അൽ ജാഥിയ - الجاثية - Al-Jathiyah

ഹാ മീം. പ്രതാപശാലിയും യുക്തിമാനുമായ അല്ലാഹുവില്‍ നിന്നാണ് ഈ വേദത്തിന്റെ അവതരണം.¹
നിശ്ചയം ഭുവന-വാനങ്ങളില്‍ സത്യവിശ്വാസികള്‍ക്ക് ദൃഷ്ടാന്തങ്ങളുണ്ട്. നിങ്ങളുടെ സൃഷ്ടിപ്പിലും ജന്തുജാലങ്ങളുടെ വിന്യാസത്തിലുമുണ്ട് ദൃഢവിശ്വാസികള്‍ക്ക് വിവിധ ദൃഷ്ടാന്തങ്ങള്‍. രാപ്പകലുകള്‍ മാറിമറിഞ്ഞുവരുന്നതിലും അല്ലാഹു അന്തരീക്ഷത്തില്‍ നിന്ന് ഉപജീവനമാധ്യമമായ മഴ വര്‍ഷിച്ച് ഭൂമിയയുടെ നിര്‍ജീവാവസ്ഥക്ക് ശേഷം സചേതനമാക്കിയതിലും കാറ്റുകളുടെ നിയന്ത്രണത്തിലും ചിന്തിച്ച് ഗ്രഹിക്കുന്നവര്‍ക്ക് ഏറെ ദൃഷ്ടാന്തങ്ങളുണ്ട്. താങ്കള്‍ക്ക് നാം പാരായണം ചെയ്തുതരുന്ന അല്ലാഹുവിന്റെ സൂക്തങ്ങളാണ് ഇവയത്രയും. അല്ലാഹുവിനും അവന്റെ സൂക്തങ്ങള്‍ക്കുമപ്പുറം ഇനി ഏതൊരു വാര്‍ത്തയാണ് നിഷേധികള്‍ വിശ്വസിക്കുക?²

ധാരാളമായി നുണപറയുകയും അധര്‍മം പ്രവര്‍ത്തിക്കുകയും ചെയ്യുന്ന എല്ലാവര്‍ക്കും മഹാനാശമാണുണ്ടാവുക. അല്ലാഹുവിന്റെ സൂക്തങ്ങള്‍ തനിക്ക് പാരായണം ചെയ്യപ്പെടുന്നതവന്‍ ശ്രവിക്കുകയും എന്നിട്ട്, കേള്‍ക്കാത്തപോലെ അഹംഭാവിയായി ഉറച്ചുനില്‍ക്കുകയും ചെയ്കയാണവന്‍. അതുകൊണ്ട് വേദനാജനകമായ ശിക്ഷയെപ്പറ്റി അവന്ന് താങ്കള്‍ ശുഭവാര്‍ത്ത നല്‍കുക! നമ്മുടെ സൂക്തങ്ങളില്‍ നിന്ന് എന്തെങ്കിലും അറിഞ്ഞാല്‍ അവനത് പരിഹാസ പാത്രമാക്കുന്നു. ഹീനമായ ശിക്ഷയാണവര്‍ക്ക് ലഭിക്കുക; വഴിയെ നരകവുമുണ്ടാകും. തങ്ങളുടെ സമ്പാദ്യങ്ങളോ അല്ലാഹുവിനെ വിട്ട് അവര്‍ വരിച്ചുവെച്ച രക്ഷാധികാരികളോ യാതൊന്നും അവര്‍ക്ക് നേടിക്കൊടുക്കില്ല. ഗുരുതര ശിക്ഷയാണവര്‍ക്കുണ്ടാവുക. ഈ ഖുര്‍ആന്‍ ഒരു മാര്‍ഗദര്‍ശനമത്രേ. തങ്ങളുടെ നാഥന്റെ സൂക്തങ്ങള്‍ നിഷേധിച്ചവര്‍ക്ക് വേദനാജനകമായ അതീവഗുരുതര ശിക്ഷയുണ്ട്.³

സമുദ്രങ്ങള്‍ നിങ്ങള്‍ക്ക് കീഴ്‌പ്പെടുത്തിത്തന്നത് അല്ലാഹുവാണ്-അവന്റെ ഉത്തരവനുസരിച്ച് അതിലൂടെ ജലയാനങ്ങളോടാനും നിങ്ങള്‍ അവന്റെ അനുഗ്രഹം അന്വേഷിക്കാനും കൃതജ്ഞരാകാനും വേണ്ടി. ഭുവന-വാനങ്ങളിലുള്ളതൊക്കെയും നിങ്ങള്‍ക്കവന്‍ കീഴ്‌പെടുത്തി. ആലോചിച്ചു ഗ്രഹിക്കുന്നവര്‍ക്ക് ഇതിലെല്ലാം വിവിധ ദൃഷ്ടാന്തങ്ങളുണ്ട്, തീര്‍ച്ച;⁴

അല്ലാഹുവിന്റെ പ്രതിഫല ദാനനാളുകള്‍ പ്രതീക്ഷിക്കാത്ത നിഷേധികള്‍ക്ക് മാപ്പുനല്‍കാന്‍ താങ്കള്‍ വിശ്വാസികളോട് നിര്‍ദേശിക്കുക; തങ്ങളുടെ ദുഷ്‌ചെയ്തികളുടെ പ്രതിഫലം അക്കൂട്ടര്‍ക്ക് അല്ലാഹു നല്‍കാന്‍ വേണ്ടി. ആരെങ്കിലും വല്ല സല്‍കര്‍മവുമനുഷ്ഠിച്ചാല്‍ അതിന്റെ ഗുണഫലം അവന്നുതന്നെ; തിന്മ ചെയ്താല്‍ അതിന്റെ ദൂഷ്യവും. വഴിയെ രക്ഷിതാവിങ്കലേക്ക് നിങ്ങള്‍ മടക്കപ്പെടും.⁵

ഇസ്രയേല്യര്‍ക്ക് നാം വേദവും വിധികര്‍തൃത്വവും പ്രവാചകത്വവും ഉദാത്തമായ ഉപജീവന മാര്‍ഗങ്ങളും കൊടുക്കുകയും മറ്റു ജനസമൂഹങ്ങളെക്കാള്‍ അവരെ ശ്രേഷ്ഠരാക്കുകയും മതകാര്യങ്ങളെക്കുറിച്ച സ്പഷ്ട ദൃഷ്ടാന്തങ്ങള്‍ നല്‍കുകയും ചെയ്തു. അങ്ങനെ ജ്ഞാനം ലഭ്യമായ ശേഷമേ -പരസ്പര ശത്രുത മൂലം-അവര്‍ ഭിന്നപക്ഷരായിട്ടുള്ളു.⁶
തങ്ങള്‍ ഭിന്നാഭിപ്രായക്കാരായിരുന്ന കാര്യങ്ങളില്‍ പുനരുത്ഥാനനാളില്‍ അവര്‍ക്കിടയില്‍ അല്ലാഹു തീര്‍പ്പ് കല്‍പിക്കുന്നതാണ്.

നബീ, പിന്നീട് അങ്ങയെ നാം മതവിഷയങ്ങളില്‍ ഒരു പ്രസ്പഷ്ട സംഹിതയിലാക്കിയിരിക്കുന്നു. അതുകൊണ്ട്, താങ്കള്‍ അത് അനുധാവനം ചെയ്യുക, അജ്ഞരുടെ അഭീഷ്ടങ്ങള്‍ പിന്തുടരരുത്.⁷
അല്ലാഹുവിനെതിരെ താങ്കള്‍ക്ക് എന്തെങ്കിലുമൊരു ഗുണം ചെയ്യാന്‍ അവര്‍ക്കു കഴിയില്ല, തീര്‍ച്ച. അതിക്രമകാരികള്‍ പരസ്പരം സംരക്ഷകരാണ്. എന്നാല്‍ സൂക്ഷ്മാലുക്കളുടെ രക്ഷാകര്‍ത്താവ് അല്ലാഹുവത്രേ. ഈ ഖുര്‍ആന്‍ സകലജനങ്ങള്‍ക്കും ഉള്‍ക്കാഴ്ചയുണ്ടാക്കുന്ന ദൃഷ്ടാന്തങ്ങളും ദൃഢവിശ്വാസികള്‍ക്ക് മാര്‍ഗദര്‍ശനവും കാരുണ്യവുമാകുന്നു.

അതല്ല, അധര്‍മകാരികള്‍ ധരിച്ചുവെച്ചിട്ടുണ്ടോ, സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവരെപ്പോലെ അവരെയും നാം ആക്കുമെന്ന്? അവരുടെ ജീവിതവും മരണവും സമാനമാക്കുമെന്ന്? അവരുടെ ആ തീര്‍പ്പ് അതീവ ഹീനം തന്നെ!⁸
ഭുവന-വാനങ്ങള്‍ സത്യനിഷ്ഠമായ ലക്ഷ്യസമേതമാണ് അല്ലാഹു സൃഷ്ടിച്ചിരിക്കുന്നത്. ഓരോ വ്യക്തിക്കും താനനുഷ്ഠിച്ചതിന്റെ പ്രതിഫലം നല്‍കപ്പെടാന്‍ കൂടിയാണത്. അവരോട് അക്രമമനുവര്‍ത്തിക്കപ്പെടുകയില്ല. സ്വേച്ഛയെ ദൈവമാക്കി വെച്ചവനെ താങ്കള്‍ കണ്ടിട്ടുണ്ടോ? അല്ലാഹു അറിഞ്ഞുകൊണ്ടുതന്നെ അവനെ ദുര്‍മാര്‍ഗിയാക്കുകയും കാതിനും ഹൃദയത്തിനും മുദ്രചാര്‍ത്തുകയും ദൃഷ്ടിക്കുമേല്‍ ആവരണമിടുകയും ചെയ്തിട്ടുണ്ട്.⁹
ഇനി അല്ലാഹുവല്ലാതെ ആരാണവനെ സന്മാര്‍ഗ ദര്‍ശനം ചെയ്യുക? വസ്തുത ഇതായിട്ടും നിങ്ങള്‍ ചിന്തിച്ചു ഗ്രഹിക്കുന്നില്ലേ?

ഈ ഐഹിക ലോക ജീവിതമല്ലാതെ വേറെയൊരു ജീവിതവും ഇല്ലേയില്ല, നാം ചിലര്‍ മരിക്കുകയും മറ്റു ചിലര്‍ ജീവിക്കുകയും ചെയ്യുന്നു, കാലം മാത്രമാണ് നമ്മെ നശിപ്പിക്കുന്നത് എന്ന് നിഷേധികള്‍ ജല്‍പിച്ചു. അവര്‍ക്ക് അത് സംബന്ധിച്ച് ഒരു വസ്തുതയുമറിയില്ല; ഊഹങ്ങള്‍ വെച്ചുപുലര്‍ത്തുക മാത്രമാണ്. നമ്മുടെ സൂക്തങ്ങള്‍ സ്പഷ്ടമാംവിധം അവര്‍ക്ക് പാരായണം ചെയ്യപ്പെട്ടാലും 'നിങ്ങള്‍ സത്യവിശ്വാസികളാണെങ്കില്‍ പരേതപിതാക്കളെ ഹാജറാക്കൂ' എന്ന ജല്‍പനം മാത്രമായിരിക്കും അവരുടെ 'ന്യായവാദം'.¹⁰
അങ്ങു പ്രഖ്യാപിക്കുക: അല്ലാഹു നിങ്ങളെ ജീവിപ്പിക്കുകയും പിന്നീട് മരണപ്പെടുത്തുകയും അനന്തരം അന്ത്യനാളിലേക്ക് നിസ്സംശയം സംഗമിപ്പിക്കുകയും ചെയ്യും. പക്ഷേ, മിക്ക ജനങ്ങളും സത്യമറിയുന്നില്ല.

ഭുവന-വാനങ്ങളുടെ രാജാധികാരം അല്ലാഹുവിന്നാണ്. അന്ത്യദിനം സമാഗതമാകുന്ന അന്ന് അസത്യവാദികള്‍ ഗുരുതര നഷ്ടത്തിലാപതിക്കും- ഓരോ ജനപഥവും മുട്ടുകുത്തിയവരായി കാണാവുന്നതും അതിന്റെ പ്രമാണത്തിലേക്ക് വിളിക്കപ്പെടുന്നതുമാണ്. 'നിങ്ങളുടെ കര്‍മങ്ങള്‍ക്കുള്ള പ്രതിഫലം ഇന്ന് നല്‍കപ്പെടും'. ഇതാ നമ്മുടെ പ്രമാണം- നിങ്ങള്‍ക്കു പ്രതികൂലമായി, സത്യമത് തുറന്നുപറയും. നിങ്ങളനുവര്‍ത്തിച്ചിരുന്നതൊക്കെയും നാം രേഖപ്പെടുത്തി വെക്കുന്നുണ്ടായിരുന്നു.¹¹

എന്നാല്‍ സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തിരുന്നവരെ തങ്ങളുടെ നാഥന്‍ തന്റെ കാരുണ്യത്തില്‍ പ്രവേശിപ്പിക്കും. അതത്രേ സ്പഷ്ടമായ സൗഭാഗ്യം. നിഷേധികളോട് പറയപ്പെടും: 'എന്റെ സൂക്തങ്ങള്‍ നിങ്ങള്‍ക്ക് പാരായണം ചെയ്യപ്പെട്ടിരുന്നില്ലേ? തത്സമയം നിങ്ങള്‍ അഹങ്കരിക്കുകയും അധര്‍മകാരികളായ ഒരു ജനവിഭാഗമാവുകയും ഉണ്ടായി. 'അല്ലാഹുവിന്റെ വാഗ്ദാനം സത്യമാണ്, അന്ത്യദിനമാകട്ടെ നിസ്സംശയം സമാഗതമാവുകയും ചെയ്യും' എന്നുദ്‌ബോധിപ്പിക്കപ്പെട്ടാല്‍ നിങ്ങള്‍ പ്രതികരിക്കും: എന്താണ് അന്ത്യനാള്‍ എന്ന് ഞങ്ങള്‍ക്കറിയില്ല, ഞങ്ങള്‍ക്കൊരു ദാര്‍ഢ്യവുമില്ല, ഊഹം മാത്രമാണുള്ളത്!¹²

അങ്ങനെ, തങ്ങളുടെ ദുഷ്‌ചെയ്തികളുടെ ദൂഷ്യഫലങ്ങള്‍ അവര്‍ക്കുവെളിപ്പെടുന്നതും എന്തിനെയവര്‍ പരിഹാസപാത്രമാക്കിയിരുന്നോ അതവരെ പൊതിയുന്നതുമാകുന്നു. അവരോട് അരുളപ്പെടും: ഇന്നാളിനെ അഭിമുഖീകരിക്കുമെന്ന വസ്തുത നിങ്ങള്‍ വിസ്മരിച്ചിരുന്നതുപോലെ നിങ്ങളെ നാം ഇന്ന് മറന്നുകളയുന്നു.¹³
നിങ്ങളുടെ ആവാസഗേഹം നരകമാണ്, സഹായികളാരുമില്ല നിങ്ങള്‍ക്ക്. അല്ലാഹുവിന്റെ ദൃഷ്ടാന്ത-സൂക്തങ്ങള്‍ നിങ്ങള്‍ പരിഹാസപാത്രമാക്കിത്തീര്‍ക്കുകയും ഐഹിക ജീവിതം നിങ്ങളെ കബളിപ്പിക്കുകയും ചെയ്തതിന്റെ പരിണതിയാണിത്. അതുകൊണ്ട് ഇന്ന് അവിടെ നിന്ന് അവര്‍ പുറത്തേക്ക് വിടപ്പെടുകയോ പ്രായശ്ചിത്തമര്‍ത്ഥിക്കപ്പെടുകയോ ചെയ്യില്ല.¹⁴

അപ്പോള്‍ ആകാശങ്ങളുടെയും ഭൂമിയുടെയും പ്രപഞ്ചത്തിന്റെയും നാഥനായ അല്ലാഹുവിന്നാണ് സമസ്ത സ്‌തോത്രങ്ങളും. ഭുവന-വാനങ്ങളില്‍ അവന്നാണ് ഔന്നത്യം; പ്രതാപശാലിയും യുക്തിമാനുമാണവന്‍.¹⁵