സാദ് - ص - Sad

'സ്വാദ്'¹
ഉദ്‌ബോധന വേദമായ ഖുര്‍ആന്‍ തന്നെ ശപഥം, സത്യനിഷേധികള്‍ ദുരാഭിജാത്യത്തിലും ശത്രുതയിലുമാകുന്നു. എത്രയെത്ര തലമുറകളെ അവര്‍ക്കുമുമ്പ് നാം ഉന്മൂലനം ചെയ്തിട്ടുണ്ട്! അപ്പോള്‍ അവര്‍ മുറവിളി കൂട്ടി. എന്നാല്‍ രക്ഷ നേടാനാകുന്ന നേരമല്ല അത്²
തങ്ങളിലേക്ക് സ്വന്തത്തില്‍ നിന്നുതന്നെയുള്ള ഒരു മുന്നറിയിപ്പുകാരന്‍ വന്നതില്‍ അദ്ഭുതം കൂറുകയാണവര്‍. 'ഇവന്‍ വ്യാജവാദിയായ ഒരു മാരണക്കാരനാണ്' എന്ന് നിഷേധികള്‍ തട്ടിവിട്ടു. ഇവന്‍ ബഹുദൈവങ്ങളെ ഏകദൈവമാക്കിയിരിക്കുകയാണോ? ഇതൊരു അദ്ഭുതകാര്യം തന്നെ, തീര്‍ച്ച. 'നിങ്ങള്‍ മുന്നോട്ടു നീങ്ങുകയും ദൈവങ്ങളുടെ കാര്യത്തില്‍ ക്ഷമയോടെ ഉറച്ചു നില്‍ക്കുകയും ചെയ്യുക; ഈ പുതിയ മതം ആസൂത്രിതം തന്നെ; ഇതിനെക്കുറിച്ച് അവസാനമതത്തില്‍ നാം യാതൊന്നും കേട്ടിട്ടില്ല; ഒരു കൃത്രിമ മതമാണിത്' എന്നിങ്ങനെ പറഞ്ഞുകൊണ്ട് അവരിലെ സാരഥികള്‍ കടന്നുപോയി³

ഞങ്ങള്‍ക്കിടയില്‍ നിന്ന് ഇവന്നാണോ ഖുര്‍ആന്‍ അവതീര്‍ണമായത് എന്ന് അവര്‍ ജല്‍പിച്ചു. അല്ല, എന്റെ ഉദ്‌ബോധനത്തെക്കുറിച്ച് സന്ദേഹത്തിലാണവര്‍; എന്നല്ല, ഇതുവരെയും എന്റെ ശിക്ഷയവര്‍ ആസ്വദിച്ചിട്ടില്ല. അതല്ല, താങ്കളുടെ അജയ്യനും ഉദാരനുമായ നാഥന്റെ കാരുണ്യ ഭണ്ഡാരങ്ങള്‍ അവരുടെ കൈയിലാണോ? ഭുവന-വാനങ്ങളുടെയും അവയ്ക്കിടയിലുള്ളതിന്റെയും മേല്‍ക്കോയ്മ അവര്‍ക്കാണോ? എങ്കില്‍ ആ വഴികളിലവര്‍ കയറിനോക്കട്ടെ. വിവിധ വിഭാഗങ്ങളില്‍ നിന്നുള്ളതും പരാജിതരാകാനിരിക്കുന്നതുമായ ഒരു സേനാവ്യൂഹമത്രേ അവിടെയുള്ളത്⁴

ഇവര്‍ക്കു മുമ്പ് നൂഹ് നബിയുടെ ജനതയും ആദ് സമൂഹവും ആണികളുറപ്പിച്ച ഫറോവയും സമൂദ് സമുദായവും ലൂഥ് നബിയുടെ ജനതയും മരക്കൂട്ട വാസികളും സത്യസന്ദേശം വ്യാജമാക്കിയിട്ടുണ്ട്⁵
ഇവരാണ് സഖ്യകക്ഷികള്‍- സര്‍വരും പ്രവാചകരെ തള്ളിക്കളയുക മാത്രമാണ് ചെയ്തത്. തന്മൂലം എന്റെ ശിക്ഷ അനിവാര്യമായി. ഒരൊറ്റ ഗര്‍ജനമേ ഇവര്‍ കാത്തിരിക്കേണ്ടതുള്ളൂ. അത് ആസന്നമായാല്‍ ഒരല്‍പസമയം പോലും ലഭിക്കില്ല. 'ഞങ്ങളുടെ രക്ഷിതാവേ, വിചാരണാ ദിനത്തിനു മുമ്പുതന്നെ ഞങ്ങളുടെ ശിക്ഷാവിഹിതം പെട്ടെന്നു തരേണമേ' എന്ന് അവര്‍ കളിയാക്കി.

നബീ, അവരുടെ പ്രസ്താവങ്ങളില്‍ അങ്ങ് ക്ഷമ കൈക്കൊള്ളുകയും നമ്മുടെ പ്രബല ദാസനായ ദാവൂദ് നബിയെ അനുസ്മരിക്കുകയും ചെയ്യുക; അദ്ദേഹം ഏറെ പശ്ചാത്തപിച്ചു മടങ്ങുന്നയാള്‍ തന്നെയത്രേ. പ്രഭാത-പ്രദോഷങ്ങളില്‍ പ്രകീര്‍ത്തനം നടത്തും വിധം പര്‍വതങ്ങളെയും സംഘടിത പക്ഷികളെയും തനിക്കു നാം കീഴ്‌പെടുത്തി. അനുസരണയോടെ എല്ലാം അദ്ദേഹത്തിലേക്കു തിരിഞ്ഞിരുന്നു. അദ്ദേഹത്തിനു രാജാധികാരം നാം ദൃഢീകരിച്ചു കൊടുക്കുകയും തത്ത്വജ്ഞാനവും വിധികര്‍തൃത്വ വൈഭവവും നല്‍കുകയുമുണ്ടായി⁶

വ്യവഹാര കക്ഷികള്‍ ദാവൂദ് നബിയുടെ പ്രാര്‍ത്ഥനാ മന്ദിരത്തില്‍ മതില്‍ചാടിയെത്തിയപ്പോഴത്തെ വൃത്താന്തം അങ്ങേക്കറിയാമോ? അഥവാ, അവര്‍ ദാവൂദ് നബിയുടെ സമീപം കടന്നു വന്ന നേരം. അപ്പോള്‍ തനിക്ക് അവരെക്കുറിച്ച് ഭയപ്പാടുണ്ടായി. അവര്‍ പറഞ്ഞു: താങ്കള്‍ പേടിക്കേണ്ട, പരസ്പരം അതിക്രമം കാട്ടിയ രണ്ട് വ്യവഹാര കക്ഷികളാണ് ഞങ്ങള്‍. അതിനാല്‍ സത്യസമേതം താങ്കള്‍ ഞങ്ങള്‍ക്കിടയില്‍ വിധി പറയണം, അനീതി കാട്ടരുത്; ഋജുവായ പന്ഥാവിലേക്ക് ഞങ്ങള്‍ക്ക് മാര്‍ഗദര്‍ശനം നല്‍കുകയും വേണം: ഇയാള്‍ എന്റെ സഹോദരനാണ്. ഇയാള്‍ക്ക് 99 പെണ്ണാടുകളുണ്ട്, എനിക്കൊരു പെണ്ണാടും. എന്നിട്ട്, അതുകൂടി തനിക്ക് വിട്ടുതരണമെന്നാണ് ഇയാള്‍ ആവശ്യപ്പെടുന്നത്. സംഭാഷണത്തില്‍ ഇയാള്‍ എന്നെ മറികടക്കുകയും ചെയ്തിരിക്കുന്നു⁷

ദാവൂദ് നബി പ്രതികരിച്ചു: അവന്റെ പെണ്ണാടുകളിലേക്ക് നിന്റേതുകൂടി ചോദിച്ചതു വഴി അക്രമമാണവന്‍ ചെയ്തിരിക്കുന്നത്. പങ്കാളികളില്‍ മിക്കവരും അതിക്രമം ചെയ്യാറുണ്ട്- സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവരൊഴികെ; അവരാകട്ടെ, അപൂര്‍വമായിരിക്കും.⁸
നാമദ്ദേഹത്തെ പരീക്ഷിച്ചതു തന്നെയാണെന്ന് ദാവൂദ് നബി മനസ്സിലാക്കുകയും തന്മൂലം നാഥനോട് മാപ്പപേക്ഷിക്കുകയും സാഷ്ടാംഗത്തിലായി വീഴുകയും ഖേദിച്ചു മടങ്ങുകയും ചെയ്തു. അപ്പോള്‍ അദ്ദേഹത്തിന് നാമത് മാപ്പാക്കി. നിശ്ചയം, നമ്മുടെയടുത്ത് അദ്ദേഹത്തിന് സാമീപ്യപദവിയും ഉദാത്തമായ മടക്കസ്ഥലവുമുണ്ട്.

ഹേ ദാവൂദ്, താങ്കളെ നാം ഭൂമിയില്‍ ഒരു പ്രതിനിധി ആക്കുക തന്നെ ചെയ്തിരിക്കുന്നു. അതുകൊണ്ട് ആളുകള്ക്കിിടയില്‍ സത്യസന്ധമായി വിധിപറയണം, സ്വേച്ഛയെ അനുധാവനം ചെയ്യരുത്. അങ്ങനെ വന്നാല്‍ അല്ലാഹുവിന്റെ പന്ഥാവില്‍ നിന്ന് താങ്കളെ അത് വ്യതിചലിപ്പിച്ചുകളയുന്നതാണ്. ദൈവിക മാര്ഗാത്തില്‍ നിന്ന് വഴിതെറ്റിപ്പോകുന്നവര്ക്ക് -അവര്‍ വിചാരണാദിനത്തെ മറന്നുകളഞ്ഞതുമൂലം-കഠിനശിക്ഷ തന്നെയാണുണ്ടാവുക. ഭുവന-വാനങ്ങളെയും അവയ്ക്കിടയിലുള്ളതിനെയും നാം വൃഥാ സൃഷ്ടിച്ചതല്ല; നിഷേധികളുടെ ധാരണയാണത്. അതിനാല്‍, നിഷേധികള്ക്ക് നരകത്തില്‍ മഹാനാശമുണ്ട്. അതല്ല, സത്യവിശ്വാസം കൈക്കൊള്ളുകയും സല്കവര്മ ങ്ങളനുഷ്ഠിക്കുകയും ചെയ്തവരെ നാട്ടില്‍ കുഴപ്പമുണ്ടാക്കുന്നവരെപ്പോലെയാക്കുമോ നാം? അല്ലെങ്കില്‍ ഭയഭക്തരായിക്കഴിയുന്നവരെ അധര്മങകാരികളെപ്പോലെ നാം ആക്കുമോ? താങ്കള്ക്ക്ദ നാമവതരിപ്പിച്ചു തന്ന അനുഗൃഹീത ഗ്രന്ഥമാണിത്. ഇതിലെ സൂക്തങ്ങള്‍ ആളുകള്‍ ചിന്താവിധേയമാക്കുവാനും ബുദ്ധിശാലികള്‍ പാഠമുള്ക്കൊമള്ളാനും വേണ്ടി⁹

ദാവൂദ് നബിക്ക് നാം സുലൈമാന്‍ നബിയെ പുത്രനായി നല്‍കി. എത്ര ഉദാത്തനായ അടിമ! നിശ്ചയം, അദ്ദേഹം അല്ലാഹുവിലേക്ക് അങ്ങേയറ്റം മടങ്ങിയ ആളാണ്. കുതിച്ചുപായുന്ന മുന്തിയ കുതിരകളെ ഒരു സായാഹ്നത്തില്‍ അദ്ദേഹം മുമ്പാകെ പ്രദര്‍ശിപ്പിക്കപ്പെട്ടത് സ്മരണീയമത്രേ. തത്സമയം അദ്ദേഹം പ്രതിവചിച്ചു: 'എന്റെ നാഥന്റെ സ്മരണ വിട്ട് ഈ ഔദാര്യ(കുതിരകള്‍)ത്തോടുള്ള സ്‌നേഹത്തില്‍ ഞാന്‍ വിലയം പ്രാപിച്ചു പോയി'. അങ്ങനെ സൂര്യന്‍ അസ്തമിച്ചു. 'അവയെ തിരിച്ചു കൊണ്ടുവരൂ.' തുടര്‍ന്നദ്ദേഹം അവയുടെ കണങ്കാലുകളും കണ്ഠങ്ങളും തടവാന്‍ തുടങ്ങി¹⁰

നിശ്ചയം സുലൈമാന്‍ നബിയെ നാം ഒരു പരീക്ഷണത്തിന് വിധേയമാക്കുകയും തന്റെ സിംഹാസനത്തില്‍ ഒരു ജഡമിടുകയും ചെയ്തു. പിന്നീട് താന്‍ പശ്ചാത്തപിക്കുകയും ഇങ്ങനെ പ്രാര്‍ത്ഥിക്കുകയുമുണ്ടായി: 'നാഥാ, എനിക്കു നീ പൊറുത്തുതരികയും എന്റെ ശേഷം മറ്റാര്‍ക്കും കിട്ടാത്ത രാജാധിപത്യം എനിക്കു നല്‍കുകയും ചെയ്യേണമേ. നിശ്ചയം, അത്യുദാരന്‍ തന്നെയാണ് നീ.'¹¹
അങ്ങനെ കാറ്റിനെ അദ്ദേഹത്തിന് നാം കീഴ്‌പെടുത്തിക്കൊടുത്തു. താന്‍ വിചാരിക്കുന്നേടത്തേക്ക് ശാസനാനുസൃതം അത് സഞ്ചരിക്കുമായിരുന്നു. പിശാചുക്കളില്‍ നിന്ന് കെട്ടിടനിര്‍മാതാക്കളും മുങ്ങല്‍വിദഗ്ദരും ചങ്ങലകളില്‍ ബന്ധിതരുമായവരെയും അധീനപ്പെടുത്തിക്കൊടുത്തു. ഇത് നമ്മുടെ ദാനമത്രേ; അതുകൊണ്ട് കൈയയച്ചു കൊടുക്കുകയോ കൈവശം വെക്കുകയോ ചെയ്യുക. നിശ്ചയം, അദ്ദേഹത്തിനു നമ്മുടെയടുത്ത് സാമീപ്യവും ഉദാത്തസങ്കേതവുമുണ്ട്¹²

നമ്മുടെ അടിമ അയ്യൂബ് നബിയെ അനുസ്മരിക്കുക. പിശാച് എനിക്ക് പാരവശ്യവും ദണ്ഡനവും ഏല്‍പിച്ചിരിക്കുന്നു എന്ന് തന്റെ നാഥനെ വിളിച്ച് അദ്ദേഹം പരിഭവിച്ച ഘട്ടം സ്മര്‍ത്തവ്യമാണ്. 'താങ്കളുടെ പാദം കൊണ്ട് മണ്ണില്‍ തട്ടുക-ഇതാ ശീതളമായ സ്‌നാനജലവും പാനജലവും' എന്നു നാം പറഞ്ഞു¹³
അദ്ദേഹത്തിന് കുടുംബത്തെ-അവരൊന്നിച്ച് അത്ര തന്നെ വേറെയും-നാം പ്രദാനം ചെയ്തു; നമ്മില്‍ നിന്നുള്ള അനുഗ്രഹവും ബുദ്ധിമാന്മാര്‍ക്ക് ഒരു ഉദ്‌ബോധനവുമായി. താങ്കള്‍ ഒരു പിടി പുല്ല് കൈയിലെടുക്കുകയും അതുകൊണ്ട് അടിക്കുകയും സത്യം ചെയ്തത് ലംഘിക്കാതിരിക്കുകയും ചെയ്യുക എന്നും നാം നിര്‍ദേശിച്ചു¹⁴
അദ്ദേഹത്തെ നാം ക്ഷമാശീലനായി തന്നെയാണ് കണ്ടത്. വളരെ ഉല്‍കൃഷ്ടനായ അടിമ! അദ്ദേഹം ഏറെ പശ്ചാത്തപിച്ചു മടങ്ങുന്നയാള്‍ തന്നെ.

നമ്മുടെ അടിമകളായ ഇബ്‌റാഹീം, ഇസ്ഹാഖ്, യഅ്ഖൂബ് എന്നിവരെയും അനുസ്മരിക്കുക- ശക്തിയും കാഴ്ചപ്പാടുകളുമുള്ളവരായിരുന്നു അവര്‍. ആത്മാര്‍ത്ഥമായ ഒരു ഗുണം -പാരത്രിക സ്മരണ- അവര്‍ക്കു നാം നല്‍കി. നമ്മുടെയടുക്കല്‍ തെരഞ്ഞെടുക്കപ്പെട്ട ഉല്‍കൃഷ്ടര്‍ തന്നെയാണവര്‍. ഇസ്മാഈല്‍, അല്‍യസഅ്, ദുല്‍കിഫ്‌ല് എന്നിവരെയും ഓര്‍ക്കുക. അവരൊക്കെയും ഉദാത്തരില്‍ പെട്ടവര്‍ തന്നെ¹⁵

ഈ ഖുര്‍ആന്‍ ഒരു ഉദ്‌ബോധനമാണ്. നിശ്ചയം, ജീവിതത്തില്‍ സൂക്ഷ്മത പുലര്‍ത്തുന്നവര്‍ക്ക് ശ്രേഷ്ഠമായ മടക്കസ്ഥലമുണ്ട്; അവര്‍ക്കായി വാതായനങ്ങള്‍ തുറന്നുവെക്കപ്പെട്ട ശാശ്വത നിവാസത്തിനുള്ള സ്വര്‍ഗീയാരാമങ്ങള്‍. അതില്‍ ചാരിയിരുന്നുകൊണ്ട്, ധാരാളം പഴങ്ങളും പാനീയങ്ങളും അവരാവശ്യപ്പെട്ടുകൊണ്ടിരിക്കും. അവരുടെ സമീപം കണ്ണുകള്‍ നിയന്ത്രിക്കുന്ന സമപ്രായക്കാരായ തരുണികളുമുണ്ടാകും. 'വിചാരണാദിനത്തേക്കുള്ള നിങ്ങളുടെ വാഗ്ദത്ത വിഭവങ്ങളാണിത്; നമ്മുടെ ഈ ഉപജീവനം അവസാനിച്ചു പോകുന്നതേയല്ല' എന്നുണര്‍ത്തപ്പെടും¹⁶

ഇതവരുടെ സ്ഥിതി. എന്നാല്‍ അതിക്രമകാരികള്‍ക്ക് ഹീനമായ മടക്കസ്ഥലം -നരകം- തന്നെയാണുള്ളത്. അവരതില്‍ പ്രവേശിക്കും; എത്ര ദുഷിച്ച സങ്കേതം! ഇതാണ് അവര്‍ക്കുള്ളത്. അവര്‍ അത് ആസ്വദിച്ചുകൊള്ളട്ടെ- കൊടും ചൂടുള്ള വെള്ളവും നരകക്കാരുടെ ചീഞ്ചലവും തത്തുല്യമായ മറ്റു പലതരം ശിക്ഷകളും
ഇതാ, നിങ്ങളോടൊപ്പം ഒരു സംഘം തള്ളിക്കയറി വരുന്നു എന്ന് അവര്‍ പരസ്പരം പറയും. ചിലര്‍ പ്രതികരിക്കും: ഇവര്‍ക്കു സ്വാഗതമില്ല, നരകത്തില്‍ കത്തിജ്ജ്വലിക്കേണ്ടവരത്രേ ഇവര്‍! ആഗതര്‍ പറയും: അല്ല, സ്വാഗതം ചെയ്യപ്പെടാത്തവര്‍ നിങ്ങള്‍ തന്നെയത്രേ. ഞങ്ങള്‍ക്കീ ദുരവസ്ഥ സമര്‍പ്പിച്ചത് നിങ്ങളാണ്. എത്ര ഹീനമായ വാസകേന്ദ്രം! അവരപേക്ഷിക്കും: നാഥാ, ഞങ്ങള്‍ക്ക് ഇത് വരുത്തിവെച്ചവന്ന് നീ ഇരട്ടി നരകശിക്ഷ നല്‍കേണമേ!¹⁸¹⁷

അവര്‍ അന്വേഷിക്കും: അല്ല, ദുഷ്ടരായി നാം പരിഗണിച്ചിരുന്ന കുറെയാളുകളെ ഇവിടെ കാണാനില്ലല്ലോ? നാമവരെ പരിഹസിച്ചത് തെറ്റായാണോ? അതോ ദൃഷ്ടിപഥത്തില്‍ നിന്ന് അവര്‍ അഗോചരരായതോ? നരകക്കാരുടെ ഈ തര്‍ക്കവിതര്‍ക്കങ്ങള്‍ ഒരു വസ്തുത തന്നെയത്രേ!¹⁹

നബീ, പ്രഖ്യാപിക്കുക: ഞാന്‍ ഒരു മുന്നറിയിപ്പുകാരന്‍ മാത്രമാണ്. ഏകനും സര്‍വവും ജയിച്ചടക്കുന്നവനുമായ അല്ലാഹു അല്ലാതെ വേറെ ഒരു ദൈവവും ഇല്ല. ഭുവന-വാനങ്ങളുടെയും അവയ്ക്കിടയിലുള്ളതിന്റെയും നാഥനും അജയ്യനും ഏറെ മാപ്പരുളുന്നവനുമത്രേ അവന്‍. പറയുക: നിങ്ങള്‍ അവഗണിച്ചു കളയുന്ന ഒരു സഗൗരവ വൃത്താന്തമത്രേ അത്. ഉപരിലോക സമൂഹം (മനുഷ്യ സൃഷ്ടികളെക്കുറിച്ച്) വിവാദം നടത്തിയതിനെപ്പറ്റി എനിക്കൊന്നും അറിയില്ലായിരുന്നു. വ്യക്തമായ ഒരു മുന്നറിയിപ്പുകാരനാകണമെന്നേ എനിക്ക് ദിവ്യസന്ദേശം നല്‍കപ്പെട്ടിട്ടുള്ളൂ²⁰

താങ്കളുടെ നാഥന്‍ മലക്കുകളെ അറിയിച്ച സന്ദര്‍ഭം സ്മരണീയമത്രേ: നിശ്ചയം, കളിമണ്ണില്‍ നിന്ന് ഒരു മനുഷ്യനെ ഞാന്‍ സൃഷ്ടിക്കാന്‍ പോവുകയാണ്; അങ്ങനെ അവനു ഞാന്‍ ശരിയായ ആകൃതി നല്‍കുകയും എന്റെ ആത്മാവില്‍ നിന്ന് അതില്‍ ഊതുകയും ചെയ്താല്‍ അവനു നിങ്ങള്‍ സാഷ്ടാംഗം ചെയ്യണം. അപ്പോള്‍ സര്‍വമാലാഖമാരും സാഷ്ടാംഗം ചെയ്തു; എന്നാല്‍ ഇബ്‌ലീസ് ചെയ്തില്ല. അവന്‍ അഹങ്കാരിയാവുകയും നിഷേധികളിലുള്‍പ്പെടുകയും ചെയ്തു. അല്ലാഹു ചോദിച്ചു: ഇബ്‌ലീസേ, ഞാന്‍ സ്വയം പടച്ചുണ്ടാക്കിയ ആദമിനെ പ്രണമിക്കുന്നതിന് നിനക്കെന്ത് പ്രതിബന്ധമാണുണ്ടായത്? നീ അഹങ്കാരിയോ അത്രക്കു വലിയവനോ ആയോ?²¹
അവന്‍ പ്രതികരിച്ചു: ഞാന്‍ അവനെക്കാള്‍ ശ്രേഷ്ഠനാണ്-എന്നെ അഗ്നിയില്‍ നിന്നും അവനെ കളിമണ്ണില്‍ നിന്നുമാണ് നീ സൃഷ്ടിച്ചിരിക്കുന്നത്. അല്ലാഹു ഉത്തരവിട്ടു: എങ്കില്‍ ഇവിടെ നിന്നു പോകണം നീ പുറത്ത്. ആട്ടിയകറ്റപ്പെട്ടവന്‍ തന്നെയത്രേ നീ. പ്രതിഫലദാനത്തിന്റെ ദിനം വരെയും എന്റെ ശാപം നിനക്കുണ്ടാകും. അവന്‍ അപേക്ഷിച്ചു: നാഥാ, എങ്കില്‍ സൃഷ്ടികളുടെ പുനരുത്ഥാനനാള്‍ വരെ എന്നെ പിന്തിച്ചിടേണമേ. അല്ലാഹു പ്രതികരിച്ചു: എന്നാല്‍, ആ നിശ്ചിത വേളയുടെ ദിവസം വരെ നിനക്കു അവസരം നല്‍കപ്പെട്ടിരിക്കുന്നു. ഇബ്‌ലീസ് വ്യക്തമാക്കി: നിന്റെ പ്രതാപം തന്നെ ശപഥം, നിന്റെ ആത്മാര്‍ത്ഥ ദാസരൊഴിച്ച് അവരെ സര്‍വരെയും ഞാന്‍ ദുര്‍മാര്‍ഗത്തിലാക്കുക തന്നെ ചെയ്യും, തീര്‍ച്ച²²
അല്ലാഹു പ്രതികരിച്ചു: അപ്പോള്‍ ഇതാണ് സത്യം-സത്യമേ ഞാന്‍ പറയൂ- നിന്നെയും അവരില്‍ നിന്നു നിന്നെ അനുധാവനം ചെയ്ത സര്‍വരെയും കൊണ്ട് ഞാന്‍ നരകം നിറക്കുക തന്നെ ചെയ്യുന്നതാണ്.

നബീ, പ്രഖ്യാപിക്കുക: ഈ പ്രബോധന നിര്‍വഹണത്തിന് ഒരു പ്രതിഫലവും നിങ്ങളോടു ഞാന്‍ ചോദിക്കുന്നില്ല; കൃത്രിമത്വം ചമച്ചുണ്ടാക്കുന്നവരില്‍ പെട്ടയാളുമല്ല ഞാന്‍. ഈ ഖുര്‍ആന്‍ ലോകര്‍ക്കുള്ള ഉദ്‌ബോധനമാണ്. ഒരു നിശ്ചിത സമയത്തിനു ശേഷം ഇതിന്റെ ശരിയായ വിവരം നിങ്ങള്‍ അറിയുക തന്നെ ചെയ്യുന്നതാണ്²³