അൽ അൻഫാൽ - الأنفال - Al-Anfal

നബിയേ, താങ്കളോടവര്‍ സമരാര്‍ജിത സമ്പത്തുക്കളെ സംബന്ധിച്ചു ചോദിക്കുന്നതാണ്¹
മറുപടി നല്‍കുക: യുദ്ധത്തില്‍ കിട്ടിയ സ്വത്തുക്കള്‍ അല്ലാഹുവിനും റസൂലിനുമുള്ളതാകുന്നു. അതുകൊണ്ട്, നിങ്ങള്‍ അല്ലാഹുവിനെ സൂക്ഷിക്കുകയും പരസ്പര ബന്ധങ്ങള്‍ മെച്ചപ്പെടുത്തുകയും അല്ലാഹുവിനെയും റസൂലിനെയും അനുസരിക്കുകയും ചെയ്യണം, നിങ്ങള്‍ വിശ്വാസികളാണെങ്കില്‍.

അല്ലാഹുവിനെക്കുറിച്ച് അനുസ്മരിക്കപ്പെട്ടാല്‍ ഹൃദയങ്ങള്‍ പേടിച്ചു വിറകൊള്ളുകയും അവന്റെ സൂക്തങ്ങള്‍ പാരായണം ചെയ്യപ്പെട്ടാല്‍ വിശ്വാസം വര്‍ധിക്കുകയും തങ്ങളുടെ നാഥനില്‍ സമസ്തവും അര്‍പ്പിക്കുകയും ചെയ്യുന്നവര്‍ മാത്രമാണ് സത്യവിശ്വാസികള്‍; നമസ്‌കാരം നിലനിറുത്തുകയും നാം നല്‍കിയതില്‍ നിന്നു ചെലവഴിക്കുകയും ചെയ്യുന്നവര്‍. അവര്‍ തന്നെയാണ് സാക്ഷാല്‍ വിശ്വാസികള്‍. തങ്ങളുടെ രക്ഷിതാവിങ്കല്‍ ഒട്ടേറെ സ്ഥാനങ്ങളും പാപമോചനവും സമാദരണീയമായ ആഹാരവും അവര്‍ക്കുണ്ട്.

സത്യവിശ്വാസികളിലൊരു സംഘം അനിഷ്ടമുള്ളവരായിരിക്കെത്തന്നെ, സത്യസന്ധമായൊരു വിഷയത്തിന് നാഥന്‍ താങ്കളെ സ്വഗൃഹത്തില്‍ നിന്നിറക്കിയപ്പോഴുണ്ടായ അവസ്ഥ പോലെത്തന്നെ. വസ്തുത വ്യക്തമായിട്ടും ന്യായമായ അക്കാര്യത്തില്‍ താങ്കളോടവര്‍ തര്‍ക്കിക്കുകയാണ്; നോക്കി നില്‍ക്കേ മരണത്തിലേക്ക് വലിച്ചിഴക്കപ്പെടുന്നതുപോലെ.²

നിങ്ങള്‍ക്ക് രണ്ടിലൊരു സംഘത്തെ³
സ്വന്തമാക്കിത്തരാമെന്ന് അല്ലാഹു വാഗ്ദാനം ചെയ്ത സന്ദര്‍ഭം സ്മരണീയമത്രേ. ആയുധ ശേഷിയില്ലാത്ത സംഘം സ്വായത്തമാകണമെന്നായി രുന്നു നിങ്ങളുടെ ഹിതം. എന്നാല്‍, തന്റെ ഉത്തരവുകള്‍ മുഖേന സത്യസാക്ഷാല്‍ക്കരണത്തിനും നിഷേധികളുടെ ഉന്മൂലനത്തിനുമാണ് അല്ലാഹു ഉദ്ദേശിക്കുന്നത്. അധര്‍മകാരികള്‍ അനിഷ്ടപ്പെട്ടാലും ശരി, സത്യത്തെ സാക്ഷാല്‍ക്കരിക്കേണ്ടതിനും അസത്യത്തെ ശിഥിലമാക്കേണ്ടതിനും വേണ്ടിയത്രേ അത്⁴
നിങ്ങള്‍ നാഥനോട് സഹായമര്‍ത്ഥിച്ച സന്ദര്‍ഭം സ്മരിക്കുക. തുടര്‍ച്ചയായി ആയിരം മലക്കുകളെ അയച്ചുതന്ന് നിങ്ങള്‍ക്കു ഞാന്‍ പിന്‍ബലം നല്‍കുന്നതാണ് എന്ന് തത്സമയം നിങ്ങള്‍ക്കവന്‍ മറുപടി നല്‍കി. ഒരു ശുഭവാര്‍ത്തയായും നിങ്ങള്‍ക്കു മനസ്സമാധാനമുണ്ടാകുവാനു മാണ് അല്ലാഹു അങ്ങനെ ചെയ്തത്. അല്ലാഹുവിങ്കല്‍ നിന്നു മാത്രമാണ് ഏതൊരു സഹായവും . അവന്‍ പ്രതാപശാലിയും യുക്തിമാനും തന്നെ. തന്റെ പക്കല്‍ നിന്നുള്ള മനഃശാന്തിയായി അല്ലാഹു നിങ്ങളെ നിദ്രാമയക്കത്താല്‍ ആവരണം ചെയ്ത സന്ദര്‍ഭം സ്മരണീയമത്രേ. നിങ്ങളെ ശുദ്ധീകരിക്കാനും പൈശാചിക ദുര്‍ബോധനം ദൂരീകരിക്കാനും മനസ്സുകള്‍ ദൃഢീകരിക്കാനും കാലുറപ്പിച്ചു നിറുത്താനുമായി അവന്‍ നിങ്ങള്‍ക്ക് അന്തരീക്ഷത്തില്‍ നിന്നു മഴ വര്‍ഷിച്ചു തന്നതും ഓര്‍ക്കുക⁵

ഞാന്‍ നിങ്ങളൊന്നിച്ചു തന്നെയുണ്ട്, അതിനാല്‍ സത്യവിശ്വാസികളെ അടിയുറപ്പിച്ചു നിറുത്തുക; നിഷേധികളുടെ ഹൃദയങ്ങളില്‍ ഞാന്‍ ഭീതി വിതക്കുന്നതാണ്, അതുകൊണ്ട് അവരുടെ ശിരസ്സുകളും കൈകാലുകളും നിങ്ങള്‍ വിച്ഛേദിക്കുക എന്ന് താങ്കളുടെ നാഥന്‍ മലക്കുകള്‍ക്ക് സന്ദേശം നല്‍കിയ സന്ദര്‍ഭം സ്മരണീയമത്രേ. അല്ലാഹുവിനോടും അവന്റെ ദൂതനോടും അവര്‍ ശത്രുത പുലര്‍ത്തി എതിരു നിന്നതുകൊണ്ടു മാത്രമാണത്. അല്ലാഹുവിനോടും റസൂലിനോടും ആരു ശാത്രവം പുലര്‍ത്തുന്നുവോ അവരെയവന്‍ കഠിനശിക്ഷക്കു വിധേയമാക്കുക തന്നെ ചെയ്യും; അതു നിങ്ങള്‍ ആസ്വദിക്കുക. സത്യ നിഷേധികള്‍ക്ക് നരകശിക്ഷ വേറെയും ഉണ്ടായിരിക്കും⁶

സത്യവിശ്വാസികളേ, നിഷേധികളുടെ സേനാവ്യൂഹവുമായി കണ്ടുമുട്ടുമ്പോള്‍ നിങ്ങള്‍ പിന്തിരിഞ്ഞോടരുത്. യുദ്ധാവശ്യാര്‍ത്ഥം മറ്റൊരിടത്തേക്ക് മാറി നില്‍ക്കാനോ വേറെയൊരു സംഘത്തില്‍ സംഗമിക്കാനോ ആയല്ലാതെ ഒരാള്‍ രണാങ്കണത്തില്‍ നിന്നു പിന്തിരിഞ്ഞോടിയാല്‍ അയാള്‍ അല്ലാഹുവിന്റെ ക്രോധത്തിനിരയായതുതന്നെ. അവന്റെ സങ്കേതം നരകമായിരിക്കും. എത്ര ഹീനമായ മടക്കസ്ഥലമാണത്!⁷

(വിശ്വാസികളേ,) നിങ്ങളല്ല ശത്രുക്കളെ വധിച്ചത്; പ്രത്യുത, അവരെ കൊന്നുകളഞ്ഞത് അല്ലാഹുവാണ്.(നബിയേ,) താങ്കളവരെ എറിഞ്ഞപ്പോള്‍, യഥാര്‍ത്ഥത്തില്‍ എറിഞ്ഞത് താങ്കളല്ല, പ്രത്യുത, അല്ലാഹുവാണ് എറിഞ്ഞത്⁸
തന്റെ പക്കല്‍ നിന്നു ഒരു ഉദാത്ത പരീക്ഷണം വഴി അല്ലാഹു സത്യവിശ്വാസികളെ പരീക്ഷിക്കുന്നതിനു വേണ്ടിയായിരുന്നു അത്. കാര്യങ്ങള്‍ നന്നായി കേള്‍ക്കുന്നവനും അറിയുന്നവനും തന്നെയാണ് അല്ലാഹു. ഇതെന്തിനെന്നാല്‍, നിഷേധികളുടെ കുതന്ത്രം അവന്‍ ദുര്‍ബലമാക്കുക തന്നെ ചെയ്യും.

നിഷേധികളേ, നിങ്ങള്‍ വിജയമര്‍ത്ഥിച്ചിരുന്നുവെങ്കില്‍ ഇതാ ആ വിജയം വന്നുകഴിഞ്ഞിരി ക്കുന്നു! നിഷേധം കൈയൊഴിയുന്നുവെങ്കില്‍ അതാണ് നിങ്ങള്‍ക്ക് ഉത്തമം. അതിലേക്കു തന്നെ നിങ്ങള്‍ തിരിച്ചു വരികയാണെങ്കില്‍ ഇവ്വിധം സംഹരണം നാമും ആവര്‍ത്തിക്കും. എത്രയധികമുണ്ടെ ങ്കിലും നിങ്ങളുടെ സംഘശക്തി ഒരു ഗുണവും ചെയ്യില്ല. അല്ലാഹു സത്യവിശ്വാസികളൊന്നിച്ചു തന്നെയായിരിക്കും, തീര്‍ച്ച⁹

സത്യവിശ്വാസികളേ, അല്ലാഹുവിനെയും റസൂലിനെയും നിങ്ങള്‍ അനുസരിക്കുക; സത്യം ശ്രവിച്ചുകൊണ്ടിരിക്കെ റസൂലിനെവിട്ട് പിന്തിരിഞ്ഞു കളയരുത്. ഒന്നും അനുസരിക്കാതെ, 'ഞങ്ങള്‍ കേട്ടിരിക്കുന്നു' എന്നു പറഞ്ഞവരെപ്പോലെ നിങ്ങളാവരുത്. കാര്യങ്ങള്‍ ചിന്തിച്ചു ഗ്രഹിക്കാത്ത ബധിരരും ഊമകളുമാണ് അല്ലാഹുവിങ്കല്‍ ഏറ്റം നികൃഷ്ട ജീവികള്‍¹⁰
അവരിലെന്തെങ്കിലും നന്മയുള്ളതായി അല്ലാഹുവിനറിയുമായിരുന്നെങ്കില്‍ അവനവരെ കേള്‍പ്പിക്കുമായിരുന്നു; കേള്‍പ്പിച്ചിരുന്നെങ്കില്‍ തന്നെ അതവഗണിച്ചുകൊണ്ട് അവര്‍ പിന്തിരിഞ്ഞുകളയും.

സത്യവിശ്വാസികളേ, അല്ലാഹുവിനും റസൂലിനും ഉത്തരം ചെയ്യുക-നിങ്ങളെ സജീവരാ ക്കാനുള്ള സല്‍പന്ഥാവിലേക്കു വിളിക്കുമ്പോള്‍. മനുഷ്യന്റെയും അവന്റെ മനസ്സിന്റെയുമിടക്ക് അല്ലാഹു മറയിടുമെന്നും¹¹
അവങ്കലേക്ക് നിങ്ങള്‍ സംഗമിപ്പിക്കപ്പെടുമെന്നും അറിഞ്ഞുകൊള്ളുക. ഒരു ശിക്ഷ ബാധിക്കുന്നതു സംബന്ധിച്ചു നിങ്ങള്‍ ജാഗ്രത കൈക്കൊള്ളുക-നിങ്ങളിലെ അക്രമകാരികളെ മാത്രമാകില്ല അതു പിടികൂടുക¹²
കഠിനമായി ശിക്ഷിക്കുന്നവനാണ് അല്ലാഹു എന്ന് അറിഞ്ഞു കൊള്ളുക! ഓര്‍ക്കുക: ശത്രുജനം തട്ടിയെടുക്കുമെന്നു പേടിച്ച് നാട്ടില്‍ ദുര്‍ബലരായി ഗണിക്കപ്പെട്ടു കഴിഞ്ഞിരുന്ന ഏതാനും പേരായിരുന്നു നിങ്ങള്‍; എന്നിട്ട ്‌നിങ്ങള്‍ക്കവന്‍ അഭയമേകി, തന്റെ സഹായം കൊണ്ട് പിന്‍ബലം തന്നു, വിശിഷ്ട ഭോജ്യങ്ങളില്‍ നിന്നു ഉപജീവനം നല്‍കി- നിങ്ങള്‍ കൃതജ്ഞത പ്രകടിപ്പിക്കാന്‍ വേണ്ടി¹³

സത്യവിശ്വാസികളേ, അറിഞ്ഞുകൊണ്ട് നിങ്ങള്‍ അല്ലാഹുവിനെയും റസൂലിനെയും വഞ്ചിക്കുകയോ വിശ്വസിച്ചേല്‍പിക്കപ്പെട്ടവയില്‍ ചതിക്കുകയോ ചെയ്യരുത്¹⁴
നിങ്ങളുടെ സമ്പത്തുക്കളും സന്താനങ്ങളും പരീക്ഷണമാണെന്നും അല്ലാഹുവിങ്കലാണ് ഉദാത്തമായ പ്രതിഫല മുള്ളതെന്നും നിങ്ങള്‍ അറിഞ്ഞുകൊള്ളുക.

സത്യവിശ്വാസികളേ, അല്ലാഹുവിനെ സൂക്ഷിക്കുന്നുവെങ്കില്‍ നിങ്ങള്‍ക്കു സത്യാ സത്യവിവേചന ശേഷി അവനുണ്ടാക്കിത്തരും, പാപങ്ങള്‍ മായ്ച്ചുകളയും, പൊറുത്തു തരും. അതിമഹത്തായ ഔദാര്യമുള്ളവനത്രേ അല്ലാഹു. നബിയേ, തടങ്കലില്‍ വെക്കുകയോ വധിക്കുകയോ നാടുകടത്തുകയോ ചെയ്യാനായി അങ്ങേക്കെതിരെ നിഷേധികള്‍ കുതന്ത്രം പ്രയോഗിച്ച സന്ദര്‍ഭം സ്മരണീയമത്രേ¹⁵
അവര്‍ കുതന്ത്രം പ്രയോഗിക്കുന്നു; അല്ലാഹു അതിനു പ്രതിക്രിയ ചെയ്യുന്നു. കുതന്ത്രങ്ങള്‍ക്കു പ്രതിക്രിയ ചെയ്യാന്‍ അതിവിദഗ്ദനത്രേ അല്ലാഹു.

നമ്മുടെ സൂക്തങ്ങള്‍ പാരായണം ചെയ്യപ്പെട്ടാല്‍ അവര്‍ തട്ടിവിടും: ഞങ്ങളിതുകേട്ടിരിക്കു ന്നു. വേണമെന്നുവിചാരിച്ചാല്‍ ഈ ഖുര്‍ആന്‍ പോലുള്ളത് ഞങ്ങളും പറയും. ഇവയത്രയും പൂര്‍വികരുടെ കെട്ടുകഥകള്‍ മാത്രമാണ്. 'അല്ലാഹുവേ, ഈ ഖുര്‍ആന്‍ നിന്റെ പക്കല്‍ നിന്നുള്ള സത്യസന്ദേശമാണ് എങ്കില്‍ ആകാശത്തുനിന്ന് ഞങ്ങളുടെ മേല്‍ കന്മഴ വര്‍ഷിക്കുകയോ വേദനയുറ്റ ശിക്ഷ കൊണ്ടുവരികയോ ചെയ്യൂ' എന്നു ആ നിഷേധികള്‍ പറഞ്ഞ സന്ദര്‍ഭം സ്മരണീയമത്രേ¹⁶
എന്നാല്‍ താങ്കള്‍ അവര്‍ക്കുമധ്യേ ജീവിച്ചിരിക്കെയോ അവര്‍ പാപമോചനമര്‍ത്ഥിച്ചു കൊണ്ടിരി ക്കെയോ അല്ലാഹു അവരെ ശിക്ഷിക്കുന്നതല്ല¹⁷

വിശുദ്ധ മസ്ജിദില്‍ നിന്നു വിശ്വാസികളെ ഉപരോധിച്ചു കൊണ്ടിരിക്കുമ്പോള്‍ അവരെ അല്ലാഹു ശിക്ഷിക്കാതിരിക്കുന്നതെങ്ങനെ? അവര്‍ അതിന്റെ സംരക്ഷകരല്ല താനും; അല്ലാഹുവിനെ ഭയപ്പെടുന്നവര്‍ മാത്രമാണ് അതിന്റെ രക്ഷാകര്‍ത്താക്കള്‍. പക്ഷേ, അവരില്‍ മിക്കവരും വിവരമില്ലാത്ത വരാണ്. ചൂളം വിളിയും കൈയടിയും മാത്രമാണ് കഅ്ബത്തിങ്കലുള്ള അവരുടെ പ്രാര്‍ത്ഥന¹⁸
സത്യത്തെ നിഷേധിച്ചിരുന്നതുകൊണ്ട് നിങ്ങള്‍ ശിക്ഷ ആസ്വദിച്ചു കൊള്ളുക. അല്ലാഹുവിന്റെ വഴിയില്‍ നിന്നു മനുഷ്യരെ ഉപരോധിക്കുവാനാണ് നിഷേധികള്‍ തങ്ങളുടെ സമ്പത്തുക്കള്‍ വ്യയം ചെയ്യുന്നത്. അങ്ങനെയവര്‍ ചെലവഴിക്കുന്നതും പിന്നീടതവര്‍ക്ക് നെടും ഖേദമായിത്തീരുന്നതുമാണ്. അനന്തരമവര്‍ കീഴടക്കപ്പെടുകയും ചെയ്യും. സത്യനിഷേധികള്‍ നരകത്തിലേക്ക് സംഗമിപ്പിക്കപ്പെടു ന്നതാണ്. നല്ലതില്‍ നിന്നു ചീത്തയെ അല്ലാഹു വേര്‍തിരിക്കാനും ചീത്തയെ മേല്‍ക്കുമേല്‍ കുമിച്ചു കൂട്ടി കൂമ്പാരമാക്കി നരകത്തിലെറിയാനും വേണ്ടിയാണിത്. അവര്‍ തന്നെയത്രെ പരാജിതര്‍¹⁹

നിഷേധത്തില്‍ നിന്നു പിന്തിരിയുകയാണെങ്കില്‍ മുമ്പ് ചെയ്തുപോയതൊക്കെ പൊറുക്കപ്പെടുമെന്ന് സത്യനിധേഷികളോട് താങ്കള്‍ പറയുക. ഇനിയവര്‍ സത്യനിഷേധത്തിലേക്കു തന്നെ വരികയാണെങ്കിലോ, മുന്‍ഗാമികളിലെ ദൈവികനടപടി കഴിഞ്ഞു പോയതാണല്ലോ²⁰
മര്‍ദനം ഇല്ലാതാവുകയും അനുസരണമത്രയും അല്ലാഹുവിന്നായിത്തീരുകയും ചെയ്യുന്നതുവരെ നിഷേധികളോട് നിങ്ങള്‍ യുദ്ധം ചെയ്യുക. ഇനി അവര്‍ വിരമിച്ചാലോ, അവര്‍ അനുവര്‍ത്തിക്കുന്ന തെല്ലാം കാണുന്നവന്‍ തന്നെയാണ് അല്ലാഹു²¹
ഇനി, സത്യം വിട്ട് അവര്‍ പിന്തിരിയുന്നുവെങ്കില്‍, അറിയുക: അല്ലാഹുവാണ് നിങ്ങളുടെ രക്ഷാധികാരി; ഏറ്റം നല്ല സംരക്ഷകനും സഹായിയുമത്രേ അവന്‍.

അറിയുക: ഏതുയുദ്ധമുതല്‍ നിങ്ങള്‍ക്ക് കിട്ടിയാലും അതിന്റെ അഞ്ചിലൊരംശം അല്ലാഹു വിനും റസൂലിനും അവിടത്തെ സമീപബന്ധുക്കള്‍ക്കും അനാഥകള്‍ക്കും പാവങ്ങള്‍ക്കും ഗതിയറ്റ യാത്രക്കാര്‍ക്കുമുള്ളതാണ്;²²
അല്ലാഹുവിലും സത്യാസത്യവിവേചന നാളില്‍-ആ രണ്ടു സംഘങ്ങ ള്‍ ഏറ്റുമുട്ടിയ ദിനം- സ്വന്തം ദാസന്റെ മേല്‍ നാം ഇറക്കിയതിലും നിങ്ങള്‍ വിശ്വാസമര്‍പ്പിച്ചിട്ടുണ്ടെ ങ്കില്‍²³
സര്‍വകാര്യങ്ങള്‍ക്കും ശേഷിയുറ്റവനത്രേ അല്ലാഹു.

മദീനയോടടുത്ത താഴ്‌വരയില്‍ നിങ്ങളും അകന്ന താഴ്‌വരയില്‍ അവരും സാര്‍ത്ഥവാഹക സംഘം നിങ്ങളുടെ താഴ്ഭാഗത്തും ആയിരുന്ന സന്ദര്‍ഭം സ്മരിക്കുക. പരസ്പരം ഏറ്റുമുട്ടാന്‍ തീരുമാനിച്ചിരുന്നുവെങ്കില്‍ നിങ്ങള്‍ പേടിച്ച് വാഗ്ദാനം ലംഘിച്ചിരുന്നേനെ. പക്ഷേ, സംഭവിക്കേണ്ട ഒരു കാര്യം അല്ലാഹു നിര്‍വഹിക്കുന്നതിനുവേണ്ടിയായിരുന്നു അത്. അഥവാ സംഹാരവിധേയരാ യവര്‍ സ്പഷ്ടദൃഷ്ടാന്തം കണ്ടു നശിക്കുവാനും അവശേഷിച്ചവര്‍ വ്യക്തമായ തെളിവുകണ്ട് ജീവിക്കുവാനും വേണ്ടി. എല്ലാം കേള്‍ക്കുന്നവനും കാണുന്നവനും തന്നെയാണ് അല്ലാഹു.

നബിയേ, താങ്കള്‍ക്ക് സ്വപ്നത്തില്‍ ആ ശത്രുക്കളെ കുറച്ചു പേര്‍ മാത്രമായി അല്ലാഹു കാണിച്ചത് അനുസ്മരിക്കുക. അവര്‍ വളരെപ്പേരായി താങ്കള്‍ക്കവന്‍ കാണിച്ചിരുന്നുവെങ്കില്‍ നിങ്ങള്‍ പേടിക്കുകയും യുദ്ധം ചെയ്യുന്ന വിഷയത്തില്‍ തര്‍ക്കമുണ്ടാകുകയും ചെയ്യുമായിരുന്നു. പക്ഷേ, അല്ലാഹു സുരക്ഷയേകി. മനസ്സുകളിലുള്ളത് അറിയുന്നവനാണവന്‍. പരസ്പരം ഏറ്റുമുട്ടിയപ്പോള്‍ നിങ്ങളുടെ ദൃഷ്ടിയില്‍ അവരുടെ എണ്ണം കുറച്ചു കാണിക്കുകയും, അവരുടെ കാഴ്ചയില്‍ നിങ്ങളുടെ എണ്ണം കുറച്ചു കാണിക്കുകയും ചെയ്ത സന്ദര്‍ഭം സ്മരണീയമത്രേ. നിര്‍ണയിച്ചു കഴിഞ്ഞ ഒരു സംഭവം പ്രയോഗവല്‍ക്കരിക്കാനത്രേ അല്ലാഹു ഇങ്ങനെ ചെയ്തത്. കാര്യങ്ങളൊക്കെ മടക്കപ്പെടുന്നത് അല്ലാഹുവിങ്കലേക്കുമാത്രമാകുന്നു.

സത്യവിശ്വാസികളേ, നിങ്ങള്‍ ഒരു സേനാവ്യൂഹത്തെ കണ്ടുമുട്ടിയാല്‍ ഉറച്ചു നിലകൊള്ളുക, അല്ലാഹുവിനെ ധാരാളമായി ഓര്‍ക്കുക-നിങ്ങള്‍ വജയികളാകാന്‍. അല്ലാഹുവിനെ യും അവന്റെ റസൂലിനെയും അനുസരിക്കുക, ഭിന്നിച്ചു പോകരുത്; അപ്പോള്‍ നിങ്ങളുടെ ധൈര്യം ക്ഷയിക്കുകയും വീര്യം നശിച്ചു പോകുകയും ചെയ്യും. ക്ഷമ കൈക്കൊള്ളുക. നിശ്ചയം ക്ഷമാശീല രോടൊപ്പമാണ് അല്ലാഹു. അഹങ്കാരികളായും ലോകമാന്യത നടിച്ചും ജനത്തെ ദൈവമാര്‍ഗത്തില്‍ നിന്നു പ്രതിരോധിക്കാനായി സ്വഗൃഹങ്ങളില്‍ നിന്നിറങ്ങിത്തിരിച്ചവരെപ്പോലെ²⁴
നിങ്ങളാകരുത്. അവരുടെ ചെയ്തികളെക്കുറിച്ചെല്ലാം സൂക്ഷ്മ ജ്ഞാനിയാണ് അല്ലാഹു.

'ഇന്നു നിങ്ങളെ തോല്‍പിക്കാന്‍ മനുഷ്യരിലൊരാളുമില്ല, ഞാന്‍ നിങ്ങളുടെ രക്ഷകനാണ്' എന്നു പറഞ്ഞുകൊണ്ട് പിശാച് അവര്‍ക്ക് തങ്ങളുടെ പ്രവൃത്തികള്‍ സുന്ദരമായി തോന്നിച്ച ഘട്ടം സ്മരണീയമാണ്. അങ്ങനെ ആ രണ്ടു വിഭാഗങ്ങള്‍ ഏറ്റുമുട്ടിയപ്പോള്‍ ഇപ്രകാരം പ്രസ്താവിച്ചു കൊണ്ട് അവന്‍ പിന്തിരിഞ്ഞോടി: 'ഞാന്‍ നിങ്ങളുമായി ഒരു വിധ ബന്ധവുമില്ല തന്നെ. നിങ്ങളുടെ ദൃഷ്ടിക്കു ഗോചരീഭവിക്കാത്തത് ഞാന്‍ കാണുന്നുണ്ട്²⁵
ഞാന്‍ അല്ലാഹുവിനെ പേടിക്കുകയാണ്, അവന്‍ കഠിനമായി ശിക്ഷിക്കും.' കപട വിശ്വാസികളും ഹൃദയങ്ങളില്‍ രോഗമുള്ളവരും പറഞ്ഞ സന്ദര്‍ഭം സ്മരണീയമത്രേ-'ഈ മുസ്‌ലിംകളെ അവരുടെ മതവിശ്വാസം വഞ്ചിച്ചു കളഞ്ഞിരിക്കു കയാണ്²⁶
എന്നാല്‍, ആരൊരാള്‍ അല്ലാഹുവില്‍ ഭരമേല്‍പ്പിക്കുന്നുവോ, നിശ്ചയം അല്ലാഹു പ്രതാപശാലിയും യുക്തിമാനും തന്നെയത്രെ.

മുന്നിലും പിന്നിലും വെട്ടേല്‍പിച്ചും 'ജ്വലിക്കുന്ന നരക ശിക്ഷ ആസ്വദിക്കൂ' എന്നാക്രോശിച്ചും കൊണ്ട് മലക്കുകള്‍ സത്യനിഷേധികളെ കൊന്നൊടുക്കുന്ന രംഗം അങ്ങു കണ്ടു പോയാല്‍! നിങ്ങളുടെ കരങ്ങള്‍ നേരത്തെ അനുവര്‍ത്തിച്ച ദുഷ്‌ചെയ്തികള്‍ കാരണവും, തന്റെ ദാസരോട് അല്ലാഹു ഒട്ടുമേ അനീതി ചെയ്യില്ല എന്നതിനാലുമത്രെ അത്²⁷
ഫിര്‍ഔന്‍ പ്രഭൃതികളു ടെയും അവരുടെ മുമ്പുള്ളവരുടെയും സ്ഥിതി പോലെത്തന്നെ. അവരൊക്കെ അല്ലാഹുവിന്റെ ദൃഷ്ടാന്തങ്ങള്‍ നിഷേധിച്ചു. തത്സമയം, തങ്ങളുടെ പാപങ്ങള്‍ മൂലം അവരെയവന്‍ ശിക്ഷിച്ചു. അല്ലാഹു ശക്തനും കഠിനശിക്ഷ നല്‍കുന്നവനും തന്നെ, തീര്‍ച്ച. ഒരു ജനപഥത്തിന്ന് താന്‍ നല്‍കിയ അനുഗ്ര ഹം, സ്വന്തം നിലപാടില്‍ അവര്‍ ഭേദപ്പെടുത്തുന്നതുവരെ അല്ലാഹു മാറ്റിക്കളയില്ല എന്നതുകൊണ്ടും, അവന്‍ സര്‍വവും കേള്‍ക്കുന്നവനും അറിയുന്നവനുമാണ് എന്നതുകൊണ്ടുമത്രേ അത്. ഫറോവ പ്രഭൃതികളുടെയും അവരുടെ പൂര്‍വഗാമികളുടെയും അവസ്ഥ തന്നെ- അവര്‍ അല്ലാഹുവിന്റെ ദൃഷ്ടാ ന്തങ്ങള്‍ വ്യാജമാക്കി. അപ്പോള്‍ തങ്ങളുടെ കുറ്റകൃത്യങ്ങള്‍ കാരണം നാം അവരെ സംഹരിച്ചു. ഫിര്‍ഔന്റെയാളുകളെ നാം മുക്കിക്കൊല്ലുകയാണു ചെയ്തത്. അവരൊക്കെയും അക്രമികളായി രുന്നു²⁸

അല്ലാഹുവിങ്കല്‍ ഏറ്റം നികൃഷ്ടജീവികള്‍ സത്യനിഷേധികള്‍ തന്നെ. അവര്‍ സത്യവിശ്വാ സം സ്വീകരിക്കുകയില്ല. അവരുമായി (നബിയേ,) താങ്കള്‍ ആക്രമണമില്ലാ സന്ധിയിലേര്‍പ്പെട്ട ശേഷം തക്കം കിട്ടുമ്പോഴൊക്കെ തങ്ങളുടെ കരാര്‍ ലംഘിക്കുകയാണര്‍; അല്ലാഹുവിനെയവര്‍ സൂക്ഷിക്കു ന്നില്ല. അതുകൊണ്ട് അവരെ യുദ്ധക്കളത്തില്‍ കണ്ടുമുട്ടിയാല്‍ പിന്നിലുള്ളവരെ കൂടി തിരിച്ചോടിക്കും വിധം ശിക്ഷിക്കുക; അവരതില്‍ നിന്നു പാഠമുള്‍ക്കൊള്ളുവാന്‍ വേണ്ടി. ഏതെങ്കിലും ജനപഥത്തില്‍ നിന്നു വഞ്ചനയുണ്ടാകുമെന്നു താങ്കള്‍ ഭയപ്പെടുന്നുവെങ്കില്‍ സമനിലയില്‍ ആ കരാര്‍ അവരിലേ ക്കെറിഞ്ഞുകൊടുക്കുക. വഞ്ചകന്മാരെ അല്ലാഹു സ്‌നേഹിക്കുകയേയില്ല²⁹

തങ്ങള്‍ അതിജയിച്ചു കഴിഞ്ഞിരിക്കുന്നു എന്നു നിഷേധികള്‍ വിചാരിക്കേണ്ട- അല്ലാഹുവിനെ തോല്‍പിക്കാന്‍ അവര്‍ക്കാവുകയേയില്ല, തീര്‍ച്ച. വിശ്വാസികളേ, അവരെ നേരിടാനായി ആവുന്നത്ര ശക്തി നിങ്ങള്‍ തയ്യാറാക്കുകയും സമരസജ്ജരായ കുതിരകളെ ഒരുക്കുകയും ചെയ്യുക. അതു മുഖേന നിങ്ങളുടെയും അല്ലാഹുവിന്റെയും ശത്രുവിനെയും, കൂടാതെ നിങ്ങളറിയാത്തവരും അല്ലാഹു അറിയുന്നവരുമായ മറ്റുചിലരെയും ഭയപ്പെടുത്താന്‍ വേണ്ടി. അല്ലാഹുവിന്റെ വഴിയില്‍ എന്തൊരു വസ്തു ചെലവഴിച്ചാലും നിങ്ങള്‍ക്കതിന്റെ സമ്പൂര്‍ണ പ്രതിഫലം നല്‍കപ്പെടുന്നതാണ്; നിങ്ങളോട് അനീതി കാണിക്കപ്പെടുകയില്ല³⁰
ഇനി, സമാധാന ത്തിലേക്കാണവര്‍ താല്‍പര്യം കാണിക്കുന്നതെങ്കില്‍ താങ്കളും അങ്ങോട്ട് ചായ്‌വ് കാണിക്കുകയും അല്ലാഹുവില്‍ ഭരമേല്‍പിക്കുകയും ചെയ്യുക. അവന്‍ എല്ലാം കേള്‍ക്കുകയും അറിയുകയും ചെയ്യുന്ന വന്‍ തന്നെയാണ്, തീര്‍ച്ച.

ഇനി, അങ്ങയെ ചതിക്കാനാണവര്‍ വിചാരിക്കുന്നതെങ്കില്‍ (ആശങ്ക വേണ്ട,) നിശ്ചയം താങ്കള്‍ക്ക് അല്ലാഹു മതി³¹
തന്റെ സഹായം കൊണ്ടും സത്യവിശ്വാസികള്‍ മുഖേനയും അവനാ ണല്ലോ താങ്കള്‍ക്ക് കരുത്തേകിയിരിക്കുന്നത്; അവരുടെ ഹൃദയങ്ങള്‍ തമ്മില്‍ അവന്‍ കൂട്ടിയിണക്കുക യുമുണ്ടായി. (നബിയേ,) ഭൂമിയിലുള്ള മുഴുവന്‍ വിഭവങ്ങളും ചെലവഴിച്ചാലും അവരുടെ മനസ്സുകള്‍ ഇണക്കിച്ചേര്‍ക്കാന്‍ താങ്കള്‍ക്കാകുമായിരുന്നില്ല. പക്ഷേ, അല്ലാഹു അവരുടെ ഹൃദയങ്ങള്‍ കൂട്ടിയി ണക്കി³²
അജയ്യനും യുക്തിമാനും തന്നെയാണവന്‍. നബിയേ, താങ്കള്‍ക്കും അനുധാവകരായ സത്യവിശ്വാസികള്‍ക്കും അല്ലാഹു തന്നെ മതി!

ഓ നബീ, താങ്കള്‍ സത്യവിശ്വാസികളെ പോരാട്ടത്തിനു പ്രോത്സാഹിപ്പിക്കുക. ക്ഷമാശീല രായ ഇരുപതാളുകള്‍ നിങ്ങളിലുണ്ടെങ്കില്‍ ഇരുനൂറു പേരെ ജയിച്ചടക്കാന്‍ അവര്‍ക്കു കഴിയും; നൂറു പേരുണ്ടെങ്കില്‍ സത്യനിഷേധികളില്‍ നിന്നു ആയിരത്തെ അവര്‍ക്കു അതിജയിക്കാവുന്നതാണ് -യാഥാര്‍ത്ഥ്യം മനസ്സിലാക്കാത്ത ഒരു കൂട്ടരാണവര്‍ എന്നതുകൊണ്ടത്രേ അത്³³

എന്നാലിപ്പോള്‍ അല്ലാഹു നിങ്ങള്‍ക്കു ലഘൂകരിക്കുകയും നിങ്ങളില്‍ ദൗര്‍ബല്യമുണ്ടെ ന്നവന്‍ കണ്ടറിയുകയും ചെയ്തിരിക്കുന്നു. അതുകൊണ്ട്, ക്ഷമാശീലരായ നൂറാളുകള്‍ നിങ്ങളിലുണ്ടെങ്കില്‍ ഇരുനൂറുപേരെ അവര്‍ക്കതിജയിക്കാം. ആയിരമാളുകള്‍ നിങ്ങളിലുണ്ടെങ്കില്‍ രണ്ടായിരം പേരെ അല്ലാഹുവിന്റെയനുമതിയോടെ അവര്‍ക്കു ജയിച്ചടക്കാവുന്നതാണ്. ക്ഷമാശീലരോ ടൊപ്പമാണ് അല്ലാഹു³⁴

ഒരു പ്രവാചകന്നും പ്രതിയോഗികളെ കീഴടക്കി ഭൂമിയില്‍ അധീശാധിപത്യം സ്ഥാപിക്കു ന്നതുവരെ ശത്രുക്കളായ ബന്ധനസ്ഥരുണ്ടായിക്കൂടാ. ഐഹികലോകത്തെ ക്ഷണിക നേട്ടമാണ് നിങ്ങളുടെ ഉദ്ദേശ്യം; അല്ലാഹുവാകട്ടെ പരലോകം ലക്ഷീകരിക്കുന്നു. അവന്‍ പ്രതാപശാലിയും യുക്തിമാനുമാകുന്നു. അല്ലാഹുവിങ്കല്‍ നിന്നു മുമ്പുള്ള ഒരു വിധിയുണ്ടായിരുന്നില്ലെങ്കില്‍ മോചന ദ്രവ്യം വാങ്ങിയതിന്റെ പേരില്‍ കഠിനശിക്ഷ നിങ്ങളെ പിടികൂടിയിരുന്നേനെ³⁵
അതുകൊണ്ട്, സമരാര്‍ജിത സമ്പത്തില്‍ നിന്ന് അനുവദനീയവും ഉദാത്തവുമെന്ന നിലക്ക് നിങ്ങള്‍ ആഹരിച്ചു കൊള്ളുക. അല്ലാഹുവിനെ നിങ്ങള്‍ സൂക്ഷിക്കണം. അവന്‍ ഏറെ പൊറുക്കുന്നവനും കരുണാമയ നുമത്രേ.

നബിയേ, നിങ്ങളുടെ കൈവശമുള്ള ബദ്‌റ് യുദ്ധത്തടവുകാരോടു പറയുക: 'എന്തെങ്കിലും നന്മ നിങ്ങളുടെ ഹൃദയങ്ങളിലുള്ളതായി അല്ലാഹുവിന്നറിയുമെങ്കില്‍, നിങ്ങളില്‍ നിന്നു പിടിച്ചെടുക്ക പ്പെട്ട ധനത്തേക്കാള്‍ ഉദാത്തമായത് അവന്‍ പകരം നല്‍കുകയും പൊറുത്തുതരികയും ചെയ്യും. ഏറെ പൊറുക്കുന്നവനും കരുണാമയനുമാണ് അല്ലാഹു³⁶
ഇനി, അങ്ങയെ ചതിക്കാനാണവര്‍ ഉദ്ദേശിക്കുന്നതെങ്കില്‍, ഇതിനുമുമ്പവര്‍ അല്ലാഹുവിനോടു തന്നെ വഞ്ചന കാണിച്ചിട്ടുണ്ട്. തന്മൂലമാണ വരെ നിങ്ങള്‍ക്കു കീഴ്‌പെടുത്തിത്തന്നത്. അല്ലാഹു സര്‍വജ്ഞനും യുക്തിമാനുമത്രേ³⁷

സത്യവിശ്വാസം കൈകൊള്ളുകയും അതിന്റെ സംരക്ഷണാര്‍ത്ഥം ദേശത്യാഗം ചെയ്കയും ദേഹ-ധനങ്ങള്‍ കൊണ്ട് ദൈവമാര്‍ഗത്തില്‍ ധര്‍മസമരമനുഷ്ഠിക്കുകയും ചെയ്തവരും, അവര്‍ക്ക് അഭയമേകുകയും സഹായം നല്‍കുകയും ചെയ്തവരും പരസ്പരം ഉറ്റമിത്രങ്ങളത്രേ. വിശ്വസിക്കു കയും എന്നാല്‍ നാടുവിടാതിരിക്കുകയും ചയ്തവരോട് അവര്‍ ദേശത്യാഗം ചെയ്യുന്നതുവരെ ഒരു സംരക്ഷണച്ചുമതലയും നിങ്ങള്‍ക്കില്ല. ഇനി മതകാര്യത്തിലവര്‍ സഹായമര്‍ത്ഥിക്കുന്നുവെങ്കില്‍ - നിങ്ങളുടെ സഖ്യകക്ഷികള്‍ക്ക് പ്രതികൂലമായല്ലാതെയുള്ള- സഹായ സമര്‍പ്പണം നിങ്ങളുടെ ബാധ്യതയാകുന്നു. നിങ്ങളുടെ പ്രവര്‍ത്തനങ്ങള്‍ കണ്ടറിയുന്നവനാണ് അല്ലാഹു³⁸
സത്യനിഷേധി കളും പരസ്പരം ആത്മമിത്രങ്ങളാണ്. മേല്‍ നിര്‍ദേശം നിങ്ങള്‍ പ്രായോഗികമാക്കിയിട്ടില്ലെങ്കില്‍ നാട്ടില്‍ കുഴപ്പവും വന്‍ നാശവുമുണ്ടാകും.

വിശ്വസിക്കുകയും ദേശത്യാഗം ചെയ്യുകയും ദൈവമാര്‍ഗത്തില്‍ പോരാടുകയും ചെയ്തവരും, അവര്‍ക്ക് അഭയവും സഹായവുമേകുകയും ചെയ്തവരും തന്നെയാണ് യഥാര്‍ത്ഥത്തി ല്‍ സത്യവിശ്വാസികള്‍. പാപമോചനവും ഉല്‍കൃഷ്ടമായ ഉപജീവനവും അവര്‍ക്കുണ്ടായിരിക്കുന്ന താണ്. അതിനു ശേഷം സത്യവിശ്വാസം പുല്‍കുകയും ദേശത്യാഗം ചെയ്കയും നിങ്ങളൊന്നിച്ച് ധര്‍മസമരത്തിലേര്‍പ്പെടുകയും ചെയ്തവരും നിങ്ങളില്‍ പെട്ടവര്‍ തന്നെയാകുന്നു. എന്നാല്‍ രക്തബ ന്ധമുള്ളവരാണ് ദൈവികനിയമത്തില്‍ പരസ്പരം കൂടുതല്‍ ബന്ധപ്പെട്ടവര്‍.³⁹
സമസ്ത കാര്യങ്ങ ളെപ്പറ്റിയും നന്നായറിയുന്നവന്‍ തന്നെയാണ് അല്ലാഹു.