അൽ അഹ്സാബ് - الأحزاب - Al-Ahzab

ഓ നബീ, അങ്ങ് അല്ലാഹുവിനെ സൂക്ഷിക്കുകയും നിഷേധികളെയും കപടവിശ്വാസികളെയും അനുസരിക്കാതിരിക്കുകയും ചെയ്യുക. നിശ്ചയം, അല്ലാഹു സര്‍വജ്ഞനും യുക്തിമാനുമത്രേ. രക്ഷിതാവിങ്കല്‍ നിന്ന് താങ്കള്‍ക്ക് ബോധനം നല്‍കപ്പെടുന്നത് അനുധാവനം ചെയ്യുക; നിങ്ങളുടെ പ്രവര്‍ത്തനങ്ങളെ പറ്റി സൂക്ഷ്മജ്ഞാനി തന്നെയാണ് അല്ലാഹു. കാര്യങ്ങളൊക്കെ അവനെ ഭരമേല്‍പിക്കുക; സംരക്ഷകനായി അവന്‍ തന്നെ ധാരാളം!

ഒരാളുടെയും അന്തരംഗത്ത് രണ്ട് ഹൃദയങ്ങള്‍ അല്ലാഹു സൃഷ്ടിച്ചിട്ടില്ല.¹
നിങ്ങള്‍ മാതൃതുല്യരായി പ്രഖ്യാപിക്കുന്ന സ്വപത്‌നിമാരെ നിങ്ങളുടെ ഉമ്മമാരോ, ദത്തുപുത്രന്മാരെ നിങ്ങളുടെ മക്കളോ ആക്കിയിട്ടുമില്ല അവന്‍; നിങ്ങളുടെ വായ കൊണ്ടുള്ള ചില പ്രസ്താവനകള്‍ മാത്രമാണത്.²
അല്ലാഹു സത്യം പറയുകയും നേര്‍മാര്‍ഗം കാട്ടുകയും ചെയ്യുന്നു. ആ ദത്തുപുത്രരെ അവരുടെ പിതാക്കളോട് ചേര്‍ത്ത് പറയുക; അല്ലാഹുവിങ്കല്‍ ഏറ്റവും നീതിനിഷ്ഠമായത് അതാണ്. ഇനി, അവരുടെ പിതാക്കള്‍ നിങ്ങള്‍ക്ക് അജ്ഞാതരാണെങ്കില്‍ തന്നെ, അവര്‍ മതത്തില്‍ നിങ്ങളുടെ സഹോദരങ്ങളും മിത്രങ്ങളുമത്രേ. ബോധപൂര്‍വം നിങ്ങള്‍ ചെയ്തതിനെ പറ്റിയാണ് ഇപ്പറഞ്ഞത്, അബദ്ധവശാല്‍ സംഭവിച്ചതില്‍ കുറ്റമില്ല. അല്ലാഹു ഏറെ പൊറുക്കുന്നവനും കരുണാമയനുമാകുന്നു.

സത്യവിശ്വാസികളെ സംബന്ധിച്ചിടത്തോളം സ്വന്തത്തെക്കാല്‍ സമീപസ്ഥരാണ് നബി തിരുമേനി; പ്രവാചക പത്‌നിമാര്‍ അവരുടെ ഉമ്മമാരുമത്രേ. രക്തബന്ധമുള്ളവരാകട്ടെ, ദൈവിക നിയമത്തില്‍ മറ്റു വിശ്വാസികളെക്കാളും മുഹാജിറുകളെക്കാളും പരസ്പരം കൂടുതല്‍ സമീപസ്ഥരാകുന്നു.³
എന്നാല്‍ സ്വന്തം മിത്രങ്ങള്‍ക്ക് എന്തെങ്കിലും ഗുണം ചെയ്യുന്നുവെങ്കില്‍ ഇപ്പറഞ്ഞതില്‍ നിന്ന് അതൊഴിവാണ്. അല്ലാഹുവിന്റെ നിയമത്തില്‍ ഉല്ലേഖിതമാണിത്.⁴

പ്രവാചകന്‍മാരിലും താങ്കളിലും നൂഹ്, ഇബ്‌റാഹീം, മൂസാ, ഈസബ്‌നുമര്‍യം എന്നിവരിലും നിന്ന് നാം ഉടമ്പടി വാങ്ങിയ സന്ദര്‍ഭം സ്മരണീയമത്രേ. ബലിഷ്ഠമായ ഒരു കരാറാണ് അവരുമായി നാം ചെയ്തത്. ആ സത്യവാന്മാരോട് അവരുടെ സത്യസന്ധതയെക്കുറിച്ച് അല്ലാഹുവിന്നു ചോദിക്കാന്‍ വേണ്ടിയത്രേ ഈ കരാര്‍. നിഷേധികള്‍ക്ക് വേദനാജനകമായ ശിക്ഷ അവന്‍ സജ്ജീകരിച്ചിരിക്കുന്നു.⁵

സത്യവിശ്വാസികളേ, അല്ലാഹു നിങ്ങള്‍ക്ക് ചെയ്തുതന്ന മഹാഅനുഗ്രഹം ഓര്‍ക്കുക: നിങ്ങളുടെ സമീപം കുറേ സൈന്യങ്ങള്‍ ആഗതരാവുകയും അപ്പോള്‍ അവര്‍ക്കു നേരെ ഒരു കാറ്റും നിങ്ങള്‍ക്ക് ഗോചരീഭവിക്കാത്ത സൈന്യങ്ങളെയും നാമയക്കുകയും ചെയ്തു -നിങ്ങളുടെ പ്രവര്‍ത്തനങ്ങളെല്ലാം അവന്‍ കണ്ടറിയുന്നുണ്ട്-അതായത്, മേല്‍ഭാഗത്തുകൂടിയും താഴ്ഭാഗത്തുകൂടിയും നിങ്ങളുടെയടുത്ത് അവരെത്തി⁶
കണ്ണുകള്‍ തള്ളിപ്പോവുകയും ഹൃദയങ്ങള്‍ തൊണ്ടകളിലെത്തുകയും അല്ലാഹുവിനെ കുറിച്ച് നിങ്ങള്‍ പലതും വിചാരിക്കുകയും ചെയ്ത ഘട്ടം. സത്യവിശ്വാസികള്‍ തന്മൂലം പരീക്ഷണ വിധേയരാവുകയും കഠിനമായി പ്രകമ്പിതരാവുകയുമുണ്ടായി.⁷

അല്ലാഹുവും റസൂലും നമ്മോടു ചെയ്ത വാഗ്ദാനം കേവലവഞ്ചനയാണെന്ന് കപടവിശ്വാസികളും ഹൃദയങ്ങളില്‍ രോഗമുള്ളവരും തട്ടിവിട്ട സന്ദര്‍ഭം സ്മരണീയമത്രേ. അവരിലൊരു വിഭാഗം വിളംബരം ചെയ്തതും ഓര്‍ക്കുക: 'യസ്‌രിബുകാരേ, നിങ്ങള്‍ക്ക് യാതൊരു നിലനില്‍പുമില്ല, അതുകൊണ്ട് തിരിച്ചു പോയിക്കൊള്ളുക!' മറ്റൊരു കൂട്ടര്‍ 'തങ്ങളുടെ വീടുകള്‍ അരക്ഷിതാവസ്ഥയിലാണെ'ന്ന് പറഞ്ഞ് യുദ്ധരംഗം വിടാന്‍ നബിയോട് അനുമതി തേടുകയാണ്, യഥാര്‍ത്ഥത്തിലവ അരക്ഷിതാവസ്ഥയിലൊന്നുമല്ല, രണാങ്കണത്തില്‍ നിന്ന് പിന്തിരിഞ്ഞോടാന്‍ അവരുദ്ദേശിക്കുന്നു എന്ന് മാത്രം. മദീനയുടെ ഭിന്നദിക്കുകളിലൂടെ ശത്രുസേന ഇവരെ സമീപിക്കുകയും കുഴപ്പമുണ്ടാക്കാനാവശ്യപ്പെടുകയുമായിരുന്നെങ്കില്‍ -പറയത്തക്ക താമസമൊന്നുമില്ലാതെ- അവരത് നിര്‍വഹിച്ചേനെ.⁸

തങ്ങള്‍ പിന്തിരിഞ്ഞു പോകില്ലെന്ന് അല്ലാഹുവിനോട് നേരത്തെ ഉടമ്പടി ചെയ്തിരുന്നു അവര്‍. അവനോട് ചെയ്ത കരാര്‍ ചോദ്യം ചെയ്യപ്പെടുന്നതാകുന്നു. നബീ, പ്രഖ്യാപിക്കുക: മരണത്തിലോ വധത്തിലോ നിന്ന് ഓടിപ്പോകുന്നുവെങ്കില്‍ അതു നിങ്ങള്‍ക്ക് ഫലപ്പെടുന്നതേയല്ല. അതുണ്ടായാല്‍ തന്നെ വളരെക്കുറച്ചുമാത്രം ജീവിത സൗഖ്യമേ നിങ്ങള്‍ക്ക് കിട്ടൂ.⁹
ചോദിക്കുക: നിങ്ങള്‍ക്ക് എന്തെങ്കിലും ദൂഷ്യമേല്‍പിക്കാന്‍ -അല്ലെങ്കില്‍ അനുഗ്രഹമേകാന്‍- അല്ലാഹു ഉദ്ദേശിച്ചിട്ടുണ്ടെങ്കില്‍ അവനില്‍ നിന്ന് നിങ്ങളെയാര് കാത്തുരക്ഷിക്കും? അവനല്ലാതെ യാതൊരു സംരക്ഷകനെയും സഹായിയെയും തങ്ങള്‍ക്കു കണ്ടെത്താന്‍ അവര്‍ക്കാകുന്നതല്ല.¹⁰

നിങ്ങളിലുള്ള പിന്തിരിപ്പന്മാരെയും 'ഞങ്ങളുടെ പക്ഷത്തേക്ക് വരൂ' എന്ന് സ്വന്തക്കാരെ പ്രലോഭിപ്പിക്കുന്നവരെയും അല്ലാഹുവിന്നറിയാം- വളരെ പരിമിതമായേ അവര്‍ യുദ്ധത്തിനെത്തൂ. നിങ്ങളുടെ കാര്യത്തിലവര്‍ ലുബ്ധരായിരിക്കും. യുദ്ധഭീതിയുണ്ടാകുമ്പോള്‍ നബിയേ, താങ്കളെയവര്‍ നോക്കുന്നതുകാണാം, മരണവെപ്രാളത്തില്‍ മോഹാലസ്യമുണ്ടായവനെ പോലെ അവരുടെ നയനങ്ങള്‍ ചുറ്റിത്തിരിയും. എന്നാല്‍ യുദ്ധഭീതി വിട്ടകന്നാലോ, സമരാര്‍ജിത സമ്പത്തില്‍ അത്യാഗ്രഹം വെച്ച് മൂര്‍ച്ചയുള്ള നാക്കുകള്‍ കൊണ്ട് നിങ്ങളെയവര്‍ അലോസരപ്പെടുത്തുന്നതാണ്. ശരിയായ സത്യവിശ്വാസം കൈക്കൊണ്ടിട്ടില്ലെന്നതിനാല്‍ അവരുടെ കര്‍മങ്ങള്‍ അല്ലാഹു ഫലശൂന്യമാക്കിയിരിക്കുന്നു. അവനെ സംബന്ധിച്ച് അത് എളുപ്പമത്രേ.¹¹

സഖ്യകക്ഷികള്‍ പിരിഞ്ഞുപോയിട്ടില്ലെന്നാണ് ഇവരുടെ വിചാരം. ഇനിയുമവര്‍ തിരിച്ചെത്തുകയാണെങ്കില്‍ നിങ്ങളുടെ യുദ്ധവൃത്താന്തങ്ങളന്വേഷിച്ചുകൊണ്ട് ഏതെങ്കിലും ഗ്രാമവാസികളായ അറബികളൊന്നിച്ച് കഴിഞ്ഞുകൂടാനാണ് കപടവിശ്വാസികളാഗ്രഹിക്കുക. പ്രത്യുത, നിങ്ങളൊന്നിച്ചുണ്ടെങ്കില്‍ തന്നെ അത്യപൂര്‍വമായേ അവര്‍ യുദ്ധം ചെയ്യൂ. നിശ്ചയം അല്ലാഹുവിന്റെ ദൂതനില്‍ നിങ്ങള്‍ക്ക്-അല്ലാഹുവിലും അന്ത്യനാളിലും വിശ്വസിക്കുകയും അവനെ ധാരാളം അനുസ്മരിക്കുകയും ചെയ്യുന്നവര്‍ക്ക്-ഉദാത്തമാതൃകയുണ്ട്. സഖ്യകക്ഷികളെ കണ്ടപ്പോള്‍ സത്യവിശ്വാസികള്‍ പ്രതികരിച്ചു: 'അല്ലാഹുവും ദൂതനും നമ്മോട് വാഗ്ദാനം ചെയ്തതാണ് ഇത്; അവനും ദൂതനും പ്രസ്താവിച്ചിട്ടുള്ളത് സത്യമാകുന്നു.' അവര്‍ക്കത് വിശ്വാസവും വിധേയത്വവും വര്‍ധിപ്പിക്കുക മാത്രമേ ചെയ്തുള്ളൂ.¹²

അല്ലാഹുവുമായി ചെയ്ത കരാര്‍ പൂര്‍ത്തീകരിച്ച ചിലയാളുകള്‍ സത്യവിശ്വാസികളിലുണ്ട്. രക്തസാക്ഷിത്വം വരിച്ചവരും അതു കാത്തിരിക്കുന്നവരുമുണ്ട് അവരില്‍. യാതൊരു ഭേദഗതിയും അവര്‍ വരുത്തിയിട്ടില്ല.¹³

സത്യനിഷ്ഠര്‍ക്ക് അവരുടെ സത്യസന്ധതക്കുള്ള പ്രതിഫലം അല്ലാഹു നല്‍കാനും അവനുദ്ദേശിക്കുന്ന പക്ഷം കപടവിശ്വാസികള്‍ക്ക് ശിക്ഷനല്‍കുകയോ പശ്ചാത്താപം സ്വീകരിക്കുകയോ ചെയ്യാനും വേണ്ടിയത്രേ പരീക്ഷണങ്ങള്‍. അവന്‍ ഏറെ പൊറുക്കുന്നവനും കരുണാമയനുമാകുന്നു. സത്യനിഷേധികളെ അവരുടെ ഈര്‍ഷ്യയോടെ -ഒരു നന്മയും നേടാതെ-അല്ലാഹു തിരിച്ചയക്കുകയും സത്യവിശ്വാസികള്‍ക്ക് യുദ്ധത്തിന്റെ ആവശ്യമില്ലാതാക്കുകയും ചെയ്തു. അവന്‍ ശക്തനും പ്രതാപശാലിയുമാകുന്നു.¹⁴
ബഹുദൈവ വിശ്വാസികള്‍ക്ക് പിന്‍ബലമേകിയ വേദക്കാരെ തങ്ങളുടെ കോട്ടകൊത്തളങ്ങളില്‍ നിന്ന് അവന്‍ ഇറക്കിവിടുകയും അവരുടെ മനസ്സുകളില്‍ ഭയം നിക്ഷേപിക്കുകയുമുണ്ടായി. അവരിലൊരു കൂട്ടരെ നിങ്ങള്‍ വധിക്കുകയും മറ്റൊരു കൂട്ടരെ തടവുകാരാക്കുകയും ചെയ്തു; അവരുടെ വീടും പറമ്പും സ്വത്തുകളും, ഇതുവരെ നിങ്ങള്‍ പ്രവേശിച്ചിട്ടില്ലാത്ത ഒരു ഭൂപ്രദേശവും നിങ്ങള്‍ക്കവന്‍ അവകാശപ്പെടുത്തിത്തന്നു. അല്ലാഹു സര്‍വകാര്യങ്ങള്‍ക്കും കഴിവുറ്റവനാകുന്നു.¹⁵

ഓ നബീ, അങ്ങ് സ്വപത്‌നിമാരോട് ഇങ്ങനെ പറയുക: ഐഹിക ജീവിതവും അതിന്റെ അലങ്കാരാര്‍ഭാടങ്ങളുമാണ് നിങ്ങള്‍ ഇച്ഛിക്കുന്നതെങ്കില്‍ വരൂ, നിങ്ങള്‍ക്കു ഞാന്‍ സുഖജീവിത വിഭവങ്ങള്‍ തരികയും ഭംഗിയായി വിമോചിപ്പിച്ചയക്കുകയും ചെയ്യാം. ഇനി, അല്ലാഹുവിനെയും ദൂതനെയും പാരത്രിക ഭവനവുമാണ് നിങ്ങളുദ്ദേശിക്കുന്നത് എങ്കില്‍ സദ്‌വൃത്തരായ നിങ്ങള്‍ക്ക് മഹത്തായ പ്രതിഫലം അല്ലാഹു സജ്ജീകരിച്ചിരിക്കുന്നു.¹⁶

പ്രവാചക സഹധര്‍മിണിമാരേ, നിങ്ങളിലൊരു വ്യക്തി സ്പഷ്ടമായ ഹീനകൃത്യം ചെയ്യുന്നുവെങ്കില്‍ അവള്‍ക്ക് ഇരട്ടി ശിക്ഷയാണ് നല്‍കപ്പെടുക; അല്ലാഹുവിന്നത് സുഗമനടപടിയത്രേ. ഇനി നിങ്ങളിലൊരാള്‍ അല്ലാഹുവിനോടും ദൂതനോടും അനുസരണം കാട്ടുകയും സല്‍കര്‍മമനുഷ്ഠിക്കുകയും ചെയ്യുന്നുവെങ്കില്‍ അവള്‍ക്ക് നാം ഇരട്ടി പ്രതിഫലം കൊടുക്കുകയും ഉദാത്തമായ ഉപജീവനം സജ്ജീകരിക്കുകയും ചെയ്യും. നബിപത്‌നിമാരേ, മറ്റൊരു വനിതയെയും പോലെയല്ല നിങ്ങള്‍; ധര്‍മനിഷ്ഠരാണെങ്കില്‍ അപരരോട് സംസാരിക്കുമ്പോള്‍ നിങ്ങള്‍ വിധേയത്വപ്രകടനം നടത്തരുത്. അങ്ങനെ ചെയ്താല്‍ ഹൃദയത്തില്‍ രോഗമുള്ളവന് ദുര്‍മോഹം ജനിക്കും.¹⁷
നിങ്ങള്‍ ഉദാത്തമായ സംസാരം നടത്തുകയും സ്വഗൃഹങ്ങളില്‍ അടങ്ങിയൊതുങ്ങിക്കഴിയുകയും ചെയ്യുക; പുരാതന അജ്ഞാനയുഗത്തിലേതു പോലുള്ള സൗന്ദര്യപ്രകടനം നടത്തരുത്; മുറപ്രകാരം നമസ്‌കാരമനുഷ്ഠിക്കുകയും സകാത്ത് നല്‍കുകയും അല്ലാഹുവിനെയും ദൂതനെയും അനുസരിക്കുകയും ചെയ്യുക. ഹേ പ്രവാചക ഗൃഹസ്ഥരേ, നിങ്ങളെ മാലിന്യമുക്തരാക്കാനും ശരിയാംവണ്ണം ശുദ്ധീകരിക്കാനുമാണ് അല്ലാഹു ഉദ്ദേശിക്കുന്നത്. സ്വഗൃഹങ്ങളില്‍ പാരായണം ചെയ്യപ്പെടുന്ന ദൈവികസൂക്തങ്ങളും തത്ത്വജ്ഞാനവും നിങ്ങള്‍ അനുസ്മരിക്കുക. അല്ലാഹു ആര്‍ദ്രതയുറ്റവനും സൂക്ഷ്മജ്ഞാനിയുമത്രേ.¹⁸

നിശ്ചയം, അല്ലാഹുവിന് കീഴ്‌പെടുന്നവരായ ആണുങ്ങളും പെണ്ണുങ്ങളും, സത്യവിശ്വാസം കൈക്കൊള്ളുന്ന ആണുങ്ങളും പെണ്ണുങ്ങളും, ആരാധകരായ ആണുങ്ങളും പെണ്ണുങ്ങളും, സത്യസന്ധരായ ആണുങ്ങളും പെണ്ണുങ്ങളും, ക്ഷമാശീലരായ ആണുങ്ങളും പെണ്ണുങ്ങളും, വിനയാന്വിതരായ ആണുങ്ങളും പെണ്ണുങ്ങളും, ധര്‍മിഷ്ഠരായ ആണുങ്ങളും പെണ്ണുങ്ങളും, വ്രതാനുഷ്ഠാനികളായ ആണുങ്ങളും പെണ്ണുങ്ങളും, സ്വന്തം ഗുഹ്യസ്ഥാനങ്ങള്‍ സൂക്ഷിക്കുന്ന ആണുങ്ങളും പെണ്ണുങ്ങളും, അല്ലാഹുവിനെ ധാരാളം സ്മരിക്കുന്ന ആണുങ്ങളും പെണ്ണുങ്ങളും-ഇവര്‍ക്കെല്ലാം പാപമോചനവും വമ്പിച്ച പ്രതിഫലവും അല്ലാഹു സജ്ജീകരിച്ചിരിക്കുന്നു.¹⁹

ഒരു വിഷയത്തില്‍ അല്ലാഹുവും ദൂതനും ഒരു വിധി പ്രസ്താവിച്ചുകഴിഞ്ഞാല്‍, തങ്ങളുടെ കാര്യത്തില്‍ സ്വേച്ഛാനുസൃതമുള്ള മറ്റൊരു തീരുമാനമെടുക്കാന്‍ ഒരു സത്യവിശ്വാസിക്കും വിശ്വാസിനിക്കും പാടില്ല. അവന്നും ദൂതന്നും ആരൊരാള്‍ എതിരു പ്രവര്‍ത്തിക്കുന്നുവോ, അയാള്‍ സ്പഷ്ടമായ മാര്‍ഗഭ്രംശത്തില്‍ നിപതിച്ചുകഴിഞ്ഞു!²⁰

നബീ, താങ്കളും അല്ലാഹുവും അനുഗ്രഹം ചെയ്ത ആ വ്യക്തിയോട് 'സ്വപത്‌നിയെ നീ കൂടെ നിറുത്തുകയും അല്ലാഹുവിനെ സൂക്ഷിക്കുകയും ചെയ്യുക' എന്ന് താങ്കള്‍ നിര്‍ദ്ദേശിച്ച സന്ദര്‍ഭം സ്മരണീയമത്രേ. അല്ലാഹു പ്രത്യക്ഷീഭവിപ്പിക്കാന്‍ പോകുന്ന ഒരു വിഷയം താങ്കള്‍ മനസ്സില്‍ രഹസ്യമാക്കി വെക്കുകയും ആളുകളെ പേടിക്കുകയും ചെയ്യുന്നു. എന്നാല്‍ അങ്ങ് ഭയപ്പെടാന്‍ ഏറ്റം അര്‍ഹന്‍ അല്ലാഹുവത്രേ. അങ്ങനെ സെയ്ദ് അവളില്‍ നിന്ന് ആവശ്യനിര്‍വഹണം നടത്തിക്കഴിഞ്ഞപ്പോള്‍ അവളെ താങ്കള്‍ക്കു നാം വിവാഹം ചെയ്തുതരികയുണ്ടായി. ദത്തുപുത്രന്മാര്‍ അവരുടെ ഭാര്യമാരില്‍ നിന്ന് ആവശ്യനിര്‍വഹണം നടത്തിക്കഴിഞ്ഞാല്‍ അവരെ വേള്‍ക്കുന്നതില്‍ വിശ്വാസികള്‍ക്ക് ഒരുവിധ പ്രയാസവും ഉണ്ടാകാതിരിക്കാനത്രേ ഇത്. അല്ലാഹുവിന്റെ കല്‍പനകള്‍ പ്രയോഗവല്‍കൃതമാകേണ്ടതാകുന്നു.²¹

തനിക്കായി അല്ലാഹു നിയമമാക്കുന്ന കാര്യങ്ങളില്‍ നബിക്ക് ഒരു പ്രയാസവും തോന്നേണ്ടതില്ല. പൂര്‍വഗാമികളില്‍ -അല്ലാഹുവിന്റെ സന്ദേശങ്ങള്‍ പ്രബോധനം ചെയ്യുകയും അവനെ ഭയപ്പെടുകയും അവനല്ലാത്ത മറ്റൊരാളെയും പേടിക്കാതിരിക്കുകയും ചെയ്യുന്നവരില്‍- അവന്‍ നടപ്പാക്കിയിരുന്ന അതേ നടപടിയാണത്. അവന്റെ കല്‍പനകള്‍ ഖണ്ഡിതവിധിയത്രേ.²²

മുഹമ്മദ് നബി നിങ്ങളിലെ പുരുഷന്മാരില്‍ ഒരാളുടെയും പിതാവല്ല, പ്രത്യുത, അല്ലാഹുവിന്റെ ദൂതനും അവസാന പ്രവാചകനുമത്രേ. ഏതു വിഷയത്തെ സംബന്ധിച്ചും നന്നായി അറിയുന്നവനാണ് അല്ലാഹു. സത്യവിശ്വാസികളേ, നിങ്ങള്‍ അല്ലാഹുവിനെ ധാരാളമായി അനുസ്മരിക്കുകയും പ്രഭാത-പ്രദോഷങ്ങളില്‍ അവന്റെ മഹത്ത്വം വാഴ്ത്തുകയും ചെയ്യുക. അന്ധകാരങ്ങളില്‍ നിന്ന് വെളിച്ചത്തിലേക്ക് നയിക്കാന്‍ വേണ്ടി അവനാണ് നിങ്ങള്‍ക്കുമേല്‍ അനുഗ്രഹം വര്‍ഷിക്കുന്നത്; അവന്റെ മാലാഖമാര്‍ പ്രാര്‍ത്ഥിക്കുകയും ചെയ്യുന്നു. അവന്‍ സത്യവിശ്വാസികളോട് ഏറെ ആര്‍ദ്രതയുറ്റവനത്രേ. അവനെ അഭിമുഖീകരിക്കുന്ന നാള്‍ അവരുടെ അഭിവാദനം സലാം ആയിരിക്കും. അവര്‍ക്ക് സമാദരണീയ പ്രതിഫലം അവന്‍ സജ്ജീകരിച്ചിരിക്കുന്നു.²³

ഓ നബീ, നിശ്ചയം താങ്കളെ നാം സത്യസാക്ഷിയും ശുഭവാര്‍ത്താവാഹകനും മുന്നറിയിപ്പുകാരനും അല്ലാഹുവിന്റെ അനുമതിയോടെ അവങ്കലേക്കു ക്ഷണിക്കുന്നയാളും വെളിച്ചം തെളിക്കുന്ന ദീപവുമായി നിയോഗിച്ചിരിക്കുന്നു.²⁴
സത്യവിശ്വാസികള്‍ക്ക് അല്ലാഹുവിങ്കല്‍നിന്ന് മഹത്തായ ഔദാര്യമുണ്ട് എന്ന് ശുഭവാര്‍ത്ത നല്‍കുക. സത്യനിഷേധികളെയും കപടവിശ്വാസികളെയും അങ്ങ് അനുസരിക്കരുത്; അവരുടെ പീഡനങ്ങള്‍ അവഗണിക്കുകയും അല്ലാഹുവില്‍ ഭരമേല്‍പിക്കുകയും ചെയ്യുക. ഭരമേല്‍പിക്കപ്പെടുന്നവനായി അവന്‍തന്നെ ധാരാളം!

സത്യവിശ്വാസികളേ, നിങ്ങള്‍ സത്യവിശ്വാസിനികളെ വിവാഹം ചെയ്യുകയും ഇണചേരുന്നതിന് മുമ്പായി അവരെ മോചനം നടത്തുകയും ചെയ്താല്‍ എണ്ണിത്തിട്ടപ്പെടുത്തിയ ഇദ്ദ ആചരിക്കേണ്ട ബാധ്യത അവര്‍ക്കില്ല. അപ്പോള്‍ അവര്‍ക്കു നിങ്ങള്‍ 'മതാഅ്' നല്‍കുകയും ഭംഗിയായി വിട്ടയക്കുകയും ചെയ്യുക.²⁵

നബീ, താങ്കള്‍ മഹ്‌റ് നല്‍കിയ സഹധര്‍മിണിമാര്‍, അല്ലാഹു യുദ്ധത്തടവുകാരാക്കിത്തന്ന താങ്കളുടെ അടിയാത്തിമാര്‍, താങ്കളൊന്നിച്ച് ഹിജ്‌റ പോന്ന പിതൃവ്യ പുത്രിമാര്‍, പിതൃസഹോദരീപുത്രിമാര്‍, അമ്മാവന്റെ പുത്രിമാര്‍, മാതൃസഹോദരീപുത്രിമാര്‍, ഒരു സത്യവിശ്വാസിനി സ്വദേഹം നബിക്കു സമര്‍പിക്കുന്ന പക്ഷം നബി അവളെ വേള്‍ക്കാനുദ്ദേശിക്കുന്നുവെങ്കില്‍ അത് -ഇത് അങ്ങേക്കുമാത്രമുള്ളതാണ്, മറ്റു വിശ്വാസികള്‍ക്കില്ല- എന്നിവരെ താങ്കള്‍ക്കു നാം അനുവദിച്ചു തന്നിരിക്കുന്നു.²⁶
വിശ്വാസികളുടെ സഹധര്‍മിണിമാരുടെയും അടിയാത്തികളുടെയും കാര്യത്തില്‍ നിയമനിര്‍മാണം നടത്തിയതിനെ പറ്റി നമുക്കറിയാം -താങ്കള്‍ക്ക് ഒരുവിധ പ്രയാസവും ഇല്ലാതിരിക്കാനാണിത്. അല്ലാഹു ധാരാളമായി പൊറുക്കുന്നവനും കരുണാമയനുമാകുന്നു. ഇവരില്‍ താങ്കള്‍ ഉദ്ദേശിക്കുന്നവരെ മാറ്റി നിറുത്തുകയോ സഹവസിപ്പിക്കുകയോ ആവാം. മാറ്റിനിറുത്തിയിരുന്നവരില്‍ നിന്ന് ആരെയെങ്കിലും സഹവസിപ്പിക്കുവാനാഗ്രഹമുണ്ടെങ്കില്‍ അതിനും കുഴപ്പമില്ല- അവര്‍ ആഹ്ലാദഭരിതരാകാനും സങ്കടപ്പെടാതിരിക്കാനും താങ്കള്‍ നല്‍കുന്നതില്‍ സംതൃപ്തി പൂണ്ടവരാകാനും നല്ല രീതിയതാണ്. അല്ലാഹു നിങ്ങളുടെ ഹൃദയങ്ങളിലുള്ളത് അറിയും; അവന്‍ സര്‍വജ്ഞനും സഹിഷ്ണുവും ആകുന്നു.²⁷
ഇനിമേല്‍, വേറെ വിവാഹം ചെയ്യാനോ ഇവര്‍ക്കു പകരം വേറെ പത്‌നിമാരെ -അവരുടെ സൗന്ദര്യം ആകര്‍ഷിച്ചാലും- സ്വീകരിക്കാനോ താങ്കള്‍ക്ക് അനുവാദമില്ല; എന്നാല്‍ അടിയാത്തികള്‍ ഇതില്‍നിന്നൊഴിവാണ്. ഓരോ കാര്യവും സൂക്ഷ്മ നിരീക്ഷണം നടത്തുന്നവനാണ് അല്ലാഹു.²⁸

സത്യവിശ്വാസികളേ, നബിയുടെ വീടുകളില്‍ അനുമതി കൂടാതെ നിങ്ങള്‍ പ്രവേശിക്കരുത്; ഭക്ഷണത്തിന് ക്ഷണിക്കപ്പെട്ടാലല്ലാതെ. അപ്പോള്‍ തന്നെ അത് പാകമാകുന്നതു നോക്കി ചടഞ്ഞുകൂടരുത്. എന്നാല്‍, വിളിക്കപ്പെടുകയാണെങ്കില്‍ കടന്നുചെല്ലുക; ആഹരിച്ചു കഴിഞ്ഞാല്‍ പിരിഞ്ഞുപോവുകയും വേണം; സംസാരിച്ചു വിനോദിച്ചിരിക്കരുത്- ഇതൊക്കെ നബിയെ അലോസരപ്പെടുത്തുന്നതാണ്. എന്നാല്‍ നബി നിങ്ങളോട് ഇതുണര്‍ത്താന്‍ ലജ്ജിക്കും. സത്യം തുറന്നുവ്യക്തമാക്കാന്‍ അല്ലാഹുവിന് സങ്കോചമില്ല.²⁹
ഇനി, പ്രവാചക പത്‌നിമാരോട് നിങ്ങളെന്തെങ്കിലും ആവശ്യപ്പെടുകയാണെങ്കില്‍ മറയുടെ പിന്നില്‍ നിന്ന് ചോദിക്കണം. അതാണ് നിങ്ങളുടെയും അവരുടെയും ഹൃദയങ്ങള്‍ക്ക് ഏറെ സംശുദ്ധമായിട്ടുള്ളത്. അവിടത്തെ പ്രയാസപ്പെടുത്താനോ നിര്യാണാനന്തരം നബിയുടെ സഹധര്‍മിണിമാരെ ഒരിക്കലും വേള്‍ക്കാനോ നിങ്ങള്‍ക്കു പാടില്ലാത്തതാണ്. ഇതൊക്കെ അല്ലാഹുവിങ്കല്‍ ഗുരുതരമായ പാതകമത്രേ. എന്തെങ്കിലും വിഷയം നിങ്ങള്‍ വെളിപ്പെടുത്തുകയോ ഗോപ്യമാക്കുകയോ ചെയ്താലും ശരി, നിശ്ചയം, അല്ലാഹു ഏതുകാര്യവും സൂക്ഷ്മമായി അറിയുന്നവനാകുന്നു.

എന്നാല്‍ അവര്‍ക്ക് സ്വന്തം പിതാക്കള്‍, പുത്രന്മാര്‍, സഹോദരങ്ങള്‍, സഹോദര-സഹോദരീ പുത്രന്മാര്‍, തങ്ങളുടെ സ്ത്രീകള്‍, സ്വന്തം അടിമകള്‍ എന്നിവരെ കാണുന്നതിന് തെറ്റില്ല. അല്ലാഹുവിനെ നിങ്ങള്‍ സൂക്ഷിക്കണം; എല്ലാ കാര്യങ്ങള്‍ക്കും സന്നിഹിതനാണവന്‍.³⁰
നബിയുടെ മേല്‍ അല്ലാഹു അനുഗ്രഹം വര്‍ഷിക്കുന്നു, മലക്കുകള്‍ പ്രാര്‍ത്ഥിക്കുന്നു; സത്യവിശ്വാസികളേ, നബിക്ക് അനുഗ്രഹ-സമാധാന വര്‍ഷത്തിനായി നിങ്ങളും പ്രാര്‍ത്ഥിക്കുക.³¹
അല്ലാഹുവിനെയും ദൂതനെയും അലോസരപ്പെടുത്തുന്നവരെ ഐഹിക-പാരത്രിക ലോകത്ത് അല്ലാഹു ശപിക്കുകയും ഹീനമായ ശിക്ഷ അവര്‍ക്ക് സജ്ജീകരിക്കുകയും ചെയ്തിരിക്കുന്നു. സത്യവിശ്വാസികളായ സ്ത്രീപുരുഷന്മാരെ അവരനുവര്‍ത്തിക്കാത്ത കുറ്റത്തിന്റെ പേരില്‍ പീഡിപ്പിക്കുന്നവര്‍ ആരോ, അപവാദവും സ്പഷ്ടമായ പാപവും വഹിച്ചിരിക്കുകയാണവര്‍.

നബീ, സ്വപത്‌നിമാരോടും പുത്രിമാരോടും സത്യവിശ്വാസിനികളായ വനിതകളോടും തങ്ങളുടെ മൂടുപടങ്ങള്‍ താഴ്ത്തിയിടാന്‍ അങ്ങ് അനുശാസിക്കുക; തിരിച്ചറിയപ്പെടാനും അലോസരം ചെയ്യപ്പെടാതിരിക്കാനും അവര്‍ക്കതാണ് ഏറ്റം അനുയോജ്യം. ഏറെ പൊറുക്കുന്നവനും കരുണാമയനുമാണ് അല്ലാഹു.³²

കപടവിശ്വാസികളും ഹൃദയങ്ങളില്‍ രോഗമുള്ളവരും നുണപ്രചരണത്തിലൂടെ മദീനയില്‍ കുഴപ്പമുണ്ടാക്കുന്നവരും പിന്തിരിപ്പന്‍പണി നിറുത്തുന്നില്ലെങ്കില്‍ അവരെ തുരത്തിവിടാന്‍ താങ്കളെ നാം ചുമതലപ്പെടുത്തുക തന്നെ ചെയ്യും; പിന്നെ വളരെ കുറച്ചുമാത്രമേ നിങ്ങളൊന്നിച്ചു കഴിയാന്‍ അവര്‍ക്ക് സാധിക്കുകയുള്ളൂ. എവിടെ കാണപ്പെട്ടാലും പിടിക്കപ്പെടുകയും നിര്‍ദ്ദയം കൊന്നൊടുക്കപ്പെടുകയും ചെയ്യുന്ന അഭിശപ്തരാകും അവര്‍. പൂര്‍വികരുടെ കാര്യത്തില്‍ അല്ലാഹു സ്വീകരിച്ച അതേ നടപടിയാണിത്; അവന്റെ രീതികള്‍ക്ക് യാതൊരു മാറ്റവും താങ്കള്‍ കണ്ടെത്തുന്നതല്ല.³³

അന്ത്യനാളിനെക്കുറിച്ച് അങ്ങയോടവര്‍ ചോദിക്കുന്നു. അതു സംബന്ധിച്ച ജ്ഞാനം അല്ലാഹുവിങ്കല്‍ മാത്രമാണെന്ന് പ്രതികരിക്കുക. ഒരുവേള സമീപസ്ഥമായിരിക്കാം അത്- താങ്കളെന്തറിഞ്ഞു! നിശ്ചയം, സത്യനിഷേധികളെ അല്ലാഹു ശപിക്കുകയും കത്തിജ്ജ്വലിക്കുന്ന നരകം അവര്‍ക്കായി സജ്ജീകരിക്കുകയും ചെയ്തിരിക്കുന്നു. അവരതില്‍ ശാശ്വത വാസികളായിരിക്കുന്നതാണ്. ഒരുവിധ സംരക്ഷകനെയും സഹായിയെയും അവര്‍ക്ക് കണ്ടെത്താനാവില്ല.
തങ്ങള്‍ അല്ലാഹുവിനെയും ദൂതനെയും അനുസരിച്ചിരുന്നുവെങ്കില്‍ എത്ര നന്നായിരുന്നുവെന്ന്, തങ്ങളുടെ മുഖങ്ങള്‍ നരകത്തില്‍ കീഴ്‌മേല്‍ മറിച്ചിടപ്പെടുന്ന നാളില്‍ അവര്‍ കേഴുന്നതും ഇങ്ങനെ പരിതപിക്കുന്നതുമാണ്: നാഥാ, ഞങ്ങള്‍ നേതാക്കന്മാരെയും ആഢ്യന്മാരെയും അനുസരിക്കുകയും അവര്‍ ഞങ്ങളെ ദുര്‍മാര്‍ഗത്തിലാക്കുകയുമാണുണ്ടായത്; നാഥാ, അവര്‍ക്ക് നീ ഇരട്ടിശിക്ഷ നല്‍കുകയും ശാപം ചൊരിയുകയും ചെയ്യേണമേ.³⁴

സത്യവിശ്വാസികളേ, നിങ്ങള്‍ മൂസാനബിയെ പീഡിപ്പിച്ചവരെ പോലെയാകരുത്. അങ്ങനെ അവരുടെ ജല്‍പനങ്ങളില്‍ നിന്ന് അദ്ദേഹത്തെയവന്‍ വിമുക്തനാക്കുകയുണ്ടായി.³⁵
അല്ലാഹുവിങ്കല്‍ അദ്ദേഹം ഉല്‍കൃഷ്ടനാകുന്നു. സത്യവിശ്വാസികളേ, നിങ്ങള്‍ അല്ലാഹുവിനെ സൂക്ഷിക്കുകയും സത്യസന്ധമായി സംസാരിക്കുകയും ചെയ്യുക. എന്നാല്‍ അവന്‍ നിങ്ങളുടെ കര്‍മങ്ങള്‍ നന്നാക്കുകയും ദോഷങ്ങള്‍ പൊറുത്തുതരികയും ചെയ്യും. അല്ലാഹുവിനെയും ദൂതനെയും ആര് അനുസരിക്കുന്നുവോ അവര്‍ മഹത്തായ വിജയം കൈവരിക്കുക തന്നെ ചെയ്തു.³⁶

ഭുവന-വാനങ്ങള്‍ക്കും പര്‍വതങ്ങള്‍ക്കും മുമ്പാകെ ആ വിശ്വസ്ത ദൗത്യ നിര്‍വഹണച്ചുമതല നാം അവതരിപ്പിച്ചു. എന്നാല്‍ അതിനെപ്പറ്റി അവ ഭയപ്പെടുകയും ഏറ്റെടുക്കാന്‍ വിസമ്മതിക്കുകയുമാണുണ്ടായത്. എന്നാല്‍ മനുഷ്യന്‍ അതേറ്റെടുത്തു. അവന്‍ വലിയ അതിക്രമിയും വിവേകശൂന്യനുമായിരിക്കുന്നു!³⁷
കപടവിശ്വാസവും ബഹുദൈവത്വവും സ്വീകരിച്ച സ്ത്രീ-പുരുഷന്മാരെ അല്ലാഹു ശിക്ഷിക്കാന്‍ വേണ്ടിയും സത്യവിശ്വാസികളായ സ്ത്രീ-പുരുഷന്മാരുടെ പശ്ചാത്താപം അവന്‍ സ്വീകരിക്കുന്നതിനുവേണ്ടിയുമത്രേ ഇത്. വളരെയധികം മാപ്പരുളുന്നവനും കരുണാവാരിധിയുമത്രേ അവന്‍.³⁸