അൽ ഹുജുറാത്ത് - الحجرات - Al-Hujurat

സത്യവിശ്വാസികളേ, അല്ലാഹുവിന്റെയും ദൂതരുടെയും സന്നിധിയില്‍ നിങ്ങള്‍ മുന്‍കടക്കാതിരിക്കുക. അല്ലാഹുവിനെ നിങ്ങള്‍ സൂക്ഷിക്കണം; നിശ്ചയം, അവന്‍ നന്നായി കേള്‍ക്കുകയും അറിയുകയും ചെയ്യുന്നവനാണ്.¹
സത്യവിശ്വാസികളേ, നിങ്ങളുടെ ശബ്ദം പ്രവാചകന്റേതിനു മീതെ ഉയര്‍ത്തുകയോ അവിടത്തോട് സംസാരിക്കുമ്പോള്‍-നിങ്ങള്‍ പരസ്പരമെന്ന പോലെ- ഉച്ചത്തില്‍ പറയുകയോ അരുത്-അറിയാതെ നിങ്ങളുടെ പ്രവര്‍ത്തനങ്ങള്‍ ഫലശൂന്യമാകാതിരിക്കാന്‍. നബിസന്നിധിയില്‍ പതുക്കെ സംസാരിക്കുന്നവരുടെ ഹൃദയങ്ങള്‍ സൂക്ഷ്മജീവിതത്തിനായി അല്ലാഹു പരീക്ഷിച്ചെടുത്തതാണ്. അവര്‍ക്ക് പാപമോചനവും മഹത്തായ പ്രതിഫലവുമുണ്ട്.²

മുറികളുടെ പുറത്തുനിന്ന് അങ്ങയെ നീട്ടിവിളിക്കുന്ന മിക്കവരും ചിന്തിച്ചു ഗ്രഹിക്കുന്നില്ല; താങ്കള്‍ പുറത്തിറങ്ങുംവരെ ക്ഷമ കൈക്കൊണ്ടിരുന്നുവെങ്കില്‍ അതാണവര്‍ക്ക് ഉദാത്തം. അല്ലാഹു ഏറെ മാപ്പരുളുന്നവനും കരുണാമയനുമാകുന്നു.³
സത്യവിശ്വാസികളേ, എന്തെങ്കിലും വൃത്താന്തവുമായി ഒരു അധര്‍മകാരി നിങ്ങളെ സമീപിച്ചാല്‍ സ്പഷ്ടമായി അന്വേഷിച്ചറിയണം. അറിയാതെ ഏതെങ്കിലുമൊരു കൂട്ടര്‍ക്ക് നിങ്ങള്‍ അപകടം വരുത്തുകയും തുടര്‍ന്ന് അതിന്റെ പേരില്‍ ദുഃഖിക്കുകയും ചെയ്യാതിരിക്കാനാണിത്.⁴

നിങ്ങള്‍ക്കിടയിലുള്ളത് അല്ലാഹുവിന്റെ ദൂതരാണ് എന്നറിയണം. അവിടന്ന് പലകാര്യങ്ങളിലും നിങ്ങളെയനുസരിക്കുകയാണെങ്കില്‍ നിങ്ങള്‍ക്കത് പ്രയാസകരമാകുമായിരുന്നു.⁵
പക്ഷേ, അല്ലാഹു സത്യവിശ്വാസം നിങ്ങള്‍ക്ക് പ്രിയങ്കരവും ഹൃദയങ്ങളിലലംകൃതവുമാക്കുകയും, അവിശ്വാസവും അധര്‍മവും അനുസരണരാഹിത്യവും അഹിതകരമാക്കുകയും ചെയ്തു. അവര്‍ തന്നെയത്രേ നേര്‍മാര്‍ഗം പ്രാപിച്ചവര്‍. അല്ലാഹുവിങ്കല്‍ നിന്നുള്ള ഔദാര്യവും അനുഗ്രഹവുമാണത്. അവന്‍ എല്ലാം അറിയുന്നവനും യുക്തിമാനുമാകുന്നു.

സത്യവിശ്വാസികളില്‍ നിന്നുള്ള രണ്ടു വിഭാഗങ്ങള്‍ അന്യോന്യം പോരാട്ടം നടത്തുകയാണെങ്കില്‍ നിങ്ങളവര്‍ക്കിടയില്‍ യോജിപ്പുണ്ടാക്കണം. എന്നിട്ട്, രണ്ടിലൊരു കക്ഷി മറുവിഭാഗത്തോട് അതിക്രമം കാട്ടിയാല്‍-അല്ലാഹുവിന്റെ കല്‍പനയിലേക്ക് തിരിച്ചെത്തുംവരെ- ആ അതിക്രമികളോട് നിങ്ങള്‍ അടരാടുക. അവര്‍ മടങ്ങുന്നുവെങ്കില്‍ നീതിയോടെ ഇരുകക്ഷികള്‍ക്കുമിടയില്‍ രഞ്ജിപ്പുണ്ടാക്കുകയും നിങ്ങള്‍ നീതി പുലര്‍ത്തുകയും ചെയ്യുക. നിശ്ചയം, നീതിപാലകരെ അല്ലാഹു ഇഷ്ടപ്പെടുന്നു.⁶
സത്യവിശ്വാസികള്‍ പരസ്പരം സഹോദരങ്ങള്‍ തന്നെയാണ്. അതുകൊണ്ട്, ഇരുസഹോദരങ്ങള്‍ക്കിടയില്‍ നിങ്ങള്‍ രഞ്ജിപ്പുണ്ടാക്കുകയും കരുണ വര്‍ഷിക്കപ്പെടാനായി അല്ലാഹുവിനെ സൂക്ഷിക്കുകയും ചെയ്യുക.

സത്യവിശ്വാസികളേ, ഒരു ജനത മറ്റൊരു ജനതയെ പരിഹസിക്കരുത്; അവര്‍ ഇവരെക്കാള്‍ ശ്രേഷ്ഠരായേക്കാം. ഒരു വനിതാവിഭാഗം മറ്റൊരു വനിതാവിഭാഗത്തെയും കളിയാക്കരുത്; അവര്‍ ഇവരെക്കാള്‍ ഉദാത്തരായേക്കാം. നിങ്ങള്‍ പരസ്പരം കുത്തുവാക്കുകള്‍ പറയാനും പരിഹാസപ്പേരുകള്‍ വിളിച്ച് അപമാനിക്കാനും പാടില്ല. വിശ്വാസം വരിച്ചതില്‍ പിന്നെ ചീത്തപ്പേര് വിളി ഹീനം തന്നെ. ഇങ്ങനെ എന്തെങ്കിലും ചെയ്തിട്ടുണ്ടെങ്കില്‍ പശ്ചാത്തപിക്കാത്തവര്‍ അതിക്രമകാരികള്‍ തന്നെയാകുന്നു.⁷
വിശ്വാസികളേ, മിക്ക ഊഹങ്ങളും നിങ്ങള്‍ വര്‍ജിക്കണം; നിശ്ചയം, അവയില്‍ ചിലത് കുറ്റകരമാകുന്നു. നിങ്ങള്‍ ചാരപ്പണി നടത്തുകയോ പരദൂഷണം പറയുകയോ അരുത്. സ്വസഹോദരന്റെ മൃതദേഹമാംസം ഭുജിക്കാന്‍ നിങ്ങളാരെങ്കിലും ഇഷ്ടപ്പെടുമോ? അത് നിങ്ങള്‍ വെറുക്കുകയാണുണ്ടാവുക. അല്ലാഹുവിനെ നിങ്ങള്‍ സൂക്ഷിക്കണം. നിശ്ചയം, പശ്ചാത്താപ സ്വീകര്‍ത്താവും കരുണാമയനുമാണവന്‍.⁸

ഹേ മര്‍ത്യകുലമേ, ഒരാണിലും പെണ്ണിലും നിന്നാണ് നിങ്ങളെ നാം സൃഷ്ടിച്ചിരിക്കുന്നത്. പരസ്പരം മനസ്സിലാക്കുവാന്‍ നിങ്ങളെ നാം വിവിധ വിഭാഗങ്ങളും ഗോത്രങ്ങളുമാക്കി. അല്ലാഹുവിങ്കല്‍ നിങ്ങളിലെ അത്യാദരണീയന്‍ ഏറ്റം ധര്‍മനിഷ്ഠനത്രേ. അല്ലാഹു എല്ലാം അറിയുന്നവനും സൂക്ഷ്മജ്ഞാനിയുമാണ്.⁹
ഞങ്ങള്‍ വിശ്വസിച്ചിരിക്കുന്നു എന്ന് ഗ്രാമീണവാസികളായ അറബികള്‍ പറയുന്നു. താങ്കള്‍ പ്രതികരിക്കുക: നിങ്ങള്‍ വിശ്വസിച്ചിട്ടില്ല, ഞങ്ങള്‍ കീഴ്‌പെട്ടിരിക്കുന്നു എന്ന് നിങ്ങള്‍ക്കവകാശപ്പെടാം. സത്യവിശ്വാസം നിങ്ങളുടെ ഹൃദയങ്ങളില്‍ കടന്നിട്ടില്ല! അല്ലാഹുവിനും ദൂതന്നും നിങ്ങള്‍ വിധേയരായിത്തീരുന്ന പക്ഷം സ്വകര്‍മഫലങ്ങളില്‍ നിന്ന് യാതൊന്നും നിങ്ങള്‍ക്കവന്‍ കുറവുവരുത്തുകയില്ല. അവന്‍ ഏറെ പൊറുക്കുന്നവനും കരുണാമയനുമാകുന്നു.¹⁰

അല്ലാഹുവിലും ദൂതരിലും വിശ്വാസമര്‍പ്പിക്കുകയും പിന്നെ സന്ദേഹം വെച്ചുപുലര്‍ത്താതിരിക്കുകയും സ്വശരീര-സമ്പത്തുകള്‍ കൊണ്ട് ദൈവമാര്‍ഗത്തില്‍ സമരമനുഷ്ഠിക്കുകയും ചെയ്തവരേ സാക്ഷാല്‍ വിശ്വാസികളാകൂ. അവര്‍ തന്നെയാണ് സത്യസന്ധന്മാര്‍. അങ്ങ് ചോദിക്കുക: സ്വമതത്തെക്കുറിച്ച് അല്ലാഹുവിനെ പഠിപ്പിക്കയാണോ നിങ്ങള്‍? അവനാകട്ടെ, ഭുവന-വാനങ്ങളിലുള്ളതൊക്കെ അറിയുന്നു. സര്‍വ വിഷയങ്ങളെ സംബന്ധിച്ചും അഭിജ്ഞനാണവന്‍.¹¹
തങ്ങളുടെ ഇസ്‌ലാമാശ്ലേഷം അവര്‍ കാണുന്നത് താങ്കളോടുള്ള ദാക്ഷിണ്യമായാണ്. അങ്ങ് പ്രതികരിക്കുക: നിങ്ങളുടെ ഇസ്‌ലാമാശ്ലേഷം എന്നോടുള്ള ദാക്ഷിണ്യമായി കാണേണ്ട; സത്യവിശ്വാസത്തിലേക്ക് നിങ്ങളെ മാര്‍ഗദര്‍ശനം ചെയ്തു എന്നത് അല്ലാഹു നിങ്ങളോടു കാണിച്ച ഔദാര്യമാണ്. സത്യവാന്മാരാണെങ്കില്‍ ഇത് നിങ്ങള്‍ ഗ്രഹിക്കുക. നിശ്ചയം, ഭുവന-വാനങ്ങളിലെ അദൃശ്യം അല്ലാഹു അറിയുന്നു. നിങ്ങളുടെ കര്‍മങ്ങള്‍ കണ്ടുകൊണ്ടിരിക്കുന്നവനാണവന്‍.¹²