അൽ അഹ്ഖാഫ് - الأحقاف - Al-Ahqaf

ഹാ മീം. പ്രതാപശാലിയും യുക്തിമാനുമായ അല്ലാഹുവിങ്കല്‍ നിന്നാണ് ഈ വേദത്തിന്റെ അവതരണം.¹
ഭുവന-വാനങ്ങളും അവയ്ക്കിടയിലുള്ളതും നാം പടച്ചിട്ടുള്ളത് സത്യനിഷ്ഠമായ ഉദ്ദേശ്യപൂര്‍വവും നിശ്ചിതാവധി വെച്ചും മാത്രമാണ്. നിഷേധികളാകട്ടെ, തങ്ങള്‍ക്കു കിട്ടിയ മുന്നറിയിപ്പ് അവഗണിച്ചു കളയുകയാണ് ചെയ്യുന്നത്. നബീ, ചോദിക്കുക: അല്ലാഹുവിനെ വിട്ട് നിങ്ങള്‍ ആരാധിക്കുന്നവയെക്കുറിച്ച് ആലോചിച്ചു നോക്കിയിട്ടുണ്ടോ നിങ്ങള്‍? ഭൂമിയില്‍ എന്താണവ പടച്ചുണ്ടാക്കിയിരിക്കുന്നതെന്ന് ഒന്നു കാണിച്ചു തരിക; അതല്ല, വാനലോകസൃഷ്ടിപ്പില്‍ എന്തെങ്കിലും ഭാഗഭാഗിത്വമുണ്ടോ അവയ്ക്ക്? സത്യവാദികളാണ് നിങ്ങളെങ്കില്‍ ഏതെങ്കിലും പൂര്‍വവേദമോ ജ്ഞാനശകലമോ ഹാജറാക്കൂ!²

അല്ലാഹുവിനെ വിട്ട്, ഖിയാമനാള്‍ വരെയും മറുപടിതരാത്ത ബിംബങ്ങള്‍ക്ക് ആരാധനകളര്‍പ്പിക്കുന്നവനെക്കാള്‍ ദുര്‍മാര്‍ഗിയായി മറ്റാരുണ്ട്?! അവയാകട്ടെ ഇവരുടെ ആരാധനയെക്കുറിച്ച് അജ്ഞരാണുതാനും. മാലോകര്‍ സംഗമിപ്പിക്കപ്പെടുമ്പോള്‍ അവ ഈ ആരാധകരുടെ ശത്രുക്കളും ഇവരുടെ ആരാധനയുടെ നിഷേധികളുമായിത്തീരുന്നതാണ്. നമ്മുടെ സൂക്തങ്ങള്‍ സ്പഷ്ടമാം വിധം പാരായണം ചെയ്യപ്പെടുകയാണെങ്കില്‍-സത്യം വന്നെത്തുമ്പോള്‍-'ഇത് വ്യക്തമായ ആഭിചാരമാണ്' എന്ന് നിഷേധികള്‍ ജല്‍പിക്കുന്നതാണ്. അതല്ല, നബി ഈ ഖുര്‍ആന്‍ കെട്ടിച്ചമച്ചു എന്നാണോ അവര്‍ തട്ടിവിടുന്നത്? താങ്കള്‍ പ്രതികരിക്കുക: ഞാനത് സ്വയം നിര്‍മിച്ചുണ്ടാക്കിയതാണെങ്കില്‍ അല്ലാഹുവിന്റെ ശിക്ഷയില്‍ നിന്ന് എനിക്ക് സുരക്ഷയേകാന്‍ ഒട്ടുമേ നിങ്ങള്‍ക്കാവില്ല. അതു സംബന്ധിച്ച് നിങ്ങള്‍ ജല്‍പിച്ചുകൊണ്ടിരിക്കുന്നതൊക്കെയും അവന്നു നന്നായറിയാം. എനിക്കും നിങ്ങള്‍ക്കുമിടയില്‍ സാക്ഷിയായി അവന്‍ തന്നെ ധാരാളം!³
ഏറെ മാപ്പരുളുന്നവനും കരുണാമയനുമാണവന്‍.

നബീ, പ്രഖ്യാപിക്കുക: ദൈവദൂതന്മാരില്‍ പ്രഥമാഗതനൊന്നുമല്ല ഞാന്‍; എന്നെയും നിങ്ങളെയും കൊണ്ട് ഏതു രീതിയനുവര്‍ത്തിക്കപ്പെടുമെന്ന് എനിക്കറിയുകയുമില്ല. ഞാന്‍ പിന്തുടരുന്നത് എനിക്കു ലഭിക്കുന്ന ദിവ്യസന്ദേശങ്ങള്‍ മാത്രമാണ്. സ്പഷ്ടമായ ഒരു താക്കീതുകാരനല്ലാതെ മറ്റാരുമല്ല ഞാന്‍. നബീ, ചോദിക്കുക: ഇതു അല്ലാഹുവിങ്കല്‍ നിന്നുള്ളതാവുകയും നിങ്ങളിത് നിഷേധിക്കുകയും ഇസ്രയേല്യരില്‍ നിന്നൊരാള്‍ ഇതിന്റെ സാധുതയ്ക്കു സാക്ഷിയാവുകയും ഇതില്‍ വിശ്വാസമര്‍പിക്കുകയും.⁴
നിങ്ങള്‍ അഹന്തനടിക്കുകയുമാണ് സംഭവിക്കുന്നതെങ്കില്‍ എന്തൊരു ദുര്യോഗമാണത്! അതിക്രമകാരികള്‍ക്ക് അല്ലാഹു നേര്‍വഴി കാട്ടുകയേ ചെയ്യില്ല.

സത്യവിശ്വാസം വരിച്ചവരെക്കുറിച്ച് നിഷേധികള്‍ തട്ടിവിട്ടു: 'ഇതൊരു ഉദാത്തദര്‍ശനമായിരുന്നുവെങ്കില്‍ ഞങ്ങള്‍ക്കു മുമ്പേ ഇവരിത് പ്രാപിക്കുമായിരുന്നില്ല!'⁵
ഇതുവഴി അവര്‍ക്കു സന്മാര്‍ഗപ്രാപ്തി ലഭിച്ചിട്ടില്ലാത്തതിനാല്‍ 'ഇതൊരു പഴഞ്ചന്‍ വ്യാജമാണ്' എന്ന് അവര്‍ ജല്‍പിക്കുന്നതാണ്. മാര്‍ഗദര്‍ശകവും കാരുണ്യവുമായി നേരത്തെ മൂസാ നബിയുടെ തൗറാത്ത് അവതരിച്ചിട്ടുണ്ട്. അതിനെ ശരിവെക്കുന്ന അറബിഭാഷാ വേദമാണിത് -അതിക്രമികള്‍ക്ക് മുന്നറിയിപ്പും സദ്‌വൃത്തര്‍ക്ക് ശുഭവൃത്താന്തവും നല്‍കാന്‍.

ഞങ്ങളുടെ രക്ഷിതാവ് അല്ലാഹുവാണെന്ന് പ്രഖ്യാപിക്കുകയും ശേഷം ഋജുവായി നിലകൊള്ളുകയും ചെയ്തവര്‍ക്ക് ഒട്ടുമേ ഭയപ്പാട് വേണ്ട; അവര്‍ ദുഃഖിക്കേണ്ടി വരികയുമില്ല. സ്വര്‍ഗക്കാരാണവര്‍. തങ്ങളനുവര്‍ത്തിച്ചിരുന്ന സുകൃതങ്ങള്‍ക്കു പ്രതിഫലമായി അവരതില്‍ ശാശ്വതവാസികളായിരിക്കും.

മാതാപിതാക്കളോട് ഉദാത്തസമീപനം പുലര്‍ത്തണമെന്ന് മനുഷ്യനോട് നാം കല്‍പിച്ചു. പ്രയാസങ്ങള്‍ സഹിച്ചുകൊണ്ടാണ് മാതാവ് അവനെ ഗര്‍ഭം ചുമന്നതും പ്രസവിച്ചതും. അവന്റെ ഗര്‍ഭധാരണവും മുലയൂട്ടല്‍ വിരാമവും മുപ്പതു മാസമാണ്.⁶
അങ്ങനെ പൂര്‍ണ യൗവനത്തിലെത്തി നാല്‍പത് വയസ്സായാല്‍ അവന്‍ ഇങ്ങനെ പ്രാര്‍ത്ഥിക്കും: 'എന്റെ നാഥാ, എനിക്കും മാതാപിതാക്കള്‍ക്കും നീ വര്‍ഷിച്ച അനുഗ്രഹങ്ങള്‍ക്ക് കൃതജ്ഞതപ്രകാശിപ്പിക്കാനും നീ ഇഷ്ടപ്പെടുന്ന സല്‍കര്‍മങ്ങള്‍ അനുഷ്ഠിക്കാനും എനിക്ക് പ്രചോദനം നല്‍കുകയും എന്റെ മക്കളില്‍ നന്മ വരുത്തുകയും ചെയ്യേണമേ. നിന്നിലേക്കു ഞാന്‍ പശ്ചാത്തപിച്ചു മടങ്ങിയിരിക്കുന്നു. നിനക്കു കീഴ്‌പെടുന്നവരില്‍ പെട്ടവനാണു ഞാന്‍.' അവരുടെ ഉദാത്ത കര്‍മങ്ങള്‍ നാം സ്വീകരിക്കുന്നതും ദുഷ്‌കര്‍മങ്ങള്‍ വിട്ടുവീഴ്ച ചെയ്യുന്നതുമാണ്. സ്വര്‍ഗക്കാരിലായിരിക്കും അവര്‍. അവരോടു ചെയ്യപ്പെട്ടിരുന്ന സത്യസന്ധവാഗ്ദാനമാണത്.⁷

'നിങ്ങളിരുവരുടെയും നിലപാട് മഹാകഷ്ടം തന്നെ;-എനിക്കു മുമ്പ് പല തലമുറകള്‍ കഴിഞ്ഞുപോയിരിക്കെ- ഞാന്‍ പുനര്‍ ജീവിപ്പിക്കപ്പെടുമെന്ന് ഭീഷണിപ്പെടുത്തുകയാണോ നിങ്ങള്‍?' എന്ന് മാതാപിതാക്കളോടു പറയുന്നവന്‍ എത്ര നിര്‍ഭാഗ്യന്‍!⁸
അവര്‍ അല്ലാഹുവോട് സഹായമര്‍ത്ഥിച്ചു: 'നിനക്ക് നാശം, നീ സത്യവിശ്വാസം വരിക്കൂ, അല്ലാഹുവിന്റെ വാഗ്ദാനം സത്യം തന്നെയത്രേ.' അവന്‍ പ്രതികരിക്കും: 'ആദിമന്മാരുടെ ഇതിഹാസങ്ങളാണിതെല്ലാം!' ജിന്നുകളിലും മനുഷ്യരിലും നിന്നുള്ള പൂര്‍വികരുടെ ഗണത്തിലായി ഇക്കൂട്ടര്‍ക്ക് ശിക്ഷാവചനം സ്ഥിരീകൃതമായിരിക്കുന്നു. ഓരോരുത്തര്‍ക്കും അവരവരുടെ അനുഷ്ഠാനാനുസൃത പദവികളാണുണ്ടാവുക. അവരുടെ കര്‍മഫലം പൂര്‍ത്തീകരിച്ചു നല്‍കാനാണത്. ഒരുവിധ അതിക്രമവും അവരോടനുവര്‍ത്തിക്കപ്പെടുന്നതല്ല.⁹

സത്യനിഷേധികള്‍ നരകത്തിനു മുമ്പാകെ വെളിപ്പെടുത്തപ്പെടുന്ന നാള്‍ അവരോട് ബോധിപ്പിക്കപ്പെടും: നിങ്ങളുടെ വിശിഷ്ട വിഭവങ്ങള്‍ ഐഹിക ജീവിതത്തില്‍ നിങ്ങള്‍ തുലച്ചു കളയുകയും അവകൊണ്ട് സുഖാസ്വാദനങ്ങളനുഭവിക്കുകയുമുണ്ടായി. അതുകൊണ്ട്, അന്യായമായി ഭൂമിയില്‍ അഹന്ത നടിച്ചിരുന്നതിന്റെയും അധര്‍മം പ്രവര്‍ത്തിച്ചിരുന്നതിന്റെയും കാരണമായി ഇന്നു നിങ്ങള്‍ക്ക് ഹീനശിക്ഷ നല്‍കപ്പെടുകയാകുന്നു!¹⁰

ആദ് ഗോത്രത്തിന്റെയാളായ ഹൂദ് നബിയെ അനുസ്മരിക്കുക-അഹ്ഖാഫിലുള്ള തന്റെ ജനതതിക്ക് അദ്ദേഹം മുന്നറിയിപ്പു കൊടുത്ത നേരം-തന്റെ മുമ്പും ശേഷവും താക്കീതുകാര്‍ ഉണ്ടായിട്ടുമുണ്ട്-: 'അല്ലാഹുവിനെയല്ലാതെ നിങ്ങള്‍ ആരാധിക്കരുത്; ഭീഷണമായൊരു നാളിലെ ശിക്ഷ നിങ്ങള്‍ക്ക് വരുമെന്ന് ഞാന്‍ ഭയപ്പെടുകയാണ്!' അവര്‍ പ്രതികരിച്ചു: സ്വദൈവങ്ങളില്‍ നിന്നു ഞങ്ങളെ തിരിച്ചു വിടാനാണോ നിന്റെ ഈ വരവ്? എന്നാല്‍, സത്യവാദിയാണെങ്കില്‍ ആ വാഗ്ദത്തശിക്ഷ നീ ഇങ്ങു കൊണ്ടുവാ! അദ്ദേഹം മറുപടി നല്‍കി: 'അല്ലാഹുവിങ്കലേ അതുസംബന്ധിച്ച വിവരമുള്ളു. ഞാന്‍ നിയുക്തനായ ദൗത്യം നിങ്ങള്‍ക്ക്എത്തിച്ചുതരിക മാത്രമാണ് എന്റെ പ്രവൃത്തി. പക്ഷേ, അവിവേകികളായാണ് നിങ്ങളെ ഞാന്‍ കാണുന്നത്.' അങ്ങനെ ശിക്ഷ തങ്ങളുടെ താഴ്‌വരകള്‍ക്കഭിമുഖമായി മേഘരൂപത്തില്‍ ദൃശ്യമായപ്പോള്‍ 'ഇത് നമുക്ക് പേമാരി വര്‍ഷിക്കുന്ന മഴക്കാറാണ്' എന്ന് അവര്‍ കളിയാക്കി.¹¹
'അല്ല, ഏതൊന്നിന്നു നിങ്ങള്‍ തത്രപ്പെട്ടിരുന്നുവോ അതാണിത്- വേദനയുറ്റ ശിക്ഷയുള്‍ക്കൊള്ളുന്നതും തന്റെ നാഥന്റെ ഉത്തരവനുസരിച്ച് സര്‍വത്തെയും ഉന്മൂലനം ചെയ്യുന്നതുമായ കൊടുങ്കാറ്റ്!' അങ്ങനെ തങ്ങളുടെ ആവാസഗേഹങ്ങളല്ലാതെ മറ്റൊന്നും ദൃശ്യമാകാത്ത വിധം അവരായി. അധര്‍മകാരികള്‍ക്ക് ഇങ്ങനെയാണ് നാം പ്രതിഫലം നല്‍കുക.

നാം നിങ്ങള്‍ക്കു തരാത്ത പല സൗകര്യങ്ങളും അവര്‍ക്കു കൊടുക്കുകയും കേള്‍വിയും കാഴ്ചയും ഹൃദയവും കനിഞ്ഞേകുകയും ചെയ്തിരുന്നു. എന്നിട്ട്, അല്ലാഹുവിന്റെ ദൃഷ്ടാന്തങ്ങള്‍ തള്ളിക്കളഞ്ഞുകൊണ്ടിരുന്നതിനാല്‍ ആ കേള്‍വിയും കാഴ്ചയും ഹൃദയവുമൊന്നും അവര്‍ക്കു യാതൊരു ഉപകാരവും ചെയ്തില്ല.¹²
ഏതൊരു ദൈവിക ശിക്ഷയെ പരിഹാസപാത്രമാക്കിയിരുന്നുവോ അത് അവരെ ആവരണം ചെയ്കയുമുണ്ടായി. നിങ്ങള്‍ക്ക് ചുറ്റുമുള്ള ചില നാടുകളും നാം സംഹരിച്ചിട്ടുണ്ട്. അന്നാട്ടുകാര്‍ സത്യത്തിലേക്ക് മടങ്ങാനായി പലതരം ദൃഷ്ടാന്തങ്ങളും നാം പ്രതിപാദിച്ചുകൊടുത്തിരുന്നു. എന്നിട്ട്, അല്ലാഹുവിന്റെ സാമീപ്യലബ്ധിക്കായി അവനെ വിട്ട് അവര്‍ വരിച്ചിരുന്ന ദൈവങ്ങള്‍ എന്തുകൊണ്ട് അവരെ സഹായിച്ചില്ല?! പ്രത്യുത, അവര്‍ അപ്രത്യക്ഷരാവുകയാണുണ്ടായത്. ആ ബഹുദൈവത്വം അവരുടെ വ്യാജസൃഷ്ടിയും സ്വയംനിര്‍മിതിയുമായിരുന്നു.¹³

ഒരുകൂട്ടം ജിന്നുകളെ ഖുര്‍ആന്‍ ശ്രവിക്കാനായി നാം താങ്കളുടെയടുത്തേക്കയച്ച സന്ദര്‍ഭം സ്മരണീയമത്രേ.¹⁴
അവിടെ ഹാജറായപ്പോള്‍ 'സാകൂതം ശ്രവിക്കൂ' എന്ന് അവര്‍ പരസ്പരം പറഞ്ഞു. അതു സമാപിച്ചപ്പോള്‍ തങ്ങളുടെ സമൂഹത്തിലേക്ക് മുന്നറിയിപ്പുകാരായി അവര്‍ മടങ്ങിപ്പോയി. അവര്‍ ഉദ്‌ബോധിപ്പിച്ചു: ഞങ്ങളുടെ സമുദായമേ, മൂസാനബിക്കു ശേഷം അവതീര്‍ണമായതും അതിനുമുമ്പുള്ളതിനെ ശരിവെക്കുന്നതുമായ ഒരുവേദം ഞങ്ങള്‍ ശ്രവിക്കയുണ്ടായി. സത്യത്തിലേക്കും നേര്‍മാര്‍ഗത്തിലേക്കുമാണത് വഴികാട്ടുന്നത്. ഞങ്ങളുടെ സമുദായമേ, അല്ലാഹുവിങ്കലേക്കു ക്ഷണിക്കുന്ന മുഹമ്മദ് നബിക്ക് നിങ്ങള്‍ ഉത്തരം ചെയ്യുകയും അവിടത്തെ വിശ്വസിക്കുകയും ചെയ്യുക. എങ്കില്‍ അവന്‍ നിങ്ങള്‍ക്ക് പാപങ്ങള്‍ പൊറുക്കുകയും വേദനയുറ്റ ശിക്ഷയില്‍ നിന്ന് സുരക്ഷയേകുകയും ചെയ്യും. പ്രത്യുത, അല്ലാഹുവിങ്കലേക്ക് ക്ഷണിക്കുന്നയാള്‍ക്ക് ഒരാള്‍ മറുപടി നല്‍കുന്നില്ലെങ്കില്‍, അവന്ന് ഈ ഭൂമിയില്‍ അല്ലാഹുവിനെ പരാജയപ്പെടുത്താനാവില്ല; അവനല്ലാതെ രക്ഷാധികാരിയുണ്ടാവുകയുമില്ല. സ്പഷ്ടമായ ദുര്‍മാര്‍ഗത്തിലായിരിക്കും അവര്‍.¹⁵

ഭുവന-വാനങ്ങള്‍ സൃഷ്ടിക്കുകയും തദ്വാരാ പരവശനാകാതിരിക്കുകയും ചെയ്ത അല്ലാഹു മരിച്ചവരെ പുനര്‍ജനിപ്പിക്കാന്‍ കഴിവുറ്റവന്‍ തന്നെയാണെന്ന് നിഷേധികള്‍ക്ക് ഗ്രഹിച്ചുകൂടേ? അതെ, ഏതുകാര്യത്തിനും കഴിവുറ്റവന്‍ തന്നെയാണവന്‍, തീര്‍ച്ച. സത്യനിഷേധികള്‍ നരകത്തിനുമുമ്പാകെ വെളിപ്പെടുത്തപ്പെടുന്ന നാള്‍, ഈ ശിക്ഷ സത്യം തന്നെയല്ലേ എന്ന് ചോദിക്കപ്പെടും. 'ഉവ്വ്, ഞങ്ങളുടെ നാഥന്‍ തന്നെ ശപഥം' എന്ന് അവര്‍ മറുപടി നല്‍കും. 'ശരി, നിങ്ങള്‍ സത്യനിഷേധം വരിച്ചുകൊണ്ടിരുന്നതിന്‍ഫലമായി ഈ ശിക്ഷ ആസ്വദിച്ചോളൂ' എന്ന് അല്ലാഹു അരുളും.¹⁶
അതുകൊണ്ട്, നബീ, ദൃഢമാനസരായ ദൈവദൂതന്മാരെപ്പോലെ താങ്കളും ക്ഷമിക്കുക;¹⁷
നിഷേധികളുടെ കാര്യത്തില്‍ തത്രപ്പെടേണ്ട. മുന്നറിയിപ്പു നല്‍കപ്പെട്ട ശിക്ഷ കാണുന്നദിവസം, പകലിന്റെ ഒരല്‍പനേരമേ തങ്ങള്‍ ദുന്‍യാവില്‍ വസിച്ചിട്ടുള്ളു എന്ന് അവര്‍ക്ക് തോന്നും. ഈ ഖുര്‍ആന്‍ ഒരു ഉദ്‌ബോധനമത്രേ. അധര്‍മകാരികള്‍ മാത്രമല്ലേ ഉന്മൂലനത്തിനു വിധേയരാവുകയുള്ളു?¹⁸