്കാനിരിക്കുകയാണ്. നമ്മെ തോല്‍പിക്കാന്‍ അവര്‍ക്കാവില്ല.²⁵

താന്‍ ഉദ്ദേശിക്കുന്ന ചിലര്‍ക്ക് അല്ലാഹു ഉപജീവനം പ്രവിശാലമാക്കുന്നതും മറ്റു ചിലര്‍ക്ക് കുടുസ്സാക്കുന്നതും അവര്‍ ഗ്രഹിച്ചിട്ടില്ലേ? സത്യവിശ്വാസം കൈക്കൊള്ളുന്നവര്‍ക്ക് നിശ്ചയം, ഇതില്‍ ദൃഷ്ടാന്തങ്ങളുണ്ട്. പറയുക: സ്വന്തത്തോട് അതിക്രമം കാട്ടിയ എന്റെ അടിമകളേ, അല്ലാഹുവിന്റെ അനുഗ്രഹത്തെക്കുറിച്ച് നിങ്ങള്‍ ഭഗ്നാശരാകരുത്. അവന്‍ പാപങ്ങളത്രയും മാപ്പാക്കുക തന്നെ ചെയ്യും; ഏറെ പാപം പൊറുക്കുന്നവനും കരുണാമയനും അവന്‍ തന്നെ, തീര്‍ച്ച.²⁶
ശിക്ഷ വന്നെത്തും മുമ്പ് നിങ്ങള്‍ താഴ്മയോടെ നാഥങ്കലേക്ക് മടങ്ങുകയും അവന്നു വിധേയരാവുകയും ചെയ്യുക. ശിക്ഷയുടെ ആഗമാനന്തരം നിങ്ങള്‍ക്ക് സഹായം ലഭിക്കുന്നതല്ല. നിനച്ചിരിക്കാതെ, പൊടുന്നനെ ശിക്ഷ വരുംമുമ്പ്, നാഥങ്കല്‍ നിന്നവതീര്‍ണമായതില്‍ ഉദാത്തമായത് നിങ്ങള്‍ അനുധാവനം ചെയ്യുകയും വേണം.²⁷
'ഹാ കഷ്ടം! അല്ലാഹുവിന്റെ കാര്യത്തില്‍ ഞാന്‍ വീഴ്ച വരുത്തിയല്ലോ; ഞാനത് പരിഹസിക്കുന്നവരുടെ ഗണത്തില്‍ തന്നെയായിരുന്നല്ലോ'; 'അല്ലാഹു മാര്‍ഗദര്‍ശനം ചെയ്തിരുന്നെങ്കില്‍ ഞാന്‍ ജീവിതത്തില്‍ സൂക്ഷ്മത പുലര്‍ത്തുന്നവരില്‍ തന്നെയായിരുന്നു', അല്ലെങ്കില്‍ ശിക്ഷ ഗോചരീഭവിക്കുമ്പോള്‍ 'എനിക്കൊരു മടക്കയാത്ര ഉണ്ടായിരുന്നെങ്കില്‍ പുണ്യവാന്മാരില്‍ ഞാനുള്‍പ്പെട്ടേനെ' എന്നൊക്കെ ഒരാള്‍ പരിഭവിക്കും മുമ്പ്. അതെ, എന്റെ സൂക്തങ്ങള്‍ നിനക്ക് ലഭിക്കുക തന്നെ ചെയ്തു; എന്നാല്‍ നീ അവ വ്യാജമാക്കുകയും അഹന്ത നടിക്കുകയും നിഷേധികളില്‍ ഉള്‍പ്പെടുകയുമാണുണ്ടായത്.²⁸

അല്ലാഹുവിന്റെ പേരില്‍ വ്യാജങ്ങള്‍ തട്ടിവിട്ടിരുന്നവരുടെ മുഖങ്ങള്‍ കറുത്തിരുണ്ടതായി അന്ത്യനാളില്‍ നിനക്കു കാണാം. അഹന്ത നടിച്ചിരുന്നവര്‍ക്കുള്ള നിവാസ കേന്ദ്രം നരകത്തിലല്ലയോ? ജീവിതത്തില്‍ സൂക്ഷ്മാലുക്കളായിരുന്നവരെ വിജയിച്ചതിന്റെ ഫലമായി അല്ലാഹു രക്ഷപ്പെടുത്തുന്നതാണ്. അവരെ ശിക്ഷ സ്പര്‍ശിക്കുകയോ ദുഃഖം ബാധിക്കുകയോ ചെയ്യില്ല. സമസ്ത വസ്തുക്കളുടെയും സ്രഷ്ടാവ് അല്ലാഹുവാണ്; എല്ലാറ്റിന്റെ മേലിലുമുള്ള കൈകാര്യകര്‍ത്താവും അവന്‍ തന്നെ. ഭുവന-വാനങ്ങളുടെ താക്കോലുകള്‍ അവന്‍ വശമാണ്. അവന്റെ ദൃഷ്ടാന്തങ്ങള്‍ നിഷേധിച്ചവര്‍ തന്നെയാണ് എല്ലാം വിനഷ്ടമായവര്‍.

നബീ, ചോദിക്കുക: അല്ലാഹു അല്ലാത്തവരെ ആരാധിക്കണമെന്നാണോ വിവരം കെട്ടവരേ, നിങ്ങളെന്നോട് കല്‍പിക്കുന്നത്? 'പങ്കാളിയെ വരിക്കുന്നുവെങ്കില്‍ കര്‍മങ്ങള്‍ ഫലശൂന്യമാവുകയും നഷ്ടക്കാരിലാവുകയും ചെയ്യും, തീര്‍ച്ച' എന്നാണ് താങ്കള്‍ക്കും പൂര്‍വികര്‍ക്കും ദിവ്യസന്ദേശം നല്‍കപ്പെട്ടിട്ടുള്ളത്. മറിച്ച്, അല്ലാഹുവിന്ന് മാത്രം ആരാധന ചെയ്യുകയും കൃതജ്ഞരിലാവുകയും ചെയ്യുക.²⁹

അല്ലാഹുവിനെ യഥായോഗ്യം ആ ബഹുദൈവ വിശ്വാസികള്‍ ബഹുമാനിച്ചില്ല. പുനരുത്ഥാനത്തിന്റെ ദിവസം ഭൂമിയാകട്ടെ, അവന്റെ പിടിയിലൊതുങ്ങുന്നതും ആകാശങ്ങള്‍ വലതുകരങ്ങളില്‍ ചുരുട്ടപ്പെട്ടതുമാകും. അവന്‍ എത്ര പരിശുദ്ധന്‍! അവര്‍ പങ്കാളികളാക്കുന്നതില്‍ നിന്നൊക്കെയും അവന്‍ മഹോന്നതനത്രേ.³⁰

കാഹളത്തില്‍ ഊതപ്പെടുമ്പോള്‍ ഭുവന-വാനങ്ങളിലുള്ളവര്‍ -അല്ലാഹു ഉദ്ദേശിച്ചവരൊഴികെ- മരിച്ചുവീഴുന്നതാണ്; പിന്നീട് മറ്റൊരിക്കല്‍ കൂടി ഊതപ്പെടുമ്പോള്‍ അതാ, അവര്‍ എഴുന്നേറ്റു നോക്കും. വിചാരണാഭൂമി അതിന്റെ നാഥന്റെ ശോഭയാല്‍ പ്രകാശിക്കുന്നതും കര്‍മരേഖകള്‍ സമര്‍പിക്കപ്പെടുന്നതും പ്രവാചകന്മാരും സാക്ഷികളും ഹാജറാക്കപ്പെടുന്നതും സൃഷ്ടികള്‍ക്കിടയില്‍ സത്യമനുസരിച്ച് വിധികല്‍പിക്കപ്പെടുന്നതുമാകുന്നു. അവരോട് അതിക്രമം കാട്ടപ്പെടുകയില്ല. ഓരോ വ്യക്തിക്കും താന്‍ അനുവര്‍ത്തിച്ചത് പൂര്‍ണമായും നല്‍കപ്പെടും; അവരുടെ ചെയ്തികളെ പറ്റി നന്നായി അറിയുന്നവനത്രേ അവന്‍.³¹

സത്യനിഷേധികള്‍ സംഘങ്ങളായി നരകത്തിലേക്ക് തെളിക്കപ്പെടുന്നതും അവരതിനു സമീപമെത്തിയാല്‍ പിന്നെ വാതിലുകള്‍ തുറക്കപ്പെടുന്നതും പാറാവുകാര്‍ ഇങ്ങനെയവരോട് ചോദിക്കുന്നതുമാണ്: നിങ്ങളുടെ നാഥന്റെ ദൃഷ്ടാന്തങ്ങള്‍ പാരായണം ചെയ്യുകയും ഈ ദിവസത്തെ അഭിമുഖീകരിക്കുന്നതിനെ പറ്റി മുന്നറിയിപ്പ് തരികയും ചെയ്യുന്ന ദൂതന്മാര്‍ നിങ്ങളുടെയടുത്ത് വന്നിരുന്നില്ലേ? അവര്‍ പ്രതികരിക്കും: അതെ, പക്ഷേ, നിഷേധികളില്‍ ശിക്ഷാവചനം സ്ഥിരപ്പെട്ടുപോയിരിക്കുന്നു! ഉത്തരവുണ്ടാകും: 'ശാശ്വതാധിവാസം വിധിക്കപ്പെട്ടവരായി നരകകവാടങ്ങളിലൂടെ പ്രവേശിക്കുക'. അപ്പോള്‍, അഹങ്കാരികളുടെ ആവാസ സ്ഥലം എത്ര ഹീനം!³²

തങ്ങളുടെ നാഥനോട് സൂക്ഷ്മത പുലര്‍ത്തിയിരുന്നവര്‍ കൂട്ടമായി സ്വര്‍ഗത്തിലേക്ക് ആനയിക്കപ്പെടുന്നതും വാതായനങ്ങള്‍ തുറന്നുവെക്കപ്പെട്ടതായിരിക്കെ അവരതിനു സമീപമെത്തുന്നതും പാറാവുകര്‍ ഇങ്ങനെ സ്വാഗതം ചെയ്യുന്നതുമാണ്: നിങ്ങള്‍ക്ക് സമാധാനം ഭവിക്കട്ടെ, നിങ്ങള്‍ പരിശുദ്ധരായിരുന്നു; അതിനാല്‍ ശാശ്വതനിവാസം വിധിക്കപ്പെട്ടവരായി നിങ്ങള്‍ ഇതില്‍ പ്രവേശിച്ചുകൊള്ളുക.³³

അവര്‍ പ്രതികരിക്കും: നമ്മോടുള്ള തന്റെ കരാര്‍ സത്യസന്ധമായി പൂര്‍ത്തീകരിക്കുകയും വിചാരിക്കുന്നിടത്തെങ്ങും നിവസിക്കാനാകും വിധം ഈ സ്വര്‍ഗഭൂമി നമുക്ക് അവകാശപ്പെടുത്തുകയും ചെയ്ത അല്ലാഹുവിനാണ് സര്‍വസ്‌തോത്രങ്ങളും. കര്‍മാനുഷ്ഠാനികള്‍ക്കുള്ള പ്രതിഫലം എത്ര ഉല്‍കൃഷ്ടം! മലക്കുകള്‍ തങ്ങളുടെ നാഥന്ന് സ്തുതിയര്‍പ്പിച്ചും പ്രകീര്‍ത്തനം ചെയ്തും സിംഹാസനത്തെ വലയം ചെയ്യുന്നത് താങ്കള്‍ക്കു കാണാം. സൃഷ്ടികള്‍ക്കിടയില്‍ സത്യസന്ധമായി തീര്‍പ്പു കല്‍പിക്കപ്പെടുന്നതും 'പ്രപഞ്ച നാഥനായ അല്ലാഹുവിനാകുന്നു സര്‍വസ്തുതിയും' എന്ന് വിളംബരം ചെയ്യപ്പെടുന്നതുമാണ്.³⁴