സബഅ് - سبأ - Saba

ഭുവന-വാനങ്ങളിലുള്ളവയത്രയും ഉടമപ്പെടുത്തിയ അല്ലാഹുവിന്നത്രേ സ്‌തോത്രങ്ങളഖിലവും; പരലോകത്തും സ്തുതി അവനു തന്നെയാകുന്നു. യുക്തിമാനും സൂക്ഷ്മജ്ഞനുമാണവന്‍. ഭൂമിയില്‍ കടക്കുന്നതും അതില്‍ നിന്ന് ബഹിര്‍ഗമിക്കുന്നതും വാനലോകത്തുനിന്ന് ഇറങ്ങിവരുന്നതും അതിലേക്ക് കയറുന്നതുമായ സര്‍വത്തെപ്പറ്റിയും അവനറിയുന്നുണ്ട്. ഏറെ കരുണാമയനും പൊറുക്കുന്നവനുമാണവന്‍.¹

അന്ത്യനാള്‍ തങ്ങള്‍ക്കു വന്നുഭവിക്കുകയില്ലെന്ന് നിഷേധികള്‍ ജല്‍പിച്ചു. അങ്ങ് പ്രതികരിക്കുക: അല്ല, അദൃശ്യജ്ഞാനിയായ എന്റെ നാഥന്‍ തന്നെ ശപഥം, അതു നിങ്ങള്‍ക്ക് വന്നെത്തുക തന്നെ ചെയ്യുന്നതാണ്; ഭുവന-വാനങ്ങളിലുള്ള ഒരണുവിന്റെ തൂക്കമുള്ളതോ അതിനെക്കാള്‍ ചെറിയതോ വലിയതോ ആയ യാതൊരു വസ്തുവും-സുവ്യക്തമായ ഒരു രേഖയിലുള്ളതായല്ലാതെ-അവനെ വിട്ട് ഗുപ്തമാകില്ല.²
സത്യവിശ്വാസം വരിക്കുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്ക് പ്രതിഫലം കൊടുക്കാനത്രേ അത്. അവര്‍ക്ക് പാപവിമുക്തിയും സമാദരണീയമായ ഉപജീവനവുമുണ്ട്. നമ്മെ പരാജയപ്പെടുത്താനായി നമ്മുടെ ദൃഷ്ടാന്തങ്ങളില്‍ കുഴപ്പമുണ്ടാക്കാന്‍ തത്രപ്പെടുന്നവര്‍ക്ക് വേദനയുറ്റ ശിക്ഷയുണ്ട്. നാഥങ്കല്‍ നിന്ന് അങ്ങേക്കവതരിച്ചത് സത്യമാണെന്നും പ്രതാപശാലിയും സ്തുത്യര്‍ഹനുമായ അല്ലാഹുവിന്റെ വഴിയിലേക്കാണത് മാര്‍ഗദര്‍ശനം ചെയ്യുകയെന്നും വിജ്ഞാനികള്‍ക്ക് മനസ്സിലാക്കാം.

സത്യനിഷേധികള്‍ കളിയാക്കി: 'നിങ്ങള്‍ നിശ്ശേഷം ഛിന്നഭിന്നമാക്കപ്പെട്ടാലും പുതുതായി പടച്ചുണ്ടാക്കപ്പെടുക തന്നെ ചെയ്യുമെന്നു വാദിക്കുന്ന ഒരാളെ ഞങ്ങളറിയിച്ചുതരട്ടെയോ? അല്ലാഹുവിന്റെ പേരില്‍ അയാള്‍ വ്യാജനിര്‍മിതി നടത്തിയതാണോ അതോ ഭ്രാന്തുണ്ടോ അയാള്‍ക്ക്?³
വസ്തുതയതല്ല, പാരത്രിക വിശ്വാസമില്ലാത്തവര്‍ ശിക്ഷയിലും അതിവിദൂരമായ മാര്‍ഗഭ്രംശത്തിലുമാകുന്നു. തങ്ങളുടെ മുന്നിലും പിന്നിലുമുള്ള ഭൂമിയിലേക്കും ആകാശത്തേക്കും അവര്‍ നോക്കിയിട്ടില്ലേ?⁴
നാം വിചാരിച്ചാല്‍ അവരെ ഭൂമിയിലാഴ്ത്തുകയോ ആകാശത്തുനിന്ന് ചില കഷ്ണങ്ങള്‍ അവര്‍ക്കുമേല്‍ വീഴ്ത്തുകയോ ചെയ്യുമായിരുന്നു! ഖേദിച്ചു മടങ്ങുന്ന ഏതൊരടിമക്കും ഇതില്‍ ദൃഷ്ടാന്തമുണ്ട്, തീര്‍ച്ച.⁵

നിശ്ചയം ദാവൂദ് നബിക്ക് നാം മഹത്തായ അനുഗ്രഹം നല്‍കി. 'പര്‍വതങ്ങളേ, പക്ഷികളേ, നിങ്ങളും അദ്ദേഹത്തോടൊപ്പം സങ്കീര്‍ത്തനങ്ങള്‍ ഏറ്റുചൊല്ലൂ' എന്ന് നാം കല്‍പിച്ചു. അദ്ദേഹത്തിന് നാം ഇരുമ്പ് മൃദുലമാക്കിക്കൊടുക്കുകയും കണ്ണികള്‍ ക്രമീകൃതമാക്കി വന്‍കവചങ്ങള്‍ നിര്‍മിക്കുക എന്നും സല്‍കര്‍മങ്ങളനുഷ്ഠിക്കുക, നിങ്ങളുടെ പ്രവൃത്തികള്‍ ഞാന്‍ കാണുന്നവനാണ് എന്നും അരുളുകയുമുണ്ടായി.⁶

സുലൈമാന്‍ നബിക്ക് കാറ്റിനെ നാം കീഴ്‌പെടുത്തി-അതിന്റെ പ്രഭാത പ്രയാണവും പ്രദോഷ പ്രയാണവും ഓരോ മാസദൂരമാണ്-തനിക്ക് ചെമ്പിന്റെ ഉറവ നാം പ്രവഹിപ്പിച്ചു കൊടുക്കുകയും ചെയ്തു. തന്റെ നാഥന്റെ ശാസനാനുസൃതം അദ്ദേഹത്തിന്റെ സന്നിധിയില്‍ ജിന്നുകള്‍ ജോലിയെടുക്കുന്നുമുണ്ടായിരുന്നു. നമ്മുടെ ശാസനക്കെതിരായി ഏതെങ്കിലുമൊരു ജിന്ന് പ്രവര്‍ത്തിക്കുന്നുവെങ്കില്‍ ജ്വലിക്കുന്ന നരകശിക്ഷ അവനെ നാമാസ്വദിപ്പിക്കും.⁷
രമ്യഹര്‍മങ്ങള്‍, പ്രതിമകള്‍, ജലസംഭരണി പോലുള്ള ഭീമന്‍ തളികകള്‍, നിലത്തുറപ്പിച്ച വന്‍ പാചകപ്പാത്രങ്ങള്‍ എന്നിങ്ങനെ തന്റെ ഹിതാനുസരണം എന്തും അവരുണ്ടാക്കിക്കൊടുത്തിരുന്നു. നാമരുളി: ദാവൂദ് കുടുംബമേ, കൃതജ്ഞതാപൂര്‍വം കാര്യങ്ങള്‍ ചെയ്യുക; യഥായോഗ്യം നന്ദിപ്രകാശിപ്പിക്കുന്നവര്‍ എന്റെ അടിമകളില്‍ അപൂര്‍വമത്രേ!

അങ്ങനെ അദ്ദേഹത്തിന് നാം മരണം വിധിച്ചപ്പോള്‍ തന്റെ ഊന്നുവടി തിന്നുകയായിരുന്ന ചിതല്‍ മാത്രമേ മരണവിവരം ജിന്നുകള്‍ക്ക് നല്‍കിയുള്ളൂ. മറഞ്ഞ കാര്യങ്ങള്‍ അറിയാമായിരുന്നെങ്കില്‍, ഈ ഹീനപീഡനത്തില്‍ കഴിഞ്ഞുവരേണ്ടതില്ലായിരുന്നുവെന്ന് അദ്ദേഹം നിലംപതിച്ചപ്പോഴാണ് ജിന്നുകള്‍ക്ക് സ്പഷ്ടമായത്⁸

ഷീബാ സാമ്രാജ്യക്കാര്‍ക്ക് തങ്ങളുടെ നിവാസ സ്ഥലത്തുതന്നെ-ഇടത്തും വലത്തുമായുള്ള ഉദ്യാനദ്വയങ്ങള്‍-ദൃഷ്ടാന്തമായുണ്ടായിരുന്നു. 'നിങ്ങളുടെ നാഥന്‍ സജ്ജീകരിച്ച ഉപജീവന മാര്‍ഗത്തില്‍ നിന്ന് ആഹരിക്കുകയും അവനു കൃതജ്ഞത പ്രകാശിപ്പിക്കുകയും ചെയ്യൂ; ഉദാത്തമായ നാടും ഏറെ പൊറുക്കുന്ന നാഥനും' (എന്ന് അവരോട് ഉണര്‍ത്തപ്പെട്ടു). എന്നാല്‍ പിന്തിരിഞ്ഞുകളയുകയാണവര്‍ ചെയ്തത്.⁹
അപ്പോള്‍ അണക്കെട്ടിന്റെ കുത്തൊഴുക്ക് അവര്‍ക്ക് നേരെ ഞാന്‍ വിട്ടു. ആ ഉദ്യാനദ്വയങ്ങള്‍ക്ക് പകരം കവര്‍പ്പുള്ള കായ്കനികളും കാറ്റാടിമരങ്ങളും ഏതാനും വാകവൃക്ഷങ്ങളുമുള്ള രണ്ടു തോട്ടങ്ങള്‍ അവര്‍ക്ക് നാം നല്‍കുകയുമുണ്ടായി. കൃതഘ്‌നത കാട്ടിയതിനു പകരം നാമവര്‍ക്ക് കൊടുത്തത് അതാണ്. ഗുരുതരമായ നന്ദികേട് കാണിക്കുന്നവന്നല്ലാതെ നാമിങ്ങനെ പ്രതിഫലം നല്‍കുമോ?¹⁰

ഷീബക്കാരുടെയും നാമനുഗ്രഹിച്ച സിറിയന്‍ നഗരങ്ങളുടെയുമിടയില്‍ മികച്ചുനിന്ന പല പട്ടണങ്ങളും നാമുണ്ടാക്കുകയും ഇടത്താവളങ്ങള്‍ നിശ്ചയിക്കുകയും ചെയ്തു. ദിനരാത്രങ്ങളില്‍ സമാധാന നിര്‍ഭരരായി നിങ്ങള്‍ യാത്രചെയ്‌തോളൂ എന്നു നാമരുളി. എന്നാല്‍, 'നാഥാ, ഞങ്ങളുടെ യാത്രാതാവളങ്ങള്‍ക്കിടയില്‍ വിദൂരതയുണ്ടാക്കേണമേ' എന്നാണ് അവര്‍ പ്രതികരിച്ചത്. സ്വന്തത്തോടു തന്നെ അക്രമം പ്രവര്‍ത്തിച്ചതിനാല്‍ അവരെ നാം കഥാവൃത്താന്തങ്ങളാക്കുകയും നിശ്ശേഷം ഛിന്നഭിന്നമാക്കുകയുമുണ്ടായി. ക്ഷമാശാലിയും കൃതജ്ഞനുമായ ഏതൊരാള്‍ക്കും ഇതില്‍ ദൃഷ്ടാന്തങ്ങളുണ്ട്, തീര്‍ച്ച!¹¹

തന്റെ ധാരണ ശരിതന്നെയാണെന്ന് മനുഷ്യരില്‍ ഇബ്‌ലീസ് സാക്ഷാല്‍കൃതമാക്കി. അങ്ങനെ, അവര്‍-ഒരുപറ്റം സത്യവിശ്വാസികളൊഴികെ-അവനെ അനുധാവനം ചെയ്തു. അവര്‍ക്കുമീതെ യാതൊരധികാരവും അവന്നുണ്ടായിരുന്നില്ല; പാരത്രിക ലോകത്തില്‍ വിശ്വാസം വെച്ചുപുലര്‍ത്തുന്നവരെയും സംശയഗ്രസ്തരായവരെയും വേര്‍തിരിച്ചറിയാന്‍ വേണ്ടി മാത്രമാണിത്. താങ്കളുടെ നാഥന്‍ എല്ലാ കാര്യങ്ങളും മേല്‍നോട്ടം ചെയ്യുന്നവനാകുന്നു¹²

നബീ, പറയുക: അല്ലാഹുവിനെ വിട്ട് ദൈവമെന്നു നിങ്ങള്‍ വാദിക്കുന്നവരെ വിളിച്ചു നോക്കൂ; ഭുവന-വാനങ്ങളില്‍ ഒരണുമണിത്തൂക്കം സ്വാധീനമോ അവയില്‍ എന്തെങ്കിലും ഭാഗഭാഗിത്വമോ അവക്കില്ല; അവന്നു ഒരു സഹായിയും അക്കൂട്ടത്തില്‍ നിന്നില്ല. അവന്‍ അനുവാദം കൊടുത്തവര്‍ക്കു മാത്രമേ തന്റെയടുത്ത് ശുപാര്‍ശ ഫലപ്പെടുകയുള്ളൂ. അങ്ങനെ, മഹ്ശറില്‍ അവരുടെ ഹൃദയങ്ങളില്‍ നിന്നു മഹാസംഭ്രമം വിട്ടകന്നുകഴിഞ്ഞാല്‍ 'നിങ്ങളുടെ നാഥന്‍ എന്താണ് അരുളിയത്' എന്ന് അവര്‍ ചോദിക്കുന്നതും 'സത്യമാണ് പറഞ്ഞത്, അവന്‍ സമുന്നതനും മഹാനുമാകുന്നു' എന്ന് മലക്കുകള്‍ മറുപടി നല്‍കുന്നതുമാണ്.¹³

ഭുവന-വാനങ്ങളില്‍ നിന്ന് നിങ്ങള്‍ക്ക് ഉപജീവനമാര്‍ഗം നല്‍കുന്നതാരാണ് എന്ന് നബീ, താങ്കളവരോട് ചോദിക്കുക. അങ്ങ് തന്നെ പ്രതികരിക്കുക: അല്ലാഹുവാണത്; ഒന്നുകില്‍ ഞങ്ങള്‍ അല്ലെങ്കില്‍ നിങ്ങള്‍ നേര്‍വഴിയിലാകുന്നു; അല്ലെങ്കില്‍ സ്പഷ്ടമായ ദുര്‍മാര്‍ഗത്തില്‍, തീര്‍ച്ച. താങ്കള്‍ പ്രഖ്യാപിക്കുക: ഞങ്ങള്‍ പാപമനുവര്‍ത്തിച്ചതിനെക്കുറിച്ച് നിങ്ങളോ, നിങ്ങളനുവര്‍ത്തിച്ചതിനെ കുറിച്ച് ഞങ്ങളോ ചോദിക്കപ്പെടുന്നതല്ല. നാഥന്‍ നമ്മെ സംഗമിപ്പിക്കുന്നതും സത്യസന്ധമായി നമുക്കിടയില്‍ വിധി കല്‍പിക്കുന്നതുമാണ്. സര്‍വജ്ഞനായ വിധികര്‍ത്താവാണവന്‍. പങ്കാളികളായി അല്ലാഹുവിനോട് നിങ്ങള്‍ ചേര്‍ത്തിയവരെ ഒന്ന് കാണിച്ചു തരൂ! എന്നാല്‍ അങ്ങനെയൊന്നില്ല, അവന്‍ പ്രതാപശാലിയും യുക്തിമാനുമായ അല്ലാഹുവാകുന്നു.¹⁴

സര്‍വമനുഷ്യര്‍ക്കും ശുഭവാര്‍ത്താവാഹകനും താക്കീതുകാരനുമായി മാത്രമേ അങ്ങയെ നാം നിയോഗിച്ചിട്ടുള്ളു. എന്നാല്‍ മിക്കവരും അത് മനസ്സിലാക്കുന്നില്ല. 'ഈ വാഗ്ദത്ത ശിക്ഷ എപ്പോഴുണ്ടാകും-നിങ്ങള്‍ സത്യവാദികളാണെങ്കില്‍' എന്നാണവരുടെ ചോദ്യം. താങ്കള്‍ പ്രതികരിക്കുക: ഒരു നിര്‍ണിത നാള്‍ നിങ്ങള്‍ക്കുണ്ട്; അത് മറികടന്ന് ഒരല്‍പനേരം മുന്നോട്ടോ പിന്നോട്ടോ നിങ്ങള്‍ പോകില്ല.¹⁵

സത്യനിഷേധികള്‍ ജല്‍പിച്ചു: ഈ ഖുര്‍ആനോ ഇതിനു മുമ്പേയുള്ള വേദമോ ഞങ്ങള്‍ വിശ്വസിക്കുകയേയില്ല, തീര്‍ച്ച! നബീ, ഈ അധര്‍മകാരികള്‍ തങ്ങളുടെ നാഥങ്കല്‍ നിറുത്തപ്പെടുന്ന സന്ദര്‍ഭം അങ്ങ് കണ്ടിരുന്നുവെങ്കില്‍...! അവരില്‍ ചിലര്‍ മറ്റു ചിലരുടെ പേരില്‍ കുറ്റാരോപണം നടത്തുന്നതാണ്. 'നിങ്ങളുണ്ടായിരുന്നില്ലെങ്കില്‍ ഞങ്ങള്‍ സത്യവിശ്വാസം കൈക്കൊണ്ടവരായിരുന്നേനെ' എന്ന് അഹങ്കാരികളായ നേതാക്കളോട് ദുര്‍ബലന്‍മാര്‍ പറയും. നിങ്ങള്‍ക്ക് സന്മാര്‍ഗം വന്നുകിട്ടിയതിനു ശേഷം അതില്‍ നിന്ന് നിങ്ങളെ പ്രതിരോധിച്ചത് ഞങ്ങളാണോ? അങ്ങനെയല്ല, സ്വയമേവ നിങ്ങള്‍ അധര്‍മകാരികളായിരുന്നു എന്ന് അഹങ്കാരികള്‍ ദുര്‍ബലരോട് പ്രതികരിക്കും.¹⁶

ദുര്‍ബലര്‍ അഹങ്കാരികളോടു പറയും: 'അതല്ല ശരി, അല്ലാഹുവിനെ നിഷേധിക്കാനും അവനു പങ്കാളികളെ വരിക്കാനുമായി ഞങ്ങളോട് കല്‍പിച്ചുകൊണ്ട് നിങ്ങള്‍ രാപ്പകല്‍ നടത്തിക്കൊണ്ടിരുന്ന കുതന്ത്രങ്ങളുടെ പരിണതിയാണിത്'. നരകശിക്ഷ ഗോചരീഭവിക്കുമ്പോള്‍ അവര്‍ നെടുംഖേദം ഗുപ്തമാക്കുന്നതും നിഷേധികളുടെ കണ്ഠങ്ങളില്‍ നാം ചങ്ങല ചാര്‍ത്തുന്നതുമാകുന്നു. സ്വകര്‍മങ്ങളുടെ പ്രതിഫലം മാത്രമല്ലേ അവര്‍ക്ക് നല്‍കപ്പെടുന്നുള്ളൂ?¹⁷

ഏതൊരു രാജ്യത്ത് താക്കീതുകാരനായ ദൂതനെ നാം നിയോഗിച്ചപ്പോഴും അവിടത്തെ സുഖലോലുപന്മാര്‍ ഇങ്ങനെ ജല്‍പിക്കാതിരുന്നിട്ടില്ല: ഏതൊരു ദര്‍ശനവുമായി നിങ്ങള്‍ അയക്കപ്പെട്ടിരിക്കുന്നുവോ, അതിനെ ഞങ്ങള്‍ നിഷേധിക്കുന്നവര്‍ തന്നെയാണ്, തീര്‍ച്ച; ഞങ്ങള്‍ക്കാണ് കൂടുതല്‍ സമ്പത്തുക്കളും സന്താനങ്ങളുമുള്ളത്; ഞങ്ങള്‍ ശിക്ഷാവിധേയരാകുന്നതല്ല!¹⁸

നബീ, പ്രഖ്യാപിക്കുക: എന്റെ നാഥന്‍ താനുദ്ദേശിക്കുന്നവര്‍ക്ക് ഉപജീവന മാര്‍ഗങ്ങള്‍ വിസ്തൃതമാക്കുകയും മറ്റു ചിലര്‍ക്കത് കുടുസ്സാക്കുകയും ചെയ്യുന്നു. പക്ഷേ, മനുഷ്യരില്‍ മിക്കവരും അതറിയുന്നില്ല. നിങ്ങളുടെ സമ്പത്തുക്കളും സന്താനങ്ങളുമൊന്നും നമ്മുടെയടുത്ത് സാമീപ്യമുണ്ടാക്കുന്നവയല്ല; എന്നാല്‍ സത്യവിശ്വാസം കൈക്കൊള്ളുകയും നല്ലത് പ്രവര്‍ത്തിക്കുകയും ചെയ്തവര്‍ അങ്ങനെയല്ല; തങ്ങളുടെ കര്‍മഫലമായി അവര്‍ക്ക് ഇരട്ടി പ്രതിഫലമുണ്ടാകും. സമാധാന പൂര്‍ണരായി സമുന്നത സൗധങ്ങളില്‍ കഴിയും അവര്‍. നമ്മെ തോല്‍പിക്കാന്‍ വേണ്ടി നമ്മുടെ സൂക്തങ്ങള്‍ ശിഥിലമാക്കാന്‍ യത്‌നിക്കുന്നവര്‍ ശിക്ഷയില്‍ സന്നിഹിതരാക്കപ്പെടുന്നതാണ്.¹⁹

നബീ, പ്രഖ്യാപിക്കുക: എന്റെ നാഥന്‍ അടിമകളില്‍ നിന്ന് താനുദ്ദേശിക്കുന്നവര്‍ക്ക് ഉപജീവനോപാധികള്‍ പ്രവിശാലമാക്കുന്നതും മറ്റു ചിലര്‍ക്ക് കുടുസ്സാക്കുന്നതുമാണ്. എന്തൊരു വസ്തു നിങ്ങള്‍ വ്യയം ചെയ്യുന്നുണ്ടെങ്കിലും അവനതിനു പകരം തരും. ഉപജീവനം നല്‍കുന്നവരില്‍ അത്യുദാത്തനത്രേ അവന്‍. അവരെയൊന്നടങ്കം അല്ലാഹു സംഗമിപ്പിക്കുന്ന നാള്‍ സ്മരണീയമാണ്. എന്നിട്ട് മലക്കുകളോടവന്‍ ചോദിക്കും: ഇവരാരാധിച്ചിരുന്നത് നിങ്ങളെയാണോ? അവര്‍ പ്രതികരിക്കും: നിന്റെ മഹത്ത്വം ഞങ്ങള്‍ പ്രകീര്‍ത്തിക്കുന്നു! അവരല്ല, നീയാണ് ഞങ്ങളുടെ സംരക്ഷകന്‍. എന്നാല്‍ അവരാരാധിച്ചിരുന്നത് ജിന്നുകളെയാണ്; അവരില്‍ മിക്കവരും ജിന്നുകളില്‍ വിശ്വസിക്കുന്നവരാകുന്നു.²⁰
അതുകൊണ്ട്, അന്നേദിവസം പരസ്പരം ഉപകാരമോ ഉപദ്രവമോ ചെയ്യാന്‍ നിങ്ങള്‍ക്കാവില്ല. 'നിങ്ങള്‍ വ്യാജമാക്കിയിരുന്ന ആ നരകശിക്ഷ ആസ്വദിച്ചോളൂ' എന്ന് അക്രമികളോട് നാം പറയുന്നതുമാണ്.

നമ്മുടെ സൂക്തങ്ങള്‍ വ്യക്തമായി പാരായണം ചെയ്യപ്പെട്ടാല്‍ നിഷേധികള്‍ ആളുകളോടു പറയും: നിങ്ങളെ പൂര്‍വികന്മാര്‍ ആരാധിച്ചുവന്ന ദൈവങ്ങളില്‍ നിന്ന് പ്രതിരോധിക്കാനുദ്ദേശിക്കുന്ന ഒരാളാണ് ഇവന്‍, കെട്ടിച്ചമക്കപ്പെട്ട വ്യാജം മാത്രമാണ് ഈ ഖുര്‍ആന്‍. സത്യസന്ദേശം സമാഗതമായപ്പോള്‍ 'ഇത് സുവ്യക്തമായ ആഭിചാരമല്ലാതെ മറ്റൊന്നുമല്ല' എന്ന് നിഷേധികള്‍ തട്ടിവിട്ടു. നാം അവര്‍ക്ക് പഠിക്കാന്‍ വേദഗ്രന്ഥങ്ങള്‍ നല്‍കുകയോ താങ്കള്‍ക്കുമുമ്പ് അവരിലേക്കൊരു താക്കീതുകാരനെ നിയോഗിക്കുകയോ ചെയ്തിരുന്നില്ല.²¹
ഇവരുടെ പൂര്‍വിക ജനപഥങ്ങളും സത്യം നിഷേധിച്ചിരുന്നു. അവര്‍ക്ക് നാം നല്‍കിയിരുന്നതിന്റെ ദശാംശം പോലും ഇവരാര്‍ജിച്ചിട്ടില്ല. അങ്ങനെ നമ്മുടെ ദൂതരെ അവര്‍ നിഷേധിച്ചപ്പോള്‍ ഞാന്‍ കൊടുത്ത ശിക്ഷ എങ്ങനെയുണ്ടായിരുന്നുവെന്ന് നോക്കൂ!²²

നബീ, പ്രസ്താവിക്കുക: ഒരു കാര്യം മാത്രമാണ് നിങ്ങളോട് ഞാനുപദേശിക്കുന്നത്-നിങ്ങള്‍ രണ്ടുപേര്‍ വീതമോ ഓരോരുത്തരായോ അല്ലാഹുവിന് വേണ്ടി സജ്ജരാവുകയും എന്നിട്ട് ചിന്തിക്കുകയും ചെയ്യുക. നിങ്ങളുടെ കൂട്ടുകാരന്ന്-ഈ മുഹമ്മദിന്-ഒരു വിധ ഭ്രാന്തുമില്ല; കഠിനശിക്ഷ വന്നെത്തുംമുമ്പേ നിങ്ങള്‍ക്കുള്ള ഒരു താക്കീതുകാരന്‍ മാത്രമാണയാള്‍.²³
എന്തെങ്കിലും പ്രതിഫലം നിങ്ങളോട് ഞാനാവശ്യപ്പെട്ടിട്ടുണ്ടെങ്കില്‍ അത് നിങ്ങള്‍ തന്നെ എടുത്തോളൂ, എനിക്കുള്ള പ്രതിഫലം അല്ലാഹുവിങ്കല്‍ മാത്രമാണ്; എല്ലാറ്റിനും അവന്‍ സാക്ഷിയാകുന്നു. അങ്ങ് വിളംബരം ചെയ്യുക: നിശ്ചയം, എന്റെ നാഥന്‍ സത്യം അവതരിപ്പിക്കുന്നു; അദൃശ്യങ്ങള്‍ നന്നായറിയുന്നവനാണവന്‍. സത്യം സമാഗതമായിക്കഴിഞ്ഞു, മിഥ്യക്ക് ഇനിയൊരു തുടക്കമോ മടക്കമോ ഉണ്ടാകില്ല. ഞാന്‍ വഴിതെറ്റിപ്പോയിട്ടുണ്ടെങ്കില്‍ എനിക്ക് പ്രതികൂലമായി തന്നെയാണത് ഭവിക്കുക; ഇനി, സന്മാര്‍ഗ പ്രാപ്തനാകുന്നുവെങ്കിലോ, എന്റെ നാഥന്‍ ബോധനം നല്‍കുന്നതിനാലാണത്. അവന്‍ എല്ലാം കേള്‍ക്കുന്നവനും ഏറെ സമീപസ്ഥനുമാകുന്നു.²⁴

നിഷേധികള്‍ ഭയവിഹ്വലരാകുന്ന ഘട്ടം താങ്കള്‍ കാണുകയാണെങ്കില്‍! ഒരു നിലക്കും രക്ഷപ്പെട്ടുപോകാന്‍ കഴിയില്ല, സമീപസ്ഥലത്തു വെച്ചുതന്നെയവര്‍ പിടിക്കപ്പെടുന്നതാണ്.²⁵
ഇതില്‍ ഞങ്ങള്‍ വിശ്വസിച്ചിരിക്കുന്നു എന്ന് അവര്‍ പ്രഖ്യാപിക്കും; എന്നാല്‍ അതിവിദൂരമായ ഒരിടത്തുനിന്ന് അതെങ്ങനെ നേടാന്‍? നേരത്തെ അതവര്‍ നിഷേധിച്ചുതള്ളുകയും ദൂരെനിന്ന് ലക്ഷ്യമറിയാതെ ആരോപണമുന്നയിക്കുകയുമായിരുന്നു.²⁶
അങ്ങനെ, അവര്‍ക്കും അവരുടെ മോഹങ്ങള്‍ക്കുമിടയില്‍-അവരുടെ കക്ഷിക്കാരെ കൊണ്ട് മുമ്പ് അനുവര്‍ത്തിക്കപ്പെട്ട പോലെ-മറയിടപ്പെടുന്നതാണ്. നിശ്ചയം അവര്‍ ഗുരുതരമായ സന്ദേഹത്തിലായിരുന്നു.²⁷