28–31
അദ്ദേഹം പ്രതികരിച്ചു: എന്റെ ജനമേ, പറയൂ, ഞാന്‍ എന്റെ നാഥങ്കല്‍ നിന്നുള്ള പ്രമാണത്തിന്‍മേലായിരിക്കുകയും അവങ്കല്‍ നിന്നുള്ള അനുഗ്രഹം എനിക്കു നല്‍കിയിരിക്കുകയും എന്നിട്ടു നിങ്ങള്‍ക്ക്(അതു ഗ്രഹിക്കാനാകാത്ത) അന്ധത ബാധിക്കുകയുമാണ് ചെയ്തിട്ടുള്ളതെങ്കില്‍(ഞാനെന്തു പിഴച്ചു!) നിങ്ങള്‍ അനിഷ്ടപ്പെടുന്നവരായിരിക്കെ നാമത് അടിച്ചേല്‍പിക്കുകയോ?12
എന്റെ ജനമേ, ഈ സന്മാര്‍ഗദര്‍ശനത്തിനു പകരം നിങ്ങളോടു ഞാന്‍ സമ്പത്ത് ആവശ്യപ്പെടുന്നില്ല. എന്റെ പ്രതിഫലം അല്ലാഹുവിങ്കലാകുന്നു. സത്യവിശ്വാസം പുല്‍കിയവരെ ഞാന്‍ ആട്ടിക്കളയുകയേ ചെയ്യില്ല. നിശ്ചയം, തങ്ങളുടെ നാഥനെ കണ്ടുമുട്ടുന്നവരാണവര്‍. പക്ഷേ, വിവരശൂന്യരായ ഒരു വിഭാഗമായാണ് നിങ്ങളെ ഞാന്‍ കാണുന്നത്. ഹേ കൂട്ടരേ, ഞാനവരെ ദൂരീകരിക്കുന്ന പക്ഷം ദൈവശിക്ഷ തടുത്ത് എന്നെ സഹായിക്കാനാരുണ്ട്; ചിന്തിക്കുന്നില്ലേ നിങ്ങള്‍?13
ദൈവിക ഖജനാവുകള്‍ എന്റെ വശമുണ്ടെന്ന അവകാശവാദവും ഞാനുന്നയിക്കുന്നില്ല. അദൃശ്യ കാര്യങ്ങള്‍ എനിക്കറിഞ്ഞുകൂടാ14
ഞാനൊരു മലക്കാണെന്ന വാദവും എനിക്കില്ല. നിങ്ങളുടെ കണ്ണുകള്‍ നിസ്സാരരായി കാണുന്നവരെക്കുറിച്ച് 'അല്ലാഹു ഒരു നന്മയും അവര്‍ക്ക് നല്‍കുകയേ ചെയ്യില്ല' എന്ന വിധികല്‍പിക്കാനും ഞാന്‍ സന്നദ്ധനല്ല- അവരുടെ അന്തരംഗങ്ങളിലുള്ളവയെപ്പറ്റി ഏറ്റമറിയുന്നവന്‍ അല്ലാഹുവത്രേ- അങ്ങനെ പറഞ്ഞാല്‍ ഞാന്‍ അക്രമികളിലുള്‍പ്പെട്ടുപോവുകതന്നെ ചെയ്യുന്നതാണ്.
3 വിശദീകരണങ്ങൾ കാണുക
12. സ്വന്തംജനതയുന്നയിച്ച വിമര്‍ശനങ്ങള്‍ക്കും ന്യൂനതകള്‍ക്കും ചിന്തോദ്ദീപകമായ മറുപടി നല്‍കുകയാണ് നൂഹ്‌നബി(അ): ഞാന്‍ അല്ലാഹുവിന്റെ ദൂതനാണ്. അവന്റെ കരുണാകടാക്ഷം തനിക്കുണ്ട്. താന്‍ സമര്‍പ്പിക്കുന്ന സിദ്ധാന്തങ്ങള്‍ക്കും അധ്യാപനങ്ങള്‍ക്കും യുക്തിഭദ്രവും അനിഷേധ്യവുമായ തെളിവുകളുണ്ട് താനും. അവയൊന്നും കാണാനും ചിന്തിക്കാനും ഗ്രഹിക്കാനുമുള്ള ബുദ്ധിയില്ലാതെ, അന്ധത ബാധിച്ചവരാണ് നിങ്ങളെങ്കില്‍ എനിക്കെന്തു ചെയ്യാനാകും? സന്മാര്ഗ പ്രവേശനത്തിനു നിങ്ങള്‍ക്കു സ്വയം താല്‍പര്യമില്ലെങ്കില്‍ പിന്നെ നിര്‍ബന്ധിക്കാന്‍ ഞാനാളല്ല.
13. മുരത്ത ദുരാഭിജാത്യം വെച്ചുപുലര്‍ത്തുന്ന നിഷേധികള്‍ എല്ലാ കാലങ്ങളിലും പറഞ്ഞുവന്നിരുന്നതാണിത്-പാവങ്ങളെ മാറ്റിനിറുത്തണം, എങ്കില്‍ ഞങ്ങള്‍ നബിസന്നിധിയില്‍ വരികയും വിശ്വസിക്കുകയും ചെയ്യാമെന്ന്. നബി(സ്വ)യോട് ഖുറൈശും ഇങ്ങനെ ആവശ്യപ്പെട്ടിരുന്നു. (അല്‍കഹ്ഫ് 28 കാണുക.) ഇത് അസ്വീകാര്യമാണെന്നാണ് നൂഹ് നബി(അ) വ്യക്തമാക്കുന്നത്.
14. എന്നാല്‍ പല അദൃശ്യകാര്യങ്ങളും പലപ്പോഴും വിവിധ പ്രവാചകന്‍മാര്‍ക്ക് അല്ലാഹു അറിയിച്ചുകൊടുത്തിരുന്നു. (ഉദാഹരണത്തിന് യൂസുഫ് 86,96 നോക്കുക.) അദൃശ്യകാര്യങ്ങള്‍ എനിക്കറിഞ്ഞുകൂടാ എന്ന് ഇവിടെ പറയുന്ന നൂഹ് നബി(അ) തന്നെ മറ്റൊരിടത്ത് 'നിങ്ങളറിയാത്തത് അല്ലാഹുവിങ്കല്‍ നിന്ന് ഞാനറിയുന്നുണ്ട്' എന്നു പ്രസ്താവിച്ചതായി കാണാം.(അഅ്‌റാഫ്: 62). ബദ്‌റ് യുദ്ധത്തിന് ശേഷം സ്വഫ്‌വാനുബ്‌നു ഉമയ്യയും ഉമൈറുബ്‌നു വഹബും ചേര്‍ന്ന് നബി(സ്വ)യെ കൊല്ലാന്‍ അതീവ രഹസ്യമായി പദ്ധതി ആവിഷ്‌കരിച്ചിരുന്നു. ഈ ദൗത്യവുമായി മദീനയിലെത്തിയ ഉമൈറിനോട് അവരിരുവരും ആവിഷ്‌കരിച്ച ഗൂഢപദ്ധതിയത്രയും ഒന്നൊഴിയാതെ തിരുമേനി(സ്വ) വിവരിച്ചുകൊടുക്കുകയുണ്ടായി. ബദ്ധവൈരിയായിരുന്ന ഉമൈറിന്റെ ഇസ്‌ലാമാശ്ലേഷത്തിലാണതു കലാശിച്ചത്. (സീറത്തുല്‍ ഹലബിയ്യ: 196, സീറത്തുന്നബവി:1:413 നോക്കുക). ഇങ്ങനെ എത്രയെത്ര സംഭവങ്ങള്‍.
قَالَ يَٰقَوۡمِ أَرَءَيۡتُمۡ إِن كُنتُ عَلَىٰ بَيِّنَةٖ مِّن رَّبِّي وَءَاتَىٰنِي رَحۡمَةٗ مِّنۡ عِندِهِۦ فَعُمِّيَتۡ عَلَيۡكُمۡ أَنُلۡزِمُكُمُوهَا وَأَنتُمۡ لَهَا كَٰرِهُونَ ٢٨
وَيَٰقَوۡمِ لَآ أَسۡـَٔلُكُمۡ عَلَيۡهِ مَالًاۖ إِنۡ أَجۡرِيَ إِلَّا عَلَى ٱللَّهِۚ وَمَآ أَنَا۠ بِطَارِدِ ٱلَّذِينَ ءَامَنُوٓاْۚ إِنَّهُم مُّلَٰقُواْ رَبِّهِمۡ وَلَٰكِنِّيٓ أَرَىٰكُمۡ قَوۡمٗا تَجۡهَلُونَ ٢٩
وَيَٰقَوۡمِ مَن يَنصُرُنِي مِنَ ٱللَّهِ إِن طَرَدتُّهُمۡۚ أَفَلَا تَذَكَّرُونَ ٣٠
وَلَآ أَقُولُ لَكُمۡ عِندِي خَزَآئِنُ ٱللَّهِ وَلَآ أَعۡلَمُ ٱلۡغَيۡبَ وَلَآ أَقُولُ إِنِّي مَلَكٞ وَلَآ أَقُولُ لِلَّذِينَ تَزۡدَرِيٓ أَعۡيُنُكُمۡ لَن يُؤۡتِيَهُمُ ٱللَّهُ خَيۡرًاۖ ٱللَّهُ أَعۡلَمُ بِمَا فِيٓ أَنفُسِهِمۡ إِنِّيٓ إِذٗا لَّمِنَ ٱلظَّٰلِمِينَ ٣١
