സൃഷ്ടി കര്‍മം നടത്തിയ താങ്കളുടെ നാഥന്റെ നാമത്തില്‍ വായിക്കുക. രക്തപിണ്ഡത്തില്‍ നിന്ന് മനുഷ്യനെ അവന്‍ സൃഷ്ടിച്ചു. വായിക്കുക, അങ്ങയുടെ നാഥന്‍ തൂലിക കൊണ്ട് അഭ്യസിപ്പിച്ച അത്യുദാരനത്രേ. തനിക്കറിവില്ലാത്തത് മനുഷ്യനെ അവന്‍ പഠിപ്പിച്ചു1
1 വിശദീകരണം കാണുക
1. തിരുനബിക്ക് ഏറ്റമാദ്യമായി ഹിറാഗുഹയില്‍ വെച്ച് ജിബ്‌രീല്‍ മുഖേന അവതരിച്ചു കിട്ടിയ ഖുര്‍ആനിക സൂക്തങ്ങളാണ് ഈ അഞ്ചെണ്ണം. മക്കയിലെ ബഹളസാന്ദ്രവും ശിര്‍ക്ക്മയവുമായ ചുറ്റുപാടുകളില്‍ നിന്ന് മാറിയിരിക്കാന്‍ വേണ്ടി മാസങ്ങളായി അവിടന്ന് ജബലുന്നൂറിലെ ഹിറാഗുഹയില്‍ ചെന്നിരിക്കാറുണ്ടായിരുന്നു. ഏതാനും നാളുകള്‍ക്കുള്ള ഭക്ഷണവും വെള്ളവും സജ്ജീകരിച്ചായിരുന്നു ഈ പോക്ക്. അവിടെ ഒറ്റക്ക് ധ്യാനനിമഗ്നമായി കഴിയുകയായിരുന്നു. അല്ലാഹുവിന്റെ സൃഷ്ടിവൈഭവത്തിലേക്ക് സൂചന നല്‍കിക്കൊണ്ട് അത്യുദാരനായ ആ സ്രഷ്ടാവിന്റെ നാമത്തിലായിരിക്കണം വായനയും പഠനവുമെന്നാണ് അനുശാസിക്കുന്നത്. അക്ഷരജ്ഞാനമില്ലാതിരുന്ന തിരുനബി(സ്വ) അങ്ങനെ, ജിബ്‌രീല്‍(അ) ഓതിക്കൊടുക്കുന്നത് ഗ്രഹിച്ച് ലോകത്തിന്ന് പാരായണം ചെയ്തുകൊണ്ട് മഹാദ്ഭുതം സൃഷ്ടിക്കുകയായിരുന്നു.