അൽ അൻആം - الأنعام - Al-Anam

ഭുവന-വാനങ്ങള്‍ സൃഷ്ടിക്കുകയും അന്ധകാരങ്ങളും പ്രകാശവുമുണ്ടാക്കുകയും ചെയ്ത അല്ലാഹുവിനാണ് സമസ്ത സ്‌തോത്രങ്ങളും. എന്നിട്ടും അവിശ്വാസികള്‍ തങ്ങളുടെ നാഥനോട് മറ്റുചിലതിനെ തുല്യമാക്കുന്നു¹
കളിമണ്ണില്‍ നിന്നു നിങ്ങളെ പടച്ചത് അവനാണ്; എന്നിട്ടവന്‍ നിങ്ങള്‍ക്ക് ഒരവധി നിര്‍ണയിച്ചു. അവങ്കല്‍ നിശ്ചിതമായ മറ്റൊരവധിയും (പുനരുത്ഥാനത്തിന്) ഉണ്ട്. എന്നിട്ടും നിഷേധികളേ, നിങ്ങള്‍ സംശയ ഗ്രസ്തരായിരിക്കുകയാണ്. അവന്‍ തന്നെയാണ് ഭുവനവാനങ്ങളിലുള്ള സാക്ഷാല്‍ ദൈവമായ അല്ലാഹു. നിങ്ങളുടെ രഹസ്യവും പരസ്യവും അവന റിയുന്നു. നിങ്ങള്‍ അനുവര്‍ത്തിക്കുന്നതിനെക്കുറിച്ചൊക്കെയും അവനഭിജ്ഞനാണ്.

തങ്ങളുടെ നാഥങ്കല്‍ നിന്നുള്ള ഏതൊരു ദൃഷ്ടാന്തം വന്നുകിട്ടുമ്പോഴും അതവഗണിച്ചുകള യുക മാത്രമാണ് നിഷേധികള്‍ ചെയ്തുവന്നത്. അങ്ങനെ ഈ ഖുര്‍ആനിക സത്യം വന്നെത്തിയപ്പോ ഴും അവരത് വ്യാജമാക്കി. തന്മൂലം, ഏതൊന്നിനെ പരിഹസിച്ചിരുന്നുവോ അതിന്റെ വിവരങ്ങള്‍ പിന്നീട് അവര്‍ക്ക് വന്നെത്തുവാന്‍ പോവുകയാകുന്നു. അവര്‍ കാണുന്നില്ലേ: ഭൂമിയില്‍ എത്രയെത്ര തലമുറകളെ അവര്‍ക്കുമുമ്പ് നാം നശിപ്പിച്ചു? ഭൂമിയില്‍ നിങ്ങള്‍ക്കു കിട്ടിയിട്ടില്ലാത്ത സൗകര്യങ്ങള്‍ അവര്‍ക്കു നാം നല്‍കിയിരുന്നു. അവര്‍ക്കു നാം സമൃദ്ധമായ മഴ നല്‍കി; താഴെ പുഴകളൊഴുക്കി. എന്നിട്ട് കുറ്റകൃത്യങ്ങള്‍ മൂലം നാമവരെ നശിപ്പിക്കുകയാണ് ചെയ്തത്. അവര്‍ക്ക് ശേഷം, മറ്റൊരു തലമുറയെ നാം സൃഷ്ടിക്കുകയുമുണ്ടായി.

നബിയേ, താങ്കള്‍ക്കു നാം കടലാസിലെഴുതിയ ഒരു ഗ്രന്ഥമവതരിപ്പിച്ചുതരികയും സ്വകരങ്ങള്‍കൊണ്ട് അവരതു സ്പര്‍ശിച്ചു ബോധ്യപ്പെടുകയും ചെയ്താലും ഇത് വ്യക്തമായ ആഭിചാരം മാത്രമാണ് എന്നാണു നിഷേധികള്‍ ജല്‍പിക്കുക. ഈ നബിയിലേക്ക് ഒരു മലക്കിനെ ഇറക്കപ്പെടാത്തതെന്താണ് എന്നും അവര്‍ ചോദിക്കുന്നു. എന്നാല്‍, മലക്കിനെ നാം ഇറക്കിയിരുന്നെങ്കി ല്‍ കഥകഴിഞ്ഞു പോയേനെ! പിന്നീടവര്‍ക്ക് ഒട്ടുമേ താമസം നല്‍കപ്പെടുന്നതല്ല. നാം നിയോഗിക്കുന്ന റസൂലിനെ മലക്കാക്കുകയാണെങ്കില്‍ തന്നെ, രൂപത്തില്‍ അതൊരു പുരുഷനായിരിക്കും. ആശയക്കുഴ പ്പമുണ്ടാകുന്ന കാര്യം അപ്പോഴുമവര്‍ക്ക് വിവേചിച്ചറിയാതായിപ്പോകുന്നതാണ്²
താങ്കള്‍ക്കു മുമ്പു ള്ള പല മുര്‍സലുകളും പരിഹസിക്കപ്പെട്ടിട്ടുണ്ട്. അപ്പോള്‍ തങ്ങള്‍ പരിഹസിച്ചുകൊണ്ടിരുന്നത് എന്താണോ അത് ആ നിഷേധികളില്‍ വന്നുഭവിക്കുകയാണുണ്ടായത്. നിങ്ങള്‍ ഭൂമിയില്‍ സഞ്ചരിച്ച് ആ നിഷേധികളുടെ പര്യവസാനം എങ്ങനെയായിരുന്നുവെന്നു നോക്കിക്കാണൂ എന്നു താങ്കള്‍ പറയുക.

നബീ, നിഷേധികളോട് അങ്ങു ചോദിക്കൂ: ഭുവന-വാനങ്ങളിലുള്ളവയത്രയും ആരുടേതാ ണ്? അല്ലാഹുവിന്റേതാണ് എന്ന് അങ്ങു മറുപടി നല്‍കുക. അവന്‍ കാരുണ്യം സ്വബാധ്യതയാക്കി വെച്ചിരിക്കയാണ്³
പുനരുത്ഥാന നാളില്‍ നിസ്സംശയം അവന്‍ നിങ്ങളെ സമ്മേളിപ്പിക്കുക തന്നെ ചെയ്യും. ആത്മനഷ്ടം വരുത്തിയവര്‍ സത്യവിശ്വാസം കൈക്കൊള്ളുകയേ ഇല്ല. രാത്രിയിലും പകലിലുമായി സ്ഥിതി ചെയ്യുന്ന സര്‍വതും അവന്റേതാണ്. എല്ലാം കേള്‍ക്കുന്നവനും അറിയുന്നവനു മത്രേ അവന്‍. നബീ, ചോദിക്കുക: ഭുവന-വാനങ്ങളുടെ സ്രഷ്ടാവായ അല്ലാഹു അല്ലാത്തവരെയാണോ ഞാന്‍ സംരക്ഷകനാക്കേണ്ടത്? എല്ലാറ്റിന്റെയും അന്നദാതാവ് അവനാണു താനും; അവന്ന് ആരും ഭക്ഷണം നല്‍കുന്നുമില്ല. താങ്കള്‍ പ്രഖ്യാപിക്കുക: അല്ലാഹുവിനോട് വിധേയത്വം പ്രകടിപ്പിക്കുന്നവരി ല്‍ ഒന്നാമനാകാനും ബഹുദൈവവിശ്വാസികളിലുള്‍പ്പെടാതിരിക്കാനുമാണ് ഞാന്‍ ശാസിക്കപ്പെട്ടിരി ക്കുന്നത്⁴

നബീ, പറയുക: എന്റെ നാഥനോട് ധിക്കാരം കാണിച്ചാല്‍ ഗൗരവതരമായൊരു ദിനത്തിലെ ശിക്ഷയാണു ഞാന്‍ ഭയപ്പെടുന്നത്. അന്ന് ആ ശിക്ഷ ആരില്‍ നിന്നു ഒഴിവാക്കപ്പെടുന്നുവോ, അവന്ന് അല്ലാഹു കരുണ ചെയ്തു! അതത്രെ സ്പഷ്ടമായ വിജയം.

അല്ലാഹു താങ്കള്‍ക്ക് വല്ല വിപത്തും വരുത്തുന്നുവെങ്കില്‍ അതു പ്രതിരോധിക്കാന്‍ അവന ല്ലാതെ മറ്റാരുമുണ്ടാകില്ല. ഇനി എന്തെങ്കിലും ഗുണം അവനില്‍ നിന്നു ലഭിക്കുന്നുവെങ്കിലോ (അതു തട്ടിനീക്കാനും ആര്‍ക്കുമാകില്ല). അവന്‍ എല്ലാറ്റിനും കഴിവുറ്റവനത്രേ⁵
തന്റെ ദാസരെ അതിജയിക്കുന്നവനും യുക്തിമാനും സൂക്ഷ്മജ്ഞാനിയുമാണ് അവന്‍. ചോദിക്കുക: ഏറ്റം വലിയ സാക്ഷ്യം ഏതാണ്? പറയുക: എനിക്കും നിങ്ങള്‍ക്കുമിടക്കുള്ള സാക്ഷി അല്ലാഹുവാണ്. ഈ ഖുര്‍ആന്‍ എനിക്കു ദിവ്യബോധനം നല്‍കപ്പെട്ടിരിക്കുന്നത്, നിങ്ങള്‍ക്കും ഇതു ലഭിക്കുന്നവര്‍ക്കും ഇതുവഴി ഞാന്‍ മുന്നറിയിപ്പു നല്‍കാനാകുന്നു. അല്ലാഹുവൊന്നിച്ച് അന്യദൈവങ്ങളുണ്ടെന്നതിന് നിങ്ങള്‍ സാക്ഷ്യം വഹിക്കുമോ? പറയുക: എനിക്കാ സാക്ഷ്യത്തിനാവില്ല. പ്രഖ്യാപിക്കുക: അവന്‍ ഒരേയൊരു ദൈവമാണ്; നിങ്ങള്‍ അവനോട് പങ്കുചേര്‍ക്കുന്ന അന്യദൈവങ്ങളില്‍ നിന്നൊക്കെ ഞാന്‍ മുക്തനത്രേ.

നാം വേദം നല്‍കിയ ആളുകള്‍ക്ക് സ്വന്തം മക്കളെ എന്നപോലെ മുഹമ്മദ് നബിയെ അറിയാം⁶
ആത്മനഷ്ടം വരുത്തിവെച്ചവര്‍ സത്യവിശ്വാസം കൈക്കൊള്ളുകയേ ഇല്ല. അല്ലാഹുവി ന്റെ പേരില്‍ കള്ളം ചമക്കുകയോ അവന്റെ ദൃഷ്ടാന്തങ്ങള്‍ വ്യാജമാക്കുകയോ ചെയ്തവനെക്കാള്‍ വലിയ അക്രമി ആരാണ്? അതിക്രമം ചെയ്തവര്‍ വിജയിക്കുകയേ ഇല്ല. നാം അവരെയെല്ലാം മഹ് ശറില്‍ സമ്മേളിപ്പിക്കുകയും അനന്തരം 'നിങ്ങള്‍ ജല്‍പിച്ചുകൊണ്ടിരുന്ന ആ പങ്കാളികള്‍ എവിടെ' എന്നു ബഹുദൈവവിശ്വാസികളോട് ചോദിക്കുകയും ചെയ്യുന്ന ദിവസം സ്മരണീയമത്രേ. എന്നിട്ട്, അവരുടെ ശിര്‍ക്കിന്റെ ഫലം ഈ ജല്പനം മാത്രമാകും: 'ഞങ്ങളുടെ നാഥനായ അല്ലാഹുതന്നെ സത്യം, ഞങ്ങള്‍ ബഹുദൈവവിശ്വാസികള്‍ ആയിരുന്നിട്ടേയില്ല!' സ്വന്തത്തെക്കുറിച്ച് അവര്‍ എങ്ങനെ നുണപറയുന്നുവെന്നും തങ്ങള്‍ കെട്ടിച്ചമച്ചുണ്ടാക്കിയിരുന്ന ദൈവങ്ങള്‍ അവരില്‍ നിന്ന് എങ്ങനെ അപ്രത്യക്ഷമായി എന്നും ചിന്തിച്ചു നോക്കൂ!⁷

താങ്കളെ സശ്രദ്ധം ശ്രവിക്കുന്നവര്‍ അവരിലുണ്ട്. അതു ഗ്രഹിക്കുന്നതിന് അവരുടെ ഹൃദയ ങ്ങള്‍ക്കു ആവരണമിടുകയും കാതുകള്‍ക്ക് മൂടികള്‍ വെക്കുകയും ചെയ്തിരിക്കയാണു നാം. ദൃഷ്ടാന്തങ്ങളത്രയും കണ്ടാലും അവരതില്‍ വിശ്വസിക്കയേ ഇല്ല. അങ്ങനെ, കുതര്‍ക്കം നടത്താനായി താങ്കളുടെയടുത്തു വന്നാല്‍ അവര്‍ തട്ടിവിടും: 'ഇതു പൂര്‍വികന്മാരുടെ കെട്ടുകഥകള്‍ മാത്രമാകുന്നു.' അവര്‍ ഖുര്‍ആനില്‍ നിന്നു ജനങ്ങളെ തടയുകയും സ്വയമതില്‍ നിന്നു അകന്നു പോവുകയുമാണ്. സ്വന്തത്തെ തന്നെ നാശത്തിലാഴ്ത്തുകയാണ് ചെയ്യുന്നതെന്ന് അവരറിയുന്നില്ല⁸

അവര്‍ നരകത്തിന്മേല്‍ നിറുത്തപ്പെടുന്നതും 'ഞങ്ങള്‍ ദുന്‍യാവിലേക്ക് മടക്കപ്പെടുകയും നാഥന്റെ ദൃഷ്ടാന്തങ്ങള്‍ വ്യാജമാക്കാതിരിക്കുകയും സത്യവിശ്വാസികളിലുള്‍പ്പെടുകയും ചെയ്തിരുന്നെങ്കില്‍' എന്നു അപേക്ഷിക്കുന്നതുമായ രംഗം അങ്ങു കണ്ടിരുന്നുവെങ്കില്‍..! അല്ല, ദുന്‍യാവില്‍ വെച്ച് മറച്ചുവെച്ചിരുന്നത് ഇപ്പോഴവര്‍ക്കു വെളിപ്പെട്ടിരിക്കുകയാകുന്നു⁹
മടക്കി അയക്കപ്പെട്ടാല്‍ തന്നെ നിരോധിതകാര്യങ്ങള്‍ തന്നെയാണ് വീണ്ടുമവര്‍ അനുവര്‍ത്തിക്കുക. നുണ പറയുക തന്നെയാണവര്‍, തീര്‍ച്ച.

ജീവിതമെന്നത് ഞങ്ങളുടെ ഈ ഐഹികജീവിതം മാത്രമാണ്, ഞങ്ങള്‍ ഉയിര്‍ത്തെഴുന്നേ ല്‍പിക്കപ്പെടുന്നതല്ല എന്ന് അവര്‍ ജല്‍പിച്ചു. തങ്ങളുടെ നാഥങ്കല്‍ അവര്‍ നിറുത്തപ്പെടുന്ന രംഗം താങ്കള്‍ കാണുകയാണെങ്കില്‍...! ഈ പുനരുത്ഥാനം യാഥാര്‍ത്ഥ്യം തന്നെയല്ലേ എന്ന് അവന്‍ ചോദി ക്കുമ്പോള്‍ 'ഞങ്ങളുടെ നാഥന്‍ തന്നെ സത്യം, വസ്തുത തന്നെ' എന്നവര്‍ പ്രതികരിക്കും. 'നിങ്ങള്‍ നിഷേധിച്ചുകൊണ്ടിരുന്നതിനാല്‍ ശിക്ഷ ആസ്വദിച്ചു കൊള്ളുക'എന്ന് അവന്‍ അരുളുന്നതാണ്.

അല്ലാഹുവുമായുള്ള ദര്‍ശനം വ്യാജമാക്കിയവര്‍ നഷ്ടത്തിലാപതിച്ചതു തന്നെ! അങ്ങനെ യാദൃച്ഛികമായി അന്ത്യനാള്‍ വന്നെത്തുമ്പോള്‍ 'ഹാ ഞങ്ങളുടെ കാര്യം മഹാകഷ്ടം, ഞങ്ങളിതില്‍ വീഴ്ച വരുത്തിയല്ലോ' എന്ന് അവര്‍ പരിഭവിക്കും. തങ്ങളുടെ കുറ്റകൃത്യങ്ങള്‍ സ്വന്തം മുതുകിലവര്‍ വഹിക്കുന്നതാണ്. അവര്‍ പേറുന്ന പാപഭാണ്ഡം എത്ര നികൃഷ്ടം! ഭൗതിക ജീവിതം കളിയും വിനോദ വും മാത്രമാണ്. എന്നാല്‍ സൂക്ഷ്മാലുക്കള്‍ക്ക് പാരത്രിക ജീവിതമാണ് ഉത്തമം. നിങ്ങളിത് ചിന്തിച്ചു മനസ്സിലാക്കുന്നില്ലേ?¹⁰

അവര്‍ ജല്‍പിച്ചുകൊണ്ടിരിക്കുന്ന കാര്യങ്ങള്‍ താങ്കളെ ദുഃഖിപ്പിക്കുന്നുണ്ടെന്ന് നാം നല്ലവ ണ്ണമറിയുന്നുണ്ട്. യഥാര്‍ത്ഥത്തില്‍ താങ്കളെയല്ല, അല്ലാഹുവിന്റെ ദൃഷ്ടാന്തങ്ങളാണ് അക്രമികള്‍ നിഷേധിച്ചു കൊണ്ടിരിക്കുന്നത്¹¹
താങ്കള്‍ക്കു മുമ്പും മുര്‍സലുകള്‍ വ്യാജരാക്കപ്പെട്ടിട്ടുണ്ട്. നിഷേധ- പീഡനങ്ങള്‍ക്കു വിധേയമായതൊക്കെ അവര്‍ ക്ഷമിച്ചു; അങ്ങനെ നമ്മുടെ സഹായം അവര്‍ക്കു ലഭ്യമായി. അല്ലാഹുവിന്റെ കല്‍പനകള്‍ ഭേദഗതി വരുത്താന്‍ ആര്‍ക്കുമാവില്ല. പൂര്‍വ ദൂതരുടെ വൃത്താന്തങ്ങള്‍ താങ്കള്‍ക്കുവന്നുകിട്ടിയിട്ടുണ്ടല്ലോ. ഇനി അവരുടെ അവഗണന ഗൗരവതരമാകുന്നു എങ്കില്‍ ഭൂമിയില്‍ ഒരു തുരങ്കമോ ആകാശത്തേക്ക് ഒരു കോണിയോ കണ്ടെത്തി അവര്‍ക്കൊരു ദൃഷ്ടാന്തം ഹാജറാക്കാന്‍ കഴിയുമെങ്കില്‍ ചെയ്‌തോളൂ¹²
അല്ലാഹു ഉദ്ദേശിച്ചിരുന്നുവെങ്കില്‍ അവരെയെല്ലാം ഋജുമാര്‍ഗത്തില്‍ ഒന്നിപ്പിച്ചേനേ. അതുകൊണ്ട്, മൂഢരുടെ ഗണത്തില്‍ ഒരിക്കലും താങ്കള്‍ അകപ്പെട്ടുപോകരുത്.

കേള്‍ക്കുന്നവര്‍ മാത്രമേ ഉത്തരം നല്‍കൂ. മരിച്ചവരെ അല്ലാഹു ഉയിര്‍ത്തെഴുന്നേല്‍പിക്കു ന്നതാണ്; പിന്നീടവര്‍ അവങ്കലേക്കു മടക്കപ്പെടും¹³
ആ നിഷേധികള്‍ വാദിക്കുന്നു: മുഹമ്മദ് നബിക്ക് എന്തേ തന്റെ നാഥന്റെ പക്കല്‍ നിന്ന് ഒരു ദൃഷ്ടാന്തം ഇറക്കപ്പെടുന്നില്ല? പറയുക: ദൃഷ്ടാന്തം ഇറക്കുവാന്‍ ശക്തിയുള്ളവന്‍ തന്നെയാണ് അല്ലാഹു. പക്ഷേ, അവരില്‍ മിക്കവരും യാഥാര്‍ത്ഥ്യം ഗ്രഹിക്കുന്നില്ല¹⁴
ഭൂതലത്തിലുള്ള ഏതൊരു ജീവിയും ഇരുചിറകുകളുമായി പറക്കുന്ന ഏതൊരു പക്ഷിയും നിങ്ങളെപ്പോലുള്ള ചില സമൂഹങ്ങള്‍ തന്നെയാണ്. യാതൊരു ന്യൂനതയും ഈ ഗ്രന്ഥത്തി ല്‍ നാം വരുത്തിയിട്ടില്ല. ശേഷം തങ്ങളുടെ നാഥങ്കലേക്ക് അവര്‍ സംഗമിപ്പിക്കപ്പെടും. നമ്മുടെ സൂക്ത ങ്ങള്‍ നിഷേധിച്ചവര്‍ ബധിരരും ഊമകളും അന്ധകാരങ്ങളില്‍ നിപതിച്ചവരുമാണ്¹⁵
താനുദ്ദേശിച്ചവരെ അല്ലാഹു ദുര്‍മാര്‍ഗത്തിലാക്കുന്നതും ഉദ്ദേശിച്ചവരെ നേര്‍വഴിയിലേക്കു നയിക്കുന്ന തുമാകുന്നു.

നബിയേ, ചോദിക്കുക: നിങ്ങള്‍ക്ക് ദൈവിക ശിക്ഷ വന്നെത്തുകയോ അന്ത്യനാള്‍ ആസന്ന മാവുകയോ ചെയ്താല്‍ അല്ലാഹു അല്ലാത്തവരോടുതന്നെയാണോ പ്രാര്‍ത്ഥിക്കുക? സത്യവാദി കളാണ് എങ്കില്‍ നിങ്ങള്‍ പറയൂ! അല്ല, തത്സമയം അല്ലാഹുവിനോടു മാത്രമേ നിങ്ങള്‍ പ്രാര്‍ത്ഥിക്കൂ; അപ്പോള്‍ ഏതൊന്നിനായി നിങ്ങള്‍ കേണപേക്ഷിക്കുന്നുവോ അത് -താനുദ്ദേശിച്ചാല്‍-അവന്‍ നീക്കി ത്തരും. തത്സമയം, അവന്നു പങ്കാളികളാക്കിയിരുന്നവയെ നിങ്ങള്‍ വിസ്മരിച്ചുകളയുന്നതാണ്¹⁶

താങ്കള്‍ക്കുമുമ്പ് വിവിധ സമൂഹങ്ങളിലേക്ക് നാം ദൂതന്മാരെ നിയോഗിച്ചിട്ടുണ്ട്. വിധേയത്വ മുള്ളവരാകാന്‍ വേണ്ടി അവരെ കഷ്ടതകളാലും ദുരിതങ്ങളാലും നാം പിടികൂടി. എന്നിട്ട് നമ്മുടെ ശിക്ഷ വന്നെത്തിയപ്പോള്‍ അവരെന്തേ വിധേയത്വം കാണിച്ചില്ല? പ്രത്യുത, അവരുടെ ഹൃദയങ്ങള്‍ കഠിനതരമാവുകയായിരുന്നു; സ്വന്തം ചെയ്തികളെ അവര്‍ക്ക് പിശാച് അലംകൃതമാക്കിക്കൊടുക്കുക യും ചെയ്തു. അങ്ങനെ, അനുസ്മരിപ്പിക്കപ്പെട്ട കാര്യങ്ങള്‍ വിസ്മരിച്ചു കളഞ്ഞപ്പോള്‍ സകലവിഭവ കവാടങ്ങളും അവര്‍ക്കു നാം തുറന്നുകൊടുക്കുകയുണ്ടായി. എന്നിട്ട് അതിലവര്‍ തിമിര്‍ത്താഹ്ലാദിച്ച പ്പോള്‍ യദൃച്ഛയാ നാമവരെ പിടികൂടി. തത്സമയമതാ അവര്‍ ഭഗ്നാശരായിരിക്കുന്നു! അങ്ങനെ അക്രമീ സമൂഹം പിഴുതെറിയപ്പെട്ടു¹⁷
പ്രപഞ്ച സംരക്ഷകനായ അല്ലാഹുവിനു സ്‌തോത്രം!

നബിയേ, ചോദിക്കുക: നിങ്ങളുടെ കേള്‍വിയും കാഴ്ചകളും അല്ലാഹു തിരിച്ചെടുക്കുകയും ഹൃദയങ്ങള്‍ക്കു മുദ്രവെക്കുകയും ചെയ്താല്‍ അവനല്ലാതെ, വേറെ ഏതൊരു ദൈവമാണ് അവ കൊണ്ടുവന്നു തരിക? നോക്കൂ, എങ്ങനെയൊക്കെയാണ് നാം ദൃഷ്ടാന്തങ്ങള്‍ പ്രതിപാദിക്കുന്നത്? എന്നിട്ടും എങ്ങനെയെല്ലാമാണ് അവര്‍ വ്യതിചലിച്ചുകളയുന്നത്? നബിയേ, ചോദിക്കുക: നിങ്ങളൊന്നു പറഞ്ഞു തരൂ, യാദൃച്ഛികമായോ പ്രത്യക്ഷത്തിലോ ദൈവിക ശിക്ഷ വന്നെത്തിയാല്‍ അക്രമികളായ ജനങ്ങള്‍ മാത്രമല്ലേ സംഹരിക്കപ്പെടുകയുള്ളൂ?¹⁸

ശുഭവാര്‍ത്താവാഹകരും താക്കീതു നല്‍കുന്നവരും മാത്രമായാണു നാം ദൂതന്മാരെ നിയോ ഗിക്കാറുള്ളത്. അതിനാല്‍ സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവര്‍ക്ക് ദുഃഖിക്കുകയോ ഭയപ്പെടുകയോ ചെയ്യേണ്ടതില്ല. നമ്മുടെ ദൃഷ്ടാന്തങ്ങള്‍ വ്യാജമാക്കി യിരുന്നവരെ അവരുടെ ധിക്കാരം കാരണമായി ശിക്ഷ പിടികൂടുന്നതായിരിക്കും¹⁹

നബിയേ, പ്രഖ്യാപിക്കുക: അല്ലാഹുവിന്റെ ഖജനാവുകള്‍ എന്റെ കൈയിലാണെന്നോ എനിക്ക് അദൃശ്യമറിയാമെന്നോ ഞാന്‍ ഒരു മലക്കാണെന്നോ നിങ്ങളോടു ഞാന്‍ അവകാശവാദമുന്ന യിക്കുന്നില്ലല്ലോ²⁰
എനിക്കു നല്‍കപ്പെടുന്ന ദിവ്യസന്ദേശങ്ങള്‍ പിന്തുടരുക മാത്രമാണു ഞാന്‍ ചെയ്യുന്നത്. ചോദിക്കുക: അന്ധനും കാഴ്ചയുള്ളവനും തുല്യരാവുമോ? നിങ്ങള്‍ ചിന്തിച്ചുനോക്കുന്നി ല്ലേ?²¹
തങ്ങളുടെ നാഥങ്കലേക്ക് സമ്മേളിപ്പിക്കപ്പെടുന്നതിനെ പേടിക്കുന്നവര്‍ക്ക് ഈ ഖുര്‍ആന്‍ വഴി താങ്കള്‍ താക്കീതു നല്‍കുക. അവനല്ലാതെ യാതൊരു സംരക്ഷകനും ശുപാര്‍ശകനും അവര്‍ക്കു ണ്ടാവില്ല. അവര്‍ ദൈവഭയമുള്ളവരായേക്കാം.

തങ്ങളുടെ റബ്ബിന്റെ സംതൃപ്തി ഉദ്ദേശിച്ചുകൊണ്ട് പ്രഭാത-പ്രദോഷങ്ങളില്‍ അവനോട് പ്രാര്‍ത്ഥിച്ചുകൊണ്ടിരിക്കുന്നവരെ താങ്കള്‍ ആട്ടിയോടിക്കരുത്. അവരുടെ കണക്കുനോക്കേണ്ട ചുമത ല താങ്കള്‍ക്കോ താങ്കളുടെ കണക്കുപരിശോധിക്കേണ്ട ബാധ്യത അവര്‍ക്കോ ഇല്ലല്ലോ; അതുണ്ടെങ്കി ലല്ലേ ആട്ടിയോടിക്കേണ്ടതുള്ളൂ! അങ്ങനെ ചെയ്താല്‍ താങ്കള്‍ അക്രമികളില്‍ പെട്ടുപോകും²²
അപ്രകാരം അവരില്‍ ചിലരെ ചിലരെക്കൊണ്ടു നാം പരീക്ഷണ വിധേയരാക്കുന്നതാണ്; 'നമുക്കിടയി ല്‍ നിന്നു ഈ പാവങ്ങള്‍ക്കാണോ അല്ലാഹു ഔദാര്യം ചെയ്തത്' എന്ന് അവര്‍ ചോദിക്കുവാന്‍ വേണ്ടി²³
കൃതജ്ഞത പ്രകാശിപ്പിക്കുന്നവരെക്കുറിച്ച് അല്ലാഹു സൂക്ഷ്മജ്ഞാനിയല്ലേ?

നമ്മുടെ ദൃഷ്ടാന്തങ്ങളില്‍ വിശ്വസിക്കുന്നവര്‍ താങ്കളുടെ സന്നിധിയില്‍ വന്നാല്‍ ഇങ്ങനെ പറയുക: നിങ്ങള്‍ക്കു സമാധാനമുണ്ടാകട്ടെ. അനുഗ്രഹം ചെയ്യുക എന്നത് നിങ്ങളുടെ നാഥന്‍ തന്റെ ബാധ്യതയായിട്ടാണു കാണുന്നത്. അതായത് നിങ്ങളിലൊരാള്‍ അവിവേകത്താല്‍ വല്ല ദോഷവും ചെയ്കയും എന്നിട്ട് പശ്ചാത്തപിക്കുകയും സല്‍കര്‍മങ്ങളനുഷ്ഠിക്കുകയും ചെയ്താല്‍ അവന്‍ ഏറ്റം പൊറുക്കുന്നവനും കരുണാമയനുമാകുന്നു. ഇപ്രകാരം ദൃഷ്ടാന്തങ്ങള്‍ പ്രതിപാദിക്കുകയാണു നാം; അധര്‍മകാരികളുടെ വഴി സ്പഷ്ടമായി വേര്‍തിരിഞ്ഞു കാണാന്‍ വേണ്ടി കൂടിയത്രേ ഇത്.

നബിയേ, പ്രഖ്യാപിക്കുക: അല്ലാഹുവിനെവിട്ട് നിങ്ങളാരാധിക്കുന്ന ദൈവങ്ങളെ പൂജിക്കു ന്നതില്‍ നിന്നു ഞാന്‍ നിരോധിക്കപ്പെടുക തന്നെ ചെയ്തിട്ടുണ്ട്. പറയുക: നിങ്ങളുടെ സ്വേച്ഛകള്‍ ഞാന്‍ പിന്‍പറ്റുകയില്ല; അങ്ങനെ ചെയ്താല്‍ ഞാന്‍ ദുര്‍മാര്‍ഗത്തില്‍ നിപതിച്ചതുതന്നെ! സന്മാര്‍ഗ പ്രാപ്തരില്‍ ഞാനുള്‍പ്പെടുകയില്ല. താങ്കള്‍ പ്രഖ്യാപിക്കുക: ഞാന്‍ എന്റെ നാഥങ്കല്‍ നിന്നുള്ള സ്പഷ്ടമായ ദൃഷ്ടാന്തങ്ങളിന്മേല്‍ തന്നെയാണു തീര്‍ച്ച; നിങ്ങളാകട്ടെ അതു വ്യാജമാക്കി. നിങ്ങള്‍ ധൃതിപ്പെട്ട് ആവശ്യപ്പെടുന്ന ശിക്ഷ എന്റെ പക്കലില്ല. അതു സംബന്ധിച്ച വിധി അല്ലാഹുവി നുള്ളതാണ്. അവന്‍ സത്യം പ്രതിപാദിച്ചു തരുന്നു. വിധികല്‍പിക്കുന്നവരില്‍ ഉത്തമന്‍ അവനത്രേ. നബിയേ, പ്രഖ്യാപിക്കുക: നിങ്ങള്‍ ധൃതിപ്പെട്ടാവശ്യപ്പെടുന്ന ശിക്ഷ എന്റെ വശമാണെങ്കില്‍, എനിക്കും നിങ്ങള്‍ക്കുമിടക്കുള്ള പ്രശ്‌നം തീരുമാനിക്കപ്പെട്ടു കഴിഞ്ഞേനെ!²⁴
അക്രമകാരികളെപ്പറ്റി ഏറ്റം നന്നായറിയുന്നവനത്രേ അല്ലാഹു.

അല്ലാഹുവിങ്കല്‍ മാത്രമാണ് അദൃശ്യകാര്യങ്ങളുടെ താക്കോലുകള്‍. അവന്നല്ലാതെ മറ്റാര്‍ ക്കുമവ അറിയില്ല. കരയിലും കടലിലുമുള്ളവയെപ്പറ്റിയത്രയും അഭിജ്ഞനാണവന്‍. ഒരു ഇല വീഴുന്ന തു പോലും അവനറിയാതിരിക്കില്ല. ഭൂമിയിലെ അന്ധകാരങ്ങളിലുള്ള ഒരു വിത്തും പച്ചയോ ഉണങ്ങിയ തോ ആയ സര്‍വതും സ്പഷ്ടമായൊരു ഗ്രന്ഥത്തില്‍ രേഖപ്പെടുത്തപ്പെടാതെയില്ല²⁵
രാത്രിയില്‍ നിങ്ങളെ പൂര്‍ണമായി പിടിച്ചെടുക്കുന്നത് അവനാണ്. പകല്‍ നിങ്ങളനുവര്‍ത്തിച്ചത് അവനറിയുന്നു. പിന്നീട്, നിര്‍ണിതമായ അവധിയുടെ പൂര്‍ത്തീകരണത്തിനായി പകല്‍ നിങ്ങളെയവന്‍ എഴുന്നേല്‍പി ക്കുന്നു. ശേഷം നിങ്ങളുടെ മടക്കം അവങ്കലേക്കുതന്നെ. പിന്നീട് സ്വന്തം ചെയ്തികളെപ്പറ്റി നിങ്ങളെ അവന്‍ അറിയിച്ചു തരുന്നതാണ്²⁶

തന്റെ അടിമകളുടെമേല്‍ സര്‍വാധിപത്യമുള്ളവനത്രേ അവന്‍. നിങ്ങളുടെ സംരക്ഷകമല ക്കുകളെ അവന്‍ നിയോഗിക്കുന്നു. അങ്ങനെ നിങ്ങളിലൊരുവ്യക്തിക്കു മരണം ആസന്നമായാല്‍ നമ്മുടെ ദൂതമാലാഖമാര്‍ അവനെ മരിപ്പിക്കുകയായി; ഒരു ന്യൂനതയും അവര്‍ വരുത്തില്ല. അനന്തരം, തങ്ങളുടെ യഥാര്‍ത്ഥ യജമാനനായ അല്ലാഹുവിങ്കലേക്ക് അവര്‍ തിരിച്ചയക്കപ്പെടും. അതിദ്രുതം കണക്കുനോക്കുന്നവനാണവന്‍.

ചോദിക്കുക: ഈ വിപത്തില്‍ നിന്നു അല്ലാഹു നമ്മെ രക്ഷിച്ചാല്‍ ഞങ്ങളവനോട് കൃത ജ്ഞരാവുക തന്നെ ചെയ്യും എന്ന് ഭവ്യതയോടെയും രഹസ്യമായും പ്രാര്‍ത്ഥിക്കുമ്പോള്‍, നിങ്ങളെ കരയിലും കടലിലും പിടികൂടുന്ന ദുരന്തങ്ങളില്‍ നിന്നു വിമോചിപ്പിക്കുന്നതാരാണ്? അതിലും മറ്റെല്ലാ വിപത്തുകളിലും നിന്നു നിങ്ങളെ രക്ഷപ്പെടുത്തുന്നത് അല്ലാഹുവാകുന്നു എന്നു താങ്കള്‍ പറയുക. എന്നിട്ടും നിങ്ങള്‍ അവനോട് പങ്കുചേര്‍ക്കുകയാണ്!²⁷

പറയുക: 'നിങ്ങളുടെ മുകളിലോ കാല്‍ക്കീഴിലോ നിന്ന് ശിക്ഷ അയക്കുവാനും, പല കക്ഷികളായി നിങ്ങളെ ഭിന്നിപ്പിച്ച് പരസ്പരം ആക്രമണത്തിന്റെ രുചിയാസ്വദിപ്പിക്കാനും കഴിവുറ്റവ നാണവന്‍.' അവര്‍ ഗ്രഹിക്കാനായി എങ്ങനെയെല്ലാമാണ് നാം ദൃഷ്ടാന്തങ്ങള്‍ പ്രതിപാദിക്കുന്നതെന്നു നോക്കൂ! താങ്കളുടെയാളുകള്‍ ഈ ഖുര്‍ആന്‍ നിഷേധിച്ചു; യഥാര്‍ത്ഥത്തില്‍ സത്യം തന്നെയാണത്. പറയുക: നിങ്ങളുടെ ഉത്തരവാദിത്വം ഏറ്റെടുത്തവനൊന്നുമല്ല ഞാന്‍! എല്ലാ വൃത്താന്തവും സാക്ഷാ ല്‍കൃതമാകുന്ന ഒരു ഘട്ടമുണ്ട്; വഴിയെ നിങ്ങളതു മനസ്സിലാക്കുന്നതാകുന്നു²⁸

നമ്മുടെ ദൃഷ്ടാന്തങ്ങളില്‍ വ്യാപൃതരായി പരിഹസിക്കുന്നവരെ കണ്ടാല്‍, മറ്റുവിഷയങ്ങളി ല്‍ പ്രവേശിക്കുന്നതുവരെ അവരെവിട്ടു താങ്കള്‍ തിരിഞ്ഞു കളയണം. ഇനി, പിശാച് വിസ്മരിപ്പിച്ചു കളഞ്ഞാല്‍, ഓര്‍മയായശേഷം അതിക്രമികളൊന്നിച്ചിരിക്കരുത്. അക്രമികളുടെ കണക്കു പരിശോധിക്കേണ്ട യാതൊരു ബാധ്യതയും സൂക്ഷ്മാലുക്കളായവര്‍ക്കില്ല; എന്നാല്‍, ഉദ്‌ബോധിപ്പിക്കേ ണ്ടതുണ്ട്; അവര്‍ ഭക്തിയുള്ളവര്‍ ആയേക്കാമല്ലോ!²⁹
സ്വന്തം മതകാര്യങ്ങളെ കളിയും വിനോദവുമാക്കുകയും ഭൗതികജീവിതം കബളിപ്പിക്കുകയും ചെയ്തവരെ താങ്കള്‍ കൈവിടുക. സ്വയംകൃതാനര്‍ത്ഥങ്ങളിലേക്ക് ഏതൊരാളും തള്ളപ്പെടുമെന്നതിനാല്‍ ഈ ഖുര്‍ആന്‍ കൊണ്ട് താങ്കള്‍ ഉല്‍ബോധിപ്പിക്കുക; അയാള്‍ക്ക് അല്ലഹുവല്ലാത്ത സംരക്ഷകനോ ശുപാര്‍ശകനോ ഉണ്ടാവി ല്ല³⁰
സര്‍വവിധ പ്രായശ്ചിത്തവും ചെയ്താലും അയാളില്‍ നിന്ന് അത് സ്വീകരിക്കപ്പെടില്ല. സ്വന്തം ചെയ്തികള്‍ മൂലം നാശത്തിലാപതിച്ചവരത്രേ അവര്‍. തങ്ങളുടെ നിഷേധഫലമായി ചുട്ടുപൊള്ളുന്ന പാനീയവും വേദനാനിര്‍ഭരമായ ശിക്ഷയുമാണ് അവര്‍ക്കുണ്ടാവുക.

ചോദിക്കുക: ഉപകാരമോ ഉപദ്രവമോ ചെയ്യാന്‍ കഴിവില്ലാത്തവയെ, അല്ലാഹുവിനെ വിട്ട് ഞങ്ങള്‍ ആരാധിക്കുകയോ! അവന്‍ സന്മാര്‍ഗത്തിലാക്കിയിട്ടും ഞങ്ങള്‍ പിന്നിലേക്ക് മടക്കപ്പെടുക യോ! ഇങ്ങോട്ടുവാ, ഇവിടെയിതാ നേരായ പന്ഥാവ് എന്നു സ്‌നേഹിതന്മാര്‍ വിളിച്ചു ക്ഷണിച്ചിട്ടും അവഗണിച്ചു, മരുഭൂമിയില്‍ പിശാച് വഴിതെറ്റിച്ചിട്ട് പരിഭ്രാന്തനായി അലഞ്ഞു തിരിയുന്നവനെപ്പോലെ ഞങ്ങളാവുകയോ!³¹
താങ്കള്‍ പ്രഖ്യാപിക്കുക: അല്ലാഹുവിന്റേതാണ് ശരിയായ നേര്‍മാര്‍ഗം; സര്‍വലോക സംരക്ഷകന്നു വിധേയരാകുവാനും നമസ്‌കാരം നിലനിറുത്താനും അവനെ സൂക്ഷി ച്ചു ജീവിക്കാനുമാണു ഞങ്ങള്‍ അനുശാസിക്കപ്പെട്ടിട്ടുള്ളത്. അവങ്കലേക്കാണ് നിങ്ങള്‍ സംഗമിപ്പിക്ക പ്പെടുക.

ഭുവന-വാനങ്ങള്‍ സത്യസമേതം സൃഷ്ടിച്ചത് അവനാണ്. 'ഉണ്ടാവുക' എന്ന് അവന്‍ ഉത്തരവിടുമ്പോള്‍ അതു സംഭവിക്കുന്നു³²
സത്യമത്രേ അവന്റെ വചനം. കാഹളത്തില്‍ ഊതപ്പെടു ന്ന അന്ത്യനാളില്‍ അവന്ന് മാത്രമായിരിക്കും ആധിപത്യം. ദൃശ്യവും അദൃശ്യവും അറിയുന്നവനും യുക്തിമാനും സൂക്ഷ്മ ജ്ഞാനിയുമാണവന്‍.

ഇബ്രാഹീം നബി പിതാവ് ആസറിനോട് ചോദിച്ച ഘട്ടം സ്മരണീയമാണ്: 'ബിംബങ്ങളെയാ ണോ താങ്കള്‍ ദൈവങ്ങളായി വരിച്ചിരിക്കുന്നത്? താങ്കളും സ്വജനതയും സ്പഷ്ടമായ ദുര്‍മാര്‍ഗത്തില്‍ തന്നെയാണെന്നാണ് ഞാന്‍ മനസ്സിലാക്കുന്നത്!' അങ്ങനെ ഭുവന-വാനങ്ങളുടെ അധൃഷ്യാധിപത്യം ഇബ്രാഹീം നബിക്കു നാം കാണിച്ചു കൊടുത്തു; താന്‍ ദൃഢവിശ്വാസമുള്ളവരുടെ ഗണത്തിലുള്‍പ്പെ ടാന്‍ വേണ്ടി.

അങ്ങനെ രാത്രിയായപ്പോള്‍ അദ്ദേഹം ഒരു നക്ഷത്രം കണ്ടു, 'ഇതാണ് എന്റെ നാഥന്‍' എന്നു പറഞ്ഞു. പിന്നെ അത് അസ്തമിച്ചപ്പോള്‍, 'മറഞ്ഞുപോകുന്നവരെ ദൈവമായി ഞാന്‍ ഇഷ്ടപ്പെ ടുന്നില്ല' എന്ന് അദ്ദേഹം പ്രഖ്യാപിച്ചു. അനന്തരം ചന്ദ്രന്‍ ഉദിച്ചുകണ്ടപ്പോള്‍ 'ഇതാണ് എന്റെ റബ്ബ്' എന്ന് അദ്ദേഹം പറഞ്ഞു. അതും അസ്തമിച്ചപ്പോള്‍ താന്‍ പ്രതികരിച്ചു: 'എന്റെ നാഥന്‍ എനിക്കു മാര്‍ഗദര്‍ശനം നല്‍കുന്നില്ല എങ്കില്‍ ഞാന്‍ വഴിതെറ്റിയവരില്‍ പെട്ടുപോവുകതന്നെ ചെയ്യുന്നതാണ്.' പിന്നീട്, സൂര്യനുദിച്ചുകണ്ടപ്പോള്‍ 'ഇതാണ് എന്റെ നാഥന്‍, ഏറ്റം വലുതാണല്ലോ ഇത്' എന്നദ്ദേഹം പ്രസ്താവിച്ചു. അതും അസ്തമിച്ചപ്പോള്‍ അദ്ദേഹം പ്രഖ്യാപിച്ചു: 'എന്റെ ജനങ്ങളേ, അല്ലാഹുവിനോ ട് നിങ്ങള്‍ പങ്കുചേര്‍ക്കുന്നവയില്‍ നിന്നത്രയും നിശ്ചയം ഞാന്‍ മുക്തനാകുന്നു.' ഭുവന-വാനങ്ങള്‍ പടച്ച അല്ലാഹുവിലേക്ക് ഞാനിതാ മുഖംതിരിച്ചിരിക്കുന്നു. സല്‍പന്ഥാവിനെ അഭിമുഖീകരിച്ചവനാണ് ഞാന്‍; ബഹുദൈവ വിശ്വാസികളില്‍ പെട്ടവനല്ല!³³

ഇബ്രാഹീം നബിയോട് തന്റെ ജനം വാഗ്വാദം നടത്തിയപ്പോള്‍ അദ്ദേഹം ചോദിച്ചു³⁴
അല്ലാഹു എന്നെ നേര്‍വഴിയിലാക്കിയിരിക്കെ അവന്റെ കാര്യത്തിലാണോ നിങ്ങളെന്നോട് തര്‍ക്കിക്കു ന്നത്? നിങ്ങളവനോട് പങ്കാളികളാക്കുന്ന യാതൊന്നിനെയും എനിക്കു പേടിയില്ല! എന്റെ നാഥനുദ്ദേശി ച്ചതേ സംഭവിക്കൂ. സമസ്തകാര്യങ്ങളെക്കുറിച്ചും എന്റെ രക്ഷിതാവ് പൂര്‍ണ ജ്ഞാനിയത്രേ. ചിന്തി ക്കുന്നില്ലേ നിങ്ങള്‍? അല്ലാഹു യാതൊരു തെളിവും അവതരിപ്പിച്ചു തരാത്തവയെ അവന്റെ പങ്കാളിക ളാക്കുന്നത് നിങ്ങള്‍ ഭയപ്പെടാതിരിക്കെ നിങ്ങള്‍ പങ്കുചേര്‍ക്കുന്നവയെ ഞാനെന്തിനു പേടിക്കണം? നാമിരു കക്ഷികളില്‍ ആരാണു നിര്‍ഭയരാകാന്‍ കൂടുതല്‍ അര്‍ഹരെന്നു നമുക്കു നോക്കാം, നിങ്ങള്‍ വിവരമുള്ളവരാണെങ്കില്‍!³⁵
സത്യവിശ്വാസം കൈക്കൊള്ളുകയും വിശ്വാസത്തില്‍ ബഹുദൈ വത്വം കലര്‍ത്താതിരിക്കുകയും ചെയ്തവര്‍ക്കാണ് നിര്‍ഭയത്വം. സന്മാര്‍ഗപ്രാപ്തരും അവര്‍ തന്നെ.

ഇബ്രാഹീം നബി സ്വജനതക്കെതിരെ സമര്‍പ്പിച്ച ആ ന്യായ പ്രമാണങ്ങള്‍ നാം നല്‍കിയ വയത്രേ³⁶
നാം ഉദ്ദേശിക്കുന്നവര്‍ക്ക് പദവികള്‍ ഉയര്‍ത്തിക്കൊടുക്കുന്നു. താങ്കളുടെ നാഥന്‍ യുക്തിമാ നും സര്‍വജ്ഞാനിയുമാണ്. അദ്ദേഹത്തിനു നാം ഇസ്ഹാഖിനെയും യഅ്ഖൂബിനെയും കനിഞ്ഞേ കി. അവരെയെല്ലാം-അതിനുമുമ്പ് നൂഹ് നബിയെയും-നാം മാര്‍ഗദര്‍ശനം ചെയ്തു; ഇബ്രാഹീമിന്റെ സന്തതികളില്‍ നിന്ന് ദാവൂദ്, സുലൈമാന്‍, അയ്യൂബ്, യൂസുഫ്, മൂസാ, ഹാറൂന്‍ എന്നിവരെയും. പു ണ്യവാന്മാര്‍ക്ക് ഇങ്ങനെയാണു നാം പ്രതിഫലം നല്‍കുക. സകരിയ്യാ, യഹ്‌യാ, ഈസാ, ഇല്‍യാസ്-ഇവരൊക്കെ സദ്‌വൃത്തരില്‍ പെട്ടവരായിരുന്നു-ഇസ്മാഈല്‍, അല്‍യസഅ്, യൂനുസ്, ലൂഥ് എന്നിവര്‍ക്കും നാം മാര്‍ഗദര്‍ശനമേകി. ഇവരെയൊക്കെ മറ്റുള്ളവരേക്കാള്‍ നാം സമാദരണീയരാക്കി യിരുന്നു. അവരുടെ പിതാക്കളിലും സന്തതികളിലും സഹോദരങ്ങളിലും നിന്നു പലരെയും നാം നേര്‍വഴിയിലാക്കി. അവരെയെല്ലാം നാം ശ്രേഷ്ഠരായി തെരഞ്ഞെടുക്കുകയും സല്‍പന്ഥാവിലേക്ക് നയിക്കുകയുമുണ്ടായി. ഇതാണ് അല്ലാഹുവിന്റെ മാര്‍ഗദര്‍ശനം. സ്വന്തം അടിമകളില്‍ നിന്നു താനുദ്ദേ ശിക്കുന്നവരെ അവന്‍ വഴികാട്ടുന്നു. അവര്‍ ബഹുദൈവ വിശ്വാസം വരിച്ചിരുന്നുവെങ്കില്‍, അനുവര്‍ ത്തിച്ചിരുന്ന സല്‍കര്‍മങ്ങളത്രയും തകര്‍ന്നു പോയേനെ.

നാം വേദഗ്രന്ഥവും തത്ത്വജ്ഞാനവും പ്രവാചകത്വവും നല്‍കിയവരാണവര്‍. ഇനി, ഈ സമൂഹം അവ തിരസ്‌കരിക്കുന്നുവെങ്കില്‍, നിഷേധിക്കുന്നവരല്ലാത്ത ഒരു സമൂഹത്തെ നാമത് ഏല്‍പി ക്കുന്നതാണ്! അല്ലാഹു സന്മാര്‍ഗത്തിലാക്കിയവരാണവര്‍. അതുകൊണ്ട്, അവരുടെ ഋജുവായ പന്ഥാവ് താങ്കള്‍ അനുധാവനം ചെയ്യണം. നബിയേ, പറയുക: ഈ മതപ്രബോധനത്തിനു യാതൊരു കൂലിയും നിങ്ങളോടു ഞാന്‍ ചോദിക്കുന്നില്ല, ലോകരോടുള്ള ഉദ്‌ബോധനം മാത്രമാണിത്³⁷

ഒരു മനുഷ്യനും അല്ലാഹു യാതൊരു ദിവ്യസന്ദേശവും അവതരിപ്പിച്ചിട്ടില്ല എന്നു ജല്‍പിച്ചപ്പോ ള്‍ അല്ലാഹുവിനെ യഥായോഗ്യം അവര്‍ ബഹുമാനിച്ചില്ല!³⁸
താങ്കള്‍ ചോദിക്കുക: ജനങ്ങള്‍ക്ക് സന്മാര്‍ഗവും പ്രകാശവുമായി മൂസാനബി കൊണ്ടുവന്ന തൗറാത്ത് ആരാണവതരിപ്പിച്ചത്? നിങ്ങളത് ഭൂരിഭാഗവും ഒളിപ്പിക്കുകയും ചിലതുമാത്രം വെളിപ്പെടുത്തുകയും ചെയ്യുന്ന കടലാസു കഷ്ണങ്ങളാ ക്കി. നിങ്ങള്‍ക്കും പൂര്‍വ പിതാക്കള്‍ക്കും അറിവില്ലാത്തത് അതു വഴി നിങ്ങള്‍ക്ക് അഭ്യസിപ്പിക്കപ്പെടു കയുണ്ടായി. അല്ലാഹുവാണ് തൗറാത്ത് അവതരിപ്പിച്ചത് എന്നു താങ്കള്‍ പ്രഖ്യാപിക്കുക; എന്നിട്ടവരെ കൈവെടിയുക-തങ്ങളുടെ വിനോദങ്ങളില്‍ സൈ്വരവിഹാരം നടത്തട്ടെ അവര്‍³⁹

ഈ ഖുര്‍ആന്‍ അനുഗൃഹീതവും മുമ്പുള്ളതിനെ ശരിവെക്കുന്നതുമായി, മക്കക്കാരെയും അതിനുചുറ്റുമുള്ളവരെയും താങ്കള്‍ താക്കീതു ചെയ്യാനായി നാമവതരിപ്പിച്ചതാണ്. പരലോകവിശ്വാസ മുള്ളവര്‍ ഇതിനെയും വിശ്വസിക്കും; തങ്ങളുടെ നമസ്‌കാരങ്ങള്‍ കൃത്യമായനുഷ്ഠിക്കുകയും ചെയ്യും അവര്‍. അല്ലാഹുവിന്റെ പേരില്‍ വ്യാജം ചമക്കുകയോ, യാതൊരു ബോധനവും നല്‍കപ്പെടാതെ 'എനിക്ക് ദിവ്യസന്ദേശം ലഭിച്ചിരിക്കുന്നു' എന്നു തട്ടിവിടുകയോ ചെയ്തവനേക്കാളും, 'അല്ലാഹു ഇറക്കിയത് പോലുള്ളത് എനിക്കും അവതരിപ്പിക്കാന്‍ കഴിയും' എന്നു ജല്‍പിച്ചവനെക്കാളും⁴⁰
വലിയ അക്രമി ആരുണ്ട്! 'നിങ്ങളുടെ ആത്മാക്കളെ പുറന്തള്ളൂ' എന്നു ശാസിച്ചുകൊണ്ട് മലക്കുകള്‍ കൈനീട്ടിക്കൊണ്ടിരിക്കെ ആ അക്രമികള്‍ മരണവെപ്രാളങ്ങളിലകപ്പെടുന്ന സന്ദര്‍ഭം താങ്കള്‍ കാണു കയാണെങ്കില്‍..! 'അല്ലാഹുവിന്റെ പേരില്‍ അസത്യങ്ങള്‍ തട്ടിവിട്ടിരുന്നതിനാലും അവന്റെ ദൃഷ്ടാന്ത ങ്ങളെവിട്ട് അഹങ്കരിച്ചിരുന്നതിനാലും ഇന്നു നിങ്ങള്‍ക്ക് നീചമായ ശിക്ഷ നല്‍കപ്പെടുന്നതാണ്' എന്നു അല്ലാഹു പറയും⁴¹
ആദ്യവട്ടം സൃഷ്ടിച്ചപ്പോഴെന്നപോലെ നിങ്ങളിതാ ഒറ്റക്ക് നമ്മുടെയടു ത്തുവന്നിരിക്കുന്നു! നാം നല്‍കിയിരുന്നതൊക്കെയും പിന്നില്‍ വിട്ടേച്ചു പോന്നിരിക്കയാണ് നിങ്ങള്‍! അല്ലാഹുവിന്റെ പങ്കുകാരാണെന്നു നിങ്ങള്‍ വാദിച്ചിരുന്ന ശുപാര്‍ശകന്മാരെയൊന്നും നിങ്ങളൊന്നിച്ചു നാം കാണുന്നില്ല! നിങ്ങള്‍ പരസ്പരമുണ്ടായിരുന്ന ബന്ധമറ്റുപോവുകയും ജല്‍പിച്ചിരുന്നതെല്ലാം നിങ്ങളെവിട്ടു അപ്രത്യക്ഷമാവുകയും ചെയ്തിരിക്കയാണ്⁴²

അല്ലാഹു തന്നെയാണ് വിത്തും ഈത്തപ്പഴക്കുരുവും പിളര്‍ത്തി മുളപ്പിക്കുന്നത്. അവന്‍ നിര്‍ജീവവസ്തുക്കളില്‍ നിന്നു ജീവനുള്ളവ പുറത്തുകൊണ്ടുവരുന്നു; ജീവനുള്ളവയില്‍ നിന്നു നിര്‍ ജീവങ്ങളും. അല്ലാഹു മാത്രമാണിതൊക്കെ ചെയ്യുന്നത്.-എന്നിട്ടും എങ്ങനെ നിങ്ങള്‍ വഴിതെറ്റിക്കപ്പെ ടുന്നു? പ്രഭാതം പിളര്‍ത്തെടുക്കുന്നതും രാത്രിയെ വിശ്രമവേളയാക്കുന്നതും സൂര്യ-ചന്ദ്രന്മാരെ കണ ക്കുകള്‍ക്കു നിദാനമാക്കിയതും അവന്‍ തന്നെ. പ്രതാപശാലിയും സര്‍വജ്ഞാനിയുമായ അല്ലാഹുവി ന്റെ നിര്‍ണയമാണത്. കടലിലും കരയിലും അന്ധകാരങ്ങളില്‍ വഴികണ്ടെത്താനായി നക്ഷത്രങ്ങള്‍ പടച്ചതും അവനാകുന്നു. കാര്യങ്ങള്‍ മനസ്സിലാക്കുന്നവര്‍ക്കായി നാം ദൃഷ്ടാന്തങ്ങള്‍ പ്രതിപാദിച്ചിരിക്കു കയാണ്. ഒരേയൊരാത്മാവില്‍ നിന്നു അവനാണ് നിങ്ങളെ സൃഷ്ടിച്ചത്, പിന്നീട് നിങ്ങള്‍ക്ക് ഓരോ സ്ഥിര സങ്കേതവും താവളവുമുണ്ട്. കാര്യബോധമുള്ളവര്‍ക്കായി നാം ദൃഷ്ടാന്തങ്ങള്‍ വിശദീകരിക്കു ന്നു⁴³

അന്തരീക്ഷത്തില്‍ നിന്നു മഴവര്‍ഷിപ്പിക്കുന്നത് അവനാണ്. അതുവഴി നാം എല്ലാ സസ്യങ്ങളെയും മുളപൊട്ടിക്കുകയും അതില്‍ നിന്നു പച്ചച്ചെടികള്‍ ഉണ്ടാക്കുകയും അവയില്‍ നിന്നു ഇടതൂര്‍ന്നു തിങ്ങിയ ധാന്യം ബഹിര്‍ഗമിപ്പിക്കുകയും ചെയ്യുന്നു; ഈന്തപ്പനയുടെ കൊതുമ്പില്‍ നിന്നു തൂങ്ങുന്ന കുലകളും, പരസ്പര സദൃശവും എന്നാല്‍ വ്യതിരിക്തവുമായ മുന്തിരിയുടെയും ഒലീവിന്റെയും ഉറുമാനിന്റെയും തോട്ടങ്ങളും നാമുണ്ടാക്കി. ഇവ കായ്ക്കുമ്പോള്‍, അതില്‍ ഫലങ്ങളുണ്ടാകുന്നതും അവ പാകമാകുന്നതും സൂക്ഷ്മ നിരീക്ഷണം നടത്തുക-വിശ്വാസമുള്ളജനതക്ക് അതില്‍ ദൃഷ്ടാന്തങ്ങ ളുണ്ട്, തീര്‍ച്ച⁴⁴

ജിന്നുകളെ അല്ലാഹു പടച്ചതായിട്ടും മുശ്‌രിക്കുകള്‍ അവരെ അവന്റെ പങ്കുകാരാക്കി. ഒരറിവുമില്ലാതെ അവന് ആണ്‍കുട്ടികളെയും പെണ്‍കുട്ടികളെയും അവര്‍ കെട്ടിച്ചമച്ചു. അവര്‍ അപ്പറ യുന്നതില്‍ നിന്നൊക്കെ അവന്‍ എത്ര സമുന്നതനും പരിശുദ്ധനുമാണ്! ഭുവന-വാനങ്ങള്‍ മുന്‍ മാതൃകയില്ലാതെ സൃഷ്ടിച്ചവനാണവന്‍. ഒരു സഹധര്‍മിണിയില്ലാതെ എങ്ങനെയാണവനു സന്താനമു ണ്ടാവുക!⁴⁵
സമസ്ത വസ്തുക്കളെയും പടച്ചത് അവനാണ്. എല്ലാ വസ്തുക്കളെക്കുറിച്ചും സൂക്ഷ് മജ്ഞാനിയാണവന്‍. അവനാണ് നിങ്ങളുടെ നാഥനായ അല്ലാഹു. അവനല്ലാതെ മറ്റൊരു ദൈവവും ഇല്ലതന്നെ. മുഴുവന്‍ വസ്തുക്കളുടെയും സ്രഷ്ടാവാണവന്‍. അതുകൊണ്ട് അവനെ നിങ്ങള്‍ ആരാധി ക്കുക. എല്ലാ വസ്തുക്കളുടെയും മുഴുവന്‍ കാര്യങ്ങളും ഏറ്റെടുത്തുനിര്‍വഹിക്കുന്നതും അവനാകു ന്നു. ദൃഷ്ടികള്‍ അവനെ കണ്ടെത്തുകയില്ല; എന്നാല്‍ എല്ലാ കണ്ണുകളെയും അവന്‍ കാണുന്നതുമാണ്. അവന്‍ സൂക്ഷ്മ ദൃഷ്ടിയുള്ളവനും അതീവ ജ്ഞാനിയുമത്രേ.

നിശ്ചയമായും നിങ്ങള്‍ക്കു രക്ഷിതാവിങ്കല്‍ നിന്നുള്ള ദൃഷ്ടാന്തങ്ങള്‍ വന്നുകിട്ടിയിരിക്കു ന്നു. അതുകൊണ്ട്, ഒരാള്‍ ഉള്‍ക്കാഴ്ചയുള്ളവനായാല്‍ അതിന്റെ ഗുണം അവനുതന്നെയാണു ലഭിക്കു ക; അന്ധനായാല്‍ അതിന്റെ ദോഷവും അവനുമാത്രം. നിങ്ങളെ കാത്തു സംരക്ഷിക്കേണ്ട ചുലതലയു ള്ളവനൊന്നുമല്ല ഞാന്‍. ഇപ്രകാരം നാം ദൃഷ്ടാന്തങ്ങള്‍ വിശദീകരിക്കുന്നു-താങ്കള്‍ മറ്റെവിടെ നിന്നോ പഠിച്ചുവന്നതാണ് എന്ന് ബഹുദൈവവിശ്വാസികള്‍ പറയാന്‍ വേണ്ടി⁴⁶
വിവരമള്ള ഒരു ജനവിഭാഗ ത്തിനായി നാം ഇത് പ്രതിപാദിച്ചു കൊടുക്കാന്‍ വേണ്ടിയും.

താങ്കളുടെ രക്ഷിതാവിങ്കല്‍ നിന്നു സന്ദേശം നല്‍കപ്പെടുന്നവ പിന്‍തുടരുക; അവനല്ലാതെ ഒരു ദൈവവും ഇല്ലതന്നെ. ബഹുദൈവവിശ്വാസികളെ താങ്കള്‍ അവഗണിക്കുക. അല്ലാഹു ഉദ്ദേശിച്ചി രുന്നുവെങ്കില്‍ അവര്‍ ബഹുദൈവത്വം പുലര്‍ത്തുമായിരുന്നില്ല. അവരെ കാത്തുസൂക്ഷിക്കേണ്ട ഉത്തരവാദിത്വമൊന്നും അങ്ങയുടെ മേല്‍ നാം നിശ്ചയിച്ചിട്ടില്ല. അവരുടെ ചുമതലയേല്‍ക്കാനുള്ള വക്കീലുമല്ല താങ്കള്‍.

അല്ലാഹുവിനെ വിട്ട് മുശ്‌രിക്കുകള്‍ ആരാധിക്കുന്ന ദൈവങ്ങളെ നിങ്ങള്‍ ശകാരിക്കരുത്. വിവരമില്ലാതെ, അതിക്രമമായി അവര്‍ അല്ലാഹുവിനെ ചീത്ത പറയാന്‍ അതു നിമിത്തമാകും⁴⁷
ഇങ്ങനെ ഓരോ സമൂഹത്തിനും അവരുടെ കര്‍മങ്ങള്‍ നാം അലംകൃതമാക്കിക്കൊടുത്തിരിക്കുകയാ ണ്. പിന്നീട്, തങ്ങളുടെ നാഥങ്കലേക്കായിരിക്കും അവരുടെ മടക്കം. തത്സമയം തങ്ങളുടെ പ്രവര്‍ത്തന ങ്ങളെക്കുറിച്ച് അവര്‍ക്ക് അവന്‍ അറിയിച്ചുകൊടുക്കുന്നതാണ്. എന്തെങ്കിലും ദൃഷ്ടാന്തം വന്നുകിട്ടുക യാണെങ്കില്‍ അതില്‍ തങ്ങള്‍ വിശ്വസിക്കുക തന്നെ ചെയ്യുമെന്ന് അവര്‍ പരമാവധി ആണയിട്ടു പറയുന്നു. ദൃഷ്ടാന്തങ്ങള്‍ അല്ലാഹുവിങ്കല്‍ മാത്രമാണുള്ളത് എന്നു താങ്കല്‍ പ്രതികരിക്കുക. മുസ്‌ലിംകളേ, നിങ്ങള്‍ക്ക് എന്തറിയാം, അവ വന്നുകിട്ടിയാല്‍ തന്നെ അവര്‍ വിശ്വസിക്കുകയില്ല⁴⁸

ഈ ഖുര്‍ആന്‍ ആദ്യം വിശ്വസിക്കാതിരുന്നത് പോലെ ഇപ്പോഴും അവരുടെ ഹൃദയങ്ങളും കണ്ണുകളും നാം മറിച്ചുകൊണ്ടിരിക്കുകയും തങ്ങളുടെ ധിക്കാരവുമായി അന്ധമായി വിഹരിക്കാന്‍ വിട്ടുകളയുകയും ചെയ്യുകയാണ്. അവരിലേക്ക് നാം മലക്കുകളെ ഇറക്കുകയും മരിച്ചവര്‍ അവരോടു സംസാരിക്കുകയും സകല വസ്തുക്കളെയും കൂട്ടമായി അവരുടെ മുമ്പിലേക്ക് നാം സംഗമിപ്പിച്ചു കൊടുക്കുകയും ചെയ്താലും അല്ലാഹു ഉദ്ദേശിച്ചാലല്ലാതെ അവര്‍ സത്യവിശ്വാസം കൈക്കൊള്ളാന്‍ പോകുന്നില്ല. പക്ഷേ, അവരില്‍ മിക്കവരും വിവരം കെട്ടവരാകുന്നു⁴⁹

അപ്രകാരം, മനുഷ്യരിലും ജിന്നുകളിലും പെട്ട പിശാചുക്കളെ ഓരോ പ്രവാചകന്നും നാം പ്രതിയോഗികളാക്കിയിട്ടുണ്ട്. വഞ്ചനയില്‍ വീഴ്ത്തുന്ന ഭംഗിവാക്കുകള്‍ അവര്‍ പരസ്പരം ദുര്‍ ബോധനം ചെയ്യും -താങ്കളുടെ നാഥന്‍ ഉദ്ദേശിച്ചിരുന്നുവെങ്കില്‍ അവരതു ചെയ്യില്ലായിരുന്നു; അതു കൊണ്ട്, അവരെയും അവര്‍ പടച്ചുവിടുന്ന നുണകളും വെറുതെ വിടുക-പരലോകവിശ്വാസമില്ലാത്ത വരുടെ ഹൃദയങ്ങള്‍ അതിലേക്ക് ആകൃഷ്ടമാകുവാനും അവരതില്‍ സംതൃപ്തരാകാനും തങ്ങളനുവര്‍ ത്തിക്കുന്ന കുറ്റകൃത്യങ്ങളില്‍ അവര്‍ നിരന്തരം നിലകൊള്ളുവാനും വേണ്ടി⁵⁰

ചോദിക്കുക: വിസ്തൃതമായി നിങ്ങള്‍ക്ക് ഖുര്‍ആന്‍ ഇറക്കിത്തന്നത് അല്ലാഹുവാണല്ലോ; എന്നിട്ടും അവനല്ലാത്തവരെയാണോ ഞാന്‍ വിധികര്‍ത്താവായി അന്വേഷിക്കേണ്ടത്?⁵¹
ഈ ഖുര്‍ ആന്‍ സത്യസമേതം നിങ്ങളുടെ നാഥങ്കള്‍ നിന്നു അവതരിപ്പിക്കപ്പെട്ടതാണെന്ന് നാം വേദം നല്‍കിയ ആളുകള്‍ക്കറിയാം. അത്‌കൊണ്ട് താങ്കള്‍ സംശയാലുക്കളില്‍ പെട്ടുപോവുകയേ അരുത്. താങ്കളുടെ നാഥന്റെ വചനം നീതിനിഷ്ഠവും സത്യസന്ധവുമായി സമ്പൂര്‍ണമായിരിക്കുന്നു. അവന്റെ വചനങ്ങള്‍ മാറ്റിമറിക്കുന്ന യാതൊന്നുമില്ല⁵²
എല്ലാം കേള്‍ക്കുന്നവനും അറിയുന്നവനുമത്രേ അവന്‍.

ഭൂമിയിലുള്ള ഭൂരിപക്ഷത്തെ അനുസരിക്കുകയാണെങ്കില്‍ അല്ലാഹുവിന്റെ മാര്‍ഗത്തില്‍ നിന്ന് താങ്കളെയവര്‍ വഴിതെറ്റിച്ചു കളയുന്നതാണ്. ഊഹങ്ങള്‍ പിന്‍പറ്റുകയും നുണപറയുകയും മാത്രമാണവര്‍ ചെയ്യുന്നത്⁵³
തന്റെ പന്ഥാവില്‍ നിന്നു വഴിതെറ്റിപ്പോകുന്നവര്‍ ആരാണെന്ന് അല്ലാഹുവിനു നന്നായറിയാം. സന്മാര്‍ഗ പ്രാപ്തരെക്കുറിച്ചും അഭിജ്ഞനത്രേ അവന്‍.

അതുകൊണ്ട്, അല്ലാഹുവിന്റെ ദൃഷ്ടാന്തങ്ങളില്‍ വിശ്വസിക്കുന്നവരാണെങ്കില്‍, അവന്റെ പേരുപറഞ്ഞറുക്കപ്പെട്ടതില്‍ നിന്നു നിങ്ങള്‍ ഭക്ഷിച്ചുകൊള്ളുക⁵⁴
അല്ലാഹുവിന്റെ നാമത്തിലറുക്ക പ്പെട്ടതില്‍ നിന്നു ആഹരിക്കുന്നതിനു നിങ്ങള്‍ക്കെന്തുണ്ട് കുഴപ്പം? അവനാകട്ടെ, നിഷിദ്ധമാക്കിയത് നിങ്ങള്‍ക്ക് പ്രതിപാദിച്ചുതന്നിട്ടുമുണ്ടല്ലോ; തിന്നാന്‍ നിങ്ങള്‍ നിര്‍ബന്ധിതരായിത്തീരുന്നതൊഴികെ. അധികപേരും ഒരു വിധ ജ്ഞാനവുമില്ലാതെ സ്വേച്ഛാനുസൃതം മറ്റുള്ളവരെ വഴിതെറ്റിച്ചു കൊണ്ടിരി ക്കയാണ്. അതിക്രമികളെക്കുറിച്ച് താങ്കളുടെ നാഥന്‍ സൂക്ഷ്മജ്ഞന്‍ തന്നെ. കുറ്റങ്ങളില്‍ നിന്നു പ്രത്യക്ഷവും പരോക്ഷവുമായവ നിങ്ങള്‍ വര്‍ജിക്കുക. തങ്ങളനുവര്‍ത്തിക്കുന്നതിന്റെ പ്രതിഫലം കുറ്റം ചെയ്യുന്നവര്‍ക്ക് നല്‍കപ്പെടുകതന്നെ ചെയ്യുന്നതാണ്.

അല്ലാഹുവിന്റെ പേരുച്ചരിച്ചറുക്കപ്പെടാത്തവ നിങ്ങള്‍ ഭക്ഷിക്കരുത്; അധര്‍മം തന്നെയാണത്⁵⁵
നിങ്ങളോടു തര്‍ക്കിക്കാനായി പിശാചുക്കള്‍ തങ്ങളുടെ മിത്രങ്ങള്‍ക്കു ദുര്‍ബോധനം നല്‍കുക തന്നെയാണു ചെയ്യുന്നത്. അവരെ അനുസരിച്ചാല്‍ നിങ്ങളും ബഹുദൈവാരാധകര്‍ തന്നെയായി ത്തീരും.

നിര്‍ജീവനായിക്കഴിയുകയും എന്നിട്ട് നാം ഉജ്ജീവിപ്പിക്കുകയും നാം നല്‍കിയ പ്രകാശ ത്തിലൂടെ ജനമദ്ധ്യേ നടക്കുകയും ചെയ്യുന്നൊരു വ്യക്തി, ഒരു തരത്തിലും രക്ഷപ്പെടാനാകാത്ത അന്ധകാരങ്ങളിലാപതിച്ചവനെപ്പോലെയാണോ?⁵⁶
അങ്ങനെ തങ്ങള്‍ ചെയ്തുകൊണ്ടിരിക്കുന്നത് സത്യനിഷേധികള്‍ക്കു അലംകൃതമാക്കപ്പെട്ടിരിക്കുന്നു. ഇപ്രകാരം ഓരോ നാട്ടിലും ചതിപ്രയോഗങ്ങ ള്‍ നടത്താന്‍ അവിടത്തെ അധര്‍മകാരികളിലെ നേതാക്കളെ നാം നിശ്ചയിച്ചിരിക്കുകയാണ്. എന്നാല്‍, സ്വന്തത്തിനെതിരെത്തന്നെയാണവര്‍ കുതന്ത്രങ്ങള്‍ പ്രയോഗിക്കുന്നത്; പക്ഷേ, അവരതറിയുന്നില്ല.

ഏതു ദൃഷ്ടാന്തം വരുമ്പോഴും ദൈവദൂതര്‍ക്കു നല്‍കപ്പെട്ടത് ഞങ്ങള്‍ക്കും ലഭിക്കുന്നതുവ രെ തീര്‍ച്ചയായും ഞങ്ങള്‍ വിശ്വസിക്കില്ല എന്നവര്‍ ജല്‍പിക്കുന്നു⁵⁷
തന്റെ ദൗത്യം എവിടെ നിക്ഷേപിക്കണമെന്ന് അല്ലാഹുവിന്ന് നന്നായറിയാം. തങ്ങളുടെ ഗൂഢാലോചനകളുടെ ഫലമായി പാപികള്‍ക്ക് അല്ലാഹുവിങ്കല്‍ നിന്നു കഠിന ശിക്ഷയും നിന്ദ്യതയും വന്നെത്തുന്നതാണ്.

ഒരാള്‍ക്കു നേര്‍വഴികാണിക്കാന്‍ അല്ലാഹു ഉദ്ദേശിച്ചാല്‍ അയാളുടെ ഹൃദയത്തിലേക്ക വന്‍ ഇസ്‌ലാമിനെ വിശാലമാക്കും; ഇനി ഒരാളെ വഴിതെറ്റിക്കാനാണുദ്ദേശിക്കുന്നതെങ്കില്‍ അവന്റെ ഹൃദയത്തെ കുടുങ്ങിയതും ദുഷ്‌കരവുമാക്കും-ആകാശത്തിലേക്കവന്‍ കയറിപ്പോകുന്നതു പോലെ⁵⁸
സത്യവിശ്വാസം കൈകൊള്ളാത്തവരുടെ മേല്‍ അല്ലാഹു ഇങ്ങനെയാണ് ശിക്ഷ നിര്‍ണയിക്കു ന്നത്. ഇത് താങ്കളുടെ നാഥന്റെ ഋജുവായ പന്ഥാവാണ്. ചിന്തിക്കുന്ന ജനതക്കുവേണ്ടി നാം ദൃഷ്ടാന്ത ങ്ങള്‍ പ്രതിപാദിച്ചിരിക്കുന്നു. അവര്‍ക്ക് തങ്ങളുടെ രക്ഷിതാവിങ്കല്‍ സമാധാനത്തിന്റെ സ്വര്‍ഗീയ ഭവനമുണ്ട്. തങ്ങളനുവര്‍ത്തിച്ചു കൊണ്ടിരുന്ന ഉദാത്ത കര്‍മങ്ങള്‍ മൂലം അവരുടെ സംരക്ഷ കന്‍ അവനായി രിക്കും.

സൃഷ്ടികളെയൊന്നടങ്കം അല്ലാഹു സംഗമിപ്പിക്കുന്ന ദിനം സ്മരണീയമത്രേ. അവന്‍ അരുളും: ജിന്നുകളുടെ സമൂഹമേ, മനുഷ്യരില്‍ ഒട്ടേറെ പേരെ നിങ്ങള്‍ ദുര്‍മാര്‍ഗികളാക്കിയിട്ടുണ്ടല്ലോ. മര്‍ത്യരില്‍ നിന്നുള്ള അവരുടെ കൂട്ടൂകാര്‍ പ്രതികരിക്കും: രക്ഷിതാവേ, ഞങ്ങളില്‍ ചിലര്‍ മറ്റുചിലരെ ഉപയോഗപ്പെടുത്തി, അങ്ങനെ നീ ഞങ്ങള്‍ക്കു നിശ്ചയിച്ച അവധി സമാഗതമായി⁵⁹
അവന്‍ ഉത്തരവിടും: നരകമാണ് നിങ്ങളുടെ അഭയസങ്കേതം; നിങ്ങളതില്‍ ശാശ്വതരായിരിക്കും; അല്ലാഹു ഉദ്ദേശിച്ചതൊഴികെ⁶⁰
താങ്കളുടെ നാഥന്‍ യുക്തിമാനും അഭിജ്ഞനും തന്നെയത്രെ. ഇപ്രകാരം അക്രമികളില്‍ ചിലര്‍ക്ക്-അവരുടെ ദുഷ്‌ചെയ്തികള്‍ നിമിത്തം- മറ്റുചിലരെ നാം മിത്രങ്ങളാക്കുന്നു. ജിന്ന്-മനുഷ്യസമൂഹമേ, എന്റെ ദൃഷ്ടാന്തങ്ങള്‍ നിങ്ങള്‍ക്കു പ്രതിപാദിക്കുകയും ഈ അന്ത്യനാളിനെ നേരിടേണ്ടിവരുമെന്ന് താക്കീതു നല്‍കുകയും ചെയ്തുകൊണ്ട് സ്വന്തത്തില്‍ നിന്നുതന്നെയുള്ള മുര്‍സലുകള്‍ നിങ്ങളിലേക്ക് വന്നിരുന്നില്ലേ? അവര്‍ പ്രതികരിക്കും: സ്വന്തത്തിനെതിരെ തന്നെ ഞങ്ങളിതാ സാക്ഷ്യം വഹിക്കുന്നു! ഭൗതിക ജീവിതം അവരെ വഞ്ചനയില്‍ വീഴ്ത്തുകയായിരുന്നു. തങ്ങള്‍ അവിശ്വാസികളായിരുന്നു എന്ന് സ്വന്തത്തിനു പ്രതികൂലമായിത്തന്നെ അവര്‍ സാക്ഷ്യം വഹിച്ചിരിക്കുകയാണ്! ഇത്, തദ്ദേശീയര്‍ സന്മാര്‍ഗം സംബന്ധിച്ച് അജ്ഞരാകവെ അന്യായമായി ഒരു രാജ്യത്തെയും താങ്കളുടെ നാഥന്‍ നശിപ്പിക്കില്ല എന്നതു കൊണ്ടാകുന്നു⁶¹
ഓരോരുത്തര്‍ക്കും സ്വന്തം കര്‍മഫലമായി വ്യത്യസ്ത പദവികളുണ്ടായിരിക്കും. അവരുടെ കര്‍മങ്ങളെപ്പറ്റി താങ്കളുടെ നാഥന്‍ അശ്രദ്ധനേ അല്ല⁶²

താങ്കളുടെ രക്ഷിതാവ് സ്വയം പര്യാപ്തനും കരുണാമയനുമാകുന്നു. അവന്‍ ഉദ്ദേശിക്കു ന്നുവെങ്കില്‍ നിങ്ങളെ ഉന്മൂലനം ചെയ്ത് താനുദ്ദേശിക്കുന്നത് നിങ്ങള്‍ക്കു ശേഷം പകരം വെക്കും; മറ്റൊരു ജനപഥത്തിന്റെ പരമ്പരയില്‍ നിങ്ങള്‍ക്ക് ജന്മം നല്‍കിയതുപോലെ. നിങ്ങളോടുള്ള വാഗ്ദത്തശിക്ഷ സാക്ഷാല്‍കൃതമാവുക തന്നെ ചെയ്യും; അല്ലാഹുവിനെ തോല്‍പിക്കാന്‍ നിങ്ങള്‍ക്കാവുകയേയില്ല. നബിയേ, പ്രഖ്യാപിക്കുക: എന്റെ സമുദായമേ, നിങ്ങളുടെ അവസ്ഥക്കനുസ രിച്ചു നിങ്ങള്‍ പ്രവര്‍ത്തിക്കുക; ഞാനും അങ്ങനെ ചെയ്യുന്നുണ്ട്⁶³
പാരത്രിക ലോകത്ത് ആര്‍ക്കാ ണ് നന്മ കൈവരിക എന്ന് വഴിയെ നിങ്ങള്‍ക്കു ബോധ്യപ്പെടും. അക്രമികള്‍ വിജയം കൈവരിക്കുക യില്ല തീര്‍ച്ച.

അല്ലാഹു പടച്ചുണ്ടാക്കിയ കൃഷിയിലും കാലികളിലും നിന്ന് അവന്നൊരു വിഹിതം നിശ്ചയി ച്ചിരിക്കുകയാണവര്‍; എന്നിട്ട്, തങ്ങളുടെ ജല്‍പനമനുസരിച്ച് ഇത് അല്ലാഹുവിനും മറ്റേതു തങ്ങളുടെ പരദൈവങ്ങള്‍ക്കും ഉള്ളതാണ് എന്ന് അവര്‍ തട്ടിവിടുന്നു. എന്നാല്‍ പരദൈവങ്ങള്‍ക്കുള്ളത് അല്ലാഹു വിനു കിട്ടുകയില്ല, അല്ലാഹുവിനുള്ളത് പരദൈവങ്ങള്‍ക്കു ലഭിക്കുകയും ചെയ്യും⁶⁴
എത്ര ഹീനമായ വിധിയാണ് അവരുടേത്!

അപ്രകാരം തന്നെ, മിക്ക ബഹുദൈവവിശ്വാസികള്‍ക്കും സ്വന്തം മക്കളെ വധിക്കുന്നത് ആ ദൈവങ്ങള്‍ അലംകൃതമാക്കിയിരിക്കുന്നു, അവരെ നാശത്തില്‍ വീഴ്ത്തുവാനും തങ്ങളുടെ മതം അവര്‍ക്ക് തരിച്ചറിയാതിരിക്കാനും വേണ്ടി⁶⁵
അല്ലാഹു ഉദ്ദേശിച്ചിരുന്നെങ്കില്‍ അതവര്‍ ചെയ്യില്ലായിരുന്നു. അതിനാല്‍ തങ്ങളുടെ വ്യാജ സൃഷ്ടികളുമായി അവരെ താങ്കള്‍ വിട്ടേക്കുക. 'ഇവ നിഷിദ്ധമായ കാലികളും കൃഷിയുമാണ്, ഞങ്ങള്‍ ഉദ്ദേശിച്ചവര്‍ മാത്രമേ ഇവ ഭക്ഷിക്കാവൂ' എന്നു സ്വന്തം വാദപ്രകാരം അവര്‍ തട്ടിവിടുന്നു; പുറത്തു സവാരി നിഷിദ്ധമായവയും അറുക്കുമ്പോള്‍ അല്ലാഹുവിന്റെ പേരുച്ചരിക്കപ്പെടാത്തവയും ഉണ്ട്. അല്ലാഹുവിന്റെ മേല്‍ വ്യാജം ചമക്കുകയാണി തെല്ലാം. ഇങ്ങനെ കെട്ടിച്ചമച്ചതിന്റെ പ്രതിഫലം അവര്‍ക്ക് അല്ലാഹു നല്‍കുന്നതാണ്⁶⁶

അവര്‍ ജല്‍പിച്ചു: ഈ കാലികളുടെ ഗര്‍ഭസ്ഥശിശുക്കള്‍ ഞങ്ങള്‍ ആണുങ്ങള്‍ക്ക് മാത്ര മുള്ളതാണ്, സ്ത്രീകള്‍ക്കു നിഷിദ്ധവും; എന്നാലത് ശവമായാല്‍ സ്ത്രീ-പുരുഷര്‍ തുല്യപങ്കുകാരാ യിരിക്കും. അവരുടെ ഈ വിവരണത്തിന് പിന്നീടവര്‍ക്ക് അല്ലാഹു പ്രതിഫലം നല്‍കുന്നതാണ്. നിശ്ചയം, അവന്‍ യുക്തിമാനും അഭിജ്ഞനുമാകുന്നു. മൗഢ്യം കാരണമായി സ്വന്തം മക്കളെ യാതൊ രു ബോധവുമില്ലാതെ വധിച്ചു കളയുകയും തങ്ങള്‍ക്കല്ലാഹു നല്‍കിയ വിഭവങ്ങള്‍ അവന്റെ പേരില്‍ വ്യാജം ചമച്ച് നിഷിദ്ധമാക്കുകയും ചെയ്തവര്‍ നഷ്ടക്കാരായിരിക്കുന്നു, തീര്‍ച്ച. അവര്‍ വഴിപിഴച്ചു പോവുക തന്നെ ചെയ്തു; അവര്‍ നേര്‍മാര്‍ഗം സ്വീകരിക്കാന്‍ പോകുന്നില്ല⁶⁷

പന്തലില്‍ പടര്‍ത്തപ്പെടുന്നതും അല്ലാത്തതുമായ വിവിധ തോട്ടങ്ങളും ഭിന്നരുചിയുള്ള ഈത്തപ്പനകളും മറ്റുവിളകളും പരസ്പര സദൃശവും അല്ലാത്തതുമായ ഒലീവും ഉറുമാനും പടച്ചുണ്ടാക്കിയത് അവനാണ്. അവ കായ്ക്കുമ്പോള്‍ നിങ്ങള്‍ പഴം തിന്നുകൊള്ളുക; വിളവെടുക്കു മ്പോള്‍ അതിന്റെ ബാധ്യത അവകാശികള്‍ക്കു നല്‍കുക; ദുര്‍വ്യയം ചെയ്യരുത്. ധൂര്‍ത്തന്മാരെ അല്ലാഹു ഇഷ്ടപ്പെടുകയേ ചെയ്യില്ല. ഭാരം ചുമക്കുന്നതും അറുത്തു തിന്നാനുള്ളതുമായ കാലികളെ യും അവന്‍ പടച്ചു. അല്ലാഹു തന്നതില്‍ നിന്നു നിങ്ങള്‍ ആഹരിച്ചുകൊള്ളുക; പിശാചിന്റെ കാല്‍പാടു കള്‍ പിന്‍പറ്റരുത്. അവന്‍ നിങ്ങളുടെ പ്രത്യക്ഷ ശത്രുതന്നെയാകുന്നു.

കാലികളില്‍ എട്ട് ഇണകളെയാണ് അല്ലാഹു സൃഷ്ടിച്ചിട്ടുള്ളത് -ചെമ്മരിയാടില്‍ നിന്നു രണ്ടും (ആണും പെണ്ണും) കോലാടില്‍ നിന്നു രണ്ടും. താങ്കള്‍ ചോദിക്കുക: ഇതില്‍ ആണിനെയോ പെണ്ണിനെയോ അതല്ല, പെണ്‍മൃഗങ്ങളുടെ ഗര്‍ഭത്തിലുള്ളതോ ഏതാണ് അവന്‍ നിഷിദ്ധമാക്കിയിട്ടു ള്ളത്? സത്യവാദികളാണു നിങ്ങളെങ്കില്‍ അറിവു നിദാനമാക്കി മറുപടി തരൂ! ഒട്ടകത്തില്‍ നിന്നു രണ്ടും മാടില്‍ നിന്നു രണ്ടും അവന്‍ സൃഷ്ടിച്ചു. ചോദിക്കുക: ഇതില്‍ ആണിനെയോ പെണ്ണിനെയോ അതല്ല, പെണ്‍മൃഗങ്ങളുടെ ഗര്‍ഭത്തിലുള്ളതോ ഏതാണവന്‍ നിഷിദ്ധമാക്കിയിട്ടുള്ളത്? അതല്ല, അല്ലാഹു ഇതൊക്കെ കല്‍പിച്ചപ്പോള്‍ നിങ്ങള്‍ സാക്ഷികളായി അവിടെയുണ്ടായിരുന്നോ?! യാതൊരു വിവരവുമില്ലാതെ മനുഷ്യരെ ദുര്‍മാര്‍ഗത്തിലാക്കാനായി അല്ലാഹുവിന്റെ പേരില്‍ വ്യാജം ചമച്ചുണ്ടാക്കു ന്നവനെക്കാള്‍ വലിയ അധര്‍മകാരി ആരുണ്ട്? അക്രമികളായ ആളുകളെ അല്ലാഹു നേര്‍വഴിയിലാക്കുന്നതേയല്ല.⁶⁸

നബിയേ, പ്രഖ്യാപിക്കുക: എനിക്കു കിട്ടുന്ന ദിവ്യസന്ദേശങ്ങളില്‍ ആഹാരം കഴിക്കുന്ന ഒരു വ്യക്തിക്ക് ഭക്ഷിക്കല്‍ നിഷിദ്ധമായി ഇവയല്ലാതെ മറ്റൊന്നും ഞാന്‍ കാണുന്നില്ല: 'ശവം, ഒഴുക്കപ്പെട്ട രക്തം, പന്നിയിറച്ചി -അതു മഹാ മ്ലേച്ഛം തന്നെ- അല്ലാഹുവിന്റേതല്ലാത്ത പേരുപറഞ്ഞ റുക്കപ്പെട്ട് നിയമവിരുദ്ധമായിത്തീര്‍ന്നത്.' എന്നാല്‍, ഒരാള്‍ നിര്‍ബന്ധിതാവസ്ഥയില്‍ -മനഃപൂര്‍വം നിയമലംഘനത്തിനോ അത്യാവശ്യത്തില്‍ കവിഞ്ഞോ അല്ലാതെ- ഇവ കഴിച്ചാല്‍, താങ്കളുടെ നാഥന്‍ ഏറെ പൊറുക്കുന്നവനും കരുണാമയനും തന്നെയത്രേ.⁶⁹

നഖമുള്ള മുഴുവന്‍ ജീവികളും ആടു-മാടുകളുടെ കൊഴുപ്പും യഹൂദികള്‍ക്കു നാം നിഷിദ്ധമാക്കുകയുണ്ടായി; അവയുടെ മുതുകിലും കുടലിന്മേലും എല്ലിലും ചേര്‍ന്നു നില്‍ക്കുന്നതൊ ഴികെ. അവരുടെ ധിക്കാരത്തിനു നാം പ്രതിഫലം നല്‍കിയതാണത്. നിശ്ചയം നാം സത്യം പറയുക തന്നെയാകുന്നു. ഇനി, താങ്കളെ അവര്‍ നിഷേധിക്കുകയാണെങ്കില്‍ ഇങ്ങനെ പ്രതികരിക്കുക: നിങ്ങളു ടെ നാഥന്‍ വിസ്തൃത കാരുണ്യമുള്ളവനാണ്; എന്നാല്‍ അധര്‍മകാരികളായ വിഭാഗങ്ങളില്‍ നിന്ന് അവന്റെ ശിക്ഷ തട്ടിമാറ്റപ്പെടുന്നതല്ല.

ബഹുദൈവവിശ്വാസികള്‍ ജല്‍പിക്കും: 'ഞങ്ങളോ പിതാക്കളോ അല്ലാഹു ഉദ്ദേശിച്ചിരു ന്നുവെങ്കില്‍ അവനോട് മറ്റാരെയും പങ്കുചേര്‍ക്കുകയോ എന്തെങ്കിലും നിഷിദ്ധമാക്കുകയോ ചെയ്യില്ലാ യിരുന്നു.' ഇതുപോലെ തന്നെ ഇവരുടെ പൂര്‍വികന്മാരും നിഷേധിക്കുകയുണ്ടായി, അങ്ങനെ നമ്മുടെ ശിക്ഷ അവര്‍ രുചിച്ചറിഞ്ഞു. താങ്കള്‍ പ്രഖ്യാപിക്കുക: നിങ്ങള്‍വശം വല്ല അറിവുമുണ്ടെങ്കില്‍ ഞങ്ങള്‍ ക്ക് അതൊന്നു വെളിപ്പെടുത്തിത്തരിക. ഊഹം പിന്തുടരുകയും നുണപറയുകയും മാത്രമാണു നിങ്ങള്‍. താങ്കള്‍ പറയുക: അതുകൊണ്ട്, മികച്ച പ്രമാണത്തിന്റെ പിന്‍ബലം അല്ലാഹുവിന്നാണ്. അവനുദ്ദേശിച്ചിരുന്നുവെങ്കില്‍ നിങ്ങള്‍ സര്‍വരെയും നേര്‍മാര്‍ഗത്തിലാക്കുമായിരുന്നു.⁷⁰

നബിയേ, പ്രഖ്യാപിക്കുക: 'നിങ്ങളിപ്പറയുന്നവയൊക്കെ അല്ലാഹു നിഷിദ്ധമാക്കിയതാണ് എന്നു തെളിയിക്കുന്ന സാക്ഷികളെ ഹാജറാക്കുക'! ഇനി വ്യാജസാക്ഷ്യം പറയുന്നുവെങ്കില്‍ അവരോടൊപ്പം താങ്കള്‍ സാക്ഷിയാകരുത്. നമ്മുടെ പ്രമാണങ്ങള്‍ വ്യാജമാക്കിയവരും പാരത്രിക ലോകത്തെ വിശ്വസിക്കാത്തവരും തങ്ങളുടെ നാഥനു പങ്കുകാരെ സ്വീകരിക്കുന്നവരുമായ ആളുകളുടെ സ്വേച്ഛകള്‍ താങ്കള്‍ അനുധാവനം ചെയ്യരുത്⁷¹

നബിയേ, പ്രഖ്യാപിക്കുക: വരൂ, നിങ്ങള്‍ക്ക് രക്ഷിതാവ് നിഷിദ്ധമാക്കിയത് എന്തൊക്കെ യാണെന്ന് ഞാന്‍ പ്രതിപാദിച്ചുതരാം: നിങ്ങളവനോട് യാതൊന്നും പങ്കുചേര്‍ക്കരുത്; മാതാപിതാക്കള്‍ ക്കു നന്മ ചെയ്യണം; ദാരിദ്യം മൂലം സ്വന്തം മക്കളെ കൊല്ലരുത് -നാമാണ് നിങ്ങള്‍ക്കും അവര്‍ക്കും ഭക്ഷണം തരുന്നത് -; പ്രത്യക്ഷമോ പരോക്ഷമോ ആയ നീച കൃത്യങ്ങളോടടുക്കുക പോലും അരുത്; അല്ലാഹു ആദരിച്ച ജീവന്‍ ന്യായപ്രകാരമല്ലാതെ കൊല്ലരുത്; ചിന്തിച്ചു ഗ്രഹിക്കുവാനായി അവന്‍ നിങ്ങള്‍ക്കു നല്‍കുന്ന ഉപദേശമാണിത്⁷²
ഏറ്റം ഉദാത്തമാര്‍ഗേണയല്ലാതെ അനാഥയുടെ സമ്പത്തി നെ നിങ്ങള്‍ സമീപിച്ചു പോകരുത്; അവന്നു പ്രായപൂര്‍ത്തിയാകും വരെ സംരക്ഷിക്കണം. അളവും തൂക്കവും നീതി പൂര്‍വം പൂര്‍ണമായി നിര്‍വഹിക്കുക. ഏതൊരുവ്യക്തിയോടും കഴിവിനപ്പുറം നാം കല്‍പിക്കുന്നതല്ല. ബന്ധുക്കളോടാണെങ്കില്‍ പോലും, സംസാരിക്കുകയാണെങ്കില്‍ നീതി പുലര്‍ത്തു ക; അല്ലാഹുവുമായുള്ള ഉടമ്പടികള്‍ നിറവേറ്റുക. നിങ്ങള്‍ ചിന്തിക്കുന്നതിനായി അവന്‍ നല്‍കുന്ന സദുപദേശമാണിത്. ഇതത്രെ എന്റെ ഋജുവായ പന്ഥാവ്. അതു നിങ്ങള്‍ അനുധാവനം ചെയ്യുക, മറ്റു വഴികള്‍ പിന്തുടരരുത്; അവയത്രയും അവന്റെ മാര്‍ഗത്തില്‍ നിന്നു നിങ്ങളെ ഭിന്നിപ്പിക്കും⁷³
നിങ്ങള്‍ ആലോചിക്കാനായി അവന്‍ സമര്‍പ്പിക്കുന്ന ഉപദേശമാണിത്⁷⁴

പിന്നീട് മൂസാ നബിക്കു നാം തൗറാത്ത് വേദം നല്‍കി, പുണ്യവാന്മാര്‍ക്ക് അനുഗ്രഹപൂര്‍ത്തീ കരണവും മുഴു കാര്യങ്ങളിലും വിശദീകരണവും സന്മാര്‍ഗദര്‍ശനവും ദിവ്യകാരുണ്യവുമായിക്കൊണ്ട്. തങ്ങളുടെ നാഥനുമായുള്ള ദര്‍ശനത്തില്‍ അവര്‍ വിശ്വസിക്കുന്നവരാകാന്‍ വേണ്ടി.

ഈ ഖുര്‍ആന്‍ നാമവതരിപ്പിച്ച അനുഗൃഹീത ഗ്രന്ഥമത്രേ. അതുകൊണ്ട് നിങ്ങളത് അനുധാവനം ചെയ്യുകയും കല്‍പനകള്‍ സൂക്ഷിക്കുകയും ചെയ്യുക; നിങ്ങള്‍ക്ക് കാരുണ്യം വര്‍ഷിക്ക പ്പെടാന്‍ വേണ്ടി. നിങ്ങള്‍ ഇപ്രകാരം ഒഴികഴിവു പറയാതിരിക്കാനാണിത് അവതരിപ്പിച്ചത്: 'ഞങ്ങള്‍ ക്കുമുമ്പുള്ള രണ്ടുവിഭാഗത്തിന്നേ വേദം നല്‍കപ്പെട്ടിട്ടുള്ളൂ; അവരുടെ അധ്യയനം സംബന്ധിച്ച് ഞങ്ങള്‍ അശ്രദ്ധര്‍ തന്നെയായിരുന്നു⁷⁵
അല്ലെങ്കില്‍, 'ഞങ്ങള്‍ക്ക് ഒരു വേദം അവതീര്‍ണമാ യിരുന്നുവെങ്കില്‍ അവരെക്കാള്‍ സന്മാര്‍ഗ നിഷ്ഠര്‍ ഞങ്ങളായേനെ.' അതിനാല്‍, രക്ഷിതാവിങ്കല്‍ നിന്നു നിങ്ങള്‍ക്കിതാ പ്രമാണവും മാര്‍ഗദര്‍ശനവും അനുഗ്രഹവും വന്നെത്തിയിരിക്കുന്നു. എന്നിട്ടും അല്ലാഹുവിന്റെ ദൃഷ്ടാന്തങ്ങള്‍ വ്യാജമാക്കുകയും അവയില്‍നിന്നു വ്യതിചലിക്കുകയും ചെയ്തവനെക്കാള്‍ വലിയ അക്രമി ആരുണ്ട്? നമ്മുടെ ദൃഷ്ടാന്തങ്ങളില്‍ നിന്നു പിന്തിരിഞ്ഞുപോകു ന്നവര്‍ക്ക് അതിനു പ്രതിഫലമായി നാം കഠിനശിക്ഷ നല്‍കുന്നതാകുന്നു.

വിശ്വസിക്കാന്‍ എന്താണ് ഇനിയവര്‍ കാത്തിരിക്കുന്നത്? തങ്ങളുടെയടുത്ത് മലക്കുകള്‍ ഹാജറാകുന്നതോ താങ്കളുടെ നാഥന്‍ തന്നെ സന്നിഹിതനാകുന്നതോ അവന്റെ ഏതെങ്കിലുമൊരു ദൃഷ്ടാന്തം വന്നെത്തുന്നതോ അല്ലാതെ! എന്നാല്‍ താങ്കളുടെ രക്ഷിതാവിന്റെ ഏതെങ്കിലും ദൃഷ്ടാന്തം വന്നെത്തുന്ന നാളില്‍, നേരത്തെ സത്യവിശ്വാസമവലംബിച്ച് ആ വിശ്വാസസമേതം നന്മചെയ്തിട്ടില്ലാ ത്ത ഒരാള്‍ക്കും തന്റെ വിശ്വാസം ഫലപ്രദമാകയില്ല. താങ്കള്‍ പ്രഖ്യാപിക്കുക: നിങ്ങള്‍ കാത്തിരിക്കു ക, ഞങ്ങളും കാത്തിരക്കുകതന്നെയാകുന്നു!⁷⁶

സ്വന്തം മതത്തില്‍ ഭിന്നിപ്പുണ്ടാക്കി വിവിധ ചേരികളായിത്തീര്‍ന്ന വേദക്കാരുമായി താങ്കള്‍ക്ക് യാതൊരു ബന്ധവുമില്ല. അവരെക്കുറിച്ച തീരുമാനം അല്ലാഹുവിങ്കല്‍ മാത്രമാണ്. തങ്ങളുടെ ചെയ്തികളെപ്പറ്റി അവരെ അല്ലാഹു അറിയിച്ചുകൊടുക്കും⁷⁷
ആരെങ്കിലും ഒരു നന്മയനുവര്‍ത്തിച്ചാല്‍ പത്തിരട്ടി പ്രതിഫലമുണ്ട്; ഒരു തിന്മ ചെയ്താലാകട്ടെ, തുല്യകൂലി മാത്രമേ നല്‍കപ്പെടൂ. യാതൊരനീതിയും അവരോട് കാണിക്കപ്പെടുന്നതല്ല⁷⁸

നബിയേ, പ്രഖ്യാപിക്കുക: നിശ്ചയം, എന്റെ നാഥന്‍ ഋജുവായ പന്ഥാവിലേക്ക്, വക്രതയി ല്ലാത്ത മതത്തിലേക്ക്, സന്മാര്‍ഗ നിഷ്ഠനായ ഇബ്രാഹീം നബിയുടെ ആദര്‍ശത്തിലേക്ക്-അദ്ദേഹം ബഹുദൈവവിശ്വാസികളില്‍ പെട്ടയാളായിരുന്നില്ല-എന്നെ മാര്‍ഗദര്‍ശനം ചെയ്തിരിക്കുന്നു. പറയുക: എന്റെ നമസ്‌കാരവും മറ്റാരാധനകളും ജീവിതവും മരണവുമൊക്കെ സര്‍വലോക സംരക്ഷകനായ അല്ലാഹുവിനുള്ളതാകുന്നു. അവനു യാതൊരു പങ്കാളിയുമില്ല. ഇങ്ങനെ വിശ്വസിക്കാനാണ് ഞാന്‍ കല്‍പിക്കപ്പെട്ടിരിക്കുന്നത്. അവനെ വണങ്ങുന്നവരില്‍ ഒന്നാമനാണു ഞാന്‍.

സകല വസ്തുക്കളുടെയും രക്ഷിതാവ് അല്ലാഹുവായിട്ടും അവനല്ലാത്തവരെ രക്ഷിതാവായി ഞാനന്വേഷിക്കുകയോ എന്നു താങ്കള്‍ ചോദിക്കുക⁷⁹
ഏതൊരു വ്യക്തിയുടെയും ചെയ്തികള്‍ക്കു ഉത്തരവാദി അയാള്‍ മാത്രമായിരിക്കും. കുറ്റവാളിയായ ഏതൊരാളും മറ്റൊരാളുടെ കുറ്റം ഏല്‍ക്കേണ്ടി വരില്ല⁸⁰
അനന്തരം നാഥങ്കലേക്കായിരിക്കും നിങ്ങളുടെ തിരിച്ചുപോക്ക്. നിങ്ങള്‍ ഭിന്നപക്ഷ ക്കാരായിരുന്ന കാര്യങ്ങളെക്കുറിച്ച് അപ്പോള്‍ നിങ്ങളെയവന്‍ അറിയിച്ചു തരുന്നതാകുന്നു.

അവനാണ് നിങ്ങളെ ഭൂമിയില്‍ തന്റെ പ്രതിനിധികളാക്കിയിട്ടുള്ളത്; അവന്‍ നല്‍കിയതില്‍ പരീക്ഷിക്കുന്നതിനായി നിങ്ങളില്‍ ചിലര്‍ക്ക് മറ്റുചിലരെക്കാള്‍ പദവി ഉയര്‍ത്തിത്തരികയും ചെയ്തു⁸¹
താങ്കളുടെ രക്ഷിതാവ് അതിദ്രുതം ശിക്ഷാനടപടികളെടുക്കുന്നവനാണ്. ഏറെ പൊറുക്കുന്നവനും കരുണാമയനും തന്നെയത്രേ അവന്‍⁸²