അസ്സാഫ്ഫാത്ത് - الصافات - As-Saffat

വരിവരിയായി അണിനിരക്കുന്നവരും¹
മേഘങ്ങള്‍ തെളിച്ചു കൊണ്ടുപോകുന്നവരും വേദപാരായകരുമായ മാലാഖമാര്‍ തന്നെ ശപഥം, മനുഷ്യരേ, നിങ്ങളുടെ ദൈവം ഏകന്‍ തന്നെയാണ്, തീര്‍ച്ച. ഭുവന-വാനങ്ങളുടെയും അവക്കിടയിലുള്ളതിന്റെയും ഉദയ ചക്രവാളങ്ങളുടെയും നാഥനാണവന്‍. നിശ്ചയം സമീപവാനത്തെ താരഭംഗിയാല്‍ നാം അലങ്കരിക്കുകയും ധിക്കാരികളായ സര്‍വ ചെകുത്താന്മാരില്‍ നിന്നും സംരക്ഷിക്കുകയും ചെയ്തിരിക്കുന്നു. ഉപരിലോക സമൂഹത്തിലേക്ക് ചെവികൊടുത്ത് കേള്‍ക്കാന്‍ അവര്‍ക്കാവില്ല, എല്ലാ ദിശയില്‍ നിന്നും എറിഞ്ഞോടിക്കപ്പെടും. അവര്‍ക്ക് ശാശ്വത ശിക്ഷയുണ്ട്. എന്നാല്‍ അവരാരെങ്കിലും എന്തെങ്കിലും റാഞ്ചുകയാണെങ്കില്‍ തുളച്ചു കയറുന്ന തീജ്വാല അവനെ പിന്തുടരുന്നതാണ്²

നബീ, ആ നിഷേധികളോട് താങ്കള്‍ അഭിപ്രായമാരാഞ്ഞു നോക്കൂ: അവരാണോ അതല്ല നാം പടച്ചുണ്ടാക്കിയിട്ടുള്ള മറ്റു വസ്തുക്കളാണോ സൃഷ്ടിക്കാന്‍ ഏറെ പ്രയാസകരമായിട്ടുള്ളത്? നിശ്ചയം, അവരെ നാം പടച്ചിരിക്കുന്നത് പശിമയുള്ള കളിമണ്ണില്‍ നിന്നാകുന്നു³
പക്ഷേ, അവരുടെ നിഷേധത്തില്‍ താങ്കള്‍ അദ്ഭുതപ്പെടുകയാണ്, അവരാകട്ടെ പരിഹസിക്കുകയും ചെയ്യുന്നു. ഉപദേശം നല്‍കപ്പെടുമ്പോള്‍ അവര്‍ ആലോചിക്കുന്നില്ല; എന്തെങ്കിലും ദൃഷ്ടാന്തങ്ങള്‍ കണ്ടാല്‍ പരിഹസിക്കുകയും ഇത് സ്പഷ്ടമായ മാരണമാണ് എന്ന് തട്ടിവിടുകയും ചെയ്യുന്നു. മരിച്ച് മണ്ണും അസ്ഥികളുമായിക്കഴിഞ്ഞാല്‍ ഞങ്ങളും പൂര്‍വപിതാക്കളും പുനര്‍ജീവിപ്പിക്കപ്പെടുമോ എന്നാണവരുടെ ചോദ്യം. താങ്കള്‍ പ്രതികരിക്കുക: അതെ; മാത്രമല്ല, നിങ്ങള്‍ നിന്ദ്യരാവുക കൂടി ചെയ്യും. ഒരൊറ്റ ഘോരഗര്‍ജ്ജനം മാത്രമാണുണ്ടാവുക-തത്സമയമതാ അവര്‍ എണീറ്റു നോക്കുന്നു!⁴

അവര്‍ പരിതപിക്കും: അഹോ, ഞങ്ങള്‍ക്ക് മഹാനാശം! ഇത് പ്രതിഫല ദിനമാണല്ലോ. 'നിങ്ങള്‍ വ്യാജമാക്കിയിരുന്ന നിര്‍ണായക വിധിയുടെ ദിനമത്രേ ഇത്'. അല്ലാഹുവിന്റെ ഉത്തരവുണ്ടാകും: അക്രമകാരികളെയും അവരുടെ കൂട്ടാളികളെയും അല്ലാഹുവിനെ വിട്ട് അവര്‍ ആരാധിച്ചിരുന്നവയെയും നിങ്ങള്‍ സംഗമിപ്പിക്കുകയും നരകപാതയിലേക്ക് നയിക്കുകയും ചെയ്യുക. അവരെയൊന്നു പിടിച്ചുനിറുത്തൂ, ചോദ്യം ചെയ്യാനുണ്ട്: 'നിങ്ങള്‍ക്കെന്തു പറ്റി, പരസ്പരം സഹായിക്കുകയൊന്നും ചെയ്യുന്നില്ലല്ലോ?'⁵
എന്നാല്‍ ഇന്ന് അവര്‍ അങ്ങേയറ്റം കീഴ്‌വണക്കമുള്ളവരായിരിക്കും; ചിലര്‍ മറ്റു ചിലര്‍ക്കുനേരെ തിരിഞ്ഞ് പരസ്പരം ചോദ്യം ചെയ്യും. 'നിങ്ങള്‍ നന്മ വാഗ്ദാനം ചെയ്തുവന്ന് ഞങ്ങളെ വഴിതെറ്റിച്ചില്ലേ' എന്നവര്‍ ചോദിക്കും. നേതാക്കള്‍ പ്രതികരിക്കും: 'അല്ല, നിങ്ങള്‍ വിശ്വാസികളാകാതിരിക്കുകയാണ് ചെയ്തത്; നിങ്ങള്‍ക്കു മീതെ ഒരധീശത്വവും ഞങ്ങള്‍ക്കില്ലായിരുന്നു. പ്രത്യുത, അതിക്രമികളായ ഒരു ജനതയായിരുന്നു നിങ്ങള്‍. അങ്ങനെ നമുക്കുമേല്‍ രക്ഷിതാവിന്റെ ശിക്ഷാവചനം സാക്ഷാല്‍കൃതമായി; നാമത് ആസ്വദിക്കാന്‍ പോകയാണ്. ശരി, ഞങ്ങള്‍ നിങ്ങളെ വഴിതെറ്റിച്ചു; ഞങ്ങള്‍ തന്നെ മാര്‍ഗഭ്രഷ്ടരായിരുന്നു.' നിശ്ചയം, അവരൊക്കെയും അന്ന് ശിക്ഷയില്‍ പങ്കാളികളായിരിക്കും. അധര്‍മകാരികളെ കൊണ്ട് അങ്ങനെത്തന്നെയാണ് നാം ചെയ്യുക⁶

അല്ലാഹു അല്ലാതെ ഒരു ദൈവവും ഇല്ല എന്ന് പറയപ്പെടുമ്പോള്‍ അവര്‍ അഹന്ത നടിക്കുകയും 'ഒരു ഭ്രാന്ത കവിക്കുവേണ്ടി ഞങ്ങള്‍ സ്വന്തം ദൈവങ്ങളെ കൈവെടിയുകയോ' എന്ന് ചോദിക്കുകയും ചെയ്യുമായിരുന്നു. അല്ല, സത്യവും കൊണ്ടാണ് ഈ നബി വന്നിരിക്കുന്നത്; പൂര്‍വിക ദൂതരെ ശരിവെക്കുന്നുമുണ്ട്. നിങ്ങള്‍, തീര്‍ച്ചയായും വേദനയുറ്റ ശിക്ഷ ആസ്വദിക്കുന്നവര്‍ തന്നെ; സ്വകര്‍മങ്ങള്‍ക്കേ നിങ്ങള്‍ പ്രതിഫലം നല്‍കപ്പെടുന്നുള്ളു.

അല്ലാഹുവിന്റെ ആത്മാര്‍ത്ഥരായ അടിമകള്‍ ഇതില്‍ നിന്നൊഴിവാണ്; അവര്‍ക്ക് സുജ്ഞാതമായ ഉപജീവനമുണ്ട്; വിവിധ പഴവര്‍ഗങ്ങള്‍. സുഖാനുഗ്രഹത്തിന്റെ ഉദ്യാനങ്ങളില്‍ സമാദരണീയരായി കട്ടിലുകളില്‍ മുഖാമുഖമായി കഴിയുകയും ഒഴുകുന്ന മദ്യം നിറച്ച കോപ്പകളുമായി ചുറ്റപ്പെടുകയും ചെയ്യും അവര്‍. പാനം ചെയ്യുന്നവര്‍ക്ക് ആസ്വാദ്യകരവും വെളുത്തതുമായ പാനീയം. യാതൊരു ദൂഷ്യവും അതിനില്ല; അവര്‍ക്ക് ലഹരി ബാധിക്കുന്നതുമല്ല. നേത്രങ്ങള്‍ നിയന്ത്രിക്കുന്നവരും വിശാലാക്ഷികളുമായ-മുട്ടകള്‍ പോലെ ഭദ്രമായി സൂക്ഷിച്ചുവെക്കപ്പെട്ട- തരുണികള്‍ അവരുടെയടുത്തുണ്ടാകും⁷

സ്വര്‍ഗവാസികളില്‍ ചിലര്‍ മറ്റുചിലരുമായി കുശലാന്വേഷണങ്ങള്‍ നടത്തുന്നതാണ്. അവരിലൊരാള്‍ പറയും: എനിക്കൊരു കൂട്ടുകാരനുണ്ടായിരുന്നു; നീ പുനരുത്ഥാനത്തില്‍ വിശ്വസിക്കുന്നവരില്‍ തന്നെയാണോ, മരിച്ച് മണ്ണും അസ്ഥികളുമായിക്കഴിഞ്ഞാല്‍ നമുക്ക് കര്‍മഫലങ്ങള്‍ നല്‍കപ്പെടുകതന്നെ ചെയ്യുമോ എന്ന് അവന്‍ ചോദിക്കുമായിരുന്നു. അവന്‍ എവിടെ എന്ന് ഒന്ന് എത്തിനോക്കാന്‍ വരുന്നോ നിങ്ങള്‍? തുടര്‍ന്ന് എത്തിനോക്കുമ്പോള്‍ അവനെ നരകമധ്യേ കണ്ടെത്തുന്നതാണ്⁸
അയാളവനോടു പറയും: അല്ലാഹു തന്നെ ശപഥം! നീ എന്നെ നശിപ്പിച്ചിരുന്നേനെ; എന്റെ നാഥന്റെ കാരുണ്യമില്ലായിരുന്നുവെങ്കില്‍ നരകശിക്ഷക്ക് സന്നിഹിതരാക്കപ്പെടുന്നവരില്‍ ഞാനുമുണ്ടായിരുന്നു!

സ്വര്‍ഗസ്ഥര്‍ പറയും: നമ്മുടെ ആദ്യമരണമല്ലാതെ ഇനി നാം മരിക്കുന്നവരോ ശിക്ഷിക്കപ്പെടുന്നവരോ അല്ലല്ലോ. ഇതുതന്നെയാണ് മഹാസൗഭാഗ്യം. ഇതുപോലെയുള്ളതിനുവേണ്ടിയാകണം കര്‍മങ്ങളനുഷ്ഠിക്കുന്നവര്‍ പ്രവര്‍ത്തിക്കേണ്ടത്⁹
ഇതാണോ വിശിഷ്ടമായ ആതിഥ്യം, അതോ സഖ്ഖൂം മരമോ? അതിക്രമികള്‍ക്ക് നാമതൊരു പരീക്ഷണമാക്കിയിരിക്കുകയാണ്. നരകഗര്‍ത്തത്തില്‍ മുളച്ചു പൊന്തുന്ന ഒരു വൃക്ഷമത്രേ അത്. പിശാചുക്കളുടെ ശിരസ്സുകള്‍ പോലെയായിരിക്കും അതിന്റെ കുലകള്‍. അവരതില്‍ നിന്ന് ഭക്ഷിക്കുകയും വയര്‍ നിറക്കുകയും ചെയ്യും, ശേഷമവര്‍ക്ക് തിളക്കുന്ന വെള്ളത്തിന്റെ ഒരു മിശ്രിതവുമുണ്ടാകും. തദനന്തരവും അവരുടെ പോക്ക് നരകത്തിലേക്ക് തന്നെ, തീര്‍ച്ച¹⁰

ഇവര്‍ തങ്ങളുടെ പൂര്‍വികരെ കണ്ടെത്തിയത് മാര്‍ഗഭ്രംശം വന്നവരായിത്തന്നെയായിരുന്നു; അങ്ങനെ ഇവര്‍ അവരുടെ കാല്‍പാടുകളില്‍ അതിദ്രുത സഞ്ചരിക്കുകയാണ്. ഇവര്‍ക്കുമുമ്പേ പൂര്‍വികരില്‍ മിക്കവരും വഴിപിഴച്ചു പോവുക തന്നെയായിരുന്നു. അവരിലേക്ക് നാം മുന്നറിയിപ്പുകാരെ അയക്കുക തന്നെ ചെയ്തു. എന്നിട്ട്, ആ മുന്നറിയിപ്പ് നല്‍കപ്പെട്ടവരുടെ പരിണതി -അല്ലാഹുവിന്റെ ആത്മാര്‍ത്ഥ ദാസരുടേതൊഴിച്ച്-എങ്ങനെയുണ്ടായിരുന്നുവെന്ന് ആലോചിച്ചുനോക്കൂ!¹¹

നൂഹ്‌നബി നമ്മെ വിളിച്ച് സഹായാര്‍ത്ഥന നടത്തുകയുണ്ടായി. തത്സമയം ഉത്തരം നല്‍കിയവന്‍ എത്ര ഉദാത്തന്‍! അദ്ദേഹത്തെയും അനുയായികളെയും മഹാവിപത്തില്‍ നിന്ന് നാം രക്ഷിച്ചു. തന്റെ സന്തതികളെ നാം അവശേഷിപ്പിക്കുകയും അന്തിമസമൂഹങ്ങളില്‍ തന്നെക്കുറിച്ചുള്ള സല്‍പേര് നിലനിറുത്തുകയും ചെയ്തു. ലോകരിലുടനീളം നൂഹ് നബിക്ക് സമാധാനം ഭവിക്കട്ടെ! പുണ്യവാന്മാര്‍ക്ക് അങ്ങനെത്തന്നെയാണ് നാം പ്രതിഫലം കൊടുക്കുക. നിശ്ചയം, അദ്ദേഹം നമ്മുടെ വിശ്വാസികളായ അടിമകളില്‍ പെട്ടയാളായിരുന്നു. പിന്നീട് മറ്റുള്ളവരെ നാം മുക്കിക്കൊന്ന് നശിപ്പിച്ചു¹²

അദ്ദേഹത്തിന്റെ കക്ഷിയില്‍ പെട്ട വ്യക്തിതന്നെയാണ് ഇബ്‌റാഹീം നബി. ആത്മാര്‍ത്ഥ ഹൃദയവുമായി താന്‍ നാഥനെ അഭിമുഖീകരിച്ച സന്ദര്‍ഭം സ്മരണീയമത്രേ- സ്വപിതാവിനോടും ജനതയോടും താന്‍ ചോദിച്ച സമയം: നിങ്ങള്‍ ഈ ആരാധന നടത്തുന്നത് ഏതുവസ്തുവിനാണ്? അല്ലാഹുവിനെ വിട്ട് വ്യാജദൈവങ്ങളെയാണോ നിങ്ങള്‍ ലക്ഷീകരിക്കുന്നത്? അപ്പോള്‍, പ്രപഞ്ച നാഥനെക്കുറിച്ചുള്ള നിങ്ങളുടെ ധാരണയെന്താണ്?¹³

അങ്ങനെ നക്ഷത്രത്തിലേക്ക് ഒന്നുനോക്കിയിട്ട് 'ഞാന്‍ രോഗബാധിതന്‍ തന്നെയാണ്' എന്നദ്ദേഹം പറഞ്ഞു. പിന്നെ ജനം അദ്ദേഹത്തെ വിട്ടുപോയി¹⁴
തത്സമയം താന്‍ അവരുടെ ദൈവങ്ങളുടെ നേരെ ചെന്ന് 'നിങ്ങള്‍ ആഹരിക്കുന്നില്ലേ, എന്തു പറ്റി, നിങ്ങള്‍ സംസാരിക്കുന്നില്ലല്ലോ' എന്ന് ചോദിക്കുകയും അവയെ അഭിമുഖീകരിച്ച് വലതു കൈ കൊണ്ട് ശക്തമായി വെട്ടുകയുമുണ്ടായി. തുടര്‍ന്ന് അദ്ദേഹത്തിന്റെ സമീപത്തേക്ക് അതിദ്രുതം അവര്‍ ചെന്നു. 'സ്വയം കൊത്തിയുണ്ടാക്കുന്ന ബിംബങ്ങളെയാണോ നിങ്ങളാരാധിക്കുന്നത്; നിങ്ങളെയും നിങ്ങള്‍ നിര്‍മിക്കുന്നവയെയുമൊന്നടങ്കം സൃഷ്ടിച്ചുണ്ടാക്കുന്നതാകട്ടെ അല്ലാഹുവാണു താനും.' ജനം ആക്രോശിച്ചു: നിങ്ങള്‍ ഇവനുവേണ്ടി ഒരു ചൂളയുണ്ടാക്കുകയും ജ്വലിക്കുന്ന തീയില്‍ ഇവനെയിടുകയും ചെയ്യുക! ഇങ്ങനെ അദ്ദേഹത്തിന്റെ കാര്യത്തില്‍ അവര്‍ നിഗൂഢ തന്ത്രം ലക്ഷ്യമിട്ടു. എന്നാല്‍ നാം അവരെ ഏറ്റം തരംതാഴ്ന്നവരാക്കുകയാണുണ്ടായത്¹⁵

അദ്ദേഹം പ്രഖ്യാപിച്ചു: ഞാന്‍ എന്റെ നാഥങ്കലേക്ക് പോവുകയാകുന്നു; അവന്‍ എനിക്ക് മാര്‍ഗദര്‍ശനം നല്‍കുന്നതാണ്. 'എന്റെ രക്ഷിതാവേ, സദ്‌വൃത്തനായ ഒരു പുത്രനെ എനിക്കു പ്രദാനം ചെയ്യേണമേ.' അപ്പോള്‍ സഹിഷ്ണുവായ ഒരു മകനെക്കുറിച്ച് തനിക്കു നാം ശുഭവാര്‍ത്ത നല്‍കി. ആ കുട്ടി താനൊന്നിച്ച് കര്‍മനിരതനാകാന്‍ തുടങ്ങിയപ്പോള്‍ അദ്ദേഹം പറഞ്ഞു: എന്റെ പ്രിയപ്പെട്ട മകനേ, നിന്നെ അറുക്കണമെന്ന് എനിക്ക് സ്വപ്നദര്‍ശനമുണ്ടായിരിക്കുന്നു, നിന്റെ നിലപാടെന്താണ്? കുട്ടി പ്രതികരിച്ചു: ബാപ്പാ, അനുശാസിക്കപ്പെടുന്നത് എന്താണോ, അത് താങ്കള്‍ നിര്‍വഹിച്ചുകൊള്ളുക; ക്ഷമാശീലനായി, ഇന്‍ശാ അല്ലാഹ്, താങ്കളെന്നെ കാണും!¹⁶

അങ്ങനെ അവരിരുവരും ശാസനക്ക് വിധേയരാവുകയും അവനെയദ്ദേഹം കമിഴ്ത്തിക്കിടത്തുകയും ചെയ്തപ്പോള്‍ നാം വിളിച്ചറിയിച്ചു: ഹേ ഇബ്‌റാഹീം, താങ്കള്‍ കിനാവ് സാക്ഷാല്‍ക്കരിക്കുക തന്നെ ചെയ്തിരിക്കുന്നു! ഇങ്ങനെത്തന്നെയാണ് പുണ്യവാന്മാര്‍ക്ക് നാം പ്രതിഫലം നല്‍കുക. വ്യക്തമായൊരു പരീക്ഷണം തന്നെയാണിത്. ബലി നല്‍കാന്‍ അവന്നു പകരം മഹത്തായൊരു മൃഗത്തെ നാം നല്‍കുകയും പില്‍ക്കാലക്കാരില്‍ തന്റെ സല്‍പേര് നിലനിറുത്തുകയും ചെയ്തു¹⁷

ഇബ്‌റാഹീം നബിയുടെ മേല്‍ സമാധാനം വര്‍ഷിക്കട്ടെ. ഇങ്ങനെയാണ് സദ്‌വൃത്തരായ ആളുകള്‍ക്ക് നാം പ്രതിഫലം നല്‍കുക. നമ്മുടെ സത്യവിശ്വാസികളായ അടിമകളില്‍ പെട്ടയാള്‍ തന്നെയായിരുന്നു അദ്ദേഹം. സദ്‌വൃത്തരില്‍ പെട്ട ഒരു പ്രവാചകനെന്ന നിലക്ക് ഇസ്ഹാഖ് എന്ന പുത്രന്റെ പിറവിയെക്കുറിച്ചും തനിക്കു നാം ശുഭവൃത്താന്തം നല്‍കുകയും അദ്ദേഹത്തിനും ഇസ്ഹാഖ് നബിക്കും അനുഗ്രഹം വര്‍ഷിക്കുകയുമുണ്ടായി. ഇരുവരുടെയും സന്തതീപരമ്പരയില്‍ സദ്‌വൃത്തന്മാരും സ്വന്തത്തോട് അതിക്രമം കാട്ടുന്നവരുമുണ്ട്¹⁸

മൂസാ നബിക്കും ഹാറൂന്‍ നബിക്കും നാം ഔദാര്യം ചെയ്യുകയും ഇരുവരെയും സ്വജനത്തെയും മഹാദുരന്തത്തില്‍ നിന്ന് രക്ഷപ്പെടുത്തുകയുമുണ്ടായി; അപ്പോള്‍ അവര്‍ തന്നെയായി ജേതാക്കള്‍. നാം അവരിരുവര്‍ക്കും വസ്തുതകള്‍ സ്പഷ്ടമാക്കുന്ന വേദം കൊടുക്കുകയും ഋജുവായ പന്ഥാവിലേക്ക് മാര്‍ഗദര്‍ശനം നല്‍കുകയും പില്‍കാലക്കാരില്‍ സല്‍പേര് നിലനിറുത്തുകയും ചെയ്തു. മൂസാ നബിക്കും ഹാറൂന്‍ നബിക്കും സമാധാനം ഭവിക്കട്ടെ. ഇങ്ങനെത്തന്നെയാണ് പുണ്യവാന്മാര്‍ക്ക് നാം പ്രതിഫലമേകുക. അവരിരുവരും സത്യവിശ്വാസികളായ അടിമകളില്‍ പെട്ടവരായിരുന്നു¹⁹

ഇല്‍യാസ് നബിയും ദൈവദൂതരില്‍ പെട്ടയാള്‍ തന്നെ. നിങ്ങള്‍ സൂക്ഷ്മത പുലര്‍ത്തുന്നില്ലേ? ബഅ്‌ലിനെ ആരാധിക്കുകയും ഏറ്റം ഉദാത്തനായ സ്രഷ്ടാവിനെ-നിങ്ങളുടെയും പൂര്‍വികരുടെയും നാഥനായ അല്ലാഹുവിനെ-ഉപേക്ഷിക്കുകയുമാണോ എന്ന് സ്വജനതയോട് അദ്ദേഹം ചോദിച്ച സന്ദര്‍ഭം സ്മരണീയമത്രേ. തത്സമയം അവരദ്ദേഹത്തെ വ്യാജനാക്കി. തന്മൂലം അവര്‍ ശിക്ഷക്ക് സന്നിഹിതരാക്കപ്പെടും-അല്ലാഹുവിന്റെ ആത്മാര്‍ത്ഥ ദാസരൊഴികെ. പില്‍കാലക്കാരില്‍ തന്റെ സല്‍പേര് നാം നിലനിറുത്തി. ഇല്‍യാസ് നബിയുടെ മേല്‍ സമാധാനം ഭവിക്കട്ടെ. ഇങ്ങനെത്തന്നെയാണ് പുണ്യവാന്മാര്‍ക്കു നാം പ്രതിഫലം നല്‍കുക. അദ്ദേഹം നമ്മുടെ സത്യവിശ്വാസികളായ അടിമകളില്‍ പെട്ടയാള്‍ തന്നെയായിരുന്നു²⁰

ലൂഥ് നബിയും ദൈവദൂതരില്‍ പെട്ടയാള്‍ തന്നെ. തന്നെയും സ്വന്തക്കാരെയുമൊന്നടങ്കം-പിന്മാറിയ ഒരു വൃദ്ധയൊഴികെ-നാം സുരക്ഷിതരാക്കിയ സന്ദര്‍ഭം സ്മരണീയമത്രേ. പിന്നെ, അപരരെ നാം സംഹരിച്ചുകളഞ്ഞു. രാവിലെയും രാത്രിയുമൊക്കെ അവരുടെ സമീപത്തുകൂടി നിങ്ങള്‍ നടന്നുപോകാറുണ്ട്; എന്നിട്ടും നിങ്ങള്‍ ചിന്തിച്ചു മനസ്സിലാക്കുന്നില്ലേ²¹

യൂനുസ് നബിയും ദൈവദൂതരില്‍ ഒരാള്‍ തന്നെ. ഭാരം നിറച്ച ജലയാനത്തിലേക്ക് താന്‍ ഒളിച്ചോടിയ സന്ദര്‍ഭം സ്മരണീയമത്രേ. അങ്ങനെ സഹയാത്രികരുമായി താന്‍ നറുക്കെടുപ്പില്‍ പങ്കാളിയാവുകയും പരാജയപ്പെടുകയും ചെയ്തു. എന്നിട്ട് ആക്ഷേപാര്‍ഹനാകവെ ആ തിമിംഗലം തന്നെ വിഴുങ്ങി. അല്ലാഹുവിന്റെ മഹത്ത്വപ്രകീര്‍ത്തകരിലുള്‍പ്പെട്ടിരുന്നില്ലെങ്കില്‍ പുനരുത്ഥാന നാള്‍ വരെ താന്‍ അതിന്റെ വയറ്റില്‍ തന്നെ കഴിഞ്ഞുകൂടേണ്ടി വരുമായിരുന്നു. എന്നിട്ട്, രോഗിയായി നാമദ്ദേഹത്തെ വെളിയിലേക്ക് തള്ളുകയും തനിക്കുമീതെ ചുരക്കച്ചെടി മുളപ്പിക്കുകയും ചെയ്തു. ഒരു ലക്ഷമോ അതിലുപരിയോ വരുന്ന ഒരു ജനസഞ്ചയത്തിലേക്ക് അദ്ദേഹത്തെ നാം ദൂതനാക്കുകയും അവര്‍ സത്യവിശ്വാസം കൈക്കൊള്ളുകയും ഒരു നിശ്ചിതകാലം അവര്‍ക്കുനാം സുഖജീവിതം നല്‍കുകയുമുണ്ടായി²²

അതുകൊണ്ട്, നബീ, ബഹുദൈവ വിശ്വാസികളോട് താങ്കള്‍ അന്വേഷിച്ചുനോക്കൂ: താങ്കളുടെ നാഥന്നു പെണ്‍മക്കളും അവര്‍ക്കു ആണ്‍മക്കളുമാണോ ഉള്ളത്? അതല്ല,-അവര്‍ സാക്ഷികളായിരിക്കെ- മലക്കുകളെ സ്ത്രീകളായി നാം സൃഷ്ടിക്കുകയായിരുന്നോ? അറിയണം, അല്ലാഹു സന്താനങ്ങളെ ജനിപ്പിച്ചിട്ടുണ്ടെന്ന് അവര്‍ തട്ടിവിടുന്നു; ആ പ്രസ്താവം നുണ തന്നെയാണെന്ന് തീര്‍ച്ച. ആണ്‍മക്കള്‍ക്കപ്പുറം പെണ്‍മക്കളെ അവന്‍ തെരഞ്ഞെടുത്തിരിക്കുന്നു എന്നാണോ അവരുടെ വാദം? നിങ്ങള്‍ക്കെന്തു പറ്റി? ഏതു വിധമാണ് നിങ്ങള്‍ വിധികല്‍പിക്കുന്നത്? ചിന്തിക്കുന്നില്ലേ നിങ്ങള്‍? അതോ, വല്ല സ്പഷ്ട പ്രമാണവും നിങ്ങള്‍ക്കുണ്ടോ? എന്നാല്‍ ആ രേഖ ഹാജറാക്കൂ, സത്യവാന്മാരാണു നിങ്ങളെങ്കില്‍! അല്ലാഹുവിന്നും അഗോചര മലക്കുകള്‍ക്കുമിടയില്‍ ബഹുദൈവ വിശ്വാസികള്‍ കുടുംബബന്ധം സ്ഥാപിച്ചിരിക്കയാണ്; എന്നാല്‍ അവര്‍ നരകത്തില്‍ സന്നിഹിതരാക്കപ്പെടുമെന്ന് മലക്കുകള്‍ക്ക് നന്നായറിയാം²³

ആ ബഹുദൈവ വിശ്വാസികള്‍ -അല്ലാഹുവിന്റെ ആത്മാര്‍ത്ഥ ദാസരൊഴികെ- നിര്‍മിച്ചുണ്ടാക്കുന്ന വിശേഷണങ്ങളില്‍ നിന്നെല്ലാം അവന്‍ എത്ര മഹോന്നതനാണ്! എന്നാല്‍ നിങ്ങള്‍ക്കും നിങ്ങളുടെ ആരാധ്യവസ്തുക്കള്‍ക്കും അവന്നു പ്രതികൂലമായി-നരകപ്രാപ്തനെയല്ലാതെ- മറ്റാരെയും കുഴപ്പത്തിലാക്കാന്‍ കഴിയുന്നതല്ല തന്നെ²⁴
മലക്കുകള്‍ പറയും: സുജ്ഞാതമായ ഒരു സ്ഥാനമില്ലാതെ ഞങ്ങളിലാരുമില്ല; അണിനിരക്കുന്നവരും മഹത്ത്വ പ്രകീര്‍ത്തനം ചെയ്യുന്നവരുമത്രേ ഞങ്ങള്‍²⁵

സത്യനിഷേധികള്‍ പറയാറുണ്ടായിരുന്നു: ഞങ്ങള്‍ വശം മുന്‍ഗാമികളില്‍ നിന്നുള്ള എന്തെങ്കിലും വേദം ഉണ്ടായിരുന്നുവെങ്കില്‍ ഞങ്ങള്‍ അല്ലാഹുവിന്റെ ആത്മാര്‍ത്ഥ അടിമകളാകുമായിരുന്നു. എന്നാല്‍ അതവതരിച്ചപ്പോള്‍ അവര്‍ നിഷേധിച്ചു; അതിന്റെ ഫലം വഴിയെ അവരറിയും²⁶

നാം നിയോഗിക്കുന്ന ദൂതന്മാര്‍ തന്നെയാണ് വിജയിക്കുകയെന്നും നമ്മുടെ സൈന്യമാണ് അജയ്യരാവുക എന്നുമുള്ള നമ്മുടെ ഉത്തരവ് നേരത്തെ സംഭവിച്ചിട്ടുണ്ട്. അതിനാല്‍, ഒരു നിശ്ചിത സമയം വരെ താങ്കള്‍ നിഷേധികളില്‍ നിന്ന് പിന്തിരിയുകയും അവരെ നിരീക്ഷിക്കുകയും ചെയ്യുക; അവര്‍ ഭവിഷ്യത്ത് കണ്ടുകൊള്ളും. നമ്മുടെ ശിക്ഷക്ക് ധൃതി കൂട്ടുകയാണോ അവര്‍? എന്നാല്‍ തങ്ങളുടെ മുറ്റത്ത് അത് വന്നണയുമ്പോള്‍ മുന്നറിയിപ്പു നല്‍കപ്പെട്ടിരുന്നവരുടെ പ്രഭാതം വളരെ ഹീനമായിരിക്കുന്നതാണ്. അതിനാല്‍ ഒരു നിശ്ചിത സമയം വരെ നിഷേധികളെ വിട്ട് അങ്ങ് പിന്തിരിയുകയും അവരെ വീക്ഷിക്കുകയും ചെയ്യുക; പരിണതി അവര്‍ കണ്ടറിയുന്നതാണ്.²⁷
പ്രതാപത്തിന്റെ നാഥനായ അങ്ങയുടെ രക്ഷിതാവ് അവരവതരിപ്പിക്കുന്ന വിശേഷണങ്ങളില്‍ നിന്നൊക്കെ എത്ര പരിശുദ്ധനാണ്! ദൈവദൂതന്മാര്‍ക്കു സമാധാനം ഭവിക്കട്ടെ. പ്രപഞ്ച നാഥനായ അല്ലാഹുവിന്നാണ് സമസ്ത സ്‌തോത്രങ്ങളും!