അർ റഅ്ദ് - الرعد - Ar-Rad

1. 'റഅ്ദ്' എന്ന അറബി പദത്തിന്ന് ഇടി എന്നാണര്‍ഥം. ഇടിയും മിന്നലും ഇടിത്തീയുമൊക്കെ മനുഷ്യരെ അമ്പരപ്പിക്കുകയും പേടിപ്പെടുത്തുകയും ചെയ്യുന്ന പ്രതിഭാസങ്ങളാണ്. ഈ സൂറയിലെ 12,13 സൂക്തങ്ങളില്‍ അവയെക്കുറിച്ച പരാമര്‍ശം കാണാം. അദ്ഭുതകരവും ചിന്തോദ്ദീപകവുമായ പ്രാപഞ്ചിക പ്രതിഭാസങ്ങളില്‍ നിന്നു മൂന്നുകാര്യങ്ങള്‍ അല്ലാഹു ഇവിടെ പരാമര്‍ശിച്ചിരിക്കുന്നതായി കാണാം: ആകാശങ്ങളുടെ സൃഷ്ടിപ്പ്, ദൈവികസിംഹാസനമായ അര്‍ശ്, സൂര്യനെയും ചന്ദ്രനെയും മനുഷ്യരുടെ ആവശ്യങ്ങള്‍ക്കായി വിധേയമാക്കിയത്. അത്യദ്ഭുതകരമായ ഇവ സൃഷ്ടിച്ച സര്‍വ ശക്തന്ന് മനുഷ്യനെ മരണാനന്തരം പുനഃസൃഷ്ടിക്കുക എന്നത് ഒട്ടും പ്രയാസകരമല്ല എന്നു പഠിപ്പിക്കാനാണിത്.

2. വെളുത്തതും കറുത്തതും, മധുരമുള്ളതും പുളിയുള്ളതും, ഉഷ്ണപ്രകൃതം ശീതപ്രകൃതം, ചെറുത് വലുത് എന്നിങ്ങനെ പലതരം വൈജാത്യങ്ങള്‍ ഫലവര്‍ഗങ്ങളിലുണ്ടല്ലോ.

3. മധുരമുന്തിരിയും കൈപ്പക്കയും കൊടുംപുളിയുമെല്ലാം ഒരേമണ്ണില്‍ ഒരേ ജലസേചനംവഴി വളരുന്നു. ഇത്തരം ഓരോന്നിലും രുചികൂടിയതും കുറഞ്ഞതുമുണ്ട്. എന്തുകൊണ്ടാണ് ഈ നാനാത്വമെന്ന് ആരെങ്കിലും ചിന്തിക്കാറുണ്ടോ? പ്രപഞ്ചസ്രഷ്ടാവും നിയന്താവുമായ അല്ലാഹുവിനെ നിഷേധിക്കുന്ന നിരീശ്വരവാദികള്‍ക്കും യുക്തിവാദികള്‍ക്കുമൊക്കെ ഇപ്പറഞ്ഞ കാര്യങ്ങളില്‍ ഒട്ടേറെ ദൃഷ്ടാന്തങ്ങളുണ്ട്.

4. ഇല്ലായ്മയില്‍ നിന്നാണ് മനുഷ്യനെ അല്ലാഹു പടച്ചത്. അവന്ന് ഇനിയൊരിക്കല്‍ അതേ മനുഷ്യനെ പുനഃസൃഷ്ടിക്കാന്‍ കഴിയില്ല എന്ന വാദം എത്ര നിരര്‍ഥകവും അതേസമയം അത്യദ്ഭുതകരവുമാണ്! യാതൊരു തത്ത്വദീക്ഷയും യുക്തിബന്ധവുമില്ലാത്ത നിഷേധം വെച്ചുപുലര്‍ത്തുന്നവര്‍ കഠിനവും ശാശ്വതവുമായ നരകശിക്ഷക്കു വിധേയരായിത്തീരും. ശിക്ഷയെക്കുറിച്ച താക്കീതുണ്ടാകുമ്പോള്‍ 'എന്നാല്‍ അതിങ്ങുവരട്ടെ' എന്നു അവര്‍ തിടുക്കം കാട്ടുന്നു - എന്തൊരു മൗഢ്യം! നിന്ദ്യവും ഹീനവുമായ ദൈവിക ശിക്ഷകള്‍ക്ക് വിധേയരായ നിഷേധീവിഭാഗങ്ങള്‍ എത്രയെത്രയാണ് ചരിത്രത്തിന്റെ ശവപ്പറമ്പില്‍. എന്നാല്‍ ഏതുനിഷേധിയും പശ്ചാത്തപിച്ചുമടങ്ങുന്നുവെങ്കില്‍ അല്ലാഹു പാപമോചനം കനിഞ്ഞരുളുന്നതാണ്.

5. ദൃശ്യമെന്നോ അദൃശ്യമെന്നോ രാത്രിയെന്നോ പകലെന്നോ വ്യത്യാസമില്ലാതെ സര്‍വകാര്യങ്ങളും അറിയുന്നവനും ത്രികാലജ്ഞനുമാണ് അല്ലാഹു. ഓരോ സ്ത്രീയുടെയും ഗര്‍ഭസ്ഥശിശുവിന്റെ സമ്പൂര്‍ണവിവരങ്ങളും ഗര്‍ഭകാലം പൂര്‍ണമോ അപൂര്‍ണമോ എന്നതുമൊക്കെ അവങ്കലുണ്ട്.

6. ഒട്ടേറെ മലക്കുകളുടെ സുരക്ഷാവലയത്തിലാണ് മനുഷ്യന്‍. അല്ലാഹുവിന്റെ നിര്‍ദേശാനുസരണം ആ സുരക്ഷാചുമതല അവര്‍ നിര്‍വഹിച്ചുകൊണ്ടിരിക്കും. ഇക്കാര്യം ഇമാം ബുഖാരി(റ)യുടെ ഒരു ഹദീസിലും വ്യക്തമാക്കിയിട്ടുണ്ട്. തിരുനബി(സ്വ) പഠിപ്പിച്ചു: ഇടതടവില്ലാതെ രാത്രിയും പകലും മലക്കുകള്‍ നിങ്ങളിലേക്ക് വന്നുകൊണ്ടിരിക്കും. സുബ്ഹ്-അസ്വ്‌റ് നമസ്‌കാരവേളകളില്‍ അവര്‍ സന്ധിക്കുന്നതാണ് (ബുഖാരി). ഇമാം മുജാഹിദിന്റെ ഒരു നിവേദനത്തില്‍, ഉറക്കത്തിലും ഉണര്‍ച്ചയിലും ക്ഷുദ്രജീവികള്‍, മനുഷ്യര്‍, ജിന്നുകള്‍ എന്നിവയില്‍നിന്നു മലക്കുകള്‍ ഓരോവ്യക്തിക്കും സുരക്ഷിതത്വം നല്‍കുന്നതാണ് എന്ന് സ്പഷ്ടമായി പറഞ്ഞിട്ടുണ്ട്.

7. മനുഷ്യനെ അല്ലാഹു ആദരിച്ചിരിക്കുന്നു (ഖുര്‍ആന്‍: 17:70). അതനുസരിച്ച് ഈ ലോകവും അതിലുള്ള സര്‍വവും അവന്നു വിധേയമാക്കി. തിട്ടപ്പെടുത്താനാവാത്ത അനുഗ്രഹങ്ങള്‍ സംവിധാനിച്ചു. ഈ പശ്ചാത്തലത്തില്‍, അനുഗ്രഹദാതാവായ അല്ലാഹുവിനെ അനുസരിച്ചു ജീവിക്കുകയും കൃതജ്ഞത പ്രകാശിപ്പിക്കുകയും ചെയ്യേണ്ടത് മനുഷ്യന്റെ അനിവാര്യബാധ്യതയാണ്. അക്കാര്യമവഗണിച്ച്, കൃതഘ്‌നതയുടെ മാര്‍ഗമാണ് സ്വീകരിക്കുന്നതെങ്കില്‍ അനുഗ്രഹങ്ങള്‍ നിഷേധിക്കപ്പെടും. പ്രയാസങ്ങളും കഷ്ടപ്പാടുകളും വരും. ഇതവന്റെ സ്വയംകൃതാനര്‍ഥമാണ്. അവന്‍ നിലപാട് മാറ്റിയപ്പോള്‍ അല്ലാഹുവും മാറ്റി.

8. ജലനിര്‍ഭരമായ കാര്‍മേഘങ്ങളും ഇടിമിന്നലും ഉണ്ടാക്കുന്നത് അല്ലാഹുവാണല്ലോ. അവയൊക്കെ സ്രഷ്ടാവിന്റെ നാമം വാഴ്ത്തുന്നുണ്ട്. അവ കാണുമ്പോള്‍ മനുഷ്യന് ഒരേസമയം പ്രത്യാശയും ഭയവുമുണ്ടാകും. തികച്ചും അപ്രതീക്ഷിതമായാണ് ചിലര്‍ക്ക് ഇവ സംഹാരകമാകുന്നത്. മിന്നലേല്‍ക്കുക, ഇടിത്തീയിറങ്ങുക എന്നതൊക്കെ സുപരിചിതമാണല്ലോ. തല്‍സമയം ചിലപ്പോള്‍ ആ ഹതഭാഗ്യര്‍ അല്ലാഹുവിനെക്കുറിച്ച തര്‍ക്കങ്ങളിലും വാഗ്വാദങ്ങളിലും വ്യാപൃതരായിരിക്കും.
ഈ സൂക്തത്തിന്റെ അവതരണ പശ്ചാത്തലം സംബന്ധിച്ചു വ്യാഖ്യാതാക്കള്‍ ഒരു സംഭവം രേഖപ്പെടുത്തിയതായി കാണാം: കടുത്ത ഒരവിശ്വാസിയുടെ അടുത്തേക്ക് നബി(സ്വ) ഒരു ദൂതനെ ഒന്നിലധികം തവണ അയച്ചു. നബി(സ്വ)യെയും അല്ലാഹുവിനെയും പരിഹസിക്കയാണയാള്‍ ചെയ്തത്-ഈ അല്ലാഹു സ്വര്‍ണമോ വെള്ളിയോ ചെമ്പോ? ഇടിവാളേറ്റ് അവന്‍ ചത്തുമലച്ചു-ബസ്സാര്‍(അസ്ബാബുന്നുസൂല്‍: -ഇമാം വാഹിദി:156)

9. ആരാധനകള്‍ക്കര്‍ഹന്‍ അല്ലാഹുമാത്രമാണ്. അവ സ്വീകരിച്ച് പ്രതിഫലം നല്‍കാനും ആരാധകരുടെ പ്രാര്‍ഥനകള്‍ക്ക് ഉത്തരം നല്‍കാനും അവന്നേ കഴിയൂ. കിണറ്റിന്റെ വക്കത്തുനിന്ന് ആഴത്തിലേക്ക് കൈനീട്ടി വെള്ളമേ, എന്റെ വായിലേക്കു വാ; ഞാന്‍ കഠിനദാഹാര്‍ത്തനാണ് എന്നു പറയുന്ന പമ്പരവിഢ്ഢിയെപ്പോലെയാണവര്‍. എന്നാല്‍ ലോകത്തുള്ള സകലതും അല്ലാഹുവിനെ മാത്രം വണങ്ങുന്നു, അവനോടുമാത്രം വിധേയത്വം കാട്ടുന്നു-നിര്‍ബന്ധിതാവസ്ഥയിലെങ്കിലും!

10. ബഹുദൈവ വിശ്വാസികള്‍ അല്ലാഹു അല്ലാത്തവരെ ആരാധിക്കുന്നതിന്റെ ന്യായതയന്വേഷിക്കുകയാണ് ഖുര്‍ആന്‍. അവരുടെ മുരത്ത മൗഢ്യവും ബുദ്ധിശൂന്യതയും യുക്തിരാഹിത്യവും അനാവരണംചെയ്യുന്ന പരിഹാസാത്മകമായ ഒരു രീതിയാണ് അതിനായി ഇവിടെ സ്വീകരിക്കുന്നത്. അല്ലാഹുവും മറ്റുദൈവങ്ങളും സൃഷ്ടികര്‍മം നടത്തിയിട്ട് ഈ ആരാധകര്‍ക്കവ വിവേചിച്ചറിയാന്‍ കഴിയാതെപോകുകയാണോ?! രണ്ടു വ്യത്യസ്ത കമ്പനികളുണ്ടാക്കുന്ന ഒരേതരം ഉല്‍പന്നം തിരിച്ചറിയാനാകാതെ ഉപഭോക്താക്കള്‍ വിഷമിക്കാറുണ്ടല്ലോ. അതൊന്നുമല്ല കാര്യം; അവരുടെ ചിന്താശൂന്യത തന്നെ. അല്ലാഹുവാണ് സമസ്ത വസ്തുക്കളുടെയും സ്രഷ്ടാവ്. സര്‍വരെയും കീഴടക്കുന്ന ആ സ്രഷ്ടാവ് ഏകന്‍ മാത്രമാണ്.

11. സത്യത്തിന്റെയും അസത്യത്തിന്റെയും, ഈമാനിന്റെയും കുഫ്‌റിന്റെയും ഉപമയാണിത്. പ്രത്യക്ഷത്തില്‍ ഉയര്‍ന്നുപൊങ്ങിനില്‍ക്കുന്ന നുരയും പതയും ലോഹങ്ങളുടെ കീടവും ഫലശൂന്യമാണ്; താമസിയാതെ അത് അപ്രത്യക്ഷമാകും. ഉദാഹരണത്തിലെ ജലവും ലോഹവുമാണ് മനുഷ്യര്‍ക്ക് ഉപകാരപ്പെടുക. ഫലദായകമായത് എന്തും അവശേഷിച്ചിരിക്കും എന്ന ഈ പ്രസ്താവം ഒരു പൊതുതത്ത്വം കൂടിയാണ് എന്നത് പ്രത്യേകം പ്രസ്താവ്യമത്രേ.

12. സന്മാര്‍ഗത്തിലേക്കുള്ള അല്ലാഹുവിന്റെ ക്ഷണം സ്വീകരിച്ചവര്‍ക്കേ ശാശ്വതവിജയമുണ്ടാകൂ. അല്ലാത്തവര്‍, നിഷേധത്തിന്റെ പാതയില്‍ കഴിഞ്ഞുകൂടിയവര്‍ പരലോകത്ത് കനത്ത പരാജയത്തിലായിരിക്കും. ആ ഗുരുതരനഷ്ടത്തെപ്പറ്റി അല്ലാഹുവിന്റെ ദൂതന്‍മാര്‍ മതിയായ മുന്നറിയിപ്പും താക്കീതും നല്‍കിയിരുന്നെങ്കിലും ചിന്താശൂന്യതയും ഭൗതികപ്രമത്തതയും ഇച്ഛാപൂജയുമായി മനുഷ്യന്‍ അതവഗണിച്ചു. ഒടുവില്‍ പരലോകത്ത്‌വെച്ച് തങ്ങളുടെ ശാശ്വതപരാജയം ബോധ്യമാകുമ്പോള്‍ ഏത് അമൂല്യവസ്തുവും മോചനദ്രവ്യമായോ പ്രായശ്ചിത്തമായോ നല്‍കാനവര്‍ തയ്യാറാകും. പക്ഷേ, നരകം വരിക്കുകയല്ലാതെ ഗത്യന്തരമുണ്ടാകയില്ല.

13. സത്യത്തെ നിഷേധിക്കുന്നവന്‍ മുരത്ത അഹങ്കാരിയാണ്. കണ്ണുകാണാത്ത കുരുടനെപ്പോലെയാണവന്‍. ദുര്‍മാര്‍ഗത്തില്‍ ബഹുമുഖാന്ധകാരങ്ങളില്‍ തപ്പിത്തടയുകയാണവന്‍ ചെയ്യുക. എന്നാല്‍ സത്യമതവും ഖുര്‍ആനും അംഗീകരിക്കുന്നവര്‍ മാതൃകാ വ്യക്തിത്വങ്ങളും പാരത്രികബോധമുള്ളവരുമായിരിക്കുന്നതാണ്. അവര്‍ ശാശ്വതവിജയത്തിന്നര്‍ഹരായിരിക്കും.

14. ഇവിടെ മൂന്നു സൂക്തങ്ങളില്‍ സ്വര്‍ഗപ്രവേശനത്തിനര്‍ഹരാകുന്ന സൗഭാഗ്യവാന്‍മാരുടെ ഏതാനും വിശേഷണങ്ങള്‍ പറഞ്ഞത് ഏറെ ശ്രദ്ധേയമാണ്: അല്ലാഹുവിനോടുള്ള കരാറും ഉറപ്പുകളും പാലിക്കുക, ലംഘിക്കരുത്. അവന്‍ ചേര്‍ക്കാന്‍ കല്‍പിച്ച ബന്ധങ്ങള്‍ ദൃഢീകരിക്കണം. അവനെ ഭയപ്പെടുകയും ശാസനകള്‍ അനുസരിക്കുകയും ചെയ്യുക. മഹ്ശറിനെയും ഹിസാബിനെയും ഭയപ്പെടുക. ദൈവപ്രീതി കാംക്ഷിച്ച്, പരീക്ഷണങ്ങളിലും പ്രതിസന്ധിഘട്ടങ്ങളിലും സഹനം മുറുകെപിടിക്കുക. നമസ്‌കാരം കൃത്യമായനുഷ്ഠിക്കുക. ഉത്തമ മാര്‍ഗങ്ങളില്‍ പണം ചെലവഴിക്കുക. നന്മകൊണ്ട് തിന്മയെ ഉപരോധിച്ച് ശാന്തിയുടെയും സമാധാനത്തിന്റെയും മാതൃകയാവുക - ഇവയോരോന്നും ധാരാളം വിശദീകരണങ്ങളുള്‍ക്കൊള്ളുന്ന തത്ത്വങ്ങളാണ്. ഇവരാണ് സ്വര്‍ഗാവകാശികള്‍.

15. സത്യവിശ്വാസവും സല്‍കര്‍മങ്ങളും മുറുകെപിടിച്ച ആളുകള്‍ കൂട്ടുകുടുംബമായി, തലമുറകളായുള്ള മാതാപിതാക്കളും സന്താനങ്ങളുമായാണ് സ്വര്‍ഗത്തില്‍ നിവസിക്കുക. മുഴുവന്‍ കവാടങ്ങളിലൂടെയും മലക്കുകള്‍ കടന്നുവന്നുകൊണ്ട് അവര്‍ക്ക് ആശംസകളര്‍പ്പിച്ചുകൊണ്ടിരിക്കുന്നതാണ്. എന്തൊരാഹ്ലാദനിര്‍ഭരമായ ജീവിതമായിരിക്കും അത്.അവിടത്തെ സുഖസൗകര്യങ്ങള്‍ക്കാണെങ്കില്‍ കൈയുംകണക്കുമില്ല. ഒരാള്‍ക്കും ഊഹിക്കാനാകാത്തതാണ് അവയെന്ന് പ്രസിദ്ധമായ ഹദീസില്‍ വ്യക്തമാക്കിയിട്ടുണ്ട്. കരുണാമയനായ റബ്ബ് നമ്മെ ആ സ്വര്‍ഗത്തിന്റെ അവകാശികളാക്കട്ടെ.

16. അല്ലാഹുവിന്റെ ഇഷ്ടങ്ങള്‍ ഭൂമിയില്‍ നടപ്പാക്കാനും അനിഷ്ടങ്ങള്‍ വിപാടനംചെയ്യാനുമാണ് മനുഷ്യന്‍ നിയുക്തനായിരിക്കുന്നത്. ആലമുല്‍ അര്‍വാഹില്‍ (ആത്മാക്കളുടെ ലോകത്ത്) പണ്ടു നടന്ന കരാറാണിവിടെ സൂചന. പ്രവാചകന്‍മാര്‍ വന്ന് ആ കരാറിന്റെ ഉള്ളടക്കങ്ങളും താല്‍പര്യങ്ങളും ദൃഢീകരിച്ചു. ഖുര്‍ആന്‍ 2: 27 കാണുക. മാതൃ-പിതൃ-പുത്ര ബന്ധങ്ങളും കുടുംബബന്ധങ്ങളും മാനവിക സൗഹൃദവുമൊക്കെ സുസ്ഥാപിതമാക്കാന്‍ അല്ലാഹു കല്‍പിച്ചു. എന്നിട്ടും കുഴപ്പവും നാശവുമായി നടക്കുന്ന പ്രതിലോമകാരികള്‍ക്ക് ദൈവികശാപവും നരകശിക്ഷയുമാണുണ്ടാവുക.

17. സര്‍വവിധ ഭൗതികപുരോഗതിയും സാങ്കേതിക നേട്ടവും കൈവരിച്ചിട്ടും ശാന്തിയും സമാധാനവും സ്വസ്ഥതയുമില്ലാതെ പരിഭ്രമിച്ച് വേവലാതിപ്പെടുന്ന ആധുനികലോകത്തിനുള്ള ഒറ്റമൂലിയാണ് ഈ കൊച്ചുവചനം-ദൈവസ്മരണ മുറുകെ പിടിക്കുക; എവിടെയുമത് കൈവിട്ടുകൂടാ. അത്തരമൊരു ജീവിതക്രമത്തിന്നു മാത്രമേ ലോകസമാധാനം കൈവരിക്കാനാകൂ.

18. എല്ലാ ജനപഥങ്ങളിലേക്കും അല്ലാഹു പ്രവാചകന്‍മാരെ നിയോഗിച്ചിരുന്നു. നിരന്തരമായി ഖുര്‍ആന്‍ അതു സൂചിപ്പിച്ചുകൊണ്ടിരിക്കാറുണ്ട്. ഈ അധ്യായം ഏഴാംസൂക്തത്തിലതു സ്പഷ്ടമാക്കുകയും ചെയ്തിരുന്നു - അങ്ങോട്ടാണ് സൂചന.

19. മതത്തിന്റെ മൂല ശിലകളാണിത്: ഏതൊരു സൃഷ്ടിയെയും പടച്ചതും സംരക്ഷിക്കുന്നതും നിയന്ത്രിക്കുന്നതുമൊക്കെ അല്ലാഹുവാണ്. അതുകൊണ്ട് അവനെ മാത്രമേ ആരാധിക്കാവൂ. എന്തൊക്കെ അനുകൂല സാഹചര്യങ്ങള്‍ ഒരാള്‍ക്കുണ്ടെങ്കിലും മുഴുവന്‍ കാര്യങ്ങളും അല്ലാഹുവില്‍ ഭരമേല്‍പിക്കണം. അവസാന മടക്കസ്ഥലവും ആശ്രയകേന്ദ്രവും അവന്‍ മാത്രമാണ്.

20. മൂസാനബി(അ)യുടെ വടിയും സ്വാലിഹ്‌നബി(അ)യുടെ ഒട്ടകവും പോലെ മുഹമ്മദ് നബി(സ്വ)ക്ക് എന്താണ് ഒരു ദൃഷ്ടാന്തം നല്‍കപ്പെടാത്തത് എന്ന് നിഷേധികള്‍ ചോദിച്ചത് 27-ാം സൂക്തത്തില്‍ പറഞ്ഞിരുന്നല്ലോ. എന്നാല്‍ മഹാദ്ഭുതങ്ങള്‍ നിറഞ്ഞതായിട്ടും ഈ ഖുര്‍ആന്‍ അവര്‍ വിശ്വസിക്കുന്നില്ല. നിഷേധികള്‍ സത്യവിശ്വാസം സ്വീകരിക്കുക എന്നതില്‍ പ്രതീക്ഷക്ക് വല്ല വകയുമുണ്ടോ? ആശമുറിഞ്ഞ കാര്യമാണത്. ഇനി, സംഭവിക്കുക ഇതാണ് - അവര്‍ ഉന്മൂലനം ചെയ്യപ്പെടുകയും ഇസ്‌ലാം വിജയക്കൊടി നാട്ടുകയും ചെയ്യും എന്ന ദിവ്യവാഗ്ദാനം സാക്ഷാല്‍കൃതമാകും. ബദ്‌റില്‍ അതു സംഭവിച്ചു. നിഷേധികളും ധിക്കാരികളും ഉന്മൂലനവിധേയരായി. തുടര്‍ന്ന് പുണ്യദീനിന്റെ ജൈത്രയാത്രയായിരുന്നു. ഇസ്‌ലാമികഭരണവും നിലവില്‍വന്നു.

21. വ്യാജദൈവങ്ങളായ ബിംബങ്ങള്‍ എത്രവലിയ ദൈന്യതയാണര്‍ഹിക്കുന്നത്! അവക്ക് വല്ല മേല്‍വിലാസവുമുണ്ടോ? തെന്നിന്ത്യന്‍ ദൈവങ്ങളെ ഉത്തരേന്ത്യക്കാര്‍ക്കോ യൂറോപ്യരുടെ ദൈവങ്ങളെ അമേരിക്കക്കാര്‍ക്കോ അറിയില്ല. പ്രപഞ്ചംമുഴുവന്‍ സൃഷ്ടിച്ചുസംരക്ഷിക്കുകയും ഓരോ വ്യക്തിയുടെയും മുഴുവന്‍ കാര്യങ്ങളും നിരീക്ഷിച്ചുകൊണ്ടിരിക്കുകയും ചെയ്യുന്ന അല്ലാഹുവും കരിങ്കല്ലിന്റെ പ്രതിഷ്ഠയും തമ്മില്‍ എന്തുസാമ്യമാണ്! അതോ അല്ലാഹുവിന്റെ അറിവില്‍പെടാത്ത ദൈവങ്ങളാണോ ഇവ എന്നാണ് പരിഹാസാത്മകമായ ചോദ്യം. ബഹുദൈവാരാധകരുടെ കടുത്ത മൗഢ്യത്തിലേക്കാണിത് വിരല്‍ചൂണ്ടുന്നത്.

22. ജൂതന്മാരും ക്രിസ്ത്യാനികളുമാണിവിടെ വിവക്ഷ. അവര്‍ക്ക് നബി(സ്വ)യും ഖുര്‍ആനും സത്യമാണെന്ന് നന്നായറിയാമായിരുന്നു. അക്കാരണത്താലാണ് പലരും അതംഗീകരിക്കുന്നത്. പക്ഷേ, ചിലര്‍ തങ്ങളുടെ ഭൗതികതാല്‍പര്യങ്ങളുടെ സംരക്ഷണാര്‍ഥം ചിലത് തള്ളുകയും മറ്റുചിലത് കൊള്ളുകയും ചെയ്തു. എന്നാല്‍, നിങ്ങളൊക്കെ അംഗീകരിക്കുകയും മരണാനന്തരം ലക്ഷീകരിക്കുകയും ചെയ്യുന്ന അല്ലാഹുവിന്റെ സല്‍പന്ഥാവിലേക്ക് ക്ഷണിക്കുക മാത്രമാണ് എന്റെ ദൗത്യം എന്ന് ലോകത്തോട് പ്രഖ്യാപിക്കാന്‍ നബി(സ്വ)യോട് പറയുകയാണ്.

23. സംബോധന നബി(സ്വ)യോടാണെങ്കിലും അനുയായികളും മര്‍ത്യകുലം ഒന്നടങ്കവുമാണ് ഉദ്ദേശ്യം. ഖുര്‍ആന്റെയും നബി(സ്വ)യുടെയും സാധുതയും സ്വീകാര്യതയും ബോധ്യമായിട്ടും അവ തള്ളിക്കളയുന്നവര്‍ക്ക് ശാശ്വത പരാജയവും നരകവുമാണ് പരലോകത്തുണ്ടാവുക. യാതൊരു സംരക്ഷകരും വിമോചകരും അവിടെ ആര്‍ക്കുമുണ്ടാകുന്നതല്ല.

24. നബി(സ്വ)യെ കണ്ണടച്ച് നിഷേധിച്ചവര്‍ക്കുള്ള മറുപടിയാണിത്. ഇത്രയേറെ ഭാര്യമാരുണ്ടായാല്‍ ആരാധനക്കും മതപ്രബോധന പ്രവര്‍ത്തനങ്ങള്‍ക്കുമൊക്കെ പിന്നെ എങ്ങനെ സമയംകിട്ടും എന്നായിരുന്നു ചില വേദക്കാരുടെ പരിഹാസാത്മകമായ ചോദ്യം. എന്നാല്‍ അവര്‍ ആദരിക്കുകയും പ്രവാചകരായി അംഗീകരിക്കുകയും ചെയ്യുന്ന പല മുന്‍ഗാമികള്‍ക്കും ഭാര്യാസന്താനങ്ങളുണ്ടായിരുന്നു. ദാവൂദ്‌നബി(അ)(കിങ്‌ഡേവിഡ്)ക്ക് നൂറുഭാര്യമാരാണുണ്ടായിരുന്നത്. (ബുഖാരി.) മകന്‍ സുലൈമാന്‍(അ)(കിങ് സോളമന്‍)ക്കും ഒട്ടേറെ പത്‌നിമാരുണ്ടായിരുന്നു.

25. മക്കാമുശ്‌രിക്കുകള്‍ ദുര്‍വാശിപിടിച്ച് പലവിധ അമാനുഷദൃഷ്ടാന്തങ്ങളും ആവശ്യപ്പെട്ടിരുന്നു. സൂറത്തുല്‍ ഇസ്രാഅ് 90-93 കാണുക. അല്ലാഹുവിന്റെ സമ്മതാനുസാരമാണ്, ദൂതന്റെ സ്വേഷ്ടയനുസരിച്ചല്ല അമാനുഷകൃത്യങ്ങള്‍ ഉണ്ടാവുക എന്ന വസ്തുതയാണ് ഇവിടെ ഉണര്‍ത്തുന്നത്.

26. ലോകത്ത് നടക്കുന്ന ചെറുതോ വലുതോ ആയ ഏതുകാര്യത്തിന്നും അല്ലാഹുവിങ്കല്‍ ഒരുനിര്‍ണയമുണ്ട്; ആ കാര്യം എവിടെ, എങ്ങനെ, എപ്പോള്‍ സംഭവിക്കണം എന്നതുസംബന്ധിച്ച സമഗ്രമായ രൂപം ഉല്ലേഖിതമായിരിക്കും. ഉമ്മുല്‍ കിതാബ് അഥവാ ലൗഹുല്‍ മഹ്ഫൂള് അതാണ്. ഇവയില്‍ മൗലികവും അടിസ്ഥാനപരവുമല്ലാത്ത വിഷയങ്ങളില്‍ അല്ലാഹുവിന്റെ ഉദ്ദേശ്യാനുസൃതം ഭേദഗതികള്‍ സംഭവിക്കാവുന്നതാണ്.

27. വാഗ്ദത്ത ശിക്ഷകള്‍ നിഷേധികളെ പിടികൂടിയോ ഇല്ലേ, അതോ അതിനുമുമ്പേ നബി(സ്വ) വഫാത്തായോ എന്നത് ഒരു അടിസ്ഥാനവിഷയമല്ല; പാരത്രികശിക്ഷ അവര്‍ക്ക് ലഭിച്ചേതീരൂ. നബി(സ്വ)യുടെ ദൗത്യം സത്യപ്രബോധനമാണ്. ആരത് സ്വീകരിച്ചു, അവഗണിച്ചു മുതലായ കാര്യങ്ങളൊക്കെ ആളുകളെ വിചാരണചെയ്ത് ഓരോരുത്തര്‍ക്കും അര്‍ഹിക്കുന്ന പ്രതിഫലം അല്ലാഹുവാണ് നല്‍കുക. ഒരു കാര്യം നിഷേധികള്‍ക്കും തള്ളിക്കളയാനാവില്ല - അറേബ്യന്‍ ഉപദ്വീപ് മുഴുവന്‍ ബഹുദൈവവിശ്വാസികളുടെയും ബിംബാരാധകരുടെയും കൈപ്പിടിയിലായിരുന്നല്ലോ. അവരുടെ ഭൂവിസ്തൃതി ക്രമേണ കുറഞ്ഞു ചെറുതായിവരികയാണ്, അവിടങ്ങളിലൊക്കെ തൗഹീദും ഇസ്‌ലാമും വ്യാപിച്ചുകൊണ്ടേയിരിക്കുന്നു. അല്ലാഹുവിന്റെ വിധിയും തീരുമാനവും മാത്രമേ പ്രപഞ്ചത്തില്‍ നടക്കുകയുള്ളൂ എന്ന് താല്‍പര്യം.

28. അല്ലാഹുവിന്റെ ഇഷ്ട ദാസന്‍മാരായ പ്രവാചകന്‍മാര്‍ക്കെതിരെ എല്ലാകാലഘട്ടങ്ങളിലും സത്യനിഷേധികള്‍ ഗൂഢാലോചനകളും കുതന്ത്രങ്ങളും മെനയുകയും നിര്‍ദാക്ഷിണ്യം പ്രതിലോമപ്രവര്‍ത്തനങ്ങള്‍ നടത്തുകയും ചെയ്തിരുന്നു. അതുകൊണ്ട് പ്രവാചകനിയോഗം നിറുത്തിവെക്കപ്പെടുകയോ സത്യമതത്തിന്റെ പ്രബോധനം അവസാനിപ്പിക്കപ്പെടുകയോ ഉണ്ടായില്ല. ഏതുഗൂഢാലോചനയും അല്ലാഹു തകര്‍ത്തു. കുതന്ത്രപ്രവര്‍ത്തനങ്ങളുടെ തിക്തഫലം പരലോകത്തുവെച്ച് നിഷേധികള്‍ ഏറ്റുവാങ്ങുകയും ചെയ്യും.

29. ജൂതന്‍മാരും ക്രിസ്ത്യാനികളും ബഹുദൈവവിശ്വാസികളും മുഹമ്മദ് നബി(സ്വ)യുടെ പ്രവാചകത്വം നിഷേധിക്കുന്നു. എന്നാല്‍, ആര്‍ജവപൂര്‍വം ആ ജല്‍പനത്തിനു മറുപടിനല്‍കാന്‍ നബി(സ്വ)യോട് അല്ലാഹു നിര്‍ദേശിച്ചിരിക്കയാണ് - എന്റെ പ്രവാചകത്വത്തിനും ദൗത്യത്തിനും നിങ്ങളുടെയാരുടെയും അംഗീകാരമാവശ്യമില്ല. ഇനി, ആര്‍ക്കെങ്കിലും അങ്ങനെയൊരാവശ്യമുണ്ടെങ്കില്‍ അതിനു മതിയായ നിരവധി തെളിവുകള്‍ ഉണ്ട്താനും. പ്രഥമവും പ്രധാനവുമായി അല്ലാഹുവിന്റെ സാക്ഷ്യംതന്നെ. നാല്‍പതു വയസ്സുവരെ പവിത്രപശ്ചാത്തലത്തില്‍ അവന്‍ വളര്‍ത്തി. തുടര്‍ന്ന് ഖുര്‍ആന്‍ നല്‍കുകയും മറ്റുവിധ അമാനുഷിക കൃത്യങ്ങള്‍ സാക്ഷാല്‍ക്കരിക്കയും ചെയ്തു. ഇതിനുപുറമെ തൗറാത്തിന്റെയും ഇന്‍ജീലിന്റെയും വിജ്ഞാനങ്ങള്‍ ശരിയാംവണ്ണം കരസ്ഥമാക്കിയ നിഷ്പക്ഷരായ വേദപണ്ഡിതന്‍മാര്‍ നബി(സ്വ)യെയും ഖുര്‍ആനെയും തങ്ങളുടെ ഗ്രന്ഥങ്ങളില്‍ നിന്നുതന്നെ യഥായോഗ്യം മനസ്സിലാക്കി ഇസ്‌ലാംമതം സ്വീകരിച്ചു. ഈ ഇരുപത്തിയൊന്നാം നൂറ്റാണ്ടിലും അതു തുടര്‍ന്നുകൊണ്ടിരിക്കുകയാണല്ലോ.
ഈ പശ്ചാത്തലത്തില്‍ പ്രവാചക പ്രസ്താവത്തിന്റെ സംഗ്രഹമിതാണ്: അല്ലാഹുവിന്റെ കല്‍പനയും അനിഷേധ്യമായ യാഥാര്‍ഥ്യങ്ങളും ഉള്‍ക്കൊള്ളാനും അംഗീകരിക്കാനും അതനുസരിച്ച് സന്മാര്‍ഗം സ്വീകരിക്കാനും ദുര്‍വാശിമൂലം സന്നദ്ധരല്ലാത്ത നിഷേധികളേ, നിങ്ങളുടെ അംഗീകാരം എനിക്കാവശ്യമില്ല! നബി(സ്വ)യുടെ ഈ പ്രസ്താവത്തിനുമുമ്പില്‍ പ്രതിലോമകാരികള്‍ അപമാനിതരായി നില്‍ക്കുകയാണല്ലോ. 'മുഹമ്മദ് നബിക്ക് നാം അവതരിപ്പിച്ച ഖുര്‍ആനില്‍ സംശയാലുക്കളാണെങ്കില്‍ തത്തുല്യമായതൊന്നു നിങ്ങള്‍ കൊണ്ടുവരൂ' എന്ന ഖുര്‍ആനിക വെല്ലുവിളി(2: 23) ശത്രുക്കളുടെ മുഖത്ത് അപമാനച്ഛവി പരത്തി അന്ത്യനാള്‍ വരെയും അധൃഷ്യമായി പ്രശോഭിതമായി നിലകൊള്ളും.