അത്തൗബ - التوبة - At-Tawbah

ബഹുദൈവ വിശ്വാസികളില്‍ ആരോടൊക്കെ നിങ്ങള്‍ ഉടമ്പടി ചെയ്തിട്ടുണ്ടോ അവരോട് അല്ലാഹുവിലും റസൂലിലും നിന്നുള്ള ബാധ്യതാമോചന പ്രഖ്യാപനമാണിത്. അതുകൊണ്ട് മുശ്‌രിക്കുകളേ, നാലു മാസം നിങ്ങള്‍ക്ക് ഇഷ്ടാനുസരണം നാട്ടില്‍ സഞ്ചരിക്കാവുന്നതാണ്¹
അറിയണം, അല്ലാഹുവിനെ പരാജയപ്പെടുത്താന്‍ നിങ്ങള്‍ക്കാവില്ല തന്നെ; സത്യനിഷേധികളെ അവന്‍ അപമാനിതരാക്കിവിടുകതന്നെ ചെയ്യും.

മഹത്തായ ഹജ്ജ് സുദിനത്തില്‍ അല്ലാഹുവിന്റെയും റസൂലിന്റെയും പക്കല്‍ നിന്നു ജനങ്ങള്‍ക്കുള്ള അറിയിപ്പാണിത്: 'അല്ലാഹുവും അവന്റെ ദൂതനും ബഹുദൈവ വിശ്വാസികളോടുള്ള ബാധ്യതകളില്‍ നിന്നു ഒഴിവായിരിക്കുന്നു. പശ്ചാത്തപിക്കുന്നുവെങ്കില്‍ അതാണു നിങ്ങള്‍ക്കു ഉത്തമം; പിന്തിരിയുകയാണെങ്കില്‍ അല്ലാഹുവിനെ പരാജയപ്പെടുത്താനാവുകയേ ഇല്ലെന്ന് നിങ്ങള്‍ ഗ്രഹിക്കണം. സത്യനിഷേധികള്‍ക്ക് വേദനാജനകമായ ശിക്ഷയാണുള്ളതെന്ന് താങ്കള്‍ ശുഭ വൃത്താന്തം അറിയിക്കുക. എന്നാല്‍ ഒരു വിഭാഗം ബഹുദൈവ വിശ്വാസികള്‍ ഇതില്‍ നിന്നൊഴിവാണ് -പരസ്പര സന്ധിക്കു ശേഷം നിങ്ങള്‍ക്ക് ഒരു വിധ നഷ്ടവും അവര്‍ വരുത്തിയിട്ടില്ല; നിങ്ങള്‍ക്കെതിരെ അവര്‍ ആരെയും സഹായിച്ചിട്ടുമില്ല. അവരുമായുള്ള കരാര്‍ അവധിയുടെ അന്ത്യം വരെ പൂര്‍ത്തീകരിക്കുക. സൂക്ഷ്മത പുലര്‍ത്തുന്നവരെ അല്ലാഹു സ്‌നേഹിക്കുക തന്നെ ചെയ്യും.²

അങ്ങനെ ആ നാലു മാസങ്ങള്‍ കഴിഞ്ഞാല്‍ ആ ബഹുദൈവവിശ്വാസികളെ കണ്ടിടത്തു വെച്ച് നിങ്ങള്‍ വധിച്ചുകളയുകയും ബന്ധനസ്ഥരായി പിടിക്കുകയും പ്രതിരോധിക്കുകയും എല്ലാ കാവല്‍സ്ഥലങ്ങളിലും അവരെയുന്നം വെച്ച് പതിയിരിക്കുകയും ചെയ്യുക. ഇനിയവര്‍ ശിര്‍ക്കില്‍ നിന്നു മടങ്ങുകയും നമസ്‌കാരം മുറപ്രകാരമനുഷ്ഠിക്കുകയും സകാത്തു നല്‍കുകയും ചെയ്യുന്നുവെങ്കില്‍ അവരുടെ വഴിക്കു വിട്ടേക്കണം. അല്ലാഹു ഏറെ പൊറുക്കുന്നവനും കരുണാമയനും തന്നെയത്രേ³

ഇനി, ഏതെങ്കിലുമൊരു ബഹുദൈവ വിശ്വാസി താങ്കളുടെ സമക്ഷം അഭയം തേടി വരുന്നുവെങ്കില്‍ അല്ലാഹുവിന്റെ വചനം കേട്ടു മനസ്സിലാക്കാനായി അവനു അഭയം നല്‍കണം; പിന്നെ സുരക്ഷിതത്വമുള്ള ഒരു സ്ഥലത്ത് അവനെ എത്തിച്ചു കൊടുക്കുകയും വേണം. അറിവു കെട്ട ഒരു ജനതയാണവര്‍ എന്നതിനാലത്രേ ഇത്.

ആ ബഹുദൈവവിശ്വാസികള്‍ക്ക് അല്ലാഹുവിങ്കലും റസൂലിങ്കലും എങ്ങനെയാണൊരു ഉടമ്പടി നിലനില്‍ക്കുക! എന്നാല്‍ മസ്ജിദുല്‍ ഹറാമിനടുത്ത് വെച്ച് നിങ്ങളോടു സന്ധിചെയ്തവര്‍ ഇതില്‍ നിന്നൊഴിവാണ്.⁴
അവര്‍ നിങ്ങളോടു ഋജുവായി നിലകൊള്ളുന്നിടത്തോളം കാലം അവരോടു നിങ്ങളും ശരിയായി വര്‍ത്തിക്കുക. സൂക്ഷ്മാലുക്കളെ അല്ലാഹു ഇഷ്ടപ്പെടുക തന്നെ ചെയ്യുന്നു.

നിങ്ങള്‍ക്കെതിരെ വിജയം നേടുന്ന പക്ഷം ഒരുവിധ കുടുംബബന്ധവും ഉടമ്പടിയും അവര്‍ പരിഗണിക്കുകയില്ലെന്നിരിക്കെ എങ്ങനെ കരാര്‍ പ്രാബല്യത്തിലിരിക്കും! വായകൊണ്ട് നിങ്ങളെ സംതൃപ്തരാക്കുകയാണവര്‍, ഹൃദയങ്ങള്‍ വെറുക്കുകയും ചെയ്യുന്നു. അവര്‍ മിക്കവരും അധര്‍മകാരികളത്രേ. അല്ലാഹുവിന്റെ ദൃഷ്ടാന്തങ്ങള്‍ തുച്ഛവിലയ്ക്കു വിറ്റ്, അവന്റെ നേര്‍മാര്‍ഗത്തില്‍ നിന്ന് മാലോകരെ തടയുകയാണവര്‍. അവരുടെ ആ ചെയ്തി എത്ര ഹീനം! ഒരു സത്യവിശ്വാസിയെക്കുറിച്ചും കുടുംബബന്ധമോ കരാറോ അവര്‍ പാലിക്കില്ല; അതിക്രമകാരികള്‍ തന്നെയത്രേ അവര്‍.⁵

ഇനി, അവര്‍ പശ്ചാത്തപിക്കുകയും നമസ്‌കാരം യഥാവിധി നിര്‍വഹിക്കുകയും സകാത്ത് കൊടുക്കുകയും ചെയ്യുന്ന പക്ഷം മതത്തില്‍ നിങ്ങളുടെ സഹോദരങ്ങളാണവര്‍. വിവരമുള്ള ജനങ്ങള്‍ക്കായി നാം ദൃഷ്ടാന്തങ്ങള്‍ പ്രതിപാദിക്കുകയാണ്. എന്നാല്‍, കരാറിലേര്‍പ്പെട്ട ശേഷം അവര്‍ സത്യങ്ങള്‍ ലംഘിക്കുകയും നിങ്ങളുടെ മതത്തെ അവഹേളിക്കുകയും ചെയ്യുന്നുവെങ്കില്‍ സത്യനിഷേധത്തിന്റെ സാരഥികളോട് നിങ്ങള്‍ പോരാടുക. കാരണം, അവരുടെ ശപഥങ്ങള്‍ക്ക് ഒട്ടുമേ നിലനില്‍പില്ല. അവര്‍ വിരമിച്ചേക്കാന്‍ സാധ്യതയുണ്ട്⁶

കരാറുകള്‍ ലംഘിക്കുകയും നബിയെ നാട്ടില്‍ നിന്നു പുറത്താക്കാന്‍ തീരുമാനിക്കുകയും ചെയ്ത ഒരു ജനവിഭാഗത്തോട് നിങ്ങള്‍ യുദ്ധം ചെയ്യുന്നില്ലേ? നിങ്ങളോട് ആദ്യം യുദ്ധം ചെയ്യാനാരംഭിച്ചത് അവര്‍ തന്നെയാണ്; എന്നിട്ടും നിങ്ങളവരെ പേടിക്കുകയാണോ? എന്നാല്‍, സാക്ഷാല്‍ വിശ്വാസികളാണെങ്കില്‍ നിങ്ങള്‍ ഭയപ്പെടാന്‍ ഏറ്റമര്‍ഹന്‍ അല്ലാഹുവത്രേ! അവരോടു നിങ്ങള്‍ യുദ്ധം ചെയ്യുക. അല്ലാഹു നിങ്ങളുടെ കൈക്ക് അവരെ ശിക്ഷിച്ച് അപമാനിക്കുകയും അവര്‍ക്കെതിരെ നിങ്ങളെ സഹായിക്കുകയും വിശ്വാസികളുടെ മനോദുഃഖം ശമിപ്പിക്കുകയും രോഷം ദൂരീകരിക്കുകയും ചെയ്യുന്നതാണ്⁷
താനുദ്ദേശിക്കുന്നവരുടെ പശ്ചാത്താപം അല്ലാഹു സ്വീകരിക്കുന്നു. അവന്‍ സര്‍വജ്ഞാനിയും യുക്തിമാനുമത്രേ!

നിങ്ങളില്‍ യുദ്ധം ചെയ്തവര്‍ ആരാണെന്നും അല്ലാഹുവിനെയും റസൂലിനെയും വിശ്വാസികളെയും വിട്ട് മറ്റാരെയും രഹസ്യമിത്രങ്ങളാക്കാത്തവര്‍ ആരാണെന്നും വേര്‍തിരിച്ചു കണ്ടറിയാതെ അല്ലാഹു അങ്ങുവിട്ടേക്കുമെന്നാണോ നിങ്ങളുടെ ധാരണ? നിങ്ങളുടെ പ്രവൃത്തികളെ പറ്റി സൂക്ഷ്മജ്ഞാനിയാണ് അവന്‍. സത്യനിഷേധത്തിനു സ്വയം സാക്ഷികളാണെന്നിരിക്കെ അല്ലാഹുവിന്റെ മസ്ജിദുകള്‍ സംരക്ഷിക്കാന്‍ ബഹുദൈവവിശ്വാസികള്‍ക്ക് യാതൊരവകാശവുമില്ല. അവരുടെ പ്രവര്‍ത്തനങ്ങള്‍ ശിഥിലമായിക്കഴിഞ്ഞിരിക്കുന്നു. നരകത്തില്‍ ശാശ്വതരത്രേ അവര്‍.

അല്ലാഹുവിലും അന്ത്യനാളിലും വിശ്വസിക്കുകയും നമസ്‌കാരം യഥാവിധി നിലനിറുത്തുകയും, സകാത്ത് കൊടുക്കുകയും അല്ലാഹുവിനെയല്ലാതെ പേടിക്കാതിരിക്കുകയും ചെയ്യുന്നവര്‍ മാത്രമേ അവന്റെ മസ്ജിദുകള്‍ പരിപാലിക്കാവൂ. അവര്‍ സന്മാര്‍ഗ പ്രാപ്തരായേക്കാം.⁸

ഹജ്ജിനെത്തുന്നവര്‍ക്കു ജലപാനം ചെയ്യിക്കലും മസ്ജിദുല്‍ഹറാം പരിപാലനവും നിങ്ങള്‍ കാണുന്നത്, അല്ലാഹുവിലും അന്ത്യദിനത്തിലും വിശ്വസിക്കുകയും ദൈവമാര്‍ഗത്തില്‍ പോരാടുകയും ചെയ്യുന്നതു പോലെയാണോ? ഈ രണ്ടു തരക്കാരും അല്ലാഹുവിങ്കല്‍ തുല്യരാവുകയില്ല. അക്രമികളായ ജനതയെ അല്ലാഹു നേര്‍മാര്‍ഗത്തിലാക്കുന്നതല്ല. സത്യവിശ്വാസം കൈക്കൊള്ളുക യും ദേശത്യാഗം ചെയ്യുകയും ദേഹ-ധനങ്ങള്‍ കൊണ്ട് ദൈവമാര്‍ഗത്തില്‍ പോരാട്ടം നടത്തുകയും ചെയ്തവര്‍ അല്ലാഹുവിങ്കല്‍ അത്യുദാത്ത പദവിയുള്ളവരത്രേ. അവര്‍ തന്നെയാണു ജേതാക്കള്‍. തന്റെ പക്കലുള്ള കാരുണ്യത്തെയും സംതൃപ്തിയെയും സ്വര്‍ഗീയോദ്യാനങ്ങളെയും കുറിച്ച് രക്ഷിതാവ് അവര്‍ക്ക് ശുഭവാര്‍ത്ത നല്‍കും. സുസ്ഥിര സൗഖ്യമാണവര്‍ക്ക് അവിടെയുണ്ടാവുക. അതിലവര്‍ നിത്യവാസികളായിരിക്കും. നിശ്ചയം, അല്ലാഹുവിങ്കലാണ് അതിമഹത്തായ പ്രതിഫലം.

സത്യവിശ്വാസികളേ, നിങ്ങളുടെ പിതാക്കളും സഹോദരങ്ങളും വിശ്വാസത്തെക്കാള്‍ നിഷേധമാണിഷ്ടപ്പെടുന്നതെങ്കില്‍ അവരെ രക്ഷാധികാരികളാക്കരുത്. നിങ്ങളാരെങ്കിലും അവരെ രക്ഷാകര്‍ത്താക്കളാക്കുന്നുവെങ്കില്‍ അവര്‍ തന്നെയാണ് അക്രമികള്‍. നബിയേ, പ്രഖ്യാപിക്കുക: നിങ്ങളുടെ പിതാക്കളും സന്താനങ്ങളും സഹോദരങ്ങളും ഇണകളും അടുത്ത കുടുംബങ്ങളും സമ്പാദ്യങ്ങളും കെട്ടിക്കിടക്കുമെന്നു നിങ്ങള്‍ ഉല്‍ക്കണ്ഠാകുലരാകുന്ന കച്ചവടച്ചരക്കും പ്രിയങ്കരമായ പാര്‍പ്പിടങ്ങളുമെല്ലാം തന്നെ, അല്ലാഹുവിനെക്കാളും റസൂലിനെക്കാളും ദൈവമാര്‍ഗത്തിലുള്ള പോരാട്ടത്തെക്കാളും നിങ്ങള്‍ക്ക് പ്രിയപ്പെട്ടതാണെങ്കില്‍ തന്റെ കല്‍പന അല്ലാഹു കൊണ്ടുവരു ന്നതു വരെ നിങ്ങള്‍ പ്രതീക്ഷിച്ചിരുന്നുകൊള്ളുക! അധര്‍മകാരികളായ ജനതയെ അല്ലാഹു സന്മാര്‍ഗ പ്രാപ്തരാക്കുന്നതല്ല⁹

ഒട്ടേറെ രണാങ്കണങ്ങളില്‍ അല്ലാഹു നിങ്ങളെ സഹായിക്കുകതന്നെ ചെയ്തിട്ടുണ്ട്; ഹുനൈന്‍ യുദ്ധത്തിന്റെ അന്നും - സ്വന്തം എണ്ണപ്പെരുപ്പം നിങ്ങളെയന്ന് ആഹ്ലാദ ഭരിതരാക്കി. എന്നിട്ട് നിങ്ങള്‍ക്കത് യാതൊരു ഫലവുമുണ്ടാക്കാതിരിക്കുകയും ഭൂമി പ്രവിശാലമായിട്ടു കൂടി നിങ്ങള്‍ക്കു കുടുസ്സായിത്തോന്നുകയും തുടര്‍ന്നു പിന്തിരിഞ്ഞോടുകയും ചെയ്ത സന്ദര്‍ഭം! തദനന്തരം റസൂലിനും സത്യവിശ്വാസികള്‍ക്കും തന്റെ പക്കല്‍ നിന്നുള്ള മനഃശാന്തി അല്ലാഹു ചൊരിഞ്ഞുകൊടുക്കുകയും നിങ്ങള്‍ കാണാത്ത ചില സേനകളെ ഇറക്കുകയും സത്യനിഷേധികളെ ശിക്ഷിക്കുകയുമുണ്ടായി! നിഷേധികളുടെ പ്രതിഫലം അതത്രേ. തദനന്തരം താനുദ്ദേശിക്കുന്നവരുടെ ഖേദപ്രകടനം അല്ലാഹു സ്വീകരിക്കും. ഏറെ പൊറുക്കുന്നവനും കരുണാമയനുമാണവന്‍.¹⁰

ഹേ സത്യവിശ്വാസികളേ, നിശ്ചയമായും ബഹുദൈവ വിശ്വാസികള്‍ അവിശുദ്ധരാകുന്നു. അതുകൊണ്ട് ഈ കൊല്ലത്തിനുശേഷം അവര്‍ പുണ്യഹറമിനെ സമീപിച്ചു പോകരുത്. തന്മൂലം നിങ്ങള്‍ സാമ്പത്തിക ക്ഷീണം ഭയപ്പെടുന്നുണ്ടെങ്കില്‍, ഉദ്ദേശിക്കുന്ന പക്ഷം, തന്റെയനുഗ്രഹത്തില്‍ നിന്ന് അല്ലാഹു നിങ്ങള്‍ക്ക് സാമ്പത്തിക സുഭിക്ഷത നല്‍കുന്നതാണ്. അവന്‍ എല്ലാം അറിയുന്നവനും യുക്തിമാനും തന്നെയത്രേ¹¹

വേദം നല്‍കപ്പെട്ടവരില്‍ നിന്ന് അല്ലാഹുവിലും അന്ത്യനാളിലും വിശ്വസിക്കാത്തവരും, അല്ലാഹുവും റസൂലും വിലക്കിയതിനെ നിഷിദ്ധമായിക്കാണാത്തവരും സത്യമതത്തിനുവിധേയരാ കാത്തവരുമായവരോട് നിങ്ങള്‍ യുദ്ധം ചെയ്യുക - അവര്‍ കീഴടങ്ങിക്കൊണ്ട് നികുതി തരുന്നതു വരെ¹²

ഉസൈര്‍ (എസ്‌റാ) ദൈവപുത്രനാണെന്ന് ജൂതന്മാര്‍ ജല്‍പിച്ചു; മസീഹ് ഈസാ (യേശു) അല്ലാഹുവിന്റെ മകനാണെന്ന് ക്രിസ്ത്യാനികളും. മുന്‍ കഴിഞ്ഞ അവിശ്വാസികളെ അനുധാവനം ചെയ്തു കൊണ്ട് അവരുടെ വായിലൂടെ ഉരുവിടുന്ന ഒരു പ്രസ്താവം മാത്രമാണത്. അല്ലാഹു ശപിച്ചി ട്ടുണ്ടവരെ; എങ്ങോട്ടെല്ലാമാണ് അവര്‍ തെറ്റിത്തിരിക്കപ്പെടുന്നത്? വേദ പണ്ഡിതരെയും പുരോഹിതരെ യും മസീഹ് ഈസബ്‌നു മര്‍യമിനെയും അല്ലാഹുവിനെക്കൂടാതെ അവര്‍ ദൈവങ്ങളായി വരിച്ചു. അവരനുശാസിക്കപ്പെട്ടിരുന്നതാകട്ടെ ഏകദൈവത്തെ ആരാധിക്കാന്‍ മാത്രമാണ്. അവനല്ലാതെ ഒരു ദൈവവുമില്ലല്ലോ. അവര്‍ പങ്കാളികളാക്കുന്നതില്‍ നിന്നൊക്കെ പവിത്രനാണവന്‍. അല്ലാഹുവിന്റെ പ്രകാശം സ്വവക്ത്രങ്ങള്‍കൊണ്ട് ഊതിക്കെടുത്താമെന്നാണവരുടെ വിചാരം. അല്ലാഹുവാകട്ടെ- സത്യനിഷേധികളെത്ര അനിഷ്ടപ്പെട്ടാലും-തന്റെ പ്രകാശം പൂര്‍ത്തീകരിച്ചേ അടങ്ങുകയുള്ളൂ¹³

എല്ലാ മതത്തെയും ജയിച്ചടക്കാനായി സന്മാര്‍ഗവും സത്യമതവും കൊണ്ട് തന്റെ റസൂലിനെ അയച്ചവനാണവന്‍- ബഹുദൈവ വിശ്വാസികള്‍ക്ക് അതനിഷ്ടകരമാണെങ്കിലും. സത്യ വിശ്വാസികളേ, വേദപണ്ഡിതരിലും പുണ്യവാളന്മാരിലും നിന്ന് ഒട്ടേറെ പേര്‍ ജനങ്ങളുടെ സമ്പത്ത് ന്യായരഹിതമയി വെട്ടിവിഴുങ്ങുകയും ദൈവിക സരണിയില്‍ നിന്ന് അവരെ തടയുകയുമാണ് ചെയ്യുന്നത്. സ്വര്‍ണവും വെള്ളിയും നിക്ഷേപമാക്കിവെക്കുകയും ദൈവമാര്‍ഗത്തിലത് ചെലവാക്കാതിരിക്കുകയും ചെയ്യുന്നവര്‍ക്ക് വേദനാജനകമായ ശിക്ഷയുണ്ടെന്ന് താങ്കള്‍ സന്തോഷവാര്‍ത്ത അറിയിക്കുക. ആ സ്വര്‍ണ-വെള്ളികള്‍ നരകത്തിലിട്ടു ചൂടുപിടിപ്പിച്ച് , അവകൊണ്ട് അവരുടെ നെറ്റിയിലും വശങ്ങളിലും മുതുകിലും ചൂടു വെക്കപ്പെടുന്നതാണ്! 'സ്വന്തത്തിനു വേണ്ടി നിങ്ങള്‍ നിക്ഷേപമാക്കി വെച്ചവയാണിത്; ഈ നിക്ഷേപം ആസ്വദിച്ചോളൂ' (എന്നവരോടു ആക്രോശിക്കപ്പെടും.)¹⁴

അല്ലാഹു ഭുവന-വാനങ്ങളെപ്പടച്ച കാലം മുതല്‍ മാസങ്ങളുടെ എണ്ണം അവങ്കല്‍ പന്ത്രണ്ടാകുന്നു. അതില്‍ നാലെണ്ണം (യുദ്ധം നിഷിദ്ധമായ) ആദരണീയമാസങ്ങളാണ്. അതാണ് ഋജുവായ മതം. അതുകൊണ്ട് ആ വിശുദ്ധ മാസങ്ങളില്‍ നിങ്ങള്‍ (യുദ്ധത്തിനിറങ്ങി) സ്വന്തത്തോട് അതിക്രമം കാട്ടരുത്. എന്നാല്‍, ബഹുദൈവ വിശ്വാസികള്‍ ഒറ്റക്കെട്ടായി നിങ്ങളോട് യുദ്ധം ചെയ്യുന്നുവെങ്കില്‍ അതു പോലെ സംഘടിതരായി അവരോട് നിങ്ങളും പോരാടുക. നിങ്ങളറിയണം, സൂക്ഷ്മാലുക്കളോടൊപ്പമാണ് അല്ലാഹു. മാസങ്ങളുടെ വിശുദ്ധി പിന്നോട്ടു മാറ്റുന്നത് വര്‍ദ്ധിത സത്യ നിഷേധം മാത്രമാണ്. തദ്വാരാ ദുര്‍മാര്‍ഗത്തിലേക്ക് കൂപ്പു കുത്തുകയാണു നിഷേധികള്‍-അവരത് ഒരു വര്‍ഷം അനുവദനീയവും മറ്റൊന്നില്‍ നിഷിദ്ധവുമാക്കുകയാണ്. അല്ലാഹു വിലക്കിയ മാസങ്ങളുടെ എണ്ണമൊപ്പിക്കുവാനും അവന്‍ നിഷിദ്ധമാക്കിയത് അനുവദനീയമാക്കുവാനുമാണ് അവരങ്ങനെ ചെയ്യുന്നത്. തങ്ങളുടെ ദുഷ്‌ചെയ്തികള്‍ അവര്‍ക്ക് അലംകൃതമാക്കപ്പെടുകയാണ്. സത്യനിഷേധികളെ അല്ലാഹു നേര്‍വഴിയിലാക്കുന്നതല്ല.¹⁵

സത്യവിശ്വാസികളേ, എന്തുസംഭവിച്ചു നിങ്ങള്‍ക്ക്! ദൈവമാര്‍ഗത്തില്‍ വിശുദ്ധ സമരത്തിനിറങ്ങിപ്പുറപ്പെടുക എന്നാജ്ഞാപിക്കപ്പെടുമ്പോള്‍ അലസരായി ചടഞ്ഞു കൂടുന്നുവോ നിങ്ങള്‍! പരലോകത്തിനു പകരം ഐഹിക ജീവിതത്തില്‍ നിങ്ങള്‍ സംതൃപ്തി പൂണ്ടിരിക്കയാണോ? പാരത്രിക ജീവിതവുമായി തുലനംചെയ്യുമ്പോള്‍ ഐഹിക സൗഖ്യങ്ങള്‍ തുച്ഛം മാത്രമാകുന്നു. പുണ്യസമരത്തിനു നിങ്ങള്‍ പുറപ്പെടുന്നില്ലെങ്കില്‍ അവന്‍ വേദനാജനകമായ ശിക്ഷ തരികയും മറ്റൊരു ജനതയെ പകരം കൊണ്ടുവരികയും ചെയ്യും. അവന്ന് ഒരു ഉപദ്രവവുമേല്‍പിക്കാന്‍ നിങ്ങള്‍ക്കാവില്ല. സര്‍വകാര്യങ്ങള്‍ക്കും കഴിവുറ്റവനത്രേ അല്ലാഹു. നിങ്ങള്‍ നബിയെ സഹായിക്കു ന്നില്ലെങ്കില്‍ (ഒന്നും വരാനില്ല), നിഷേധികള്‍ നബിയെ മക്കയില്‍ നിന്നു പുറത്താക്കുകയും ഇരുവരിലൊരാളാവുകയും ചെയ്തപ്പോള്‍ -അവരിരുവരും ആ ഗുഹയിലായപ്പോള്‍- അവന്‍ നബിയെ സഹായിച്ചിട്ടുണ്ട്! 'ദുഃഖിക്കേണ്ട, അല്ലാഹു നാമൊന്നിച്ചുണ്ട്, തീര്‍ച്ച' എന്ന് അവിടന്ന് കൂട്ടുകാരനോട് പറഞ്ഞ സമയം. തന്റെ സമാധാനം തത്സയമം അല്ലാഹു നബിക്ക് ഇറക്കിക്കൊടുക്കുകയും നിങ്ങള്‍ക്കു ഗോചരീഭവിക്കാത്ത സൈന്യങ്ങള്‍ കൊണ്ട് പിന്‍ബലമേകുകയും സത്യനിഷേധികളുടെ വാക്ക് ഏറ്റം അധഃസ്ഥിതമാക്കുകയുമുണ്ടായി. അല്ലാഹുവിന്റെ മുദ്രാവാക്യമാണ് അത്യുന്നതം. അവന്‍ പ്രതാപപൂര്‍ണനും യുക്തിമാനുമത്രേ¹⁶

നിങ്ങള്‍ ബലഹീനരോ ശക്തരോ ആകട്ടെ, പോരാട്ടത്തിനിറങ്ങണം; ധന-ദേഹങ്ങള്‍ കൊണ്ട് അല്ലാഹുവിന്റെ മാര്‍ഗത്തില്‍ പടവെട്ടണം. വിവരമുള്ളവരാണെങ്കില്‍ അതാണു നിങ്ങള്‍ക്കു ഉത്തമം.¹⁷

സമീപത്തുതന്നെയുള്ള നേട്ടമോ സുഗമമായ യുദ്ധയാത്രയോ ആണെങ്കില്‍ ആ കപടവിശ്വാസികള്‍ താങ്കളൊന്നിച്ച് വന്നേനെ. പക്ഷേ, ദൂരേക്കുള്ള യുദ്ധയാത്ര അവര്‍ക്കു ദുഷ്‌കരമായി. 'സാധിക്കുമെങ്കില്‍ നിങ്ങളൊന്നിച്ചു ഞങ്ങളും വരുമായിരുന്നു' എന്ന് അവര്‍ അല്ലാഹുവിനെ പിടിച്ച് സത്യം ചെയ്യുകയാണ്! സ്വന്തത്തിനു തന്നെ നാശം വരുത്തുകയാണവര്‍. നുണ പറയുകതന്നെയാണവര്‍ എന്ന് അല്ലാഹുവിനു നന്നായറിയാം. അല്ലാഹു താങ്കള്‍ക്ക് മാപ്പാക്കിയിരിക്കുന്നു - സത്യം പറഞ്ഞവരെയും നുണബോധിപ്പിച്ചവരെയും സ്പഷ്ടമായി തിരിച്ചറിയുന്നതുവരെ അങ്ങ് എന്തിനാണവര്‍ക്ക് അനുമതി നല്‍കിയത്?¹⁸

അല്ലാഹുവിലും അന്ത്യനാളിലും ശരിയായ വിശ്വാസം വെച്ചു പുലര്‍ത്തുന്നവര്‍ ധന-ദേഹങ്ങള്‍ക്കൊണ്ട് ധര്‍മസമരം അനുഷ്ഠിക്കുന്നതില്‍ നിന്ന് മാറിനില്‍ക്കാന്‍ അങ്ങയോട് അനുമതി തേടുകയില്ല. സൂക്ഷ്മത പുലര്‍ത്തുന്നവരെക്കുറിച്ച് അല്ലാഹു നന്നായി അറിയുന്നവനത്രേ. അല്ലാഹുവിലും അന്ത്യനാളിലും വിശ്വസിക്കാതിരിക്കുകയും മനസ്സുകള്‍ സംശയഗ്രസ്തമായിരി ക്കുകയും ചെയ്യുന്നവര്‍ മാത്രമേ അങ്ങയോട് അനുമതി തേടൂ; അവര്‍ തങ്ങളുടെ സന്ദേഹത്തില്‍ ചഞ്ചലരായിക്കൊണ്ടിരിക്കും. യുദ്ധത്തിനു പോകാനുദ്ദേശിച്ചിരുന്നുവെങ്കില്‍ അവര്‍ അതിനു സന്നാഹങ്ങള്‍ ചെയ്യുമായിരുന്നു. പക്ഷേ, അവര്‍ പുറപ്പെടുന്നത് അല്ലാഹുവിനിഷ്ടമില്ലാത്തതിനാല്‍ പിന്തിരിപ്പിച്ചു നിറുത്തിയതാണ്. മടിച്ചുകഴിയുന്നവരോടൊപ്പം നിങ്ങളും ഇരുന്നോളൂ എന്നവരോട് നിര്‍ദ്ദേശിക്കപ്പെടുകയുമുണ്ടായി¹⁹

നിങ്ങളൊന്നിച്ച് യുദ്ധത്തിനു പുറപ്പെട്ടിരുന്നെങ്കില്‍ അവര്‍ നാശം മാത്രമേ കൂടുതല്‍ നേടിത്തരുമായിരുന്നുള്ളൂ. നിങ്ങള്‍ക്കിടയില്‍ ഛിദ്രതയുണ്ടാക്കാനായി അവരങ്ങുമിങ്ങും ഓടിപ്പാഞ്ഞു നടക്കുകയും ചെയ്യുമായിരുന്നു. അവര്‍ക്ക് ചെവികൊടുക്കുന്ന ചിലര്‍ നിങ്ങളിലുണ്ട് താനും. അതിക്രമികളെപ്പറ്റി നന്നായി അറിയുന്നവനാണ് അല്ലാഹു. ഇതിനു മുമ്പും അവര്‍ കുഴപ്പമുണ്ടാക്കാ നുദ്ദേശിക്കുകയും അങ്ങേക്കെതിരെ പലകാര്യങ്ങളും തിരിച്ചും മറിച്ചും പയറ്റി നോക്കുകയും ചെയ്തിട്ടുണ്ട്. അവസാനം അവര്‍ വിമ്മിഷ്ടപ്പെട്ടിട്ടും സത്യം പ്രത്യക്ഷീഭവിക്കുകയും അല്ലാഹുവിന്റെ മതം വിജയിക്കുകയും ചെയ്തു²⁰

'എനിക്ക് യുദ്ധത്തില്‍ നിന്നു വിട്ടുനില്‍ക്കാന്‍ സമ്മതം തരണേ, പരീക്ഷണത്തിലകപ്പെടു ത്തരുതേ' എന്നു ആവശ്യപ്പെടുന്ന ചിലര്‍ അവരിലുണ്ട്²¹
അറിയുക, അവര്‍ മുമ്പേ പരീക്ഷണ ത്തില്‍ വീണുകഴിഞ്ഞിരിക്കുകയാണല്ലോ. നരകം സത്യനിഷേധികളെ പൊതിയുക തന്നെ ചെയ്തിരിക്കുന്നു, തീര്‍ച്ച. താങ്കള്‍ക്ക് വല്ല നന്മയും വന്നെത്തുകയാണെങ്കില്‍ അതവരെ ദുഃഖിതരാക്കുകയും, വല്ല വിപത്തും വന്നുഭവിക്കുമ്പോള്‍ 'സ്വന്തം കാര്യം മുമ്പുതന്നെ ഞങ്ങള്‍ സംരക്ഷിച്ചിട്ടുണ്ട്' എന്നു പറഞ്ഞ് ആഹ്ലാദ ഭരിതരായി അവര്‍ തിരിഞ്ഞു പോവുകയും ചെയ്യും.

പറയുക: ഞങ്ങള്‍ക്ക് അല്ലാഹു നിശ്ചയിച്ചതല്ലാത്ത മറ്റൊന്നും തന്നെ സംഭവിക്കുകയില്ല, തീര്‍ച്ച; അവനാണ് ഞങ്ങളുടെ രക്ഷാകര്‍ത്താവ്. സത്യവിശ്വാസികള്‍ അല്ലാഹുവിന്റെമേല്‍ കാര്യങ്ങള്‍ ഭരമേല്‍പിച്ചുകൊള്ളട്ടെ. ചോദിക്കുക: രക്തസാക്ഷിത്വം, വിജയം എന്നീ രണ്ടു ശ്രേഷ്ഠ കാര്യങ്ങളില്‍ ഒന്നല്ലാതെ മറ്റെന്തെങ്കിലും ഞങ്ങള്‍ക്കുണ്ടാകുമെന്ന് നിങ്ങള്‍ പ്രതീക്ഷിക്കുന്നുണ്ടോ? എന്നാല്‍, തന്റെ പക്കല്‍ നിന്നു നേരിട്ടോ ഞങ്ങള്‍ കൈയായോ ഉള്ള ശിക്ഷകൊണ്ട് അല്ലാഹു നിങ്ങളെ പിടികൂടുമെന്നാണ് നിങ്ങളുടെ കാര്യത്തിലുള്ള ഞങ്ങളുടെ പ്രത്യാശ.²²
അതുകൊണ്ട് അതു നിങ്ങള്‍ കാത്തിരുന്നു കൊള്ളുക. ഞങ്ങളും നിങ്ങളൊന്നിച്ച് അതു പ്രതീക്ഷിച്ചുകൊണ്ടിരിക്കുകയാകുന്നു.

പറയുക: നിങ്ങള്‍ സ്വമേധയായോ അനിഷ്ടത്തോടെയോ ധനവ്യയം ചെയ്തുകൊള്ളുക- എങ്ങനെയാണെങ്കിലും നിങ്ങളില്‍ നിന്നത് സ്വീകരിക്കപ്പെടുന്നതേയല്ല, തീര്‍ച്ച. നിശ്ചയം, അധര്‍മകാരികളായ ഒരു ജനവിഭാഗമായിക്കഴിഞ്ഞിരിക്കുകയാണു നിങ്ങള്‍! അവരുടെ ദാനങ്ങള്‍ അസ്വീകാര്യമായിരിക്കുന്നതിന്റെ കാരണങ്ങള്‍ ഇതുമാത്രമാണ്: 'അവര്‍ അല്ലാഹുവിലും റസൂലിലും അവിശ്വസിച്ചു; അലസരായേ നമസ്‌കരിക്കാനെത്തൂ; വെറുപ്പോടെ മാത്രമേ എന്തും ചെലവു ചെയ്യൂ'! അവരുടെ സമ്പത്തുകളും സന്താനങ്ങളും നിങ്ങളെ വിസ്മയിപ്പിക്കാതിരിക്കട്ടെ. അവ നിമിത്തമായി ഐഹിക ജീവിതത്തില്‍ അവരെ ശിക്ഷാവിധേയരാക്കണമെന്നും, നിഷേധികളായിക്കൊണ്ടു തന്നെ അവര്‍ അന്ത്യശ്വാസം വലിക്കണമെന്നുമാണ് അല്ലാഹുവിന്റെ ഉദ്ദേശ്യം.²³

അവര്‍ നിങ്ങളുടെ ഗണത്തില്‍ പെട്ടവര്‍ തന്നെയാണെന്ന് അല്ലാഹുവിന്റെ പേരിലവര്‍ ശപഥം ചെയ്യുന്നു. എന്നാല്‍ അവര്‍ നിങ്ങളില്‍പെട്ടവരല്ല, ഭയന്നു കഴിയുന്ന ഒരു ജനതതിയത്രേ. വല്ല അഭയ സങ്കേതമോ ഗുഹകളോ മാളമോ കണ്ടെത്തുകയാണെങ്കില്‍ അവരങ്ങോട്ടു കുതറിയോടിപ്പോകുന്നതാണ്.²⁴

ദാന-ധര്‍മവിതരണ കാര്യത്തില്‍ താങ്കളെ അധിക്ഷേപിക്കുന്ന ചിലര്‍ അവരിലുണ്ട്- തങ്ങള്‍ക്കതില്‍ നിന്ന് യഥേഷ്ടം നല്‍കപ്പെടുന്നുവെങ്കില്‍ അവര്‍ സംതൃപ്തരാകും, നല്‍കപ്പെട്ടില്ലെങ്കിലോ, അവരതാ പ്രകോപിതരാകുന്നു!²⁵
അവര്‍ അല്ലാഹുവും റസൂലും നല്‍കുന്നതില്‍ സംതൃപ്തരാവുകയും ഇങ്ങനെ പ്രതികരിക്കുകയും ചെയ്തിരുന്നെങ്കില്‍ എത്ര നന്നായിരുന്നു: അല്ലാഹുമതി ഞങ്ങള്‍ക്ക്; തന്റെ അനുഗ്രഹത്തില്‍ നിന്ന് അവനും റസൂലും ഞങ്ങള്‍ക്കു നല്‍കിക്കൊള്ളും; അല്ലാഹുവില്‍ ശുഭപ്രതീക്ഷ വെച്ചുപുലര്‍ത്തുന്നവരാണു ഞങ്ങള്‍!

പരമദരിദ്രര്‍, അഗതികള്‍, സകാത്ത് ജോലിക്കാര്‍, ഹൃദയങ്ങള്‍ ഇണക്കപ്പെടേണ്ടവര്‍, അടിമത്ത വിമോചനം, കടബാധ്യതയില്‍ കുടുങ്ങിയവര്‍, ധര്‍മയുദ്ധത്തിനു സജ്ജരായവര്‍, ഗതിയറ്റ യാത്രക്കാര്‍ എന്നിവര്‍ക്കു മാത്രം അര്‍ഹതപ്പെട്ടതാണ് സകാത്തിന്റെ ധനം. അല്ലാഹുവിങ്കല്‍ നിന്നു നിര്‍ബന്ധമായ നിശ്ചയമാണിത്. അവന്‍ സര്‍വജ്ഞാനിയും മഹായുക്തിമാനുമത്രേ.²⁶

നബിക്ക് മനോവേദനയുണ്ടാക്കുകയും 'ആരുപറയുന്നതും കേള്‍ക്കുന്നയാളാണദ്ദേഹം' എന്നു ജല്‍പിക്കുകയും ചെയ്യുന്നവര്‍ കപടവിശ്വാസികളിലുണ്ട്. പറയുക: നബി നിങ്ങള്‍ക്കുവേണ്ടി നല്ലതു കേള്‍ക്കുന്നു, അല്ലാഹുവിലും സത്യവിശ്വാസികളെയും വിശ്വസിക്കുന്നു; നിങ്ങളില്‍ നിന്നു സത്യവിശ്വാസം കൈക്കൊണ്ടവര്‍ക്ക് മഹത്തായ അനുഗ്രഹമാണു നബി. അല്ലാഹുവിന്റെ ദൂതനു മനഃപ്രയാസമുണ്ടാക്കുന്നവര്‍ക്ക് വേദനയുറ്റ ശിക്ഷയുണ്ട്.²⁷

നിങ്ങളെ പ്രീതിപ്പെടുത്താനായി അല്ലാഹുവിന്റെ പേരില്‍ നിങ്ങളോടവര്‍ ശപഥം ചെയ്യുന്നു. എന്നാല്‍, സത്യവിശ്വാസികളാണെങ്കില്‍ അവര്‍ പ്രീതിപ്പെടുത്താന്‍ ഏറ്റം കടപ്പെട്ടവര്‍ അല്ലാഹുവും റസൂലുമത്രേ. അല്ലാഹുവിനോടും റസൂലിനോടും ഒരാള്‍ ശത്രുത പുലര്‍ത്തുന്നുവെങ്കില്‍ നിത്യവാസം വിധിക്കപ്പെട്ടനിലയില്‍ നരകാഗ്നിയാണവനുണ്ടാവുക എന്ന് ആ കപടന്മാര്‍ക്കറിയില്ലേ? അതീവ ഹീനമായ അപമാനമത്രേ അത്.

തങ്ങളുടെ അന്തരംഗങ്ങളില്‍ ഗുപ്തമായ കാര്യങ്ങളെപ്പറ്റി വിളംബരപ്പെടുത്തുന്ന ഏതെങ്കിലും ഖുര്‍ആനികാധ്യായം അവതീര്‍ണമായേക്കുമോ എന്നു ഭയപ്പെടുകയാണവര്‍. 'പരിഹസിച്ചോളു, നിങ്ങള്‍ പേടിച്ചുകൊണ്ടിരിക്കുന്നത് നിശ്ചയം അല്ലാഹു പുറത്തു കൊണ്ടുവരുന്ന താണ്'എന്നു താങ്കള്‍ പറയുക. ഇതിനെക്കുറിച്ചു ചോദിക്കുമ്പോള്‍ 'ഞങ്ങള്‍ കളി തമാശകള്‍ പറഞ്ഞു വിനോദിക്കുക മാത്രമായിരുന്നു' എന്ന് അവര്‍ തട്ടിവിടും. 'അല്ലാഹുവിനെയും അവന്റെ ദൃഷ്ടാന്തങ്ങളെയും റസൂലിനെയുമാണോ നിങ്ങള്‍ പരിഹസിക്കുന്നത്' എന്നു അവരോട് ചോദിക്കുക.²⁸
ഒഴികഴിവുകളൊന്നും പറയേണ്ട, വിശ്വാസം വരിച്ചതിനു ശേഷം നിങ്ങള്‍ അവിശ്വസിക്കുക തന്നെ ചെയ്തിരിക്കുന്നു; നിങ്ങളില്‍ ഒരു വിഭാഗത്തിനു നാം മാപ്പു നല്‍കുന്നുവെങ്കില്‍ തന്നെ, മറ്റൊരു വിഭാഗത്തെ-അവര്‍ അതിക്രമകാരികളായിട്ടുണ്ടെന്നതിനാല്‍- നാം ശിക്ഷിക്കുന്നതാണ് എന്നു താങ്കള്‍ പറയുക.

കപടവിശ്വാസീ-വിശ്വാസിനികള്‍ പരസ്പരതുല്യരത്രേ. അവര്‍ തിന്മകല്‍പിക്കുകയും നന്മ നിരോധിക്കുകയും പിശുക്കുകാട്ടുകയും ചെയ്യുന്നു. അവര്‍ അല്ലാഹുവിനെ വിസ്മരിച്ചു; അപ്പോഴവന്‍ അവരെ അവഗണിച്ചു. കപടവിശ്വാസികള്‍ അധര്‍മകാരികള്‍ തന്നെയാണ്, തീര്‍ച്ച. കപടവിശ്വാസീ- വിശ്വാസിനികള്‍ക്കും സത്യനിഷേധികള്‍ക്കും നിത്യവാസം വിധിക്കപ്പെട്ട നിലയ്ക്ക് അല്ലാഹു നരകം വാഗ്ദാനം ചെയ്തിരിക്കുന്നു. അതുമതി അവര്‍ക്ക്! അവരെ അല്ലാഹു ശപിച്ചിട്ടുമുണ്ട്. സ്ഥിരമായി നിലകൊള്ളുന്ന ശിക്ഷ അവര്‍ക്കുണ്ടായിരിക്കും²⁹
നിങ്ങളുടെ പൂര്‍വഗാമികളെപ്പോലെത്തന്നെ: നിങ്ങളെക്കാള്‍ മികച്ച ശക്തിയും കൂടുതല്‍ സ്വത്തുകളും സന്തതികളുമുള്ളവരായിരുന്നു അവര്‍. അങ്ങനെ തങ്ങളുടെ വിഹിതം കൊണ്ട് അവര്‍ സുഖിച്ചു. ആ മുന്‍ഗാമികള്‍ തങ്ങളുടെ വിഹിതം കൊണ്ടു സുഖിച്ചതുപോലെ സ്വവിഹിതം നിങ്ങളും സുഖിച്ചാസ്വദിക്കുന്നു. അവര്‍ അധര്‍മബദ്ധരായ തുപോലെ നിങ്ങളും അധര്‍മ ബദ്ധരായിക്കഴിയുകയാണ്! അത്തരക്കാരുടെ പ്രവര്‍ത്തനങ്ങള്‍ ഇഹലോകത്തും പരലോകത്തും ഫലശൂന്യമത്രേ. നഷ്ടക്കാര്‍ അവര്‍ തന്നെയാകുന്നു.

തങ്ങളുടെ മുന്‍ഗാമികളുടെ വിവരം ഇവര്‍ക്കു ലഭിച്ചിട്ടില്ലേ?-നൂഹ് നബിയുടെ ജനതയുടെയും ആദ്-സമൂദ് വിഭാഗങ്ങളുടെയും ഇബ്രാഹീം നബിയുടെ ജനതയുടെയും മദ്‌യന്‍കാരുടെയും നാട് അട്ടിമറിക്കപ്പെട്ടവരുടെയും വിവരം. തങ്ങളിലേക്കുള്ള ദൈവദൂതന്മാര്‍ സ്പഷ്ട ദൃഷ്ടാന്തങ്ങളുമായി അവരെ സമീപിച്ചു. അല്ലാഹു അവരോട് അക്രമം കാണിച്ചിട്ടില്ല, സ്വന്തത്തോടു അവര്‍ തന്നെ അക്രമം കാട്ടുകയായിരുന്നു.

സത്യവിശ്വാസികളും സത്യവിശ്വാസിനികളും പരസ്പരം മിത്രങ്ങളാകുന്നു. അവര്‍ നന്മ കല്‍പിക്കുകയും തിന്മ നിരോധിക്കുകയും നമസ്‌കാരം യഥാവിധി അനുഷ്ഠിക്കുകയും സകാത്ത് നല്‍കുകയും അല്ലാഹുവിനെയും റസൂലിനെയും അനുസരിക്കുകയും ചെയ്യുന്നു. അവര്‍ക്ക് അല്ലാഹു വിന്റെ കാരുണ്യവര്‍ഷമുണ്ടാകുന്നതാണ്. അവന്‍ പ്രതാപശാലിയും യുക്തിമാനും തന്നെയാണ്, തീര്‍ച്ച. സത്യവിശ്വാസികള്‍ക്കും സത്യവിശ്വാസിനികള്‍ക്കും താഴെക്കൂടി ആറുകളൊഴുകുന്ന സ്വര്‍ഗീയ ഉദ്യാനങ്ങള്‍ അല്ലാഹു വാഗ്ദാനം ചെയ്തിരിക്കുന്നു. അതിലവര്‍ ശാശ്വതവാസികളായിരിക്കും. സ്ഥിരവാസത്തിനുള്ള ആരാമങ്ങളില്‍ ഉത്തമവസതികളും അവന്‍ വാഗ്ദാനം ചെയ്തിട്ടുണ്ട്. എന്നാല്‍ അല്ലാഹുവിന്റെ സംതൃപ്തിയത്രേ മഹോന്നതം! മഹത്തായ വിജയം അതാകുന്നു.³⁰

നബിയേ, സത്യനിഷേധികളോടും കപടവിശ്വാസികളോടും അടരാടുകയും പരുഷ സമീപനം പുലര്‍ത്തുകയും ചെയ്യുക. അവരുടെ ആവാസ കേന്ദ്രം നരകമത്രേ. എത്ര ദുഷിച്ച അഭയ സ്ഥലം! അങ്ങനെ തങ്ങള്‍ പറഞ്ഞിട്ടില്ലെന്ന് അല്ലാഹുവിനെ പിടിച്ച് അവര്‍ ശപഥം ചെയ്യും. അവര്‍ സത്യനിഷേധത്തിന്റെ പദം ഉച്ചരിക്കുകയും ഇസ്‌ലാം വരിച്ചതില്‍ പിന്നെ അവിശ്വസിക്കുകയും നേടാനാകാത്തതിനെ പറ്റി വിചിന്തനം നടത്തുകയും ചെയ്തിട്ടുണ്ട്, തീര്‍ച്ച³¹
തന്റെ ഔദാര്യം കൊണ്ട് അല്ലാഹുവും അവന്റെ ദൂതനും ഐശ്വര്യന്മാരാക്കി എന്നതു മാത്രമാണ് അവരുടെ ക്രോധത്തിന് കാരണം. പശ്ചാത്തപിക്കുകയാണെങ്കില്‍ അതാണവര്‍ക്ക് ഉത്തമം; പിന്തിരിഞ്ഞു കളയുന്നുവെങ്കിലോ, ഇഹലോകത്തും പരലോകത്തും അല്ലാഹു അവര്‍ക്ക് വേദനയുറ്റ ശിക്ഷ നല്‍കും. ഒരു രക്ഷകനും സഹായിയും അവര്‍ക്കുണ്ടാവില്ല.

തന്റെ ഔദാര്യത്തില്‍ നിന്ന് അല്ലാഹു ഞങ്ങള്‍ക്ക് തരികയാണെങ്കില്‍ ഞങ്ങള്‍ ദാനം ചെയ്യുകയും സജ്ജനങ്ങളിലുള്‍പ്പെടുകയും ചെയ്യും, തീര്‍ച്ച എന്ന് അവനുമായി ഉടമ്പടി ചെയ്തവരും കപടവിശ്വാസികളിലുണ്ട്. എന്നിട്ട് തന്റെ ഔദാര്യത്തില്‍ നിന്ന് അവന്‍ നല്‍കിയപ്പോള്‍ അവരതില്‍ ലുബ്ധരാവുകയും അവഗണിച്ചു പിന്തിരിയുകയും ചെയ്യുന്നു!³²
അതിന്റെ അനന്തരഫലം, തന്നെ അഭിമുഖീകരിക്കുന്ന ഖിയാമനാള്‍ വരെ അല്ലാഹു അവരുടെ ഹൃദയങ്ങളില്‍ കാപട്യമുണ്ടാക്കി എന്നതായിരുന്നു. അവനോട് അവര്‍ ചെയ്ത വാഗ്ദാനം ലംഘിച്ചതുകൊണ്ടും നുണപറഞ്ഞിരുന്നതു കൊണ്ടുമാണത്. തങ്ങളുടെ രഹസ്യങ്ങളെയും ഗൂഢാലോചനകളെയും കുറിച്ച് അല്ലാഹു അഭിജ്ഞ നാണെന്നും അദൃശ്യകാര്യങ്ങള്‍ നന്നായറിയുന്നവനാണെന്നും അവര്‍ മനസ്സിലാക്കിയിട്ടില്ലേ!

വിശ്വാസികളില്‍ നിന്നു സ്വയം സന്നദ്ധരായി ദാനം ചെയ്യുന്നവരെയും സ്വന്തം തൊഴിലല്ലാതെ മറ്റൊന്നും കൈയിലില്ലാത്തവരെയും അധിക്ഷേപിക്കുകയും പരിഹസിക്കുകയും ചെയ്യുന്നവരാണവര്‍. അവരുടെ പരിഹാസത്തിന് അല്ലാഹു പ്രതിക്രിയ ചെയ്യും. അവര്‍ക്ക് വേദനാജനകമായ ശിക്ഷയാണുള്ളത്.³³

നബിയേ, അവര്‍ക്ക് പാപമോചനത്തിനായി താങ്കള്‍ പ്രാര്‍ത്ഥിച്ചാലും ഇല്ലെങ്കിലും- എഴുപതുവട്ടം പാപമോചനം തേടിയാലും- അല്ലാഹു അവര്‍ക്ക് പൊറുത്തു കൊടുക്കുന്നതേയല്ല. അല്ലാഹുവിലും റസൂലിലും അവര്‍ അവിശ്വസിച്ചു എന്നതു കൊണ്ടത്രേ അത്. അധര്‍മകാരികളെ അവന്‍ നേര്‍വഴിയിലാക്കുന്നതല്ല. റസൂലിന്റെ ശാസന ലംഘിച്ച് യുദ്ധത്തിനു പോകാതിരുന്നവര്‍ അതില്‍ സന്തോഷിച്ചു. തങ്ങളടെ ധന-ദേഹങ്ങള്‍ കൊണ്ട് അല്ലാഹുവിന്റെ വഴിയില്‍ യുദ്ധം ചെയ്യാനവര്‍ അനിഷ്ടപ്പെട്ടു. ഈ കൊടും ചൂടില്‍ നിങ്ങള്‍ യുദ്ധത്തിനു പോകേണ്ട എന്ന് അവര്‍ പറഞ്ഞു. നരകാഗ്നി അതികഠിനമായ ചൂടുള്ളതാകുന്നു എന്നു താങ്കളവരെ ഉപദേശിക്കുക. അവര്‍ യാഥാര്‍ത്ഥ്യം ഗ്രഹിച്ചിരുന്നുവെങ്കില്‍! അതുകൊണ്ട്, തങ്ങളുടെ കര്‍മഫലമായി അവര്‍ കുറച്ചു ചിരിക്കുകയും ധാരാളം കരയുകയും ചെയ്യട്ടെ.

ഇനി താങ്കളെ അവരിലൊരുവിഭാഗത്തിലേക്ക് അല്ലാഹു തിരിച്ചെത്തിക്കുകയും എന്നിട്ട് മറ്റൊരു യുദ്ധത്തിന് അങ്ങയോടവര്‍ സമ്മതം ചോദിക്കുകയും ചെയ്താല്‍ ഇങ്ങനെ പ്രതികരിക്കണം: എന്റെയൊപ്പം നിങ്ങള്‍ പുറപ്പെടുകയോ ഒരു ശത്രുവിനോടും പടവെട്ടുകയോ ചെയ്യേണ്ട; ആദ്യ പ്രാവശ്യം ഒഴിവായിരിക്കാനാണല്ലോ നിങ്ങളിഷ്ടപ്പെട്ടത്. അതുകൊണ്ട് മാറിനില്‍ക്കുന്നവരോടൊപ്പം ഇരിക്കുക.³⁴

അവരില്‍ ആരുമരിച്ചാലും താങ്കള്‍ നമസ്‌കരിക്കുകയോ അവന്റെ ഖബ്‌റിന്നു സമീപം പ്രാര്‍ത്ഥിക്കാന്‍ നില്‍ക്കുകയോ ചെയ്യരുത്; നിശ്ചയം അവര്‍ അല്ലാഹുവിലും റസൂലിലും അവിശ്വസിക്കുകയും നിഷേധികളായി മൃതിയടയുകയും ചെയ്തിരിക്കുന്നു.³⁵

അവരുടെ സമ്പത്തും സന്താനങ്ങളും നിങ്ങളില്‍ വിസ്മയമുണ്ടാക്കാതിരിക്കട്ടെ. അവ മുഖേന ഐഹിക ലോകത്തു തന്നെ അവരെ ശിക്ഷിക്കാനും നിഷേധികളായിക്കൊണ്ടു തന്നെ അവര്‍ അന്ത്യ ശ്വാസം വലിക്കാനും മാത്രമാണ് അല്ലാഹു ഉദ്ദേശിക്കുന്നത്.³⁶

അല്ലാഹുവില്‍ വിശ്വസിക്കുകയും അവന്റെ മാര്‍ഗത്തില്‍ യുദ്ധം ചെയ്യുകയും വേണം എന്നനുശാസിക്കുന്ന വല്ല ഖുര്‍ആനികാധ്യായവും അവതരിക്കുമ്പോള്‍, അവരിലെ കഴിവുള്ളവര്‍ ഒഴിവായിക്കിട്ടാന്‍ താങ്കളോട് അനുമതി തേടുകയാണ്! 'ഞങ്ങളെ മാറ്റിനിര്‍ത്തണേ, വീട്ടില്‍ കഴിയുന്നവരൊന്നിച്ച് ഞങ്ങളും ഇരുന്നുകൊള്ളാം' എന്നവര്‍ ബോധിപ്പിക്കും. ഒഴിഞ്ഞു നില്‍ക്കുന്ന പെണ്ണുങ്ങളൊന്നിച്ച് കഴിയാനാണവര്‍ക്കിഷ്ടം. തങ്ങളുടെ ഹൃദയങ്ങള്‍ മുദ്രിതമായിരിക്കുന്നതിനാല്‍ അവര്‍ യാഥാര്‍ത്ഥ്യം ഗ്രഹിക്കുന്നില്ല.³⁷

എന്നാല്‍ റസൂലും അവിടത്തോടൊന്നിച്ചുള്ള വിശ്വാസികളും തങ്ങളുടെ ധന-ദേഹങ്ങള്‍ കൊണ്ട് പോരാട്ടം നടത്തി. നന്മകള്‍ അവര്‍ക്കുള്ളതാണ്; ജേതാക്കളും അവര്‍ തന്നെ. താഴെക്കൂടി അരുവികളൊഴുകുന്ന ചില സ്വര്‍ഗത്തോപ്പുകള്‍ അവര്‍ക്കായി അല്ലാഹു ഒരുക്കി വെച്ചിരിക്കുന്നു; അതിലവര്‍ ശാശ്വതവാസികളായിരിക്കും. അതിമഹത്തായ വിജയമാണത്.

മാറിനില്‍ക്കാന്‍ ഒഴികഴിവുകള്‍ ബോധിപ്പിക്കാനുള്ള ഗ്രാമീണ അറബികള്‍ നബി സമക്ഷം സമ്മതത്തിനു വന്നു. അല്ലാഹുവിനോടും റസൂലിനോടും വ്യാജം പറഞ്ഞവരാകട്ടെ സ്വഗൃഹങ്ങളില്‍ ചടഞ്ഞു കൂടുകയുമുണ്ടായി. അവരില്‍ നിഷേധികളായവരെ വേദനാജനകമായ ശിക്ഷ പിടികൂടുന്നതാണ്. ദുര്‍ബലരുടെയും രോഗികളുടെയും യുദ്ധത്തിനു ധനമൊന്നും ചെലവഴിക്കാനില്ലാത്തവരുടെയും പേരില്‍ യാതൊരു കുറ്റവുമില്ല-അല്ലാഹുവിനോടും റസൂലിനോടും അവര്‍ ഗുണകാംക്ഷയുള്ളവരാണെങ്കില്‍. പുണ്യവാന്മാരെ അധിക്ഷേപിക്കാന്‍ യാതൊരു വഴിയുമില്ല. ഇക്കൂട്ടര്‍ക്കും കുറ്റമില്ല: യുദ്ധയാത്രക്കുവേണ്ടി സവാരി മൃഗം നല്‍കാനായി അവര്‍ നേരില്‍ വന്നു അപേക്ഷിച്ചപ്പോള്‍ 'വാഹനമൊന്നും എന്റെ കൈയിലില്ലല്ലോ'എന്നു താങ്കള്‍ പ്രതികരിച്ചു; അപ്പോള്‍, യുദ്ധത്തിനു ചെലവഴിക്കാനായി തങ്ങളുടെ പക്കല്‍ ധനമൊന്നുമില്ലാതെ പോയല്ലോ എന്നോര്‍ത്ത് സങ്കടപ്പെട്ടു കണ്ണീരൊലിപ്പിച്ചുകൊണ്ട് അവര്‍ മടങ്ങിപ്പോയി.³⁸

അധിക്ഷേപ വിധേയരാകാന്‍ വഴിയുള്ളവര്‍ ഇവര്‍ മാത്രമാണ്: സമ്പന്നരായിരിക്കെ യുദ്ധത്തില്‍ നിന്നു മാറിനില്‍ക്കാന്‍ അങ്ങയോടവര്‍ അനുമതി തേടുകയും ഒഴിഞ്ഞു നില്‍ക്കുന്ന പെണ്ണുങ്ങളൊന്നിച്ച് കഴിയാനവരിഷ്ടപ്പെടുകയും ചെയ്യുന്നു. അവരുടെ ഹൃദയങ്ങളില്‍ അല്ലാഹു മുദ്രവെച്ചിരിക്കുകയാണ്; തന്മൂലം അവര്‍ യാഥാര്‍ത്ഥ്യം ഗ്രഹിക്കുന്നില്ല.

യുദ്ധാനന്തരം അവരുടെയടുത്ത് തിരിച്ചെത്തിയാല്‍ നിങ്ങളോടവര്‍ ഒഴികഴിവ് ബോധിപ്പിക്കുന്നതാണ്. അങ്ങു പ്രതികരിക്കണം: നിങ്ങള്‍ ഒഴികഴിവൊന്നും സമര്‍പ്പിക്കേണ്ട. ഞങ്ങള്‍ നിങ്ങളെ വിശ്വാസത്തിലെടുക്കുന്നതേയല്ല. നിങ്ങളുടെ ചില വിവരങ്ങള്‍ അല്ലാഹു ഞങ്ങള്‍ക്കറിയിച്ചു തന്നിരിക്കുന്നു. നിങ്ങളുടെ ചെയ്തികള്‍ അല്ലാഹുവും റസൂലും കാണുന്നതുമാണ്. ദൃശ്യവും അദൃശ്യവുമറിയുന്നവന്റെയടുത്തേക്ക് പിന്നീട് നിങ്ങള്‍ മടക്കപ്പെടുന്നതും സ്വന്തം ചെയ്തികളെപ്പറ്റി അപ്പോള്‍ നിങ്ങള്‍ക്കവന്‍ വിവരം തരുന്നതുമാണ്.

നിങ്ങള്‍ മടങ്ങിച്ചെല്ലുമ്പോള്‍ തങ്ങളെ വെറുതെ വിട്ടേക്കാനായി അല്ലാഹുവിനെ പിടിച്ച് അവര്‍ ശപഥം ചെയ്യും. അവരെ നിങ്ങള്‍ അവഗണിക്കുക. അശുദ്ധന്മാരത്രേ അവര്‍. സ്വന്തം കര്‍മങ്ങളുടെ ഫലമായി അവരുടെ സങ്കേതം നരകമായിരിക്കുന്നതാണ്. നിങ്ങളവരെപ്പറ്റി സംതൃപ്തരാകാനായി ശപഥം ചെയ്തുകൊണ്ടിരിക്കും അവര്‍. ഇനി നിങ്ങള്‍ അവരെക്കുറിച്ച് തൃപ്തരായാല്‍ പോലും അതിക്രമികളെ സംബന്ധിച്ച് അല്ലാഹു സംതൃപ്തനാവുകയേ ചെയ്യില്ല.³⁹

ഗ്രാമീണ അറബികള്‍ സത്യനിഷേധത്തിലും കാപട്യത്തിലും കൂടുതല്‍ തീവ്രതയുള്ളവരാണ്. റസൂലിനു അല്ലാഹു അവതരിപ്പിച്ച നിയമപരിധികള്‍ അറിയാതിരിക്കാന്‍ ഏറെ കടപ്പെട്ടവരും അവരത്രേ. അല്ലാഹു സൂക്ഷ്മജ്ഞാനിയും യുക്തിമാനുമാകുന്നു. തങ്ങള്‍ ചെലവഴിക്കുന്നത് നഷ്ടമായി വിലയിരുത്തുന്നവരും ഗ്രാമീണരിലുണ്ട്. നിങ്ങള്‍ക്കെന്തെങ്കിലും വിപത്തു ഭവിക്കുന്നത് പ്രതീക്ഷിച്ചിരിക്കുകയാണവര്‍. കാലക്കേടുകള്‍ അവര്‍ക്കു തന്നെ വന്നു പെടട്ടെ- അല്ലാഹു എല്ലാം കേള്‍ക്കുന്നവനും അറിയുന്നവനുമാകുന്നു. എന്നാല്‍ അല്ലാഹുവിലും അന്ത്യനാളിലും നന്നായി വിശ്വസിക്കുന്നവരും ആ ഗ്രാമീണരിലുണ്ട്. തങ്ങള്‍ ചെലവു ചെയ്യുന്നത് അവന്റെ സാമീപ്യവും റസൂലിന്റെ പ്രാര്‍ത്ഥനയും നേടാനുള്ള നിമിത്തമായാണവര്‍ ഗണിക്കുക. അറിയുക, അതവര്‍ക്കു ദൈവ സാമീപ്യമാര്‍ഗം തന്നെയത്രേ. തന്റെ കാരുണ്യത്തില്‍ അല്ലാഹു അവരെ പ്രവേശിപ്പിക്കുന്നതാണ്. ഏറെ പൊറുക്കുന്നവനും കരുണാമയനും തന്നെയത്രേ അവന്‍.

മുഹാജിറുകളിലും അന്‍സ്വാറുകളിലും നിന്ന് ഏറ്റമാദ്യം മുന്നോട്ടു വന്നവരും പുണ്യത്തിലായി അവരെ അനുധാവനം ചെയ്തവരുമുണ്ടല്ലോ, അവരെക്കുറിച്ച് അല്ലാഹു സംതൃപ്തനായിരിക്കുന്നു; അവനെപ്പറ്റി അവരും തൃപ്തിപ്പെട്ടിട്ടുണ്ട്.⁴⁰
താഴ്ഭാഗങ്ങളില്‍ കൂടി ആറുകളൊഴുകുന്ന സ്വര്‍ഗം അവര്‍ക്കായി അവന്‍ സജ്ജീകരിച്ചിട്ടുമുണ്ട്. അവരതില്‍ ശാശ്വത വാസികളാണ്. മഹത്തായ വിജയമത്രേ അത്.

നിങ്ങളുടെ പരിസരത്തുള്ള ഗ്രാമീണരിലും മദീനക്കാരില്‍ തന്നെയുമുണ്ട് കപടവിശ്വാസികള്‍. അചഞ്ചല കാപട്യത്തിലാണവര്‍; അവരെ താങ്കള്‍ക്കു മനസ്സിലാക്കാനാകില്ല, നമുക്കറിയാം. രണ്ടുവട്ടം നാമവരെ ശിക്ഷാവിധേയരാക്കുന്നതാണ്.⁴¹
പിന്നീടവര്‍ കഠിന ശിക്ഷയിലേക്ക് തിരിച്ചുവിടപ്പെടുകയും ചെയ്യും.

വേറെ ചിലയാളുകളുണ്ട്: അവര്‍ സല്‍ക്കര്‍മങ്ങളും ദുഷ്‌കര്‍മങ്ങളും കൂട്ടിക്കലര്‍ത്തി അനുവര്‍ത്തിച്ചവരും കുറ്റങ്ങള്‍ സമ്മതിച്ച് ഏറ്റുപറഞ്ഞവരുമാണ്. അല്ലാഹു അവരുടെ പശ്ചാത്താപം സ്വീകരിച്ചേക്കാം; ഏറെ പൊറുക്കുന്നവനും കരുണാമയനുമത്രേ അവന്‍. അവരെ ശുദ്ധീകരിക്കുകയും സംസ്‌കരിക്കുകയും ചെയ്യുന്ന സകാത്ത് അവരുടെ സമ്പത്തില്‍ നിന്ന് താങ്കള്‍ വാങ്ങുകയും അവര്‍ക്കുവേണ്ടി പ്രാര്‍ത്ഥിക്കുകയും ചെയ്യുക. അങ്ങയുടെ പ്രാര്‍ത്ഥന അവര്‍ക്കു മനഃശാന്തി നല്‍കുക തന്നെ ചെയ്യുന്നതാണ്. എല്ലാം അറിയുന്നവനും കേള്‍ക്കുന്നവനുമത്രേ അല്ലാഹു. തന്റെ അടിമകളുടെ പശ്ചാത്താപം സ്വീകരിക്കുന്നതും ദാനങ്ങള്‍ ഏറ്റുവാങ്ങുന്നതും അല്ലാഹുവാണെന്നും അവന്‍ പശ്ചാത്താപം ഏറെ സ്വീകരിക്കുന്നവനും കരുണാമയനുമാണെന്നും അവര്‍ ഗ്രഹിച്ചുവെച്ചിട്ടില്ലേ?⁴²

നബിയേ, പ്രഖ്യാപിക്കുക: നിങ്ങള്‍ കര്‍മങ്ങള്‍ അനുഷ്ഠിച്ചുകൊള്ളുക-അല്ലാഹുവും റസൂലും സത്യവിശ്വാസികളും നിങ്ങളുടെ പ്രവൃത്തികള്‍ കാണുന്നതാണ്. പ്രത്യക്ഷ-പരോക്ഷ കാര്യങ്ങളത്രയും അറിയുന്നവനിലേക്കു പിന്നെ നിങ്ങള്‍ മടക്കപ്പെടും; നിങ്ങളനുവര്‍ത്തിച്ചിരുന്നവയെക്കുറിച്ച് തത്സമയം അവന്‍ നിങ്ങളെ വിവരമറിയിച്ചുതരുന്നതാണ്.⁴³

വേറെ ചിലരുമുണ്ട് യുദ്ധത്തിനു പോകാത്തവര്‍. അല്ലാഹുവിങ്കല്‍ നിന്നുത്തരവുണ്ടാകും വരെ അവരുടെ കാര്യം മാറ്റിവെക്കപ്പെട്ടിരിക്കുകയാണ്. അവനവരെ ശിക്ഷിക്കുകയോ അവരുടെ പശ്ചാത്താപം സ്വീകരിക്കുകയോ ചെയ്യും. എല്ലാം അറിയുന്നവനും യുക്തിമാനുമാണ് അല്ലാഹു⁴⁴

കപടവിശ്വാസികളില്‍ ചിലരുണ്ട്: ദ്രോഹനടപടികള്‍ക്കും സത്യത്തെ നിഷേധിക്കാനും വിശ്വാസികള്‍ക്കിടയില്‍ ഛിദ്രതയുണ്ടാക്കാനും നേരത്തെത്തന്നെ അല്ലാഹുവിനോടും റസൂലിനോടും ശത്രുതപുലര്‍ത്തിയവന്ന് ഗൂഢ സങ്കേതമൊരുക്കാനുമായി അവരൊരു പള്ളിയുണ്ടാക്കി; നന്മമാത്രമേ തങ്ങളുദ്ദേശിച്ചിട്ടുള്ളൂ എന്ന് അവര്‍ ശപഥം ചെയ്യും. അവര്‍ നുണതന്നെയാണ് പറയുന്നതെന്ന് അല്ലാഹു സാക്ഷ്യം വഹിക്കുന്നു. നബിയേ, ഒരിക്കലും താങ്കളതില്‍ നമസ്‌കരിക്കരുത്; തുടക്കം മുതലേ ഭക്തിയുടെ മേല്‍ അടിത്തറ പാകിയിട്ടുള്ള മസ്ജിദാണ് താങ്കള്‍ക്കു നമസ്‌കരിക്കാന്‍ ഏറ്റമനുയോജ്യം. വിശുദ്ധരാകാന്‍ തല്‍പരരായ ചില പുരുഷന്മാര്‍ അവിടെയുണ്ട്. പരിശുദ്ധന്മാരെ അല്ലാഹു സ്‌നേഹിക്കുന്നു.⁴⁵

അല്ലാഹുവിലുള്ള ഭയപ്പാടിലും സംതൃപ്തിയിലുമായി ഒരാള്‍ അസ്തിവാരമുറപ്പിച്ചു കെട്ടിടം പണിതു; മറ്റൊരാള്‍ മണ്ണിടിച്ചില്‍ മൂലം ഉള്‍ഭാഗം പൊള്ളയായ നദിയുടെ കരയില്‍ കെട്ടിടമുണ്ടാക്കുകയും അതയാളെയും കൊണ്ട് നരകത്തിലേക്ക് കൂപ്പുകുത്തുകയും ചെയ്തു- ഇവരില്‍ ആരാണ് ശ്രേഷ്ഠന്‍? അതിക്രമികളെ അല്ലാഹു സന്മാര്‍ഗത്തിലേക്കു നയിക്കില്ല. കപടവിശ്വാ സികള്‍ പണിത ആ സദനം സ്വന്തം ഹൃദയങ്ങളില്‍ - അവ ഛിന്നഭിന്നമാകും വരെ- ആശങ്കാജനക മായിക്കൊണ്ടേയിരിക്കും. എല്ലാം അറിയുന്നവനും യുക്തിമാനുമാണ് അല്ലാഹു.⁴⁶

സ്വര്‍ഗം തരാം എന്ന വ്യവസ്ഥയില്‍ സത്യവിശ്വാസികളില്‍ നിന്ന് അവരുടെ ധന-ദേഹങ്ങള്‍ അല്ലാഹു വിലകൊടുത്ത് വാങ്ങിയിരിക്കുന്നു. അവര്‍ അല്ലാഹുവിന്റെ വഴിയില്‍ യുദ്ധം ചെയ്യുകയും തദ്വാരാ വധിക്കുകയും വധിക്കപ്പെടുകയും (സ്വര്‍ഗപ്രാപ്തരാവുകയും) ചെയ്യുന്നു. തൗറാത്തിലും ഇന്‍ജീലിലും ഖുര്‍ആനിലുമുള്ള അല്ലാഹുവിന്റെ സത്യവാഗ്ദാനമത്രേ ഇത്. അവനെക്കാള്‍ വലിയ വാഗ്ദാനപാലകന്‍ ആരുണ്ട്! അതുകൊണ്ട്, അവനുമായി നടത്തിയ ഈ ഇടപാടില്‍ നിങ്ങള്‍ ആഹ്ലാദ ഭരിതരാവുക. മഹത്തായ വിജയമത്രേ അത്.⁴⁷

അവര്‍ പശ്ചാത്തപിക്കുന്നവരും ആരാധനാനിമഗ്‌നരും സ്തുതിഗീതങ്ങളര്‍പ്പിക്കുന്നവരും നോമ്പനുഷ്ഠിക്കുന്നവരും റുകൂഅ്-സുജൂദുകള്‍ ചെയ്യുന്നവരും നന്മകല്‍പിക്കുന്നവരും തിന്മ വിരോധിക്കുന്നവരും അല്ലാഹുവിന്റെ പരിധികള്‍ കാത്തുസൂക്ഷിക്കുന്നവരുമായിരിക്കും. സത്യവിശ്വാസികള്‍ക്ക് താങ്കള്‍ ശുഭവാര്‍ത്തയറിയിക്കുക.

ബഹുദൈവവിശ്വാസികള്‍ നരകാവകാശികളാണെന്ന് സ്പഷ്ടമായിക്കഴിഞ്ഞ ശേഷം അവര്‍ക്കുവേണ്ടി -അടുത്ത ബന്ധുക്കളായാല്‍ പോലും- പാപമോചനമര്‍ത്ഥിക്കാന്‍ പ്രവാചകനും സത്യവിശ്വാസികള്‍ക്കും പാടില്ല. എന്നാല്‍ ഇബ്രാഹീം നബി സ്വപിതാവിനുവേണ്ടി പാപമോചനം തേടിയത്, പിതാവിനോട് അങ്ങനെയൊരു വാഗ്ദാനമുണ്ടായിരുന്നതിനാല്‍ മാത്രമാണ്. അദ്ദേഹം അല്ലാഹുവിന്റെ ശത്രു തന്നെയാണെന്ന് ബോധ്യമായപ്പോള്‍ താന്‍ അതില്‍ നിന്നു പിന്മാറി. ഇബ്രാഹീം നബി വളരെ വിനീതനും സഹനശീലനും തന്നെയാകുന്നു⁴⁸

ഒരു ജനപഥം കാത്തു സൂക്ഷിക്കേണ്ട കാര്യങ്ങള്‍ അവര്‍ക്കു സ്പഷ്ടമാക്കിക്കൊടുത്ത ശേഷമല്ലാതെ, താന്‍ സന്മാര്‍ഗത്തിലേക്കു നയിച്ച ആ ജനപഥത്തെ ദുര്‍മാര്‍ഗത്തിലാക്കുന്ന രീതി അല്ലാഹുവിനില്ല. സകല കാര്യങ്ങളെപ്പറ്റിയും സൂക്ഷ്മജ്ഞാനി തന്നെയാണവന്‍. ഭുവന-വാനങ്ങളുടെ ആധിപത്യം അല്ലാഹുവിനു മാത്രമാണ്. അവനാണ് ജീവിപ്പിക്കുന്നതും മരിപ്പിക്കുന്നതും. അവനെക്കൂടാതെ ഒരു രക്ഷാധികാരിയും സഹായിയും നിങ്ങള്‍ക്കില്ല.

പ്രവാചകന്നും പ്രതിസന്ധിഘട്ടത്തില്‍ അവിടത്തെ അനുധാവനം ചെയ്തു ദേശത്യാഗം ചെയ്തവര്‍ക്കും അവരുടെ സഹായികളായവര്‍ക്കും അല്ലാഹു മാപ്പരുളിയിരിക്കുന്നു; അവരില്‍ ഒരു പറ്റത്തിന്റെ മനസ്സ് വഴിതെറ്റുമാറായിരുന്ന ശേഷം. പിന്നീടവന്‍ അവരുടെ പശ്ചാത്താപം സ്വീകരിച്ചു.⁴⁹
അവരോട് ഏറെ ദയാലുവും കാരുണ്യവാനുമത്രേ അവന്‍. തീരുമാനം പിന്തിച്ചു വെക്കപ്പെട്ടിരുന്ന മൂന്നാള്‍ക്കും മാപ്പു നല്‍കി; തങ്ങളുടെ പ്രശ്‌നം നീട്ടി വെക്കപ്പെട്ടപ്പോള്‍ പ്രവിശാലമായ ഭൂമി അവര്‍ക്ക് ഏറെ കുടുസ്സായിരുന്നു. സ്വജീവന്‍ തന്നെ സങ്കോചിച്ചു; അല്ലാഹുവിങ്കല്‍ നിന്നു അവങ്കലേക്കു മാത്രമേ അഭയസ്ഥാനമുള്ളൂ എന്നവര്‍ക്കു ബോധ്യപ്പെട്ടു. പിന്നീട് അല്ലാഹു അവര്‍ക്ക് പശ്ചാത്താപത്തിനവസരമുണ്ടാക്കി; അവര്‍ ഖേദിച്ചു മടങ്ങുന്നവരാകാന്‍. അവന്‍ ധാരാളമായി പശ്ചാത്താപം സ്വീകരിക്കുന്നവനും കരുണാമയനുമത്രേ.⁵⁰

സത്യവിശ്വാസികളേ, നിങ്ങള്‍ അല്ലാഹുവിനെ സൂക്ഷിക്കുകയും സത്യസന്ധന്മാരൊന്നിച്ചാവുകയും ചെയ്യുക. മദീനക്കാര്‍ക്കും അവരുടെ പരിസരത്തുള്ള ഗ്രാമവാസികള്‍ക്കും റസൂലിനെ വിട്ട് മാറിനില്‍ക്കാനോ അവിടത്തെയവഗണിച്ച് സ്വന്തം കാര്യങ്ങളില്‍ തല്‍പരരാകാനോ പാടില്ല.⁵¹
കാരണം, അല്ലാഹുവിന്റെ വഴിയില്‍ അവര്‍ക്ക് വിശപ്പോ ദാഹമോ ക്ഷീണമോ ഉണ്ടാവുകയോ, നിഷേധികള്‍ക്ക് രോഷമുണ്ടാക്കുന്ന ഒരിടത്ത് അവര്‍ കാലെടുത്തു വെക്കുകയോ പ്രതിയോഗിക്ക് ദ്രോഹമേല്‍പിക്കുകയോ ചെയ്തിട്ടുണ്ടെങ്കില്‍ അവയത്രയും സല്‍കര്‍മമായി ഉല്ലേഖിതമാകാതിരിക്കില്ല. പുണ്യവാന്മാരുടെ പ്രതിഫലം അല്ലാഹു പാഴാക്കുന്നതല്ല, തീര്‍ച്ച. അതുപോലെ തന്നെ, ചെറിയതോ വലിയതോ ആയ ഒരു തുക അല്ലാഹുവിന്റെ വഴിയില്‍ അവര്‍ ചെലവഴിക്കുകയോ ഒരു താഴ്‌വര അവര്‍ മുറിച്ചു കടക്കുകയോ ചെയ്തിട്ടുണ്ടെങ്കില്‍ അതും സല്‍പ്രവൃത്തികളായി അവരുടെ പേരില്‍ രേഖപ്പെടുത്താതിരിക്കില്ല തന്നെ. അവര്‍ അനുവര്‍ത്തിച്ചുകൊണ്ടിരിക്കുന്ന ഉദാത്ത കൃത്യങ്ങള്‍ക്ക് അല്ലാഹു പ്രതിഫലം നല്‍കാനാണിത്.

സത്യവിശ്വാസികള്‍ ഒന്നടങ്കം യുദ്ധത്തിനു പോയിക്കൂടാ. അവരിലെ ഓരോ വിഭാഗത്തില്‍ നിന്നും ഓരോ സംഘം നബിയൊന്നിച്ചു മതവിഷയങ്ങളില്‍ ജ്ഞാനമാര്‍ജിക്കാനും തങ്ങളുടെയാളുകള്‍ യുദ്ധം കഴിഞ്ഞു മടങ്ങിയെത്തിയാല്‍ അവര്‍ക്ക് താക്കീതു നല്‍കാനും എന്തുകൊണ്ടു പുറപ്പെടുന്നില്ല?⁵²
അവര്‍ സൂക്ഷ്മത പുലര്‍ത്തുവാന്‍ വേണ്ടി. സത്യവിശ്വാസികളേ, നിങ്ങളുടെ സമീപ വാസികളായ നിഷേധികളോട് യുദ്ധം ചെയ്യുക; നിങ്ങളുടെ പാരുഷ്യം അവര്‍ കാണട്ടെ. സൂക്ഷ്മാലുക്കളൊന്നിച്ചാണ് അല്ലാഹു എന്ന് നിങ്ങള്‍ ഗ്രഹിക്കുക.⁵³

ഏതെങ്കിലുമൊരു ഖുര്‍ആനികാധ്യായം അവതീര്‍ണമാകുമ്പോള്‍ 'നിങ്ങളിലാര്‍ക്കാണിത് വിശ്വാസം വര്‍ധിപ്പിച്ചത്' എന്ന് ചില കപടവിശ്വാസികള്‍ പരിഹാസാത്മകമായി ചോദിക്കും. എന്നാല്‍, സത്യവിശ്വാസികള്‍ക്ക് അതവരുടെ വിശ്വാസം വര്‍ധിപ്പിക്കുക തന്നെയാണുണ്ടായത്. അവര്‍ സന്തോഷ ഭരിതരാവുകയും ചെയ്യും. എന്നാല്‍, ഹൃദയങ്ങളില്‍ കാപട്യ രോഗമുള്ളവര്‍ക്കത് മേല്‍ക്കുമേല്‍ മാലിന്യം വര്‍ദ്ധിപ്പിക്കുകയാണു ചെയ്യുക. സത്യനിഷേധികളായിക്കൊണ്ടുതന്നെ അവര്‍ മരിക്കുന്നതുമാണ്. ഓരോ കൊല്ലവും ഒന്നോ രണ്ടോ വട്ടം തങ്ങള്‍ പരീക്ഷണവിധേയരാവുക തന്നെ ചെയ്യുന്നുണ്ട് എന്ന് അവര്‍ കാണുന്നില്ലേ? എന്നിട്ടുമവര്‍ പശ്ചാത്തപിക്കുകയോ ആലോചിക്കുകയോ ചെയ്യുന്നില്ല. ഒരു ഖുര്‍ആനികാധ്യായമവതീര്‍ണമായാല്‍, അവരില്‍ ചിലര്‍ മറ്റുചിലരെ, നിങ്ങളെയാരെങ്കിലും ശ്രദ്ധിക്കുന്നുണ്ടോ എന്ന ഭാവേന നോക്കുകയും എന്നിട്ട് തടിയൂരുകയും ചെയ്യും. വസ്തുത മനസ്സിലാക്കാത്ത ഒരു ജനവിഭാഗമാകയാല്‍ അവരുടെ ഹൃദയങ്ങള്‍ അല്ലാഹു വ്യതിചലിപ്പിച്ചിരിക്കുകയാണ്.⁵⁴

സ്വന്തത്തില്‍ നിന്നു തന്നെയുള്ള ഒരു റസൂല്‍ നിങ്ങള്‍ക്കിതാ വന്നിരിക്കുന്നു. നിങ്ങള്‍ക്കു ബുദ്ധിമുട്ടുണ്ടാക്കുന്നത് അവിടത്തേക്ക് അസഹനീയമാണ്. നിങ്ങളുടെ സന്മാര്‍ഗ പ്രാപ്തിയില്‍ അതീവേച്ഛുവും സത്യവിശ്വാസികളോട് ഏറെ ആര്‍ദ്രനും ദയാലുവുമാണ് അവിടന്ന്.⁵⁵

ഇനി അവര്‍ വ്യതിചലിച്ചു കളയുന്നുവെങ്കില്‍ അങ്ങു പ്രതികരിക്കുക: എനിക്ക് അല്ലാഹു മതി; അവനല്ലാതെ യാതൊരാരാധ്യനുമില്ല. അവനില്‍ ഞാന്‍ ഭരമേല്‍പിച്ചിരിക്കുന്നു. മഹോന്നതമായ സിംഹാസനത്തിന്റെ അധിപനത്രേ അവന്‍⁵⁶