അൽ ഹിജ്ർ - الحجر - Al-Hijr

1. സൂറത്തുല്‍ ഹിജ്‌റ് എന്നാണ് ഈ അധ്യായത്തിന്റെ നാമം. സ്വാലിഹ് നബി(അ)യുടെ ജനത നിവസിച്ചിരുന്ന പ്രദേശത്തിന്റെ പേരാണ് അല്‍ഹിജ്‌റ്. അധ്യായം 12 ഹൂദില്‍ ഇവരെപ്പറ്റി വിവരിച്ചിട്ടുണ്ട്. (സൂക്തം: 61-68) പ്രവാചകന്‍മാരെ നിഷേധിച്ചും പരിഹസിച്ചും നടന്നിരുന്നവരാണല്ലോ സത്യനിഷേധികള്‍. എന്നാല്‍ തങ്ങളും മുസ്‌ലിംകളായിരുന്നുവെങ്കില്‍ എത്ര നന്നായേനെ എന്ന് പരലോകത്ത് അവര്‍ അഭിലഷിക്കും. അതാണിവിടെ സൂചന. ഇമാം ഥ്വബ്‌റാനി, ഇബ്‌നു അബീഹാതിം തുടങ്ങിയവരുടെ ഒരു നിവേദനത്തില്‍ ഇപ്രകാരം കാണാം: നരകത്തിലുള്ള മുഅ്മിനുകളോട് സത്യനിഷേധികള്‍ ഇങ്ങനെ ചോദിക്കും-നിങ്ങള്‍ മുസ്‌ലിംകളായിരുന്നിട്ടും ഞങ്ങളോടൊപ്പമെന്താ നരകത്തില്‍? ഇസ്‌ലാംകൊണ്ട് എന്തു നേട്ടം കിട്ടി നിങ്ങള്‍ക്ക്? തല്‍സമയം ശിക്ഷയുടെ നിശ്ചിതസമയം കഴിഞ്ഞതിനാലോ മാപ്പിന്നു വിധേയമായതു കൊണ്ടോ സത്യവിശ്വാസികളായിരുന്ന മുഴുവന്‍ പേരെയും അല്ലാഹു നരകത്തില്‍ നിന്ന് മോചിപ്പിച്ച് സ്വര്‍ഗത്തില്‍ പ്രവേശിപ്പിക്കും. അപ്പോഴാണ്, 'ഞങ്ങളും മുസ്‌ലിംകള്‍ ആയിരുന്നെങ്കില്‍ എത്ര നന്നായേനെ' എന്ന് നിഷേധികള്‍ അഭിലഷിക്കുക.

2. ഞങ്ങളെപ്പോലുള്ള ഒരു മനുഷ്യന്‍ തന്നെയല്ലേ നീ? റസൂലായി നിയോഗിക്കപ്പെടുന്നത് മാലാഖയാണെങ്കില്‍ ഞങ്ങള്‍ വിശ്വസിക്കാം എന്നു പല ധിക്കാരികളും തങ്ങളുടെ മുര്‍സലുകളോട് തട്ടിവിട്ടിരുന്നു. ഈ മിരട്ടുവാദത്തിന്നു ഖുര്‍ആന്‍ തന്നെ മറുപടി നല്‍കിയിട്ടുണ്ട് - 6: 9. നിരര്‍ത്ഥകമായ ഒരു ജല്‍പനം മാത്രമായിരുന്നു അത്.

3. പൂര്‍വിക ഗ്രന്ഥങ്ങളുടെ സംരക്ഷണച്ചുമതല അതത് സമൂഹങ്ങളെത്തന്നെയാണ് അല്ലാഹു ഏല്‍പിച്ചിരുന്നത്. എന്നാല്‍ മാറ്റത്തിരുത്തലുകളും കൂട്ടിച്ചേര്‍ക്കലുകളുമായി അവര്‍ അവയില്‍ കൃത്രിമങ്ങള്‍ ചെയ്തു. വിശുദ്ധ ഖുര്‍ആന്റെ സംരക്ഷണമാകട്ടെ, അവതാരകനായ അല്ലാഹു തന്നെ ഏറ്റെടുത്തിരിക്കയാണ്. ലോകാവസാനംവരെയും ഏതൊരു വന്‍ശക്തിയാണെങ്കിലും യാതൊരു ഭേദഗതിയും ഖുര്‍ആനില്‍ ചെയ്യാന്‍ ആര്‍ക്കും തന്നെ സാധിക്കയില്ല.

4. നേരത്തെ കടന്നുപോയ പല ജനസമൂഹങ്ങളും അല്ലാഹുവിന്റെ മാര്‍ഗദര്‍ശനങ്ങളെയും പ്രവാചകന്‍മാരെയും വേദഗ്രന്ഥങ്ങളെയുമൊക്കെ തള്ളിപ്പറയുകയായിരുന്നു. അങ്ങനെ അഹന്ത മുഴുത്തപ്പോള്‍ അവര്‍ ഉന്മൂല നാശത്തിനു വിധേയരായി. അത്തരം പല ദുരന്തചരിത്രങ്ങളും അറിയാമെങ്കിലും അവയില്‍നിന്നൊന്നും പാഠമുള്‍ക്കൊള്ളാന്‍ സന്നദ്ധരാകാതെ മക്കാമുശ്‌രിക്കുകള്‍ നബി(സ്വ)യെയും വിശുദ്ധ ഖുര്‍ആനെയും അവിശ്വസിക്കുകയും തള്ളിക്കളയുകയുമാണ്.

5. കാലാകാലങ്ങളിലും അവിശ്വാസികളുടെ രീതി ഒന്നു തന്നെയായിരുന്നു - അല്ലാഹുവിനെയും പ്രവാചക - ദൂതരെയും നിഷേധിക്കുക, വേദങ്ങളെ വ്യാജമാക്കുക, ദുര്‍വാശിയും ധിക്കാരവും കൈമുതലാക്കി വിനാശകാരികളായി നടക്കുക. മക്കയിലെ മുശ്‌രിക്കുകള്‍ സ്വീകരിച്ച നിലപാടും അതുതന്നെ. പൂര്‍വികരായ നിഷേധീവിഭാഗങ്ങള്‍ ഉന്മൂലനാശത്തിനു വിധേയമായതില്‍ നിന്ന് ഒരു പാഠവും അവരുള്‍ക്കൊള്ളാന്‍ തയ്യാറായില്ല. അത്യദ്ഭുകരമായ അമാനുഷ ദൃഷ്ടാന്തങ്ങള്‍ കാണിച്ചുകൊടുത്താലവര്‍ വാക്കുമാറും. ആകാശത്തേക്ക് കയറിപ്പോകാന്‍ ഒരു ഗോവണിയും കവാടവും ഒരുക്കിക്കൊടുത്തുവെന്നു തന്നെ സങ്കല്‍പിക്കുക - ഞങ്ങള്‍ കണ്‍കെട്ടിനും ആഭിചാരത്തിനും വിധേയമായിരിക്കുകയാണ്; ഇത് യാഥാര്‍ഥ്യമൊന്നുമല്ല എന്നു തട്ടിവിട്ട് അവര്‍ ധിക്കാരം തുടരും. എന്തൊരു ചിന്താശൂന്യത!

6. നക്ഷത്രങ്ങള്‍, ഭ്രമണപഥങ്ങള്‍ എന്നൊക്കെ ഇവിടെ ഉദ്ദേശ്യമാകാവുന്നതാണ്. ദശലക്ഷക്കണക്കിനു നക്ഷത്രങ്ങള്‍ പ്രപഞ്ചത്തിലുണ്ടെന്നാണ് ആധുനിക ശാസ്ത്രം പറയുന്നത്. അവയോരോന്നും വളരെ വ്യവസ്ഥാപിതമായി സഞ്ചരിക്കുന്നുമുണ്ട്. ഓരോ ഭ്രമണപഥത്തില്‍ ഓരോന്നും നീന്തിസഞ്ചരിക്കുകയാണ്. (ഖുര്‍ആന്‍: 21:33, 26:40) അതേ സമയം ഇരുണ്ട രാത്രിയില്‍ ആകാശത്തേക്കു നോക്കുന്ന ഒരാള്‍ക്ക് വളരെ സുന്ദരവും നയനാഭിരാമവുമായ ദൃശ്യമാണവ കാഴ്ചവെക്കുന്നത്.
പ്രാപഞ്ചിക ഭരണക്രമങ്ങള്‍ സംബന്ധമായ കാര്യങ്ങള്‍ മലക്കുകള്‍ ചര്‍ച്ചചെയ്യുന്നത് കട്ടുകേള്‍ക്കാനും എന്നിട്ടവ തങ്ങളുടെ ശിങ്കിടികള്‍ക്കും ആരാധകര്‍ക്കും നുണകള്‍ കലര്‍ത്തി എത്തിച്ചുകൊടുക്കാനുമായി പിശാചുക്കള്‍ വാനലോകത്തേക്ക് കയറിപ്പോയിരുന്നതായും പിന്നീടവര്‍ അതില്‍നിന്നു വിലക്കപ്പെട്ടതായും സ്പഷ്ടമായി നിരവധി ഹദീസുകളിലുണ്ട്. അതാണിവിടെ സൂചിപ്പിച്ചത്. അങ്ങനെ വ്യാജശ്രവണത്തിനു ശ്രമിക്കുന്ന പിശാചുക്കളെ ചെങ്കോല്‍കൊണ്ട് എറിയപ്പെടുന്നതാണ് എന്ന് ഹദീസില്‍ (ബുഖാരി, മുസ്‌ലിം) വ്യക്തമാക്കിയിട്ടുണ്ട്. അതാണ് 'ജ്വലിക്കുന്ന അഗ്നിസ്ഫുലിംഗങ്ങള്‍'.

7. ഗോളാകൃതിയിലുള്ള ഭൂമിയില്‍ എവിടെ സഞ്ചരിച്ചാലും അതു പരന്നതായാണു അനുഭവപ്പെടുക. അതാണിവിടെ സൂചിപ്പിച്ചിരിക്കുന്നത്. സ്വന്തം അച്ചുതണ്ടില്‍ തിരിയുന്നത് കൊണ്ട് ചലനാത്മകമാണെങ്കിലും ഉപരിതലത്തില്‍ നിവസിക്കുന്ന മനുഷ്യനോ ജന്തുജാലങ്ങള്‍ക്കോ അങ്ങനെയൊരു ബുദ്ധിമുട്ടനുഭവപ്പെടുന്നില്ല. പര്‍വതങ്ങള്‍ ഭൂമി ഇളകാതിരിക്കാനായി അടിച്ച വലിയ ആണികളെപ്പോലെയാണെന്ന് ഒട്ടേറെ സൂക്തങ്ങളില്‍ ഖുര്‍ആന്‍ വ്യക്തമാക്കിയിട്ടുണ്ട്. കോടാനുകോടി ചെറുതും വലുതുമായ ജന്തുജാലങ്ങള്‍ക്ക് ഇതേ ഭൂമിയില്‍ അല്ലാഹു അന്നപാനാദികള്‍ നല്‍കുന്നു. ആനകള്‍ക്കും തിമിംഗലങ്ങള്‍ക്കും മുതല്‍ അതിസൂക്ഷ്മ ജീവികള്‍ക്കു വരെ നല്‍കപ്പെടുന്ന ആഹാരങ്ങളുടെ ഖജനാവ് അല്ലാഹുവിങ്കല്‍ തന്നെയത്രേ. തന്റെ യുക്തിയും ക്രമീകരണങ്ങളും വ്യവസ്ഥകളുമനുസരിച്ചേ ഓരോ ജീവിക്കും അവന്‍ ഭക്ഷണം കൊടുക്കുകയുള്ളു.

8. അല്ലാഹു ഭൂതലത്തില്‍ സംവിധാനിച്ച അത്യമൂല്യമായ ഒരനുഗ്രഹമാണ് കാറ്റ്. ഒട്ടേറെ ധര്‍മങ്ങളാണത് നിര്‍വഹിച്ചുകൊണ്ടിരിക്കുന്നത്. കാര്‍മേഘങ്ങള്‍ വഹിച്ചുകൊണ്ടുപോവുക എന്ന കാറ്റിന്റെ ഒരു മുഖ്യ ദൗത്യമാണിവിടെ പരാമര്‍ശിക്കുന്നത്. സസ്യലതാദികളില്‍ പരാഗണം നടത്തുന്നതും കാറ്റുതന്നെ. ആ അര്‍ത്ഥവും 'ലവാഖിഹ്' എന്ന പദത്തിനു ഉദ്ദേശിക്കാവുന്നതാണ്. കാര്‍മേഘങ്ങളുടെ സഞ്ചാരവും ഓട്ടവും കൊച്ചുകുട്ടികള്‍ക്കു പോലും കാണാം. അല്ലാഹു നിശ്ചയിച്ച സ്ഥലത്തെത്തി അവ മഴവര്‍ഷിക്കുന്നു. വൃക്ഷങ്ങളും ചെടികളും സസ്യങ്ങളും ഭൂമിയും മനുഷ്യരുമൊക്കെ ആ വെള്ളം പാനംചെയ്യുന്നു. ഓരോ വര്‍ഷവും പെയ്തുകൊണ്ടിരിക്കുന്ന ജലം എവിടെയെങ്കിലും സൂക്ഷിച്ചുവെക്കാന്‍ മനുഷ്യനു സാധിക്കുമോ!

9. ഇത്യാദി അനുഗ്രഹങ്ങളും അദ്ഭുതകൃത്യങ്ങളുമൊക്കെ അനുഭവിച്ചും അറിഞ്ഞും കണ്ടും കഴിഞ്ഞുകൂടുന്ന മനുഷ്യന്‍ പിന്നെയും ധിക്കരിക്കയും അഹങ്കരിക്കയുമാണ്. ജനനവും മരണവുമൊക്കെ അല്ലാഹുവിന്റെ അധീനതയിലാണുള്ളത്. അവന്റെ അഭീഷ്ടത്തിനും തീരുമാനത്തിനും വിധേയനാകാന്‍ മാത്രമേ മനുഷ്യനു കഴിയൂ. മുന്‍ഗാമികളോ പിന്‍ഗാമികളോ എന്ന യാതൊരു വ്യത്യാസവുമില്ലാതെ സര്‍വരെക്കുറിച്ചുമുള്ള സമഗ്ര വിവരം അല്ലാഹുവിങ്കലുണ്ട്. ഓരോരുത്തരുടെയും കര്‍മങ്ങള്‍ക്കനുസരിച്ച പ്രതിഫലം നല്‍കാനായി സര്‍വരെയും മഹ്ശറില്‍ അവന്‍ സമ്മേളിപ്പിക്കുന്നതാണ്.

10. മനുഷ്യന്റെയും ജിന്നിന്റെയും സൃഷ്ടിപ്പിന്റെ മൗലികവും അടിസ്ഥാനപരവുമായ പദാര്‍ത്ഥം സൂചിപ്പിക്കയാണ്. മനുഷ്യപിതാവായ ആദം നബി(അ)നെയാണ് മണ്ണുകൊണ്ട് സൃഷ്ടിച്ചത്. നനുത്ത മണ്ണ് വെള്ളംചേര്‍ത്തു കുഴച്ചു പാകപ്പെടുത്തിയിട്ട ശേഷം അനേകവര്‍ഷങ്ങള്‍ക്കൊണ്ട് ഉണങ്ങി വരണ്ടുറച്ചു. മുട്ടിയാല്‍ പ്രത്യേകമുഴക്കം ഉണ്ടാകുംവിധമായി. നീണ്ടകാലം വെള്ളംചേര്‍ന്നുകിടന്ന മണ്ണ് കറുത്ത നിറമാകുമല്ലോ. അതീവ നിസ്സാര വസ്തുവില്‍ നിന്നു ഉയിര്‍ കൊണ്ട മനുഷ്യന് അഹന്ത നടിക്കാനുള്ള ഒരു യോഗ്യതയുമില്ല എന്നു വിവക്ഷ.

11. മനുഷ്യന്റെ ആദിപിതാവായ ആദം നബി(അ)യുടെ സൃഷ്ടിപ്പിനെയും മലക്കുകളുടെ സുജൂദിനെയും ഇബ്‌ലീസിന്റെ വിസമ്മതത്തെയും ധിക്കാരത്തെയും കുറിച്ചെല്ലാം നേരത്തെ പറഞ്ഞുപോയിട്ടുണ്ട്. അല്‍ബഖറ: 30-38, അല്‍ അഅ്‌റാഫ്: 11-27 മുതലായവ നോക്കുക.

12. പുനരുത്ഥാന നാള്‍വരെ പിന്തിച്ചിടാന്‍ ആവശ്യപ്പെടുകവഴി മരണത്തില്‍ നിന്നു രക്ഷപ്പെടാം എന്നായിരുന്നു ഇബ്‌ലീസിന്റെ വ്യാമോഹം. കാരണം പുനരുത്ഥാനാനന്തരം മരണമുണ്ടാവില്ല. എന്നാല്‍ 'സുജ്ഞാത സമയം' കൊണ്ടുള്ള വിവക്ഷ സര്‍വ ജീവികളും നശിച്ചുപോകുന്ന അന്ത്യനാളാണ്;'സൂറി(കാഹളത്തി)ലെ ഒന്നാം ഊത്തിന്റെ സമയം. അന്ന് അവനും മരണത്തിനു വിധേയനാകും. ഏതായാലും, അനുസരണക്കേടും അഹന്തയും ധിക്കാരവും ഇബ്‌ലീസിനെ ശാശ്വതമായ ദൈവിക ശാപത്തിനു വിധേയനാക്കിയത് മനുഷ്യനു വലിയ ഗൗരവതരമായ പാഠമാകേണ്ടതാണ്.

13. സ്വര്‍ഗത്തില്‍ നിന്നു ബഹിഷ്‌കൃതനായതോടെ ഇബ്‌ലീസ് മനുഷ്യവംശത്തിന്റെ വര്‍ഗശത്രുവായി മാറി - കടുത്ത പകയും ഒടുങ്ങാത്ത വിദ്വേഷവും അവന്‍ വിളംബരം ചെയ്തു. ഒരു പ്രതിലോമ ശക്തി മുന്നിലുണ്ടെങ്കിലേ അതു വകഞ്ഞുമാറ്റി മനുഷ്യന്‍ സാവേശം ലക്ഷ്യത്തിലേക്കു മുന്നേറൂ എന്നതിനാല്‍ അല്ലാഹു അവന്ന് പ്രവര്‍ത്തനാനുമതിയും നല്‍കി. എന്നാല്‍ അടിയുറച്ച വിശ്വാസവും ദൈവഭയവുമുള്ളവര്‍ നിതാന്തജാഗ്രതയിലാവുകയും പൈശാചിക ദുര്‍ബോധനങ്ങളില്‍ നിന്നു രക്ഷപ്പെടുകയും ചെയ്യും. ദുര്‍മാര്‍ഗികളാകട്ടെ നരകത്തിലാപതിക്കും. ഓരോവിഭാഗം കുറ്റവാളികളും നിശ്ചിത കവാടങ്ങളിലൂടെയാകും നരകത്തില്‍ പ്രവേശിക്കുക.

14. നിഷേധികളുടെ ദയനീയ പരിണതി നരകമാണെന്നു പറഞ്ഞശേഷം സത്യവിശ്വാസികളും ദൈവഭക്തരുമായി ഭൗതികലോകത്ത് ജീവിച്ചു മരിച്ചവരുടെ അനിര്‍വചനീയമായ സ്വര്‍ഗീയാനുഭൂതികള്‍ സൂചിപ്പിക്കുകയാണ്. ശാശ്വതത്വം കല്‍പിക്കപ്പെട്ടുകൊണ്ടാണ് ആ മഹാഭാഗ്യവാന്‍മാര്‍ സ്വര്‍ഗത്തില്‍ കടക്കുക.

15. സത്യവിശ്വാസിയായ ഒരാളുടെ നിലപാട് ആശക്കും ആശങ്കക്കുമിടയിലാകണം. അതാണ് ഇവിടെ വ്യക്തമാക്കുന്നത്: അല്ലാഹു പാപങ്ങള്‍ പൊറുക്കുന്നവനും വിശ്വാസികളോട് കാരുണ്യമുള്ളവനുമാണ്; അതേ സമയം, ശിക്ഷിക്കേണ്ടിവരുന്ന ഘട്ടത്തില്‍ വേദനാജനകമായ ശിക്ഷയും അവന്‍ നല്‍കും. തിരുമേനി(സ്വ) ഒരിക്കല്‍ ഒരു സംഘം സ്വഹാബികളുടെയടുത്തുകൂടി നടന്നുപോവുകയായിരുന്നു. തല്‍സമയം അവര്‍ വല്ലാതെ ചിരിച്ചുല്ലസിക്കുന്നതായി കണ്ടപ്പോള്‍ 'നരകം മുന്നിലിരിക്കെ നിങ്ങളിങ്ങനെ ചിരിച്ചാഹ്ലാദിക്കയാണോ' എന്നു അവിടന്നു ചോദിച്ചു. അല്‍പം കഴിഞ്ഞ് ഇബ്രാഹീം മഖാമിനടുത്തെത്തിയ നബി(സ്വ) തിരിച്ചുവന്ന് ഇങ്ങനെ പറഞ്ഞു: നിങ്ങളെ വിട്ടുപിരിഞ്ഞ ശേഷം ജിബ്‌രീല്‍(അ) എന്ന സമീപിക്കുകയും 'നബീ, അങ്ങ് എന്തിനാണ് എന്റെ അടിമകളെ ഭഗ്നാശരാക്കുന്നത്' എന്ന് അല്ലാഹു ചോദിക്കുന്നതായി അറിയിക്കുകയും ചെയ്തിരിക്കുന്നു. തുടര്‍ന്ന് ഈ 49,50 സൂക്തങ്ങള്‍ നബി(സ്വ) ഓതുകയും ചെയ്തു.

16. ദുര്‍നടപ്പുകാരും ധിക്കാരികളുമായിരുന്ന സദൂം ദേശക്കാരെ(ലൂഥ് നബി(അ)യുടെ ജനത) നശിപ്പിക്കാന്‍ നിയുക്തരായ മലക്കുകള്‍ വഴിമധ്യേ ഇബ്രാഹീം നബി(അ)യുടെയടുത്ത് വന്നതാണ്. ഇവരെക്കണ്ട് അപരിചിതരായ അതിഥികളാണെന്നു ധരിച്ച് നബി മൂരിക്കുട്ടനെ അറുത്ത് പാകംചെയ്ത് അവരുടെ മുമ്പില്‍ വെച്ചുവെന്നും അതു ഭക്ഷിക്കാതിരുന്നപ്പോഴാണ് ആശങ്കയുണ്ടായതെന്നും സൂറത്തു ഹൂദ് 69-76 ലും സൂറത്തുദ്ദാരിയാത്തി(24-37)ലും മറ്റും വിശദീകരിച്ചിട്ടുണ്ട്. സഹധര്‍മിണി സാറ ബീവിയില്‍ ഇസ്ഹാഖ് നബി(അ) ജനിക്കും എന്ന ശുഭവാര്‍ത്തയാണ് മലക്കുകള്‍ നല്‍കിയത്.

17. ഇബ്രാഹീം നബി(അ)ക്ക് നൂറോ നൂറ്റി ഇരുപതോ വയസ്സും സാറ ബീവിക്ക് തൊണ്ണൂറ്റി ഒമ്പത് വയസ്സും ഉള്ളപ്പോഴാണ് ഈ പുത്രസുവാര്‍ത്ത; മാത്രമല്ല ബീവി വന്ധ്യയുമാണ്. അതാണ് അദ്ഭുതം പ്രകടിപ്പിക്കുന്നതിന്റെ കാരണം. മറിച്ച്, അല്ലാഹുവിന്റെ ഖുദ്‌റത്തിലുള്ള സംശയമല്ല. ദുര്‍മാര്‍ഗികള്‍ മാത്രമേ അവന്റെ കാരുണ്യത്തെക്കുറിച്ച് ആശമുറിഞ്ഞവരാകൂ എന്ന ഇബ്രാഹീം നബി(അ)യുടെ പ്രസ്താവം അതാണ് സൂചിപ്പിക്കുന്നത്.

18. ഞങ്ങള്‍ അങ്ങനെ നിശ്ചയിച്ചിരിക്കുന്നു, ഞങ്ങള്‍ രക്ഷപ്പെടുത്തും എന്നിങ്ങനെയുള്ള പ്രയോഗങ്ങള്‍ ആലങ്കാരികം(മജാസ്) ആണ്; നിശ്ചയിക്കുന്നവനും രക്ഷപ്പെടുത്തുന്നവനുമൊക്കെ അല്ലാഹുവാണല്ലോ. ഈസാനബി(അ)യും മുഹ്‌യിദ്ദീന്‍ ശൈഖും മരിച്ചവരെ ജീവിപ്പിച്ചു എന്ന പ്രയോഗവും ഇങ്ങനെത്തന്നെ. അവര്‍ അല്ലാഹു ആക്കപ്പെടുന്നു എന്ന ചിലരുടെ ജല്‍പനം അജ്ഞതയാണ്.

19. ) ലൂഥ് നബി(അ)യുടെ ജനത ധിക്കാരത്തിലും അധര്‍മത്തിലും ആറാടുകയായിരുന്നു. അവസാനം ഇപ്പോഴിതാ ഉന്‍മൂലനാശം വരികയായി. ആ ഉത്തരവുമായി വന്ന മലക്കുകള്‍ നബിക്ക് ആവശ്യമായ നിര്‍ദേശങ്ങള്‍ നല്‍കുകയാണ്. നിഷേധികളെ പിടികൂടുന്ന ഘോരശിക്ഷ കണ്ടുപോകുന്നതു പോലും സംഹാരകമായിരിക്കുമെന്നതുകൊണ്ടാണ് ഒരാളും തിരിഞ്ഞുനോക്കരുതെന്നു കല്‍പിച്ചത്.

20. അനാഗതശ്മശ്രുക്കളും അതിസുന്ദരന്‍മാരുമായ ചെറുപ്പക്കാരുടെ രൂപത്തിലാണ് മലക്കുകള്‍ ലൂഥ് നബി(അ)യുടെ അടുത്തേക്ക് വന്നിരുന്നത്. വാര്‍ത്ത അതിദ്രുതം പ്രചരിക്കുകയും തെമ്മാടികളായ ജനം ഓടിക്കൂടുകയും ചെയ്തു. പ്രകൃതിവിരുദ്ധ ലൈംഗിക വേഴ്ചക്ക് അതിഥികളെ ഉപയോഗപ്പെടുത്തുകയായിരുന്നു അവരുടെ ദുരുദ്ദേശ്യം. അമൂല്യമായ ഇരകിട്ടിയ ഉല്‍സാഹത്തിലാണവര്‍.

21. ആളുകളുമായി ബന്ധപ്പെട്ട് ഞങ്ങള്‍ എന്തെങ്കിലും കാര്യങ്ങള്‍ ചെയ്യുകയാണെങ്കില്‍ നീ അതില്‍ ഇടങ്കോലിടുകയും ഇടപെടുകയുമൊന്നും ചെയ്യരുതെന്ന് ഇതിനുമുമ്പേ നിന്നോട് ഞങ്ങള്‍ പറഞ്ഞിരുന്നില്ലേ എന്നാണ് ചോദ്യം!

22. ലൂഥ് നബി(അ)യുടെ സമൂഹത്തിലുള്ള സ്ത്രീകള്‍ എന്നാണു വിവക്ഷ. ഇത് നേരത്തെ പറഞ്ഞുപോയിട്ടുണ്ട്. സൂറത്തു ഹൂദിലെ 79 -ാം ആയത്തിന്റെ വ്യാഖ്യാനം കാണുക.

23. മുഹമ്മദ് നബി(സ്വ)യോടാണ് സംബോധന. ലൂഥ് നബി(അ)യോടാണെന്നും പക്ഷമുണ്ട്. 'അംറ്' എന്ന പദത്തിന് ആയുസ്സ്, ജീവിതം എന്നൊക്കെയാണര്‍ത്ഥം. തിരുനബി(സ്വ)യുടെ മഹോന്നത പദവിയാണിതു സൂചിപ്പിക്കുന്നത്. ഹ. ഇബ്‌നു അബ്ബാസ്(റ) പ്രസ്താവിച്ചു: നബി(സ്വ)യെക്കാള്‍ ശ്രേഷ്ഠമായ മറ്റൊന്നും അല്ലാഹു സൃഷ്ടിച്ചിട്ടില്ല; മറ്റൊരാളുടെ ജീവിതം കൊണ്ട് അവന്‍ സത്യംചെയ്ത്പറഞ്ഞതായി ഞാന്‍ കേട്ടിട്ടുമില്ല.

24. മക്കക്കാര്‍ പലപ്പോഴും സിറിയ(ശാം)യിലേക്കു കച്ചവടയാത്രകള്‍ നടത്തിയിരുന്നു. ആ സഞ്ചാരപഥത്തിലാണ് സംഹരിക്കപ്പെട്ട ഈ മേഖല. ചിന്തിക്കുകയും ചരിത്രസംഭവങ്ങള്‍ നിരീക്ഷണവിധേയമാക്കുകയും ചെയ്യുന്ന ബുദ്ധിമാന്‍മാര്‍ക്കും സത്യവിശ്വാസികള്‍ക്കും ഇതില്‍ നിരവധി ഗുണപാഠങ്ങളാണുള്ളത്. ചാവുകടലും അതിന്റെ പരിസരപ്രദേശങ്ങളുമാണ് ഇവിടെ വിവക്ഷ.

25. ശുഐബ് നബി(അ)യുടെ നാടായ മദ്‌യന്‍ ആണ് ഉദ്ദേശ്യം. മരങ്ങളും സസ്യലതാദികളും കായ്കനികളും ഫലവര്‍ഗങ്ങളും തിങ്ങിവളര്‍ന്നിരുന്ന പ്രദേശമാണത്. അതുകൊണ്ട് ഖുര്‍ആനില്‍ പലേടത്തും ആ പേരില്‍ അവര്‍ പരാമൃഷ്ടരായിട്ടുണ്ട്. 26:176,38:13,50:14 ഉദാഹരണം. മരുഭൂമിയില്‍ ഇങ്ങനെയൊരനുഗ്രഹം ലഭിക്കുക മഹാഭാഗ്യമാണല്ലോ. പക്ഷേ അവര്‍ നിഷേധികളായി ദൈവിക ശിക്ഷക്ക് പാത്രീഭൂതരായി. സൂറ ഹൂദ്: 84-95 കാണുക. ചാവുകടല്‍ പ്രദേശങ്ങളും മദ്‌യനുമാണ് രണ്ട് നാടുകള്‍.

26. സ്വാലിഹ് നബി(അ)യുടെ ജനതയായ സമൂദ്‌ഗോത്രം താമസിച്ചിരുന്ന പ്രദേശമാണ് അല്‍ ഹിജ്‌റ്. ഈ സൂറയുടെ പേര് അതു പരിഗണിച്ചാണെന്ന് ആദ്യം പറഞ്ഞിട്ടുണ്ട്. അവര്‍ അല്ലാഹുവിനെയും അവന്റെ ദൂതന്‍മാരെയും നിഷേധിക്കുന്നവരായിരുന്നു. സ്വാലിഹ് നബി(അ)യെ അവര്‍ വല്ലാതെ അവഹേളിക്കയും ധിക്കരിക്കയും ചെയ്തു. ഒടുവില്‍ ഘോരശിക്ഷ വന്നു. ജനം ഉന്മൂലനവിധേയരായി. സൂറത്തു ഹൂദിലും(61-68 വചനങ്ങള്‍) മറ്റു പലേടത്തും ഈ ധിക്കാരികളുടെ ദുരന്തകഥ ഖുര്‍ആന്‍ അനാവരണംചെയ്തിട്ടുണ്ട്. ഇന്നത്തെ ധിക്കാരികളും അധര്‍മകാരികളും അല്ലാഹുവിന്ന് അതീതരല്ല. അവര്‍ അതില്‍ നിന്നു പാഠമുള്‍ക്കൊള്ളുമോ?

27. പാരത്രിക ജീവിതത്തെയും ഖിയാമനാളിനെയും മറ്റുമൊക്കെ പറഞ്ഞുകൊടുക്കുമ്പോള്‍ നിഷേധികള്‍ മാന്യതയില്ലാതെയും അവഹേളനാത്മകമായും പ്രതികരിക്കും. നബി(സ്വ)യെയും ഖുര്‍ആനെയും വ്യാജമാക്കും. ഇത്തരം ഹീനവും ക്രൂരവുമായ സമീപനങ്ങള്‍ക്കെതിരെ ക്ഷമാപൂര്‍വമായാണ് പ്രതികരിക്കേണ്ടതെന്ന് തിരുമേനി(സ്വ)യെ ഉണര്‍ത്തുകയാണ്.

28. ഫാത്തിഹാ സൂറയാണ് സപ്തസൂക്തങ്ങളുടെ വിവക്ഷ. അതാണ് എനിക്കു നല്‍കപ്പെട്ട ആവര്‍ത്തിക്കപ്പെടുന്ന ഏഴുവചനങ്ങളും മഹോന്നതമായ ഖുര്‍ആനും എന്നു റസൂല്‍(സ്വ) പറഞ്ഞതായി ബുഖാരി ഉദ്ധരിച്ചിട്ടുണ്ട്. വിശുദ്ധദീനിന്റെ എല്ലാ മൗലിക സിദ്ധാന്തങ്ങളും ആ സൂറ ഉള്‍ക്കൊണ്ടതായി ഖുര്‍ആന്‍ വ്യാഖ്യാതാക്കളും പണ്ഡിത മഹാരഥരും വിശദീകരിച്ചതായി കാണാം.

29. ജൂതന്മാര്‍, ക്രിസ്ത്യാനികള്‍, ബഹുദൈവവിശ്വാസികള്‍, മതനിഷേധികള്‍ തുടങ്ങിയവര്‍ക്കെല്ലാം ഭൗതിക സുഭിക്ഷതയും പുരോഗതിയും പലപ്പോഴുമുണ്ടാകാം. അല്ലാഹുവിന്റെ പരീക്ഷണമാണത്. സ്വന്തം നിലപാടു മറന്ന് നിഷേധികളുടെ ആഡംബരങ്ങളില്‍ കണ്ണുവെക്കരുതെന്നാണിവിടെ വ്യക്തമാക്കുന്നത്. അഭിസംബോധന നബി(സ്വ)യോടാണെങ്കിലും ഉമ്മത്ത് ആണ് ഉദ്ദേശ്യം. അവര്‍ക്കെന്താണ് ഇങ്ങനെ സുഭിക്ഷത എന്നോര്‍ത്ത് അസ്വസ്ഥതയോ വേവലാതിയോ വിശ്വാസികളെ പിടികൂടാനും പാടില്ല. അവരുടെ പ്രതാപവും പ്രൗഢിയും ക്ഷണികമാണ്.

30. വേദം പകുത്തെടുക്കുകയും ഓഹരിവെച്ച് ചിലത് തള്ളുകയും മറ്റുചിലത് കൊള്ളുകയും ചെയ്തവര്‍ ജൂത - ക്രിസ്ത്യാനികളാണ്. ഇമാം ബുഖാരിയുടെ ഒരു ഹദീസില്‍ ഇങ്ങനെ വിവരിച്ചിട്ടുണ്ട്: അവര്‍ ആ ചെയ്തത് പോലെത്തന്നെയാണ് ഖുര്‍ആന്റെ അഭിസംബോധിതരായ മക്കാമുശ്‌രിക്കുകളുടെയും രീതി. സിഹ്‌റ്, പദ്യം, ജ്യോത്‌സ്യം, പൂര്‍വികരുടെ കെട്ടുകഥകള്‍ എന്നിങ്ങനെ അതിനെ ഓഹരിവെച്ച് തള്ളുകയാണവരും ചെയ്യുന്നത്.

31. നിഷേധികള്‍ പരലോകത്ത്‌വെച്ച് വിസ്തൃതമായ വിചാരണയ്ക്കു വിധേയരാകും. അവരെ അവഗണിച്ച് ദഅ്‌വത്തിന്റെ ഉത്തരവാദിത്വം അങ്ങു യഥായോഗ്യം നിര്‍വഹിക്കണമെന്നാണ് തിരുമേനി(സ്വ)യെ ഉണര്‍ത്തുന്നത്. ശത്രുക്കളായ ബഹുദൈവവിശ്വാസികളും നിഷേധികളും എന്തെല്ലാം കുതന്ത്രങ്ങളും കുത്സിത പ്രവര്‍ത്തനങ്ങളുമാണ് നടത്തിയത്. പലവട്ടം വധശ്രമങ്ങള്‍ വരെ ഉണ്ടായി. അവയില്‍ നിന്നൊക്കെ നബി(സ്വ)യെ അല്ലാഹു രക്ഷപ്പെടുത്തി.

32. സ്വന്തക്കാരും ബന്ധക്കാരുമെല്ലാമാണ് നബി(സ്വ)യെ അവഹേളിക്കുകയും കുറ്റപ്പെടുത്തുകയും ചീത്തപറയുകയും അക്രമിക്കുകയും ചെയ്തിരുന്നത്. കാരണമോ? അവരുടെ നാനോന്മുഖമായ ക്ഷേമത്തിനും ഐഹിക-പാരത്രിക വിജയത്തിനും നിദാനമായ മോക്ഷത്തിന്റെ പാത കാണിച്ചുകൊടുത്തു എന്നത്. എത്രവലിയ മനഃപ്രയാസമാണതുണ്ടാക്കുക!

33. ഏതുപ്രതിസന്ധിയിലും കൈവിടാതെ മുറുകെപ്പിടിച്ചു ചെയ്യാനായി അല്ലാഹു കല്‍പിക്കുന്നതിതാണ്: അവന്റെ ഔന്നത്യം വാഴ്ത്തുകയും അവന്നു സ്തുതികീര്‍ത്തനങ്ങളര്‍പ്പിക്കുകയും നമസ്‌കാരം വര്‍ധിപ്പിക്കുകയും നാനാവിധ ആരാധനകളില്‍ മുഴുകുകയും ചെയ്യുക. മരണംവരെ ഈ മാര്‍ഗമാണു പിന്തുടരേണ്ടത്. ജാതി-മത ഭേദമന്യേ സകലരും ദൃഢമായി ഉറപ്പിച്ചുവെച്ച കാര്യമാണ് ഒരിക്കല്‍ മരണം വന്നെത്തുമെന്ന്. അതുകൊണ്ടാണ് അതിന്ന് 'യഖീന്‍'(ഉറപ്പുള്ള കാര്യം) എന്ന പദം ഉപയോഗിച്ചത്. ഖുര്‍ആന്‍: 74:47 ലും തിരുമേനി(സ്വ)യുടെ ഹദീസിലും ഇതേ പ്രയോഗമുണ്ട്.
'ഉറപ്പുവരുന്നതുവരെ അല്ലാഹുവിനെ ആരാധിക്കണം, അവനെക്കുറിച്ച ഉറപ്പുവന്നുകഴിഞ്ഞാല്‍ പിന്നെ ആരാധനകളൊന്നും വേണ്ട' എന്നു സൂക്തം പഠിപ്പിക്കുന്നതായി ചില ദുര്‍മാര്‍ഗികള്‍ ജല്‍പിക്കാറുണ്ട്. ഖുര്‍ആന്‍ ദുര്‍വ്യാഖ്യാനം ചെയ്ത് ജനങ്ങളുടെ വിശ്വാസം പിഴപ്പിക്കുന്ന മനുഷ്യപ്പിശാചുക്കളില്‍ നിന്നു കരുണാമയനായ റബ്ബ് മുസ്‌ലിംകളെ കാത്തുരക്ഷിക്കട്ടെ. ആമീന്‍