യൂനുസ് - يونس - Yunus

അലിഫ് ലാം റാ. ഇവ വിജ്ഞാന സമ്പൂര്‍ണമായ വേദഗ്രന്ഥത്തിലെ വാക്യങ്ങളാകുന്നു. മാനവതക്കു താക്കീതു നല്‍കുകയും വിശ്വാസികള്‍ക്കു തങ്ങളുടെ നാഥങ്കല്‍ സമുല്‍കൃഷ്ട പദവിയുണ്ടെന്ന ശുഭവാര്‍ത്തയറിയിക്കുകയും ചെയ്യുക എന്ന ദൗത്യവുമായി മനുഷ്യരില്‍ നിന്നു തന്നെയുള്ള ഒരാള്‍ക്കു നാം ബോധനം നല്‍കിയതില്‍ അവര്‍ക്കു വിസ്മയം തോന്നുകയാണോ? ഇദ്ദേഹം സ്പഷ്ടമായ ഒരാഭിചാരകന്‍ തന്നെയാണെന്ന കാര്യം തീര്‍ച്ച എന്നു സത്യ നിഷേധികള്‍ തട്ടിവിട്ടു¹

നിശ്ചയം, നിങ്ങളുടെ നാഥന്‍ അല്ലാഹുവാകുന്നു. ഭുവന-വാനങ്ങള്‍ ആറു ദിവസങ്ങളിലായി സൃഷ്ടിക്കുകയും അനന്തരം പ്രാപഞ്ചിക കാര്യങ്ങള്‍ നിയന്ത്രിച്ചു കൊണ്ട് സിംഹാസനാധിപത്യമേല്‍ക്കുകയും ചെയ്തവനാണവന്‍. അവന്റെ അനുമതിയനുസരിച്ചല്ലാതെ ഒരാളും ശുപാര്‍ശ ചെയ്യാനുണ്ടാവില്ല. അവനാണ് നിങ്ങളുടെ നാഥനായ അല്ലാഹു. അതിനാല്‍ അവനെ ആരാധിക്കുക, നിങ്ങള്‍ ചിന്തിച്ചു യാഥാര്‍ഥ്യം ഗ്രഹിക്കുന്നില്ലേ? നിങ്ങള്‍ സര്‍വരുടെയും മടക്കം അവങ്കലേക്കാകുന്നു. അല്ലാഹുവിന്റെ യഥാര്‍ഥ വാഗ്ദാനമാണിത്. സൃഷ്ടികര്‍മം ആരംഭിക്കുന്നത് അവനാണ്; വിശ്വസിക്കുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ക്ക് നീതിപൂര്‍വം പ്രതിഫലം നല്‍കാനായി പിന്നീട് അതവന്‍ ആവര്‍ത്തിക്കുന്നു. എന്നാല്‍ സത്യനിഷേധികള്‍ക്ക് അത്യുഷ്ണ പാനീയവും വേദനയുറ്റ ശിക്ഷയുമാണുണ്ടാവുക-സബോധം അവര്‍ സത്യനിഷേധം വരിച്ചിരുന്നതാണ് കാരണം²

സൂര്യനെ ജ്വലിക്കുന്ന വെളിച്ചവും ചന്ദ്രനെ പ്രഭയുമാക്കിയത് അവനാണ്. വര്‍ഷങ്ങളുടെ എണ്ണവും കണക്കും നിങ്ങള്‍ക്കു ഗ്രഹിക്കാനായി അതിനവന്‍ വിവിധ സഞ്ചാര പഥങ്ങള്‍ നിര്‍ണയിച്ചു. ന്യായമായ ആവശ്യാര്‍ത്ഥം മാത്രമേ അല്ലാഹു അവ സൃഷ്ടിച്ചിട്ടുള്ളൂ. വസ്തുതകള്‍ ഗ്രഹിക്കുന്നവര്‍ക്കായി അവന്‍ ദൃഷ്ടാന്തങ്ങള്‍ പ്രതിപാദിക്കുന്നു. രാപ്പകലുകള്‍ മാറി വരുന്നതിലും ഭുവന-വാനങ്ങളില്‍ അല്ലാഹു സൃഷ്ടിച്ചിട്ടുള്ളവയിലും സൂക്ഷ്മാലുക്കളായ ജനങ്ങള്‍ക്കു ദൃഷ്ടാന്തങ്ങളുണ്ട്³

നാമുമായുള്ള കൂടിക്കാഴ്ചയെ ആഗ്രഹിക്കാത്തവരും ഐഹിക ജീവിതത്തില്‍ സംതൃപ്തി പൂണ്ട് അതില്‍ സമാധാനം കണ്ടെത്തിയവരും നമ്മുടെ ദൃഷ്ടാന്തങ്ങളെ കുറിച്ച് അശ്രദ്ധരായവരും ആരോ, തങ്ങളുടെ പ്രവര്‍ത്തനങ്ങളുടെ പകരമായി അവര്‍ക്കുള്ള സങ്കേതം നരകം തന്നെയാകുന്നു⁴
എന്നാല്‍ സത്യവിശ്വാസം കൈകൊള്ളുകയും സല്‍കര്‍മങ്ങളനുവര്‍ത്തിക്കുകയും ചെയ്തവരാകട്ടെ, തങ്ങളുടെ വിശ്വാസം കാരണമായി നാഥന്‍ അവര്‍ക്ക് സന്‍മാര്‍ഗം കാട്ടിക്കൊടുക്കുക തന്നെ ചെയ്യുന്നതാണ്. അനുഗ്രഹ പൂര്‍ണമായ സ്വര്‍ഗപൂന്തോപ്പുകളില്‍ അവരുടെ താഴെ കൂടി അരുവികള്‍ ഒഴുകിക്കൊണ്ടിരിക്കും. അവിടെ അവരുടെ പ്രാര്‍ഥന 'അല്ലാഹുവേ നീ എത്ര പരിശുദ്ധന്‍' എന്നാണ്. അതിലവരുടെ അഭിവാദ്യം 'സലാം' ആയിരിക്കും. ലോക രക്ഷിതാവായ അല്ലാഹുവിനാണ് സര്‍വ സ്‌ത്രോത്രങ്ങളും എന്നായിരിക്കും അവരുടെ പ്രാര്‍ഥനാ സമാപനം⁵

നന്മ കൈവരാനുള്ള മനുഷ്യരുടെ പ്രാര്‍ഥനക്ക് അല്ലാഹു പെട്ടെന്നുത്തരം ചെയ്യുന്നത് പോലെ, തിന്മ തേടിക്കൊണ്ടുള്ളതിന് അവന്‍ ധൃതിയില്‍ മറുപടി നല്‍കുകയാണെങ്കില്‍ അവരുടെ അവധി അവസാനിച്ചു പോയിരുന്നേനെ! അതു കൊണ്ട് നാമുമായുള്ള കൂടിക്കാഴ്ച ആഗ്രഹിക്കാത്തവരെ തങ്ങളുടെ ധിക്കാരത്തില്‍ അന്ധമായി വിഹരിക്കുവാന്‍ നാം വിടുകയാണ്⁶
തനിക്ക് കഷ്ടപ്പാടുണ്ടാകുമ്പോള്‍ കിടന്നോ ഇരുന്നോ നിന്നോ മനുഷ്യന്‍ നമ്മോട് പ്രാര്‍ഥിക്കും. വിപത്ത് നാം നീക്കിയാലോ, തന്നെ പിടികൂടിയ ആ ആപത്തിന്റെ കാര്യത്തില്‍ നമ്മോട് പ്രാര്‍ഥിച്ചിട്ടേയില്ലെന്ന ഭാവേന അവന്‍ കടന്നു പോകുന്നു! ഇങ്ങനെ, അതിക്രമകാരികള്‍ക്ക് തങ്ങളുടെ ചെയ്തികള്‍ അലംകൃതമാക്കി കാണിക്കപ്പെടുകയാണ്⁷

നിങ്ങളുടെ മുമ്പുള്ള പല തലമുറകളെയും അതിക്രമം ചെയ്തതിനാല്‍ നാം സംഹരിച്ച് കളയുക തന്നെ ചെയ്തിട്ടുണ്ട്. അവരുടെയടുത്ത് സ്പഷ്ട ദൃഷ്ടാന്തങ്ങളുമായി നമ്മുടെ ദൂതന്‍മാര്‍ ചെന്നെങ്കിലും അവര്‍ വിശ്വസിക്കുകയുണ്ടായില്ല. കുറ്റവാളികളായ ജനങ്ങള്‍ക്ക് അങ്ങനെയാണ് നാം പ്രതിഫലം നല്‍കുക. പിന്നീട് അവരുടെ പിറകെ നിങ്ങളെ നാം ഭൂമിയില്‍ അനന്തരവരാക്കി; നിങ്ങളുടെ ചെയ്തികള്‍ എങ്ങനെയിരിക്കുമെന്നു നിരീക്ഷിക്കാന്‍.

നമ്മുടെ വ്യക്തമായ സൂക്തങ്ങള്‍ ഓതിക്കേള്‍പിക്കപ്പെടുമ്പോള്‍ 'നീ ഇതല്ലാത്ത ഒരു ഖുര്‍ആന്‍ കൊണ്ടുവരികയോ ഇതില്‍ മാറ്റത്തിരുത്തലുകള്‍ വരുത്തുകയോ ചെയ്യുക'എന്ന് നമ്മുടെ കൂടിക്കാഴ്ചയെ പ്രതീക്ഷിക്കാത്തവര്‍ തട്ടിവിടും. നബീ, താങ്കള്‍ പറയുക: സ്വന്തം വകയായി ഇതില്‍ മാറ്റത്തിരുത്തലുകള്‍ വരുത്താന്‍ എനിക്കു പാടില്ല; ബോധനം നല്‍കപ്പെടുന്നത് പിന്തുടരുക മാത്രമാണ് ഞാന്‍. എന്റെ നാഥനു എതിരു ചെയ്യുന്നുവെങ്കില്‍ ഭയാനകമായ ഒരു നാളിലെ ശിക്ഷ ഞാന്‍ ഭയപ്പെടുക തന്നെ ചെയ്യുന്നു⁸
താങ്കള്‍ പ്രഖ്യാപിക്കുക: അല്ലാഹു ഉദ്ദേശിച്ചിരുന്നുവെങ്കില്‍ ഞാന്‍ നിങ്ങള്‍ക്കിത് ഓതിത്തരികയോ അവന്‍ നിങ്ങള്‍ക്കിത് അറിയിച്ച് തരികയോ ചെയ്യുമായിരുന്നില്ല. ഞാന്‍ നിങ്ങള്‍ക്കിടയില്‍ ഇതിന് മുമ്പും കുറെ കാലം വസിച്ചിരുന്നിട്ടുണ്ടല്ലോ? ആലോചിച്ചു നോക്കുന്നില്ലേ നിങ്ങള്‍?⁹

അല്ലാഹുവിന്റെ പേരില്‍ വ്യാജം കെട്ടിച്ചമക്കുകയോ അവന്റെ ദൃഷ്ടാന്തങ്ങള്‍ നിഷേധിക്കുകയോ ചെയ്തവനേക്കാള്‍ വലിയ അക്രമി മറ്റാരുണ്ട്! നിശ്ചയം, കുറ്റവാളികള്‍ വിജയം വരിക്കുന്നതല്ല¹⁰

അവര്‍ അല്ലാഹുവിനെ കൂടാതെ, തങ്ങള്‍ക്ക് എന്തെങ്കിലും ഉപദ്രവമോ ഉപകാരമോ ചെയ്യാനാകാത്ത വസ്തുക്കളെയാണ് ആരാധിക്കുന്നത്; 'ഇക്കൂട്ടര്‍ അല്ലാഹുവിങ്കല്‍ ഞങ്ങള്‍ക്കുള്ള ശുപാര്‍ശകരാണ്' എന്നവര്‍ തട്ടിവിടുകയും ചെയ്യുന്നു. ഭുവന-വാനങ്ങളില്‍ തനിക്കറിയാത്ത കാര്യം അല്ലാഹുവിന് നിങ്ങള്‍ പഠിപ്പിച്ച് കൊടുക്കുകയാണോ എന്നു അങ്ങു ചോദിച്ചു നോക്കുക¹¹
അവര്‍ പങ്കാളികളാക്കുന്നവയില്‍ നിന്നെല്ലാം അവന്‍ എത്ര പരിശുദ്ധനും മഹോന്നതനുമാണ്!

മനുഷ്യര്‍ ഒരേയൊരു സമുദായം മാത്രമായിരുന്നു; പിന്നീടവര്‍ ഭിന്നരായി. താങ്കളുടെ രക്ഷിതാവില്‍ നിന്നുള്ള ഒരു തീരുമാനം നേരത്തേ ഉണ്ടായിട്ടില്ലായിരുന്നുവെങ്കില്‍, അവര്‍ ഭിന്ന പക്ഷക്കാരായ കാര്യങ്ങളില്‍ ഒരു ദ്രുതവിധി അവന്‍ നടപ്പില്‍ വരുത്തിയിരുന്നേനെ¹²

തന്റെ നാഥനില്‍ നിന്നു എന്തുകൊണ്ടാണ് അദ്ദേഹത്തിനൊരു ദൃഷ്ടാന്തം ലഭിക്കാത്തത് എന്നവര്‍ ചോദിക്കുന്നു. പ്രതികരിക്കുക: അദൃശ്യ കാര്യങ്ങള്‍ അല്ലാഹുവിങ്കലുള്ളതാണ്; അതുകൊണ്ട് നിങ്ങള്‍ പ്രതീക്ഷിച്ചിരുന്നുകൊള്ളുക. നിങ്ങളൊന്നിച്ചു ഞാനും കാത്തിരിക്കുക തന്നെയാണ്¹³
ദുരിത ബാധക്കു ശേഷം മനുഷ്യനു വല്ല അനുഗ്രഹവും നാം ആസ്വദിപ്പിക്കുകയാണെങ്കില്‍, അവരതാ നമ്മുടെ ദൃഷ്ടാന്തങ്ങളില്‍ ഗൂഢാലോചന നടത്തുന്നു. നബീ, പ്രഖ്യാപിക്കുക: അല്ലാഹു അതിദ്രുതം തന്ത്രം പ്രയോഗിക്കുന്നവനാകുന്നു. നിശ്ചയം നിങ്ങളുടെ കുതന്ത്ര പ്രയോഗങ്ങള്‍ നമ്മുടെ ദൂതന്‍മാര്‍ ഉല്ലേഖനം ചെയ്യുന്നുണ്ട്¹⁴

കടലിലും കരയിലും അവനാണ് നിങ്ങള്‍ക്ക് സഞ്ചാര സൗകര്യമേകുന്നത്.അങ്ങനെ നിങ്ങള്‍ ജലയാനത്തിലാവുകയും അനുകൂലമായ കാറ്റുമൂലം അതു യാത്രക്കാരുമായി സഞ്ചരിക്കുകയും അതിലവര്‍ സന്തുഷ്ടരായിരിക്കുകയും ചെയ്യുമ്പോഴതാ ജലയാനത്തെ കൊടുങ്കാറ്റു പിടികൂടുന്നു; എല്ലാ വശങ്ങളില്‍ നിന്നും തിരമാലകള്‍ ആഞ്ഞടിക്കുന്നു; വിനാശം തങ്ങളെ വരിഞ്ഞു മുറുക്കി എന്നവര്‍ മനസ്സിലാക്കുന്നു-തത്സമയം അല്ലാഹുവിനെ മാത്രം വണങ്ങി അവനോടവര്‍ പ്രാര്‍ഥിക്കുന്നു: 'ഈ ദുരന്തത്തില്‍ നിന്നു ഞങ്ങളെ നീ രക്ഷപ്പെടുത്തിയാല്‍ കൃതജ്ഞരുടെ ഗണത്തില്‍ ഞങ്ങള്‍ ആയിത്തീരുക തന്നെ ചെയ്യുന്നതാണ്'. എന്നിട്ട് രക്ഷപ്പെടുത്തിയപ്പോള്‍ അവരതാ യാതൊരു ന്യായീകരണവുമില്ലാതെ നാട്ടില്‍ അതിക്രമികളായിത്തീരുന്നു! ഹേ മനുഷ്യരേ, സ്വന്തം കര്‍മ ഫലം നിങ്ങള്‍ക്ക് തന്നെ കിട്ടും. ഇതൊക്കെ കേവലം ഭൗതിക സൗഖ്യം; പിന്നീട് നമ്മുടെ അടുത്തേക്ക് തന്നെയാണ് നിങ്ങളുടെ തിരിച്ചുവരവ്. അപ്പോള്‍ സ്വന്തം പ്രവര്‍ത്തനങ്ങളെ പറ്റി നിങ്ങള്‍ക്ക് അല്ലാഹു പ്രതിപാദിച്ചു തരുന്നതാണ്.¹⁵

ഐഹിക ജീവിതത്തിന്റെ ഉദാഹരണം ഇതാണ്: അന്തരീക്ഷത്തില്‍ നിന്നു നാം മഴ വര്‍ഷിച്ചു. അങ്ങനെ, ആളുകളും കാലികളും ആഹരിക്കാറുള്ള ഭൂസസ്യങ്ങള്‍ തന്‍മൂലം ഇടതൂര്‍ന്നു വളരുകയും ഭൂമി ചമയ വിഭൂഷിതയായി അലംകൃതയാവുകയുമുണ്ടായി. അത് കൊയ്‌തെടുക്കാന്‍ കഴിയുമെന്ന് ഉടമകള്‍ ചിന്തിച്ചു. അപ്പോഴതാ രാത്രിയോ പകലോ അതില്‍ നമ്മുടെ ഉത്തരവ് വന്നെത്തുന്നു-തല്‍ക്ഷണം, ഇന്നലെയവിടെ യാതൊന്നുമില്ലാതിരുന്ന വിധം അത് കൊയ്‌തെടുത്ത പോലെ നാമാക്കി. ഇപ്രകാരം, ചിന്തിക്കുന്നവര്‍ക്ക് വേണ്ടി നമ്മുടെ ദൃഷ്ടാന്തങ്ങള്‍ നാം പ്രതിപാദിക്കുകയാണ്¹⁶

അല്ലാഹു ക്ഷണിക്കുന്നത് ശാന്തിയുടെ സദനത്തിലേക്കാണ്; താനുദ്ദേശിക്കുന്നവരെ അവന്‍ ഋജുവായ പന്ഥാവിലേക്ക് മാര്‍ഗദര്‍ശനം ചെയ്യുന്നു¹⁷

സല്‍കര്‍മാനുഷ്ഠാനികള്‍ക്ക് ഉദാത്ത പ്രതിഫലം ലഭിക്കും; വര്‍ധവുമുണ്ടാകും. അവരുടെ വദനങ്ങളെ ഇരുളോ നിന്ദ്യതയോ പിടികൂടുകയില്ല. സ്വര്‍ഗാവകാശികളാണവര്‍. അതില്‍ ശാശ്വത വാസികളുമായിരിക്കും അവര്‍¹⁸
ദുഷ്‌കര്‍മങ്ങള്‍ അനുവര്‍ത്തിച്ചവരുണ്ടല്ലോ, തിന്മയുടെ പ്രതിഫലം തത്തുല്യമായത് തന്നെയാകും. അവരെ അപമാനം പിടികൂടുന്നതാണ്. അല്ലാഹുവില്‍ നിന്ന് തങ്ങളെ സംരക്ഷിക്കുന്ന യാതൊരാളും അവര്‍ക്കുണ്ടാവില്ല. ഇരുള്‍ മുറ്റിയ നിശയുടെ ചീന്തുകള്‍ കൊണ്ട് അവരുടെ മുഖങ്ങള്‍ ആവരണം ചെയ്തപോലെയുണ്ടാകും. അവര്‍ നരകാവകാശികളും അതില്‍ സ്ഥിരവാസികളുമായിരിക്കും¹⁹

അവരെയെല്ലാം നാം ഒരുമിച്ചു കൂട്ടുന്ന ദിനം സ്മരണീയമത്രേ. എന്നിട്ട്, 'നിങ്ങളും നിങ്ങള്‍ വരിച്ചിരുന്ന ബഹുദൈവങ്ങളും അവിടെ തന്നെ നില്‍ക്കുക' എന്നു നാം കല്‍പിക്കുന്നതാണ്. അങ്ങനെ അവരെ നാം വേര്‍പെടുത്തും. ആ ബഹുദൈവങ്ങള്‍ ഇങ്ങനെ പറയുന്നതാണ്: നിങ്ങള്‍ ഞങ്ങളെ ആരാധിക്കുകയൊന്നും ചെയ്തിരുന്നില്ലല്ലോ. ഞങ്ങള്‍ക്കും നിങ്ങള്‍ക്കുമിടയില്‍ സാക്ഷിയായി അല്ലാഹു തന്നെ മതി. ഞങ്ങളെ നിങ്ങള്‍ ആരാധിച്ചിരുന്നതിനെ കുറിച്ച് യാതൊരറിവുമില്ലാത്തവരായിരുന്നു ഞങ്ങള്‍!²⁰

അവിടെ വെച്ച് ഓരോ വ്യക്തിയും താന്‍ നേരത്തേ അനുവര്‍ത്തിച്ചിരുന്ന പ്രവര്‍ത്തനങ്ങളുടെ ഫലം പരിശോധിച്ചറിയുന്നതായിരിക്കും. തങ്ങളുടെ യഥാര്‍ഥ നാഥനായ അല്ലാഹുവിങ്കലേക്ക് പിന്നീടവര്‍ തിരിച്ചയക്കപ്പെടുന്നതാണ്. തങ്ങള്‍ നിര്‍മിച്ചുണ്ടാക്കിയിരുന്ന വ്യാജങ്ങളത്രയും അവരില്‍ നിന്ന് അപ്രത്യക്ഷമാകും²¹

ചോദിക്കുക: നിങ്ങള്‍ക്ക് ആകാശ ഭൂമികളില്‍ നിന്ന് ആഹാരം തരുന്നത് ആരാണ്? കേള്‍വിയും കാഴ്ചയും ഉടമപ്പെടുത്തുന്നത് ആരാണ്? ജീവനില്ലാത്തവയില്‍ നിന്ന് ജീവനുള്ളവയെയും സജീവ വസ്തുക്കളില്‍ നിന്ന് ജീവനില്ലാത്തവയെയും ബഹിര്‍ഗമിപ്പിക്കുന്നത് ആരാണ്? പ്രാപഞ്ചിക കാര്യങ്ങള്‍ ആരാണ് നിയന്ത്രിച്ച് കൊണ്ടിരിക്കുന്നത്? അല്ലാഹുവാകുന്നു എന്ന് അവര്‍ പ്രതികരിക്കും²²
ചോദിക്കുക: എന്നിട്ടും നിങ്ങള്‍ അവനെ സൂക്ഷിച്ചു ജീവിക്കാത്തതെന്ത്?! അവനാണ് അല്ലാഹു; നിങ്ങളുടെ സത്യസന്ധനായ നാഥന്‍. അപ്പോള്‍, സത്യത്തിന്നു ശേഷം ദുര്‍മാര്‍മല്ലാതെ മറ്റെന്താണുള്ളത്? എന്നിട്ടും എങ്ങോട്ടാണ് നിങ്ങള്‍ വ്യതിചലിപ്പിക്കപ്പെടുന്നത്? ഇങ്ങനെ താങ്കളുടെ നാഥന്റെ ഉത്തരവ് അധര്‍മകാരികളുടെ കാര്യത്തില്‍ സാക്ഷാല്‍കൃതമായിരിക്കുന്നു-അവര്‍ സത്യവിശ്വാസം വരിക്കുകയില്ലെന്ന്!

ചോദിക്കുക: സൃഷ്ടികര്‍മം ആരംഭിക്കുകയും പിന്നെ അതാവര്‍ത്തിക്കുകയും ചെയ്യുന്നവരായി നിങ്ങള്‍ വരിച്ച പങ്കാളികളില്‍ ആരുണ്ട്? പറയുക: സൃഷ്ടികര്‍മം അല്ലാഹു ആരംഭിക്കുകയും പിന്നീട് ആവര്‍ത്തിക്കുകയും ചെയ്യുന്നു. എന്നിട്ടും എങ്ങോട്ടാണ് നിങ്ങള്‍ പിന്തിരിപ്പിക്കപ്പെടുന്നത്! സത്യത്തിലേക്ക് മാര്‍ഗ ദര്‍ശനം ചെയ്യുന്നവരായി നിങ്ങളുടെ പങ്കാളികളില്‍ ആരെങ്കിലുമുണ്ടോ എന്നു ചോദിച്ചുനോക്കൂ. പ്രതികരിക്കുക: സത്യത്തിലേക്ക് മാര്‍ഗ ദര്‍ശനം ചെയ്യുന്നവന്‍ അല്ലാഹുവാകുന്നു. അപ്പോള്‍, സത്യത്തിലേക്ക് മാര്‍ഗ ദര്‍ശനം ചെയ്യുന്നവനോ, അതല്ല, വേറെ ആരെങ്കിലും വഴികാണിച്ചു കൊടുത്താലല്ലാതെ ഒരു വഴി കണ്ടുപിടിക്കാനാകാത്തവനോ ആരാണ് അനുധാവനം ചെയ്യപ്പെടാന്‍ ഏറ്റം അര്‍ഹന്‍?²³
നിങ്ങള്‍ക്കെന്തു പറ്റിപ്പോയി! എങ്ങനെയൊക്കെയാണ് നിങ്ങള്‍ വിധിച്ച് കൊണ്ടിരിക്കുന്നത്! അവരില്‍ മിക്കവരും ഊഹം മാത്രമാണ് പിന്തുടരുന്നത്. ഊഹമാകട്ടെ സത്യം ഗ്രഹിക്കുന്നതിന്ന് ഒട്ടുമേ പ്രയോജനപ്പെടില്ലല്ലോ. അവരുടെ പ്രവര്‍ത്തനങ്ങളെ കുറിച്ച് സൂക്ഷ്മജ്ഞാനിയാണ് അല്ലാഹു.

ഈ ഖുര്‍ആന്‍ അല്ലാഹുവല്ലാത്ത മറ്റാരാലും വ്യാജമായി നിര്‍മിച്ചുണ്ടാക്കപ്പെടാവതല്ല. മറിച്ച്, മുമ്പുള്ള വേദങ്ങളെ ശരിവെക്കുന്നതും പ്രതിപാദിക്കുന്നതുമാണിത്. പ്രപഞ്ച സംരക്ഷകനില്‍ നിന്നുള്ളതാണിതെന്നതില്‍ സന്ദേഹം ഒട്ടുമേയില്ല. ഇനി, മുഹമ്മദ് വ്യാജമായി നിര്‍മിച്ചതാണിതെന്നവര്‍ ജല്‍പിക്കുന്നുണ്ടോ? എങ്കില്‍ പ്രതികരിക്കുക: ഈ ഖുര്‍ആനു തുല്യമായ ഒരധ്യായമെങ്കിലും നിങ്ങള്‍ കൊണ്ടു വരൂ, നിങ്ങള്‍ സത്യവാന്മാരാണെങ്കില്‍; അല്ലാഹുവല്ലാത്ത ആരെയൊക്കെ സഹായത്തിന് വിളിക്കാമോ, അവരെയൊക്കെ വിളിക്കുകയും ചെയ്യുക²⁴

വസ്തുത അതല്ല, തങ്ങള്‍ സമഗ്രമായി അറിഞ്ഞിട്ടില്ലാത്തതും ഇതുവരെയും ഖുര്‍ആനിക തത്ത്വങ്ങളുടെ പൂര്‍ത്തീകരണം തങ്ങളില്‍ പുലര്‍ന്നു കഴിഞ്ഞിട്ടില്ലാത്തതുമായ യാഥാര്‍ഥ്യങ്ങളെയാണവര്‍ നിഷേധിക്കുന്നത്. ഇവരുടെ മുമ്പുള്ള നിഷേധികള്‍ സത്യം തള്ളിക്കളഞ്ഞതും ഇങ്ങനെ തന്നെയായിരുന്നു. ആ അതിക്രമകാരികളുടെ ഭവിഷ്യത്ത് എങ്ങനെയുണ്ടായിരുന്നു എന്ന് താങ്കളൊന്ന് ചിന്തിച്ച് നോക്കുക!²⁵

ഖുര്‍ആന്‍ കൊണ്ട് വിശ്വസിക്കുന്ന ചിലരും അവിശ്വസിക്കുന്ന മറ്റു ചിലരും അവരിലുണ്ട്. നാശകാരികളെ കുറിച്ച് സൂക്ഷ്മജ്ഞാനിയാണ് അല്ലാഹു. ഇനി, താങ്കളെ അവര്‍ നിഷേധിക്കുന്നുവെങ്കില്‍ ഇങ്ങനെ പ്രതികരിക്കുക: എനിക്ക് എന്റെ കര്‍മ ഫലവും നിങ്ങള്‍ക്ക് നിങ്ങളുടെ കര്‍മ ഫലവുമാണുണ്ടാവുക. എന്റെ പ്രവൃത്തികളില്‍ നിന്ന് നിങ്ങളും നിങ്ങളുടെ ചെയ്തികളില്‍ നിന്ന് ഞാനും നിര്‍മുക്തരായിരിക്കുന്നതാണ്²⁶

താങ്കളിലേക്ക് ചെവി കൊടുക്കുന്നവര്‍ അവരിലുണ്ട്. എന്നാല്‍-ഗ്രഹിക്കാന്‍ സന്നദ്ധരല്ലെങ്കിലും-ബധിരരെ കേള്‍പിക്കാന്‍ അങ്ങേക്കാകുമോ? താങ്കളെ സശ്രദ്ധം വീക്ഷിക്കുന്ന ചിലരെയും കാണാം; എന്നാല്‍ കണ്ടു മനസ്സിലാക്കാന്‍ തയ്യാറല്ലെങ്കിലും അന്ധര്‍ക്കു നേര്‍വഴികാട്ടാന്‍ താങ്കള്‍ക്ക് സാധിക്കുമോ? ജനങ്ങളെ അല്ലാഹു ഒട്ടുമേ ദ്രോഹിക്കയില്ല തന്നെ; എന്നാല്‍ മനുഷ്യര്‍ സ്വന്തത്തോട് തന്നെ അക്രമം കാട്ടുകയാണ്²⁷

അല്ലാഹു അവരെ ഒരുമിച്ചു കൂട്ടുന്ന ദിവസം സ്മരണീയമത്രേ. പകലിലെ ഒരു മണിക്കൂര്‍ മാത്രമേ ഭൗതിക ലോകത്ത് നിവസിച്ചിട്ടുള്ളൂ എന്ന പ്രതീതിയാണവരിലുണ്ടാവുക. അവരവിടെ പരസ്പരം തിരിച്ചറിയുന്നതാണ്. അല്ലാഹുവുമായുള്ള കൂടിക്കാഴ്ചയെ നിഷേധിച്ചവര്‍ പരാജിതരായതു തന്നെ, തീര്‍ച്ച. അവര്‍ സന്മാര്‍ഗ പ്രാപ്തരായിരുന്നില്ല²⁸
അവരുടെ വാഗ്ദത്ത ശിക്ഷയില്‍ ചിലത് താങ്കള്‍ക്കു നാം കാണിച്ചു തരികയോ അല്ലെങ്കില്‍ അതിന് മുമ്പ് താങ്കളെ നാം മരിപ്പിക്കുകയോ ചെയ്താലും നമ്മിലേക്കു തന്നെയാണവരുടെ മടക്കം. പിന്നീട് അവരുടെ ചെയ്തികളെ പറ്റി അല്ലാഹു സാക്ഷിയായിരിക്കുന്നതാണ്²⁹
ഓരോ ജനപഥത്തിനും ഓരോ ദൂതനുണ്ട്. സ്വജനതയുമായി ആ ദൂതന്‍ പരലോകത്ത് വന്നു കഴിഞ്ഞാല്‍ അവര്‍ക്കിടയില്‍ നീതി പൂര്‍വം വിധികല്‍പിക്കപ്പെടുന്നതാണ്. അവരോട് അനീതി കാണിക്കപ്പെടില്ല³⁰

'ഈ വാഗ്ദത്ത ശിക്ഷ എപ്പോള്‍ വന്നെത്തും? നിങ്ങള്‍ സത്യസന്ധരാണെങ്കില്‍' എന്ന് അവര്‍ ചോദിക്കുന്നു. പറയുക: സ്വന്തത്തിന് തന്നെ ഉപകാരമോ ഉപദ്രവമോ ഉണ്ടാക്കാന്‍ എനിക്കാവില്ല; അല്ലാഹു ഉദ്ദേശിച്ചതൊഴികെ. എല്ലാ സമൂഹത്തിനും ഒരവധിയുണ്ട്; അതെത്തിക്കഴിഞ്ഞാല്‍ ഒരല്‍പസമയമെങ്കിലും അവര്‍ പിന്നിലാവുകയോ മുന്‍കടക്കുകയോ ചെയ്യില്ല³¹
അവന്റെ ശിക്ഷ രാത്രിയോ പകലോ വന്നെത്തിയാല്‍ അതില്‍ ഏതിനാണു അധര്‍മകാരികള്‍ തിടുക്കം കാട്ടുക? നിങ്ങള്‍ ചിന്തിച്ചിട്ടുണ്ടോ? എന്നിട്ട്, അതു വന്നെത്തിയിട്ടാണോ നിങ്ങളതില്‍ വിശ്വസിക്കുക? 'ഈ ശിക്ഷക്ക് തിടുക്കം കാട്ടിയിട്ട് ഇപ്പോഴാണോ നിങ്ങളതില്‍ വിശ്വസിക്കുന്നത്' എന്നവര്‍ പരിഹസിക്കപ്പെടും³²
പിന്നീട് അക്രമകാരികളോട് ആഹ്വാനമുണ്ടാകും: നിരന്തര ശിക്ഷ ആസ്വദിക്കുക. സ്വന്തം പ്രവര്‍ത്തനങ്ങള്‍ക്കല്ലാതെ നിങ്ങള്‍ക്ക് പ്രതിഫലം നല്‍കപ്പെടുന്നുണ്ടോ?

ഈ പാരത്രിക ശിക്ഷ സത്യമാണോ എന്ന് താങ്കളോടവര്‍ ചോദിക്കുന്നു. പറയുക: അതെ, എന്റെ നാഥന്‍ തന്നെയാണ, ഇതു സത്യം തന്നെ തീര്‍ച്ച. നിങ്ങള്‍ക്കല്ലാഹുവിനെ പരാജയപ്പെടുത്താനാവില്ല തന്നെ.

അക്രമം പ്രവര്‍ത്തിച്ച ഓരോ വ്യക്തിക്കും ഭൂമിയിലുള്ളതത്രയും സ്വന്തമായുണ്ടായാലും അതയാള്‍ പ്രായശ്ചിത്തം നല്‍കും; ശിക്ഷ കാണുമ്പോഴവര്‍ സങ്കടം മറച്ച് വെക്കും. അവര്‍ക്കിടയില്‍ അക്രമം ചെയ്യപ്പെടാതെ നീതി പൂര്‍വം വിധികല്‍പിക്കപ്പെടുന്നതാണ്³³
അറിയുക, ആകാശ-ഭൂമികളിലുള്ളതത്രയും അല്ലാഹുവിനുള്ളതാണ്; ഓര്‍ക്കുക, അല്ലാഹുവിന്റെ വാഗ്ദാനം സത്യമാകുന്നു, പക്ഷേ അവരില്‍ മിക്കവരും അതറിയുന്നില്ല. അവന്‍ ജീവിപ്പിക്കുകയും മരിപ്പിക്കുകയും ചെയ്യുന്നു; അവങ്കലേക്കാണ് നിങ്ങള്‍ മടക്കപ്പെടുക³⁴

ജനങ്ങളേ, രക്ഷിതാവിങ്കല്‍ നിന്നുള്ള സദുപദേശവും മനസ്സുകളിലെ രോഗത്തിന്ന് ശമനവും നിങ്ങള്‍ക്ക് ലഭിച്ചിരിക്കുന്നു; സത്യവിശ്വാസികള്‍ക്കു സന്‍മാര്‍ഗവും ദയാവായ്പും. പറയുക: അല്ലാഹുവിന്റെ ഔദാര്യവും കാരുണ്യവും കൊണ്ടാണത്. അത് കൊണ്ട് അതിലവര്‍ ആഹ്ലാദിച്ചു കൊള്ളട്ടെ. അവര്‍ ശേഖരിച്ചു കൊണ്ടിരിക്കുന്ന ഭൗതികതയെക്കാള്‍ അതത്രേ ഉത്തമം³⁵

ചോദിക്കുക: അല്ലാഹു ഉല്‍പാദിപ്പിച്ചു തരുന്ന ആഹാരത്തെ പറ്റി നിങ്ങള്‍ ചിന്തിച്ചിട്ടുണ്ടോ? എന്നിട്ട് അവയില്‍ ചിലത് നിങ്ങള്‍ നിഷിദ്ധവും മറ്റു ചിലത് അനുവദനീയവുമാക്കി. അല്ലാഹുവാണോ ഇതിന് നിങ്ങള്‍ക്ക് അനുമതി നല്‍കുന്നത്? അതോ അവന്റെ മേല്‍ നിങ്ങള്‍ വ്യാജം ചമക്കുകയാണോ? അല്ലാഹുവിന്റെ പേരില്‍ കള്ളം നിര്‍മിച്ചുണ്ടാക്കുന്നവര്‍ക്ക് അന്ത്യനാളിനെ കുറിച്ച വിചാരമെന്താണ്! അല്ലാഹു മര്‍ത്യ സഞ്ചയത്തോട് ഔദാര്യന്‍ തന്നെയത്രെ. പക്ഷേ അവരില്‍ മിക്കവരും കൃതജ്ഞരാവുന്നില്ല³⁶

താങ്കള്‍ ഏതെങ്കിലും കാര്യത്തിലേര്‍പെടുകയോ അതു സംബന്ധിച്ചു ഖുര്‍ആനില്‍ നിന്ന് വല്ലതും പാരായണം ചെയ്യുകയോ, (ജനങ്ങളേ) നിങ്ങള്‍ ഏതെങ്കിലും ജോലിയില്‍ വ്യാപൃതരാവുകയോ ചെയ്യുന്നുവെങ്കില്‍ നിങ്ങള്‍ക്കു സാക്ഷിയായി നാമുണ്ടാവുക തന്നെ ചെയ്യും. ഭുവന-വാനങ്ങളില്‍ ഒരണുത്തൂക്കമുള്ള വസ്തുവോ അതിനേക്കാള്‍ ചെറുതോ വലുതോ ഏതുമാകട്ടെ, താങ്കളുടെ നാഥനില്‍ നിന്ന് അത് ഗോപ്യമാവുകയില്ല. സര്‍വവും സ്പഷ്ടമായൊരു ഗ്രന്ഥത്തില്‍ രേഖപ്പെട്ടിട്ടുണ്ടാവും³⁷

അറിയുക, സത്യവിശ്വാസം കൈക്കൊള്ളുകയും അതിസൂക്ഷ്മ ജീവിതം നയിക്കുകയും ചെയ്ത അല്ലാഹുവിന്റെ മിത്രങ്ങളുണ്ടല്ലോ അവര്‍ക്ക് യാതൊരു ഭയപ്പാടും ദുഃഖവുമുണ്ടാകുന്നതല്ല; ഭൗതിക ജീവിതത്തിലും പരലോകത്തും അവര്‍ക്ക് ശുഭവാര്‍ത്തയാണുണ്ടാവുക. അല്ലാഹുവിന്റെ വചനങ്ങള്‍ക്ക് ഭേദഗതിയുണ്ടാവില്ല. അതത്രേ മഹാവിജയം. നിഷേധികളുടെ വാക്കുകള്‍ താങ്കളെ ദുഃഖിപ്പിക്കാതിരിക്കട്ടെ. നിശ്ചയം പ്രതാപമത്രയും അല്ലാഹുവിനത്രേ. എല്ലാം കേള്‍ക്കുകയും അറിയുകയും ചെയ്യുന്നവനാണവന്‍³⁸

ശ്രദ്ധിക്കുക, ഭുവന-വാനങ്ങളിലുള്ളവരെല്ലാം അല്ലാഹുവിനുള്ളതാകുന്നു. അവനല്ലാത്ത മറ്റു പങ്കാളികളെ ആരാധിക്കുന്നവര്‍ എന്തിനെയാണ് പിന്തുടരുന്നത്! ഊഹം മാത്രം അനുധാവനം ചെയ്യുകയും നുണ മാത്രം പറയുകയുമാണവര്‍³⁹
വിശ്രമിക്കുവാന്‍ രാത്രിയെയും വെളിച്ചം തരാന്‍ പകലിനെയും നിങ്ങള്‍ക്കു സംവിധാനിച്ചത് അവനാണ്. ശ്രദ്ധിച്ചു കേള്‍ക്കുന്ന ജനങ്ങള്‍ക്ക് വിവിധ ദൃഷ്ടാന്തങ്ങള്‍ ഇതിലുണ്ട്.

അല്ലാഹുവിന് സന്താനമുണ്ടെന്ന് അവര്‍ ജല്‍പിക്കുന്നു. എത്ര പരിശുദ്ധനാണവന്‍! അവന്‍ നിരാശ്രയനത്രേ. ആകാശ ഭൂമികളിലുള്ളവയത്രയും അവനുള്ളതാണ്. ഈ ജല്‍പനത്തിനു നിങ്ങളുടെ പക്കല്‍ പ്രമാണങ്ങളൊന്നുമില്ല തന്നെ. വിവരമില്ലാത്തത് നിങ്ങള്‍ അല്ലാഹുവിന്റെ പേരില്‍ പറയുകയോ? അല്ലാഹുവിന്റെ മേല്‍ വ്യാജം കെട്ടിച്ചമക്കുന്നവര്‍ വിജയം വരിക്കുകയില്ലതന്നെ എന്നു താങ്കള്‍ പ്രഖ്യാപിക്കുക. അവരുടേത് ഐഹിക സുഖാനുഭവം മാത്രം! ശേഷം നമ്മിലേക്കാണവരുടെ മടക്കം. പിന്നീട് തങ്ങളുടെ നിഷേധം കാരണമായി അവര്‍ക്ക് കഠിന ശിക്ഷ നാം ആസ്വദിപ്പിക്കുന്നതാണ്⁴⁰

നൂഹ് നബിയുടെ വൃത്താന്തം താങ്കളവര്‍ക്ക് ഓതിക്കൊടുക്കുക. സ്വജനതയോടദ്ദേഹം പ്രസ്താവിച്ച സന്ദര്‍ഭം: സമുദായമേ, എന്റെ നിലപാടും ദിവ്യദൃഷ്ടാന്തങ്ങളോടെയുള്ള ഉദ്‌ബോധനവും അസഹനീയമായി നിങ്ങള്‍ക്ക് തോന്നുന്നുവെങ്കില്‍ ഞാനിതാ, അല്ലാഹുവിന്റെ മേല്‍ ഭരമേല്‍പിക്കുന്നു. അതുകൊണ്ട്, നിങ്ങളും പങ്കാളികളും ചേര്‍ന്ന് ഒരു പദ്ധതി ചിന്തിച്ചുറപ്പിക്കുക, പിന്നീട് യാതൊരവ്യക്തതയും നിങ്ങള്‍ക്കുണ്ടാവരുത്. എന്നിട്ട് എനിക്കെതിരെ അത് നടപ്പാക്കുക, ഒട്ടും ഇടതരേണ്ടതില്ല⁴¹
ഇനിയും പിന്തിരിഞ്ഞ് പോകയാണു നിങ്ങളെങ്കില്‍ ഓര്‍ക്കുക: ഒരു പ്രതിഫലവും നിങ്ങളോട് ഞാനാവശ്യപ്പെട്ടിട്ടില്ലല്ലോ. അല്ലാഹുവിങ്കല്‍ മാത്രമാണ് എന്റെ കൂലി. മുസ്‌ലിംകളിലുള്‍പെടണമെന്നാണ് ഞാന്‍ അനുശാസിക്കപ്പെട്ടിരിക്കുന്നത്.

എന്നിട്ട്, അവര്‍ അദ്ദേഹത്തെ വ്യാജനാക്കി. അപ്പോള്‍ തന്നെയും കൂടെയുള്ളവരെയും നാം കപ്പലില്‍ സുരക്ഷിതരാക്കുകയും ഭൂമിയില്‍ പിന്‍ഗാമികളാക്കുകയുമുണ്ടായി. നമ്മുടെ ദൃഷ്ടാന്തങ്ങള്‍ നിഷേധിച്ചവരെ നാം മുക്കിക്കൊന്നു. അപ്പോള്‍, താക്കീത് നല്‍കപ്പെട്ടിരുന്നവരുടെ പരിണതി എങ്ങനെയുണ്ടായിരുന്നുവെന്നു ചിന്തിച്ചു നോക്കൂ!⁴²
പിന്നീട്, തനിക്കു ശേഷം പല ദൂതന്‍മാരെയും സ്വസമുദായങ്ങളിലേക്കു നാമയച്ചു. ദൃഷ്ടാന്തങ്ങളുമായി അവര്‍ ജനങ്ങളുടെ അടുത്തെത്തി. അങ്ങനെ, മുമ്പ് എന്തു കാര്യങ്ങള്‍ നിഷേധിച്ചിരുന്നുവോ അതില്‍ വിശ്വസിക്കാന്‍ അവര്‍ സന്നദ്ധരായില്ല. അതിക്രമം കാട്ടുന്നവരുടെ ഹൃദയങ്ങളില്‍ ഇങ്ങനെ നാം മുദ്രയടിക്കും.⁴³

അവര്‍ക്കു പിറകെ നമ്മുടെ ദൃഷ്ടാന്തങ്ങളുമായി മൂസാനബിയെയും ഹാറൂന്‍ നബിയെയും നാം അയച്ചു-ഫറോവയുടെയും അവന്റെ വിശിഷ്ടരുടെയും അടുത്തേക്ക്. എന്നാല്‍ അഹങ്കാരം കാട്ടുകയാണവര്‍ ചെയ്തത്. അധര്‍മകാരികളായ ഒരു വിഭാഗമായിരുന്നു അവര്‍. നമ്മുടെ അടുത്തുനിന്നുള്ള സത്യം വന്നു കിട്ടിയപ്പോള്‍ 'ഇതു വ്യക്തമായ ആഭിചാരം തന്നെയാകുന്നു' എന്നവര്‍ തട്ടിവിട്ടു. മൂസാ നബി പ്രതികരിച്ചു: സത്യം വന്നെത്തിയപ്പോള്‍ ഇങ്ങനെയാണോ നിങ്ങള്‍ പറയുന്നത്? ഇത് ആഭിചാരമാണോ? ആഭിചാരകന്‍മാര്‍ വിജയപ്രാപ്തരാകുന്നതല്ല.⁴⁴
അവര്‍ ചോദിച്ചു: പൂര്‍വ പിതാക്കളെ കണ്ടെത്തിയ മാര്‍ഗത്തില്‍ നിന്ന് ഞങ്ങളെ വ്യതിചലിപ്പിച്ച് കളയാനും രാജ്യത്തെ ആധിപത്യം നിങ്ങളിരുവര്‍ക്കുമാകാനുമാണോ നിങ്ങള്‍ വന്നിരിക്കുന്നത്? നിങ്ങളിരുവരെയും ഞങ്ങള്‍ വിശ്വസിക്കുകയേ ചെയ്യില്ല.⁴⁵

ഫറോവ ഉത്തരവിട്ടു: മികച്ച പരിജ്ഞാനമുള്ള എല്ലാ ആഭിചാരകന്‍മാരെയും എന്റെയടുത്ത് ഹാജറാക്കുക. അങ്ങനെ അവരെത്തിയപ്പോള്‍ 'നിങ്ങളുടെ പക്കലുള്ളതൊക്കെ ഇട്ടുകൊള്ളുക'⁴⁶
എന്നു മൂസാനബി ആവശ്യപ്പെട്ടു.

അങ്ങനെ അവര്‍ വടികളിട്ടള്‍ (അവ പാമ്പുകളായി. തത്‌സമയം) മൂസാനബി പറഞ്ഞു: നിങ്ങള്‍ ഈ അവതരിപ്പിക്കുന്നത് ആഭിചാരമാണ്. അല്ലാഹു ഇത് ശിഥിലമാക്കുക തന്നെ ചെയ്യും. നാശകാരികളുടെ ചെയ്തികളെയവന്‍ ഉദാത്തമാക്കിത്തീര്‍ക്കുന്നതേയല്ല. അധര്‍മകാരികള്‍ അനിഷ്ടപ്പെട്ടാലും, തന്റെ വചനങ്ങളിലൂടെ സത്യം അവന്‍ സാക്ഷാല്‍കരിക്കുക തന്നെ ചെയ്യും.

എന്നാല്‍ തന്റെ ജനതയില്‍ നിന്ന് ഏതാനും പേരൊഴികെ മറ്റാരും മൂസാനബിയെ വിശ്വസിച്ചില്ല; അതു തന്നെ ഫറോവയുടെയും സംഘത്തിന്റെയും പീഡന വിഹ്വലതയോടെ മാത്രം. നിശ്ചയം, ഫറോവ നാട്ടില്‍ ഔന്നത്യം നടിക്കുന്നവനും പരിധിവിട്ടു പ്രവര്‍ത്തിക്കുന്നവരില്‍ പെട്ടവനുമാണ്. മൂസാനബി പറഞ്ഞു: എന്റെ ജനമേ, അല്ലാഹുവില്‍ വിശ്വസിച്ചിട്ടുണ്ടെങ്കില്‍ നിങ്ങള്‍ അവനില്‍ കാര്യങ്ങള്‍ ഭരമേല്‍പിക്കുക, നിങ്ങളവനു വിധേയരായിട്ടുണ്ടെങ്കില്‍! അവര്‍ പ്രതികരിച്ചു: ഞങ്ങള്‍ അല്ലാഹുവില്‍ ഭരമേല്‍പിച്ചിരിക്കുന്നു; 'നാഥാ, അക്രമികളായ ഈ ജനതയുടെ മര്‍ദന-പീഡനങ്ങള്‍ക്ക് ഞങ്ങളെ നീ പാത്രീഭൂതരാക്കരുതേ, നിന്റെ കാരുണ്യം കൊണ്ട് നിഷേധികളായ ഈ ജനത്തില്‍ നിന്ന് ഞങ്ങളെ രക്ഷപ്പെടുത്തേണമേ'!⁴⁷

മൂസാനബിക്കും സഹോദരനും നാം ദിവ്യ സന്ദേശം നല്‍കി: നിങ്ങളിരുവരും സ്വസമുദായത്തിനു വേണ്ടി ഈജിപ്തില്‍ വീടുകള്‍ നിര്‍മിക്കുകയും അവ ആരാധനാഗേഹങ്ങളാക്കുകയും നമസ്‌കാരം നിലനിര്‍ത്തുകയും ചെയ്യുക. സത്യവിശ്വാസികള്‍ക്കു താങ്കള്‍ ശുഭവാര്‍ത്ത അറിയിക്കുക. മൂസാനബി പ്രാര്‍ഥിച്ചു: ഞങ്ങളുടെ നാഥാ, ഫിര്‍ഔന്നും അവന്റെ വരിഷ്ടര്‍ക്കും ഭൗതിക ജീവിതാര്‍ഭാടങ്ങളും സമ്പത്തും നീ നല്‍കിയിട്ടുണ്ടല്ലോ; നാഥാ, അതുവഴി ജനങ്ങളെ നിന്റെ പന്ഥാവില്‍ നിന്ന് വ്യതിചലിപ്പിക്കാനാണ്(അവരുടെ ശ്രമം). ഞങ്ങളുടെ രക്ഷിതാവേ, അവരുടെ സമ്പത്തുകള്‍ നീ ഉന്‍മൂലനം ചെയ്യുകയും ഹൃദയങ്ങള്‍ കഠിനതരമാക്കുകയും ചെയ്യേണമേ. അങ്ങനെ വേദനയുറ്റ ശിക്ഷ കാണുന്നതുവരെ അവര്‍ വിശ്വസിക്കാതിരിക്കട്ടെ⁴⁸

അല്ലാഹു പ്രതികരിച്ചു: നിങ്ങളിരുവരുടെയും ദുആ സ്വീകരിക്കപ്പെടുക തന്നെ ചെയ്തിരിക്കുന്നു; അതുകൊണ്ട് ഋജുവായി നിലകൊള്ളുക, അജ്ഞരുടെ പന്ഥാവ് ഒട്ടുമേ പിന്തുടരരുത്. ഇസ്രയേല്യരെ നാം ചെങ്കടല്‍ കടത്തിക്കൊണ്ട് പോയി⁴⁹
അപ്പോള്‍ ഫിര്‍ഔനും സൈന്യവും ധിക്കാരവും അതിക്രമവുമായി അവരുടെ പിന്നാലെക്കൂടി. അങ്ങനെ, മുങ്ങിച്ചാകുമെന്നായപ്പോള്‍ 'ഇസ്രയേല്യര്‍ ഏതൊരു ദൈവത്തില്‍ വിശ്വാസമര്‍പ്പിച്ചിരിക്കുന്നുവോ അവനല്ലാതെ മറ്റൊരു ദൈവവുമില്ലെന്ന് ഞാനിതാ വിശ്വസിച്ചിരിക്കുന്നു' എന്ന് അവന്‍ ഉദ്‌ഘോഷിക്കുകയുണ്ടായി. അല്ലാഹു ചോദിച്ചു: ഇപ്പോഴാണോ നീ വിശ്വസിക്കുന്നത്? ഇക്കാലമത്രയും ധിക്കരിക്കുകയും വിനാശകാരികളുടെ ഗണത്തിലാവുകയുമാണല്ലോ നീ ചെയ്തത്! അത്‌കൊണ്ട് പിന്‍ഗാമികള്‍ക്ക് ദൃഷ്ടാന്തമായിരിക്കേണ്ടതിന്നു ഈ ലോകത്ത് നിന്റെ ജഡം നാം സുരക്ഷിതമാക്കും! നിശ്ചയം, മനുഷ്യരില്‍ ഒട്ടേറെ പേര്‍ നമ്മുടെ ദൃഷ്ടാന്തങ്ങളെപ്പറ്റി ചിന്താശൂന്യര്‍ തന്നെയത്രേ⁵⁰

നിശ്ചയം ഇസ്രയേല്യരെ നാം ഉദാത്തമായ സങ്കേതത്തില്‍ നിവസിപ്പിക്കുകയും ഉത്തമ വസ്തുക്കളില്‍ നിന്ന് അവര്‍ക്ക് ആഹാരം നല്‍കുകയും ചെയ്യുകയുണ്ടായി. എന്നിട്ട് വിജ്ഞാനം കൈവന്നതിന് പിറകെത്തന്നെയാണവര്‍ ഭിന്ന പക്ഷമായത്. തങ്ങള്‍ വ്യത്യസ്താഭിപ്രായക്കാരായിരുന്ന വിഷയങ്ങളില്‍ അവര്‍ക്കിടയില്‍ അന്ത്യനാളില്‍ താങ്കളുടെ നാഥന്‍ വിധി കല്‍പിക്കുക തന്നെ ചെയ്യുന്നതാണ്⁵¹

ഇനി, നാമിറക്കിയ ഖുര്‍ആനില്‍ വല്ല സംശയവുമുണ്ടെങ്കില്‍ താങ്കള്‍ക്ക് മുമ്പ് വേദം പാരായണം നടത്തിയിരുന്നവരോട് ചോദിച്ചുനോക്കുക. നാഥന്റെ പക്കല്‍ നിന്നുള്ള സത്യം തന്നെയാണങ്ങേക്കു ലഭിച്ചിരിക്കുന്നത്; അതു കൊണ്ട് സന്ദേഹികളില്‍ അകപ്പെട്ട് പോകരുത്. ദൈവിക ദൃഷ്ടാന്തങ്ങള്‍ വ്യാജമാക്കിയവരിലും താങ്കളായിക്കൂടാ; അപ്പോള്‍ അങ്ങ് പരാജിതരില്‍ ഉള്‍പെടുന്നതാണ്. താങ്കളുടെ നാഥന്റെ വചനം ആരുടെ മേല്‍ കടപ്പെട്ടിരിക്കുന്നുവോ, സര്‍വ തെളിവുകളും വന്നുകിട്ടിയാലും വേദനയുറ്റ ശിക്ഷ കണ്ടുമുട്ടും വരെ അവര്‍ വിശ്വാസം വരിക്കുകയേ ഇല്ല⁵²

എന്നാല്‍ ഒരു നാട്ടുകാരും സത്യവിശ്വാസം വരിക്കുകയും അങ്ങനെ തങ്ങളുടെ വിശ്വാസം അവര്‍ക്ക് ഉപകാരപ്രദമാവുകയും ചെയ്യാത്തതെന്ത് കൊണ്ടാണ്-യൂനുസ് നബിയുടെ സമുദായത്തിനൊഴികെ? (ശിക്ഷ വരുമെന്ന് കണ്ട്) വിശ്വാസം സ്വീകരിച്ചപ്പോള്‍ നാം ഇഹലോകത്തെ ഹീന ശിക്ഷ അവരില്‍ നിന്ന് ഒഴിവാക്കിക്കൊടുക്കുകയും ഒരവധിവരെ അവര്‍ക്ക് സുഖവിഭവങ്ങള്‍ നല്‍കുകയും ചെയ്തു⁵³

താങ്കളുടെ നാഥന്‍ ഉദ്ദേശിച്ചിരുന്നുവെങ്കില്‍ ഭൂതലത്തിലുള്ളവരത്രയും സത്യവിശ്വാസം കൈകൊള്ളുമായിരുന്നു. എന്നിട്ടും വിശ്വസിക്കുവാനായി ആളുകളെ താങ്കള്‍ നിര്‍ബന്ധിക്കുകയാണോ? അല്ലാഹുവിന്റെ ഉദ്ദേശ്യമില്ലാതെ സത്യവിശ്വാസിയാവാന്‍ ഒരു വ്യക്തിക്കുമാവുകയില്ല. ചിന്തിച്ചു ഗ്രഹിക്കാനാകാത്തവരില്‍ നിഷേധത്തിന്റെ മാലിന്യം അവന്‍ നിക്ഷേപിക്കുന്നതാണ്⁵⁴

പ്രഖ്യാപിക്കുക: ഭുവന-വാനങ്ങളില്‍ എന്തൊക്കെ ദൃഷ്ടാന്തങ്ങളാണുള്ളതെന്നു നിങ്ങള്‍ ചിന്തിച്ച് നോക്കുക. എന്നാല്‍ വിശ്വസിക്കാത്ത ജനപഥങ്ങള്‍ക്ക് ദൃഷ്ടാന്തങ്ങളും മുന്നറിയിപ്പുകളും എന്തു നേട്ടമുണ്ടാക്കാനാണ്! അപ്പോള്‍, തങ്ങളുടെ പൂര്‍വഗാമികളുടെ തിക്താനുഭവങ്ങള്‍ക്കു സമാനമല്ലാത്ത മറ്റു വല്ല ശിക്ഷകളും ഇവര്‍ പ്രതീക്ഷിക്കുന്നുണ്ടോ! 'എങ്കില്‍, നിങ്ങള്‍ കാത്തിരുന്നുകൊള്ളുക, ഞാനും നിങ്ങളൊന്നിച്ച് പ്രതീക്ഷിച്ചിരിക്കുയാണ്' എന്നു താങ്കള്‍ വിളംബരം ചെയ്യുക⁵⁵
ശേഷം, നമ്മുടെ ദൂതന്‍മാരെയും വിശ്വാസികളെയും നാം രക്ഷപ്പെടുത്തും. ഇങ്ങനെ സ്വബാധ്യത എന്ന നിലക്ക്, സത്യവിശ്വാസം കൈവരിച്ചവരെ നാം ശിക്ഷാമുക്തരാക്കുന്നതാണ്⁵⁶

പ്രഖ്യാപിക്കുക: ഹേ ജനങ്ങളേ, എന്റെ മതത്തെ പറ്റി നിങ്ങള്‍ സംശയാലുക്കളാണെങ്കില്‍ (ഞാന്‍ മുറുകെ പിടിക്കുന്ന നിലപാട് ഇതത്രേ:) അല്ലാഹുവിനു പുറമെ നിങ്ങളാരാധിക്കുന്നവയെ ഞാന്‍ ആരാധിക്കുന്നില്ല; നിങ്ങളെ മരിപ്പിക്കുന്ന അല്ലാഹുവിനെയാണ് ഞാനാരാധിക്കുന്നത്. സത്യവിശ്വാസികളിലുള്‍പെടണമെന്നും ഋജുമാനസനായി മതത്തിലേക്ക് മുഖം തിരിക്കണമെന്നും ബഹുദൈവ വിശ്വാസികളിലാകരുതെന്നും ഞാനനുശാസിക്കപ്പെട്ടിട്ടുമുണ്ട്⁵⁷

അല്ലാഹുവിനെ വിട്ട് താങ്കള്‍ക്ക് ഉപകാരമോ ഉപദ്രമോ ചെയ്യാത്തവയെ ആരാധിക്കരുത്. അങ്ങനെ ചെയ്താല്‍ താങ്കള്‍ അക്രമികളിലുള്‍പെടുന്നതാണ്. അല്ലാഹു താങ്കള്‍ക്ക് വല്ല വിപത്തും വരുത്തുകയാണെങ്കില്‍ അതു നീക്കിക്കളയാന്‍ അവനൊഴികെ മറ്റാരും ഇല്ലതന്നെ. ഇനി താങ്കള്‍ക്കൊരു നന്മയാണവനുദ്ദേശിക്കുന്നതെങ്കില്‍ ആ ഔദാര്യം തട്ടിമാറ്റാനും ഒരാളുമില്ല. അടിമകളില്‍ താനുദ്ദേശിക്കുന്നവര്‍ക്കു അവനതു നല്‍കുന്നു. ഏറെ പൊറുക്കുന്നവനും കരുണാമയനുമത്രേ അവന്‍⁵⁸

നബിയേ, പ്രഖ്യാപിക്കുക: ഹേ ജനങ്ങളേ, നിങ്ങള്‍ക്കു രക്ഷിതാവിങ്കല്‍ നിന്നുള്ള സത്യം ഇതാ വന്നെത്തിയിരിക്കുന്നു⁵⁹
അതുകൊണ്ട്, ആരെങ്കിലും സന്മാര്‍ഗ പ്രാപ്തനാവുന്നുവെങ്കില്‍ അത് അവനുവേണ്ടി തന്നെയാണ്. ആരൊരാള്‍ ദുര്‍മാര്‍ഗിയാകുന്നുവോ ആ മാര്‍ഗഭ്രംശം അവനുമാത്രമാണ് പ്രതികൂലമായി ഭവിക്കുക. നിങ്ങളുടെ മേല്‍ ഭരമേല്‍പിക്കപ്പെട്ടവനല്ല ഞാന്‍. താങ്കള്‍ക്കു നല്‍കപ്പെടുന്ന ദിവ്യബോധനങ്ങള്‍ അനുധാവനം ചെയ്യുക. അല്ലാഹു ഒരു ഖണ്ഡിത തീരുമാനമുണ്ടാക്കുന്നത് വരെ ക്ഷമ കൈക്കൊള്ളുക. വിധികല്‍പിക്കുന്നവരില്‍ ഏറ്റം ഉത്തമനത്രേ അവന്‍⁶⁰