ലുഖ്മാൻ - لقمان - Luqman

അലിഫ് ലാം മീം. സാരസമ്പൂര്‍ണമായ ദിവ്യഗ്രന്ഥത്തിലെ സൂക്തങ്ങളത്രേ ഇവ. കൃത്യനിഷ്ഠയോടെ നമസ്‌കാരം നിര്‍വഹിക്കുകയും നിര്‍ബന്ധദാനം കൊടുത്തുവീട്ടുകയും പാരത്രിക ജീവിതത്തില്‍ ദൃഢമായി വിശ്വസിക്കുകയും ചെയ്യുന്ന പുണ്യവാന്മാര്‍ക്കു സന്മാര്‍ഗ ദര്‍ശനവും അനുഗ്രഹവുമത്രേ ഇത്. തങ്ങളുടെ നാഥങ്കല്‍ നിന്നുള്ള നേര്‍മാര്‍ഗത്തിലാണവര്‍. അവര്‍ തന്നെയാണ് ജേതാക്കള്‍.¹

യാതൊരറിവുമില്ലാതെ, അല്ലാഹുവിന്റെ മാര്‍ഗത്തില്‍ നിന്ന് ജനങ്ങളെ ഭ്രഷ്ടരാക്കാനും അതിനെ പരിഹാസ പാത്രമാക്കാനുമായി വിലകൊടുത്ത് വിനോദം വാങ്ങുന്ന ചിലയാളുകളുണ്ട്. അവര്‍ക്ക് ഹീനശിക്ഷയാണുള്ളത്. നമ്മുടെ സൂക്തങ്ങള്‍ ഓതിക്കേള്‍പിക്കപ്പെട്ടാല്‍ ഇരുചെവികളിലും അടപ്പിട്ടപോലെ, അതു കേള്‍ക്കാത്തവിധം അവന്‍ അഹങ്കരിച്ചു പിന്തിരിഞ്ഞുകളയും. അതുകൊണ്ട് വേദനയുറ്റ ശിക്ഷയെപറ്റി അവനു ശുഭവാര്‍ത്തയറിയിക്കുക.²

സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്കുള്ളതു തന്നെയാണ് സുഖസൗകര്യ നിബിഡമായ സ്വര്‍ഗീയാരാമങ്ങള്‍. അവരതില്‍ ശാശ്വതരാണ്. അല്ലാഹുവിന്റെ സത്യനിഷ്ഠ വാഗ്ദാനമത്രേ അത്. പ്രതാപശാലിയും യുക്തിമാനുമാണവന്‍. നിങ്ങള്‍ക്ക് ഗോചരീഭവിക്കുന്ന തൂണുകകളൊന്നുമില്ലാതെയാണ് അവന്‍ ആകാശങ്ങള്‍ സൃഷ്ടിച്ചിരിക്കുന്നത്. നിങ്ങളെയും കൊണ്ട് ഭൂമി ഉലഞ്ഞുപോകാതിരിക്കാനായി അതിലവന്‍ ഉറച്ച മലകള്‍ സ്ഥാപിച്ചു; സകലയിനം ജീവികളെയും അതില്‍ വ്യാപിപ്പിച്ചു. അന്തരീക്ഷത്തില്‍ നിന്നു നാം മഴപെയ്യിക്കുകയും ഉദാത്തമായ സസ്യജോഡികള്‍ അതില്‍ മുളപ്പിക്കുകയും ചെയ്തു. ഇക്കാണുന്നതൊക്കെയും അല്ലാഹു പടച്ചതാണ്. എന്നാല്‍, അവനല്ലാത്തവര്‍ സൃഷ്ടിച്ചിട്ടുള്ളത് എന്താണെന്ന് നിങ്ങളൊന്ന് പറഞ്ഞുതരൂ! അതല്ല കാര്യം, അക്രമകാരികള്‍ സ്പഷ്ടമായ ദുര്‍മാര്‍ഗത്തിലത്രേ.³

നിശ്ചയം, ലുഖമാന്ന് നാം തത്ത്വജ്ഞാനം നല്‍കി: നിങ്ങള്‍ അല്ലാഹുവിന്ന് കൃതജ്ഞത പ്രകാശിപ്പിക്കുക. ഒരാള്‍ നന്ദി കാണിക്കുന്നുവെങ്കില്‍ അവന്ന് തന്നെയാണതിന്റെ നേട്ടം. ഇനി കൃതഘ്‌നതയാണൊരാള്‍ കാട്ടുന്നതെങ്കില്‍, അല്ലാഹു സ്വാശ്രയനും സ്തുത്യര്‍ഹനുമത്രേ.⁴
തന്റെ പുത്രന്ന് സദുപദേശം നല്‍കിക്കൊണ്ട് ലുഖ്മാന്‍ പറഞ്ഞത് സ്മരണീയമാണ്: എന്റെ കുഞ്ഞുമകനേ, അല്ലാഹുവിന്ന് നീ പങ്കുകാരെ വരിക്കരുത്. ബഹുദൈവവിശ്വാസം തീര്‍ച്ചയായും വലിയ അക്രമമാണ്. മാതാപിതാക്കളോടുള്ള ബാധ്യതാനിര്‍വഹണകാര്യം മനുഷ്യനോട് നാം ഊന്നിപ്പറഞ്ഞിട്ടുണ്ട്. മാതാവ് അവനെ ഗര്‍ഭത്തില്‍ ചുമന്നത് മേല്‍ക്കുമേല്‍ ബലഹീനതയോടെയാണ്. അവന്റെ മുലയൂട്ടല്‍ നിര്‍ത്തുക രണ്ടു വര്‍ഷം കൊണ്ടത്രേ. അതുകൊണ്ട്, എനിക്കും മാതാപിതാക്കള്‍ക്കും നീ കൃതജ്ഞത പ്രകാശിപ്പിക്കണം; നിന്റെ തിരിച്ചുവരവ് എന്റെയടുത്തേക്ക് തന്നെയാണ്.⁵

എന്നാല്‍, നിനക്കറിവില്ലാത്ത എന്തിനെയെങ്കിലും എന്നോടു പങ്കുചേര്‍ക്കാന്‍ അവരിരുവരും നിന്നെ നിര്‍ബന്ധിച്ചാല്‍ അനുസരിക്കരുത്; ഐഹികലോകത്ത് അവരുമായി നന്നായി വര്‍ത്തിക്കുക.⁶
എന്നിലേക്ക് മടങ്ങിയവരുടെ മാര്‍ഗമാണ് നീ അനുധാവനം ചെയ്യേണ്ടത്. പിന്നീട് എന്റെയടുത്തേക്കാണ് നിങ്ങളുടെ മടക്കം. നിങ്ങളുടെ ചെയ്തികളെ പറ്റി തത്സമയം ഞാന്‍ വിവരമറിയിച്ചു തരുന്നതാകുന്നു. എന്റെ കുഞ്ഞുമകനേ, നിന്റെയൊരു പ്രവൃത്തി ഒരു കടുകുമണിത്തൂക്കമുള്ളതാണെങ്കിലും, അത് നീയനുവര്‍ത്തിക്കുന്നത് ഒരു പാറക്കകത്തോ ആകാശങ്ങളിലോ ഭൂമിയിലോ എവിടെ വെച്ചായാലും അല്ലാഹു അത് ഹാജരാക്കുന്നതാണ്. അവന്‍ സൂക്ഷ്മദൃക്കും അഗാധജ്ഞനുമത്രേ.⁷

എന്റെ കുഞ്ഞുമകനേ, നമസ്‌കാരം നീ മുറപ്രകാരം അനുഷ്ഠിക്കുകയും നന്മ കല്‍പിക്കുകയും തിന്മ നിരോധിക്കുകയും വന്നുഭവിക്കുന്ന വിഷമങ്ങള്‍ സഹിക്കുകയും ചെയ്യുക. ദൃഢീകരിക്കേണ്ട വിഷയങ്ങളില്‍ പെട്ടവയാണിവ. നീ ജനങ്ങളില്‍ നിന്ന് ആഢ്യമനസ്‌കനായി മുഖം തിരിച്ചുകളയുകയോ ഭൂമിയില്‍ അഹംഭാവത്തോടെ നടക്കുകയോ അരുത്. അഹന്തയും പൊങ്ങച്ചവും കാട്ടുന്ന ഒരാളെയും അല്ലാഹു ഇഷ്ടപ്പെടുകയേ ഇല്ല. നടത്തത്തില്‍ മിതത്വം കാട്ടുകയും ശബ്ദം താഴ്ത്തുകയും വേണം. ശബ്ദങ്ങളില്‍ ഏറ്റം അറപ്പുണ്ടാക്കുന്നത് കഴുതയുടേതത്രേ.⁸

ഭുവന-വാനങ്ങളിലുള്ളവയത്രയും അല്ലാഹു അധീനപ്പെടുത്തിത്തന്നിരിക്കുന്നത് നിങ്ങള്‍ കാണുന്നില്ലേ? ഗോചരവും അഗോചരവുമായ തന്റെയനുഗ്രഹങ്ങള്‍ നിങ്ങള്‍ക്കുമേല്‍ അവന്‍ ചൊരിയുകയും ചെയ്തു.⁹
ഒരുവിധ അറിവും മാര്‍ഗദര്‍ശനവും പ്രകാശകവേദവുമില്ലാതെ അല്ലാഹുവിനെ പറ്റി കുതര്‍ക്കങ്ങള്‍ നടത്തുന്ന ചിലയാളുകളുണ്ട്; അവന്‍ അവതരിപ്പിച്ചത് നിങ്ങളനുധാവനം ചെയ്യൂ എന്ന് നിര്‍ദ്ദേശിക്കപ്പെടുമ്പോള്‍ അവര്‍ പ്രതികരിക്കും-'അല്ല പൂര്‍വികരെ ഏതൊരു ചര്യയിലായി കണ്ടുവോ, അതാണ് ഞങ്ങള്‍ പിന്‍പറ്റുക'. കത്തിജ്വലിക്കുന്ന നരകത്തിലേക്കാണ് പിശാച് അവരെ ക്ഷണിക്കുന്നതെങ്കിലും അവനെ പിന്തുടരുകയോ?¹⁰

പുണ്യകര്‍മങ്ങളനുഷ്ഠിക്കുന്നവനായി സ്വന്തത്തെ ആരൊരാള്‍ അല്ലാഹുവിന് സമര്‍പിക്കുന്നുവോ, അവന്‍ ബലിഷ്ഠപാശമാണ് മുറുകെ പിടിച്ചിരിക്കുന്നത്. സര്‍വകാര്യങ്ങളുടെയും പരിണാമം അല്ലാഹുവിങ്കലേക്കാകുന്നു. ഇനി ആരെങ്കിലും അവിശ്വാസിയാകുന്നുവെങ്കില്‍, അത് താങ്കളെ ദുഃഖിപ്പിക്കാതിരിക്കട്ടെ.¹¹
അവരുടെ മടക്കം നമ്മിലേക്കാണ്. തത്സമയം അവരുടെ ചെയ്തികളെ കുറിച്ച് നാമവര്‍ക്ക് പറഞ്ഞുകൊടുക്കുന്നതാണ്. ജനഹൃദയങ്ങളിലുള്ളതിനെ പറ്റി സൂക്ഷ്മജ്ഞന്‍ തന്നെയത്രേ അല്ലാഹു. അവര്‍ക്ക് നാം തുച്ഛം സുഖാസ്വാദനം നല്‍കുന്നതും പിന്നീട് ഘോരശിക്ഷയിലേക്ക് തള്ളിവിടുന്നതുമാണ്.¹²

ഭുവന-വാനങ്ങള്‍ പടച്ചുണ്ടാക്കിയത് ആരാണ് എന്ന് താങ്കള്‍ ചോദിക്കുന്നുവെങ്കില്‍ അല്ലാഹുവാണ് എന്ന് തീര്‍ച്ചയായും അവര്‍ പ്രതികരിക്കും.¹³
താങ്കള്‍ പറയുക: 'അല്ലാഹുവിനാണ് സര്‍വസ്തുതിയും'. പക്ഷേ, ജനങ്ങളില്‍ മിക്കവരും വസ്തുത ഗ്രഹിക്കുന്നില്ല. ഭൂമിയിലും ആകാശങ്ങളിലുമുള്ളവയത്രയും അല്ലാഹുവിന്റേതത്രേ. അവന്‍ ഐശ്വര്യനും സ്തുത്യര്‍ഹനുമാകുന്നു. ഭൂതലത്തിലുള്ള മരങ്ങളത്രയും തൂലികകളാവുകയും സമുദ്രങ്ങള്‍-പുറമെ സപ്തസാഗരങ്ങള്‍ വേറെയും-മഷിയാവുകയും ചെയ്ത് ഉല്ലേഖനം ചെയ്യപ്പെട്ടാല്‍ പോലും അല്ലാഹുവിന്റെ വചനങ്ങളവസാനിക്കയേ ചെയ്യില്ല. പ്രതാപശാലിയും യുക്തിമാനുമത്രേ അവന്‍.¹⁴
നിങ്ങളെയൊന്നടങ്കം സൃഷ്ടിക്കലും പുനരുജ്ജീവിപ്പിക്കലും ഒരൊറ്റ വ്യക്തിയുടേതുപോലെ മാത്രമാകുന്നു.¹⁵

നിങ്ങള്‍ ചിന്താവിധേയമാക്കുന്നില്ലേ: അല്ലാഹു രാത്രിയെ പകലിലും പകലിനെ രാത്രിയിലും സന്നിവേശിപ്പിക്കുന്നു;¹⁶
സൂര്യനെയും ചന്ദ്രനെയും കീഴ്‌പെടുത്തി, ഒരു നിശ്ചിതാവധി വരെ അവ സഞ്ചരിച്ചു കൊണ്ടിരിക്കും. നിങ്ങളുടെ കര്‍മങ്ങളെ കുറിച്ചെല്ലാം സൂക്ഷ്മജ്ഞനാണ് അവന്‍. സത്യമായ അസ്തിത്വം അല്ലാഹുവാണ് എന്നതിനാലാണത്. അവനെ വിട്ട് അവര്‍ ആരാധിക്കുന്നതൊക്കെയും മിഥ്യയത്രേ. അവന്‍ തന്നെയാണ് അത്യുന്നതനും മഹാനും.

നിങ്ങള്‍ ആലോചിക്കുന്നില്ലേ: ആഴിയിലൂടെ ജലയാനങ്ങള്‍ ഓടുന്നത് അല്ലാഹുവിന്റെ അനുഗ്രഹം കൊണ്ടാണ്. അവന്റെ ചില ദൃഷ്ടാന്തങ്ങള്‍ നിങ്ങള്‍ക്ക് കാണിച്ചുതരാനാണിത്. ഏറെ ക്ഷമിക്കുകയും കൃതജ്ഞരാവുകയും ചെയ്യുന്നവര്‍ക്ക് ഇതില്‍ ദൃഷ്ടാന്തങ്ങളുണ്ട്. മലപോലുള്ള തിരമാലകള്‍ ആവരണം ചെയ്തുകളഞ്ഞാല്‍ വിധേയത്വം അല്ലാഹുവിനോട് മാത്രമാക്കിക്കൊണ്ട് അവനെയവര്‍ വിളിച്ചു പ്രാര്‍ത്ഥിക്കും. എന്നാല്‍ കരയിലേക്കെത്തിച്ച് രക്ഷപ്പെടുത്തിയാലോ, ചിലര്‍ മിതത്വം പാലിക്കും (മറ്റുചിലര്‍ നിഷേധത്തില്‍ തുടരും)¹⁷
മഹാവഞ്ചകരും തീരെ നന്ദികെട്ടവരുമല്ലാതെ മറ്റാരും നമ്മുടെ ദൃഷ്ടാന്തങ്ങള്‍ നിഷേധിക്കുകയില്ല.

മര്‍ത്യകുലമേ, നിങ്ങള്‍ നാഥനെ സൂക്ഷിക്കുകയും, ഒരു പിതാവും തന്റെ മകന്നോ ഒരു മകനും തന്റെ പിതാവിനോ യാതൊരു ഉപകാരവും ചെയ്യാത്ത അന്ത്യദിനത്തെ പേടിക്കുകയും ചെയ്യുക. അല്ലാഹുവിന്റെ വാഗ്ദാനം സത്യം തന്നെയാണ്; അതുകൊണ്ട്, ഐഹിക ജീവിതവും മഹാവഞ്ചകനായ പിശാചും അവന്റെ കാര്യത്തില്‍ നിങ്ങളെ ചതിയില്‍ വീഴ്ത്താതിരിക്കട്ടെ.¹⁸
നിശ്ചയം, അന്ത്യനാളിനെക്കുറിച്ചുള്ള ജ്ഞാനം അല്ലാഹുവിങ്കലാകുന്നു. അവന്‍ മഴ വര്‍ഷിക്കുകയും ഗര്‍ഭാശയങ്ങളിലുള്ളത് അറിയുകയും ചെയ്യുന്നു.¹⁹
താന്‍ അടുത്ത നിമിഷം എന്താണ് ചെയ്യുക എന്നും ഏത് നാട്ടിലാണ് മരിക്കുക എന്നും ഒരാള്‍ക്കുമറിയില്ല. അല്ലാഹു സര്‍വകാര്യങ്ങളുമറിയുന്നവനും സൂക്ഷ്മജ്ഞാനിയും തന്നെ, തീര്‍ച്ച.²⁰