ഖാഫ് - ق - Qaf

ഖാഫ്, അതിമഹത്തായ ഈ ഖുര്‍ആന്‍ തന്നെ സത്യം!¹
സ്വന്തത്തില്‍ നിന്നുതന്നെയുള്ള ഒരു മുന്നറിയിപ്പുകാരന്‍ തങ്ങളുടെയടുത്തേക്ക് വന്നതില്‍ അവരാശ്ചര്യപ്പെടുകയും 'അദ്ഭുതകരമായ ഒരു കാര്യം തന്നെയാണിത്, മരിച്ചു മണ്ണായിട്ടാണോ ഒരു പുനരുത്ഥാനമുണ്ടാവുക? അതിവിദൂരമായ ഒരു മടക്കം തന്നെയാണത്' എന്ന് നിഷേധികള്‍ തട്ടിവിടുകയും ചെയ്തു. ഭൂമി അവരില്‍ നിന്ന് എന്തൊക്കെ തിന്നുതീര്‍ക്കുന്നുണ്ടെന്ന് നമുക്കറിയുക തന്നെചെയ്യും. കാര്യങ്ങള്‍ സസൂക്ഷ്മം രേഖപ്പെടുത്തിയ ഒരു പ്രമാണം നമ്മുടെ പക്കലുണ്ട്. അല്ല, സത്യം തങ്ങള്‍ക്കു വന്നെത്തിയപ്പോള്‍ അവരത് നിഷേധിച്ചു തള്ളുകയായിരുന്നു. അങ്ങനെ ഒരു ചഞ്ചലാവസ്ഥയിലാണവര്‍.²

തങ്ങള്‍ക്കു മീതെയുള്ള ആകാശത്തേക്കവര്‍ നോക്കുന്നില്ലേ, ഒരു വിടവുകളുമില്ലാതെ എങ്ങനെയാണ് നാമത് നിര്‍മിച്ചിട്ടുള്ളതും അലങ്കരിച്ചിട്ടുള്ളതുമെന്ന്? ഭൂമിയാകട്ടെ, നാം പ്രവിശാലമാക്കുകയും ദൃഢീകൃത പര്‍വതങ്ങള്‍ അതില്‍ സ്ഥാപിക്കുകയും വശ്യമായ സര്‍വവിധ സസ്യലതാദിജോടികളും മുളപ്പിക്കുകയും ചെയ്തു-സത്യത്തിലേക്കു മടങ്ങുന്ന ഏതൊരടിമക്കും കണ്ടുഗ്രഹിക്കാനും ഓര്‍ക്കാനും വേണ്ടി.

അന്തരീക്ഷത്തില്‍ നിന്നു നാം അനുഗൃഹീത ജലം വര്‍ഷിക്കുകയും തദ്വാരാ വിവിധയിനം തോട്ടങ്ങളും കൊയ്‌തെടുക്കപ്പെടുന്ന ധാന്യങ്ങളും അടുക്കടുക്കായി പഴനിബിഡമായ കുലകള്‍ തൂങ്ങുന്ന നീണ്ടുയര്‍ന്ന ഈന്തമരങ്ങളും മുളപ്പിക്കയുമുണ്ടായി-നമ്മുടെ അടിമകള്‍ക്ക് ഉപജീവനമായത്രേ ഇതെല്ലാം. നിശ്ചേതനമായ ഭൂമി അതുവഴി നാം സചേതനമാക്കി. അങ്ങനെയാണ് ശ്മശാനങ്ങളില്‍ നിന്നുള്ള ബഹിര്‍ഗമനം.³

ഇവര്‍ക്കു മുമ്പ് നൂഹ് നബിയുടെ ജനം, കിണറ്റിന്റെയാളുകള്‍, സമൂദ്-ആദ് ഗോത്രങ്ങള്‍, ഫിര്‍ഔന്‍, ലൂഥ് നബിയുടെയാള്‍ക്കാര്‍, മരക്കൂട്ടനിവാസികള്‍, തുബ്ബഇന്റെ ജനത എന്നിവരെല്ലാം സത്യനിഷേധികളാവുകയും ദൈവദൂതരെ വ്യാജരാക്കുകയും ചെയ്തപ്പോള്‍ എന്റെ മുന്നറിയിപ്പ് സാക്ഷാത്കൃതമായി. അപ്പോള്‍, ആദ്യത്തെ സൃഷ്ടികര്‍മം വഴി നാം പരവശരായിരുന്നുവോ? അല്ല, ഇനിയൊരു നവസൃഷ്ടികര്‍മത്തെക്കുറിച്ച സന്ദേഹത്തിലാണവര്‍!⁴

നിശ്ചയം, മാനവനെ നാം സൃഷ്ടിച്ചുണ്ടാക്കി; അവന്റെ മാനസമന്ത്രങ്ങള്‍ നാമറിയുന്നുണ്ട്; കണ്ഠനാഡിയെക്കാള്‍ അവനുമായി സമീപസ്ഥനാണ് നാം. രണ്ട് സ്വീകര്‍ത്താക്കള്‍ അവന്റെ ഇടത്തും വലത്തുമിരുന്ന് എല്ലാം ഏറ്റുവാങ്ങുന്നത് സ്മരണീയമത്രേ. ഏതൊരു വാക്ക് ഉച്ചരിക്കുമ്പോഴും അവന്റെയടുത്ത് രേഖപ്പെടുത്താനൊരുങ്ങിയ നിരീക്ഷകനുണ്ടാകാതിരിക്കില്ല.⁵
നീ ഒഴിഞ്ഞുമാറി നടന്നിരുന്ന മരണത്തിന്റെ വെപ്രാളം യാഥാര്‍ത്ഥ്യമായി വന്നണയും; കാഹളത്തില്‍ ഊതപ്പെടുന്നതും-അതാണ് താക്കീത് ദിനം- സര്‍വരും സന്നിഹിതരാകുന്നതുമാകുന്നു; കൂടെ ആനയിക്കുന്നവനും സാക്ഷിയുമുണ്ടായിരിക്കും. അരുളപ്പെടും. 'ഇതു സംബന്ധിച്ച അവഗണനയില്‍ തന്നെയായിരുന്നു നീ; ആ മൂടി ഇപ്പോള്‍ നാം അനാവരണം ചെയ്തിരിക്കയാണ്. ഇന്ന് നിന്റെ ദൃഷ്ടിക്ക് നല്ല മൂര്‍ച്ചയുണ്ട്!'.⁶

അവന്റെ കൂട്ടാളി മലക്ക് ബോധിപ്പിക്കും. എന്റെ പക്കല്‍ തയ്യാറുള്ള രേഖയിതാ. ഇരുമാലാഖമാരോടും അല്ലാഹു കല്‍പിക്കും: നന്മ മുടക്കുന്നവനും പരിധി ലംഘിക്കുന്നവനും സംശയാലുവും അല്ലാഹുവൊന്നിച്ച് മറ്റുദൈവത്തെ വരിച്ചവനും നിഷേധിയും അഹങ്കാരിയുമായ സര്‍വരെയും നരകത്തിലെ കഠിനശിക്ഷയിലേക്ക് നിങ്ങളിരുവരും വലിച്ചെറിയുക.⁷
അവന്റെ കൂട്ടാളിപ്പിശാച് ബോധിപ്പിക്കും: ഞങ്ങളുടെ നാഥാ, ഞാനവനെ ദുര്‍മാര്‍ഗത്തിലാക്കിയിട്ടില്ല; പ്രത്യുത, അവന്‍ സ്വയമേവ വിദൂരവഴികേടിലായിരുന്നു. അല്ലാഹു അരുളും: എന്റെ മുമ്പാകെ നിങ്ങള്‍ തര്‍ക്കവിതര്‍ക്കങ്ങള്‍ നടത്തേണ്ട; മുമ്പ് തന്നെ നിങ്ങള്‍ക്കു ഞാന്‍ മുന്നറിയിപ്പ് തന്നിട്ടുണ്ട്. എന്റെയടുത്ത് വാക്ക് മാറ്റപ്പെടുകയോ അടിമകളോട് ഞാന്‍ ഒട്ടുമേ അനീതി കാട്ടുകയോ ചെയ്യില്ല. നീ നിറഞ്ഞുകഴിഞ്ഞുവോ എന്ന് നരകത്തോട് നാം അന്വേഷിക്കുകയും 'ഇനിയും അധികമുണ്ടോ' എന്ന് അത് ചോദിക്കുകയും ചെയ്യുന്ന ദിനമാണതുണ്ടാവുക.⁸

ജീവിതത്തില്‍ സൂക്ഷ്മത പുലര്‍ത്തിയവര്‍ക്ക് ദൂരെയല്ലാതെ സ്വര്‍ഗം സമീപസ്ഥമാക്കപ്പെടുന്നതാണ്. 'നന്നായി ഖേദിച്ചു മടങ്ങുകയും നിയമങ്ങള്‍ കാത്തുസൂക്ഷിക്കുകയും ചെയ്ത -അദൃശ്യതയില്‍ പരമ കാരുണികനെ പേടിക്കുകയും വിനയാന്വിത ഹൃദയവുമായി വരികയും ചെയ്ത- നിങ്ങള്‍ക്കുള്ള വാഗ്ദത്ത സ്വര്‍ഗമിതാ! സമാധാനസമേതം നിങ്ങൡില്‍ പ്രവേശിച്ചുകൊള്ളുക'. ശാശ്വത നിവാസ ദിനമാണത്. തങ്ങളുദ്ദേശിക്കുന്നതെന്തും അവര്‍ക്കവിടെയുണ്ടാകും; നമ്മുടെയടുത്താകട്ടെ കൂടുതല്‍ നല്‍കാനുമുണ്ട്!⁹

ഇവര്‍ക്കുമുമ്പ് എത്രയെത്ര തലമുറകള്‍ നാം സംഹരിച്ചിട്ടുണ്ട്. ഇവരെക്കാള്‍ കടുത്ത ശക്തരായിരുന്നു അവര്‍. എന്നിട്ട് വല്ല സുരക്ഷാതാവളവുമുണ്ടോ എന്ന് പല നാടുകളിലും അവര്‍ കൂലങ്കഷമായന്വേഷിച്ചു. ഹൃദയസാന്നിധ്യമുണ്ടാവുകയോ മനസ്സിരുത്തി ചെവികൊടുത്ത് ശ്രവിക്കുകയോ ചെയ്യുന്നവന്ന് ഇതില്‍ ഉദ്‌ബോധനമുണ്ടെന്ന കാര്യം തീര്‍ച്ച.¹⁰
ഭുവന-വാനങ്ങളും അവയ്ക്കിടയിലുള്ളതും ആറു നാളുകള്‍ക്കകം നാം സൃഷ്ടിച്ചു; യാതൊരു ക്ഷീണവും നമ്മെ ബാധിച്ചിട്ടില്ല. അതുകൊണ്ട്, ആ നിഷേധികളുടെ ജല്‍പനങ്ങളില്‍ താങ്കള്‍ ക്ഷമിക്കുക. സൂര്യോദയത്തിനും അസ്തമനത്തിനും മുമ്പും രാത്രിയും നമസ്‌കാരങ്ങളുടെ ശേഷവും നാഥനെ സ്തുതിക്കുന്നതോടൊപ്പം അവന്റെ മഹത്ത്വപ്രകീര്‍ത്തനം നടത്തുക.¹¹

സമീപസ്ഥമായ ഒരിടത്തു നിന്ന് ഒരു വക്താവ് വിളിച്ചു പറയുന്ന ദിനത്തെക്കുറിച്ച് സശ്രദ്ധം ശ്രവിക്കുക; അതായത്, ആ ഭീകര നാദം സത്യമായും ശ്രവിക്കുന്ന നാള്‍. അതത്രേ ശ്മശാന നിര്‍ഗമന ദിവസം. നിശ്ചയം, നാം ജീവിപ്പിക്കുകയും മരിപ്പിക്കുകയും ചെയ്യും; നമ്മിലേക്കു തന്നെയാണ് മടക്കം. അതായത് അവരെ വിട്ട് ഭൂമി അതിദ്രുതം പിളരുന്ന നാള്‍! നമ്മെ സംബന്ധിച്ച് സുഗമമായൊരു സംഘാടനമാണത്. അവര്‍ ജല്‍പിച്ചു കൊണ്ടിരിക്കുന്നതിനെ കുറിച്ചെല്ലാം നമുക്ക് നന്നായറിയാം. താങ്കളവരില്‍ അധികാരം ചെലുത്തേണ്ടയാളൊന്നുമല്ല. അതുകൊണ്ട് എന്റെ മുന്നറിയിപ്പ് ഭയപ്പെടുന്നവരെ ഈ ഖുര്‍ആന്‍ കൊണ്ട് താങ്കള്‍ ഉദ്‌ബോധിപ്പിക്കുക.