അൽ ഫത്ഹ് - الفتح - Al-Fath

അങ്ങയുടെ വീഴ്ചകളില്‍ നിന്ന് മുമ്പ് സംഭവിച്ചതും വരാനിരിക്കുന്നതുമായവ അല്ലാഹു മാപ്പാക്കുന്നതിനും അവന്റെ അനുഗ്രഹം അങ്ങേക്ക് പൂര്‍ത്തീകരിക്കുന്നതിനും ഋജുവായ പന്ഥാവിലേക്ക് അങ്ങയെ നയിക്കുന്നതിനും അജയ്യമായൊരു സഹായം അവന്‍ നല്‍കേണ്ടതിനുമായി പ്രസ്പഷ്ടമായൊരു വിജയം താങ്കള്‍ക്കു നാം കനിഞ്ഞേകുക തന്നെ ചെയ്തിരിക്കുന്നു.¹

സത്യവിശ്വാസികളുടെ ഹൃദയങ്ങളില്‍-അവരുടെ വിശ്വാസത്തോടൊപ്പം വര്‍ധനകൂടിയുണ്ടാകാന്‍-സമാധാനം വര്‍ഷിച്ചത് അവനാണ്.²
ഭുവന-വാനങ്ങളിലുള്ള സൈന്യങ്ങള്‍ അല്ലാഹുവിന്നുള്ളതാകുന്നു. എല്ലാം അറിയുന്നവനും യുക്തിമാനുമാണവന്‍. സത്യവിശ്വാസം വരിച്ച ആണുങ്ങളെയും പെണ്ണുങ്ങളെയും അടിയിലൂടെ ആറുകളൊഴുകുന്ന സ്വര്‍ഗീയാരാമങ്ങളില്‍ ശാശ്വതനിവാസികളായി പ്രവേശിപ്പിക്കാനും അവരുടെ തിന്മകള്‍ മാപ്പാക്കാനും-അല്ലാഹുവിങ്കല്‍ വന്‍വിജയമാണത്-അവനെക്കുറിച്ച് ഹീനധാരണകള്‍ വെച്ചുപുലര്‍ത്തുന്ന കപടവിശ്വാസികളായ പുരുഷന്മാരെയും സ്ത്രീകളെയും ബഹുദൈവ വിശ്വാസം സ്വീകരിച്ച ആണുങ്ങളെയും പെണ്ണുങ്ങളെയും-അവര്‍ക്കുമേല്‍ തിന്മയുടെ ആവരണമുണ്ട്-ശിക്ഷിക്കാനും വേണ്ടി. അല്ലാഹു അവരോട് കോപിക്കുകയും അവരെ ശപിക്കുകയും അവര്‍ക്കായി നരകം സജ്ജീകരിക്കുകയും ചെയ്തിരിക്കുന്നു-എത്ര ഹീനമാണ് ആ സങ്കേതം! ഭുവന-വാനങ്ങളിലുള്ള സൈന്യങ്ങള്‍ അല്ലാഹുവിനുള്ളതാണ്. അവന്‍ അജയ്യനും യുക്തിമാനുമാകുന്നു.³

നബീ, അല്ലാഹുവിലും ദൂതരിലും നിങ്ങള്‍ വിശ്വസിക്കുവാനും അവനെ സഹായിക്കുവാനും ബഹുമാനിക്കുവാനും പ്രഭാത-പ്രദോഷങ്ങളില്‍ അവന്റെ മഹത്ത്വം വാഴ്ത്തുവാനുമായി അങ്ങയെ സത്യസാക്ഷിയും ശുഭവാര്‍ത്താവാഹകനും മുന്നറിയിപ്പുകാരനുമായി നിശ്ചയം, നാം നിയോഗിച്ചിരിക്കുന്നു.

താങ്കളോടു ഉടമ്പടിയിലേര്‍പ്പെടുന്നവര്‍ അല്ലാഹുവിനോട് തന്നെയാണത് ചെയ്യുന്നത്; അവരുടെ കൈകള്‍ക്കുമീതെ അല്ലാഹുവിന്റെ ഹസ്തമുണ്ട്. അതുകൊണ്ട്, അതാരെങ്കിലും ലംഘിക്കുന്നുവെങ്കില്‍ അതിന്റെ ദൂഷ്യം അവന്നുതന്നെ. അല്ലാഹുവുമായി ചെയ്ത ഉടമ്പടി ഒരാള്‍ പൂര്‍ത്തീകരിക്കുന്നുവെങ്കില്‍, മഹത്തായ പ്രതിഫലം അയാള്‍ക്കവന്‍ നല്‍കുന്നതാകുന്നു.⁴

സ്വത്തുകളും കുടുംബങ്ങളും യുദ്ധയാത്രയില്‍ നിന്ന് ഞങ്ങളെ വ്യാപൃതരാക്കിക്കളഞ്ഞു; അതുകൊണ്ട് താങ്കള്‍ ഞങ്ങള്‍ക്ക് പാപമോചനത്തിനര്‍ത്ഥിക്കണം എന്ന്, പുറംതിരിഞ്ഞുനിന്ന ഗ്രാമവാസികളായ അറബികള്‍ അങ്ങയോടു ബോധിപ്പിക്കും. ഹൃദയങ്ങളിലില്ലാത്തതാണ് നാവുകൊണ്ടവര്‍ പറയുന്നത്.⁵
താങ്കള്‍ ചോദിക്കുക: അപ്പോള്‍, അല്ലാഹു നിങ്ങള്‍ക്ക് എന്തെങ്കിലും ഉപദ്രവമോ ഉപകാരമോ ചെയ്യാനുദ്ദേശിച്ചാല്‍ അവങ്കല്‍ നിന്ന് നിങ്ങള്‍ക്കെന്തെങ്കിലും സ്വായത്തമാക്കിത്തരാന്‍ ആരാണുണ്ടാവുക?⁶
അല്ല, നിങ്ങളുടെ ചെയ്തികളെക്കുറിച്ച് സൂക്ഷ്മജ്ഞനാണ് അല്ലാഹു. പ്രത്യുത, ദൈവദൂതനും സത്യവിശ്വാസികളും യുദ്ധാനന്തരം തങ്ങളുടെ കുടുംബങ്ങളിലേക്ക് തിരിച്ചെത്തുകയേ ഇല്ലെന്ന് നിങ്ങള്‍ ധരിക്കുകയും അതു നിങ്ങള്‍ക്ക് അലംകൃതമായി തോന്നുകയും ചെയ്തു. നിങ്ങള്‍ ഹീനവിചാരം വെച്ചുപുലര്‍ത്തുകയും തുലഞ്ഞ ഒരു കൂട്ടരാവുകയുമുണ്ടായി.⁷
അല്ലാഹുവിലും ദൈവദൂതരിലും ആരെങ്കിലും വിശ്വസിക്കാതിരിക്കുന്നുവെങ്കില്‍ അത്തരം നിഷേധികള്‍ക്ക് ജ്വലിക്കുന്ന നരകം നാം സജ്ജീകരിച്ചിരിക്കുന്നു. ഭുവന-വാനങ്ങളുടെ രാജാധിപത്യം അല്ലാഹുവിനാണ്. താനുദ്ദേശിക്കുന്ന ചിലര്‍ക്കവന്‍ പൊറുത്തുകൊടുക്കുകയും മറ്റു ചിലരെ ശിക്ഷിക്കുകയും ചെയ്യുന്നു. ഏറെ മാപ്പരുളുന്നവനും കരുണാമയനുമാണവന്‍.

സാമ്പത്തിക നേട്ടം കൈവരിക്കാനുള്ളേടത്തേക്ക് യുദ്ധയാത്ര ചെയ്കയാണെങ്കില്‍ 'നിങ്ങളൊന്നിച്ച് ഞങ്ങളെക്കൂടി വരാനനുവദിക്കൂ' എന്ന് ആ പുറംതിരിഞ്ഞുനിന്നവരാവശ്യപ്പെടും. അല്ലാഹുവിന്റെ വചനം മാറ്റിമറിക്കാനാണവര്‍ ആഗ്രഹിക്കുന്നത്. താങ്കള്‍ പ്രതികരിക്കുക: നിങ്ങള്‍ ഞങ്ങളെ അനുഗമിക്കയേ ചെയ്യരുത്; അങ്ങനെയാണ് അല്ലാഹുവിന്റെ മുന്‍ഉത്തരവ്. 'അല്ല, നിങ്ങള്‍ ഞങ്ങളോട് അസൂയപ്പെടുകയാണ്' എന്ന് തത്സമയമവര്‍ പ്രതികരിക്കുന്നതാണ്.⁸
അല്ല, വളരെക്കുറച്ചുമാത്രമേ അവര്‍ ഗ്രഹിക്കുന്നുള്ളു. പുറം തിരിഞ്ഞു നിന്ന ഗ്രാമവാസികളായ അറബികളോട് താങ്കള്‍ പറയുക: തീവ്രമായ ആക്രമണശേഷിയുള്ള ഒരു സംഘത്തെ അഭിമുഖീകരിക്കാന്‍ വഴിയെ നിങ്ങള്‍ വിളിക്കപ്പെടുന്നതാണ്; അവര്‍ ആയുധം വെക്കുംവരെ നിങ്ങള്‍ പടപൊരുതേണ്ടിവരും. തത്സമയം, അനുസരണമുള്ളവരാവുകയാണെങ്കില്‍ അല്ലാഹു നിങ്ങള്‍ക്ക് ഉദാത്തമായ പ്രതിഫലം തരും; മുമ്പെന്ന പോലെ ഇനിയും പുറംതിരിഞ്ഞുപോകുന്നുവെങ്കിലോ, വേദനാജനകമാം വിധം നിങ്ങളെയവന്‍ ശിക്ഷിക്കുന്നതാണ്.⁹

അന്ധനും മുടന്തനും രോഗിയും ധര്‍മസമരത്തിന് വരാത്തതില്‍ കുറ്റമില്ല. അല്ലാഹുവിനെയും ദൂതനെയും ഒരാള്‍ അനുസരിക്കുന്നുവെങ്കില്‍ അടിയിലൂടെ ആറുകളൊഴുകുന്ന സ്വര്‍ഗീയാരാമങ്ങളില്‍ അവനെ പ്രവേശിപ്പിക്കുന്നതാണ്. ആരെങ്കിലും പുറംതിരിഞ്ഞുപോകുന്നുവെങ്കില്‍ അയാളെ വേദനാജനകമാം വിധം അവന്‍ ശിക്ഷിക്കും. ആ വൃക്ഷച്ചുവട്ടില്‍ വെച്ച് സത്യവിശ്വാസികള്‍ താങ്കളോട് ഉടമ്പടി ചെയ്തപ്പോള്‍ അവരെക്കുറിച്ച് അവന്‍ സംതൃപ്തനാവുക തന്നെ ചെയ്തിട്ടുണ്ട്. അവരുടെ ഹൃദയങ്ങളിലുള്ളത് അവന്‍ അറിയുകയും അങ്ങനെ അവര്‍ക്ക് മനഃശാന്തി വര്‍ഷിക്കയും, സമീപസ്ഥ വിജയവും പിടിച്ചെടുക്കാനായി ഒട്ടേറെ സമരാര്‍ജിത സമ്പത്തുകളും പ്രതിഫലം നല്‍കുകയുമുണ്ടായി.¹⁰
അല്ലാഹു അജയ്യനും യുക്തിമാനുമാകുന്നു. പിടിച്ചെടുക്കാവുന്ന ഒട്ടേറെ സമരാര്‍ജിത സ്വത്തുകള്‍ അവന്‍ നിങ്ങള്‍ക്ക് വാഗ്ദാനം ചെയ്തിട്ടുണ്ട്; എന്നാല്‍ ഈ ഖൈബര്‍ സ്വത്ത് നേരത്തെ തന്നിരിക്കയാണ്. സത്യവിശ്വാസികള്‍ക്ക് ദൃഷ്ടാന്തമായിരിക്കാനും നിങ്ങളെ നേര്‍മാര്‍ഗത്തിലാക്കാനുമായി ജനഹസ്തങ്ങള്‍ നിങ്ങളില്‍ നിന്ന് അവന്‍ പ്രതിരോധിക്കുകയും നിങ്ങള്‍ക്ക് നേടിയെടുക്കാനാകാത്ത-അല്ലാഹു വലയം ചെയ്ത-മറ്റു നേട്ടങ്ങള്‍ വാഗ്ദാനം ചെയ്കയുമുണ്ടായി. ഏതു കാര്യത്തിനും കഴിവുറ്റവനാണവന്‍.¹¹

ആ നിഷേധികള്‍ നിങ്ങളുമായി പോരാട്ടം നടത്തിയിരുന്നെങ്കില്‍ തന്നെ അവര്‍ പിന്തിരിഞ്ഞോടിയിരുന്നേനെ; പിന്നീട് ഒരു രക്ഷകനെയും സഹായിയെയും അവര്‍ക്ക് കണ്ടെത്താനുമാവില്ല. പണ്ടു മുതലേ നടന്നുവരുന്ന അല്ലാഹുവിന്റെ നടപടിയാണിത്. അവന്റെ നടപടികളില്‍ ഒരുവിധ ഭേദഗതിയും താങ്കള്‍ക്ക് കണ്ടെത്താനേ ആവില്ല. ആ ബഹുദൈവ വിശ്വാസികള്‍ക്കെതിരെ നിങ്ങള്‍ക്ക് വിജയം തന്ന ശേഷം മക്കയുടെ ഉള്ളില്‍ വെച്ച് നിങ്ങളുടെ ഹസ്തങ്ങള്‍ പരസ്പരം നീളുന്നത് ഉപരോധിച്ചവനാണ് അല്ലാഹു. നിങ്ങളുടെ പ്രവൃത്തികള്‍ നന്നായി കണ്ടറിയുന്നവനാണവന്‍.¹²

സത്യത്തെ നിഷേധിക്കുകയും മസ്ജിദുല്‍ഹറാമില്‍ നിന്ന് നിങ്ങളെയും ബലിമൃഗങ്ങള്‍ നിശ്ചിത സ്ഥലത്തെത്തുന്നതും പ്രതിരോധിക്കുകയും ചെയ്തവരാണവര്‍. നിങ്ങളുടെ അറിവോടെയല്ലാതെ, സത്യവിശ്വാസികളായ ചില സ്ത്രീ-പുരുഷന്മാരെ നിങ്ങള്‍ ചവിട്ടിമെതിക്കാനും സബോധമല്ലാതെ നിങ്ങള്‍ക്ക് ദോഷബാധയുണ്ടാകാനും സാധ്യതയില്ലായിരുന്നെങ്കില്‍ യുദ്ധം നടന്നേനെ!¹³
താനുദ്ദേശിക്കുന്നവരെ തന്റെ കാരുണ്യത്തില്‍ അല്ലാഹു ഉള്‍പെടുത്തേണ്ടതിനായിരുന്നു ഇത്. ആ നിഷേധികളും വിശ്വാസികളും വെവ്വേറെയായിരുന്നു താമസമെങ്കില്‍ വേദനയുറ്റ ശിക്ഷ നിഷേധികള്‍ക്ക് നാം നല്‍കിയിരുന്നേനെ.

നിഷേധികള്‍ തങ്ങളുടെ മനസ്സുകളില്‍ അജ്ഞതായുഗത്തിന്റെ ദുരാഭിജാത്യം വെച്ചുപുലര്‍ത്തിയ സന്ദര്‍ഭം സ്മരണീയമാണ്. തത്സമയം ദൈവദൂതരിലും സത്യവിശ്വാസികളിലും അല്ലാഹു സമാധാനം വര്‍ഷിക്കുകയും ജീവിതത്തില്‍ സൂക്ഷ്മത പുലര്‍ത്താനുള്ള ഉത്തരവ് സ്വീകരിക്കാന്‍-അതിനേറ്റം അര്‍ഹരും അതിന്റെ അവകാശികളും അവര്‍ തന്നെ- നിര്‍ബന്ധിക്കുകയുമുണ്ടായി. അല്ലാഹു സര്‍വകാര്യവും നന്നായറിയുന്നവനത്രേ.¹⁴
നിങ്ങള്‍-ഇന്‍ശാ അല്ലാഹ്-സമാധാന പൂര്‍വം മസ്ജിദുല്‍ഹറാമില്‍-തല മുണ്ഡനം ചെയ്തും മുടിവെട്ടിയും-പ്രവേശിക്കുകതന്നെ ചെയ്യുമെന്ന് ദൈവദൂതന്‍ ദര്‍ശിച്ച കിനാവ് അവന്‍ സത്യസമേതം സാക്ഷാല്‍ക്കരിക്കുകതന്നെ ചെയ്തു. നിങ്ങളറിയാത്തത് അല്ലാഹു അറിഞ്ഞിരുന്നു. അങ്ങനെ, അതല്ലാത്ത ഏറെ സമീപസ്ഥമായ ഖൈബര്‍ വിജയം കൂടി അവനുണ്ടാക്കി.¹⁵

നേര്‍മാര്‍ഗവും സത്യമതവുമായി തന്റെ ദൂതനെ അയച്ചത് അല്ലാഹുവാണ്- മറ്റെല്ലാ മതങ്ങളെക്കാളും അതിനെ സമുന്നതമാക്കാന്‍. സാക്ഷിയായി അല്ലാഹു തന്നെ ധാരാളം!¹⁶
മുഹമ്മദ് നബി അല്ലാഹുവിന്റെ ദൂതനാകുന്നു; താനൊന്നിച്ചുള്ളവര്‍ നിഷേധികളോട് കര്‍ക്കശമായി വര്‍ത്തിക്കുന്നവരും അവര്‍ പരസ്പരം കാരുണ്യമുള്ളവരുമാണ്. അല്ലാഹുവിന്റെ ഔദാര്യവും സംതൃപ്തിയുമര്‍ത്ഥിച്ചുകൊണ്ട്, കുനിഞ്ഞും സാഷ്ടാംഗം നമിച്ചും-സുജൂദിന്റെ അടയാളം അവരുടെ മുഖങ്ങളിലുണ്ട്-നമസ്‌കരിക്കുന്നതായി താങ്കള്‍ക്കു കാണാം. തൗറാത്തില്‍ ഇപ്രകാരമാണവരുടെ വിശേഷണം. ഇന്‍ജീലില്‍ അവരുടെ ഉപമ ഇങ്ങനെയത്രേ: പുഷ്ടിപ്പെട്ട്, കരുത്തു നേടി കൂമ്പ് വെളിപ്പെടുത്തിയ ഒരു കൃഷി. കര്‍ഷകരെ സന്തുഷ്ടരാക്കും വിധം തണ്ടിന്മേല്‍ അത് നിവര്‍ന്നുനിലകൊണ്ടു.¹⁷
സത്യവിശ്വാസികളെ ഇവ്വിധമാക്കിയത് നിഷേധികളെ രോഷാകുലരാക്കാനാണ്. അവരില്‍ നിന്ന് സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്ക് അല്ലാഹു പാപമോചനവും മഹത്തായ പ്രതിഫലവും വാഗ്ദാനം ചെയ്തിരിക്കുന്നു.¹⁸