അദ്ദാരിയാത്ത് - الذاريات - Adh-Dhariyat

ശക്തിയായി പൊടിപാറ്റുന്ന കാറ്റുകളും ജലഭാരം പേറുന്ന മേഘങ്ങളും അനായാസമോടുന്ന ജലയാനങ്ങളും ദൈവിക കല്‍പന സൃഷ്ടികളില്‍ വീതിച്ചുകൊടുക്കുന്ന മലക്കുകളും തന്നെ ശപഥം, നിങ്ങള്‍ക്ക് താക്കീതു നല്‍കപ്പെടുന്ന പുനരുത്ഥാനം യാഥാര്‍ത്ഥ്യവും ന്യായവിധി സംഭവ്യവും തന്നെയത്രേ.¹

ബലിഷ്ഠ സുന്ദരമായ ആകാശം തന്നെ സത്യം, നിശ്ചയം നിങ്ങള്‍ ഭിന്നപക്ഷക്കാരായിരിക്കുകയാണ്; ഭ്രഷ്ടരായവര്‍ ആ ഖുര്‍ആനില്‍ നിന്ന് വ്യതിചലിപ്പിക്കപ്പെടുന്നു! അന്ധതയില്‍ മതിമറന്നുകഴിയുന്ന ഊഹക്കാര്‍ അഭിശപ്തരാകട്ടെ. പ്രതിഫലദാന ദിവസം എന്നാണെന്ന് അവര്‍ ചോദിക്കുന്നു. അവര്‍ നരകത്തീയില്‍ പരീക്ഷിക്കപ്പെടുന്ന അന്നുതന്നെയാണത്. 'നിങ്ങളുടെ ഈ ശിക്ഷ അനുഭവിച്ചോളൂ, ധൃതിപ്പെട്ട് നിങ്ങളാവശ്യപ്പെട്ടിരുന്നതാണിത്!'²

നിശ്ചയം, ജീവിതത്തില്‍ സൂക്ഷ്മത പാലിച്ചിരുന്നവര്‍-അവരുടെ നാഥന്‍ കനിഞ്ഞേകിയ ഔദാര്യമേറ്റുവാങ്ങി-സ്വര്‍ഗീയാരാമങ്ങളിലും അരുവികളിലുമായിരിക്കും. നേരത്തെ തന്നെ പുണ്യവാന്മാരായിരുന്നു അവര്‍; രാത്രിയില്‍ നിന്ന് അല്‍പം മാത്രം ഉറങ്ങുകയും അതിന്റെ അന്തിമയാമങ്ങളില്‍ പാപമോചനമര്‍ത്ഥിക്കുകയും ചെയ്യുന്നവരായിരുന്നു. അവരുടെ സ്വത്തുകളിലാകട്ടെ, ചോദിക്കുന്നവനും ഉപജീവനം നിഷേധിക്കപ്പെട്ടവനും ഓഹരിയുണ്ടായിരിക്കും.³

ദൃഢവിശ്വാസികള്‍ക്ക് ഭൂമിയിലും നിങ്ങളില്‍ തന്നെയും വിവിധ ദൃഷ്ടാന്തങ്ങളുണ്ട്; എന്നിട്ട് അവ കണ്ടറിയുന്നില്ലേ നിങ്ങള്‍? വാനലോകത്ത് നിങ്ങളുടെ ഉപജീവനവും വാഗ്ദത്ത വിഷയങ്ങളുമുണ്ട്. അപ്പോള്‍, ആകാശ-ഭൂമിയുടെ നാഥന്‍ തന്നെ ശപഥം, ഇത് നിങ്ങള്‍ സംസാരിക്കുന്നതുപോലെ സത്യമാകുന്നു.⁴

ഇബ്‌റാഹീം നബിയുടെ വിശിഷ്ടാതിഥികളെക്കുറിച്ചുള്ള വൃത്താന്തം താങ്കള്‍ക്ക് ലഭിച്ചുവോ? അവര്‍ തന്റെ സന്നിധിയിലെത്തി സലാം പറഞ്ഞപ്പോള്‍ അദ്ദേഹം പ്രതികരിച്ചു: അല്ലാഹുവിന്റെ രക്ഷ നിങ്ങള്‍ക്കുണ്ടാവട്ടെ, അപരിചിതരാണല്ലോ? അങ്ങനെയദ്ദേഹം വേഗം സഹധര്‍മിണിയുടെയടുത്ത് ചെന്നു. എന്നിട്ട് തടിച്ച കാളക്കുട്ടിയെ പാകം ചെയ്ത് കൊണ്ടുവന്ന് അവരുടെയടുത്തേക്ക് വെച്ച് 'കഴിക്കുകയല്ലേ' എന്ന് ചോദിച്ചു. തത്സമയം അവരെക്കുറിച്ച് അദ്ദേഹത്തിന് അന്തര്‍ഭയമുണ്ടായി. 'താങ്കള്‍ ഭയപ്പെടേണ്ട' എന്ന് അവര്‍ പ്രതികരിക്കുകയും അഭിജ്ഞനായ ഒരാണ്‍കുട്ടിയെപ്പറ്റി അദ്ദേഹത്തിന് ശുഭവാര്‍ത്ത നല്‍കുകയും ചെയ്തു. തത്സമയം തന്റെ സഹധര്‍മിണി ആഹ്ലാദാരവമുയര്‍ത്തി വരികയും വിസ്മയസൂചകമായി മുഖത്തടിച്ച് 'വന്ധ്യയായ കിഴവി പ്രസവിക്കുകയോ' എന്ന് ചോദിക്കയുമുണ്ടായി. ദൂതര്‍ പ്രതികരിച്ചു. അങ്ങനെത്തന്നെയാണ് നിങ്ങളുടെ നാഥന്റെയുത്തരവ്. അവന്‍ യുക്തിമാനും സര്‍വജ്ഞനും തന്നെയാണ്.⁵

ഇബ്‌റാഹീം നബി ചോദിച്ചു: ദൂതരേ, നിങ്ങളെന്താണ് വന്നത്? അവര്‍ മറുപടി നല്‍കി: നിശ്ചയം പാപികളായ ഒരു ജനതയിലേക്ക്-അതിക്രമികള്‍ക്കായി താങ്കളുടെ നാഥങ്കല്‍ മുദ്രിതമായ കളിമണ്‍ശിലകള്‍ അവര്‍ക്കു നേരെ തൊടുത്തുവിടാനായി- നിയുക്തരാണ് ഞങ്ങള്‍.

അങ്ങനെ അവിടെ സത്യവിശ്വാസികളായി ഉണ്ടായിരുന്നവരെയത്രയും നാം പുറത്തുകൊണ്ടുവന്നു; ഒരൊറ്റ മുസ്‌ലിം ഗൃഹമേ അവിടെ കണ്ടെത്തിയുള്ളു. വേദനയുറ്റ പാരത്രിക ശിക്ഷ പേടിക്കുന്നവര്‍ക്കായി അവിടെ ഒരു ദൃഷ്ടാന്തം നാം വിട്ടേക്കുകയും ചെയ്തു.⁶
സ്പഷ്ടമായ പ്രമാണവുമായി മൂസാനബിയെ ഫിര്‍ഔന്റെയടുത്തേക്ക് നാമയച്ചതിലും ചിന്തിക്കാന്‍ വകയുണ്ട്. തത്സമയമവന്‍ തന്റെ സേനാശേഷിയുമായി പിന്തിരിയുകയും മൂസാനബി ആഭിചാരകനോ മാനസികമായി സമനില തെറ്റിയവനോ ആണെന്ന് തട്ടിവിടുകയും ചെയ്തു. അതിനാല്‍ അധിക്ഷേപാര്‍ഹനായിരിക്കെ അവനെയും അവന്റെ സൈന്യങ്ങളെയും നാം പിടികൂടുകയും ചെങ്കടലില്‍ തള്ളുകയുമുണ്ടായി.

ആദ് സമുദായത്തിലുമുണ്ട് ദൃഷ്ടാന്തങ്ങള്‍. കടന്നുപോകുന്ന ഏതൊരു സാധനത്തെയും ദ്രവിപ്പിച്ചു മാത്രം വിടുന്ന വന്ധ്യമായ കാറ്റ് അവര്‍ക്കു നേരെ നാം തിരിച്ചുവിട്ടപ്പോള്‍! സമൂദ് ഗോത്രക്കാരിലുമുണ്ട് ദൃഷ്ടാന്തങ്ങള്‍; ഒരു നിര്‍ണിതവേള വരെ നിങ്ങള്‍ സുഖമനുഭവിച്ചോളൂ എന്ന് അവര്‍ക്ക് മുന്നറിയിപ്പ് നല്‍കപ്പെട്ടപ്പോള്‍! എന്നിട്ട് തങ്ങളുടെ നാഥന്റെ ശാസനകള്‍ക്ക് വിപരീതമായി അവര്‍ ധിക്കാരികളായി. അതിനാല്‍ കണ്ടുകൊണ്ടിരിക്കെത്തന്നെ ആ ഇടിത്തീ അവരെ പിടികൂടി. തത്സമയം എഴുന്നേറ്റ് ഓടിപ്പോകാനോ സ്വന്തം രക്ഷാമാര്‍ഗം നേടാനോ അവര്‍ക്കായില്ല. അതിനുമുമ്പ് നൂഹ് നബിയുടെ ജനത്തെ നാം ഉന്മൂലനം ചെയ്തതിലുമുണ്ട് ദൃഷ്ടാന്തങ്ങള്‍. അധര്‍മകാരികളായ ഒരു ജനപഥം തന്നെയായിരുന്നു അവര്‍.⁷

വന്‍ശേഷി കൊണ്ടാണ് നാം ആകാശം സൃഷ്ടിച്ചത്; നാമത് വികസിപ്പിച്ചുകൊണ്ടിരിക്കുക തന്നെ ചെയ്യും. ഭൂമിയെ നാം വിരിപ്പാക്കി-അങ്ങനെ വിതാനിച്ചവന്‍ എത്ര ഉദാത്തന്‍! ഓരോ വസ്തുവിലും നിന്ന് രണ്ടുവീതം ഇണകളെ-നിങ്ങള്‍ ചിന്തിക്കാന്‍ വേണ്ടി- നാം പടച്ചു.⁸
അതിനാല്‍ അല്ലാഹുവിങ്കലേക്ക് നിങ്ങള്‍ ദ്രുതസഞ്ചാരം നടത്തുക. അവങ്കല്‍ നിന്ന് നിങ്ങളിലേക്കുള്ള സ്പഷ്ടമായ മുന്നറിയിപ്പുകാരനാണ് ഞാന്‍. അല്ലാഹുവൊന്നിച്ച് മറ്റൊരു ദൈവത്തെ നിങ്ങള്‍ വരിക്കരുത്; ഞാന്‍ നിങ്ങളുടെ സന്നിധിയിലേക്ക് അവന്റെയടുത്തുനിന്നുള്ള വ്യക്തമായ താക്കീതുകാരനത്രേ.⁹

അങ്ങയുടെ സ്ഥിതി പോലെത്തന്നെ ഈ ജനത്തിന്റെ പൂര്‍വഗാമികളില്‍ ഏതൊരു ദൂതന്‍ വന്നപ്പോഴും ആഭിചാരകനെന്നോ കിറുക്കനെന്നോ അവര്‍ തട്ടിവിടാതിരുന്നിട്ടില്ല. അങ്ങനെ ജല്‍പിക്കാന്‍ വല്ല പരസ്പര ധാരണയിലുമെത്തിയതാണോ അവര്‍? അല്ല, വഴിതെറ്റിയ ഒരു ജനപഥമാണവര്‍. അതുകൊണ്ട് അങ്ങ് അധിക്ഷേപാര്‍ഹനല്ല, അവരെ വിട്ട് തിരിഞ്ഞുകളയുക! താങ്കള്‍ ഉദ്‌ബോധനം നിര്‍വഹിക്കണം, നിശ്ചയം, സത്യവിശ്വാസികള്‍ക്കത് ഫലദായകമാകുന്നു¹⁰

ജിന്നുകളെയും മാനവരെയും എന്നെ ആരാധിക്കാനായി മാത്രമേ ഞാന്‍ സൃഷ്ടിച്ചിട്ടുള്ളു. അവരില്‍ നിന്ന് ഒരുവിധ ഉപജീവനവും ഞാന്‍ കാംക്ഷിക്കുന്നില്ല; അവര്‍ എന്നെ ആഹരിപ്പിക്കണമെന്നും എനിക്കുദ്ദേശ്യമില്ല. അല്ലാഹു തന്നെയാണ് ഭക്ഷണം നല്‍കുന്നവനും ശക്തിയുള്ളവനും ദാര്‍ഢ്യനും.¹¹

ഇഹലോകത്ത് അതിക്രമം കാട്ടിയവര്‍ക്ക് തങ്ങളുടെ മുന്‍കാല കൂട്ടാളികളുടേതു പോലുള്ള വിഹിതമുണ്ടായിരിക്കും; അതുകൊണ്ട് എന്നോടവര്‍ തത്രപ്പെടേണ്ട. അപ്പോള്‍ തങ്ങള്‍ക്ക് മുന്നറിയിപ്പു നല്‍കപ്പെട്ടിരുന്ന ദിവസം വഴി സത്യനിഷേധികള്‍ക്കു മഹാനാശമാണുണ്ടാവുക!