അൽ അഅ്റാഫ് - الأعراف - Al-Araf

അലിഫ് ലാം മീം സ്വാദ്¹
നബിയേ, താങ്കള്‍ക്ക് അവതീര്‍ണമായ മഹല്‍ ഗ്രന്ഥമത്രേ ഇത്. താങ്കളുടെ മനസ്സില്‍ യാതൊരു പ്രയാസവും ഇതു സംബന്ധിച്ചുണ്ടാവാതിരിക്കട്ടെ²
ഇതു വഴി താങ്കള്‍ താക്കീതു നല്‍കുവാനും സത്യവിശ്വാസികള്‍ക്ക് ഉദ്‌ബോധനമായിരിക്കാനും വേണ്ടി.

രക്ഷിതാവിങ്കല്‍ നിന്നു നിങ്ങള്‍ക്കായി അവതീര്‍ണമാകുന്നത് അനുധാവനം ചെയ്തുകൊള്ളുക; അവനല്ലാത്ത മറ്റു രക്ഷാധികാരികളെ പിന്‍പറ്റരുത്. നിങ്ങള്‍ വളരെ കുറച്ചേ ചിന്തിച്ചു മനസ്സിലാക്കുന്നുള്ളൂ. എത്രയെത്ര രാജ്യങ്ങളാണ് നാം സംഹരിച്ചു കളഞ്ഞിട്ടുള്ളത്! രാത്രിയിലോ ഉച്ചയുറക്കത്തിലായിരുന്നപ്പോഴോ നമ്മുടെ ശിക്ഷ അവര്‍ക്കു വന്നെത്തി. അപ്പോള്‍, 'ഞങ്ങള്‍ അക്രമികളായിപ്പോയല്ലോ' എന്നു പറഞ്ഞു വിലപിക്കുക മാത്രമായിരുന്നു അവര്‍. ഏതേതു സമൂഹങ്ങളിലേക്ക് പ്രവാചകനിയോഗമുണ്ടായോ, അവരെയൊക്കെയും ആ ദൂതന്മാരെയും നാം വിചാരണാവിധേയരാക്കുക തന്നെ ചെയ്യും³
എന്നിട്ട് പൂര്‍ണജ്ഞാനസമേതം നാമവര്‍ക്കു വസ്തുതകള്‍ പ്രതിപാദിച്ചു കൊടുക്കുന്നതാണ്. നാം അപ്രത്യക്ഷമാവുകയേ ചെയ്തിട്ടില്ലായിരുന്നു!

അന്നു മര്‍ത്യകര്‍മങ്ങള്‍ തൂക്കുമെന്നത് സത്യമാണ്⁴
അപ്പോള്‍ ആരുടെ തുലാസുകള്‍ കനമുള്ളതായോ അവരാണ് ജേതാക്കള്‍; ആരുടെ തുലാസുകള്‍ കനശൂന്യമായോ അവരാണ് ആത്മ നഷ്ടം വരുത്തിയവര്‍. നമ്മുടെ ദൃഷ്ടാന്തങ്ങളോട് അവര്‍ അനീതി പ്രവര്‍ത്തിച്ചതുമൂലമത്രേ അത്.

നിങ്ങള്‍ക്കു നാം ഭൂമിയില്‍ അധികാരം തരികയും ഉപജീവനമാര്‍ഗങ്ങള്‍ സംവിധാനിക്കുകയും ചെയ്തു. പക്ഷെ, വളരെ കുറച്ചു മാത്രമേ നിങ്ങള്‍ നന്ദി പ്രകാശിപ്പിക്കുന്നുള്ളൂ. നിങ്ങളെ നാം സൃഷ്ടിക്കുകയും രൂപകല്‍പന ചെയ്യുകയും പിന്നീട് 'നിങ്ങള്‍ ആദമിനു സാഷ്ടാംഗം ചെയ്യുക' എന്ന് മലക്കുകളോടു കല്‍പിക്കുകയും അപ്പോള്‍ ഇബ്‌ലീസൊഴികെ അവരെല്ലാം സുജൂദ് ചെയ്യുകയുമുണ്ടായി⁵
അവന്‍ സാഷ്ടാംഗം ചെയ്തവരില്‍ പെട്ടില്ല. അല്ലാഹു ചോദിച്ചു: 'ഞാന്‍ കല്‍പിച്ചപ്പോള്‍ സുജൂദ് ചെയ്യാതിരിക്കാന്‍ നിനക്കെന്താണ് തടസ്സമുണ്ടായത്?' അവന്‍ പറഞ്ഞു:'ആദമിനെക്കാള്‍ ശ്രേഷ്ഠന്‍ ഞാനാണ്; എന്നെ തീയിലും അവനെ മണ്ണിലും നിന്നാണ് നീ സൃഷ്ടിച്ചിരിക്കുന്നത്.' അല്ലാഹു അരുളി: 'ഉടന്‍ ഇറങ്ങിപ്പോകണം നീ ഇവിടന്ന്. നിനക്ക് അഹങ്കരിക്കുവാന്‍ ഇവിടെ പറ്റില്ല; കടക്ക് പുറത്ത്! നിന്ദ്യരില്‍ പെട്ടവനാണു നീ, തീര്‍ച്ച.'

ഇബ്‌ലീസ് അപേക്ഷിച്ചു: 'ഉയിര്‍ത്തെഴുന്നേല്‍പിന്റെ നാള്‍ വരെ എനിക്ക് അവധി നീട്ടിത്തരേണമേ.' അല്ലാഹു പറഞ്ഞു:' അവധി നല്‍കപ്പെട്ടവരില്‍ തന്നെയാണു നീ'⁶
ഇബ്‌ലീസ് വ്യക്തമാക്കി: 'നീ എന്നെ വഴിതെറ്റിച്ചതിനാല്‍ നിന്റെ ഋജുവായ പന്ഥാവില്‍ ആളുകള്‍ പ്രവേശിക്കുന്നത് തടുക്കാനായി ഞാന്‍ കാത്തിരിക്കുകയും അവരുടെ മുന്നിലൂടെയും പിന്നിലൂടെയും ഇടം-വലം ഭാഗങ്ങളിലൂടെയും ഞാനവരെ സമീപിക്കുകയും ചെയ്യും, തീര്‍ച്ച. അവരില്‍ മിക്കവരെയും കൃതജ്ഞരായി നിനക്ക് കാണാനാകില്ല.' അല്ലാഹു അരുളി: 'ഹീനനും അഭിശപ്തനുമായി നീ പുറത്തു കടക്കുക. അവരിലാരെങ്കിലും നിന്നെ പിന്തുടരുന്നുവെങ്കില്‍ നിങ്ങളെല്ലാവരെയും കൊണ്ട് നരകം ഞാന്‍ നിറച്ചു കളയുക തന്നെ ചെയ്യും, തീര്‍ച്ച.'

ആദം നബിയേ, താങ്കളും സഹധര്‍മിണിയും ഈ സ്വര്‍ഗത്തില്‍ നിവസിക്കുകയും യഥേഷ്ടം ആഹരിക്കുകയും ചെയ്തുകൊള്ളുക; എന്നാല്‍ ഈ വൃക്ഷത്തെ സമീപിച്ചു പോകരുത്; അങ്ങനെ ചെയ്താല്‍ നിങ്ങളിരുവരും അക്രമികളില്‍ പെട്ടുപോകുന്നതാണ് എന്ന് അല്ലാഹു അരുളി⁷
അങ്ങനെ പിശാച് അവരില്‍ ദുഷ്‌പ്രേരണ ചെലുത്തി. തദ്ഫലമായി അവരുടെ ഗുപ്തഗുഹ്യങ്ങള്‍ വെളിപ്പെട്ടു. 'നിങ്ങളിരുവരും മലക്കുകളോ ശാശ്വതരോ ആയിത്തീരരുതെന്നുവെച്ചു മാത്രമാണ് രക്ഷിതാവ് ഈ മരത്തില്‍ നിന്നു നിങ്ങളെ നിരോധിച്ചത്' എന്നവന്‍ തട്ടിവിട്ടു. ഞാന്‍ നിങ്ങളുടെ ഗുണകാംക്ഷികളില്‍ പെട്ടവന്‍ തന്നെയാണെന്നവന്‍ ആണയിട്ടു പറയുകയുമുണ്ടായി.

അങ്ങനെ അവന്‍ അവരിരുവരെയും കബളിപ്പിച്ച് താഴേക്കിറക്കി. ആ വൃക്ഷത്തില്‍ നിന്നു രുചിച്ചപ്പോള്‍ അവരുടെ ഗുഹ്യങ്ങള്‍ പ്രത്യക്ഷപ്പെട്ടു. സ്വര്‍ഗത്തിലെ ഇലകള്‍ പറിച്ചു വെച്ച് അവര്‍ ശരീരം മറയ്ക്കാന്‍ തുടങ്ങി. അപ്പോള്‍ രക്ഷിതാവ് അവരിരുവരെയും വിളിച്ചു ചോദിച്ചു: ആ വൃക്ഷത്തില്‍ നിന്നു ഞാന്‍ നിങ്ങളെ തടയുകയും പിശാച് നിങ്ങളുടെ പ്രത്യക്ഷ ശത്രുതന്നെയാണെന്ന് പറയുകയും ചെയ്തിരുന്നില്ലേ? അവര്‍ പറഞ്ഞു: നാഥാ, സ്വന്തത്തോടു തന്നെ ഞങ്ങള്‍ അക്രമം ചെയ്തു പോയി, നീ പൊറുക്കുകയും കരുണ വര്‍ഷിക്കുകയും ചെയ്യുന്നില്ല എങ്കില്‍ ഞങ്ങള്‍ സര്‍വ നഷ്ടം വന്നവരായിപ്പോവുക തന്നെ ചെയ്യും, തീര്‍ച്ച⁸

അല്ലാഹു അരുളി: ഇറങ്ങിപ്പോവുക; നിങ്ങള്‍ പരസ്പരം ശത്രുക്കളായിരിക്കും⁹
ഭൂമിയില്‍ നിങ്ങള്‍ക്ക് വാസസ്ഥലവും ഒരു നിശ്ചിത സമയം വരെ ജീവിത സൗകര്യങ്ങളുമുണ്ടായിരിക്കും. അവിടെ നിങ്ങള്‍ ജീവിക്കുകയും മരിക്കുകയും അതില്‍ നിന്നു തന്നെ പുനര്‍ജീവിപ്പിക്കപ്പെടുക യും ചെയ്യുന്നതാണ്¹⁰

ഹേ മനുഷ്യരേ, നിങ്ങള്‍ക്ക് നഗ്നത മറയ്ക്കാനും അലങ്കാരത്തിനുമുള്ള വസ്ത്രം നാ തന്നിരിക്കുന്നു; എന്നാല്‍ ഭക്തിയുടെ പുടവയാണ് ഏറ്റം ഉദാത്തം. അവര്‍ പാഠമുള്‍ക്കൊള്ളാനായി അല്ലാഹു അവതരിപ്പിക്കുന്ന ദൃഷ്ടാന്തങ്ങളില്‍ പെട്ടതാണത്¹¹
ഹേ മാനവ സമൂഹമേ, മാതാപിതാക്കളെ സ്വര്‍ഗത്തില്‍ നിന്നു ബഹിഷ്‌കരിച്ചതുപോലെ പിശാച് നിങ്ങളെ നരകത്തിലകപ്പെടുത്താതിരിക്കട്ടെ. തങ്ങളുടെ ഗുപ്തഗുഹ്യങ്ങള്‍ കാണിച്ചു കൊടുക്കാനായി അവരുടെ ഉടയാടകള്‍ അവനഴിക്കുകയാണുണ്ടായത്. നിങ്ങള്‍ അവരെ കാണാത്ത വിധം അവനും സംഘവും നിങ്ങളെ കാണുക തന്നെ ചെയ്യുന്നുണ്ട്. വിശ്വാസം കൈകൊള്ളാത്തവര്‍ക്ക് പിശാചുക്കളെ നാം ചങ്ങാതിമാരാക്കിക്കൊടുത്തിരിക്കയാണ്¹²

എന്തെങ്കിലും മ്ലേച്ഛവൃത്തി ചെയ്യുമ്പോള്‍ 'സ്വപിതാക്കള്‍ ഇങ്ങനെയനുവര്‍ത്തിക്കുന്നതാണ് ഞങ്ങള്‍ കണ്ടിട്ടുള്ളത്, അല്ലാഹു ഞങ്ങളോടങ്ങനെ അനുശാസിച്ചതാണ്' എന്ന് അവര്‍ തട്ടിവിടും. നബിയേ, താങ്കള്‍ പ്രതികരിക്കുക: മ്ലേച്ഛവൃത്തി ചെയ്യാന്‍ അല്ലാഹു കല്‍പിക്കുകയില്ല തന്നെ. അല്ലാഹുവിന്റെ പേരില്‍ വിവരമില്ലാത്തത് പറയുകയാണോ നിങ്ങള്‍?¹³
അങ്ങ് പ്രഖ്യാപിക്കുക: എന്റെ നാഥന്‍ നീതിയാണനുശാസിച്ചിരിക്കുന്നത്. എല്ലാ നമസ്‌കാരവേളയിലും നിങ്ങളുടെ വദനം അവങ്കലേക്കഭിമുഖമാക്കുക. മതം അല്ലാഹുവിന് ആത്മാര്‍ത്ഥ സമര്‍പ്പണം ചെയ്ത് അവനോടു പ്രാര്‍ത്ഥിക്കുക. അവന്‍ ആദ്യം സൃഷ്ടിച്ച സ്ഥിതിയിലേക്കു തന്നെ നിങ്ങള്‍ മടങ്ങുന്നതാകുന്നു¹⁴
ഒരു കൂട്ടരെ അവന്‍ സന്മാര്‍ഗത്തിലാക്കി, മറ്റൊരു കൂട്ടരാകട്ടെ, ദുര്‍മാര്‍ഗത്തിനവര്‍ അര്‍ഹരായി; അല്ലാഹുവിനെ വിട്ട് പിശാചുക്കളെയാണവര്‍ മിത്രങ്ങളാക്കിയിരിക്കുന്നത്. സന്മാര്‍ഗപ്രാപ്തരാണ് തങ്ങളെന്ന് അവര്‍ ധരിക്കുകയും ചെയ്യുന്നു¹⁵

ഹേ മനുഷ്യരേ, ആരാധനാ വേളകളിലൊക്കെ നിങ്ങള്‍ വസ്ത്രാലങ്കാരമണിയുക. അന്ന-പാനാദികള്‍ കഴിക്കുക, എന്നാല്‍ ദുര്‍വ്യയം അരുത്. ദുര്‍വ്യയക്കാരെ അവന്‍ ഇഷ്ടപ്പെടുകയില്ല. നബിയേ, ചോദിക്കുക: തന്റെ അടിമകള്‍ക്കായി അല്ലാഹു ഉല്‍പാദിപ്പിച്ച അലങ്കാര വസ്തുക്കളും ഉത്തമാഹാരങ്ങളും ആരാണു നിഷിദ്ധമാക്കിയത്? ഭൗതിക ലോകത്ത് അവ സത്യവിശ്വാസം കൈക്കൊണ്ടവര്‍ക്കവകാശപ്പെട്ടതാണ്; അന്ത്യനാളില്‍ അവര്‍ക്കു മാത്രവും¹⁶
വിവരമുള്ള ജനങ്ങള്‍ക്കായി ഇപ്രകാരം നാം ദൃഷ്ടാന്തങ്ങള്‍ വിശദീകരിക്കുന്നു

നബിയേ, പ്രഖ്യാപിക്കുക: പ്രത്യക്ഷവും പരോക്ഷവുമായ ഹീന പ്രവൃത്തികള്‍, കുറ്റകൃത്യങ്ങള്‍, നീതിരഹിതമായ അധര്‍മങ്ങള്‍, അല്ലാഹു യാതൊരു തെളിവും അവതരിപ്പിച്ചിട്ടില്ലാത്തവയെ അവനോടു പങ്കുചേര്‍ക്കല്‍, അറിയാത്ത കാര്യങ്ങള്‍ അല്ലാഹുവിന്റെ പേരില്‍ കെട്ടിച്ചമക്കല്‍ എന്നിവയേ എന്റെ നാഥന്‍ നിരോധിച്ചിട്ടുള്ളൂ. ഓരോ ഉമ്മത്തിനും ഓരോ അവധിയുണ്ട്; അത് ആസന്നമായാല്‍ ഒരിത്തിരിനേരം മുന്നോട്ടോ പിന്നോട്ടോ അവര്‍ നീങ്ങുകയില്ല¹⁷

മര്‍ത്യ സഞ്ചയമേ, എന്റെ സൂക്തങ്ങള്‍ പ്രതിപാദിച്ചുകൊണ്ട് സ്വന്തത്തില്‍ നിന്നുതന്നെയുള്ള മുര്‍സലുകള്‍ നിങ്ങള്‍ക്കു വന്നെത്തുമ്പോള്‍ സൂക്ഷ്മ ജീവിതം നയിക്കുകയും നന്മയനുവര്‍ത്തിക്കുകയും ചെയ്തവര്‍ക്കു പേടിക്കാനൊന്നുമില്ല; ദുഃഖിക്കേണ്ടിവരുന്നതുമല്ല അവര്‍. എന്നാല്‍ നമ്മുടെ സൂക്തങ്ങള്‍ വ്യാജമാക്കുകയും അവയ്ക്കു നേരെ അഹന്ത നടിക്കുകയും ചെയ്തവര്‍ നരകക്കാര്‍ തന്നെയാണ്. അവരതില്‍ ശാശ്വതരായിരിക്കും¹⁸

അല്ലാഹുവിന്റെ പേരില്‍ വ്യാജം ചമക്കുകയോ അവന്റെ ദൃഷ്ടാന്തങ്ങള്‍ നിഷേധിക്കുകയോ ചെയ്തവനേക്കാള്‍ വലിയ അക്രമി ആരുണ്ട്? വിധിപ്രകാരമുള്ള വിഹിതം അവര്‍ക്കു ലഭിക്കും. അങ്ങനെ നമ്മുടെ ദൂതന്മാര്‍ അവരെ മരിപ്പിക്കാനായി ചെല്ലുമ്പോള്‍ ചോദിക്കും: അല്ലാഹുവിനെ വിട്ട് നിങ്ങളാരാധിച്ചിരുന്നതെവിടെ? അവര്‍ പ്രതികരിക്കും: 'ഞങ്ങളെ വിട്ട് അവര്‍ അപ്രത്യക്ഷരായിരിക്കുന്നു.' തങ്ങള്‍ സത്യനിഷേധികള്‍ തന്നെയായിരുന്നുവെന്ന് സ്വന്തത്തിനെതിരെ അവര്‍ സാക്ഷ്യം വഹിക്കുന്നതാണ്. അല്ലാഹു അരുളും: 'ജിന്നുകളിലും മനുഷ്യരിലും നിന്നുള്ള മുന്‍ഗാമികളുടെ കൂടെ നരകത്തില്‍ നിങ്ങളും കടക്കൂ!' ഓരോ സമൂഹം നരകത്തില്‍ പ്രവേശിക്കുമ്പോഴും സഹസമൂഹത്തെ ശപിച്ചു കൊണ്ടിരിക്കുന്നതാണ്¹⁹
അങ്ങനെ നരകത്തില്‍ സകലരും ഒത്തുകൂടിക്കഴിഞ്ഞാല്‍ പിന്‍ഗാമികള്‍ മുമ്പേഗമിച്ചവരെ അധിക്ഷേപിച്ചു പറയും: 'ഞങ്ങളുടെ നാഥാ, ഇവര്‍ ഞങ്ങളെ വഴിതെറ്റിച്ചതാണ്; അതുകൊണ്ട് ഇരട്ടി ശിക്ഷ ഇവര്‍ക്കു നല്‍കേണമേ.' അല്ലാഹു പ്രതികരിക്കും: 'ഇരട്ടി ശിക്ഷ സര്‍വര്‍ക്കുമുണ്ട്; പക്ഷെ, നിങ്ങളതറിയുന്നില്ല.' അവരിലെ പൂര്‍വഗാമികള്‍ പിന്‍ഗാമികളോടു പറയും: ശിക്ഷാലഘൂകരണത്തിന് നിങ്ങള്‍ക്കു ഞങ്ങളേക്കാള്‍ മഹത്ത്വമൊന്നും ഇല്ലല്ലോ. അതുകൊണ്ട് സ്വന്തം ചെയ്തികള്‍ക്കുള്ള ശിക്ഷ നിങ്ങള്‍ തന്നെ രുചിച്ചുകൊള്ളുക!

നമ്മുടെ ദൃഷ്ടാന്തങ്ങള്‍ വ്യാജമാക്കുകയും അവയുടെ നേരെ അഹന്ത നടിക്കുകയും ചെയ്തവരുടെ ആത്മാക്കള്‍ക്കായി ആകാശകവാടങ്ങള്‍ തുറക്കപ്പെടുന്നതേയല്ല. ഒട്ടകം സൂചിക്കുഴയിലൂടെ കടന്നുപോകുന്നതു വരെ സ്വര്‍ഗത്തിലവര്‍ പ്രവേശിക്കയുമില്ല²⁰
അങ്ങനെയാണ് അധര്‍മകാരികള്‍ക്കു നാം കൂലികൊടുക്കുക. നരകാഗ്നിയാലുള്ള മെത്തയും മീതെയുള്ള ആവരണങ്ങളും അവര്‍ക്കുണ്ടാകും. അക്രമികള്‍ക്ക് അങ്ങനെയാണു നാം പ്രതിഫലം നല്‍കുക²¹

സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍- ഒരാളോടും കഴിവിനതീതമായത് നാം കല്‍പിക്കയില്ല- സ്വര്‍ഗക്കാരാണ്; അവരതില്‍ ശാശ്വതരായിരിക്കും. അവരുടെ നെഞ്ചകങ്ങളിലുള്ള അസൂയ നാം നീക്കിക്കളയും. അവരുടെ താഴെ അരുവികള്‍ ഒഴുകിക്കൊണ്ടിരിക്കുന്നതാണ്. അവര്‍ ഇങ്ങനെ പ്രതിവചിക്കും: 'നമ്മെ ഇതിലേക്ക് മാര്‍ഗദര്‍ശനം ചെയ്ത അല്ലാഹുവിനു സമസ്ത സ്‌തോത്രങ്ങളും; അവന്‍ വഴികാണിച്ചിട്ടില്ലായിരുന്നെങ്കില്‍ നാമൊരിക്കലും സന്മാര്‍ഗ പ്രാപ്തരാകില്ലായിരുന്നു. നാഥന്റെ ദൂതന്മാര്‍ നമ്മുടെയടുത്തുവന്നത് സത്യവുമായിത്തന്നെ, തീര്‍ച്ച! ഒരശരീരി വിളിച്ചു പറയും: അതാ, സ്വര്‍ഗലോകം! സ്വന്തം കര്‍മഫലമായി നിങ്ങള്‍ക്കതു അവകാശമായി ലഭിച്ചിരിക്കുന്നു²²

സ്വര്‍ഗക്കാര്‍ നരകക്കാരെ വിളിച്ചു ചോദിക്കും: ഞങ്ങള്‍ രക്ഷിതാവ് വാഗ്ദാനം ചെയ്തത് യാഥാര്‍ത്ഥ്യമായി കണ്ടെത്തിയിരിക്കുന്നു; നിങ്ങള്‍ നാഥന്റെ വാഗ്ദത്ത ശിക്ഷ നേരാകുന്നുവെന്നു കണ്ടെത്തിയോ? അവര്‍ പ്രതികരിക്കും: 'അതെ'. തത്സമയം അവര്‍ക്കിടയില്‍ ഒരു വിളംബരക്കാരന്‍ വിളിച്ചു പറയും: അല്ലാഹുവിന്റെ വഴിയില്‍ നിന്നു ജനങ്ങളെ തടയുകയും അതു വക്രമായവതരിപ്പിക്കാനാഗ്രഹിക്കുകയും പരലോകത്തെ നിഷേധിക്കുകയും ചെയ്യുന്ന അക്രമികളുടെ മേല്‍ അല്ലാഹുവിന്റെ ശാപമുണ്ടാകട്ടെ.

അവരിരുവിഭാഗത്തിനുമിടയില്‍ വലിയൊരു ഭിത്തിയുണ്ടായിരിക്കും; ആ ഉയര്‍ന്ന സ്ഥലങ്ങളില്‍ ചിലയാളുകളുണ്ടാകും. അടയാളം കൊണ്ട് സ്വര്‍ഗ-നരകക്കാരെല്ലാവരെയും അവര്‍ തിരിച്ചറിയുന്നതാണ്. 'നിങ്ങള്‍ക്കു സമാധാനം ഭവിക്കട്ടെ' എന്നവര്‍ സ്വര്‍ഗസ്ഥരോട് വിളിച്ചു പറയും. അവര്‍ അതുവരെയും സ്വര്‍ഗത്തില്‍ പ്രവേശിച്ചിട്ടില്ല, അതിനഭിലഷിച്ചു കൊണ്ടിരിക്കുകയാണ്²³
തങ്ങളുടെ നേത്രങ്ങള്‍ നരകക്കാരുടെ നേരെ തിരിക്കപ്പെടുമ്പോള്‍ അവര്‍ അപേക്ഷിക്കും: നാഥാ, അക്രമികളായ ജനതയൊന്നിച്ച് ഞങ്ങളെ നീ ആക്കരുതേ.

ആ ഉയര്‍ന്ന സ്ഥലങ്ങളിലുള്ളവര്‍ അടയാളം കൊണ്ടു തങ്ങള്‍ക്കു മനസ്സിലാകുന്ന ചിലരെ വിളിച്ചു ചോദിക്കും: ആര്‍ജിത സമ്പത്തുകളും അഹങ്കാര നിബദ്ധമായ ജീവിതവും നിങ്ങള്‍ക്ക് എന്തു പ്രയോജനമാണിവിടെ ചെയ്തത്? ഈ സ്വര്‍ഗസ്ഥരെപ്പറ്റിയാണോ 'ഇക്കൂട്ടര്‍ക്ക് യാതൊരു കാരുണ്യവും അല്ലാഹു നല്‍കുകയില്ലെ'ന്ന് നിങ്ങള്‍ ശപഥം ചെയ്തിരുന്നത്? (ഇവരോടിതാ ഇപ്പോള്‍ അല്ലാഹുവിന്റെ കല്‍പ്പന:) നിങ്ങള്‍ സ്വര്‍ഗത്തില്‍ പ്രവേശിച്ചു കൊള്ളുക, യാതൊന്നും ഭയപ്പെടുകയോ ദുഃഖിക്കുകയോ ചെയ്യേണ്ടിവരില്ല²⁴

നരകക്കാര്‍ സ്വര്‍ഗസ്ഥരെ വിളിച്ചപേക്ഷിക്കും: നിങ്ങള്‍ ഞങ്ങള്‍ക്ക് അല്‍പം വെള്ളമൊഴിച്ചു തരികയോ അല്ലാഹു തന്ന ആഹാരം സ്വല്‍പം നല്‍കുകയോ ചെയ്യൂ! അവര്‍ പ്രതികരിക്കും: തങ്ങളുടെ മതത്തെ കളിയും വിനോദവുമാക്കുകയും ഭൗതികജീവിതത്തില്‍ വഞ്ചിതരാവുകയും ചെയ്ത സത്യ നിഷേധികള്‍ക്ക് സ്വര്‍ഗത്തിലെ അന്നപാനീയങ്ങള്‍ അല്ലാഹു നിഷിദ്ധമാക്കിയിരിക്കുന്നു. അതുകൊണ്ട്, അവര്‍ ഈ ദിവസത്തെ അഭിമുഖീകരിക്കുമെന്ന് വിസ്മരിച്ചതുപോലെ, നമ്മുടെ ദൃഷ്ടാന്തങ്ങള്‍ നിഷേധിച്ചതുപോലെ ഇന്നു നാം അവരെയും മറന്നുകളയുകയാണ്.²⁵

വിശ്വാസമുള്ള ഒരു സമൂഹത്തിന് മാര്‍ഗദര്‍ശകവും കരുണ്യവുമായി ജ്ഞാന സമേതം കാര്യങ്ങള്‍ പ്രതിപാദിക്കുന്ന വേദഗ്രന്ഥം അവര്‍ക്കു നാം നല്‍കുക തന്നെ ചെയ്തിട്ടുണ്ട്. അതിലുള്ളതിന്റെ സാക്ഷാല്‍ക്കാരമല്ലാതെ മറ്റെന്താണവര്‍ പ്രതീക്ഷിക്കുന്നത്? അതിനെ നേരത്തെ വിസ്മരിച്ചവര്‍ അതു പുലരുന്നനാള്‍ പരിഭവിക്കും: 'നമ്മുടെ നാഥന്റെ ദൂതന്മാര്‍ സത്യസമേതം തന്നെയാണ് സന്നിഹിതരായിരുന്നത്! അതുകൊണ്ട്, ഞങ്ങളെ ശുപാര്‍ശ ചെയ്തു രക്ഷപ്പെടുത്താന്‍ വല്ലവരുമുണ്ടോ? അല്ലെങ്കില്‍ ഭൗതികലോകത്തേക്ക് ഞങ്ങള്‍ തിരിച്ചയക്കപ്പെട്ടു തന്നേക്കുമോ? എങ്കില്‍ മുമ്പ് അനുവര്‍ത്തിച്ചതില്‍ നിന്നു ഭിന്നമായി ഞങ്ങള്‍ക്കു സല്‍കര്‍മങ്ങളനുഷ്ഠിക്കാമായിരുന്നു.' സ്വന്തത്തിന്നു തന്നെ അവര്‍ നഷ്ടം വരുത്തിവെക്കുകയും, കെട്ടിച്ചമച്ചിരുന്ന ദൈവങ്ങളെല്ലാം അവരെ വിട്ട് അപ്രത്യക്ഷമാവുകയും ചെയ്തിരിക്കുകയാണ്.

നിശ്ചയം നിങ്ങളുടെ നാഥന്‍ ഭുവന-വാനങ്ങള്‍ ആറുദിവസങ്ങളിലായി സൃഷ്ടിച്ചു സംവിധാനിച്ച അല്ലാഹുവാകുന്നു. എന്നിട്ടവന്‍ സിംഹാസനത്തില്‍ ആധിപത്യം ചെലുത്തി. രാത്രിയെകൊണ്ട് പകലിനെ അവന്‍ ആവരണം ചെയ്യുന്നു; അതിദ്രുതം അത് പകലിനെത്തേടിച്ചെല്ലുകയാണ്. തന്റെ ചൊല്‍പടിയിലായി സൂര്യ-ചന്ദ്ര-താരകങ്ങളെയുമവന്‍ സൃഷ്ടിച്ചു. അറിയുക, സൃഷ്ടിപ്പും ആജ്ഞാധികാരവും അവന്റേതു മാത്രമാണ്. പ്രപഞ്ച നാഥനായ അല്ലാഹു അനുഗ്രഹ പൂര്‍ണന്‍ തന്നെ. നിങ്ങള്‍ ഭവ്യതയോടെയും പതുക്കെയും നാഥനോടു പ്രാര്‍ത്ഥിക്കുക; പരിധിവിടുന്നവരെ അവന്‍ സ്‌നേഹിക്കുന്നതേയല്ല.²⁶

ഭൂമിയില്‍ അല്ലാഹു നന്മയുണ്ടാക്കിയ ശേഷം നിങ്ങള്‍ കുഴപ്പമുണ്ടാക്കരുത്. ആശങ്കയോടും ആശയോടുമൊപ്പം നിങ്ങളവനോടു പ്രാര്‍ത്ഥിക്കുക. അല്ലാഹുവിന്റെ കാരുണ്യം പുണ്യവാന്മാരോടു സമീപസ്ഥം തന്നെയാകുന്നു²⁷

തന്റെ അനുഗ്രഹമാകുന്ന മഴക്കുമുമ്പ് ശുഭവൃത്താന്തമായി കാറ്റുകളയക്കുന്നത് അവനാകുന്നു. അങ്ങനെ അവ ഭാരിച്ച മേഘങ്ങള്‍ വഹിച്ചാല്‍ ഏതെങ്കിലും നിര്‍ജീവ ദേശത്തേക്ക് നാമത് കൊണ്ടുപോവും. എന്നിട്ടവിടെ മഴവര്‍ഷിക്കുകയും തദ്വാരാ എല്ലാ ഫലങ്ങളും ഉല്‍പാദിപ്പിക്കുകയും ചെയ്യുന്നു. അങ്ങനെയാണ് നാം മരിച്ചവരെ പുനര്‍ജനിപ്പിക്കുക, നിങ്ങള്‍ ചിന്തിച്ചു മനസ്സിലാക്കിയെങ്കിലോ?²⁸
നല്ല ഭൂമിയില്‍ രക്ഷിതാവിന്റെ അനുമതിയോടെ സസ്യലതാദികള്‍ നന്നായി മുളച്ചുവരും. എന്നാല്‍ ചീത്ത മണ്ണില്‍ മുരടിച്ചേ അവ മുളക്കൂ²⁹
ഇതുപോലെ, കൃതജ്ഞരായ ആളുകള്‍ക്കാ യി നാം ദൃഷ്ടാന്തങ്ങള്‍ പ്രതിപാദിക്കുകയാണ്.

നൂഹ് നബിയെ തന്റെ സമൂഹത്തിലേക്കു നാം നിയോഗിക്കുക തന്നെ ചെയ്തു. അദ്ദേഹം പറഞ്ഞു: എന്റെ സമൂഹമേ, നിങ്ങള്‍ അല്ലാഹുവിനെ ആരാധിക്കുക, അവനല്ലാതെ ഒരു ദൈവവും നിങ്ങള്‍ക്കില്ല. ഒരു ഭീകരദിവസത്തെ ശിക്ഷ നിങ്ങള്‍ക്കു വന്നെത്തുമെന്നു ഭയപ്പെടുകയാണു ഞാന്‍. തന്റെ ജനതയിലെ പ്രമുഖന്മാര്‍ പ്രതികരിച്ചു: ഞങ്ങള്‍ മനസ്സിലാക്കുന്നത്, നീ സ്പഷ്ടമായ ദുര്‍മാര്‍ഗത്തിലാണെന്നാകുന്നു. നൂഹ് നബി മറുപടി നല്‍കി: 'എന്റെ ജനങ്ങളേ, ദുര്‍മാര്‍ഗമൊന്നും എന്നിലില്ല; എന്നാല്‍ ലോക നാഥന്റെ ദൂതനാണു ഞാന്‍. എന്റെ രക്ഷിതാവിന്റെ സന്ദേശങ്ങള്‍ നിങ്ങള്‍ക്കു ഞാന്‍ എത്തിച്ചു തരികയും നിങ്ങളോട് ഞാന്‍ ഗുണകാംക്ഷ പുലര്‍ത്തുകയും ചെയ്യുന്നു. നിങ്ങള്‍ക്കറിഞ്ഞു കൂടാത്തത് അല്ലാഹുവിങ്കല്‍ നിന്ന് എനിക്കറിയാം. സ്വന്തത്തില്‍ നിന്നൊരാള്‍ മുഖേന നിങ്ങള്‍ക്കു താക്കീതു നല്‍കാനും അനുഗ്രഹം വര്‍ഷിക്കപ്പെടാനും നിങ്ങള്‍ സൂക്ഷ്മത പുലര്‍ത്താനും വേണ്ടി രക്ഷിതാവിങ്കല്‍ നിന്നു ബോധനം കിട്ടിയതില്‍ നിങ്ങളദ്ഭുതപ്പെടുകയാണോ?' എന്നാല്‍ അവരദ്ദേഹത്തെ വ്യാജനാക്കി. അപ്പോള്‍, തന്നെയും കൂടെയുള്ളവരെയും നാം കപ്പലില്‍ രക്ഷിച്ചു; നമ്മുടെ ദൃഷ്ടാന്തങ്ങള്‍ നിഷേധിച്ചവരെ മുക്കിക്കൊന്നു. അവരൊരു അന്ധസമൂഹം തന്നെയായിരുന്നു³⁰

ആദ് സമൂഹത്തിലേക്ക് അവരുടെ സഹോദരന്‍ ഹൂദ് നബിയെ നാം നിയോഗിച്ചു³¹
അദ്ദേഹം കല്‍പിച്ചു: എന്റെ ജനങ്ങളേ, അല്ലാഹുവിനെ ആരാധിക്കൂ നിങ്ങള്‍; അവനല്ലാതെ ഒരു ദൈവവും നിങ്ങള്‍ക്കില്ല. സൂക്ഷ്മത പുലര്‍ത്തുന്നില്ലേ നിങ്ങള്‍? തന്റെ സമൂഹത്തിലെ നിഷേധീ പ്രമാണികള്‍ പ്രതികരിച്ചു: നിശ്ചയം, നീ ഗുരുതരമായ മൗഢ്യത്തിലകപ്പെട്ടതായാണ് ഞങ്ങള്‍ കാണുന്നത്; നീ വ്യാജന്മാരില്‍ പെട്ടിരിക്കുന്നുവെന്നാണ് ഞങ്ങളുടെയഭിപ്രായം. ഹൂദ് നബി പ്രതികരിച്ചു: എന്റെ ജനമേ, ഒരു വിധമൗഢ്യവും എന്നിലില്ല. പ്രത്യുത, സര്‍വലോക സംരക്ഷകനായ അല്ലാഹുവിങ്കല്‍ നിന്നു നിയുക്തനായ റസൂലാണു ഞാന്‍. നാഥന്റെ സന്ദേശങ്ങള്‍ നിങ്ങള്‍ക്കു ഞാന്‍ എത്തിച്ചു തരുന്നു. നിങ്ങളുടെ വിശ്വസ്ത ഗുണകാംക്ഷിയാണു ഞാന്‍. മുന്നറിയിപ്പു നല്‍കാനായി സ്വന്തത്തില്‍ നിന്നു തന്നെയുള്ള ഒരാള്‍ വഴി നാഥന്റെ ഉദ്‌ബോധനം വന്നു കിട്ടിയതില്‍ അദ്ഭുതപ്പെടുകയാണോ നിങ്ങള്‍? നൂഹ് നബിയുടെയാളുകള്‍ക്കു ശേഷം അവന്‍ നിങ്ങളെ പിന്‍ഗാമികളാക്കി; നിങ്ങള്‍ക്കവന്‍ കായിക ശേഷി വര്‍ധിപ്പിച്ചു. അതുകൊണ്ട്, അല്ലാഹുവിന്റെ അനുഗ്രഹങ്ങള്‍ അനുസ്മരിക്കുക, നിങ്ങള്‍ വിജയികളാകാന്‍.

അവര്‍ പ്രതികരിച്ചു: ഞങ്ങള്‍ അല്ലാഹുവിനെ മാത്രം ആരാധിക്കാനും പൂര്‍വികരാരാധിച്ചിരുന്നവ കൈവെടിയാനുമാണോ നീ വന്നിരിക്കുന്നത്? എങ്കില്‍ നിന്റെ ആ വാഗ്ദത്ത ശിക്ഷ ഇങ്ങു കൊണ്ടുവാ, നീ നേരാണു പറയുന്നതെങ്കില്‍! ഹൂദ് നബി പ്രതികരിച്ചു: 'നാഥങ്കല്‍ നിന്നുള്ള ശിക്ഷയും ക്രോധവുമിതാ നിങ്ങള്‍ക്ക് വരികയായി. അല്ലാഹു യാതൊരു പ്രമാണവും ഇറക്കിയിട്ടില്ലാത്തതും നിങ്ങളും പൂര്‍വ പിതാക്കളും പേരുവെച്ചതുമായ ചില നാമങ്ങളിലല്ലേ എന്നോടു നിങ്ങള്‍ തര്‍ക്കിക്കുന്നത്? അതുകൊണ്ട് ശിക്ഷ കാത്തിരുന്നുകൊള്ളുക, നിങ്ങളൊന്നിച്ച് ഞാനുമത് പ്രതീക്ഷിച്ചിരിക്കുക തന്നെയാണ്. അങ്ങനെ, അദ്ദേഹത്തെയും സഹചാരികളെയും നമ്മുടെ കാരുണ്യം മുഖേന രക്ഷപ്പെടുത്തുകയും, വിശ്വാസം കൈവരിക്കാതിരിക്കുകയും നമ്മുടെ ദൃഷ്ടാന്തങ്ങള്‍ നിഷേധിക്കുകയും ചെയ്തവരെ നാം ഉന്മൂലനാശം വരുത്തുകയുമുണ്ടായി³²

സമൂദ് സമുദായത്തിലേക്ക് അവരുടെ സഹോദരന്‍ സ്വാലിഹ് നബിയെ നാം നിയോഗിച്ചു. അദ്ദേഹം പറഞ്ഞു: എന്റെ ജനമേ, അല്ലാഹുവിനെ നിങ്ങള്‍ ആരാധിക്കൂ; അവനല്ലാതെ ഒരു ദൈവവും നിങ്ങള്‍ക്കില്ല. നാഥന്റെ പക്കല്‍ നിന്നു സ്പഷ്ടമായ ഒരു ദൃഷ്ടാന്തം നിങ്ങള്‍ക്കു വന്നെത്തിയിരിക്കുന്നു. നിങ്ങള്‍ക്കു തെളിവായി ഇതാ അല്ലാഹുവിന്റെ ഒട്ടകം³³
അതുകൊണ്ട് ഭൂമിയില്‍ മേഞ്ഞു തിന്നു നടക്കാനായി അതിനെ വിട്ടേക്കുക, ഒരു വിധ ദ്രോഹവും നിങ്ങളതിനെ ചെയ്തു പോകരുത്; അങ്ങനെ ചെയ്താല്‍ വേദനയുറ്റ ശിക്ഷ നിങ്ങളെ പിടികൂടും. നിങ്ങള്‍ ഓര്‍ക്കണം, ആദിനു ശേഷം നിങ്ങളെയവന്‍ പിന്‍ഗാമികളാക്കി; നിങ്ങള്‍ക്കവന്‍ ഭൂമിയില്‍ ആവാസ കേന്ദ്രമൊരുക്കി- സമതലങ്ങളില്‍ നിങ്ങള്‍ കൊട്ടാരങ്ങള്‍ പണിയുന്നു, മലകള്‍ തുരന്നു വീടുകള്‍ നിര്‍മിക്കുന്നു. അതുകൊണ്ട് അല്ലാഹുവിന്റെ അനുഗ്രഹങ്ങള്‍ നിങ്ങളോര്‍ക്കുക, നാശകാരികളായി നാട്ടില്‍ കുഴപ്പമുണ്ടാക്കരുത്³⁴

തന്റെ സമുദായത്തില്‍ പെട്ട അഹങ്കാരികളായ പ്രമുഖര്‍ പാവപ്പെട്ട സത്യവിശ്വാസികളോടു ചോദിച്ചു: തന്റെ രക്ഷിതാവിങ്കല്‍ നിന്നു നിയോഗിക്കപ്പെട്ട പ്രവാചകനാണ് എന്ന് സ്വാലിഹ് നിങ്ങള്‍ക്ക് ബോധ്യമാണോ? അവര്‍ പ്രതികരിച്ചു: അദ്ദേഹം നിയുക്തനായ മതത്തില്‍ ഞങ്ങള്‍ ഉറച്ചു വിശ്വസിക്കുന്നു. ആ ധിക്കാരികള്‍ പറഞ്ഞു: 'നിങ്ങള്‍ വിശ്വസിക്കുന്ന മതത്തെ ഞങ്ങള്‍ നിഷേധിച്ചു തള്ളിക്കളയുക തന്നെയാണ്'! അങ്ങനെയവര്‍ ആ ഒട്ടകത്തെ കശാപ്പു ചെയ്യുകയും തങ്ങളുടെ നാഥന്റെ കല്‍പന ധിക്കരിക്കുകയും ഇങ്ങനെ വെല്ലുവിളിച്ചു പറയുകയുമുണ്ടായി: 'സ്വാലിഹേ, നീ പ്രവാചകന്മാരില്‍ പെട്ടവനാണെങ്കില്‍, താക്കീതു ചെയ്തിരുന്ന ആ ശിക്ഷയിങ്ങോട്ടു കൊണ്ടുവാ!' അപ്പോള്‍ ഭൂകമ്പം അവരെ പിടികൂടി. പ്രഭാതത്തിലവര്‍ സ്വഗൃഹങ്ങളില്‍ മുട്ടു കുത്തി വീണു മരിച്ചു കിടന്നു. അവരെവിട്ട് മാറി നിന്ന് സ്വാലിഹ് നബി സങ്കടപ്പെട്ടു: എന്റെ സമുദായമേ, ഞാന്‍ നാഥന്റെ സന്ദേശം നിങ്ങള്‍ക്കു എത്തിച്ചു തരിക തന്നെ ചെയ്തു; നിഷ്‌കളങ്കമായി നിങ്ങളെ ഉപദേശിച്ചു. പക്ഷെ, ഉപദേശം നല്‍കുന്നവരെ നിങ്ങളിഷ്ടപ്പെടുന്നില്ല³⁵

ലൂഥ് നബിയെയും നാം റസൂലാക്കി. തന്റെ ജനത്തോട് അദ്ദേഹം പറഞ്ഞ സന്ദര്‍ഭം സ്മരണീയമാണ്: ഇതിനു മുമ്പ് മറ്റൊരാളും ചെയ്യാത്ത ഈ ഹീന കൃത്യം നിങ്ങള്‍ ചെയ്യുന്നുവോ? വികാര ശമനത്തിന് സ്ത്രീകളെ വിട്ട് ആണുങ്ങളെ സമീപിക്കുകയാണു നിങ്ങള്‍; പരിധിവിട്ടു പ്രവര്‍ത്തിക്കുന്ന ഒരു കൂട്ടര്‍ തന്നെ. തന്റെ ജനതയുടെ മറുപടി ഈ പരസ്പരാക്രോശം മാത്രമായിരുന്നു: 'ഇവരെ നിങ്ങളുടെ നാട്ടില്‍ നിന്നു പുറന്തള്ളുക, ഇവര്‍ വലിയ വിശുദ്ധന്മാരാണല്ലോ.' അങ്ങനെ ലൂഥ് നബിയെയും ഭാര്യയൊഴിച്ചുള്ള കുടുംബത്തെയും നാം രക്ഷപ്പെടുത്തി -അവള്‍ പുറം തിരിഞ്ഞു നിന്നവരിലായിരുന്നു. അവരുടെ മേല്‍ നാം കന്മഴ വര്‍ഷിച്ചു. നോക്കൂ! ആ അപരാധികളുടെ പര്യവസാനം എങ്ങനെയുണ്ടായിരുന്നു?³⁶

മദ്‌യന്‍ നിവാസികളിലേക്ക് അവരുടെ സഹോദരനായ ശുഐബ് നബിയെ നാം റസൂലാക്കി. അദ്ദേഹം പറഞ്ഞു: എന്റെ ജനമേ, നിങ്ങള്‍ അല്ലാഹുവിനെ ആരാധിക്കൂ; അവനല്ലാത്ത ഒരു ദൈവവും നിങ്ങള്‍ക്കില്ല തന്നെ. നാഥങ്കല്‍ നിന്നുള്ള സ്പഷ്ടമായ ദൃഷ്ടാന്തങ്ങള്‍ വന്നുകിട്ടിയിട്ടുണ്ട് നിങ്ങള്‍ക്ക്; അതുകൊണ്ട് അളവും തൂക്കവും പൂര്‍ത്തീകരിച്ചു നല്‍കണം. ജനത്തിന് സാധനങ്ങളില്‍ കമ്മി വരുത്തരുത്. നാട്ടില്‍ അല്ലാഹു നന്മവരുത്തിയശേഷം നിങ്ങളിവിടെ നാശമുണ്ടാക്കരുത്. വിശ്വാസികളാണെങ്കില്‍ നിങ്ങള്‍ക്കു നല്ലത് അതാണ്³⁷
ജനങ്ങളെ ഭീഷണിപ്പെടുത്തിയും വിശ്വാസികളെ സന്മാര്‍ഗത്തില്‍ നിന്നു തടഞ്ഞും അതു വക്രമായവതരിപ്പിക്കാനുദ്ദേശിച്ചും നിങ്ങള്‍ വഴിയോരങ്ങളിലിരിക്കരുത്. അംഗസംഖ്യ കുറവായിരുന്നപ്പോള്‍ അല്ലാഹു നിങ്ങളില്‍ വര്‍ധനവുണ്ടാക്കിയത് അനുസ്മരിക്കുക. നാശകാരികളുടെ ഭവിഷ്യത്ത് എങ്ങനെയായിരുന്നുവെന്നു ചിന്തിച്ചു നോക്കുക! എന്റെ ദൗത്യത്തില്‍ നിങ്ങളില്‍ ഒരു വിഭാഗം വിശ്വസിക്കുകയും മറ്റൊരു വിഭാഗം അവിശ്വസിക്കുകയുമാണെങ്കില്‍ നമുക്കിടയില്‍ അല്ലാഹുവിന്റെ വിധിയുണ്ടാകും വരെ നിങ്ങള്‍ ക്ഷമിക്കുക! വിധികര്‍ത്താക്കളില്‍ ഏറ്റം ഉത്തമനത്രേ അവന്‍³⁸

തന്റെ സമൂഹത്തിലെ ധിക്കാരികളായ പ്രമുഖന്മാര്‍ ആക്രോശിച്ചു: ശുഐബേ, നിന്നെയും കൂടെയുള്ള വിശ്വാസികളെയും നാട്ടില്‍ നിന്നു ഞങ്ങള്‍ ബഹിഷ്‌കരിക്കുക തന്നെ ചെയ്യും, തീര്‍ച്ച; അല്ലെങ്കില്‍ നിങ്ങളൊക്കെ ഞങ്ങളുടെ മതത്തിലേക്കു വരണം. നബി ചോദിച്ചു: ഞങ്ങളതു വെറുക്കുന്നുവെങ്കിലും വരണമെന്നാണോ? നിങ്ങളുടെ ബഹുദൈവത്വത്തില്‍ നിന്നു അല്ലാഹു ഞങ്ങളെ സുരക്ഷിതരാക്കിയിട്ടും അതിലേക്കു വരികയാണെങ്കില്‍, അവന്റെ പേരില്‍ കള്ളം കെട്ടിച്ചമക്കുകയാവും ഞങ്ങള്‍ ചെയ്യുന്നത്! ആ തിരിച്ചുപോക്ക് ഞങ്ങള്‍ക്കു പാടില്ലാത്തതാണ്;³⁹
രക്ഷിതാവ് ഉദ്ദേശിച്ചാലല്ലാതെ. ഞങ്ങളുടെ രക്ഷിതാവിന്റെ ജ്ഞാനം സമസ്ത വസ്തുക്കള്‍ക്കും പ്രവിശാലമത്രേ. അല്ലാഹുവിന്റെ മേല്‍ ഞങ്ങള്‍ ഭരമേല്‍പ്പിച്ചിരിക്കുന്നു. 'നാഥാ, ഞങ്ങള്‍ക്കും സ്വജനതക്കുമിടക്ക് സത്യത്തിന്റേതായ വിജയം നീ കനിഞ്ഞരുളേണമേ. തീരുമാനമെടുക്കുന്നവരില്‍ ഉത്തമനാണല്ലോ നീ.⁴⁰

തന്റെ ജനതയിലെ നിഷേധികളായ പ്രമുഖര്‍ പറഞ്ഞു: ശുഐബിനെ പിന്തുടരുകയാണെങ്കില്‍, തത്സമയം നിങ്ങള്‍ കടുത്ത പരാജിതര്‍ തന്നെയായിപ്പോകുന്നതാണ്! അപ്പോള്‍ ഭൂമികുലുക്കം അവരെ ബാധിച്ചു. അങ്ങനെ പ്രഭാതത്തില്‍ സ്വഗൃഹങ്ങളില്‍ മുട്ടുകുത്തി വീണു കിടക്കുകയായിരുന്നു അവര്‍. ശുഐബ് നബിയെ വ്യാജമാക്കിയവരുടെ അവസ്ഥ, അവരവിടെ നിവസിക്കുകയേ ചെയ്തിരുന്നിട്ടില്ലാത്തതു പോലെയായി! അദ്ദേഹത്തെ തള്ളിക്കളഞ്ഞവര്‍ തന്നെയായി സര്‍വവും നഷ്ടപ്പെട്ടവര്‍⁴¹
അദ്ദേഹം അവരില്‍ നിന്നു മാറി നില്‍ക്കുകയും, ഇങ്ങനെ സഹതപിക്കുകയും ചെയ്തു: എന്റെ ജനമേ, ഞാന്‍ രക്ഷിതാവിന്റെ സന്ദേശങ്ങള്‍ നിങ്ങള്‍ക്കെത്തിച്ചു തരികയും ആത്മാര്‍ത്ഥമായ ഉപദേശം നിങ്ങള്‍ക്ക് നല്‍കുകയും ചെയ്തിട്ടുണ്ട്. പിന്നെ, നിഷേധീ സമൂഹത്തിന്റെ പേരില്‍ ഞാനെങ്ങനെ ദുഃഖിക്കും?

ഏതൊരു ദേശത്തേക്ക് നാം പ്രവാചകനെ നിയോഗിച്ചപ്പോഴും ദുരിതവും പ്രയാസവും കൊണ്ടു തദ്ദേശീയരെ പിടികൂടാതിരുന്നിട്ടില്ല; അവര്‍ വിധേയത്വമുള്ളവരാകാന്‍. അനന്തരം ദുരിതങ്ങള്‍ക്കു പകരം നാം സുഭിക്ഷത നല്‍കുന്നു. അങ്ങനെ അഭിവൃദ്ധി നേടുമ്പോള്‍ നിലപാടുമാറ്റി അവര്‍ തട്ടിവിടും: 'ഇങ്ങനെ കഷ്ടപ്പാടും സുഭിക്ഷതയുമൊക്കെ നമ്മുടെ പൂര്‍വപിതാക്കളിലുമുണ്ടായിരുന്നു.' തത്സമയം ഓര്‍ക്കാപ്പുറത്ത് അവരെ നാം പിടികൂടുകയുണ്ടായി⁴²

ആ നാടുകളില്‍ നിവസിച്ചിരുന്നവര്‍ സത്യവിശ്വാസം കൈക്കൊള്ളുകയും അല്ലാഹുവിനെ സൂക്ഷിക്കുകയും ചെയ്തിരുന്നുവെങ്കില്‍ ആകാശത്തും ഭൂമിയിലും നിന്ന് അവര്‍ക്ക് നാം അനുഗ്രഹങ്ങള്‍ തുറന്നു കൊടുത്തിരുന്നേനെ; പക്ഷെ, അവര്‍ വ്യാജമാക്കുകയാണു ചെയ്തത്. തന്മൂലം അവരുടെ ദുഷ്‌ചെയ്തികളുടെ ഫലമായി നാമവരെ ശിക്ഷിക്കുകയുണ്ടായി. രാത്രി ഉറങ്ങുമ്പോള്‍ നമ്മുടെ ശിക്ഷ ബാധിക്കുന്നതിനെപ്പറ്റി തദ്ദേശീയര്‍ നിര്‍ഭയരാണോ? പൂര്‍വാഹ്ന സമയത്ത് കളിച്ചുല്ലസിക്കുമ്പോള്‍ യാദൃച്ഛികമായി നമ്മുടെ ശിക്ഷ പിടികൂടുന്നതിനെ കുറിച്ച് അവര്‍ വിശ്വസ്തരായിരിക്കുകയാണോ? അതല്ല, അല്ലാഹുവിന്റെ തന്ത്രാവിഷ്‌കാരത്തെ സംബന്ധിച്ചു തന്നെ നിര്‍ഭയത്വത്തിലാണോ അവര്‍? എന്നാല്‍ പരാജിതരായ ജനത മാത്രമേ അല്ലാഹുവിന്റെ തന്ത്രത്തെപ്പറ്റി നിര്‍ഭയാവസ്ഥയിലാകൂ⁴³

പൂര്‍വികാവകാശികളുടെ തിരോധാനാനന്തരം ഭൂമി പൈതൃകമായി ലഭിച്ചവരെ-നാമുദ്ദേശിക്കുന്നുവെങ്കില്‍-അവരുടെ പാപങ്ങള്‍ മൂലം നാം പിടികൂടുമെന്ന ഗുണപാഠം അവര്‍ക്കു സന്മാര്‍ഗ ദര്‍ശനം ചെയ്യുന്നില്ലേ? ഹൃദയങ്ങളില്‍ നാം മുദ്രവെച്ചിരിക്കുന്നതിനാല്‍ അവര്‍ സദുപദേശം കേള്‍ക്കാന്‍ സന്നദ്ധരാകുന്നില്ല. ആ ദേശവാസികളുടെ വൃത്താന്തങ്ങള്‍ താങ്കള്‍ക്കുനാം പ്രതിപാദിച്ചു തരികയാണ്; സ്വന്തത്തില്‍ നിന്നുള്ള ദൂതന്മാര്‍ സ്പഷ്ടമായ തെളിവുകളുമായി അവര്‍ക്കു വന്നെത്തുക തന്നെ ചെയ്തിട്ടും നേരത്തെ വ്യാജമാക്കിയിരുന്ന വിഷയങ്ങളില്‍ അവര്‍ സത്യവിശ്വാസം കൈക്കൊള്ളുകയുണ്ടായില്ല. ഇങ്ങനെയാണ് നിഷേധീ ഹൃദയങ്ങളില്‍ അല്ലാഹു മുദ്രയടിക്കുന്നത്. അവരില്‍ മിക്കവരിലും വാഗ്ദാനനിര്‍വഹണം നാം കണ്ടില്ല; ഭൂരിഭാഗത്തെയും അധര്‍മകാരികളായി തന്നെയാണ് നാം കണ്ടെത്തിയത്⁴⁴

തദനന്തരം മൂസാനബിയെ നമ്മുടെ ദൃഷ്ടാന്തങ്ങളുമായി ഫിര്‍ഔന്റെയും അവന്റെ ജനപ്രമുഖരുടെയും അടുത്തേക്ക് നാം നിയോഗിച്ചു. പക്ഷെ, അവര്‍ ആ ദൃഷ്ടാന്തങ്ങളോട് അതിക്രമം കാട്ടുകയാണുണ്ടായത്. ആ വിനാശകാരികളുടെ ഭവിഷ്യത്ത് എങ്ങനെയായിരുന്നുവെന്നു താങ്കള്‍ നോക്കൂ! മൂസാ നബി പറഞ്ഞു: ഹേ ഫിര്‍ഔന്‍, സര്‍വലോക നാഥന്റെ ദൂതന്‍ തന്നെയാണ് ഞാന്‍. അല്ലാഹുവിന്റെ പേരില്‍ സത്യമല്ലാത്തതൊന്നും എനിക്കു പറയാന്‍ പാടില്ല. നിങ്ങളുടെ രക്ഷിതാവിങ്കല്‍ നിന്നുള്ള ദൃഷ്ടാന്തവും കൊണ്ടാണ് ഞാന്‍ വന്നിരിക്കുന്നത്. അത് കൊണ്ട്, ഇസ്രയേല്യരെ എന്റെ കൂടെ വിട്ടയച്ചു തരണം⁴⁵
ഫിര്‍ഔന്‍ പ്രതികരിച്ചു: ദൃഷ്ടാന്തവും കൊണ്ടാണു നീ വന്നിരിക്കുന്നതെങ്കില്‍ അതിങ്ങു കൊണ്ടുവാ, നീ സത്യസന്ധനാണെങ്കില്‍!

തത്സമയം മൂസാനബി തന്റെ വടി താഴെയിട്ടു. അപ്പോഴത്, വ്യക്തമായ ഒരു പാമ്പായിരിക്കുന്നു! അദ്ദേഹം കൈ പുറത്തെടുത്തു കാണിച്ചപ്പോള്‍ തത്സമയമതാ ദ്രഷ്ടാക്കള്‍ക്ക് അത് വെളുത്തു തിളങ്ങുന്നു! ഫിര്‍ഔന്റെ ജനതയിലെ പ്രമുഖര്‍ തട്ടിവിട്ടു: ഇവന്‍ നിങ്ങളെ നാട്ടില്‍ നിന്നു പുറന്തള്ളാനുദ്ദേശിക്കുന്ന മികച്ച അഭിജ്ഞനായ ഒരു മാരണക്കാരന്‍ തന്നെയാകുന്നു. അതുകൊണ്ട് ഇവനെപ്പറ്റി നിങ്ങള്‍ക്കു അനുശാസിക്കാനുള്ളതെന്താണ്?

അവര്‍ ഫിര്‍ഔനോടപേക്ഷിച്ചു: 'ഇവന്നും സഹോദരന്നും അല്‍പം അവധി നല്‍കുക. നാട്ടിലുള്ള നിപുണരായ മാരണ വിദ്യക്കാരെ താങ്കളുടെയടുത്തു ഹാജറാക്കാന്‍ ദൂതരെ വിടുകയും ചെയ്യണം.' അങ്ങനെ ആഭിചാരകന്മാര്‍ ഫിര്‍ഔന്റെയടുത്തു സന്നിഹിതരായി. അവര്‍ ചോദിച്ചു: ഞങ്ങളാണ് ജേതാക്കളെങ്കില്‍ മികച്ച പ്രതിഫലമുണ്ടാകുമോ? അവന്‍ പ്രതികരിച്ചു: അതെ, നിങ്ങള്‍ എന്റെ സമീപസ്ഥരാവുക കൂടി ചെയ്യുന്നതായിരിക്കും, തീര്‍ച്ച⁴⁶

ആഭിചാരകന്മാര്‍ പറഞ്ഞു: ഒന്നുകില്‍ നീ വടി ഇടുക; അല്ലെങ്കില്‍ ഞങ്ങള്‍ ഇടാം. മൂസാ നബി പ്രതികരിച്ചു: 'നിങ്ങള്‍ തന്നെ ഇടുക.' അങ്ങനെ അവര്‍ വടികള്‍ നിലത്തിട്ടപ്പോള്‍ ജന ദൃഷ്ടികള്‍ക്കു മാരണം ചെയ്കയും അവരെ പേടിപ്പെടുത്തുകയും ഭീകരമാരണം അവതരിപ്പിക്കുകയുമുണ്ടായി. മൂസാ നബിക്കു നാം ബോധനം നല്‍കി: 'താങ്കള്‍ വടി നിലത്തിടുക.' അപ്പോഴതാ, അവരുടെ വ്യാജ മാരണങ്ങളെയെല്ലാം അതു വിഴുങ്ങുന്നു! അങ്ങനെ സത്യം പുലര്‍ന്നു കാണുകയും അവരുടെ വ്യാജ വൃത്തികളെല്ലാം ശിഥിലമായിപ്പോവുകയുമുണ്ടായി. അവിടെയവര്‍ പരാജിതരാവുകയും നിന്ദ്യരായിത്തീരുകയും ചെയ്തു⁴⁷

ആഭിചാരകന്മാര്‍ സാഷ്ടാംഗം ചെയ്യുന്നവരായി വീഴുകയും 'സര്‍വലോക സംരക്ഷകനില്‍, മൂസാനബിയുടെയും ഹാറൂന്‍ നബിയുടെയും നാഥനില്‍ ഞങ്ങള്‍ വിശ്വസിച്ചിരിക്കുന്നു' എന്നു പ്രഖ്യാപിക്കുകയുമുണ്ടായി. ഫിര്‍ഔന്‍ ആക്രോശിച്ചു: എന്റെ ഉത്തരവുണ്ടാകും മുമ്പ് നിങ്ങളവനെ വിശ്വസിക്കയോ? ഇന്നാട്ടുകാരെ ഇവിടെ നിന്നു ബഹിഷ്‌കരിക്കാനായി നിങ്ങളാവിഷ്‌കരിച്ച ഗൂഢാലോചനയാണിതെന്നു തീര്‍ച്ച. ഇതിന്റെ ഫലം നിങ്ങളറിയാന്‍ പോകയാണ്! നിങ്ങളുടെ കരചരണങ്ങള്‍ ഒന്നിനൊന്നു എതിരായി ഞാന്‍ വിച്ഛേദിച്ചുകളയുക തന്നെ ചെയ്യും, സകലത്തെയും ഞാന്‍ ക്രൂശിക്കുന്നതുമാണ്⁴⁸

അവര്‍ പ്രതികരിച്ചു: ഞങ്ങള്‍ രക്ഷിതാവിങ്കലേക്കാണ് മടങ്ങിപ്പോകുന്നത്. നാഥന്റെ ദൃഷ്ടാന്തങ്ങള്‍ വന്നുകിട്ടിയപ്പോള്‍ അതില്‍ വിശ്വസിച്ചു എന്നതല്ലാതെ മറ്റൊരപരാധവും നീ ഞങ്ങളെ പ്പറ്റി പറയില്ലല്ലോ. 'രക്ഷിതാവേ, ഞങ്ങള്‍ക്കു നീ ക്ഷമ ചൊരിഞ്ഞു തരികയും ഞങ്ങളെ മുസ്‌ലിംകളായി മരിപ്പിക്കുകയും ചെയ്യേണമേ!' ഫിര്‍ഔന്റെ ജനതയിലെ പ്രമുഖര്‍ ചോദിച്ചു: നാട്ടില്‍ കുഴപ്പമുണ്ടാക്കാനും തിരുമനസ്സിനെയും അവിടത്തെ ദൈവങ്ങളെയും കൈയൊഴിക്കാനുമായി മൂസായെയും അവന്റെയാള്‍ക്കാരെയും വിടുകയാണോ?⁴⁹
അവന്‍ ആക്രോശിച്ചു: നാം ഇസ്രയേല്യരുടെ ആണ്‍മക്കളെ കൊന്നൊടുക്കുകയും പെണ്ണുങ്ങളെ ജീവിക്കാന്‍ വിടുകയും ചെയ്യുന്നതാണ്. അവര്‍ക്കുമീതെ നാം ആധിപത്യം വാഴുക തന്നെ ചെയ്യും⁵⁰

മൂസാ നബി സ്വജനതയെ ഉദ്‌ബോധിപ്പിച്ചു: നിങ്ങള്‍ അല്ലാഹുവോട് സഹായമര്‍ത്ഥിക്കുകയും ക്ഷമകൈക്കൊള്ളുകയും ചെയ്യുക. ഭൂമി അല്ലാഹുവിന്റേതാണ്; ദാസന്മാരില്‍ താനുദ്ദേശിക്കുന്നവര്‍ക്ക് അവനത് അവകാശമായി നല്‍കുകതന്നെ ചെയ്യും. അല്ലാഹുവിനെ സൂക്ഷിക്കുന്നവര്‍ക്കാണ് ശ്ലാഘനീയ പര്യവസാനം ഉണ്ടാവുക. അവര്‍ ബോധിപ്പിച്ചു: താങ്കള്‍ റസൂലായി വരുന്നതിനു മുമ്പും അതിനു ശേഷവും ഞങ്ങള്‍ മര്‍ദന വിധേയരായിരിക്കുന്നുവല്ലോ? മൂസാ നബി പ്രത്യാശ പ്രകടിപ്പിച്ചു: രക്ഷിതാവ് നിങ്ങളുടെ പ്രതിയോഗിയെ നശിപ്പിക്കുകയും നാട്ടില്‍ നിങ്ങളെ പിന്‍ഗാമികളാക്കുകയും ചെയ്‌തേക്കാം! എന്നിട്ട് നിങ്ങളുടെ ചെയ്തികള്‍ എങ്ങനെയൊക്കെയാണെന്ന് അവന്‍ നിരീക്ഷിക്കുന്നതാണ്.

ഫിര്‍ഔന്‍ സംഘത്തെ അവര്‍ ചിന്തിക്കാന്‍ വേണ്ടി, വരള്‍ച്ചയും ഫല ദൗര്‍ഭിക്ഷ്യവും കൊണ്ട് നാം പിടികൂടി. എന്നാല്‍ ഒരു നന്മ കൈവരുമ്പോള്‍ 'നമുക്കര്‍ഹതപ്പെട്ടതു തന്നെയാണിത്' എന്നവര്‍ തട്ടിവിടും; പ്രത്യുത, എന്തെങ്കിലും തിന്മയാണനുഭവിക്കുന്നതെങ്കില്‍ 'ഇതു മൂസായുടെയും അനുയായികളുടെയും ദുഃശകുനമാണ്' എന്നാണു ജല്‍പിക്കുക. അറിയണം, അവരുടെ അവലക്ഷണം അല്ലാഹുവിങ്കലുള്ള വിധിയനുസരിച്ചാകുന്നു. പക്ഷെ, അവരില്‍ മിക്കവരും അതു മനസ്സിലാക്കുന്നില്ല. അവര്‍ ജല്‍പിച്ചു: ഞങ്ങളെ മാരണം ചെയ്യാനായി എന്തു ദൃഷ്ടാന്തം കൊണ്ടുവന്നാലും ശരി, നിന്നെ ഞങ്ങള്‍ വിശ്വസിക്കുന്ന പ്രശ്‌നമേയില്ല! അപ്പോള്‍, വെള്ളപ്പൊക്കം, വെട്ടുകിളി, പേന്‍, തവള, രക്തം എന്നിങ്ങനെ സ്പഷ്ടമായ ദൃഷ്ടാന്തങ്ങള്‍ അവര്‍ക്ക് നാമയച്ചു. എന്നിട്ടും അഹംഭാവം നടിക്കുകയും കുറ്റവാളികളായ ജനമായിത്തീരുകയുമാണവര്‍ ചെയ്തത്!

അങ്ങനെ, ശിക്ഷ വന്നെത്തിയപ്പോള്‍ അവര്‍ കേണപേക്ഷിച്ചു: ഓ മൂസാ, താങ്കളുടെ നാഥന്റെ വാഗ്ദാനാനുസൃതം അവനോടു ഞങ്ങള്‍ക്കായി പ്രാര്‍ത്ഥിക്കൂ! ഈ ശിക്ഷ അകറ്റിത്തരുന്ന പക്ഷം താങ്കളെ ഞങ്ങള്‍ വിശ്വസിക്കുക തന്നെ ചെയ്യും; ഇസ്രയേല്യരെ താങ്കളൊന്നിച്ചു വിട്ടയക്കുകയും ചെയ്യാം, തീര്‍ച്ച. എന്നാല്‍, വന്നെത്താനുള്ള ഒരവധിവരെ അവരുടെ ശിക്ഷ നാം മാറ്റി വെച്ചപ്പോള്‍, അവരതാ വാഗ്ദാന ലംഘനം നടത്തുന്നു! അക്കാരണത്താല്‍ അവരെ നാം ശിക്ഷിച്ചു; കടലില്‍ മുക്കി നശിപ്പിച്ചു-നമ്മുടെ ദൃഷ്ടാന്തങ്ങള്‍ വ്യാജമാക്കിത്തള്ളിക്കളയുകയും അവയെ കുറിച്ച് അശ്രദ്ധരാവുകയും ചെയ്തതുമൂലം. പീഡിതരായിക്കഴിഞ്ഞിരുന്ന ഇസ്രയേല്യര്‍ക്ക് നാമനുഗ്രഹം ചൊരിഞ്ഞു; ആ നാടിന്റെ കിഴക്കും പടിഞ്ഞാറുമൊക്കെ അവകാശപ്പെടുത്തിക്കൊടുത്തു. ക്ഷമകൈക്കൊണ്ടതിന്റെ ഫലമായി, താങ്കളുടെ നാഥന്റെ ഉദാത്തവചനം ഇസ്രയേല്യരില്‍ സാക്ഷാല്‍കൃതമാവുകയും⁵¹
ഫിര്‍ഔനും അനുയായികളും പടുത്തുയര്‍ത്തിക്കൊണ്ടിരുന്ന രമ്യഹര്‍മങ്ങളും കെട്ടിയുയര്‍ത്തിയ ഫല-കായ്കനികളും നാം സംഹരിച്ചു കളയുകയും ചെയ്തു.

ഇസ്രയേല്യരെ നാം ചെങ്കടല്‍ കടത്തി രക്ഷിച്ചു. എന്നിട്ട്, തങ്ങളുടെ വിഗ്രഹങ്ങളെ ഭജിച്ചു കഴിയുന്ന ഒരു സമൂഹത്തിന്റെയടുത്ത് അവരെത്തി. അവര്‍ ആവശ്യപ്പെട്ടു: ഹേ മൂസാ, ഇവര്‍ക്കു ദൈവങ്ങളുള്ളതുപോലെ ഞങ്ങള്‍ക്കും ഒരു ദൈവത്തെ ഉണ്ടാക്കിത്തരൂ!⁵²
അദ്ദേഹം പ്രതികരിച്ചു: വിവരമില്ലാത്ത ഒരു ജനത തന്നെയാണു നിങ്ങള്‍. ഇവരുടെ ഈ വിഗ്രഹാരാധനാമതം നാശവിധേയമാകുന്നതും ഇവരുടെ ചെയ്തികള്‍ ശിഥിലമാകുന്നതുമാണ്. സര്‍വരെക്കാളും അല്ലാഹു നിങ്ങളെ ശ്രേഷ്ഠരാക്കിയിരിക്കെ അവനല്ലാത്ത മറ്റൊന്ന് നിങ്ങള്‍ക്കു ഞാന്‍ ദൈവമായി അന്വേഷിക്കണമെന്നോ?⁵³

സ്വന്തം ആണ്‍മക്കളെ കൊന്നൊടുക്കുകയും പെണ്ണുങ്ങളെ ജീവിക്കാന്‍ വിടുകയും ചെയ്ത് നിങ്ങളെ ഹീന ശിക്ഷയനുഭവിപ്പിച്ചിരുന്ന ഫിര്‍ഔന്‍സംഘത്തില്‍ നിന്ന് നാം രക്ഷപ്പെടുത്തിയത് അനുസ്മരിക്കുക. നിങ്ങളുടെ രക്ഷിതാവിങ്കല്‍ നിന്നുള്ള ഗുരുതര പരീക്ഷണമായിരുന്നു അത്. മൂസാ നബിയോട് മുപ്പതു രാത്രി നാം വാഗ്ദാനം ചെയ്യുകയും പത്തു കൂടി ചേര്‍ത്ത് പൂര്‍ത്തീകരിക്കുകയും അങ്ങനെ നിശ്ചിത നാല്‍പതു നാള്‍ സമ്പൂര്‍ണമാവുകയും ചെയ്തു. പോകുമ്പോള്‍ സഹോദരന്‍ ഹാറൂനിനോട് മൂസാ നബി നിര്‍ദ്ദേശിച്ചു: സ്വജനതയുടെ കാര്യത്തില്‍ താങ്കള്‍ എന്റെ പ്രാതിനിധ്യം വഹിക്കുകയും നന്നായി പ്രവര്‍ത്തിക്കുകയും ചെയ്യുക; കുഴപ്പക്കാരുടെ മാര്‍ഗം അനുധാവനം ചെയ്യരുത്⁵⁴

നിശ്ചിത സമയം മൂസാനബി എത്തുകയും നാഥനുമായി സംഭാഷണം നടത്തുകയും ചെയ്തപ്പോള്‍ അദ്ദേഹം അപേക്ഷിച്ചു: 'നാഥാ, നിന്നെ എനിക്ക് കാണിച്ചു തരേണമേ, ഞാനൊന്നു ദര്‍ശിക്കെട്ട.' അല്ലാഹു പ്രതികരിച്ചു: 'താങ്കള്‍ക്ക് എന്നെ കാണാന്‍ കഴിയുകയേ ഇല്ല; എങ്കിലും ആ പര്‍വതത്തിലേക്ക് നോക്കുക-അതു തല്‍സ്ഥാനത്തു തന്നെ നിലകൊള്ളുന്നുവെങ്കില്‍ താങ്കള്‍ക്കെന്നെ കാണാനാകും.' അങ്ങനെ തന്റെ നാഥന്റെ പ്രഭ ആ പര്‍വതത്തിലേക്ക് വെളിപ്പെട്ടപ്പോള്‍ അതിനെ ഛിന്നഭിന്നമാക്കുകയും മൂസാനബി ബോധരഹിതനായി നിലംപതിക്കുകയുമുണ്ടായി. എന്നിട്ട് ഉണര്‍ന്നു കഴിഞ്ഞപ്പോള്‍ അദ്ദേഹം ബോധിപ്പിച്ചു: നീ എത്ര പരിശുദ്ധന്‍! നിന്നിലേക്കു ഞാന്‍ പശ്ചാത്തപിച്ചു മടങ്ങിയിരിക്കുന്നു. വിശ്വാസികളില്‍ പ്രഥമനാണു ഞാന്‍⁵⁵

അല്ലാഹു പറഞ്ഞു: ഓ മൂസാ, എന്റെ സന്ദേശങ്ങളും സംസാരവും കൊണ്ട്, ജനങ്ങളില്‍ ശ്രേഷ്ഠനായി താങ്കളെ ഞാന്‍ തെരഞ്ഞെടുത്തിരിക്കുന്നു. അതുകൊണ്ട് ഞാന്‍ താങ്കള്‍ക്കു തന്നത് മുറുകെപ്പിടിക്കുകയും കൃതജ്ഞരിലുള്‍പ്പെടുകയും ചെയ്യുക. മുഴുവന്‍ വിഷയങ്ങളെക്കുറിച്ചും-സദുപദേശവും എല്ലാ കാര്യങ്ങളെപ്പറ്റിയുള്ള പ്രതിപാദനങ്ങളും- അദ്ദേഹത്തിനു നാം പലകകളില്‍ എഴുതിക്കൊടുക്കുകയും ഇങ്ങനെ കല്‍പിക്കുകയും ചെയ്തു: ഇതു മുറുകെ പിടിക്കുക; ഇതിലെ അത്യുദാത്തകാര്യങ്ങള്‍ പ്രയോഗവത്കരിക്കാന്‍ സ്വജനതയോടനുശാസിക്കുക. അധര്‍മകാരികളുടെ ആവാസ കേന്ദ്രം വഴിയെ നിങ്ങള്‍ക്കു ഞാന്‍ കാണിച്ചു തരുന്നതാണ്⁵⁶
അന്യായമായി ഭൂമിയില്‍ അഹങ്കരിച്ചു കഴിയുന്നവരെ എന്റെ ദൃഷ്ടാന്തങ്ങളില്‍ നിന്നു ഞാന്‍ തിരിച്ചു കളയും. ദൃഷ്ടാന്തങ്ങളത്രയും കാണുകയാണെങ്കില്‍ തന്നെയും അവരതില്‍ വിശ്വസിക്കുകയില്ല; സന്മാര്‍ഗം കണ്ടാല്‍ അവരതു സ്വീകരിക്കുകയില്ല. ദുര്‍മാര്‍ഗം കണ്ടാലോ, അതാണവര്‍ വഴിയായി അംഗീകരിക്കുക. നമ്മുടെ ദൃഷ്ടാന്തങ്ങള്‍ നിഷേധിക്കുകയും അവയെക്കുറിച്ച് അശ്രദ്ധരായിത്തീരുകയും ചെയ്തതിനാലാണിത്⁵⁷
നമ്മുടെ ദൃഷ്ടാന്തങ്ങളെയും പാരത്രിക ജീവിതത്തെ അഭിമുഖീകരിക്കുന്നതിനെയും വ്യാജമാക്കിയവരുടെ കര്‍മങ്ങള്‍ ഫലശൂന്യമായിരിക്കുന്നു. തങ്ങള്‍ അനുവര്‍ത്തിച്ചിരുന്നതിന്റെ പ്രതിഫലമല്ലേ അവര്‍ക്കു നല്‍കപ്പെടുക?⁵⁸

മൂസാനബി ഥൂറിലേക്ക് പോയ ശേഷം സ്വജനത തങ്ങളുടെ സ്വര്‍ണാഭരണങ്ങള്‍ കൊണ്ട് ഒരു കാളക്കിടാവിനെ ദൈവമാക്കി; മുക്രയിടുന്ന ഒരു പ്രതിമ. തങ്ങളോടത് സംസാരിക്കുന്നില്ലെന്നും യാതൊരു വിഷയത്തിലും തങ്ങള്‍ക്കത് മാര്‍ഗദര്‍ശനം നല്‍കുന്നില്ലെന്നും അവര്‍ മനസ്സിലാക്കുന്നില്ലേ? അവരതിനെ ദൈവമാക്കുകയും അതിക്രമികളായിത്തീരുകയുമുണ്ടായി. അവര്‍ ഖേദിക്കുകയും തങ്ങള്‍ക്കു മാര്‍ഗഭ്രംശം സംഭവിച്ചിരിക്കുന്നു എന്ന് ബോധ്യമാവുകയും ചെയ്തപ്പോള്‍ അവര്‍ പരിതപിച്ചു: രക്ഷിതാവ് ഞങ്ങളോടു കരുണ കാണിക്കുകയും പൊറുത്തു തരികയും ചെയ്യുന്നില്ലെങ്കില്‍ ഞങ്ങള്‍ നഷ്ടക്കാരില്‍ പെട്ടവര്‍ തന്നെ, തീര്‍ച്ച⁵⁹

കോപാകുലനും ദുഃഖിതനുമായി സ്വജനതയിലേക്ക് മടങ്ങിവന്നപ്പോള്‍ മൂസാ നബി പറഞ്ഞു: ഞാന്‍ പോയതിനു പിറകെ നിങ്ങളനുവര്‍ത്തിച്ച കാര്യം എത്ര ഹീനം! നാഥന്റെ ഉത്തരവും വിട്ട് നിങ്ങള്‍ ധൃതികാണിച്ചുവോ?⁶⁰
തൗറാത്തിന്റെ ആ പലകകള്‍ അദ്ദേഹം താഴെയിടുകയും സഹോദരന്റെ തലമുടിപിടിച്ച് തന്നിലേക്കു വലിക്കുകയുമുണ്ടായി. ഹാറൂന്‍ നബി പ്രതികരിച്ചു: എന്റെ മാതാവിന്റെ മകനേ, എന്നെ ആളുകള്‍ ദുര്‍ബലനായിക്കാണുകയും വധിക്കുമാറാവുകയും ചെയ്തു. അതുകൊണ്ടു ഞാന്‍വഴി താങ്കള്‍ ശത്രുക്കളെ സന്തോഷിപ്പിക്കരുതേ! അക്രമികളൊന്നിച്ച് എന്നെ പരിഗണക്കുകയുമരുത്⁶¹

നിശ്ചയം, കാളക്കിടാവിനെ ദൈവമാക്കിയവര്‍ക്ക് രക്ഷിതാവിങ്കല്‍ നിന്നുള്ള ക്രോധവും ഭൗതിക ജീവിതത്തില്‍ നിസ്സാരതയും വന്നെത്തുക തന്നെ ചെയ്യും. വ്യാജം നിര്‍മിച്ചുണ്ടാക്കുന്നവര്‍ക്കു അങ്ങനെയാണു നാം പ്രതിഫലം നല്‍കുക. എന്നാല്‍ തിന്മകളനുവര്‍ത്തിക്കുകയും തദനന്തരം പശ്ചാത്തപിക്കുകയും സത്യവിശ്വാസം കൈക്കൊള്ളുകയും ചെയ്തവര്‍ക്കു താങ്കളുടെ നാഥന്‍ ഏറെ പൊറുക്കുന്നവനും കരുണ ചെയ്യുന്നവനും തന്നെയാകുന്നു. തന്റെ ക്രോധം അടങ്ങിയപ്പോള്‍ മൂസാ നബി ആ വേദ ഫലകങ്ങള്‍ കൈയിലെടുത്തു. സ്വന്തം നാഥനെ പേടിയുള്ളവര്‍ക്ക് അതു മാര്‍ഗദര്‍ശകവും കാരുണ്യവുമാണെന്ന് അതില്‍ രേഖപ്പെടുത്തിയിരുന്നു.

നാം നിശ്ചയിച്ചു കൊടുത്ത സമയത്തേക്ക് തന്റെ ജനത്തില്‍ നിന്ന് എഴുപത് പേരെ മൂസാ നബി തെരഞ്ഞെടുക്കുകയുണ്ടായി. എന്നിട്ട് ആ തീവ്രപ്രകമ്പനം അവരെ പിടികൂടിയപ്പോള്‍ അദ്ദേഹം ബോധിപ്പിച്ചു⁶²
നാഥാ നീ ഉദ്ദേശിച്ചിരുന്നുവെങ്കില്‍, അവരെയും എന്നെയും നേരത്തെ തന്നെ നിനക്ക് നശിപ്പിക്കാമായിരുന്നു. ഞങ്ങളില്‍പെട്ട വിഡ്ഢികളുടെ ചെയ്തിമൂലം ഞങ്ങളെ നീ സംഹരിക്കുകയാണോ? നിശ്ചയം, ഇതു നിന്റെ പരീക്ഷണം തന്നെയാണ്; നീയുദ്ദേശിക്കുന്നവരെ ഇതു മുഖേന നീ വഴിതെറ്റിക്കുകയും ഉദ്ദേശിക്കുന്നവരെ സന്മാര്‍ഗത്തിലാക്കുകയും ചെയ്യുന്നു. നീയാണ് ഞങ്ങളുടെ സംരക്ഷകന്‍. അതിനാല്‍ ഞങ്ങള്‍ക്കു നീ പൊറുത്തു തരികയും കരുണവര്‍ഷിക്കുകയും ചെയ്യേണമേ; പൊറുക്കുന്നവരില്‍ ഉത്തമനാണു നീ. ഇഹലോകത്തും പരലോകത്തും ഞങ്ങള്‍ക്കു നന്മ രേഖപ്പെടുത്തേണമേ. നിശ്ചയം, ഞങ്ങളിതാ നിന്നിലേക്ക് മടങ്ങിയിരിക്കുന്നു. അല്ലാഹു പ്രതികരിച്ചു: ഞാനുദ്ദേശിക്കുന്നവരെ എന്റെ ശിക്ഷ ബാധിക്കും. എന്റെ കാരുണ്യം സമസ്ത വസ്തുക്കള്‍ക്കും പ്രവിശാലമത്രേ. സൂക്ഷ്മതയോടെ ജീവിക്കുകയും സകാത്ത് നല്‍കുകയും നമ്മുടെ ദൃഷ്ടാന്തങ്ങളില്‍ വിശ്വസിക്കുകയും ചെയ്യുന്നവര്‍ക്ക് വഴിയേ ഞാനത് രേഖപ്പെടുത്തുന്നതാണ്⁶³

തങ്ങള്‍ വശമുള്ള തൗറാത്തിലും ഇന്‍ജീലിലും ഉല്ലേഖിതനായി അവര്‍ക്കു കാണാന്‍ കഴിയുന്ന, അക്ഷരം പഠിച്ചിട്ടില്ലാത്ത പ്രവാചകനായ മുഹമ്മദ് നബിയെ അനുധാവനം ചെയ്യുന്നവരാണവര്‍. ആ നബി അവരോട് നന്മകല്‍പിക്കുകയും തിന്മ നിരോധിക്കുകയും ചെയ്യുന്നു; എല്ലാ നല്ലതും അനുവദിക്കുകയും ചീത്ത നിഷിദ്ധമാക്കുകയും അവരുടെ ഭാരങ്ങള്‍ ഇറക്കി വെക്കുകയും ചെയ്യുന്നു; അവരെ വരിഞ്ഞു മുറുക്കിയിരുന്ന ചങ്ങലകള്‍ അഴിച്ചു മാറ്റുന്നു⁶⁴
അപ്പോള്‍, ആര് ആ നബിയെ വിശ്വസിക്കുകയും ആദരിക്കുകയും സഹായിക്കുകയും തന്നോടൊപ്പം അവതീര്‍ണമായ ഖുര്‍ആനിക പ്രകാശം പിന്തുടരുകയും ചെയ്യുന്നുവോ അവര്‍ തന്നെയത്രേ വിജയികള്‍.

നബിയേ, പ്രഖ്യാപിക്കുക: മര്‍ത്യസഞ്ചയമേ, നിങ്ങള്‍ സര്‍വരിലേക്കുമായുള്ള ദൈവദൂതനാണ് ഞാന്‍⁶⁵
ഭുവന-വാനങ്ങളുടെ ആധിപത്യം അവനാണ്. അവനല്ലാതെ ഒരു ദൈവവും ഇല്ല. ജീവിപ്പിക്കുകയും മരിപ്പിക്കുകയും ചെയ്യുന്നത് അവനാണ്. അതുകൊണ്ട് അല്ലാഹുവില്‍ നിങ്ങള്‍ വിശ്വസിക്കുക; അല്ലാഹുവിലും അവന്റെ വചനങ്ങളിലും വിശ്വാസമര്‍പ്പിച്ചിരിക്കുന്ന, അക്ഷരം പഠിച്ചിട്ടില്ലാത്ത പ്രവാചകനായ റസൂലിലും വിശ്വസിക്കുകയും അവിടത്തെ പിന്തുടരുകയും ചെയ്യുക. എങ്കില്‍ നിങ്ങള്‍ സന്മാര്‍ഗ പ്രാപ്തരായേക്കാം⁶⁶

എന്നാല്‍ സത്യസമേതം സന്മാര്‍ഗ ദര്‍ശനം ചെയ്യുകയും തദനുസൃതം നീതി മുറുകെ പിടിക്കുകയും ചെയ്യുന്ന ഒരു വിഭാഗം മൂസാ നബിയുടെ ജനതയിലുണ്ട്.⁶⁷

പന്ത്രണ്ട് ഗോത്ര സമൂഹങ്ങളായി ഇസ്രയേല്യരെ നാം വിഭജിച്ചു⁶⁸
തന്റെ ജനം മൂസാ നബിയോട് പാനജലമാവശ്യപ്പെട്ടപ്പോള്‍ 'താങ്കളുടെ വടികൊണ്ട് ആ പാറമേല്‍ പ്രഹരിക്കുക' എന്നു നാം അദ്ദേഹത്തിനു ബോധനമേകി. തത്സമയം അതില്‍ നിന്നു പന്ത്രണ്ടു ഉറവകള്‍ പൊട്ടിയൊലിച്ചു. തങ്ങള്‍ക്കു കുടിക്കാനുള്ള സ്ഥലം ഓരോ വിഭാഗത്തിനും മനസ്സിലായി. അവര്‍ക്കു നാം മേഘത്തണല്‍ നല്‍കുകയും കട്ടിത്തേനും കാടപ്പക്ഷിയുമിറക്കിക്കൊടുക്കുകയും 'നാം നിങ്ങള്‍ക്കു തന്ന വിശിഷ്ട ഭോജ്യങ്ങള്‍ ആഹരിക്കുക' എന്നു നിര്‍ദേശിക്കുകയും ചെയ്തു. നമ്മെ അവര്‍ ഒരു ദ്രോഹവും ഏല്‍പിച്ചിട്ടില്ല; പ്രത്യുത, തങ്ങളെത്തന്നെ ദ്രോഹിക്കുകയായിരുന്നു അവര്‍⁶⁹
അവരോട് ഇങ്ങനെ നിര്‍ദേശിക്കപ്പെട്ട സന്ദര്‍ഭം സ്മരണീയമത്രേ: 'നിങ്ങള്‍ ഈ ഖുദ്‌സില്‍ നിവസിക്കുകയും നിങ്ങള്‍ക്കിഷ്ടമുള്ളിടത്തു നിന്നു ആഹരിക്കുകയും ചെയ്യുക; പാപവിമുക്തിക്കായുള്ള പ്രാര്‍ത്ഥനാപൂര്‍വം ഖുദ്‌സിന്റെ പ്രവേശനകവാടം നമ്രഃശിരസ്‌കരായി കടക്കണം. എങ്കില്‍ നാം നിങ്ങളുടെ ദോഷങ്ങള്‍ പൊറുക്കുന്നതും പുണ്യവാന്മാര്‍ക്ക് വര്‍ധനവ് നല്‍കുന്നതുമാണ്⁷⁰
തത്സമയം, അവരില്‍ പെട്ട അതിക്രമകാരികള്‍ നിര്‍ദിഷ്ട പദമല്ലാത്ത മറ്റൊന്ന് പകരമാക്കി. തന്മൂലം, അക്രമം ചെയ്തതിന്റെ ഫലമായി ആകാശത്തുനിന്നു അവര്‍ക്കു നാം ശിക്ഷയിറക്കി⁷¹

സമുദ്ര തീരത്തെ ആ പട്ടണത്തെപ്പറ്റി താങ്കള്‍ യഹൂദികളോടു ചോദിച്ചു നോക്കൂ; അവര്‍ ശനിയാഴ്ച അതിക്രമം കാണിച്ചിരുന്നതിനെപ്പറ്റി. അതായത് അന്ന് മത്സ്യങ്ങള്‍ കൂട്ടമായി ജലോപരിതലത്തില്‍ പൊങ്ങിവരുമായിരുന്നു; മറ്റു ദിവസങ്ങളില്‍ വരികയുമില്ല. അവര്‍ അധര്‍മം പ്രവര്‍ത്തിച്ചതിന്റെ ഫലമായി അങ്ങനെ നാമവരെ പരീക്ഷിക്കുകയായിരുന്നു⁷²

അല്ലാഹു സംഹരിച്ചുകളയുകയോ കഠിന ശിക്ഷ നല്‍കുകയോ ചെയ്യാന്‍ പോകുന്ന ഒരു ജനതതിയെ എന്തിനാണ് നിങ്ങള്‍ ഉപദേശിക്കുന്നത് എന്ന് അവരില്‍ ഒരു വിഭാഗം ചോദിച്ച സന്ദര്‍ഭം സ്മരണീയമത്രേ. മറുകക്ഷി പ്രതികരിച്ചു: 'നിങ്ങളുടെ നാഥന്റെയടുത്ത് നമുക്ക് ഒഴിവ് കഴിവ് കിട്ടാനും അവര്‍ സൂക്ഷ്തയുള്ളവരായിത്തീരാനും വേണ്ടിയാകുന്നു.' എന്നാല്‍ തങ്ങള്‍ക്കു കിട്ടിയ സദുപദേശം അവര്‍ മറന്നു കളഞ്ഞപ്പോള്‍ കുറ്റകൃത്യം നിരോധിച്ചിരുന്നവരെ നാം സുരക്ഷിതരാക്കുകയും അതിക്രമികളെ ഹീനമായ ശിക്ഷയാല്‍ പിടികൂടുകയുമുണ്ടായി. അവര്‍ അധര്‍മം ചെയ്തിരുന്നതിനാലാണത്. അങ്ങനെ വിലക്കപ്പെട്ട കാര്യം ധാര്‍ഷ്ട്യപൂര്‍വം ചെയ്തപ്പോള്‍ 'നിങ്ങള്‍ നിന്ദ്യരായ കുരങ്ങുകളായിക്കൊള്ളൂ' എന്ന് നാം ഉത്തരവിട്ടു⁷³

ഇസ്രയേല്യരുടെ മേല്‍ അന്ത്യനാള്‍ വരെയും അവരെ ഹീനമായി മര്‍ദിച്ചു കൊണ്ടിരിക്കുന്ന വരെ താങ്കളുടെ നാഥന്‍ നിയോഗിക്കുക തന്നെ ചെയ്യുമെന്ന് അവന്‍ അറിയിച്ച ഘട്ടം സ്മരണീയ മത്രെ. താങ്കളുടെ രക്ഷിതാവ് അതിദ്രുതം ശിക്ഷിക്കുന്നവനും ഏറെ പൊറുക്കുന്നവനും കരുണാമയ നും തന്നെയാകുന്നു⁷⁴

ഭൂമിയില്‍ പല സമൂഹങ്ങളായി അവരെ നാം ഛിദ്രിപ്പിക്കുകയുണ്ടായി. സദ്‌വൃത്തന്മാരും അല്ലാത്തരും അവരിലുണ്ട്. നന്മകള്‍ കൊണ്ടും തിന്മകള്‍ കൊണ്ടും നാമവരെ പരീക്ഷണ വിധേയരാക്കി, അവര്‍ മടങ്ങാന്‍ വേണ്ടി.

പിന്നീട് അവര്‍ക്കു ശേഷം പിന്‍ഗാമികളായി ഒരു തലമുറ രംഗപ്രവേശം ചെയ്തു. അവര്‍ വേദത്തിന്റെ അനന്തരാവകാശികളായി. എന്നാല്‍, നിസ്സാരമായ ഈ ഭൗതിക ലോകവിഭവങ്ങള്‍ സ്വീകരിക്കയാണവര്‍ ചെയ്തത്; ഇതൊക്കെ ഞങ്ങള്‍ക്കു പൊറുക്കപ്പെടുന്നതാണ് എന്നവര്‍ ന്യായീകരിക്കുകയും ചെയ്യും. തത്തുല്യമായ മറ്റൊരു ഭൗതിക വിഭവം കിട്ടുന്നുവെങ്കില്‍ അതുമവര്‍ സ്വീകരിക്കും. അല്ലാഹുവിനെ കുറിച്ച് സത്യം മാത്രമേ പറയാവൂ എന്ന് വേദം മുഖേന അവരുമായി കരാര്‍ ചെയ്യപ്പെടുകയും ആ വേദത്തിലുള്ളത് അവര്‍ പഠിക്കുകയും ചെയ്തിട്ടില്ലേ? സൂക്ഷ്മത പുലര്‍ത്തുന്നവര്‍ക്ക് പാരത്രിക ഭവനമാണ് ഉത്തമം. നിങ്ങള്‍ ആലോചിക്കുന്നില്ലേ?

വേദഗ്രന്ഥം മുറുകെ പിടിക്കുകയും നമസ്‌കാരം കൃത്യമായി നിലനിറുത്തുകയും ചെയ്യുന്ന വരുണ്ടല്ലോ, ആ സല്‍ക്കര്‍മികളുടെ പ്രതിഫലം നാം പാഴാക്കുകയേ ഇല്ല, തീര്‍ച്ച.

പര്‍വതം ഒരു കുടപോലെ നാമവര്‍ക്കുമേല്‍ പറിച്ചുയര്‍ത്തുകയും അതു തങ്ങള്‍ക്കുമീതെ നിപതിക്കുക തന്നെ ചെയ്യുമെന്ന് അവര്‍ വിചാരിക്കുകയും ചെയ്ത ഘട്ടം സ്മരണീയമത്രേ. നാം കല്‍പിച്ചു: നിങ്ങള്‍ക്കു നാം തന്ന ഈ വേദം മുറുകെ പിടിക്കുകയും അതിലുള്ളത് ഓര്‍ക്കുകയും ചെയ്യുക. എങ്കില്‍ നിങ്ങള്‍ സൂക്ഷ്മത പാലിക്കുന്നവരായേക്കാം⁷⁵

മനുഷ്യരില്‍ നിന്ന്-അവരുടെ മുതുകുകളില്‍ നിന്ന്-താങ്കളുടെ നാഥന്‍ അവരുടെ സന്താനപരമ്പരയെ ബഹിര്‍ഗമിപ്പിച്ച് തങ്ങളെത്തന്നെ അവര്‍ക്കുമേല്‍ സാക്ഷ്യം വഹിപ്പിച്ച ഘട്ടം അനുസ്മരിക്കുക. ഞാനല്ലെയോ നിങ്ങളുടെ നാഥന്‍ എന്ന് അവന്‍ ചോദിച്ചപ്പോള്‍, അതെ, ഞങ്ങള്‍ സാക്ഷ്യം വഹിച്ചിരിക്കുന്നു എന്ന് അവര്‍ പ്രതികരിച്ചു. ഞങ്ങള്‍ ഇതു സംബന്ധിച്ച് അശ്രദ്ധരായിരുന്നു എന്നോ, 'ഞങ്ങളുടെ പിതാക്കള്‍ നേരത്തെത്തന്നെ ബഹുദൈവാരാധകരായിരുന്നു; ഞങ്ങളാകട്ടെ അവര്‍ക്കു പിന്‍ഗാമികളായി വന്ന സന്താനങ്ങളും; ആ ദുര്‍മാര്‍ഗികളനുവര്‍ത്തിച്ച പാപത്തിനു ഞങ്ങളെ നീ സംഹരിക്കുകയാണോ' എന്നോ അന്ത്യനാളില്‍ നിങ്ങള്‍ പറഞ്ഞേക്കും എന്നതിനാലാണ് ഇപ്രകാരം ഉടമ്പടി ചെയ്തത്. ഇങ്ങനെ നാം ദൃഷ്ടാന്തങ്ങള്‍ പ്രതിപാദിക്കുന്നു, അവര്‍ സത്യ ത്തിലേക്ക് മടങ്ങുവാന്‍ വേണ്ടി⁷⁶

നബിയേ, ഒരു വ്യക്തിയുടെ കഥ അവര്‍ക്കു താങ്കള്‍ പാരായണം ചെയ്തു കൊടുക്കുക: നാമയാള്‍ക്കു നമ്മുടെ ദൃഷ്ടാന്തങ്ങള്‍ നല്‍കിയിരുന്നു. എന്നാല്‍, അയാളതില്‍ നിന്നു നിര്‍മുക്തനാവുകയും പിശാച് അയാളുടെ പിന്നാലെ കൂടുകയും അങ്ങനെ അയാള്‍ ദുര്‍മാര്‍ഗികളിലുള്‍പ്പെടുകയുമുണ്ടായി⁷⁷
നാമുദ്ദേശിച്ചിരുന്നുവെങ്കില്‍ ആ ദൃഷ്ടാന്തങ്ങള്‍ വഴി അയാള്‍ക്ക് ഔന്നത്യം നല്‍കിയേനെ; പക്ഷെ, അയാള്‍ ഭൗതികതയിലേക്ക് കൂപ്പുകുത്തുകയും സ്വേച്ഛകള്‍ പിന്‍പറ്റുകയുമായിരുന്നു. ഒരു നായയുടെ ഉപമയാണയാളുടേത്-വിരട്ടിയോടിക്കുകയാണെങ്കിലും വെറുതെ വിടുകയാണെങ്കിലും അത് കിതച്ചു നാവു തൂക്കിയിടും. നമ്മുടെ ദൃഷ്ടാന്തങ്ങള്‍ വ്യാജമാക്കുന്നവരുടെ ഉപമയാണിത്. അതുകൊണ്ട്, ചിന്തിക്കാന്‍ വേണ്ടി അവര്‍ക്ക് ഈ കഥ താങ്കള്‍ പ്രതിപാദിച്ചു കൊടുക്കുക. നമ്മുടെ ദൃഷ്ടാന്തങ്ങള്‍ വ്യാജമാക്കുകയും സ്വന്തത്തെ ദ്രോഹിക്കുകയും ചെയ്യുന്നവരുടെ ഉപമ മഹാമോശം തന്നെ! അല്ലാഹു ഏതൊരാളെ നേര്‍വഴിയിലാക്കുന്നുവോ അവനാണ് സന്മാര്‍ഗ പ്രാപ്തന്‍, ഏതൊരുത്തരെ അവന്‍ വഴിതെറ്റിക്കുന്നുവോ, അവരത്രേ പരാജിതര്‍.

ജിന്നിലും മനുഷ്യരിലും ധാരാളം പേരെ നരകത്തിലേക്കായി നാം സൃഷ്ടിച്ചിരിക്കുന്നു- അവര്‍ക്ക് ഹൃദയങ്ങളുണ്ട്, അതുകൊണ്ടവര്‍ സത്യം ഗ്രഹിക്കില്ല; കണ്ണുകളുണ്ട്, അവകൊണ്ടവര്‍ സത്യം കണ്ടെത്തില്ല; കാതുകളുണ്ട്, അവകൊണ്ടവര്‍ സത്യം ശ്രവിക്കില്ല. കാലികളെപ്പോലെയാണവര്‍; അല്ല, അവയെക്കാള്‍ വഴിപിഴച്ചവര്‍. അവര്‍ തന്നെയാണ് ബോധശൂന്യന്മാര്‍!⁷⁸

അല്ലാഹുവിനു അത്യുദാത്ത നാമങ്ങളുണ്ട്; അവ കൊണ്ട് നിങ്ങളവനെ വിളിച്ചു കൊള്ളുക. അവന്റെ നാമങ്ങള്‍ വളച്ചൊടിക്കുന്നവരെ നിങ്ങള്‍ വിട്ടേക്കുക. തങ്ങളുടെ ദുഷ്‌ചെയ്തികളുടെ പ്രതിഫലം അവര്‍ക്ക് പിന്നീട് നല്‍കപ്പെടുന്നതാണ്⁷⁹
ഋജുവായ പന്ഥാവിലേക്ക് വഴികാണിക്കുകയും സത്യം മുറുകെ പിടിച്ച് നീതി പുലര്‍ത്തുകയും ചെയ്യുന്ന ഒരു വിഭാഗം നമ്മുടെ സൃഷ്ടികളിലുണ്ട്⁸⁰
എന്നാല്‍ നമ്മുടെ ദൃഷ്ടാന്തങ്ങള്‍ വ്യാജമാക്കിയവരെ തങ്ങള്‍ നിനച്ചിരിക്കാത്ത വിധം നാം ക്രമപ്രവൃദ്ധമായി പിടികൂടുകയും അവര്‍ക്കു നാം ഇടകൊടുക്കുകയും ചെയ്യുന്നതാണ്. നിശ്ചയം, എന്റെ തന്ത്രം സുശക്തം തന്നെ!⁸¹

തങ്ങളുടെ കൂട്ടുകാരന്‍ മുഹമ്മദ് നബി(സ്വ)ക്ക് യാതൊരുവിധ ഭ്രാന്തുമില്ലെന്ന് അവര്‍ ചിന്തിച്ചു ഗ്രഹിക്കുന്നില്ലേ? സ്പഷ്ടമായ മുന്നറിയിപ്പുകാരന്‍ മാത്രമാണു റസൂല്‍. ഭുവന-വാനങ്ങളുടെ ഭരണ സംവിധാനം, അല്ലാഹു പടച്ച ഏതൊരു വസ്തുവും, തങ്ങളുടെ ജീവിതാവധി തീരാറായിരിക്കാം എന്നിവയെപ്പറ്റിയൊന്നും അവര്‍ ആലോചിച്ചു നോക്കുന്നില്ലേ? ഈ ഖുര്‍ആന്‍ അവിശ്വസിക്കയാണെങ്കില്‍, പിന്നെ ഏതൊരു വൃത്താന്തത്തിലാണവര്‍ വിശ്വസിക്കുക?! അല്ലാഹു ആരെയെങ്കിലും ദുര്‍മാര്‍ഗത്തിലാക്കിയാല്‍ പിന്നെ ഒരു സന്മാര്‍ഗദര്‍ശകനും അവനുണ്ടാകില്ല; തങ്ങളുടെ ധിക്കാരത്തില്‍ അന്ധമായി വിഹരിക്കാനായി അവരെ അവന്‍ വിട്ടേച്ചു കളയും⁸²

അന്ത്യദിനത്തെപ്പറ്റി, അതെപ്പോഴാണ് വരിക എന്ന് താങ്കളോടവര്‍ ചോദിക്കുന്നു. പറയുക: അതു സംബന്ധിച്ച അറിവ് എന്റെ നാഥങ്കല്‍ മാത്രമാണ്. അതിന്റെ സമയത്ത് അവന്‍ മാത്രമാണത് പ്രത്യക്ഷീഭവിപ്പിക്കുക. വാന-ഭുവന നിവാസികളില്‍ അത് കനത്തതായിരിക്കും! യാദൃച്ഛികമായേ നിങ്ങള്‍ക്കത് വന്നെത്തൂ. സൂക്ഷ്മമായന്വേഷിച്ചു ഗ്രഹിച്ചവനെന്ന നിലക്കാണ് താങ്കളോടതിനെക്കുറിച്ച് അവര്‍ ചോദിക്കുന്നത്. പറയുക: അതു സംബന്ധിച്ച ജ്ഞാനം അല്ലാഹുവിങ്കല്‍ മാത്രമാണുള്ളത്. എന്നാല്‍ മിക്ക ജനങ്ങളും യാഥാര്‍ത്ഥ്യം ഗ്രഹിക്കുന്നില്ല⁸³

പ്രഖ്യാപിക്കുക: അല്ലാഹു ഉദ്ദേശിച്ചതൊഴിച്ച്, എനിക്കു തന്നെ ഒരു ഉപകാരമോ ഉപദ്രവമോ എന്റെ അധീനതയിലില്ല. ഞാന്‍ അദൃശ്യമറിഞ്ഞിരുന്നുവെങ്കില്‍, ധാരാളം നന്മകള്‍ ആര്‍ജിച്ചു വെക്കുമായിരുന്നു; തിന്മകള്‍ എന്നെ ബാധിക്കയുമില്ലായിരുന്നു. ദുര്‍മാര്‍ഗികള്‍ക്കു താക്കീതുകാരനും വിശ്വാസികള്‍ക്ക് ശുഭവാര്‍ത്താവാഹകനും മാത്രമാണു ഞാന്‍⁸⁴

ഒരേയൊരു ശരീരത്തില്‍ നിന്നു നിങ്ങളെ പടച്ചത് അവനാണ്. എന്നിട്ട് അതില്‍ നിന്നു തന്നെ അതിന്റെ ഇണയെയും അവന്‍ സൃഷ്ടിച്ചു, അവളോടൊത്ത് മനസ്സമാധാനം നേടാന്‍⁸⁵
അങ്ങനെ പുരുഷന്‍ അവളുമായി ഇണചേരുമ്പോള്‍ അവള്‍ ലഘുവായ ഗര്‍ഭഭാരം വഹിക്കുകയും അതുമായി നടക്കുകയും ചെയ്യുന്നു. എന്നിട്ട്, അവള്‍ക്കു ഗര്‍ഭഭാരം വര്‍ധിക്കുമ്പോള്‍ ഇരുവരും നാഥനായ അല്ലാഹുവിനോട് ഇങ്ങനെ പ്രാര്‍ത്ഥിക്കും: 'നീ ഒരുത്തമ സന്തതിയെ തരികയാണെങ്കില്‍ ഞങ്ങള്‍ കൃതജ്ഞരുടെ ഗണത്തില്‍ തന്നെയായിരിക്കും, തീര്‍ച്ച.' അങ്ങനെ അവരിരുവര്‍ക്കും അല്ലാഹു ഒരു നല്ല കുട്ടിയെ നല്‍കുമ്പോള്‍ അതിലവര്‍ അവനു പങ്കുകാരെ സ്ഥാപിക്കുന്നു! അവരുടെ കല്‍പിത ദൈവങ്ങളില്‍ നിന്നെല്ലാം മഹോന്നതനത്രേ അല്ലാഹു. അവര്‍ പങ്കാളികളാക്കുന്നത് യാതൊന്നും സൃഷ്ടിക്കാത്തവയെയാണോ? അവ തന്നെ നിര്‍മിച്ചുണ്ടാക്കപ്പെടുന്നവയാണ്. അവര്‍ക്ക് യാതൊരുവിധ സഹായവും ചെയ്യാന്‍ ആ ആരാധ്യ വസ്തുക്കള്‍ക്കാവില്ല. സ്വന്തത്തെത്തന്നെ സഹായിക്കാന്‍ അവക്കു കഴിയില്ല.

നിങ്ങള്‍ സന്മാര്‍ഗത്തിലേക്കു ക്ഷണിക്കുന്നുവെങ്കില്‍ അവര്‍ നിങ്ങളെ പിന്തുടരുകയില്ല. അവരെ ക്ഷണിച്ചാലും മൗനം പാലിച്ചാലും നിങ്ങള്‍ക്കു സമമാണ്. അല്ലാഹുവിനെ വിട്ട് നിങ്ങളാരാധിക്കുന്ന ദൈവങ്ങള്‍ നിങ്ങളെപ്പോലുള്ള അടിമകള്‍ മാത്രമാകുന്നു. അവരെ വിളിച്ചു നോക്കൂ, നിങ്ങള്‍ക്കവര്‍ ഉത്തരം തരട്ടെ, നിങ്ങള്‍ സത്യവാദികളാണെങ്കില്‍! അവര്‍ക്കു നടക്കുവാന്‍ കാലുകളോ പിടിക്കാന്‍ കൈകളോ കാണുവാന്‍ കണ്ണുകളോ കേള്‍ക്കുവാന്‍ കാതുകളോ ഉണ്ടോ?! നബിയേ, പറയുക: നിങ്ങളുടെ ആ പങ്കാളികളെ വിളിക്കുകയും എന്നിട്ട് ഒട്ടും ഇടതരാതെ എനിക്കെതിരെ കുതന്ത്രം പ്രയോഗിക്കുകയും ചെയ്തു കൊള്ളുക!⁸⁶

ഈ ഖുര്‍ആന്‍ ഇറക്കിയ അല്ലാഹുവാണ് എന്റെ സംരക്ഷകന്‍, സജ്ജനങ്ങളുടെ കാര്യം അവന്‍ ഏറ്റെടുക്കുന്നതാണ്. അല്ലാഹുവിനെ വിട്ട് നിങ്ങളാരാധിക്കുന്ന പരദൈവങ്ങള്‍ക്ക് നിങ്ങളെ സഹായിക്കാന്‍ കഴിയില്ല; സ്വന്തത്തെ തന്നെ അവ സഹായിക്കുന്നതല്ല. നേര്‍മാര്‍ഗത്തിലേക്ക് നിങ്ങളവരെ വിളിക്കുന്നുവെങ്കില്‍ അവ ശ്രവിക്കുകയില്ല. നിന്റെ നേരെ അവ നോക്കുന്നതായി കാണാം, എന്നാല്‍ യാതൊന്നും കാണുകയില്ല. താങ്കള്‍ മാപ്പ് മുറുകെ പിടിക്കുകയും നന്മ കല്‍പിക്കുകയും മൂഢന്മാരെ അവഗണിക്കുകയും ചെയ്യുക. പിശാചിന്റെ വല്ല ദുര്‍ബോധനവും നിങ്ങളെ ബാധിക്കുന്നുവെങ്കില്‍ അല്ലാഹുവിനോട് കാവല്‍ ചോദിക്കുക; നിശ്ചയം, എല്ലാം കേള്‍ക്കുന്നവനും അറിയുന്നവനുമാണവന്‍.

സൂക്ഷ്മത പുലര്‍ത്തുന്നവര്‍ പൈശാചിക ദുര്‍ബോധനമുണ്ടാകുമ്പോള്‍ അല്ലാഹുവിനെ സ്മരിക്കും. തത്സമയം അവര്‍ ഉള്‍ക്കാഴ്ചയുള്ളവരായിത്തീരുന്നതാണ്. എന്നാല്‍, പിശാചുക്കളുടെ മിത്രങ്ങളാകട്ടെ, ദുര്‍മാര്‍ഗത്തില്‍ അവരെ അയച്ചു വിട്ടുകൊണ്ടിരിക്കും അവര്‍; പിന്നെയവരതില്‍ ഒരു വീഴ്ചയും വരുത്തില്ല.⁸⁷

ആവശ്യപ്പെട്ട ദൃഷ്ടാന്തം അവര്‍ക്കു താങ്കള്‍ കാണിച്ചു കൊടുത്തില്ലെങ്കില്‍ 'നീ എന്തു കൊണ്ട് സ്വയമത് കാണിക്കുന്നില്ല' എന്നാണവരുടെ ചോദ്യം. പറയുക: എന്റെ നാഥങ്കല്‍ നിന്നു കിട്ടുന്ന സന്ദേശം പിന്‍പറ്റുക മാത്രമാണു ഞാന്‍. ഈ ഖുര്‍ആന്‍ നിങ്ങളുടെ രക്ഷിതാവിങ്കല്‍ നിന്നുള്ള തെളിവുകളും, വിശ്വസിക്കുന്ന ജനതക്ക് മാര്‍ഗദര്‍ശനവും കാരുണ്യവുമാണ്⁸⁸
ഖുര്‍ആന്‍ പാരായണം ചെയ്യപ്പെടുമ്പോള്‍ നിങ്ങളത് സശ്രദ്ധം ശ്രവിക്കുകയും നിശ്ശബ്ദത പാലിക്കുകയും ചെയ്യുക; എങ്കില്‍ നിങ്ങള്‍ക്ക് കാരുണ്യ വര്‍ഷമുണ്ടായേക്കാം⁸⁹

വിനയത്തോടെയും ഭയത്തോടെയും രാവിലെയും വൈകുന്നേരവും രഹസ്യമായി താങ്കളുടെ നാഥനെ അനുസ്മരിക്കുക; വാക്കുകള്‍ ഉച്ചത്തിലാകാതെയും അവനെ ഓര്‍ക്കുക. അശ്രദ്ധരുടെ കൂട്ടത്തില്‍ നിങ്ങളകപ്പെട്ടു പോകരുത്⁹⁰
നിശ്ചയം, താങ്കളുടെ രക്ഷിതാവിന്റെയടുത്തുള്ള മലക്കുകള്‍ അവനെ ആരാധിക്കുന്നതില്‍ നിന്ന് അഹങ്കാരം നടിക്കുകയില്ല. അവര്‍ അവന്റെ മഹത്ത്വം വാഴ്ത്തുകയും അവനു സാഷ്ടാംഗം നമിക്കുകയും ചെയ്തു കൊണ്ടിരിക്കുന്നു⁹¹