അസ്സജ്ദ - السجدة - As-Sajdah

അലിഫ് ലാം മീം. ഈ വേദത്തിന്റെ അവതരണം നിസ്സംശയം സര്‍വലോക പരിപാലകനില്‍ നിന്നാകുന്നു. അതല്ല, ഇത് നബി കെട്ടിച്ചമച്ചു എന്നാണോ നിഷേധികള്‍ ജല്‍പിക്കുന്നത്? അല്ല, താങ്കളുടെ നാഥങ്കല്‍ നിന്നുള്ള സത്യമത്രേ ഇത്-മുമ്പ് ഒരു മുന്നറിയിപ്പുകാരനും സമാഗതമായിട്ടില്ലാത്ത ജനപഥത്തിന്ന് അങ്ങ് താക്കീത് നല്‍കാന്‍വേണ്ടി. അവര്‍ നേര്‍മാര്‍ഗത്തില്‍ എത്തിച്ചേര്‍ന്നുവെങ്കിലോ.¹

ഭുവന-വാനങ്ങളും അവക്കിടയിലുള്ളതും ആറു നാള്‍ കൊണ്ട് സൃഷ്ടിച്ചവനാണ് അല്ലാഹു. പിന്നീടവന്‍ അര്‍ശിന്മേല്‍ ആധിപത്യം ചെലുത്തി. അവനല്ലാതെ യാതൊരു രക്ഷകനും ശുപാര്‍ശകനും നിങ്ങള്‍ക്കില്ല. ഇനിയും ചിന്തിച്ചു ഗ്രഹിക്കുന്നില്ലേ നിങ്ങള്‍?²
ആകാശത്തുനിന്ന് ഭൂമിയിലേക്ക് കാര്യങ്ങള്‍ നിയന്ത്രിച്ചെത്തിക്കുന്നത് അവനാണ്. പിന്നീട് -നിങ്ങളുടെ ഗണനാനുസൃതം ആയിരം വര്‍ഷമുള്ള- ഒരു ദിവസത്തിനകം അതവങ്കലേക്ക് ആരോഹണം ചെയ്തുപോകുന്നു³
ദൃശ്യവും അദൃശ്യവുമറിയുന്ന പ്രതാപശാലിയും കരുണാമയനുമാണവന്‍; താന്‍ പടച്ച സമസ്ത വസ്തുക്കളെയും മെച്ചപ്പെടുത്തിയവന്‍. മാനവന്റെ സൃഷ്ടിപ്പ് അവന്‍ കളിമണ്ണില്‍ നിന്ന് ആരംഭിക്കുകയും പിന്നീട് അവന്റെ സന്തതിയെ ഒരു നിസ്സാര ദ്രവത്തിന്റെ സത്തയില്‍ നിന്ന് പടക്കുകയും പിന്നെ അവനെ ശരിയായ രൂപത്തിലാക്കുകയും തന്റെ ആത്മാവ് അവനില്‍ നിക്ഷേപിക്കുകയുമുണ്ടായി. അവന്‍ നിങ്ങള്‍ക്ക് കേള്‍വിയും കാഴ്ചയും ഹൃദയങ്ങളും സൃഷ്ടിച്ചു തന്നു. വളരെ തുച്ഛമായേ നിങ്ങള്‍ കൃതജ്ഞത പ്രകാശിപ്പിക്കുന്നുള്ളൂ.⁴

മണ്‍മറഞ്ഞുപോയാലും ഞങ്ങള്‍ പുതുതായി സൃഷ്ടിക്കപ്പെടുമെന്നോ എന്ന് നിഷേധികള്‍ ചോദിച്ചു. വസ്തുതയതല്ല, തങ്ങളുടെ നാഥനുമായുള്ള കൂടിക്കാഴ്ച തള്ളിപ്പറയുന്നവരാണവര്‍. നബീ, പ്രതികരിക്കുക: നിങ്ങളുടെ കാര്യം ഏല്‍പിക്കപ്പെട്ട മരണത്തിന്റെ മലക്ക് നിങ്ങളെ മരിപ്പിക്കുന്നതും ശേഷം നാഥങ്കലേക്ക് നിങ്ങള്‍ മടക്കപ്പെടുന്നതുമാകുന്നു. 'നാഥാ, ഞങ്ങള്‍ സത്യം കാണുകയും കേള്‍ക്കുകയും ചെയ്തു; അതിനാല്‍ ദുന്‍യാവിലേക്ക് ഞങ്ങളെ തിരിച്ചയച്ചു തരേണമേ; എങ്കില്‍ ഞങ്ങള്‍ നന്മയനുവര്‍ത്തിച്ചുകൊള്ളാം; ഇപ്പോള്‍ ഞങ്ങള്‍ വിശ്വാസ ദാര്‍ഢ്യമുള്ളവരായിരിക്കുന്നു' എന്ന് നാഥന്റെ സന്നിധിയില്‍ നമ്രഃശിരസ്‌കരായിക്കൊണ്ട് അധര്‍മകാരികള്‍ പരിഭവിക്കുന്ന സന്ദര്‍ഭം താങ്കള്‍ കാണുകയാണെങ്കില്‍ (അതൊരു ഭീകരദൃശ്യം തന്നെയായിരിക്കും). ഉദ്ദേശിച്ചിരുന്നുവെങ്കില്‍ നാം ഓരോ വ്യക്തിയെയും സന്മാര്‍ഗദര്‍ശനം ചെയ്തിരുന്നു; പക്ഷേ, 'മനുഷ്യ-ജിന്ന് വര്‍ഗങ്ങളെക്കൊണ്ട് നരകം ഞാന്‍ നിറക്കുക തന്നെ ചെയ്യും' എന്ന വാക്ക് എന്നില്‍ നിന്ന് കടപ്പെട്ടുകഴിഞ്ഞിട്ടുണ്ട്.⁵
അതുകൊണ്ട് ഇങ്ങനെയൊരു ദിവസത്തെ കണ്ടുമുട്ടുമെന്ന വസ്തുത വിസ്മരിച്ചു കളഞ്ഞതിന്റെ ശിക്ഷ അനുഭവിച്ചോളൂ. നിങ്ങളെ നാം വിസ്മൃതതുല്യരാക്കിയിരിക്കുന്നു. സ്വയംകൃതാനര്‍ത്ഥങ്ങളുടെ ഫലമായി നിങ്ങള്‍ ശാശ്വതശിക്ഷ ആസ്വദിച്ചുകൊള്ളുക.

നിശ്ചയം നമ്മുടെ സൂക്തങ്ങളില്‍ ഇവര്‍ മാത്രമേ വിശ്വാസമര്‍പിക്കൂ: അവ മുഖേന ഉദ്‌ബോധിപ്പിക്കപ്പെട്ടാല്‍ അവര്‍ സാഷ്ടാംഗ പ്രണാമത്തില്‍ വീഴുന്നതും തങ്ങളുടെ നാഥനെ സ്തുതിച്ചു പ്രകീര്‍ത്തിക്കുന്നതുമാണ്; അഹങ്കാരികളാവില്ല. ആശയിലും ആശങ്കയിലുമായി നാഥനോടു പ്രാര്‍ത്ഥിക്കാന്‍ വേണ്ടി അവര്‍ നിദ്രാസ്ഥലങ്ങള്‍ വിട്ടുപോവുകയും നാം നല്‍കിയതില്‍ നിന്ന് ചെലവഴിക്കുകയും ചെയ്യും. തങ്ങളനുവര്‍ത്തിച്ചിരുന്ന സല്‍കര്‍മങ്ങള്‍ക്കുള്ള പ്രതിഫലമായി ആഹ്‌ളാദ ജനകമായ എന്തൊക്കെയാണ് രഹസ്യമായി അവര്‍ക്കവിടെ സജ്ജീകരിക്കപ്പെട്ടിട്ടുള്ളത് എന്ന് ഒരാള്‍ക്കുമറിയില്ല. സത്യവിശ്വാസിയായിക്കഴിഞ്ഞ ഒരാള്‍ അധര്‍മകാരിയെ പോലെയാണോ? അവര്‍ സമന്മാരാകുന്നതേയല്ല!⁶

സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ ആരോ, അവര്‍ക്ക് തങ്ങളുടെ കര്‍മഫലമായുള്ള ആതിഥ്യമായി ആവാസത്തിനുള്ള സ്വര്‍ഗീയാരാമങ്ങളുണ്ട്. എന്നാല്‍ അധര്‍മകാരികളുടെ നിവാസസ്ഥലം നരകമാണ്; അതില്‍ നിന്നു പുറത്തുവരാന്‍ വിചാരിക്കുമ്പോഴൊക്കെയും അകത്തേക്കുതന്നെ അവര്‍ തിരിച്ചയക്കപ്പെടുന്നതും 'നിങ്ങള്‍ വ്യാജമാക്കിത്തള്ളിയിരുന്ന ആ നരകശിക്ഷ ആസ്വദിച്ചുകൊള്ളുക' എന്ന് പറയപ്പെടുന്നതുമാണ്. ഈ ഗുരുതര ശിക്ഷ കൂടാതെ-പാപങ്ങളില്‍ നിന്ന് മടങ്ങാന്‍ വേണ്ടി-അവര്‍ക്ക് ചെറിയ ഐഹിക ശിക്ഷകളും നാം ആസ്വദിപ്പിക്കും.⁷
തന്റെ നാഥന്റെ സൂക്തങ്ങള്‍ കൊണ്ട് ഉദ്‌ബോധിപ്പിക്കപ്പെട്ടിട്ടും പിന്തിരിഞ്ഞുപോകുന്നവനെക്കാള്‍ വലിയ അക്രമി ആരുണ്ട്? അധര്‍മകാരികളോട് നാം പ്രതികാരമെടുക്കുക തന്നെ ചെയ്യും, തീര്‍ച്ച.⁸

നിശ്ചയം മൂസാനബിക്കു നാം വേദം നല്‍കുകയും ഇസ്രയേല്യര്‍ക്കത് മാര്‍ഗദര്‍ശകമാക്കുകയും ചെയ്തിട്ടുണ്ട്; അതുകൊണ്ട് ഈ വേദലബ്ധിയില്‍ താങ്കള്‍ ഒട്ടും സംശയാലുവാകേണ്ടതില്ല (ഇത് താങ്കളുടെ ഉമ്മത്തിന് മാര്‍ഗദര്‍ശകമത്രേ)⁹
ഇസ്രയേല്യര്‍ ക്ഷമാശീലരാവുകയും നമ്മുടെ ദൃഷ്ടാന്തങ്ങളില്‍ ദൃഢവിശ്വാസം പുലര്‍ത്തുന്നവരാവുകയും ചെയ്തപ്പോള്‍ നമ്മുടെ ശാസനാനുസൃതം നേര്‍വഴി കാട്ടിക്കൊടുക്കുന്ന നായകരെ അവരില്‍ നിന്ന് നാം നിശ്ചയിക്കുകയുമുണ്ടായി. അവര്‍ വ്യത്യസ്താഭിപ്രായക്കാരായിരുന്ന കാര്യങ്ങളില്‍ താങ്കളുടെ നാഥന്‍ പുനരുത്ഥാനദിനം അവര്‍ക്കിടയില്‍ വിധികല്‍പിക്കുക തന്നെ ചെയ്യും.¹⁰

എത്രയോ ജനപഥങ്ങളെ മുമ്പ് നാം സംഹരിച്ചുകളഞ്ഞിട്ടുണ്ടെന്ന ചരിത്രയാഥാര്‍ത്ഥ്യം ഇവര്‍ക്ക് നേര്‍മാര്‍ഗം കാണിച്ചുകൊടുക്കുന്നില്ലേ? അവരുടെ ആവാസകേന്ദ്രങ്ങളിലൂടെയാണിവര്‍ യാത്രചെയ്യുന്നത്. അതില്‍ ദൃഷ്ടാന്തങ്ങളുണ്ട്, തീര്‍ച്ച. എന്നിട്ടും ഈ സൂക്തങ്ങളൊന്നും ഇവര്‍ ശ്രവിക്കുന്നില്ലേ?¹¹
ഇക്കൂട്ടര്‍ ഇത് ചിന്തിക്കുന്നില്ലേ: ഉണങ്ങിവരണ്ട ഭൂമിയിലേക്ക് നാം മഴവെള്ളമെത്തിക്കുകയും അതുമുഖേന ഇവരുടെ കാലികളും ഇവര്‍ തന്നെയും ആഹരിക്കുന്ന കൃഷിയുല്‍പാദിപ്പിക്കുകയും ചെയ്യുന്നു. ഇതൊന്നുമിവര്‍ കണ്ടറിയുന്നില്ലേ?¹²

സത്യവാദികളാണെങ്കില്‍ നിങ്ങളുടെ വാദപ്രകാരമുള്ള ദൈവികവിജയത്തിന്റെ തീരുമാനം എപ്പോഴാണുണ്ടാവുക എന്നാണ് നിഷേധികളുടെ പരിഹാസച്ചോദ്യം. താങ്കള്‍ പ്രതികരിക്കുക: ആ വിജയവിധിയുടെ നാളില്‍ സത്യനിഷേധികള്‍ക്ക് അവരുടെ വിശ്വാസം ഫലപ്രദമാകുന്നതല്ല; അവധി നല്‍കപ്പെടുന്നവരുമാകില്ല അവര്‍.¹³
അതുകൊണ്ട് അവരെ താങ്കള്‍ അവഗണിക്കുകയും വിജയാഗമം പ്രതീക്ഷിക്കുകയും ചെയ്യുക. നിശ്ചയം, അവരും (അങ്ങയുടെയും അനുയായികളുടെയും നാശം) പ്രതീക്ഷിച്ചിരിക്കുകയാകുന്നു.¹⁴