36–38
ഈ ഐഹിക ജീവിതം കളിയും വിനോദവുമല്ലാതെ മറ്റൊന്നുമല്ല. സത്യവിശ്വാസം കൈക്കൊള്ളുകയും സൂക്ഷ്മത പുലര്‍ത്തുകയും ചെയ്യുന്നുവെങ്കില്‍ അതിനുള്ള പ്രതിഫലം നിങ്ങള്‍ക്കവന്‍ തരുന്നതാണ്. സ്വന്തം സമ്പത്തുകള്‍ നിങ്ങളോടവന്‍ ചോദിക്കുന്നില്ല; അവ ചോദിക്കുകയും സമ്മര്‍ദം ചെലുത്തുകയും ചെയ്തിരുന്നുവെങ്കില്‍ നിങ്ങള്‍ പിശുക്കുകാണിക്കുന്നതും നിങ്ങളുടെ ഉള്ളിലുള്ള പക അവന്‍ പുറത്തുകൊണ്ടുവരുന്നതുമാണ്.16
നോക്കൂ, നിങ്ങളിതാ അല്ലാഹുവിന്റെ വഴിയില്‍ ധനം ചെലവഴിക്കുവാന്‍ ക്ഷണിക്കപ്പെടുന്നു. തത്സമയം, നിങ്ങളില്‍ ചിലര്‍ ലുബ്ധരാവുകയാണ്. ആരൊരാള്‍ പിശുക്കുകാട്ടുന്നുവോ, സ്വന്തത്തോടു തന്നെയാണ് അവനതു പ്രകടിപ്പിക്കുന്നത്.17
അല്ലാഹുവാകട്ടെ, സ്വയം പര്യാപ്തനും നിങ്ങള്‍ ദരിദ്രരുമാകുന്നു. ഇനി, നിങ്ങള്‍ പിന്തിരിഞ്ഞു പോവുകയാണെങ്കില്‍ നിങ്ങളല്ലാത്ത മറ്റൊരു ജനപഥത്തെ അവന്‍ പകരം കൊണ്ടുവരും. പിന്നെ, നിങ്ങളെപ്പോലെയാകില്ല അവര്‍.18
3 വിശദീകരണങ്ങൾ കാണുക
16. മനുഷ്യന്റെ പ്രേമഭാജനമാണ് ധനം (89:20). പലരുടെയും പൂജാവസ്തുവും ദൈവവുമാണത്. മറ്റുള്ളവര്‍ക്കത് അല്‍പമെങ്കിലും നല്‍കാന്‍ പലരും ഇഷ്ടപ്പെടില്ല. അതുകൊണ്ട്, അല്ലാഹു മനുഷ്യനോടത് നിര്‍ബന്ധിച്ചു ചോദിക്കുന്നില്ലെന്നും അങ്ങനെ ചെയ്താല്‍ അവന്നത് ദുസ്സഹമായിരിക്കുമെന്നും വിദ്വേഷവും ക്രോധവും മറ്റും പ്രകടമാക്കുമെന്നുമാണ് പറയുന്നത്. ഈ ധനഭ്രമ മനഃശാസ്ത്രം വെച്ചുകൊണ്ട് ദുര്‍വഹമായ ദാനധര്‍മാദികള്‍ നിങ്ങളോട് മതത്തില്‍ അനുശാസിക്കപ്പെട്ടിട്ടില്ല എന്നാണ് വിവക്ഷ.
17. പുണ്യത്തിന്റെ വഴികള്‍ നിരവധിയാണ്. അവയില്‍ ആവുംവിധം ചെലവഴിക്കാന്‍ വിശ്വാസി കല്‍പിക്കപ്പെട്ടിട്ടുണ്ട്. എന്നാല്‍ പലരും ചെറിയ ഒരംശം പോലും ആ വഴിയില്‍ വ്യയം ചെയ്യാന്‍ മടിക്കുകയും പിശുക്കുകാട്ടുകയും ചെയ്യുന്നു. സര്‍ക്കാരുകളുടെ വരുമാന നികുതിയും കച്ചവട നികുതിയും മറ്റുമായി തുലനം ചെയ്താല്‍ വളരെക്കുറച്ചുമാത്രമേ സകാത്ത് കൊടുക്കേണ്ടതുള്ളു എന്നുകാണാം. അതിന്നുവരെ സന്നദ്ധരാകാത്ത നിരവധി സമ്പന്നരുണ്ട്. യഥാര്‍ത്ഥത്തില്‍ ദാനധര്‍മങ്ങളിലൂടെ സമ്പത്തില്‍ അനുഗ്രഹവും ശ്രേയസ്സും പുരോഗതിയുമുണ്ടാവുകയാണ് ചെയ്യുക. വളരെ മികച്ച പ്രതിഫലവും ലഭിക്കും. അതുകൊണ്ടാണ് ദാനധര്‍മങ്ങള്‍ കാരണമായി ഒരു സമ്പത്തിലും കുറവു വരുന്നതല്ല (ബുഖാരി, മുസ്‌ലിം) എന്നു നബി(സ്വ) പഠിപ്പിച്ചത്.
18. വലിയൊരു പരീക്ഷണ മേഖലയാണ് സാമ്പത്തികം. വരവും ചെലവുമൊക്കെ കണിശമായ ശ്രദ്ധയിലും വ്യവസ്ഥിതിയിലും നടക്കണം. അല്ലാഹുവിന്റെ സ്വന്താവശ്യത്തിനല്ല അത് മനുഷ്യരോടു ചോദിക്കുന്നത്; പ്രത്യുത വ്യക്തിയുടെ നേട്ടത്തിന്നും മറ്റുള്ളവരുടെ ഗുണങ്ങള്‍ക്കും വേണ്ടിയാണ്. അതുകൊണ്ടു നിങ്ങള്‍ അറുപിശുക്കന്മാരായി സാമൂഹിക താളപ്പിഴകളുണ്ടായാല്‍ നിങ്ങളെ ഉന്മൂലനം ചെയ്ത് മറ്റൊരു ജനപഥത്തെ കൊണ്ടുവരുമെന്ന് അല്ലാഹു താക്കീത് ചെയ്യുകയാണ്.
إِنَّمَا ٱلۡحَيَوٰةُ ٱلدُّنۡيَا لَعِبٞ وَلَهۡوٞۚ وَإِن تُؤۡمِنُواْ وَتَتَّقُواْ يُؤۡتِكُمۡ أُجُورَكُمۡ وَلَا يَسۡـَٔلۡكُمۡ أَمۡوَٰلَكُمۡ ٣٦
إِن يَسۡـَٔلۡكُمُوهَا فَيُحۡفِكُمۡ تَبۡخَلُواْ وَيُخۡرِجۡ أَضۡغَٰنَكُمۡ ٣٧
هَٰٓأَنتُمۡ هَٰٓؤُلَآءِ تُدۡعَوۡنَ لِتُنفِقُواْ فِي سَبِيلِ ٱللَّهِ فَمِنكُم مَّن يَبۡخَلُۖ وَمَن يَبۡخَلۡ فَإِنَّمَا يَبۡخَلُ عَن نَّفۡسِهِۦۚ وَٱللَّهُ ٱلۡغَنِيُّ وَأَنتُمُ ٱلۡفُقَرَآءُۚ وَإِن تَتَوَلَّوۡاْ يَسۡتَبۡدِلۡ قَوۡمًا غَيۡرَكُمۡ ثُمَّ لَا يَكُونُوٓاْ أَمۡثَٰلَكُم ٣٨
