യൂസുഫ് - يوسف - Yusuf

അലിഫ് ലാം റാ. വ്യക്തമായ ദിവ്യഗ്രന്ഥത്തിലെ സൂക്തങ്ങളാണിവ. നിങ്ങള്‍ മനസ്സിലാക്കാന്‍ വേണ്ടി അറബി ഭാഷയില്‍ പാരായണം ചെയ്യപ്പെടുന്നതായി നാമത് അവതരിപ്പിച്ചിരിക്കുകയാണ്. അങ്ങേക്ക് ഈ ഖുര്‍ആന്‍ ദിവ്യബോധനം നല്‍കുകവഴി അത്യുദാത്ത കഥാകഥനമാണ് നാം നിര്‍വഹിക്കുന്നത്. ഇതിനുമുമ്പ് അതു സംബന്ധിച്ച് താങ്കള്‍ അനഭിജ്ഞന്‍ തന്നെയായിരുന്നു¹

യൂസുഫ്‌നബി തന്റെ പിതാവ് യഅ്ഖൂബ് നബിയോട് പറഞ്ഞ സന്ദര്‍ഭം സ്മരണീയമത്രേ: എന്റെ പിതാവേ, പതിനൊന്നു നക്ഷത്രങ്ങളും സൂര്യനും ചന്ദ്രനും എനിക്കു സാഷ്ടാംഗം നമിക്കുന്നതായി ഞാന്‍ കിനാവു കാണുകയുണ്ടായി! ബാപ്പ പ്രതികരിച്ചു: എന്റെ കുഞ്ഞു മകനേ, സഹോദരന്‍മാരോട് നിന്റെ ഈ സ്വപ്നവൃത്താന്തം പറയരുതേ; അവര്‍ നിനക്കെതിരെ എന്തെങ്കിലും കുതന്ത്രം പ്രയോഗിക്കും. പിശാച് മനുഷ്യന്റെ പ്രത്യക്ഷ ശത്രു തന്നെയത്രേ²

സ്വപ്നം കണ്ടത് പോലെ, താങ്കളെ രക്ഷിതാവ് തെരഞ്ഞെടുക്കുകയും കിനാവുകളുടെ വ്യാഖ്യാനം പഠിപ്പിച്ചു തരികയും താങ്കളുടെയും യഅ്ഖൂബ് കുടുംബത്തിന്റെയും മേല്‍ തന്റെ അനുഗ്രഹങ്ങള്‍ പൂര്‍ത്തീകരിക്കുകയും ചെയ്യുന്നതാണ്-മുമ്പ് ഇബ്രാഹീം, ഇസ്ഹാഖ് എന്നീ പിതാക്കള്‍ക്ക് അനുഗ്രഹപൂര്‍ത്തീകരണം നല്‍കിയതു പോലെ. താങ്കളുടെ നാഥന്‍ സര്‍വജ്ഞനും യുക്തിമാനും തന്നെയത്രേ³

നിശ്ചയം, യൂസുഫ് നബിയിലും സഹോദരങ്ങളിലും അന്വേഷിച്ചറിയുന്നവര്‍ക്ക് ദൃഷ്ടാന്തങ്ങള്‍ ഒട്ടേറെയുണ്ട്. അവര്‍ പറഞ്ഞ സന്ദര്‍ഭം സ്മരണീയമാണ്: യൂസുഫും അവന്റെ പൂര്‍ണ സഹോദരന്‍ ബിന്‍യാമീനുമാണ് ബാപ്പാക്ക് നമ്മെക്കാള്‍ ഏറ്റം പ്രിയങ്കരര്‍; നാമാകട്ടെ ഒരു സംഘമുണ്ട്താനും. വ്യക്തമായി വഴിവിട്ട നിലപാടില്‍ തന്നെയാണ് ബാപ്പയുള്ളത്. 'നിങ്ങള്‍ യൂസുഫിനെ വധിച്ചുകളയുകയോ ഏതെങ്കിലും സ്ഥലത്ത് കൊണ്ടുപോയി ഇട്ടേക്കുകയോ ചെയ്യുക; എങ്കില്‍ പിതൃമുഖം നിങ്ങള്‍ക്ക് സ്വന്തമായിക്കിട്ടുന്നതാണ്; പിന്നീട് നിങ്ങള്‍ക്ക് സദ്‌വൃത്തരായിത്തീരുകയും ചെയ്യാം' എന്നു അവര്‍ പറഞ്ഞ സന്ദര്‍ഭം⁴

അവരില്‍ ഒരാള്‍ നിര്‍ദേശിച്ചു: യൂസുഫിനെ നിങ്ങള്‍ കൊല്ലേണ്ട; എന്തെങ്കിലും ചെയ്‌തേ പറ്റൂ എങ്കില്‍ കിണറ്റിനടിയിലേക്ക് ഇടുക, വല്ല യാത്രാസംഘങ്ങളും അവനെ എടുത്ത്‌കൊണ്ട് പൊയ്‌ക്കൊള്ളുമല്ലോ⁵
(ഗൂഢാലോചനക്ക് ശേഷം പിതാവിനെ ചെന്നു കണ്ട്) അവര്‍ പറഞ്ഞു: ബാപ്പാ, അങ്ങേക്കെന്തു സംഭവിച്ചു! യൂസുഫിന്റെ കാര്യത്തില്‍ താങ്കള്‍ ഞങ്ങളെ വിശ്വാസത്തിലെടുക്കുന്നില്ല? ഞങ്ങളവന്റെ ഗുണകാംക്ഷികള്‍ തന്നെയാണ്. ഞങ്ങളൊന്നിച്ച് നാളെയവനെ(ആടുമേക്കാന്‍) അയച്ചു തരൂ. അവന്‍ ആഹ്ലാദിച്ചുല്ലസിക്കുകയും കളിച്ചു നടക്കുകയും ചെയ്യട്ടെ. ഞങ്ങളവനെ കാത്തു സംരക്ഷിക്കുക തന്നെ ചെയ്യും⁶

അദ്ദേഹം പ്രതികരിച്ചു: അവനെയും കൊണ്ട് നിങ്ങള്‍ പോവുക എന്നത് എന്നെ അതീവദുഃഖിതനാക്കുക തന്നെ ചെയ്യും. നിങ്ങള്‍ അശ്രദ്ധരായിരിക്കെ അവനെ ചെന്നായ പിടിച്ചു തിന്നുമെന്ന ഭീതിയും എനിക്കുണ്ട്. അവര്‍ പ്രത്യുത്തരം നല്‍കി: ഞങ്ങളൊരു കൂട്ടം ആളുകളുണ്ടായിട്ടും അവനെ ചെന്നായ പിടിച്ചു തിന്നുകയാണെങ്കില്‍, തീര്‍ച്ചയായും മഹാപരാജിതര്‍ തന്നെയാകുമല്ലോ ഞങ്ങള്‍!

അങ്ങനെയവര്‍ യൂസുഫിനെ കൊണ്ടുപോവുകയും കിണറ്റിനടിയിലേക്ക് തള്ളാന്‍ ഏകകണ്ഠരായി ഖണ്ഡിതതീരുമാനമെടുക്കുകയും (ആ കടുംകൈ ചെയ്യുകയും) ഉണ്ടായി. 'തങ്ങളുടെ ഈ കഠോരകൃത്യത്തെപ്പറ്റി ഓര്‍ക്കാപുറത്ത് അവരെ നീ അറിയിക്കുന്നതാണ്' എന്ന് യൂസുഫിന്ന് നാം ബോധനം നല്‍കി⁷
സന്ധ്യമയങ്ങിയപ്പോള്‍ അവര്‍ കരഞ്ഞുകൊണ്ട് പിതാവിനടുത്തെത്തുകയും ഇങ്ങനെ ബോധിപ്പിക്കുകയുമുണ്ടായി: 'ബാപ്പാ, ഞങ്ങള്‍ ഓട്ടപ്പന്തയത്തിന് പോവുകയും യൂസുഫിനെ സാധനങ്ങള്‍ക്കരികെ വിടുകയും ചെയ്തിരുന്നു. അപ്പോഴവനെ ചെന്നായ തിന്നു. നേരു പറയുകയാണെങ്കില്‍ തന്നെയും അങ്ങു ഞങ്ങളെ വിശ്വസിക്കുകയില്ല!'യൂസുഫിന്റെ കുപ്പായത്തില്‍ വ്യാജരക്തം പുരട്ടിയാണവരെത്തിയത്. പിതാവു പ്രതികരിച്ചു: അല്ല, നിങ്ങള്‍ക്ക് ഒരു കടുംകൈ ഭംഗിയായിത്തോന്നി എന്നുമാത്രം. അതുകൊണ്ട്, നന്നായി ക്ഷമിക്കുക തന്നെ. നിങ്ങളുടെ ഈ പ്രതിപാദനങ്ങളില്‍ എനിക്കു സഹായമര്‍ഥിക്കാനുള്ളത് അല്ലാഹുവത്രേ⁸

ഒരു സംഘം യാത്രക്കാര്‍ അതുവഴി വരികയും വെള്ളംകോരാന്‍ ആളെ അയക്കുകയുമുണ്ടായി. തൊട്ടി കിണറ്റിലിറക്കിയ അയാള്‍ 'ഹാ സന്തോഷം, ഇതാ ഒരു ബാലന്‍' എന്നു വിളിച്ചു കൂവി. അവരവനെ ഒരു കച്ചവടച്ചരക്കായി ഒളിച്ചുവെച്ചു. അവരുടെ ചെയ്തികളെക്കുറിച്ചു നന്നായി അറിയുന്നവനത്രേ അല്ലാഹു. അവരവനെ തുച്ഛവിലയ്ക്ക്, എണ്ണപ്പെട്ട വെള്ളിക്കാശിനു വിറ്റു. അവന്റെ കാര്യത്തില്‍ വിമുഖരായിരുന്നു അവര്‍⁹

ഈജിപ്തില്‍ നിന്നു യൂസുഫിനെ വാങ്ങിയയാള്‍ ഭാര്യയോട് നിര്‍ദേശിച്ചു: ഇവനു ആദരപൂര്‍ണമായ താമസ സൗകര്യമേര്‍പ്പെടുത്തണം. നമുക്കിവന്‍ ഉപകാരപ്പെട്ടേക്കാം; അല്ലെങ്കില്‍ നമുക്കു വളര്‍ത്തുപുത്രനാക്കാം. ഇങ്ങനെ അന്നാട്ടില്‍ യൂസുഫിനു നാം സ്വാധീനമുണ്ടാക്കി. സ്വപ്നവ്യാഖ്യാനം തനിക്കു പഠിപ്പിച്ചു കൊടുക്കാന്‍വേണ്ടി കൂടിയായിരുന്നു ഇത്. തന്റെ കാര്യങ്ങളില്‍ അല്ലാഹു അജയ്യനായിരിക്കും; എന്നാല്‍ മിക്ക മനുഷ്യരും അതറിയുകയില്ല¹⁰

അങ്ങനെ, യൗവനം പ്രാപിച്ചപ്പോള്‍ അദ്ദേഹത്തിനു നാം തത്ത്വജ്ഞാനവും അറിവും നല്‍കി. ഉല്‍കൃഷ്ടന്‍മാര്‍ക്ക് അങ്ങനെയാണ് നാം പ്രതിഫലം നല്‍കുക. താന്‍ നിവസിച്ചിരുന്ന കൊട്ടാരത്തിലെ റാണി യൂസുഫ് നബിയെ വശീകരിച്ചു. വാതിലുകള്‍ കൊട്ടിയടച്ച് അവള്‍ കല്‍പിച്ചു-ഇങ്ങോട്ടു വാ. അദ്ദേഹം പ്രതികരിച്ചു: അല്ലാഹുവില്‍ ശരണം, യജമാനനായ അദ്ദേഹം എന്റെ നിവാസം ഉദാത്തമാക്കിയിട്ടുണ്ട്. അക്രമികള്‍ വിജയം വരിക്കയില്ല, തീര്‍ച്ച. അവള്‍ അദ്ദേഹത്തെക്കൊണ്ട് ദുഷ്‌കൃത്യമുദ്ദേശിക്കുക തന്നെ ചെയ്തു; തന്റെ നാഥനായ അല്ലാഹുവിന്റെ ദൃഷ്ടാന്തം കണ്ടറിഞ്ഞിട്ടില്ലായിരുന്നെങ്കില്‍ അദ്ദേഹവും അതുദ്ദേശിച്ചിരുന്നേനെ. അങ്ങനെ നാം ചെയ്തത്, അദ്ദേഹത്തില്‍ നിന്നു തിന്‍മയും നീചവൃത്തിയും തിരിച്ചുവിടാനാണ്. നമ്മുടെ സമുല്‍കൃഷ്ട ദാസരില്‍ പെട്ടയാള്‍ തന്നെയാണദ്ദേഹം¹¹

അവരിരുവരും വാതിലിനടുത്തേക്ക് മത്സരിച്ചോടുകയും അവളദ്ദേഹത്തിന്റെ കുപ്പായം പിന്നില്‍ നിന്നു വലിച്ചുകീറുകയുമുണ്ടായി. (തത്സമയം യദൃച്ഛയാ) അവളുടെ ഭര്‍ത്താവ് വാതില്‍ക്കലുള്ളത് ഇരുവരും കണ്ടു. അപ്പോള്‍ അവള്‍ പറഞ്ഞു: താങ്കളുടെ സഹധര്‍മിണിയുമായി ഹീനകൃത്യം ചെയ്യാനുദ്ദേശിച്ച ഇവനെ ജയിലിലടക്കുകയോ വേദനാജനകമായ ശിക്ഷക്കു വിധേയനാക്കുകയോ അല്ലാതെ മറ്റെന്തു പ്രതിഫലം നല്‍കും!¹²
യൂസുഫ് പ്രതികരിച്ചു: 'എന്നെ പാട്ടിലാക്കാന്‍ അവളാണ് ശ്രമിച്ചത്.' അവളുടെ കുടുംബത്തില്‍ നിന്നു ഒരു സാക്ഷി ഇങ്ങനെ സാക്ഷ്യം ബോധിപ്പിച്ചു: അവന്റെ കുപ്പായം മുന്‍വശമാണ് കീറിയിട്ടുള്ളതെങ്കില്‍ അവള്‍ പറഞ്ഞതാണു സത്യം; അവന്‍ നുണയന്‍മാരില്‍ പെട്ടു. ഇനി, പിന്‍വശത്താണത് കീറിയിട്ടുള്ളതെങ്കില്‍ അവള്‍ നുണ പറഞ്ഞു; അവനാകട്ടെ സത്യവാന്‍മാരിലായി.¹³
അങ്ങനെ കുപ്പായം പിന്നില്‍ നിന്നാണ് കീറിയിട്ടുള്ളതെന്ന് കണ്ടപ്പോള്‍ അയാള്‍ ഭാര്യയോട് പറഞ്ഞു: ഈ സംഭവം നിങ്ങളുടെ പെണ്‍കുതന്ത്രങ്ങളില്‍ പെട്ടതത്രേ. നിങ്ങളുടെ കുതന്ത്രങ്ങള്‍ ഗൗരവതരം തന്നെ! 'യൂസുഫേ, ഇക്കാര്യം നീ അവഗണിച്ചു കളഞ്ഞേക്ക്. (എടീ,) നീ ചെയ്ത പാതകത്തിന് മോചനമര്‍ത്ഥിക്കുക; നീ മഹാപാപമനുവര്‍ത്തിച്ചവരിലകപ്പെടുക തന്നെ ചെയ്തിരിക്കുന്നു.¹⁴

പട്ടണത്തിലെ ചില കുലീനമഹിളകള്‍ പറഞ്ഞു: 'അസീസിന്റെ സഹധര്‍മിണി ഭൃത്യനെ പാട്ടിലാക്കാന്‍ ശ്രമിക്കുകയാണ്; പ്രേമംകൊണ്ട് അവന്‍ അവളുടെ മനം കവര്‍ന്നിരിക്കുന്നു. അവള്‍ സ്പഷ്ടമായ ദുര്‍മാര്‍ഗത്തിലകപ്പെട്ടതായാണ് ഞങ്ങള്‍ കാണുന്നത്.' ഈ ഗൂഢാലോചന സംബന്ധിച്ചു കേട്ടപ്പോള്‍ സുലൈഖ അവരുടെയടുത്തേക്ക് ആളെ അയച്ച് ക്ഷണിക്കുകയും സവിശേഷ ഇരിപ്പിടങ്ങളൊരുക്കുകയും ചെയ്തു.(അങ്ങനെയവര്‍ സദ്യക്കെത്തി. പഴങ്ങള്‍ മുറിക്കാനായി) ഓരോരുത്തര്‍ക്കും ഓരോ കത്തിയും അവള്‍ നല്‍കിയിരുന്നു. (അവര്‍ പഴങ്ങള്‍ മുറിച്ചുകൊണ്ടിരിക്കവെ യൂസുഫിനോട്) സുലൈഖ കല്‍പിച്ചു: അവരുടെ അടുത്തുകൂടെ ചെല്ല്. അദ്ദേഹത്തെ കണ്ടുകഴിഞ്ഞപ്പോള്‍ അവര്‍ അത്ഭുതപരതന്ത്രരാവുകയും സ്വകരങ്ങള്‍(അറിയാതെ) മുറിപ്പെടുത്തുകയുമുണ്ടായി. അവര്‍ പ്രതികരിച്ചു: തമ്പുരാനേ, ഇതൊരു മനുഷ്യനേയല്ല, വിശിഷ്ടനായ ഒരു മലക്ക് തന്നെയാണ്.¹⁵
അവള്‍ ഇടപെട്ടു: ഇവന്റെ കാര്യത്തിലാണ് എന്നെ നിങ്ങള്‍ അധിക്ഷേപിച്ചിരുന്നത്. ഞാനവനെ പാട്ടിലാക്കാന്‍ ശ്രമിക്കുക തന്നെ ചെയ്തിട്ടുണ്ട്. അപ്പോളവന്‍ നിഷ്‌കളങ്കത പരിരക്ഷിച്ചു. എന്നാല്‍ ഞാന്‍ കല്‍പിക്കുന്നത് ചെയ്യുന്നില്ലെങ്കില്‍ അവന്‍ ജയിലിലടക്കപ്പെടുകയും ഹീനരിലുള്‍പെടുകയും ചെയ്യും, തീര്‍ച്ച.¹⁶

അദ്ദേഹം പ്രാര്‍ഥിച്ചു: 'എന്റെ രക്ഷിതാവേ, ഇവര്‍ എന്നെ ക്ഷണിച്ചുകൊണ്ടിരിക്കുന്ന ഹീനകൃത്യത്തെക്കാള്‍ എനിക്കു പ്രിയങ്കരം ജയില്‍ തന്നെയാണ്. ഇവരുടെ ഗൂഢാലോചനകള്‍ എന്നില്‍ നിന്നു നീ തട്ടിമാറ്റുന്നില്ലങ്കില്‍ ഞാനവരിലേക്ക് വ്യതിചലിച്ച് പോകയും മൂഢന്‍മാരിലകപ്പെടുകയും ചെയ്യുന്നതാണ്.' അപ്പോള്‍ അദ്ദേഹത്തിന്റെ പ്രാര്‍ഥന അല്ലാഹു സ്വീകരിക്കുകയും അവരുടെ ഗൂഢാലോചനകള്‍ അദ്ദേഹത്തില്‍ നിന്നു തിരിച്ചുവിടുകയും ചെയ്തു. നിശ്ചയം, എല്ലാം കേള്‍ക്കുന്നവനും അറിയുന്നവനും തന്നെയത്രേ അവന്‍.¹⁷

പിന്നീട്, തെളിവുകള്‍ മനസ്സിലായ ശേഷവും, കുറെ കാലം അദ്ദേഹത്തെ ജയിലിലിടണമെന്ന് അവര്‍ക്കു തോന്നി. രണ്ടു യുവാക്കളും അദ്ദേഹമൊന്നിച്ചു ജയിലില്‍ പ്രവേശിച്ചിരുന്നു. അവരിലൊരാള്‍ (യൂസുഫ് നബിയോട്) പറഞ്ഞു: 'ഞാന്‍ വീഞ്ഞു പിഴിഞ്ഞെടുക്കുന്നതായി കിനാവ് കണ്ടിരിക്കുന്നു.' അപരന്‍ വ്യക്തമാക്കി: 'തലയില്‍ റൊട്ടി വഹിക്കുകയും അതില്‍ നിന്നു പക്ഷികള്‍ തിന്നുകയും ചെയ്യുന്നതായാണ് എന്റെ സ്വപ്നം.' ഞങ്ങള്‍ക്കവ വ്യാഖ്യാനിച്ചു തരൂ; താങ്കളെ ഒരു പുണ്യവാളനായാണ് ഞങ്ങള്‍ മനസ്സിലാക്കുന്നത്.¹⁸

അദ്ദേഹം പ്രസ്താവിച്ചു: നിങ്ങളിരുവര്‍ക്കുമുള്ള ഭക്ഷണം ഹാജരാക്കപ്പെടുന്നതിനു മുമ്പുതന്നെ അതിന്റെ വിവരണം ഞാന്‍ തരാം. എന്റെ നാഥന്‍ എനിക്കഭ്യസിപ്പിച്ചതില്‍ പെട്ടതാണത്. അല്ലാഹുവില്‍ അവിശ്വസിക്കുകയും പരലോകത്തെ നിഷേധിക്കുകയും ചെയ്യുന്നവരുടെ മാര്‍ഗം ഞാന്‍ തള്ളിക്കളയുക തന്നെ ചെയ്തിരിക്കുന്നു. എന്റെ പിതാക്കളായ ഇബ്രാഹീം, ഇസ്ഹാഖ്, യഅ്ഖൂബ് എന്നീ നബിമാരുടെ മാര്‍ഗമാണ് ഞാന്‍ അനുധാവനം ചെയ്യുന്നത്. യാതൊന്നിനെയും അല്ലാഹുവിന്റെ പങ്കാളികളാക്കാന്‍ ഞങ്ങള്‍ക്കു പാടില്ല. ഞങ്ങള്‍ക്കും മറ്റുമനുഷ്യര്‍ക്കും അവന്‍ നല്‍കിയ അനുഗ്രഹമത്രേ അത്. പക്ഷേ മിക്കമനുഷ്യരും കൃതജ്ഞത പ്രകാശിപ്പിക്കുന്നില്ല¹⁹

ജയില്‍ സോദരരേ, ഭിന്നരായ സംരക്ഷകന്‍മാരാണോ ഉത്തമം, അതോ ഏകനും അജയ്യനുമായ അല്ലാഹുവോ? അവനെക്കൂടാതെ നിങ്ങളാരാധിക്കുന്നവ നിങ്ങളും പിതാക്കളും നാമകരണം ചെയ്ത ചില സംജ്ഞകളല്ലാതെ മറ്റൊന്നുമല്ല. അവയെക്കുറിച്ച് ഒരുവിധ പ്രമാണവും അല്ലാഹു ഇറക്കിയിട്ടില്ല. വിധികര്‍തൃത്വാധികാരം അവന്നുമാത്രമുള്ളതാണ്. തന്നെയല്ലാതെ മറ്റൊന്നിനെയുമാരാധിക്കരുതെന്ന് അവന്‍ കല്‍പിച്ചിരിക്കുന്നു. ഋജുവായ മതം അതാണ്.²⁰
പക്ഷേ മനുഷ്യരില്‍ മിക്കവരും യാഥാര്‍ഥ്യം അറിയുന്നില്ല. ജയില്‍ സോദരരേ, (ചോദിച്ച സ്വപ്നത്തിന്റെ വ്യാഖ്യാനം ഇതാണ്:) 'നിങ്ങളിലൊരാള്‍ തന്റെ യജമാനന്നു വീഞ്ഞ് തുടര്‍ന്നും കുടിപ്പിക്കും. എന്നാല്‍ മറ്റേയാള്‍ കുരിശിലേറ്റപ്പെടുകയും അയാളുടെ ശിരസ്സ് പക്ഷികള്‍ കൊത്തിത്തിന്നുകയും ചെയ്യുന്നതാണ്. നിങ്ങളിരുവരും ഏതു വിഷയം സംബന്ധിച്ചു വിവരണമന്വേഷിക്കുന്നുണ്ടോ അത് തീരുമാനിക്കപ്പെട്ടുകഴിഞ്ഞിരിക്കുന്നു.' ഇരുവരില്‍ നിന്നു ജയില്‍മുക്തനാകുമെന്നു താന്‍ മനസ്സിലാക്കിയ വ്യക്തിയോട് യൂസുഫ് ആവശ്യപ്പെട്ടു: 'യജമാന സന്നിധിയില്‍ എന്നെക്കുറിച്ച് അനുസ്മരിക്കുക.' എന്നാല്‍ യജമാനനോട് അതുണര്‍ത്തുന്ന വിഷയം പിശാച് അയാളെ വിസ്മരിപ്പിച്ചു. അങ്ങനെ ഏതാനും വര്‍ഷം അദ്ദേഹം തടവറയില്‍ കഴിച്ചുകൂട്ടി.²¹

ഒരിക്കല്‍ രാജാവ് പറഞ്ഞു: തടിച്ച ഏഴു പശുക്കളെ മെലിഞ്ഞ ഏഴെണ്ണം തിന്നുന്നതും കൂടാതെ ഏഴുവീതം പച്ചക്കതിരുകളും ഉണക്കക്കതിരുകളും നാം സ്വപ്നം കണ്ടിരിക്കുന്നു. ഹേ പ്രമുഖരേ, നിങ്ങള്‍ സ്വപ്നങ്ങള്‍ വ്യാഖ്യാനിക്കുന്നവരാണെങ്കില്‍ ഇവ വിവരിച്ചു തരൂ. അവര്‍ പ്രതികരിച്ചു: ഇവയെല്ലാം പേക്കിനാവുകളാണ്. ആ ഗണത്തില്‍ പെട്ടവയുടെ വ്യാഖ്യാനം ഞങ്ങള്‍ക്കറിയില്ല. ആ രണ്ടു ജയില്‍ സോദരരില്‍ മുക്തനായ ആള്‍ കുറേക്കാലശേഷം ഓര്‍ത്തെടുത്ത് ബോധിപ്പിച്ചു:'നിങ്ങള്‍ നിയോഗിക്കുകയാണെങ്കില്‍ രാജ സ്വപ്നവ്യാഖ്യാനം ഞാന്‍ അറിയിച്ചു തരാം.' അങ്ങനെ യൂസുഫ് നബിയുടെയടുത്ത് ജയിലില്‍ ചെന്ന് അയാളപേക്ഷിച്ചു:²²
ഹേ സത്യനിഷ്ഠനായ യൂസുഫ്, തടിച്ച ഏഴു പശുക്കളെ മെലിഞ്ഞ ഏഴെണ്ണം തിന്നുന്നതിലും ഏഴുവീതം പച്ചക്കതിരുകളിലും ഉണക്കക്കതിരുകളിലും താങ്കള്‍ ഞങ്ങള്‍ക്ക് സ്വപ്നവ്യാഖ്യാനം നല്‍കണം. ആളുകള്‍ക്ക് അവ ഗ്രഹിക്കാനായി അതിന്റെ വിവരണവുമായി എനിക്ക് തിരിച്ചുപോകാമായിരുന്നു.

യൂസുഫ് നബി വ്യാഖ്യാനിച്ചു: ഏഴു വര്‍ഷം തുടര്‍ച്ചയായി നിങ്ങള്‍ കൃഷിയിറക്കണം; എന്നിട്ട് കൊയ്‌തെടുക്കുന്നവ - ഭക്ഷിക്കാന്‍ വേണ്ട അല്‍പമൊഴികെ - കതിരോടെ സൂക്ഷിച്ചുവെക്കുക. ശേഷം കഠിന ക്ഷാമത്തിന്റെ ഏഴാണ്ടുകള്‍ വന്നെത്തും. മുന്‍കരുതലായി നിങ്ങള്‍ സൂക്ഷിച്ചതെല്ലാം അക്കാലം തിന്നുതീര്‍ക്കുന്നതാണ്; കരുതലായി വെക്കുന്ന സ്വല്‍പമൊഴികെ. പിന്നീട് ഒരു കൊല്ലം വരും; അന്നു ജനങ്ങള്‍ക്കു സമൃദ്ധി കൈവരുന്നതും (പഴസത്തുക്കളും മറ്റും) പിഴിഞ്ഞുണ്ടാക്കുന്നതുമാകുന്നു.²³

യൂസുഫിനെ നമ്മുടെ മുമ്പില്‍ ഹാജരാക്കുക എന്നു രാജാവ് ഉത്തരവിട്ടു. എന്നാല്‍, തന്റെയടുത്ത് ദൂതനെത്തിയപ്പോള്‍ അദ്ദേഹം നിര്‍ദേശിച്ചു: നീ രാജാവിന്റെയടുത്ത് തിരിച്ച് ചെല്ലുകയും പണ്ട് സ്വകരങ്ങള്‍ മുറിപ്പെടുത്തിയ മഹിളകളുടെ നിലപാട് എന്താണെന്നന്വേഷിക്കുകയും ചെയ്യണം. അവരുടെ കുതന്ത്രത്തെക്കുറിച്ച് തന്റെ നാഥന്‍ അഭിജ്ഞന്‍ തന്നെ തീര്‍ച്ച²⁴
ആ മഹിളകളെ വരുത്തി രാജാവ് ആരാഞ്ഞു: യൂസുഫിനെ പാട്ടിലാക്കാന്‍ തുനിഞ്ഞപ്പോഴത്തെ നിങ്ങളുടെ സ്ഥിതി എന്തായിരുന്നു? അവര്‍ പ്രതികരിച്ചു: അല്ലാഹു എത്ര പരിശുദ്ധന്‍! അദ്ദേഹത്തെക്കുറിച്ച് ഹീനമായതൊന്നും ഞങ്ങള്‍ക്കു ഗ്രഹിക്കാനായിട്ടില്ല. അസീസിന്റെ സഹധര്‍മിണി വ്യക്തമാക്കി: ഇപ്പോള്‍ യാഥാര്‍ഥ്യം വെളിപ്പെട്ടിരിക്കുകയാണ് - യൂസുഫിനെ പാട്ടിലാക്കാന്‍ ശ്രമിക്കയുണ്ടായത് ഞാനാണ്. അദ്ദേഹം സത്യനിഷ്ഠരില്‍ പെട്ടയാള്‍ തന്നെ, തീര്‍ച്ച²⁵
(യൂസുഫ് പറഞ്ഞു:) ഞാനിങ്ങനെ നിര്‍ദേശിക്കുന്നത്, അസാന്നിധ്യാവസ്ഥയില്‍ അസീസിനെ ഞാന്‍ വഞ്ചിച്ചിട്ടില്ലെന്ന് അദ്ദേഹം അറിയാനും ചതിയന്‍മാരുടെ കുതന്ത്രങ്ങള്‍ അല്ലാഹു സാക്ഷാല്‍ക്കരിക്കില്ല എന്നതിനാലുമാകുന്നു.²⁶
എന്നാല്‍ സ്വന്തം മനസ്സിനെ ഞാന്‍ കുറ്റമുക്തമാക്കുന്നില്ല; ഹീന വൃത്തികള്‍ക്ക് മനുഷ്യമനസ്സ് വല്ലാതെ പ്രേരിപ്പിക്കുക തന്നെ ചെയ്യും - എന്റെ നാഥന്റെ കാരുണ്യം ലഭിച്ചവരുടേതൊഴികെ. എന്റെ രക്ഷിതാവ് ഏറെ പൊറുക്കുന്നവനും കരുണാമയനും തന്നെയത്രേ.²⁷

രാജാവ് ഉത്തരവിട്ടു: 'അദ്ദേഹത്തെ നമ്മുടെയടുത്ത് ഹാജരാക്കുക; ഞാനദ്ദേഹത്തെ എന്റെ വിശിഷ്ടനായി നിശ്ചയിക്കട്ടെ.' അങ്ങനെ യൂസുഫ് നബിയുമായി സംസാരിച്ചപ്പോള്‍ രാജാവ് അരുളി: താങ്കളിന്ന് നമ്മുടെ സവിധത്തില്‍ ഉന്നത സ്ഥാനീയനും വിശ്വസ്തനുമാകുന്നു. അദ്ദേഹം അപേക്ഷിച്ചു: 'അവിടന്ന് സാമ്രാജ്യത്തിന്റെ ഖജനാവുകള്‍ എന്നെ ഏല്‍പിച്ചാലും! ഞാനവ നന്നായി സംരക്ഷിക്കുന്നതാണ്; അതിനുള്ള പരിജ്ഞാനവും എനിക്കുണ്ട്.' അങ്ങനെ അന്നാട്ടില്‍ താനുദ്ദേശിക്കുന്ന എങ്ങും താമസിക്കാവുന്ന വിധം യൂസുഫ് നബിക്ക് നാം ആധിപത്യമേകി. നാം ഉദ്ദേശിക്കുന്നവര്‍ക്ക് നമ്മുടെ കാരുണ്യവര്‍ഷമേകുന്നു. പുണ്യകര്‍മങ്ങളനുഷ്ഠിച്ചവരുടെ പ്രതിഫലം നാം പാഴാക്കിക്കളയുകയേ ഇല്ല. സത്യവിശ്വാസം കൈക്കൊള്ളുകയും സൂക്ഷ്മത പുലര്‍ത്തുകയും ചെയ്തവര്‍ക്ക് പാരത്രിക ലോകത്തെ പ്രതിഫലമത്രേ ഏറ്റം ഉല്‍കൃഷ്ടം²⁸

യൂസുഫ് നബിയുടെ സഹോദരങ്ങള്‍ ഈജിപ്തിലെത്തി തന്റെയടുത്ത് പ്രവേശിച്ചു. തത്സമയം താനവരെ തിരിച്ചറിഞ്ഞു, അവര്‍ക്കദ്ദേഹത്തെ മനസ്സിലായില്ല. ചരക്കുകള്‍കെട്ടി അവരെ യാത്രയാക്കാനൊരുങ്ങിയപ്പോള്‍ യൂസുഫ് നബി നിര്‍ദേശിച്ചു: പിതാവൊത്ത സഹോദരനെക്കൂടി (ഇനി വരുമ്പോള്‍) എന്റെയടുത്ത് കൊണ്ടുവരണം. നിങ്ങള്‍ക്കു ഞാന്‍ വേണ്ടത്ര ഭക്ഷ്യധാന്യം തന്നുവെന്നും ഉദാത്തമായ ആതിഥ്യമൊരുക്കിയെന്നും നിങ്ങള്‍ കണ്ടില്ലേ? ഇനി, അവനെ കൊണ്ടുവരുന്നില്ലെങ്കില്‍ നിങ്ങള്‍ക്ക് എന്റെയടുത്ത് ഭക്ഷ്യധാന്യമില്ല, എന്നെ സമീപിക്കുകയേ വേണ്ടതാനും!²⁹

അവര്‍ പ്രതികരിച്ചു: അതിന്നവന്റെ പിതാവിനോടു ഞങ്ങളപേക്ഷിച്ചുനോക്കാം. ഞങ്ങളക്കാര്യം നിര്‍വഹിക്കുക തന്നെ ചെയ്യും. യൂസുഫ് നബി സേവകന്‍മാരോട് കല്‍പിച്ചു: ഇവര്‍ ധാന്യവിലയായി കൊണ്ടുവന്നത് ഇവരുടെ ഭാണ്ഡങ്ങളില്‍ തന്നെ നിക്ഷേപിക്കുക, സ്വകുടുംബത്തില്‍ മടങ്ങിയെത്തുമ്പോള്‍ അവരതറിഞ്ഞുകൊള്ളും - തന്‍മൂലമവര്‍ ഇനിയും വന്നേക്കാം³⁰

അങ്ങനെ പിതാവിനടുത്ത് മടങ്ങിച്ചെന്നപ്പോള്‍ അവര്‍ ബോധിപ്പിച്ചു: ബാപ്പാ, നമുക്ക് ധാന്യലബ്ധി നിഷേധിക്കപ്പെട്ടിരിക്കയാണ്; അതുകൊണ്ട് അനുജന്‍ ബിന്‍യാമീനെക്കൂടി ഞങ്ങളോടൊപ്പം അയച്ചുതരണം-എങ്കില്‍ ധാന്യമളന്നു കിട്ടും. അവനെ ഞങ്ങള്‍ നന്നായി സംരക്ഷിക്കുകതന്നെ ചെയ്യും, തീര്‍ച്ച. അദ്ദേഹം പ്രതികരിച്ചു: ഇവന്റെ സഹോദരന്‍ യൂസുഫിനെപ്പറ്റി പണ്ട് നിങ്ങളെ വിശ്വസിച്ചതുപോലെയല്ലാതെ ഇവന്റെ കാര്യത്തില്‍ എനിക്ക് വിശ്വസിക്കാന്‍ കഴിയുമോ?³¹
അല്ലാഹുവാണ് ഏറ്റം ഉത്തമനായ സംരക്ഷകന്‍. കാരുണ്യവാന്‍മാരില്‍ പരമകാരുണികനും അവനത്രേ. അങ്ങനെ അവര്‍ സാമാനങ്ങള്‍ തുറന്നപ്പോള്‍ വില തങ്ങള്‍ക്കു തന്നെ തിരിച്ചുനല്‍കപ്പെട്ടതായി കണ്ടു. അവര്‍ വിസ്മയം കൂറി: ബാപ്പാ, ഇതിലപ്പുറമിനി എന്ത് ഔദാര്യമാണ് നാം പ്രതീക്ഷിക്കുക? ചരക്കുകളുടെ വില ഇതാ ഇങ്ങോട്ടുതന്നെ തിരിച്ചുതന്നിരിക്കുന്നു. ഇനിയും ഞങ്ങള്‍ കുടുംബത്തിന്ന് ഭക്ഷ്യവസ്തുക്കള്‍ എത്തിക്കാം; അനുജനെ സംരക്ഷിക്കുകയും ചെയ്യാം. ഒരൊട്ടകം ചുമക്കുന്ന അളവ് -അസീസിനത് നിസ്സാരമാണ്-ഞങ്ങള്‍ക്ക് കൂടുതല്‍ കിട്ടുന്നതുമാണ്³²

അദ്ദേഹം പറഞ്ഞു: വല്ല ഗുരുതര വിപത്തിലും കുടുങ്ങിയാലൊഴികെ, അവനെ എന്റെയടുത്ത് തിരിച്ചെത്തിക്കുമെന്ന് അല്ലാഹുവിനെപ്പിടിച്ച് ഉടമ്പടിചെയ്താലല്ലാതെ ഞാനയച്ചു തരികയേ ഇല്ല. അങ്ങനെ പിതാവിനോടവര്‍ കരാര്‍ ചെയ്തപ്പോള്‍ അദ്ദേഹം പ്രതികരിച്ചു: നാം പറയുന്ന ഈ ഉടമ്പടിക്ക് അല്ലാഹു സാക്ഷിയാകുന്നു. താന്‍ തുടര്‍ന്നു: മക്കളേ, നിങ്ങള്‍ എല്ലാവരുംകൂടി ഒരു കവാടത്തിലൂടെ പ്രവേശിക്കരുത്; വ്യത്യസ്ത വാതിലുകളിലൂടെ വേണം കടക്കുക.³³
അല്ലാഹുവിന്റെ പക്കല്‍ നിന്നുള്ള യാതൊന്നും നിങ്ങളില്‍ നിന്നു പ്രതിരോധിച്ചു നിര്‍ത്താന്‍ എനിക്കു പറ്റില്ല. അവന്ന് മാത്രമാണ് വിധികര്‍തൃത്വാവകാശം. അവനില്‍ സര്‍വ കാര്യങ്ങളും ഞാന്‍ ഏല്‍പിച്ചിരിക്കുകയാണ്. ഭരമേല്‍പിക്കാനുള്ളവര്‍ അവനെ ഏല്‍പിച്ചുകൊള്ളട്ടെ.

അങ്ങനെ ബാപ്പ കല്‍പിച്ച വിധം (ഈജിപ്തില്‍) കടന്നപ്പോള്‍ അല്ലാഹുവിങ്കല്‍ നിന്നുണ്ടാകുന്ന ഒന്നുംതന്നെ പ്രതിരോധിക്കാന്‍ അദ്ദേഹത്തിനാകുമായിരുന്നില്ല; തന്റെ മനസ്സിലെ ഒരാവശ്യം യഅ്ഖൂബ് നബി നിര്‍വഹിച്ചു എന്നുമാത്രം. നാം പഠിപ്പിച്ചുകൊടുത്തത്‌കൊണ്ട് വിജ്ഞാനി തന്നെയാണദ്ദേഹം. പക്ഷേ, മിക്ക മനുഷ്യരും യാഥാര്‍ഥ്യമറിയുന്നില്ല³⁴

അവര്‍ യൂസുഫ് നബിയുടെ അടുത്ത് കടന്നുചെന്നപ്പോള്‍ സ്വസഹോദരനെയദ്ദേഹം തന്റെയൊപ്പം താമസിപ്പിക്കുകയും ഇങ്ങനെ വെളിപ്പെടുത്തുകയുമുണ്ടായി: നിന്റെ സഹോദരന്‍ തന്നെയാണ് ഞാന്‍; അവരുടെ ചെയ്തികളെ സംബന്ധിച്ചു നീ ദു:ഖാകുലനാകേണ്ടതില്ല³⁵

അങ്ങനെ അവരുടെ ചരക്കുകള്‍ തയ്യാറാക്കിക്കൊടുത്തപ്പോള്‍ അളക്കുന്ന പാനപാത്രം അദ്ദേഹം സ്വസഹോദരന്റെ ഭാണ്ഡത്തിലിട്ടു. പിന്നീട് ഒരാള്‍ വിളിച്ചറിയിച്ചു: ഹേ യാത്രാസംഘമേ, നിങ്ങള്‍ കള്ളന്‍മാര്‍ തന്നെയാകുന്നു! അവരുടെ നേരെ തിരിഞ്ഞുവന്നുകൊണ്ട് ഇവരന്വേഷിച്ചു: നിങ്ങള്‍ക്കെന്താണു നഷ്ടപ്പെട്ടിരിക്കുന്നത്? അവര്‍ പ്രതികരിച്ചു: രാജാവിന്റെ അളവുപാത്രം ഞങ്ങള്‍ കാണുന്നില്ല. അത് ഹാജരാക്കുന്നവര്‍ക്ക് ഒരൊട്ടകച്ചുമട്(ധാന്യം) കിട്ടും; അക്കാര്യം ഞാനേറ്റു. സഹോദരര്‍ ബോധിപ്പിച്ചു: അല്ലാഹു തന്നെ സത്യം, കുഴപ്പമുണ്ടാക്കാനല്ല ഞങ്ങള്‍ ഇന്നാട്ടിലെത്തിയതെന്നു നിങ്ങള്‍ക്കുതന്നെ അറിയാമല്ലോ; ഞങ്ങള്‍ കള്ളന്‍മാരായിട്ടുമില്ല. അവര്‍ ചോദിച്ചു: എന്നാല്‍, നിങ്ങള്‍ വ്യാജമാണു പറയുന്നതെങ്കില്‍ എന്തു ശിക്ഷതരണം? സഹോദരര്‍ മറുപടി നല്‍കി: ആരുടെ ഭാണ്ഡത്തിലാണോ അതുള്ളത് അയാളെ പിടിച്ചുവെക്കലാണതിന്റെ ശിക്ഷ. അക്രമികള്‍ക്ക് അങ്ങനെയാണ് ഞങ്ങള്‍ പ്രതിഫലം നല്‍കുക³⁶

അങ്ങനെ യൂസുഫ് നബി സ്വസഹോദരന്റെ ഭാണ്ഡത്തിന് മുമ്പേ അവരുടേത് പരിശോധനയാരംഭിക്കുകയും പിന്നീട് സഹോദരന്റേതില്‍ നിന്ന് അതു പുറത്തെടുക്കുകയും ചെയ്തു. യൂസുഫ് നബിക്കു വേണ്ടി ഇങ്ങനെ നാം തന്ത്രംമെനയുകയുണ്ടായി. രാജാവിന്റെ ഭരണവ്യവസ്ഥപ്രകാരം യൂസുഫ് നബിക്ക് സ്വസഹോദരനെ പിടിച്ച് വെക്കാന്‍ സാധിക്കില്ലായിരുന്നു. ഉദ്ദേശിക്കുന്നവരെ നാം പല പദവികള്‍ ഉയര്‍ത്തുന്നതാണ്. എല്ലാ ജ്ഞാനികള്‍ക്കുമുപരി ഒരു സര്‍വജ്ഞനുണ്ട്.

സഹോദരര്‍ പറഞ്ഞു: ഇവന്‍ കളവുനടത്തിയിട്ടുണ്ടെങ്കില്‍ പണ്ടു ഇവന്റെ സഹോദരനും അതു ചെയ്തിട്ടുണ്ട്. തത്സമയം യൂസുഫ് നബി അത് മനസ്സിലൊളിപ്പിച്ചു, വെളിപ്പെടുത്തിയില്ല; ഇങ്ങനെ (മനസ്സാ)പറഞ്ഞു: നിങ്ങളുടെ നിലപാട് എത്ര മോശം! നിങ്ങളുടെ ഈ വിവരണങ്ങളെക്കുറിച്ചെല്ലാം അല്ലാഹുവിന്നു നന്നായറിയാം³⁷

സഹോദരര്‍ അപേക്ഷിച്ചു: പ്രഭോ, ഇവന്ന് വയോവൃദ്ധനായ പിതാവുണ്ട്; അതുകൊണ്ട് ഇവന്നുപകരം ഞങ്ങളിലൊരാളെ പിടിച്ചുവെച്ചാലും! ഒരു ഉത്തമനായിത്തന്നെയാണ് താങ്കളെ ഞങ്ങള്‍ മനസ്സിലാക്കുന്നത്. അദ്ദേഹം പ്രതികരിച്ചു: അല്ലാഹുവോട് ഞാന്‍ കാവല്‍ തേടുകയാണ്. നമ്മുടെ സാധനം ആരുവശം കണ്ടെത്തിയോ അവനെയല്ലാതെ പിടികൂടുകയോ? തത്സമയം ഞങ്ങള്‍ അക്രമകാരികള്‍ തന്നെയായിപ്പോകുമല്ലോ³⁸

അങ്ങനെ ബിന്‍യാമീനെക്കുറിച്ച് ഭഗ്നാശരായിക്കഴിഞ്ഞപ്പോള്‍ അവര്‍ അകലെ മാറി കൂടിയാലോചന നടത്തി. മൂത്തയാള്‍ പറഞ്ഞു: അല്ലാഹുവിനെ മുന്‍നിറുത്തി (ബിന്‍യാമീന്റെ കാര്യത്തില്‍) ബാപ്പ ഉറപ്പുവാങ്ങിയതും പണ്ട്, യൂസുഫിന്റെ വിഷയത്തില്‍ വീഴ്ചവരുത്തിയതും നിങ്ങള്‍ക്കോര്‍മയില്ലേ? അതുകൊണ്ട്, എനിക്ക് ബാപ്പ സമ്മതം നല്‍കുകയോ അല്ലാഹു ഒരു വിധിതരുകയോ ചെയ്യുന്നതുവരെ ഞാന്‍ ഈ നാടുവിടുകയില്ല. അല്ലാഹു വിധികര്‍ത്താക്കളില്‍ ഏറ്റം ഉത്തമനാകുന്നു. നിങ്ങള്‍ പിതാവിനടുത്തേക്ക് തിരിച്ചുചെന്ന് ഇങ്ങനെ ബോധിപ്പിക്കുക: ബാപ്പാ, താങ്കളുടെ പുത്രന്‍ മോഷണം നടത്തുകതന്നെ ചെയ്തിരിക്കുന്നു. അറിവില്‍പെട്ട കാര്യത്തിന്നു മാത്രമാണ് ഞങ്ങള്‍ സാക്ഷ്യം വഹിച്ചിട്ടുണ്ടായിരുന്നത്; മറഞ്ഞ കാര്യം ഞങ്ങള്‍ക്കറിയില്ലായിരുന്നു. ഞങ്ങളുണ്ടായിരുന്ന നാട്ടുകാരോടും ഞങ്ങളുടെ സഹയാത്രിക സംഘത്തോടും താങ്കള്‍ക്കന്വേഷിച്ചു നോക്കാം. സത്യം തന്നെയണ് ഞങ്ങള്‍ പറയുന്നത്³⁹

യഅ്ഖൂബ് നബി പറഞ്ഞു: 'അല്ല, നിങ്ങള്‍ക്ക് ഒരു കാര്യം ഭംഗിയായിത്തോന്നി; അതുകൊണ്ട് നന്നായി ക്ഷമിക്കുകതന്നെ. എന്റെ മുമ്പില്‍ അവരെയെല്ലാവരെയും അല്ലാഹു കൊണ്ടുവന്നേക്കാം. സര്‍വജ്ഞനും യുക്തിമാനും തന്നെയാണവന്‍.' അവരെ വിട്ടു തിരിഞ്ഞ്, യൂസുഫിന്റെ കാര്യം മഹാകഷ്ടം തന്നെ എന്ന് അദ്ദേഹം സഹതപിച്ചു; കടുത്ത ദുഃഖംമൂലം തന്റെ നയനദ്വയങ്ങള്‍ വെളുത്തുപോയി; ആഴമേറിയ സങ്കടം കടിച്ചമര്‍ത്തി⁴⁰

മക്കള്‍ പറഞ്ഞു: അല്ലാഹു തന്നെ സത്യം, നിശ്ശേഷം പാരവശ്യം ബാധിക്കുകയോ മരണപ്പെടുകതന്നെയോ ചെയ്യുമാറ് യൂസുഫിനെ സ്മരിച്ചുകൊണ്ടേയിരിക്കുകയാണല്ലോ ബാപ്പാ താങ്കള്‍? അദ്ദേഹം പ്രതികരിച്ചു: ഞാനെന്റെ വര്‍ധിത ദുഃഖവും നെടുംഖേദവും അല്ലാഹുവിങ്കല്‍ മാത്രം ബോധിപ്പിക്കുകയാണ്. നിങ്ങളറിയാത്ത ചിലകാര്യങ്ങള്‍ അവങ്കല്‍ നിന്നു ഞാനറിയുന്നുണ്ട്. (കുറേ കഴിഞ്ഞ് താന്‍ നിര്‍ദേശിച്ചു:) പ്രിയമക്കളേ, നിങ്ങള്‍ പോയി യൂസുഫിനെയും സഹോദരനെയും കുറിച്ച് അന്വേഷണം നടത്തുക; അല്ലാഹുവിന്റെ അനുഗ്രഹത്തെക്കുറിച്ചു ആശയറ്റുപോകരുത്. നിഷേധികളായ ജനങ്ങള്‍ മാത്രമേ അവന്റെയനുഗ്രഹത്തെപ്പറ്റി ഭഗ്നാശരാകൂ⁴¹

(മക്കള്‍ വീണ്ടും ഈജിപ്തിലേക്കു പോയി.) അങ്ങനെ യൂസുഫ് നബിയുടെ അടുത്ത് പ്രവേശിച്ചിട്ട് അവര്‍ ബോധിപ്പിച്ചു: പ്രഭോ, ഞങ്ങളും കുടുംബവും ദുരിതബാധിതരായിരിക്കുന്നു. മോശം വിലയാണ് ഞങ്ങള്‍ കൊണ്ടുവന്നിട്ടുള്ളത്. എന്നാലും അളവു തികച്ചു തരികയും ഉദാരമനസ്‌കത പുലര്‍ത്തുകയും ചെയ്യണം. ഔദാര്യന്മാര്‍ക്ക് അല്ലാഹു തക്ക പ്രതിഫലം നല്‍കുകതന്നെ ചെയ്യുന്നതാണ്⁴²

അദ്ദേഹം ചോദിച്ചു: അറിവില്ലാത്തവരായിരുന്ന കാലത്ത് നിങ്ങള്‍ യൂസുഫിനെയും സഹോദരനെയും എന്തുചെയ്തുവെന്ന് ഓര്‍ക്കുന്നുണ്ടോ?! അവര്‍ ചോദിച്ചു: താങ്കള്‍ തന്നെയാണോ യൂസുഫ്? അദ്ദേഹം പ്രതികരിച്ചു: അതെ, ഞാനാണ് യൂസുഫ്, ഇതെന്റെ സഹോദരന്‍ ബിന്‍യാമീന്‍. നിശ്ചയം, അല്ലാഹു ഞങ്ങള്‍ക്ക് ഔദാര്യം ചെയ്തിരിക്കുന്നു. ആരെങ്കിലും സൂക്ഷ്മജീവിതം നയിക്കുകയും സഹനം കൈക്കൊള്ളുകയുമാണെങ്കില്‍ അത്തരം പുണ്യവാന്‍മാരുടെ കൂലി അല്ലാഹു പാഴാക്കുന്നതേയല്ല.⁴³

അവര്‍ പ്രതികരിച്ചു: അല്ലാഹു തന്നെ ശപഥം, അവന്‍ താങ്കളെ ഞങ്ങളെക്കാള്‍ ഉല്‍കൃഷ്ടനാക്കിയിരിക്കുന്നു. ഞങ്ങള്‍ പാപികള്‍ തന്നെയാണ്. അദ്ദേഹം വ്യക്തമാക്കി: നിങ്ങളെപ്പറ്റി ഒരധിക്ഷേപവും ഞാനിപ്പോള്‍ ഉന്നയിക്കുന്നില്ല! അല്ലാഹു നിങ്ങള്‍ക്ക് പൊറുത്തുതരട്ടെ. ഏറ്റം വലിയ കരുണാവാരിധിയത്രെ അവന്‍. നിങ്ങള്‍ എന്റെ കുപ്പായവുമായിപോയി പിതൃമുഖത്ത് വെച്ചുകൊടുക്കുക; എങ്കിലദ്ദേഹം കാഴ്ചയുള്ളയാളായി പരിണമിക്കുന്നതാണ്. എന്നിട്ട് കുടുംബങ്ങളെയൊന്നടങ്കം കൂട്ടി എന്റെയടുത്തേക്ക് വരിക⁴⁴

സാര്‍ത്ഥവാഹകസംഘം ഈജിപ്ത് വിട്ടപ്പോള്‍ തന്നെ അവരുടെ പിതാവ് പറഞ്ഞു: യൂസുഫിന്റെ ഗന്ധം ഞാന്‍ അനുഭവിക്കുക തന്നെ ചെയ്യുന്നുണ്ട്; എനിക്കു ബുദ്ധിഭ്രമമാണെന്നു നിങ്ങള്‍ അധിക്ഷേപിക്കുന്നില്ലെങ്കില്‍...! ചുറ്റുമുള്ളവര്‍ പ്രതികരിച്ചു: അല്ലാഹു തന്നെ ശപഥം, താങ്കളിപ്പോഴും ആ പഴയ മൂഢധാരണയില്‍ തന്നെയാണല്ലോ!⁴⁵
അങ്ങനെ ശുഭവാര്‍ത്താ വാഹകനെത്തിയപ്പോള്‍ ആ കുപ്പായം യഅ്ഖൂബ് നബിയുടെ മുഖത്ത് വെക്കുകയും ഉടനെ താന്‍ കാഴ്ചയുള്ളവനാകുകയും ചെയ്തു. അദ്ദേഹം ചോദിച്ചു: നിശ്ചയം നിങ്ങള്‍ക്കറിയാത്തത് അല്ലാഹുവിങ്കല്‍ നിന്നു ഞാനറിയുന്നുണ്ടെന്നു നിങ്ങളോടു ഞാന്‍ പറഞ്ഞിരുന്നില്ലേ? അവരപേക്ഷിച്ചു: ഞങ്ങളുടെ പാപമോചനത്തിനായി താങ്കള്‍ അല്ലാഹുവിനോടര്‍ഥിച്ചാലും! ഞങ്ങള്‍ കുറ്റവാളികളായിക്കഴിഞ്ഞിട്ടുണ്ട്, തീര്‍ച്ച. അദ്ദേഹം പ്രതികരിച്ചു: നിങ്ങള്‍ക്കുവേണ്ടി വഴിയെ ഞാനെന്റെ നാഥനോടര്‍ഥിക്കാം. ഏറെ പൊറുക്കുന്നവനും പരമകാരുണികനും തന്നെയാണവന്‍⁴⁶

അങ്ങനെ, അവര്‍ യൂസുഫ് നബിയുടെ അടുത്ത് എത്തിയപ്പോള്‍ മാതാപിതാക്കളെയദ്ദേഹം ആശ്ലേഷിച്ചു. അല്ലാഹു ഉദ്ദേശിക്കുന്ന പക്ഷം സമാധാനപൂര്‍ണരായി നിങ്ങള്‍ ഈജിപ്തില്‍ പ്രവേശിച്ചുകൊള്ളുക എന്നദ്ദേഹം സ്വാഗതമോതി; മാതാപിതാക്കളെ സിംഹാസനത്തിലിരുത്തി. എല്ലാവരും തനിക്ക് സാഷ്ടാംഗപ്രണാമമര്‍പ്പിച്ചു⁴⁷
അദ്ദേഹം പ്രതിവചിച്ചു: എന്റെ വന്ദ്യപിതാവേ, ഞാന്‍ പണ്ടുകണ്ട കിനാവിന്റെ വ്യാഖ്യാനമാണിത്. എന്റെ നാഥനത് സാക്ഷാല്‍കരിച്ചിരിക്കയാണ്. ജയില്‍ വിമുക്തനാക്കിയപ്പോഴും സഹോദരങ്ങള്‍ക്കും എനിക്കും മധ്യേ പിശാച് കുഴപ്പമുണ്ടാക്കിയതിനു ശേഷം മരുഭൂമിയില്‍ നിന്നു നിങ്ങളെയിവിടെ സന്നിഹിതരാക്കിയപ്പോഴും അവനെനിക്ക് മികച്ച നന്മയാണ് വര്‍ഷിച്ചത്. നിശ്ചയം എന്റെ നാഥന്‍ താനുദ്ദേശിക്കുന്ന വിഷയങ്ങളുടെ അതിസൂക്ഷ്മ സംവിധായകനാണ്. സര്‍വജ്ഞനും അതീവ യുക്തിമാനുമത്രേ അവന്‍⁴⁸

യൂസുഫ് നബി ദുആ ചെയ്തു: എന്റെ രക്ഷിതാവേ, എനിക്കു നീ രാജാധികാരം നല്‍കുകയും സ്വപ്നവ്യാഖ്യാനം പഠിപ്പിക്കുകയും ചെയ്തു. ഭുവന - വാനങ്ങളുടെ സ്രഷ്ടാവേ, ഇഹലോകത്തും പരലോകത്തും നീയാണ് എന്റെ സംരക്ഷകന്‍. എന്നെ നീ മുസ്‌ലിമായി മരിപ്പിക്കുകയും സജ്ജനങ്ങളിലുള്‍പ്പെടുത്തുകയും ചെയ്യേണമേ⁴⁹

ഇവയത്രയും അദൃശ്യ വൃത്താന്തങ്ങളില്‍ പെട്ടതാണ്. ദിവ്യസന്ദേശമായി താങ്കള്‍ക്കു നാമിത് നല്‍കിയിരിക്കുന്നു. (യൂസുഫ് നബിക്കെതിരെ)നിഗൂഢ പ്രവര്‍ത്തനങ്ങള്‍ക്കായി അവര്‍ പദ്ധതികളാവിഷ്‌കരിച്ചപ്പോള്‍ അവരൊന്നിച്ചു താങ്കളുണ്ടായിരുന്നില്ല.⁵⁰
താങ്കളെത്ര കൊതിച്ചാലും മിക്കമനുഷ്യരും സത്യവിശ്വാസം വരിക്കയില്ല. ഈ മതപ്രബോധന പ്രവര്‍ത്തനങ്ങള്‍ക്ക് അവരില്‍ നിന്നു ഒരു പ്രതിഫലവും അങ്ങ് ചോദിക്കുന്നില്ല. പ്രപഞ്ചത്തിനൊന്നാകെയുള്ള ഒരു ഉദ്‌ബോധനം തന്നെയാണ് ഈ ഖുര്‍ആന്‍.

ഭുവന - വാനങ്ങളിലുള്ള എത്രയെത്ര ദൃഷ്ടാന്തങ്ങള്‍ക്കരികിലൂടെയാണു നിഷേധികള്‍ നടന്നുപോകുന്നത്! അവയെക്കുറിച്ച് അവര്‍ പിന്തിരിഞ്ഞ് കളയുകയാണ്. മറ്റുവസ്തുക്കളെ അല്ലാഹുവിനോട് പങ്കാളികളാക്കിക്കൊണ്ടു മാത്രമേ അവരില്‍ മിക്കവരും വിശ്വസിക്കുന്നുള്ളൂ. തങ്ങളെ ഗ്രസിച്ചുകളയുന്ന എന്തെങ്കിലും ദൈവികശിക്ഷ വന്നെത്തുകയോ യദൃച്ഛയാ അന്ത്യനാള്‍ ആസന്നമാവുകയോ ചെയ്യുന്നതിനെക്കുറിച്ച് വിശ്വസ്തരായിരിക്കുകയാണോ അവര്‍?⁵¹

നബീ, പ്രഖ്യാപിക്കുക: ഇതാണ് എന്റെ മാര്‍ഗം-അല്ലാഹുവിന്റെ വഴിയിലേക്കു ഞാന്‍ ക്ഷണിക്കുന്നു. ഞാനും എന്നെ പിന്തുടര്‍ന്നവരും ഉള്‍ക്കാഴ്ചയോടെയാണ് നിലകൊള്ളുന്നത്. അല്ലാഹു പരിശുദ്ധനത്രെ; ഞാന്‍ ബഹുദൈവ വിശ്വാസികളില്‍ പെട്ടവനല്ല.⁵²

അങ്ങേക്ക് മുമ്പ് നാം ദൈവദൂതന്‍മാരായി നിയമിച്ചിരുന്നത് പട്ടണവാസികളായ പുരുഷന്‍മാരെത്തന്നെയാണ്; അവര്‍ക്ക് നാം ബോധനം നല്‍കുകയുണ്ടായി. നിഷേധികള്‍ ഭൂമിയില്‍ സഞ്ചരിക്കുകയും തങ്ങളുടെ പൂര്‍വികരുടെ പരിണതി എങ്ങനെയായിരുന്നുവെന്ന് കണ്ടുമനസ്സിലാക്കുകയും ചെയ്യുന്നില്ലേ? സൂക്ഷ്മാലുക്കള്‍ക്ക് പാരത്രികസദനമാണ് ഉദാത്തമായിട്ടുള്ളത്. ചിന്തിച്ചു ഗ്രഹിക്കുന്നില്ലേ നിങ്ങള്‍?⁵³

(നിഷേധികളുടെ സീമയറ്റ വിളയാട്ടമുണ്ടായപ്പോള്‍) ദൈവദൂതന്‍മാര്‍ ഹതാശരാവുകയും ജനങ്ങളാല്‍ തങ്ങള്‍ വ്യാജരാക്കപ്പെട്ടിരിക്കുന്നുവെന്ന് വിചാരിക്കുകയും ചെയ്തപ്പോള്‍ നമ്മുടെ സഹായം അവര്‍ക്ക് കിട്ടി; അങ്ങനെ നാമുദ്ദേശിച്ചവര്‍ സുരക്ഷിതരായി. അധര്‍മകാരികളായ ജനതയില്‍ നിന്നു നമ്മുടെ ശിക്ഷ തട്ടിമാറ്റപ്പെടുന്നതല്ല⁵⁴

നിശ്ചയം, അവരുടെ കഥാകഥനങ്ങളില്‍ ബുദ്ധിമാന്‍മാര്‍ക്ക് വലിയ ഗുണപാഠമുണ്ട്. കെട്ടിച്ചമച്ചുണ്ടാക്കുന്ന ഒരു വൃത്താന്തമല്ല ഈ ഖുര്‍ആന്‍; പ്രത്യുത പൂര്‍വവേദങ്ങളെ ശരിവെക്കുന്നതും എല്ലാവിഷയങ്ങളെയും അധികരിച്ചുള്ള ഒരു പ്രതിപാദനവും സത്യവിശ്വാസം കൈക്കൊള്ളുന്ന ജനതതിക്ക് സന്‍മാര്‍ഗ ദര്‍ശനവും ദിവ്യാനുഗ്രഹവുമാകുന്നു⁵⁵