Sunday, 11 October 2026 Hijri: — 11:47:54 am

Quran translation reader

ഇബ്രാഹീം إبراهيم Ibrahim

Surah 14 മക്കിയ്യ • مكية • Makkiyah 52 ആയത്തുകൾ • 52 Ayahs

സൂറത്ത് ഇബ്രാഹീം (Ibrahim), ഖുർആൻ അധ്യായം 14 — അറബി ആയത്തുകളും മലയാളം വിവർത്തനവും ഉൾപ്പെടെ 52 ആയത്തുകൾ വായിക്കുക. Read Surah Ibrahim with Arabic text and മലയാളം translation.

Language Malayalam source Surah

بِسْمِ ٱللَّهِ ٱلرَّحْمَٰنِ ٱلرَّحِيمِ

1–3

അലിഫ് ലാം റാ. തങ്ങളുടെ നാഥന്റെ അനുമതിയനുസരിച്ച് മനുഷ്യരെ അന്ധകാരങ്ങളില്‍ നിന്നു പ്രകാശത്തിലേക്ക്-പ്രതാപശാലിയും സ്തുത്യര്‍ഹനുമായവന്റെ, ഭുവനവാനങ്ങളിലുള്ളവയുടെ ഉടമയായ അല്ലാഹുവിന്റെ പന്ഥാവിലേക്ക് - കൊണ്ടുവരാനായി താങ്കള്‍ക്കു നാമവതരിപ്പിച്ചു തന്ന വേദമാണിത്.¹
പാരത്രികലോകത്തെക്കാള്‍ ഐഹികജീവിതത്തെ സ്‌നേഹിക്കുകയും ദൈവികമാര്‍ഗത്തില്‍ നിന്ന് മറ്റുള്ളവരെ പിന്തിരിപ്പിക്കുകയും അതില്‍ വക്രതയുണ്ടാക്കാനുദ്ദേശിക്കുകയും ചെയ്യുന്ന നിഷേധികള്‍ക്ക് ഗുരുതരശിക്ഷ മൂലം മഹാനാശം തന്നെയാണ് വരാനിരിക്കുന്നത്.²

2 വിശദീകരണങ്ങൾ കാണുക

1. സൂറത്തു ഇബ്രാഹീം എന്നാണ് ഈ അധ്യായത്തിന്റെ പേര്. സമുദായ സമാനന്‍ എന്നു അല്ലാഹു വിശേഷിപ്പിച്ച മഹാനും(16: 120) സത്യവിശ്വാസികള്‍ക്കു മുസ്‌ലിംകള്‍ എന്നു പേരുവെച്ച നായകനു(ഹജ്ജ്: 78)മായ തന്റെ ചില ജീവിതാധ്യായങ്ങളിലേക്ക് ഈ സൂറത്തിന്റെ അവസാനം സൂചനകളുണ്ട്. പ്രകാശവും വെളിച്ചവും ഒന്നുമാത്രമേയുള്ളു - ഇസ്‌ലാം; അന്ധകാരങ്ങള്‍ ബഹുമുഖമാണ്. അതാണ് പ്രഥമ സൂക്തത്തില്‍ ഒന്ന് ഏകവചനവും മറ്റൊന്ന് ബഹുവചനവുമാക്കിയത്.

2. കാലാകാലങ്ങളില്‍ നിഷേധികളുടെ മുഖമുദ്ര ഇതായിരുന്നു - ഭൗതിക പ്രമത്തത, തന്മൂലം തന്നെയുണ്ടായിത്തീരുന്ന സന്‍മാര്‍ഗത്തോടുള്ള വൈരം. അല്ലാഹുവിന്റെ താല്‍പര്യത്തിനു കടകവിരുദ്ധമാണിതെന്നതിനാല്‍ അവര്‍ക്കു ഗുരുതരവും കഠോരവുമായ പാരത്രികശിക്ഷ സുനിശ്ചിതമാണ്.

الٓرۚ كِتَٰبٌ أَنزَلۡنَٰهُ إِلَيۡكَ لِتُخۡرِجَ ٱلنَّاسَ مِنَ ٱلظُّلُمَٰتِ إِلَى ٱلنُّورِ بِإِذۡنِ رَبِّهِمۡ إِلَىٰ صِرَٰطِ ٱلۡعَزِيزِ ٱلۡحَمِيدِ ۝١

ٱللَّهِ ٱلَّذِي لَهُۥ مَا فِي ٱلسَّمَٰوَٰتِ وَمَا فِي ٱلۡأَرۡضِۗ وَوَيۡلٞ لِّلۡكَٰفِرِينَ مِنۡ عَذَابٖ شَدِيدٍ ۝٢

ٱلَّذِينَ يَسۡتَحِبُّونَ ٱلۡحَيَوٰةَ ٱلدُّنۡيَا عَلَى ٱلۡأٓخِرَةِ وَيَصُدُّونَ عَن سَبِيلِ ٱللَّهِ وَيَبۡغُونَهَا عِوَجًاۚ أُوْلَٰٓئِكَ فِي ضَلَٰلِۭ بَعِيدٖ ۝٣

തന്റെ ജനതക്ക് സന്മാര്‍ഗം പ്രതിപാദിച്ചുകൊടുക്കാനായി ഏതൊരു റസൂലിനെയും അവരുടെ ഭാഷയിലല്ലാതെ നാം നിയോഗിച്ചിട്ടില്ല. അങ്ങനെ താനുദ്ദേശിക്കുന്ന ചിലരെ അല്ലാഹു ദുര്‍മാര്‍ഗത്തിലും മറ്റുചിലരെ സന്മാര്‍ഗത്തിലും ആക്കുന്നു. പ്രതാപശാലിയും യുക്തിമാനുമത്രേ അവന്‍³

1 വിശദീകരണം കാണുക

3. ദൈവദൂതന്‍മാരെ അല്ലാഹു നിയോഗിക്കുന്നത് മനുഷ്യര്‍ക്ക് നേര്‍മാര്‍ഗം പഠിപ്പിച്ചുകൊടുക്കാനും അതുസംബന്ധമായ സംശയനിവാരണങ്ങള്‍ക്കും പ്രതിപാദനങ്ങള്‍ക്കുമാണ്. അതുകൊണ്ട് സ്വജനതയുടെ ഭാഷയിലേ പ്രവാചകനിയോഗമുണ്ടായിട്ടുള്ളു. എന്നാല്‍, നമ്മുടെ നബി(സ്വ) എല്ലാജനങ്ങളിലേക്കും നിയുക്തരായ സ്ഥിതിക്ക് മുഴുവന്‍ ഭാഷകളിലും വേദം വേണ്ടതല്ലേ എന്ന ചോദ്യം ഉന്നീതമാകാം. ഖുര്‍ആന്‍ വ്യാഖ്യാതാക്കള്‍ ഇത് സവിസ്തരം ചര്‍ച്ചചെയ്തിട്ടുണ്ട്. സംഗ്രഹമിതാണ്:
പൂര്‍വകാല മുര്‍സലുകള്‍ നിയുക്തരായിരുന്നത് സ്വജനതയിലേക്ക് മാത്രമാണ്; തിരുമേനി(സ്വ) നിയോഗിക്കപ്പെട്ടിരിക്കുന്നതാകട്ടെ മര്‍ത്യസഞ്ചയത്തിലേക്ക് ഒന്നടങ്കവും. ഖുര്‍ആന്‍ സൂറത്തു സബഅ് 28 ലും അല്‍ അഅ്‌റാഫ് 158 ലും ബുഖാരി-മുസ്‌ലിം നിവേദനം ചെയ്ത ഹദീസിലും ഇതു കാണാം. മാത്രമല്ല, നബി(സ്വ)യുടെ ജനത(ഖൗമ്) അറബികള്‍ ആണ്; മറ്റുള്ളവരൊന്നടങ്കം സമൂഹവും(ഉമ്മത്ത്). ആ നിലക്ക് 'ഖൗമി'ന്റെ ഭാഷയില്‍ തന്നെയാണ് റസൂലും കിതാബും. എന്നാല്‍ മറ്റുള്ളവര്‍ക്ക് സന്മാര്‍ഗവും ദീനും ഖുര്‍ആനും ഗ്രഹിക്കാന്‍ അധ്യാപന സംരംഭങ്ങളും വിവര്‍ത്തന - വ്യാഖ്യാനങ്ങളും മതിയാകുന്നതാണ്.

وَمَآ أَرۡسَلۡنَا مِن رَّسُولٍ إِلَّا بِلِسَانِ قَوۡمِهِۦ لِيُبَيِّنَ لَهُمۡۖ فَيُضِلُّ ٱللَّهُ مَن يَشَآءُ وَيَهۡدِي مَن يَشَآءُۚ وَهُوَ ٱلۡعَزِيزُ ٱلۡحَكِيمُ ۝٤

താങ്കളുടെ ജനതയെ അന്ധകാരങ്ങളില്‍ നിന്നു പ്രകാശത്തിലേക്കു കൊണ്ടുവരികയും അല്ലാഹുവിന്റെ അനുഗ്രഹവേളകളെക്കുറിച്ച് അനുസ്മരിപ്പിക്കുകയും ചെയ്യുക എന്നു കല്‍പിച്ചുകൊണ്ട് നമ്മുടെ ദൃഷ്ടാന്തങ്ങളുമായി മൂസാനബിയെ നാം അയക്കുകയുണ്ടായി. മികച്ച ക്ഷമയും കൃതജ്ഞതയുമുള്ള സകലര്‍ക്കും അതില്‍ ഗുണപാഠങ്ങളുണ്ട്, തീര്‍ച്ച

وَلَقَدۡ أَرۡسَلۡنَا مُوسَىٰ بِـَٔايَٰتِنَآ أَنۡ أَخۡرِجۡ قَوۡمَكَ مِنَ ٱلظُّلُمَٰتِ إِلَى ٱلنُّورِ وَذَكِّرۡهُم بِأَيَّىٰمِ ٱللَّهِۚ إِنَّ فِي ذَٰلِكَ لَأٓيَٰتٖ لِّكُلِّ صَبَّارٖ شَكُورٖ ۝٥

6–8

മൂസാനബി സ്വജനതയോട് പറഞ്ഞ സന്ദര്‍ഭം സ്മരണീയമാണ്: നിങ്ങളെ കഠിനമായി ശിക്ഷിക്കുകയും നിങ്ങളുടെ ആണ്‍മക്കളെ അറുകൊല നടത്തുകയും പെണ്‍മക്കളെ ജീവിക്കാന്‍ വിടുകയും ചെയ്ത ഫറോവാപ്രഭൃതികളില്‍ നിന്ന് മുക്തരാക്കിയപ്പോള്‍-നിങ്ങളുടെ നാഥങ്കല്‍ നിന്നുള്ള ഗുരുതര പരീക്ഷണം അതിലുണ്ട്-അല്ലാഹു നിങ്ങള്‍ക്കു ചെയ്ത അനുഗ്രഹം ഓര്‍ത്തുനോക്കുക⁴
കൃതജ്ഞത പ്രകാശിപ്പിക്കുന്നുവെങ്കില്‍ നിശ്ചയം നിങ്ങള്‍ക്കു ഞാന്‍ അനുഗ്രഹവര്‍ധന നല്‍കുന്നതാണ്; പ്രത്യുത കൃതഘ്‌നതകാട്ടുന്നുവെങ്കില്‍ എന്റെ ശിക്ഷ കഠിനം തന്നെ തീര്‍ച്ച എന്നു നിങ്ങളുടെ നാഥന്‍ അറിയിച്ചതും സ്മരണീയമത്രേ. നിങ്ങളും ഭൂമിയിലുള്ള സകലരും നന്ദികേട് കാട്ടിയാലും അല്ലാഹു ഐശ്വര്യനും സ്തുത്യര്‍ഹനുമാണ് എന്നും മൂസാനബി പറഞ്ഞു.

1 വിശദീകരണം കാണുക

4. സൂറത്തു യൂസുഫില്‍ നിന്നു മനസ്സിലാക്കിയതു പോലെ, യഅ്ഖൂബ് നബി(അ)യും കുടുംബവും ഈജിപ്തിലെത്തുന്നതോടെയാണ് അവിടെ ആ വംശത്തിന്റെ തുടക്കം. അന്നവര്‍ രാജകുടുംബമായിരുന്നു. എന്നാല്‍ നൂറ്റാണ്ടുകള്‍ മാറിവന്നപ്പോള്‍ ഫറോവ ചക്രവര്‍ത്തിമാര്‍ സിംഹാസനമേറി. യഅ്ഖൂബ് നബി(അ)യുടെ സന്തതീ പരമ്പരയായ ഇസ്രാഈല്യരുടെ കഷ്ടകാലമായിരുന്നു അത്. അടിമതുല്യം അവര്‍ അവഗണിക്കപ്പെട്ടു. ഇസ്രയേല്യരില്‍ ജനിക്കുന്ന ഒരു ബാലനിലൂടെ ഫറോവയുടെ സിംഹാസനം തട്ടിത്തെറിപ്പിക്കപ്പെടും എന്ന ജ്യോത്സ്യപ്രഖ്യാപനമുണ്ടായപ്പോള്‍, തുടര്‍ന്നു അവരില്‍ ജനിക്കുന്ന മുഴുവന്‍ ആണ്‍കുട്ടികളെയും അറുകൊല നടത്താന്‍ അവന്‍ ഉത്തരവിട്ടു. അടിമപ്പണിക്കും കാമപൂരണത്തിനുമായി പെണ്‍കുട്ടികളെ അവശേഷിപ്പിച്ചു. എന്നാല്‍, ഇതില്‍ നിന്നൊക്കെ പിന്നീടവരെ അല്ലാഹു രക്ഷപ്പെടുത്തി. അതാണ് മൂസാനബി(അ) അനുസ്മരിപ്പിക്കുന്നത്.

وَإِذۡ قَالَ مُوسَىٰ لِقَوۡمِهِ ٱذۡكُرُواْ نِعۡمَةَ ٱللَّهِ عَلَيۡكُمۡ إِذۡ أَنجَىٰكُم مِّنۡ ءَالِ فِرۡعَوۡنَ يَسُومُونَكُمۡ سُوٓءَ ٱلۡعَذَابِ وَيُذَبِّحُونَ أَبۡنَآءَكُمۡ وَيَسۡتَحۡيُونَ نِسَآءَكُمۡۚ وَفِي ذَٰلِكُم بَلَآءٞ مِّن رَّبِّكُمۡ عَظِيمٞ ۝٦

وَإِذۡ تَأَذَّنَ رَبُّكُمۡ لَئِن شَكَرۡتُمۡ لَأَزِيدَنَّكُمۡۖ وَلَئِن كَفَرۡتُمۡ إِنَّ عَذَابِي لَشَدِيدٞ ۝٧

وَقَالَ مُوسَىٰٓ إِن تَكۡفُرُوٓاْ أَنتُمۡ وَمَن فِي ٱلۡأَرۡضِ جَمِيعٗا فَإِنَّ ٱللَّهَ لَغَنِيٌّ حَمِيدٌ ۝٨

നൂഹ്‌നബിയുടെ ജനത, ആദ്-സമൂദ് ജനപഥങ്ങള്‍, അവര്‍ക്കുശേഷമുള്ള-അല്ലാഹുവിന് മാത്രമേ അവരെക്കുറിച്ചറിയൂ-സമൂഹങ്ങള്‍ തുടങ്ങിയ പൂര്‍വഗാമികളുടെ വൃത്താന്തങ്ങള്‍ നിങ്ങള്‍ക്കു ലഭിച്ചിട്ടില്ലേ? സ്പഷ്ടദൃഷ്ടാന്തങ്ങളുമായി ദൂതന്‍മാര്‍ അവരെ സമീപിച്ചു. തത്സമയവര്‍ വായില്‍ കൈവെക്കുകയും⁵
ഇങ്ങനെ പുലമ്പുകയുമുണ്ടായി: നിങ്ങള്‍ നിയുക്തരായ ഈ സന്ദേശത്തില്‍ ഞങ്ങള്‍ അവിശ്വസിക്കുക തന്നെ ചെയ്തിരിക്കുന്നു. നിങ്ങള്‍ ഏതൊരാദര്‍ശത്തിലേക്ക് ഞങ്ങളെ ക്ഷണിക്കുന്നുവോ അതുസംബന്ധിച്ച്, നിശ്ചയം കടുത്ത സംശയത്തിലാണു ഞങ്ങള്‍.

1 വിശദീകരണം കാണുക

5. പ്രവാചകരെ അവഹേളിക്കുകയും നിസ്സാരരാക്കുകയും പരിഹസിക്കുകയും ചെയ്തുകൊണ്ട് പൊട്ടിച്ചിരിച്ച് വായപൊത്തി എന്നു താല്‍പര്യം. ദൃഷ്ടാന്തങ്ങള്‍ ലഭിച്ചിട്ടും ഇങ്ങനെയുള്ള പ്രവാചകാവഹേളനവും ദൈവധിക്കാരവും മൂലം നിരവധി ജനപഥങ്ങള്‍ ഉന്‍മൂലനവിധേയമായിട്ടുണ്ടെന്നും അല്ലാഹുവിനു മാത്രമേ അവരെക്കുറിച്ച വിവരങ്ങളറിയൂ എന്നുമുള്ള പരാമര്‍ശം കാര്യത്തിന്റെ ഗൗരവമാണു സൂചിപ്പിക്കുന്നത്.

أَلَمۡ يَأۡتِكُمۡ نَبَؤُاْ ٱلَّذِينَ مِن قَبۡلِكُمۡ قَوۡمِ نُوحٖ وَعَادٖ وَثَمُودَ وَٱلَّذِينَ مِنۢ بَعۡدِهِمۡ لَا يَعۡلَمُهُمۡ إِلَّا ٱللَّهُۚ جَآءَتۡهُمۡ رُسُلُهُم بِٱلۡبَيِّنَٰتِ فَرَدُّوٓاْ أَيۡدِيَهُمۡ فِيٓ أَفۡوَٰهِهِمۡ وَقَالُوٓاْ إِنَّا كَفَرۡنَا بِمَآ أُرۡسِلۡتُم بِهِۦ وَإِنَّا لَفِي شَكّٖ مِّمَّا تَدۡعُونَنَآ إِلَيۡهِ مُرِيبٖ ۝٩

10–12

അവരിലേക്ക് നിയോഗിക്കപ്പെട്ടിരുന്ന ദൂതന്‍മാര്‍ ചോദിച്ചു: ഭുവന - വാനങ്ങളുടെ സ്രഷ്ടാവായ അല്ലാഹുവിന്റെ കാര്യത്തിലുണ്ടോ എന്തെങ്കിലും സന്ദേഹം? അവന്‍ ക്ഷണിക്കുന്നത് നിങ്ങള്‍ക്ക് ദോഷങ്ങള്‍ പൊറുത്തുതരാനും നിശ്ചയിക്കപ്പെട്ട സമയംവരെ അവധി തരാനുമാണ്⁶
നിഷേധികള്‍ പ്രതികരിച്ചു: ഞങ്ങളെപ്പോലുള്ള മനുഷ്യര്‍ മാത്രമാണു നിങ്ങള്‍. പൂര്‍വപിതാക്കളാരാധിച്ചിരുന്ന ബിംബങ്ങളില്‍ നിന്നു ഞങ്ങളെ തടയുകയാണു നിങ്ങളുടെ ഉദ്ദേശ്യം. അതുകൊണ്ട്, സ്പഷ്ടമായ വല്ല ദൃഷ്ടാന്തവും ഹാജറാക്കൂ! അവരുടെ ദൂതന്‍മാര്‍ മറുപടിനല്‍കി: നിങ്ങളെപ്പോലുള്ള മനുഷ്യര്‍ തന്നെയാണു ഞങ്ങള്‍. എങ്കിലും തന്റെ അടിമകളില്‍ നിന്നു ഉദ്ദേശിക്കുന്നവര്‍ക്ക് അല്ലാഹു ഔദാര്യം നല്‍കുന്നു⁷
അവന്റെ സമ്മതമനുസരിച്ചു മാത്രമേ ഏതൊരു ദൃഷ്ടാന്തവും നിങ്ങള്‍ക്കു കൊണ്ടുവന്നുതരാന്‍ ഞങ്ങള്‍ക്കു കഴിയൂ. സത്യവിശ്വാസികള്‍ അല്ലാഹുവിങ്കലാണ് കാര്യങ്ങള്‍ ഭരമേല്‍പിക്കേണ്ടത്. ഞങ്ങള്‍ എങ്ങനെ അല്ലാഹുവിങ്കല്‍ ഭരമേല്‍പിക്കാതിരിക്കും? അവനാണല്ലോ ഞങ്ങള്‍ക്ക് സന്മാര്‍ഗദര്‍ശനം നല്‍കിയത്. നിങ്ങളുടെ മര്‍ദന - പീഡനങ്ങള്‍ ഞങ്ങള്‍ സഹിക്കുകതന്നെ ചെയ്യും. ഭരമേല്‍പിക്കുന്ന ആരും അല്ലാഹുവിങ്കലാണ് കാര്യങ്ങള്‍ ഭരമേല്‍പിക്കേണ്ടത്.

2 വിശദീകരണങ്ങൾ കാണുക

6. ദൈവദൂതരുടെ ക്ഷണം സ്വീകരിക്കുകയും അല്ലാഹുവിന്റെ പന്ഥാവില്‍ പ്രവേശിക്കുകയും ചെയ്യുമ്പോള്‍ മനുഷ്യന്‍ മഹാസൗഭാഗ്യവാനും വിജയിയുമാവുകയല്ലേ ചെയ്യുന്നത്? പാപവിമുക്തനും സമാധാനപൂര്‍ണനുമായി മരണം വരെ കഴിയാനാകുന്നു; തുടര്‍ന്നു ലഭിക്കുന്നതോ, അമൂല്യമായ പാരത്രിക വിജയവും സ്വര്‍ഗവും. ഈ സന്‍മാര്‍ഗം തട്ടിക്കളയുന്നവന്‍ എത്രവലിയ മൂഢനാണ്!

7. ജീവശാസ്ത്രപരമായി പ്രവാചകന്‍മാരും ദൈവദൂതന്മാരുമൊക്കെ മനുഷ്യര്‍ തന്നെയാണ്. പലേടത്തും ഖുര്‍ആനില്‍ കാണുന്ന ഈ ദൃശപരാമര്‍ശങ്ങള്‍ അല്‍പജ്ഞരായ ചില മുസ്‌ലിംകള്‍ തന്നെ അസ്ഥാനത്ത് ഉപയോഗിക്കുന്നതായി കാണാം. പീടികത്തിണ്ണയില്‍ കഴിയുന്ന ഒരു യാചകന്‍ 'ഞാനും രാജാവും മനുഷ്യര്‍ തന്നെയാണ്' എന്നുപറയുന്നതു പോലെ ബാലിശമാണിത്. അല്ലാഹുവിങ്കല്‍ നിന്നുള്ള നുബുവ്വത്തും രിസാലത്തും ലഭിക്കുക എന്നത് ചെറിയ കാര്യമല്ല. എത്രകാലം തപസ്സിരുന്നാലും കഠിനാധ്വാനം ചെയ്താലും സ്വയം ആര്‍ജിക്കാനാകാത്ത പദവിയാണത്. അല്ലാഹു കനിഞ്ഞരുളുന്നവര്‍ക്കു മാത്രമേ ആ മഹാഭാഗ്യം കൈവരിക്കാനാകൂ.

۞ قَالَتۡ رُسُلُهُمۡ أَفِي ٱللَّهِ شَكّٞ فَاطِرِ ٱلسَّمَٰوَٰتِ وَٱلۡأَرۡضِۖ يَدۡعُوكُمۡ لِيَغۡفِرَ لَكُم مِّن ذُنُوبِكُمۡ وَيُؤَخِّرَكُمۡ إِلَىٰٓ أَجَلٖ مُّسَمّٗىۚ قَالُوٓاْ إِنۡ أَنتُمۡ إِلَّا بَشَرٞ مِّثۡلُنَا تُرِيدُونَ أَن تَصُدُّونَا عَمَّا كَانَ يَعۡبُدُ ءَابَآؤُنَا فَأۡتُونَا بِسُلۡطَٰنٖ مُّبِينٖ ۝١٠

قَالَتۡ لَهُمۡ رُسُلُهُمۡ إِن نَّحۡنُ إِلَّا بَشَرٞ مِّثۡلُكُمۡ وَلَٰكِنَّ ٱللَّهَ يَمُنُّ عَلَىٰ مَن يَشَآءُ مِنۡ عِبَادِهِۦۖ وَمَا كَانَ لَنَآ أَن نَّأۡتِيَكُم بِسُلۡطَٰنٍ إِلَّا بِإِذۡنِ ٱللَّهِۚ وَعَلَى ٱللَّهِ فَلۡيَتَوَكَّلِ ٱلۡمُؤۡمِنُونَ ۝١١

وَمَا لَنَآ أَلَّا نَتَوَكَّلَ عَلَى ٱللَّهِ وَقَدۡ هَدَىٰنَا سُبُلَنَاۚ وَلَنَصۡبِرَنَّ عَلَىٰ مَآ ءَاذَيۡتُمُونَاۚ وَعَلَى ٱللَّهِ فَلۡيَتَوَكَّلِ ٱلۡمُتَوَكِّلُونَ ۝١٢

13–17

സത്യനിഷേധികള്‍ ദൂതരോട് പ്രതികരിച്ചു: ഞങ്ങളുടെ മതത്തിലേക്കു വരുന്നില്ലെങ്കില്‍ നിങ്ങളെ നാട്ടില്‍നിന്നു ആട്ടിയോടിക്കുക തന്നെ ചെയ്യും ഞങ്ങള്‍!⁸
തത്സമയം ദൂതര്‍ക്കു അല്ലാഹു ബോധനം നല്‍കി: 'നിശ്ചയം, ഈ അക്രമികളെ നാം സംഹരിക്കുകയും അവരുടെ പിറകില്‍ ഇന്നാട്ടില്‍ നിങ്ങളെ അധിവസിപ്പിക്കുകയും ചെയ്യുന്നതാകുന്നു. എന്റെ തിരുസന്നിധാനവും താക്കീതും ഭയപ്പെടുന്നവര്‍ക്കാണതു ലഭ്യമാവുക.' ആ ദൂതര്‍ വിജയത്തിനായി പ്രാര്‍ഥിക്കുകയും മത്സരമനസ്‌കരായ മുഴുവന്‍ സ്വേച്ഛാധിപതികളും പരാജയപ്പെടുകയുമുണ്ടായി. അവന്റെ വഴിയെ നരകവുമുണ്ട്; രക്തവും ചലവും കലര്‍ന്ന ദ്രാവകമാണവന്ന് കുടിപ്പിക്കപ്പെടുക. അത് കീഴ്‌പോട്ടിറക്കാനവന്‍ സാഹസപ്പെട്ടുനോക്കും; പക്ഷേ, കഴിയുമാറാകില്ല. മരണം എല്ലാ സ്ഥലത്തുനിന്നും അവനുനേരെ വരും, എന്നാല്‍ മരിക്കുകയുമില്ല. അതിനു ശേഷവുമുണ്ട് കഠോരമായ ശിക്ഷ!⁹

2 വിശദീകരണങ്ങൾ കാണുക

8. സത്യനിഷേധികളുടെ അതീവഗുരുതരമായ തീവ്രവാദ നിലപാടാണ് ഇവിടെ കാണുന്നത്. ചരിത്രത്തിലുടനീളം ഇതുതന്നെയാണവസ്ഥ. ഖുര്‍ആന്‍ 7:88, 60:9, 47:13, 9:40, 8:30 മുതലായവ കാണുക. അധുനാതന ചിത്രവും മറ്റൊന്നല്ല. ഞങ്ങളുടെ മതത്തിലേക്കു വരുന്നില്ലെങ്കില്‍ നിങ്ങളെ നാടുകടത്തുമെന്നാണ് അവിശ്വാസികളുടെ ആക്രോശം. എന്നാല്‍ ഏതെങ്കിലും റസൂലോ അനുയായികളോ പ്രതിപക്ഷത്തോട് ഇങ്ങനെ പറഞ്ഞതായി ചരിത്രമില്ല! സത്യവിശ്വാസികളുടെമേല്‍ തീവ്രവാദാരോപണം നടത്തുന്നവര്‍ രണ്ടുവട്ടം ചിന്തിക്കട്ടെ, മന്ത് മറ്റേ കാലിലാണ്. ഉദ്ദേശിക്കുന്നവര്‍ സത്യവിശ്വാസമവലംബിക്കട്ടെ; ഉദ്ദേശിക്കുന്നവര്‍ നിഷേധിക്കയും ചെയ്യട്ടെ - ഇതാണ് ഖുര്‍ആന്റെ(18:29) പ്രഖ്യാപനം.

9. മരണത്തിന്റെ ഭയാനകതകളും ഗുരുതരനോവുകളും നാനാഭാഗത്തുനിന്നും നിഷേധിയുടെ നേരെ വന്നുകൊണ്ടിരിക്കും; പക്ഷേ ഒരിക്കലും മരണപ്പെടില്ല. വിശ്വാസികള്‍ സ്വര്‍ഗത്തിലും നിഷേധികള്‍ നരകത്തിലും സ്ഥിരപ്രതിഷ്ഠരായിക്കഴിഞ്ഞാല്‍ സര്‍വരും കാണ്‍കെ, മരണം എന്ന പ്രതിഭാസത്തെ കൊമ്പുള്ള ഒരു ആട്ടിന്റെ രൂപത്തില്‍ ഹാജറാക്കി അറുത്തുകളയപ്പെടുമെന്ന് ഹദീസില്‍(മുസ്‌ലിം) ഉണ്ട്. അതോടെ മരണം ഇല്ലായ്മ ചെയ്യപ്പെടും, സര്‍വരും ശാശ്വതരായി എന്നു താല്‍പര്യം.

وَقَالَ ٱلَّذِينَ كَفَرُواْ لِرُسُلِهِمۡ لَنُخۡرِجَنَّكُم مِّنۡ أَرۡضِنَآ أَوۡ لَتَعُودُنَّ فِي مِلَّتِنَاۖ فَأَوۡحَىٰٓ إِلَيۡهِمۡ رَبُّهُمۡ لَنُهۡلِكَنَّ ٱلظَّٰلِمِينَ ۝١٣

وَلَنُسۡكِنَنَّكُمُ ٱلۡأَرۡضَ مِنۢ بَعۡدِهِمۡۚ ذَٰلِكَ لِمَنۡ خَافَ مَقَامِي وَخَافَ وَعِيدِ ۝١٤

وَٱسۡتَفۡتَحُواْ وَخَابَ كُلُّ جَبَّارٍ عَنِيدٖ ۝١٥

مِّن وَرَآئِهِۦ جَهَنَّمُ وَيُسۡقَىٰ مِن مَّآءٖ صَدِيدٖ ۝١٦

يَتَجَرَّعُهُۥ وَلَا يَكَادُ يُسِيغُهُۥ وَيَأۡتِيهِ ٱلۡمَوۡتُ مِن كُلِّ مَكَانٖ وَمَا هُوَ بِمَيِّتٖۖ وَمِن وَرَآئِهِۦ عَذَابٌ غَلِيظٞ ۝١٧

18–21

കൊടുങ്കാറ്റ് ആഞ്ഞുവീശിയ ഒരുനാളില്‍ അതു പാറ്റിപ്പറത്തിയ വെണ്ണീറുപോലെയാണ് തങ്ങളുടെ നാഥനെ നിഷേധിച്ചവരുടെ കര്‍മങ്ങള്‍ - തങ്ങളനുവര്‍ത്തിച്ചതൊന്നും അവര്‍ക്കനുഭവിക്കാന്‍ സാധിക്കയില്ല. അതിവിദൂരമായ ദുര്‍മാര്‍ഗമാണത്.¹⁰
ഭുവന വാനങ്ങള്‍ സത്യസന്ധമായാണ് അല്ലാഹു സൃഷ്ടിച്ചതെന്ന് താങ്കള്‍ മനസ്സിലാക്കിയിട്ടില്ലേ? ഉദ്ദേശിക്കുന്ന പക്ഷം അവന്‍ നിങ്ങളെ നിഷ്‌കാസനം ചെയ്ത് പുതിയൊരു സൃഷ്ടിവിഭാഗത്തെ കൊണ്ടുവരും; അവനത് പ്രയാസകരമേ അല്ല.¹¹
അവരത്രയും അല്ലാഹുവിന്റെ മുമ്പില്‍ പ്രത്യക്ഷപ്പെടുന്നതാണ്. തത്സമയം, അഹങ്കാരം നടിച്ചിരുന്ന നേതാക്കളോട് ദുര്‍ബലര്‍ ചോദിക്കും: നിശ്ചയം, ദുന്‍യാവില്‍ ഞങ്ങള്‍ നിങ്ങളുടെ അനുയായികളായിരുന്നു; അതുകൊണ്ട് അല്ലാഹുവിന്റെ ശിക്ഷയില്‍ നിന്നു ഞങ്ങള്‍ക്കെന്തെങ്കിലും നിങ്ങള്‍ ഇളവുചെയ്യിച്ചുതരുമോ? അവര്‍ പ്രതികരിക്കും: അവന്‍ ഞങ്ങളെ സന്മാര്‍ഗത്തിലാക്കിയിരുന്നെങ്കില്‍ ഞങ്ങള്‍ നിങ്ങളെയും സന്മാര്‍ഗത്തിലാക്കിയിരുന്നേനെ. ക്ഷമിക്കുകയോ അസ്വസ്ഥത കാട്ടുകയോ എന്തുചെയ്താലും നമ്മെസ്സംബന്ധിച്ച് തുല്യംതന്നെ; ഒരു മോക്ഷമാര്‍ഗവും ഇല്ലേയില്ല.¹²

3 വിശദീകരണങ്ങൾ കാണുക

10. സത്യനിഷേധികള്‍ അനുവര്‍ത്തിക്കുന്ന പുണ്യകര്‍മങ്ങള്‍ക്കൊന്നും പരലോകത്ത് പ്രതിഫലം ലഭിക്കില്ല. അടിസ്ഥാനപരമായ ഉപാധി-സത്യവിശ്വാസം കൈക്കൊള്ളുക-അവര്‍ അംഗീകരിച്ചില്ല എന്നതാണു കാരണം. വ്യക്തമായൊരു ചിത്രമോ വിശദീകരണങ്ങളോ അറിയില്ലെങ്കിലും മരണാനന്തരം ഒരു ജീവിതവും സ്വര്‍ഗ-നരകങ്ങളും മറ്റും ഉണ്ടെന്നു ധരിക്കുകയും തദനുസൃതം മോക്ഷലബ്ധിക്കായി പുണ്യകര്‍മങ്ങള്‍ അനുവര്‍ത്തിക്കുകയും ചെയ്യുന്ന ധാരാളം സത്യനിഷേധികളുണ്ട്. കുടുംബ ബന്ധങ്ങള്‍ പുലര്‍ത്തല്‍, അഗതി - അനാഥ സഹായം, വിദ്യാഭ്യാസ - സാംസ്‌കാരിക പ്രവര്‍ത്തനങ്ങള്‍, അക്രമവിധേയരെ സഹായിക്കല്‍ തുടങ്ങിയ പല സല്‍കര്‍മങ്ങളും ദൈവപ്രീതിക്കും പരലോകമോക്ഷത്തിനുമാണവര്‍ ചെയ്യുന്നത്. എന്നാല്‍ അവിടെച്ചെന്ന് നോക്കുമ്പോള്‍ അത്തരം പുണ്യകൃത്യങ്ങള്‍ കൊടുങ്കാറ്റില്‍ പാറിപ്പറന്ന് ചിന്നഭിന്നമായ വെണ്ണീര്‍കൂനപോലെയാണവര്‍ കാണുക - തീര്‍ത്തും ഫലശൂന്യമായിരിക്കും.

11. അല്ലാഹുവിന്റെ മഹച്ഛക്തിയെപ്പറ്റി സത്യനിഷേധികള്‍ സഗൗരവം ഓര്‍ത്തിരിക്കണമെന്നാണ് പറയുന്നത്. ധിക്കാരവും വിളയാട്ടവും പരിധിവിട്ടു നടത്തുന്നവരെ അവന്‍ പിടികൂടി വേരോടെപിഴുതെറിയുകയും പുതിയൊരു ജനപഥത്തെ തല്‍സ്ഥാനത്ത് പ്രതിഷ്ഠിക്കുകയും ചെയ്‌തേക്കാം. ചരിത്രത്തില്‍ പലപ്പോഴും അങ്ങനെ സംഭവിച്ചുകഴിഞ്ഞിട്ടുണ്ട്. സര്‍വശക്തനായ അല്ലാഹുവിന്ന് അതത്ര പ്രയാസകരമൊന്നുമല്ല.

12. പാരത്രികലോകത്തെ ഒരു രംഗം ചിത്രീകരിക്കുകയാണിവിടെ. ബിംബങ്ങളെയും ആള്‍ദൈവങ്ങളെയും മറ്റും പൂജിക്കുകയും ആരാധിക്കുകയും ചെയ്തിരുന്ന ബഹുദൈവ വിശ്വാസികളും സത്യനിഷേധികളും ഫലശൂന്യമെന്നു ബോധ്യപ്പെട്ടിട്ടും പുല്‍ക്കൊടിയില്‍ തൂങ്ങും - അവയോട് വാഗ്വാദത്തിലേര്‍പ്പെടും, സഹായാര്‍ത്ഥന നടത്തും. സ്വന്തത്തെത്തന്നെ രക്ഷപ്പെടുത്താനാകാത്ത അവര്‍ എന്തുചെയ്യും?

مَّثَلُ ٱلَّذِينَ كَفَرُواْ بِرَبِّهِمۡۖ أَعۡمَٰلُهُمۡ كَرَمَادٍ ٱشۡتَدَّتۡ بِهِ ٱلرِّيحُ فِي يَوۡمٍ عَاصِفٖۖ لَّا يَقۡدِرُونَ مِمَّا كَسَبُواْ عَلَىٰ شَيۡءٖۚ ذَٰلِكَ هُوَ ٱلضَّلَٰلُ ٱلۡبَعِيدُ ۝١٨

أَلَمۡ تَرَ أَنَّ ٱللَّهَ خَلَقَ ٱلسَّمَٰوَٰتِ وَٱلۡأَرۡضَ بِٱلۡحَقِّۚ إِن يَشَأۡ يُذۡهِبۡكُمۡ وَيَأۡتِ بِخَلۡقٖ جَدِيدٖ ۝١٩

وَمَا ذَٰلِكَ عَلَى ٱللَّهِ بِعَزِيزٖ ۝٢٠

وَبَرَزُواْ لِلَّهِ جَمِيعٗا فَقَالَ ٱلضُّعَفَٰٓؤُاْ لِلَّذِينَ ٱسۡتَكۡبَرُوٓاْ إِنَّا كُنَّا لَكُمۡ تَبَعٗا فَهَلۡ أَنتُم مُّغۡنُونَ عَنَّا مِنۡ عَذَابِ ٱللَّهِ مِن شَيۡءٖۚ قَالُواْ لَوۡ هَدَىٰنَا ٱللَّهُ لَهَدَيۡنَٰكُمۡۖ سَوَآءٌ عَلَيۡنَآ أَجَزِعۡنَآ أَمۡ صَبَرۡنَا مَا لَنَا مِن مَّحِيصٖ ۝٢١

വിധിപ്രസ്താവമുണ്ടായിക്കഴിഞ്ഞാല്‍ പിശാച് വിളംബരംചെയ്യും:¹³
അല്ലാഹു നിങ്ങളോട് സത്യസന്ധമായ വാഗ്ദാനമാണ് ചെയ്തിരുന്നത്. ഞാനും നിങ്ങള്‍ക്കു ചില വാക്കുതന്നു; എന്നാല്‍ ഞാനതു ലംഘിച്ചു. നിങ്ങളിലെനിക്ക് അധീശാധിപത്യമൊന്നുമുണ്ടായിരുന്നില്ല - ഞാന്‍ വിളിച്ചു; അപ്പോള്‍ നിങ്ങളതിന് ഉത്തരം ചെയ്തുവെന്ന്മാത്രം. അതുകൊണ്ട് എന്നെയധിക്ഷേപിക്കേണ്ട, സ്വന്തത്തെത്തന്നെ നിങ്ങള്‍ കുറ്റപ്പെടുത്തിയാല്‍ മതി¹⁴
നിങ്ങളെ സഹായിക്കാന്‍ എനിക്കു സാധിക്കുകയില്ല; എന്നെ രക്ഷപ്പെടുത്താന്‍ നിങ്ങള്‍ക്കുമാവില്ല. മുമ്പ് (ഭൗതിക ലോകത്ത്) നിങ്ങളെന്നെ അല്ലാഹുവിന്റെ പങ്കുകാരനാക്കിയിരുന്നതിനെ ഞാന്‍ ഇതാ നിഷേധിക്കുന്നു. അക്രമികള്‍ക്ക് വേദനാജനകമായ ശിക്ഷയുണ്ട്, തീര്‍ച്ച.¹⁵

3 വിശദീകരണങ്ങൾ കാണുക

13. സത്യനിഷേധികള്‍ നരകത്തില്‍ പ്രവേശിപ്പിക്കപ്പെട്ടു കഴിഞ്ഞശേഷം ഇബ്‌ലീസ് നടത്തുന്ന ഒരു ഹ്രസ്വപ്രസംഗമാണിത്. ലക്ഷണംകെട്ട പ്രഭാഷണം(അല്‍ഖുഥ്ബത്തുല്‍ബത്‌റാ) എന്ന പേരില്‍ കുപ്രസിദ്ധമാണിത്. ശാശ്വത പരാജയവും അനന്തകാലത്തേക്കുള്ള കഠോരശിക്ഷയും ലഭിക്കുന്നതിന് അവരെ അര്‍ഹരാക്കിയതിന്റെ ഉത്തരവാദിത്വം ഒഴിഞ്ഞുകൊണ്ടും അത് അനുയായികളുടെ പിരടിയില്‍തന്നെ വെച്ചുകെട്ടിയും അവന്‍ നിര്‍വഹിക്കുന്നതാണീ പ്രസംഗം.

14. കാലാകാലങ്ങളിലായി സത്യനിഷേധികളുയര്‍ത്തിയിരുന്ന മുഴുവന്‍ വാദങ്ങളും - മരണാനന്തര ജീവിതവും സ്വര്‍ഗ - നരകങ്ങളും മറ്റും ഇല്ലെന്നത് - ഇബ്‌ലീസിന്റേതാണ്. താനും തന്റെ പ്രതീകങ്ങളായ ബിംബങ്ങളും ആള്‍ദൈവങ്ങളും നിങ്ങളെ രക്ഷപ്പെടുത്തും എന്ന വാഗ്ദാനം അവന്‍ ലംഘിച്ചു. എന്റെ മാര്‍ഗം നിങ്ങള്‍ സ്വയം തെരെഞ്ഞടുത്തതാണ്; പ്രത്യുത നിങ്ങളിലത് അടിച്ചേല്‍പിക്കാന്‍ എനിക്കു കഴിയുമായിരുന്നില്ല എന്ന വസ്തുത വെളിപ്പെടുത്തുകയാണവന്‍.

15. അനുയായികളെ ബഹുമുഖമായ അപകടങ്ങളില്‍ ചാടിച്ച് അവസാനം തലയൂരുകയും നിഷേധപ്രസ്താവനകള്‍ നടത്തുകയും ചെയ്യുന്ന ധാരാളം നേതാക്കളെ നമുക്ക് കാണാം. അവരുടെയൊക്കെ നെടുനായകനായ ഇബ്‌ലീസും അന്ത്യനാളില്‍ ഇതുതന്നെ ചെയ്യുന്നു; മറിച്ചൊന്നും ചെയ്ത് രക്ഷാമാര്‍ഗം തേടാനാകാത്ത അവസാനഘട്ടത്തില്‍. അല്ലാഹു നമ്മെ കാത്തു രക്ഷിക്കട്ടെ.

وَقَالَ ٱلشَّيۡطَٰنُ لَمَّا قُضِيَ ٱلۡأَمۡرُ إِنَّ ٱللَّهَ وَعَدَكُمۡ وَعۡدَ ٱلۡحَقِّ وَوَعَدتُّكُمۡ فَأَخۡلَفۡتُكُمۡۖ وَمَا كَانَ لِيَ عَلَيۡكُم مِّن سُلۡطَٰنٍ إِلَّآ أَن دَعَوۡتُكُمۡ فَٱسۡتَجَبۡتُمۡ لِيۖ فَلَا تَلُومُونِي وَلُومُوٓاْ أَنفُسَكُمۖ مَّآ أَنَا۠ بِمُصۡرِخِكُمۡ وَمَآ أَنتُم بِمُصۡرِخِيَّ إِنِّي كَفَرۡتُ بِمَآ أَشۡرَكۡتُمُونِ مِن قَبۡلُۗ إِنَّ ٱلظَّٰلِمِينَ لَهُمۡ عَذَابٌ أَلِيمٞ ۝٢٢

സത്യവിശ്വാസം കൈക്കൊള്ളുകയും സല്‍കര്‍മങ്ങളനുഷ്ഠിക്കുകയും ചെയ്തവര്‍ താഴ്ഭാഗത്തുകൂടി ആറുകളൊഴുകുന്ന സ്വര്‍ഗങ്ങളില്‍ പ്രവേശിപ്പിക്കപ്പെടുന്നതാണ്. തങ്ങളുടെ നാഥന്റെ അനുമതിയോടെ അവരതില്‍ ശാശ്വതരായിരിക്കും. അവിടെ അവരുടെ അഭിവാദ്യം സലാം ആയിരിക്കുന്നതാണ്¹⁶

1 വിശദീകരണം കാണുക

16. നിഷേധികളുടെ നരകശിക്ഷയെക്കുറിച്ച് പ്രതിപാദിച്ചതിന്റെ തൊട്ടുപിന്നിലായി സത്യവിശ്വാസികള്‍ക്ക് കനിഞ്ഞേകപ്പെടുന്ന അനിര്‍വചനീയമായ സ്വര്‍ഗത്തെക്കുറിച്ചു പറയുകയാണ്. സ്വര്‍ഗത്തെയും അതിലെ നിസ്സീമവും അനിര്‍വചനീയവുമായ സുഖസൗകര്യങ്ങളെയും കുറിച്ച് ഖുര്‍ആനില്‍ പലേടത്തും പ്രതിപാദനങ്ങളുണ്ട്. ഇവിടെ ഒറ്റവാക്കില്‍ സംഗ്രഹിച്ചുപറഞ്ഞ അരുവികളെപ്പറ്റി സൂറത്തു മുഹമ്മദ്: 15 -ല്‍ വിശദീകരിച്ചതായും കാണാം. 'സലാം' സംബന്ധിച്ച് സൂറ യൂനുസ് 10 ലും വിവരണമുണ്ട്.

وَأُدۡخِلَ ٱلَّذِينَ ءَامَنُواْ وَعَمِلُواْ ٱلصَّٰلِحَٰتِ جَنَّٰتٖ تَجۡرِي مِن تَحۡتِهَا ٱلۡأَنۡهَٰرُ خَٰلِدِينَ فِيهَا بِإِذۡنِ رَبِّهِمۡۖ تَحِيَّتُهُمۡ فِيهَا سَلَٰمٌ ۝٢٣

24–27

ഒരു ഉദാത്ത വചനത്തെ അല്ലാഹു എങ്ങനെയാണ് ഉപമിച്ചിരിക്കുന്നത് എന്ന് താങ്കള്‍ ഗ്രഹിക്കുന്നില്ലേ? ഒരു ഉത്തമവൃക്ഷം പോലെ. അതിന്റെ വേര് ഭൂമിയില്‍ ആഴ്ന്നിറങ്ങിയതും ശിഖരങ്ങള്‍ അന്തരീക്ഷത്തിലേക്ക് ഉയര്‍ന്നു നില്‍ക്കുന്നതുമാകുന്നു. നാഥന്റെ അനുമതിയോടെ സര്‍വദാ അത് ഫലദായകമായിരിക്കും. ചിന്തിച്ചുഗ്രഹിക്കാനായി മനുഷ്യര്‍ക്ക് അല്ലാഹു ഉപമകള്‍ പ്രതിപാദിച്ചുകൊടുക്കുന്നു. എന്നാല്‍ ഒരു ഹീനവചനത്തിന്റെ ഉദാഹരണം, ഭൂമിയുടെ ഉപരിതലത്തില്‍ നിന്നു പറിച്ചെടുക്കപ്പെട്ടതും നിലനില്‍പില്ലാത്തതുമായ ദുഷിച്ച മരം പോലെയാണ്¹⁷
ഐഹിക - പാരത്രിക ലോകങ്ങളില്‍ ദൃഢീകൃത വചനംകൊണ്ട് സത്യവിശ്വാസികളെ അല്ലാഹു ഉറപ്പിച്ചുനിറുത്തുകയും അക്രമികളെ അവന്‍ ദുര്‍മാര്‍ഗത്തിലാക്കുകയും ചെയ്യുന്നു. താന്‍ ഉദ്ദേശിക്കുന്നത് അല്ലാഹു പ്രവര്‍ത്തിക്കുന്നതാണ്.¹⁸

2 വിശദീകരണങ്ങൾ കാണുക

17. ഇവിടെ പറഞ്ഞ ഉദാത്തവചനം സത്യവിശ്വാസത്തിന്റെ അടിസ്ഥാന സാക്ഷ്യവചനങ്ങളാണ്, കലിമത്തുത്തൗഹീദ്; 'ഉത്തമ വൃക്ഷം' കൊണ്ടുള്ള വിവക്ഷ വിശ്വാസിയുടെ ഹൃദയമത്രേ - ഇമാം ഇബ്‌നുഅബ്ബാസി(റ)ന്റെ വ്യാഖ്യാനമാണിത്. രൂഢമൂലമായ സത്യവിശ്വാസമുള്ള വ്യക്തിയില്‍ നിന്നു എന്നും എല്ലാവര്‍ക്കും നാനാവിധ ഗുണങ്ങളും നേട്ടങ്ങളുമാണ് കിട്ടുക, അത് അല്ലാഹുവിങ്കല്‍ സ്വീകരിക്കപ്പെടുകയും പ്രതിഫലാര്‍ഹമായിരിക്കുകയും ചെയ്യും എന്നു താല്‍പര്യം. തുടര്‍ന്നു പറയുന്നത് നിഷേധിയുടെ ഉപമയാണ്. അവന് യുക്തിഭദ്രമോ സ്പഷ്ടമോ ആയ വിശ്വാസമോ ആദര്‍ശമോ ഉണ്ടാകില്ല. അല്ലാഹുവിങ്കല്‍ അവന്റെ കര്‍മങ്ങള്‍ അസ്വീകാര്യമായിരിക്കും. 'ദുഷിച്ച മരം'കൊണ്ടുള്ള വിവക്ഷ വള്ളിച്ചെടിയായ ആട്ടങ്ങയാണെന്ന് മുഫസ്സിറുകള്‍ പറഞ്ഞിട്ടുണ്ട്.

18. ഐഹികലോകത്ത് വിശ്വാസി അചഞ്ചലനായിരിക്കും; ഏതു പ്രതിസന്ധിയെയും വിശ്വാസം വഴി അവന്‍ അതിജീവിക്കും. പരലോകത്തും അതേ വിശ്വാസമാണ് അവന്റെ വിജയത്തിന് ഹേതുകമാവുക. ഒരിക്കല്‍ തിരുമേനി (സ്വ) അരുളി: ഖബ്‌റില്‍ വെച്ച് സത്യവിശ്വാസി ചോദ്യംചെയ്യപ്പെടുമ്പോള്‍ 'അല്ലാഹു അല്ലാതെ ഒരാരാധ്യനില്ലെന്നും മുഹമ്മദ് നബി(സ്വ) അവന്റെ ദൂതനാണെന്നും' സാക്ഷ്യം വഹിക്കുന്നതാണ്. 'യുസബ്ബിത്തുല്ലാഹു...'(ഈ സൂക്താന്ത്യം) അതാണു വ്യക്തമാക്കുന്നത്.(ബുഖാരി)

أَلَمۡ تَرَ كَيۡفَ ضَرَبَ ٱللَّهُ مَثَلٗا كَلِمَةٗ طَيِّبَةٗ كَشَجَرَةٖ طَيِّبَةٍ أَصۡلُهَا ثَابِتٞ وَفَرۡعُهَا فِي ٱلسَّمَآءِ ۝٢٤

تُؤۡتِيٓ أُكُلَهَا كُلَّ حِينِۭ بِإِذۡنِ رَبِّهَاۗ وَيَضۡرِبُ ٱللَّهُ ٱلۡأَمۡثَالَ لِلنَّاسِ لَعَلَّهُمۡ يَتَذَكَّرُونَ ۝٢٥

وَمَثَلُ كَلِمَةٍ خَبِيثَةٖ كَشَجَرَةٍ خَبِيثَةٍ ٱجۡتُثَّتۡ مِن فَوۡقِ ٱلۡأَرۡضِ مَا لَهَا مِن قَرَارٖ ۝٢٦

يُثَبِّتُ ٱللَّهُ ٱلَّذِينَ ءَامَنُواْ بِٱلۡقَوۡلِ ٱلثَّابِتِ فِي ٱلۡحَيَوٰةِ ٱلدُّنۡيَا وَفِي ٱلۡأٓخِرَةِۖ وَيُضِلُّ ٱللَّهُ ٱلظَّٰلِمِينَۚ وَيَفۡعَلُ ٱللَّهُ مَا يَشَآءُ ۝٢٧

28–31

അല്ലാഹുവിന്റെ അനുഗ്രഹങ്ങള്‍ക്ക് കൃതജ്ഞതയ്ക്കു പകരം കൃതഘ്‌നത കാട്ടുകയും സ്വന്തം ജനത്തെ നാശത്തിന്റെ സങ്കേതമായ നരകത്തില്‍ ആപതിപ്പിക്കുകയും ചെയ്തവരെ താങ്കള്‍ കാണുന്നില്ലേ? അതില്‍ പ്രവേശിച്ച് അവര്‍ നരകിക്കും. എത്ര ദുഷിച്ച സങ്കേതമാണത്!¹⁹
അല്ലാഹുവിന്റെ പന്ഥാവില്‍ നിന്ന് മറ്റുള്ളവരെ വഴിതെറ്റിക്കാനായി അവന്ന് അവര്‍ പങ്കുകാരെ സ്ഥാപിച്ചു. പ്രഖ്യാപിക്കുക: നിങ്ങള്‍ സുഖാസ്വാദനങ്ങള്‍ അനുഭവിച്ചോളൂ; നരകത്തിലേക്കാണ് നിങ്ങളുടെ മടക്കം, തീര്‍ച്ച. നമസ്‌കാരം മുറപ്രകാരം അനുഷ്ഠിക്കാനും ക്രയവിക്രയങ്ങളോ സൗഹൃദമോ ഫലദായകമല്ലാത്തൊരു ദിനം വരുംമുമ്പ്²⁰
രഹസ്യമായും പരസ്യമായും ചെലവുചെയ്യാനും സത്യവിശ്വാസികളായ എന്റെ അടിമകളോട് താങ്കള്‍ പറയുക.

2 വിശദീകരണങ്ങൾ കാണുക

19. മക്കയിലെ ബഹുദൈവവിശ്വാസികളാണു സൂചന. ഒട്ടേറെ അനുഗ്രഹങ്ങളാണവര്‍ക്കു ലഭിച്ചിരുന്നത്: അവരുടെ പ്രദേശം അല്ലാഹു സുരക്ഷിതസങ്കേതം(ഹറം) ആക്കി; ഊഷര ഭൂമിയായിട്ടും ജീവിതം സുഭിക്ഷമാക്കിക്കൊടുത്തു; ഭൗതിക - പാരത്രികമോക്ഷത്തിനും പ്രതാപലബ്ധിക്കും നിമിത്തമായി മുഹമ്മദ് നബി(സ്വ)യെ നിയോഗിച്ചു. പക്ഷേ കടുത്ത ധിക്കാരവും നിഷേധവുമാണവര്‍ സ്വീകരിച്ചത്. തന്മൂലം ഏഴുവര്‍ഷം നീണ്ട ഗുരുതര ക്ഷാമം ബാധിച്ചു. ബദ്‌റില്‍ അവരുടെ എഴുപത് പ്രമുഖനേതാക്കള്‍ അറുകൊല ചെയ്യപ്പെട്ടു; അത്രതന്നെ പേര്‍ തടവുകാരായി. അവസാനം ഇനി വരാനിരിക്കുന്നതോ, അതീവ നിന്ദ്യവും ഹീനവുമായ ശാശ്വത നരകവും! എല്ലാ നിഷേധികളുടെ സ്ഥിതിയും ഇതുതന്നെ.

20. ഖിയാമനാള്‍ ആണ് ഉദ്ദേശ്യം. ഭൗതികമാനദണ്ഡങ്ങളനുസരിച്ച് - സൗഹൃദമോ കുടുംബബന്ധമോ പണമോ മാധ്യമമാക്കി - കാര്യം നേടല്‍ അവിടെ നടക്കുകയില്ല എന്നു വിവക്ഷ. സൂറത്തുല്‍ ബഖറ(2:254)യിലും മറ്റും ഇത് വ്യക്തമാക്കിയിട്ടുണ്ട്.

۞ أَلَمۡ تَرَ إِلَى ٱلَّذِينَ بَدَّلُواْ نِعۡمَتَ ٱللَّهِ كُفۡرٗا وَأَحَلُّواْ قَوۡمَهُمۡ دَارَ ٱلۡبَوَارِ ۝٢٨

جَهَنَّمَ يَصۡلَوۡنَهَاۖ وَبِئۡسَ ٱلۡقَرَارُ ۝٢٩

وَجَعَلُواْ لِلَّهِ أَندَادٗا لِّيُضِلُّواْ عَن سَبِيلِهِۦۗ قُلۡ تَمَتَّعُواْ فَإِنَّ مَصِيرَكُمۡ إِلَى ٱلنَّارِ ۝٣٠

قُل لِّعِبَادِيَ ٱلَّذِينَ ءَامَنُواْ يُقِيمُواْ ٱلصَّلَوٰةَ وَيُنفِقُواْ مِمَّا رَزَقۡنَٰهُمۡ سِرّٗا وَعَلَانِيَةٗ مِّن قَبۡلِ أَن يَأۡتِيَ يَوۡمٞ لَّا بَيۡعٞ فِيهِ وَلَا خِلَٰلٌ ۝٣١

32–34

ഭുവന - വാനങ്ങള്‍ സൃഷ്ടിക്കുകയും അന്തരീക്ഷത്തില്‍ നിന്നു മഴവര്‍ഷിക്കുകയും തദ്വാരാ ഉപജീവനത്തിനായി നിങ്ങള്‍ക്ക് ഫലവര്‍ഗങ്ങള്‍ ഉല്‍പാദിപ്പിക്കുകയും ചെയ്തത് അല്ലാഹുവാണ്. അവന്റെ ഉത്തരവനുസരിച്ച് സമുദ്രയാത്രക്കായി നിങ്ങള്‍ക്ക് ജലയാനങ്ങള്‍ കീഴ്‌പ്പെടുത്തുകയും നദികള്‍, നിരന്തരമായി ചലിക്കുന്ന സൂര്യ - ചന്ദ്രന്‍മാര്‍, രാത്രി, പകല്‍ എന്നിവയെല്ലാം നിങ്ങള്‍ക്കു വിധേയമാക്കുകയും ആവശ്യപ്പെട്ടതില്‍ നിന്നൊക്കെ നിങ്ങള്‍ക്ക് നല്‍കുകയും ചെയ്തു അവന്‍. അല്ലാഹുവിന്റെ അനുഗ്രഹങ്ങള്‍ എണ്ണിനോക്കുകയാണെങ്കില്‍ നിങ്ങള്‍ക്കവ തിട്ടപ്പെടുത്താനാവില്ല²¹
നിശ്ചയമായും മനുഷ്യന്‍ ഗുരുതരമായ അക്രമിയും ഏറെ നന്ദികെട്ടവനും തന്നെയത്രേ!

1 വിശദീകരണം കാണുക

21. നിങ്ങള്‍ ചോദിച്ചതില്‍ നിന്നൊക്കെ തന്നു എന്നാല്‍ നിങ്ങള്‍ക്ക് ആവശ്യമുള്ളതില്‍ നിന്ന് അഥവാ നിങ്ങള്‍ ചോദിക്കുമായിരുന്നവയില്‍ നിന്ന് എന്നു വിവക്ഷ. ചോദിച്ചതും ചോദിക്കാത്തതുകൂടിയും തന്നു എന്നു വ്യാഖ്യാനിച്ചവരുമുണ്ട്. ഏതായാലും മനുഷ്യനുവേണ്ടി അല്ലാഹു സംവിധാനിച്ചതും നല്‍കിയതുമായ അനുഗ്രഹങ്ങള്‍ പരകോടികളാണ്.

ٱللَّهُ ٱلَّذِي خَلَقَ ٱلسَّمَٰوَٰتِ وَٱلۡأَرۡضَ وَأَنزَلَ مِنَ ٱلسَّمَآءِ مَآءٗ فَأَخۡرَجَ بِهِۦ مِنَ ٱلثَّمَرَٰتِ رِزۡقٗا لَّكُمۡۖ وَسَخَّرَ لَكُمُ ٱلۡفُلۡكَ لِتَجۡرِيَ فِي ٱلۡبَحۡرِ بِأَمۡرِهِۦۖ وَسَخَّرَ لَكُمُ ٱلۡأَنۡهَٰرَ ۝٣٢

وَسَخَّرَ لَكُمُ ٱلشَّمۡسَ وَٱلۡقَمَرَ دَآئِبَيۡنِۖ وَسَخَّرَ لَكُمُ ٱلَّيۡلَ وَٱلنَّهَارَ ۝٣٣

وَءَاتَىٰكُم مِّن كُلِّ مَا سَأَلۡتُمُوهُۚ وَإِن تَعُدُّواْ نِعۡمَتَ ٱللَّهِ لَا تُحۡصُوهَآۗ إِنَّ ٱلۡإِنسَٰنَ لَظَلُومٞ كَفَّارٞ ۝٣٤

35–41

ഇബ്രാഹീം നബി ഇങ്ങനെ പ്രാര്‍ത്ഥിച്ച സന്ദര്‍ഭം സ്മര്‍ത്തവ്യമത്രേ: എന്റെ നാഥാ, ഈ മക്കാരാജ്യം നീ വിശ്വസ്തമാക്കുകയും എന്നെയും മക്കളെയും ബിംബങ്ങളെ - രക്ഷിതാവേ, അവ നിരവധി മനുഷ്യരെ വഴിതെറ്റിച്ചിട്ടുണ്ട് - ആരാധിക്കുന്നതില്‍ നിന്നു ദൂരീകരിക്കുകയും ചെയ്യേണമേ²²
അതുകൊണ്ട് എന്നെ ആര് അനുധാവനം ചെയ്യുന്നുവോ അവന്‍ എന്റെ ഗണത്തിലാണ്; എന്നെ ആരെങ്കിലും ധിക്കരിക്കുന്നുവെങ്കില്‍ നാഥാ, നീ ധാരാളമായി പൊറുക്കുന്നവനും കരുണാമയനുമാകുന്നു. ഞങ്ങളുടെ നാഥാ, എന്റെ ചില സന്തതികളെ കൃഷിയൊന്നുമില്ലാത്ത ഈ താഴ്‌വരയില്‍ നിന്റെ വിശുദ്ധ ഗേഹ(കഅ്ബ)ത്തിനു സമീപം - അവര്‍ കൃത്യമായി നമസ്‌കാരം നിലനിറുത്താനായി - ഞാന്‍ നിവസിപ്പിച്ചിരിക്കുന്നു. അതുകൊണ്ട് ജനഹൃദയങ്ങള്‍ അവരോടു ചായ്‌വുള്ളതാക്കുകയും അവര്‍ക്ക് ആഹരിക്കാനായി ഫലങ്ങള്‍ നല്‍കുകയും ചെയ്യേണമേ - അവര്‍ കൃതജ്ഞരായേക്കാം.²³
ഞങ്ങളുടെ നാഥാ, രഹസ്യമായും പരസ്യമായും ഞങ്ങള്‍ ചെയ്യുന്നത് നിശ്ചയം നീ അറിയുന്നുണ്ട്. ആകാശ ഭൂമിയിലുള്ള യാതൊന്നും അല്ലാഹുവിന്ന് അഗോചരമല്ല. ഈ വയസ്സുകാലത്ത് ഇസ്മാഈലിനെയും ഇസ്ഹാഖിനെയും എനിക്കു കനിഞ്ഞേകിയ അല്ലാഹുവിനാണ് സര്‍വസ്തുതിയും. നിശ്ചയം, എന്റെ നാഥന്‍ പ്രാര്‍ഥന കേള്‍ക്കുന്നവന്‍ തന്നെയത്രേ.²⁴
നാഥാ, എന്നെയും എന്റെ മക്കളില്‍ പെട്ടവരെയും കൃത്യമായി നമസ്‌കാരം നിലനിറുത്തുന്നവരാക്കേണമേ; ഞങ്ങളുടെ നാഥാ, എന്റെ പ്രാര്‍ത്ഥന നീ സ്വീകരിക്കേണമേ. ഞങ്ങളുടെ നാഥാ, വിചാരണ നടക്കുന്ന നാളില്‍ എനിക്കും മാതാപിതാക്കള്‍ക്കും സത്യവിശ്വാസികള്‍ക്കും നീ പാപങ്ങള്‍ പൊറുക്കേണമേ.²⁵

4 വിശദീകരണങ്ങൾ കാണുക

22. ഇബ്രാഹീം നബി(അ)ന്റെ ഈ ദുആ അല്ലാഹു സ്വീകരിച്ചു. ബിംബങ്ങളിലും വിഗ്രഹാരാധനയിലും നിന്ന് കഅ്ബാ ശരീഫിനെയും അറേബ്യന്‍ ഉപദ്വീപിനെത്തന്നെയും മക്കാഫത്‌ഹോടെ തിരുനബി(സ്വ)യുടെ തിരുഹസ്തങ്ങളാല്‍ അല്ലാഹു സ്ഫുടം ചെയ്‌തെടുക്കുകയുണ്ടായി.

23. ഭാര്യ ഹാജര്‍ ബീവിയെയും പുത്രന്‍ ഇസ്മാഈല്‍ നബി(അ)യെയുമാണവിടെ താമസിപ്പിച്ചത്. പിന്നീടവര്‍ വളര്‍ന്നു പന്തലിച്ചു. വരണ്ടുണങ്ങി ഊഷരഭൂമിയായിക്കിടന്ന പ്രദേശം പ്രശാന്ത സുന്ദരവും ജനനിബിഡവും ഭക്ഷ്യവിഭവങ്ങള്‍ സുലഭവുമായ നാടായി മാറി.

24. സാധാരണഗതിയിലെ ഒരു പുരുഷായുസ്സ് മുഴുവന്‍ സന്താന സൗഭാഗ്യമില്ലാതെയാണ് ഇബ്രാഹീം നബി(അ) കഴിച്ചുകൂട്ടിയത്. ജീവിതത്തിന്റെ സായംസന്ധ്യയില്‍ 99 -ാം വയസ്സിലാണ് ഇസ്മാഈല്‍(അ) ജനിക്കുന്നത്. ഇസ്ഹാഖ് നബി(അ)ന്റെ പിറവിയാകട്ടെ നൂറ്റിപ്പന്ത്രണ്ടാം വയസ്സിലായിരുന്നു (ഇമാം ഇബ്‌നു അബ്ബാസ്.) തീര്‍ത്തും അസാധാരണവും അത്യമൂല്യവുമായ അനുഗ്രഹമായതിനാലാണ് ഇത് പ്രത്യേകം പറഞ്ഞ് സ്തുതിയര്‍പ്പിക്കുന്നത്.

25. ഇബ്രാഹീം നബി(അ) അല്ലാഹുവിനോട് പ്രത്യേകമായി അപേക്ഷിക്കുന്ന ഇക്കാര്യം ഏറെ ഗൗരവതരവും അതീവ ശ്രദ്ധേയവുമാണ്. മക്കള്‍ കൃത്യമായി നമസ്‌കാരം നിലനിറുത്തുന്നവരാക്കിത്തരേണമേ എന്ന ദുആയാണത്. സാധാരണയായി ആളുകള്‍ നിസ്സാരമായാണിത് കാണുക. അല്ലാഹുവിന്റെ ആത്മമിത്രം എന്ന പദവിയിലുള്ള ഇബ്രാഹീം നബി(അ)ന്റെ ഈ പ്രാര്‍ത്ഥനയില്‍ നിന്ന് അതിന്റെ മാഹാത്മ്യവും ഗൗരവവും നാമുള്‍ക്കൊള്ളണം. മാതാപിതാക്കള്‍ക്കുവേണ്ടിയുള്ള പാപമോചനാര്‍ത്ഥന ഓരോ വ്യക്തിയും നിര്‍വഹിക്കേണ്ടതാണ്. എന്നാല്‍ ഇബ്രാഹീം നബി(അ)യുടെ ഈ പ്രാര്‍ത്ഥനയെപ്പറ്റി സൂറത്തുത്തൗബ 114-ല്‍ പരാമര്‍ശിച്ചിട്ടുണ്ട്; അവിടെ നോക്കുക

وَإِذۡ قَالَ إِبۡرَٰهِيمُ رَبِّ ٱجۡعَلۡ هَٰذَا ٱلۡبَلَدَ ءَامِنٗا وَٱجۡنُبۡنِي وَبَنِيَّ أَن نَّعۡبُدَ ٱلۡأَصۡنَامَ ۝٣٥

رَبِّ إِنَّهُنَّ أَضۡلَلۡنَ كَثِيرٗا مِّنَ ٱلنَّاسِۖ فَمَن تَبِعَنِي فَإِنَّهُۥ مِنِّيۖ وَمَنۡ عَصَانِي فَإِنَّكَ غَفُورٞ رَّحِيمٞ ۝٣٦

رَّبَّنَآ إِنِّيٓ أَسۡكَنتُ مِن ذُرِّيَّتِي بِوَادٍ غَيۡرِ ذِي زَرۡعٍ عِندَ بَيۡتِكَ ٱلۡمُحَرَّمِ رَبَّنَا لِيُقِيمُواْ ٱلصَّلَوٰةَ فَٱجۡعَلۡ أَفۡـِٔدَةٗ مِّنَ ٱلنَّاسِ تَهۡوِيٓ إِلَيۡهِمۡ وَٱرۡزُقۡهُم مِّنَ ٱلثَّمَرَٰتِ لَعَلَّهُمۡ يَشۡكُرُونَ ۝٣٧

رَبَّنَآ إِنَّكَ تَعۡلَمُ مَا نُخۡفِي وَمَا نُعۡلِنُۗ وَمَا يَخۡفَىٰ عَلَى ٱللَّهِ مِن شَيۡءٖ فِي ٱلۡأَرۡضِ وَلَا فِي ٱلسَّمَآءِ ۝٣٨

ٱلۡحَمۡدُ لِلَّهِ ٱلَّذِي وَهَبَ لِي عَلَى ٱلۡكِبَرِ إِسۡمَٰعِيلَ وَإِسۡحَٰقَۚ إِنَّ رَبِّي لَسَمِيعُ ٱلدُّعَآءِ ۝٣٩

رَبِّ ٱجۡعَلۡنِي مُقِيمَ ٱلصَّلَوٰةِ وَمِن ذُرِّيَّتِيۚ رَبَّنَا وَتَقَبَّلۡ دُعَآءِ ۝٤٠

رَبَّنَا ٱغۡفِرۡ لِي وَلِوَٰلِدَيَّ وَلِلۡمُؤۡمِنِينَ يَوۡمَ يَقُومُ ٱلۡحِسَابُ ۝٤١

42–46

അക്രമികളുടെ ചെയ്തികളെക്കുറിച്ച് അല്ലാഹു അശ്രദ്ധനാണെന്നു താങ്കള്‍ ധരിച്ചുവശാകേണ്ട; ഭീതിദമായ ഒരുനാളിലേക്ക് അവരെയവന്‍ പിന്തിച്ചിടുകയാണ് - അന്ന് അവര്‍ കണ്ണുകള്‍ തള്ളി തലപൊക്കി വിരണ്ടോടും; സ്വന്തത്തിലേക്ക് തന്നെ നോക്കുകയില്ല,അവരുടെ ഹൃദയങ്ങള്‍ നിശ്ശൂന്യമായിരിക്കും²⁶
ശിക്ഷ വന്നെത്തുന്ന നാളിനെപ്പറ്റി അങ്ങ് ജനങ്ങള്‍ക്ക് താക്കീത് നല്‍കുക. അക്രമികള്‍ അന്നു പറയും: നാഥാ, അടുത്തുതന്നെയുള്ള ഒരവധിവരെ ഞങ്ങളെ പിന്തിച്ചുതരേണമേ; എങ്കില്‍ ഞങ്ങള്‍ നിന്റെ ക്ഷണം സ്വീകരിക്കുകയും പ്രവാചകരെ പിന്തുടരുകയും ചെയ്തുകൊള്ളാം. (മറുപടി നല്‍കപ്പെടും:) 'മറ്റൊരു ലോകത്തേക്കുള്ള മാറ്റം ഞങ്ങള്‍ക്കുണ്ടാവുകയേ ഇല്ലെന്ന് ശപഥംചെയ്തിരുന്നത് നിങ്ങള്‍ തന്നെയല്ലേ?'ആത്മദ്രോഹം ചെയ്തവരുടെ ആവാസകേന്ദ്രങ്ങളിലാണ് നിങ്ങള്‍ നിവസിച്ചത്; അവരെക്കൊണ്ട് നാം എന്താണ് ചെയ്തതെന്ന് നിങ്ങള്‍ക്കു സ്പഷ്ടമായി ബോധ്യപ്പെടുകയും നിങ്ങള്‍ക്കു നാം ഉദാഹരണങ്ങള്‍ വിവരിച്ചുതരികയുമുണ്ടായി.²⁷
തങ്ങളാലാവുന്ന കുതന്ത്രങ്ങള്‍ അവര്‍ പയറ്റി; ആ കുതന്ത്രങ്ങള്‍ക്കുള്ള പ്രതിഫലം അല്ലാഹുവിങ്കലുണ്ട്. അവരുടെ ഗൂഢാലോചനകള്‍ മൂലം മലകള്‍ക്കു സ്ഥാനചലനം സംഭവിക്കുമാറായിരുന്നു!²⁸

3 വിശദീകരണങ്ങൾ കാണുക

26. സത്യനിഷേധികളും ധിക്കാരികളുമായ ആളുകള്‍ തങ്ങളുടെ അക്രമപ്രവര്‍ത്തനങ്ങള്‍ തുടര്‍ന്നുകൊണ്ടേയിരിക്കുന്നതായി കാണുന്നത് സാര്‍വത്രികമാണ്. അവസാനത്തെ കഠോരമായ ഒറ്റപ്പിടിത്തത്തിനായി അല്ലാഹു തങ്ങളെ അയച്ചുവിടുകയാണ് എന്ന യാഥാര്‍ത്ഥ്യം അവര്‍ തിരിച്ചറിയില്ല. അവസാനം ഗുരുതരമായ ശിക്ഷ-ഏറെക്കുറെ ദുന്‍യാവില്‍ വെച്ചു തന്നെ-അവര്‍ ഏറ്റുവാങ്ങും; പരലോകത്താകട്ടെ, അനന്തവും ഹീനവുമായ നരകശിക്ഷയും.

27. പരലോകത്തുവെച്ചുള്ള സത്യനിഷേധികളുടെ ഈ കുമ്പസാരത്തെപ്പറ്റി ഖുര്‍ആന്‍ പലവുരു മുന്നറിയിപ്പു നല്‍കിയിട്ടുണ്ട്. അത് കേവലം ഒരു അധരവ്യായാമം മാത്രമാണ്.(അല്‍മുഅ്മിനൂന്‍: 99,100) ഈ മുന്നറിയിപ്പ് ഉള്‍ക്കൊണ്ട് ഐഹികലോകത്തു വെച്ച് സന്മാര്‍ഗനിഷ്ഠമായ ജീവിതം നയിക്കുവാനാണ് അല്ലാഹു കല്‍പിക്കുന്നത്.

28. മക്കയിലെ ബഹുദൈവവിശ്വാസികളും നബി(സ്വ)യുടെ ബദ്ധവൈരികളുമാണ് സൂചന. പര്‍വതങ്ങളെപ്പോലും കിടിലംകൊള്ളിക്കാന്‍ പര്യാപ്തമായ ഗൂഢാലോചനകളാണവര്‍ നടത്തിയത്. വിശ്വാസികള്‍ക്കും പ്രവാചകനുമെതിരെ ബഹുമുഖമായ പീഡന-മര്‍ദന മുറകള്‍ പ്രയോഗിച്ച അവര്‍ പത്തിലധികം പ്രാവശ്യം നബി(സ്വ)ക്കു നേരെ വധശ്രമങ്ങള്‍ വരെ നടത്തി. പക്ഷേ, പ്രതിയോഗികള്‍ തോറ്റു; ഇസ്‌ലാം വിജയവൈജയന്തി പറത്തി.

وَلَا تَحۡسَبَنَّ ٱللَّهَ غَٰفِلًا عَمَّا يَعۡمَلُ ٱلظَّٰلِمُونَۚ إِنَّمَا يُؤَخِّرُهُمۡ لِيَوۡمٖ تَشۡخَصُ فِيهِ ٱلۡأَبۡصَٰرُ ۝٤٢

مُهۡطِعِينَ مُقۡنِعِي رُءُوسِهِمۡ لَا يَرۡتَدُّ إِلَيۡهِمۡ طَرۡفُهُمۡۖ وَأَفۡـِٔدَتُهُمۡ هَوَآءٞ ۝٤٣

وَأَنذِرِ ٱلنَّاسَ يَوۡمَ يَأۡتِيهِمُ ٱلۡعَذَابُ فَيَقُولُ ٱلَّذِينَ ظَلَمُواْ رَبَّنَآ أَخِّرۡنَآ إِلَىٰٓ أَجَلٖ قَرِيبٖ نُّجِبۡ دَعۡوَتَكَ وَنَتَّبِعِ ٱلرُّسُلَۗ أَوَلَمۡ تَكُونُوٓاْ أَقۡسَمۡتُم مِّن قَبۡلُ مَا لَكُم مِّن زَوَالٖ ۝٤٤

وَسَكَنتُمۡ فِي مَسَٰكِنِ ٱلَّذِينَ ظَلَمُوٓاْ أَنفُسَهُمۡ وَتَبَيَّنَ لَكُمۡ كَيۡفَ فَعَلۡنَا بِهِمۡ وَضَرَبۡنَا لَكُمُ ٱلۡأَمۡثَالَ ۝٤٥

وَقَدۡ مَكَرُواْ مَكۡرَهُمۡ وَعِندَ ٱللَّهِ مَكۡرُهُمۡ وَإِن كَانَ مَكۡرُهُمۡ لِتَزُولَ مِنۡهُ ٱلۡجِبَالُ ۝٤٦

47–50

അതുകൊണ്ട്, തന്റെ ദൂതന്‍മാരോട് ചെയ്ത വാഗ്ദാനം അല്ലാഹു ലംഘിക്കുന്നവനാണെന്ന് താങ്കള്‍ ധരിക്കുകയേ ചെയ്യരുത്. അവന്‍ പ്രതാപശാലിയും ശിക്ഷാനടപടി കൈക്കൊള്ളുന്നവനും തന്നെയത്രേ²⁹
ഈ ഭൂമിയും ആകാശങ്ങളും ഇതല്ലാത്ത മറ്റൊന്നായി പരിവര്‍ത്തിപ്പിക്കപ്പെടുകയും, സര്‍വരെയും അടക്കിബ്ഭരിക്കുന്നവനും ഏകനുമായ അല്ലാഹുവിങ്കല്‍ അവര്‍ ഹാജറാവുകയും ചെയ്യുന്ന ദിവസം!³⁰
പാപികള്‍ അന്നു ചങ്ങലകളില്‍ ബന്ധിതരായി താങ്കള്‍ക്കു കാണാം. അവരുടെ കുപ്പായങ്ങള്‍ താറുകൊണ്ടുള്ളതായിരിക്കും; മുഖങ്ങളെ അഗ്നി ആവരണം ചെയ്യുന്നതുമാണ്.³¹

3 വിശദീകരണങ്ങൾ കാണുക

29. സത്യത്തിനാണ് അന്തിമവിജയം; അല്ലാഹുവിന്റെയും ദൂതന്‍മാരുടെയും ഇസ്‌ലാമിന്റെയും ശത്രുക്കള്‍ പരാജയപ്പെടും-ഇതാണ് അല്ലാഹുവിന്റെ വാഗ്ദാനം. ചരിത്രത്തിന്റെ ഗതിവിഗതികള്‍ പരിശോധിച്ചു നോക്കിയാല്‍ നിംനോന്നതികള്‍ കാണുക സ്വാഭാവികം മാത്രമാണ്. മേല്‍പറഞ്ഞ വാഗ്ദാനം അല്ലാഹു നിറവേറ്റുക തന്നെ ചെയ്യും; അങ്ങനെയാണ് ചരിത്രവും. അതിനുമാത്രം ശക്തനും അധൃഷ്യനുമാണ് പ്രഞ്ച സ്രഷ്ടാവായ അല്ലാഹു.

30. അന്ത്യനാള്‍ സംഭവിച്ചുകഴിഞ്ഞാല്‍ പ്രാപഞ്ചിക ഘടന തന്നെ മാറും. ഭൂമിയും ആകാശവുമെല്ലാം അടിസ്ഥാനപരമായ പരിവര്‍ത്തനങ്ങള്‍ക്കു വിധേയമാകും. ആകാശങ്ങള്‍ പൊട്ടിപ്പിളരും; നക്ഷത്രങ്ങളും ക്ഷീരപഥങ്ങളും കൂട്ടിയിടിച്ച് ഉതിര്‍ന്നുവീഴും; സമുദ്രങ്ങളില്‍ അഗ്നി പടരും; മലകള്‍ തരിപ്പണമാകും... (ഖുര്‍ആന്‍ 70: 8-17; 81: 1-14; 19: 1-5; 21: 1-5)

31. സത്യനിഷേധവും ബഹുദൈവവിശ്വാസവുമെന്ന അതീവ ഗുരുതരമായ പാപം അനുവര്‍ത്തിച്ചവരാണിവിടെ വിവക്ഷ. ചങ്ങലകളില്‍ അത്തരക്കാര്‍ പരസ്പരം ബന്ധിതരായിരിക്കുമെന്നാണ് ഒരു വ്യാഖ്യാനം; മറ്റൊന്ന്, ഒരു വ്യക്തിയുടെത്തന്നെ കൈകാലുകളും കഴുത്തുമൊക്കെ കൂട്ടിക്കെട്ടിയിരിക്കുമെന്നാണ്. അവര്‍ക്ക് ധരിപ്പിക്കപ്പെടുന്ന കുപ്പായം താറുകൊണ്ടുള്ളതായിരിക്കും. നരകത്തിന്റെ ചൂടില്‍ അവ ഉരുകിയൊലിക്കുമല്ലോ. പുറമെ അഗ്നിയുടെ വലയത്തിലാകും അവരുടെ മുഖങ്ങള്‍. മേല്‍ക്കുമേല്‍ ഉദ്‌ബോധനം ചെയ്യപ്പെട്ടിട്ടും സത്യത്തെ നിസ്സാരമായി തള്ളിക്കളഞ്ഞതിനുള്ള കഠോര ശിക്ഷ! കരുണാമയനായ നാഥന്‍ നമ്മെ കാത്തുരക്ഷിക്കട്ടെ.

فَلَا تَحۡسَبَنَّ ٱللَّهَ مُخۡلِفَ وَعۡدِهِۦ رُسُلَهُۥٓۚ إِنَّ ٱللَّهَ عَزِيزٞ ذُو ٱنتِقَامٖ ۝٤٧

يَوۡمَ تُبَدَّلُ ٱلۡأَرۡضُ غَيۡرَ ٱلۡأَرۡضِ وَٱلسَّمَٰوَٰتُۖ وَبَرَزُواْ لِلَّهِ ٱلۡوَٰحِدِ ٱلۡقَهَّارِ ۝٤٨

وَتَرَى ٱلۡمُجۡرِمِينَ يَوۡمَئِذٖ مُّقَرَّنِينَ فِي ٱلۡأَصۡفَادِ ۝٤٩

سَرَابِيلُهُم مِّن قَطِرَانٖ وَتَغۡشَىٰ وُجُوهَهُمُ ٱلنَّارُ ۝٥٠

51–52

ഓരോ വ്യക്തിക്കും താന്‍ അനുവര്‍ത്തിച്ചതിന്ന് അല്ലാഹു പ്രതിഫലം കൊടുക്കുവാനത്രേ ഇത്. നിശ്ചയം, അതിദ്രുതം കണക്കുനോക്കുന്നവനാണവന്‍³²
ഖുര്‍ആന്‍ മുഖേന മുന്നറിയിപ്പ് നല്‍കപ്പെടാനും, ഏകനായ ആരാധ്യനാണ് അവനെന്നു മനസ്സിലാക്കാനും, ബുദ്ധിമാന്‍മാര്‍ ആലോചിച്ചു ഗ്രഹിക്കാനുമായി മാനവകുലത്തിനുള്ള സ്പഷ്ടമായ ഉദ്‌ബോധനമാണിത്.³³

2 വിശദീകരണങ്ങൾ കാണുക

32. മുകളില്‍ പറഞ്ഞ ശിക്ഷകള്‍ കേള്‍ക്കുമ്പോള്‍ കുറേ അധികവും കഠിനവുമായിപ്പോയില്ലേ എന്നു ചിലര്‍ക്കു തോന്നാം. അതിനു മറുപടിയാണിത്: സത്യവും അസത്യവും മനുഷ്യരെ പഠിപ്പിക്കാന്‍ അല്ലാഹു പ്രവാചകരെയും ദൂതന്‍മാരെയും മാര്‍ഗദര്‍ശികളെയും നിശ്ചയിച്ചു. അവര്‍ ഉത്തരവാദിത്വം നിറവേറ്റി. ഈ പശ്ചാത്തലത്തില്‍ നിഷേധികള്‍ക്ക് അര്‍ഹമായ ശിക്ഷനല്‍കുന്നില്ലെങ്കില്‍, വിശ്വാസികളോടു ചെയ്യുന്ന അനീതിയാണത്. അല്ലാഹു തികഞ്ഞ നീതിമാനാണല്ലോ.

33. ഈ ഖുര്‍ആന്‍ ഏതെങ്കിലും ഒരു ജനവിഭാഗത്തിനുള്ളതല്ല; മര്‍ത്യസഞ്ചയത്തിന് ആകമാനമുള്ള ഉദ്‌ബോധനമാണ്. അവര്‍ക്കുള്ള മുന്നറിയിപ്പുകളാണിതിന്റെ ഉള്ളടക്കം. തൗഹീദ് എന്ന ഏകദൈവവിശ്വാസമാണ് ഖുര്‍ആന്റെ അടിസ്ഥാനം; അല്ലാഹു മാത്രമാണ് സത്യസന്ധനായ ദൈവവും ആരാധ്യനും. വിശേഷബുദ്ധി എന്ന അമൂല്യ സിദ്ധിയുള്ളവനാണ് മനുഷ്യന്‍. ആ ബുദ്ധി ഉപയോഗപ്പെടുത്തി ഖുര്‍ആന്‍ പഠിക്കണം, ചിന്തിക്കണം, ഗുണപാഠങ്ങള്‍ ഉള്‍ക്കൊള്ളണം.

لِيَجۡزِيَ ٱللَّهُ كُلَّ نَفۡسٖ مَّا كَسَبَتۡۚ إِنَّ ٱللَّهَ سَرِيعُ ٱلۡحِسَابِ ۝٥١

هَٰذَا بَلَٰغٞ لِّلنَّاسِ وَلِيُنذَرُواْ بِهِۦ وَلِيَعۡلَمُوٓاْ أَنَّمَا هُوَ إِلَٰهٞ وَٰحِدٞ وَلِيَذَّكَّرَ أُوْلُواْ ٱلۡأَلۡبَٰبِ ۝٥٢

ഇബ്രാഹീം - إبراهيم - Ibrahim

ഇബ്രാഹീം إبراهيم Ibrahim