അൽ അൻബിയാഅ് - الأنبياء - Al-Anbiya

1. ഖിയാമനാളിനെക്കുറിച്ച സൂചനയാണ് സൂറയുടെ തുടക്കം. ലോകാവസാനം സംഭവിച്ചുകഴിഞ്ഞാല്‍ മനുഷ്യരാശി ഒന്നടങ്കം മഹ്ശറില്‍ ഹാജറാക്കപ്പെട്ട് വിചാരണാവിധേയരാകും. പിന്നെ വിജയമോ പരാജയമോ ആയി, സ്വര്‍ഗമോ നരകമോ ആയി ശാശ്വതജീവിതമാണ്; അറ്റമോ അന്ത്യമോ ഇല്ലാത്ത ലോകം. അതു ഗ്രഹിക്കുവാനും വിശ്വസിക്കാനും പര്യാപ്തമായ നിരവധി ലക്ഷണങ്ങള്‍ അല്ലാഹു മനുഷ്യന് കാണിച്ചുകൊടുക്കുന്നുണ്ട്. പക്ഷേ, നിഷേധികള്‍ അവ തള്ളിക്കളയുകയും പരിഹസിക്കുകയുമാണ്.

2. നബിതിരുമേനി(സ്വ) സാധാരണ മനുഷ്യനാണെന്ന് അവര്‍ തട്ടിവിട്ടു. അതേ വാദമാണ് നമ്മുടെ ചില സുഹൃത്തുക്കള്‍ ഇന്നും ആവര്‍ത്തിച്ചുകൊണ്ടിരിക്കുന്നത്. മുഹമ്മദ് ശരിയായ പ്രവാചകന്മാരെപ്പോലെയാണെങ്കില്‍ ദൃഷ്ടാന്തങ്ങള്‍ കൊണ്ടുവരട്ടെ എന്ന് വെല്ലുവിളിക്കയാണവര്‍. എന്നാല്‍ അമാനുഷ കാര്യങ്ങള്‍ എന്തെങ്കിലും കാണിച്ചുകൊടുത്താലോ, ഇത് ആഭിചാരമാണെന്ന് തട്ടിവിടുകയും ചെയ്യും. വല്ലാത്തൊരു ദയനീയമായ ബുദ്ധിശൂന്യത!

3. വ്യത്യസ്ത സമയങ്ങളില്‍ നബിയെയും ഖുര്‍ആനെയും ഇസ്‌ലാമിനെയും കുറിച്ച് അവര്‍ പ്രകടിപ്പിക്കുമായിരുന്ന ഭിന്നമായ അഭിപ്രായഗതികളാണിത്. ഇതിനൊക്കെ ഖുര്‍ആന്‍ സ്പഷ്ടമായ മറുപടി പറഞ്ഞിട്ടുണ്ട്. പാഴ്കിനാവുകളോ സിഹ്‌റോ കവിതയോ സ്വയം നിര്‍മിതിയോ ഒന്നുമല്ല ഇതെന്ന് അവര്‍തന്നെ സമ്മതിച്ചുകഴിഞ്ഞതാണ്. മനുഷ്യരും ജിന്നുകളും സഹകരിച്ച് തത്തുല്യമായ ഒരു സൂക്തമെങ്കിലും കൊണ്ടുവരാനായി ഖുര്‍ആന്‍ ഉയര്‍ത്തിയ വെല്ലുവിളി, പതിനാലു നൂറ്റാണ്ടായി സ്വീകരിക്കാന്‍ ഇന്നുവരെ ആര്‍ക്കും സാധിച്ചിട്ടില്ല.

4. മനുഷ്യനെ എങ്ങനെയാണ് അല്ലാഹു ദൂതനായി അയക്കുക, മലക്കിനെയല്ലേ നിയോഗിക്കേണ്ടത് എന്ന മക്കയിലെ നിഷേധികളുടെ ജല്‍പനത്തിന് മറുപടിയാണിത്: മനുഷ്യരാശിയുടെ ആരംഭം മുതലേ ദൈവദൂതന്മാര്‍ നിയുക്തരായിരുന്നു; അവരൊന്നും മലക്കുകളായിരുന്നില്ല, മനുഷ്യരായിരുന്നു; അവരില്‍ നിന്നു തന്നെ ആണുങ്ങളും. മാനുഷിക ലക്ഷണങ്ങളായ ആഹാര - നീഹാരാദികള്‍, ഉറക്കം, മരണം തുടങ്ങിയവയൊക്കെ അവര്‍ക്കുമുണ്ടായിരുന്നു. മുഹമ്മദ് നബി(സ്വ)യുടെ കാര്യത്തില്‍ മാത്രം എന്ത്‌കൊണ്ട് മലക്കുകള്‍ എന്നാണു ചോദ്യം. ധിക്കാരവും ദുശ്ശാഠ്യവും ഉപേക്ഷിക്കുന്നുവെങ്കില്‍ ഖുര്‍ആനും നബി(സ്വ)യെയും ആര്‍ക്കും നിഷ്പ്രയാസം ഗ്രഹിക്കാം.

5. സുഖലോലുപരും ധിക്കാരികളും അഹങ്കാരികളുമായ സത്യനിഷേധികള്‍ അല്ലാഹുവിന്റെ ശിക്ഷവരുമെന്നു ബോധ്യപ്പെടുമ്പോള്‍ ആത്മരക്ഷാര്‍ഥം കുതിച്ചോടി രക്ഷപ്പെടാന്‍ പാഴ്ശ്രമം നടത്തും. ഏതു ധീരനും ഭീരുവാകുന്ന പ്രതിസന്ധിഘട്ടമാണത്. അപ്പോള്‍ അല്ലാഹുവിങ്കല്‍ നിന്നുണ്ടാവുന്ന പരിഹാസാത്മകമായ തിരിച്ചുവിളിയാണിത്: ഹേ, ധീര ശൂര വീര ശിരോമണികളേ, എങ്ങോട്ടാണ് ഈ തിരിഞ്ഞോട്ടം? സ്വന്തം രമ്യഹര്‍മങ്ങളിലേക്കും സുഖാഡംബരലോകത്തേക്കും തിരിച്ചുവരൂ, അവയുടെ അനുഭൂതികളെപ്പറ്റിയും മറ്റും ആളുകള്‍ക്ക് നിങ്ങളോട് ചോദിച്ചറിയാനുണ്ടാകും, നിങ്ങളിങ്ങനെ പോയ്ക്കളഞ്ഞാലോ? പശ്ചാത്താപ പ്രകടനവും നിലവിളികളുമായി മോചനത്തിന് വേണ്ടി അന്തിമശ്രമം നടത്തിനോക്കുമവര്‍. പക്ഷേ, സമയം കഴിഞ്ഞുപോയി!

6. പ്രപഞ്ചവും അതിലെ കോടാനുകോടി വസ്തുക്കളും സൃഷ്ടിച്ചത് മനുഷ്യന് വേണ്ടിയാണ്. അവന്‍ അവയില്‍ നിന്ന് പാഠങ്ങളുള്‍ക്കൊണ്ട് അല്ലാഹുവിനെ അറിഞ്ഞ് ആരാധനകളര്‍പ്പിക്കുന്നതിനാണത്; എന്നല്ലാതെ വ്യര്‍ഥമോ വിനോദത്തിനോ ആയി സൃഷ്ടിച്ചതല്ല. മക്കളെയോ പങ്കുകാരെയോ മറ്റെന്തെങ്കിലുമോ വേണമെങ്കില്‍ തനിക്കു അനുയോജ്യമായ വിധത്തില്‍ താന്‍ തന്നെ അത് സൃഷ്ടിക്കുമായിരുന്നു എന്നാണ് അല്ലാഹു വ്യക്തമാക്കുന്നത്. ജൂത-ക്രിസ്ത്യാനികള്‍ക്കും മറ്റു ബഹുദൈവ വിശ്വാസികള്‍ക്കുമുള്ള മറുപടിയാണിത്.

7. അസത്യത്തിനു മേല്‍ എറിയപ്പെടുന്ന ഭാരിച്ച ഒരു വസ്തുവായി സത്യത്തെ ചിത്രീകരിച്ചിരിക്കുകയാണ്. അങ്ങനെ അസത്യം ശിഥിലവും അസ്തിത്വം നഷ്ടപ്പെട്ടതുമായിത്തീരും. ബഹുദൈവ വിശ്വാസികളുടെ ലാത്തും ഉസ്സായും മനാത്തും മനുഷ്യനാല്‍ ആരാധിക്കപ്പെടുന്ന മറ്റേതു ദൈവങ്ങളും ഇങ്ങനെത്തന്നെ. കണ്ണും കാതും കഴിവും ശേഷിയുമില്ലാത്ത അവ ചിന്താബന്ധുരമായ ബുദ്ധിക്കുമുമ്പില്‍ ധൂളിയായിപ്പോകും.

8. മലക്കുകളെ ആരാധ്യരാക്കി വെച്ചവര്‍ക്കുള്ള മറുപടികൂടിയാണിത്. പ്രപഞ്ചത്തിലുള്ള സകലതും സൃഷ്ടിക്കപ്പെട്ട വസ്തുക്കളാണ്. അപ്പോള്‍ അവയൊന്നും തന്നെ ആരാധ്യരാകില്ല. മലക്കുകള്‍ പോലും അല്ലാഹുവിന്റെ അടിമകളും വിധേയരും ആരാധകരുമാണ്. മനുഷ്യന്റെ ശ്വാസോച്ഛ്വാസം പോലെയാണ് മലക്കുകളുടെ തസ്ബീഹ്. ഏത് അവസരത്തിലുമത് വേര്‍പെടില്ല.

9. പ്രപഞ്ചത്തിന് ഒന്നിലധികം ദൈവങ്ങളാണ് അധിപന്മാരായി ഉണ്ടായിരുന്നതെങ്കില്‍ പരസ്പരം പോരടിച്ച് അഭിപ്രായ ഭിന്നതകള്‍ രൂക്ഷമായി അവരണ്ടും നശിച്ചുപോകും. ലോക ചരിത്രം ഇപ്പറഞ്ഞതിനു സാക്ഷിയാണ്. സത്യത്തില്‍, സ്രഷ്ടാവും നിയന്താവുമായ അല്ലാഹു മാത്രമാണ് പ്രപഞ്ചത്തിന്റെ സര്‍വാധിപതി. അവന്റെ ചെയ്തികളെപ്പറ്റി ആരും ചോദ്യം ചെയ്യില്ല; എന്നാല്‍ സൃഷ്ടികള്‍ ഒന്നടങ്കം വിചാരണക്ക് വിധേയരായിത്തീരുമല്ലോ.

10. അല്ലാഹു, പ്രവാചകത്വം, പാരത്രിക ജീവിതം എന്നീ മൗലിക സ്തംഭങ്ങളിലധിഷ്ഠിതമാണ് വിശുദ്ധ ഖുര്‍ആന്‍. പൂര്‍വ വേദങ്ങളും ഇങ്ങനെത്തന്നെ. അതാണ് 'എന്റെയും പൂര്‍വികരുടെയും പ്രമാണമിതാണ്' എന്നതിന്റെ വിവക്ഷ.

11. മാനവകുലത്തിലേക്ക് നിരവധി പ്രവാചകന്മാരും ദൂതന്മാരും വന്നിട്ടുണ്ട്. അവരത്രയും മുറുകെപിടിച്ച മുദ്രാവാക്യം ഒന്നു മാത്രമായിരുന്നു - അല്ലാഹു അല്ലാതെ ഒരു ദൈവവുമില്ല, അതുകൊണ്ട് അവനെ മാത്രമേ ആരാധിക്കാവൂ.

12. മലക്കുകള്‍ അല്ലാഹുവിന്റെ പെണ്‍മക്കളാണെന്ന് ജല്‍പിക്കുകയും അവര്‍ക്ക് ആരാധനകളര്‍പ്പിക്കുകയും ചെയ്യുന്ന ചില അറേബ്യന്‍ ഗോത്രങ്ങളുണ്ടായിരുന്നു. അത്തരം മൂഢവിശ്വാസികള്‍ക്കുള്ള സവിസ്തര മറുപടിയാണ് ഈ സൂക്തം. അല്ലാഹുവിന്റെ അടിമകളാണ് മലക്കുകള്‍. ആ അടിമത്തവും നിരന്തര ആരാധനയുമായി കടുകിട വ്യതിചലിക്കാതെ മാത്രമാണ് അവര്‍ കഴിഞ്ഞുകൂടുക. ബഹുദൈവാരാധകരുടെ അബദ്ധവിശ്വാസമനുസരിച്ച്, 'ഞാന്‍ ദൈവമാണ്' എന്ന് ഒരു മലക്ക് പറയുന്നുവെന്നു സങ്കല്‍പിച്ചാല്‍ നരകമാകും ഫലം.

13. ആകാശഭൂമികളുള്‍പ്പെടെയുള്ള പ്രപഞ്ചത്തിന്റെ ഉല്‍പത്തിയിലേക്ക് ഖുര്‍ആന്‍ മര്‍ത്യകുലത്തിന്റെ, വിശിഷ്യ നിഷേധികളുടെ ശ്രദ്ധ ക്ഷണിക്കുകയാണ്. വാനലോകങ്ങളും ഭൂഗോളവും ഒട്ടിച്ചേര്‍ന്നു നില്‍ക്കുകയായിരുന്നു ആദ്യം. പിന്നീട് അല്ലാഹു അവ വേര്‍പ്പെടുത്തുകയും മലക്കുകള്‍ക്കും ജിന്നുകള്‍ക്കും മനുഷ്യര്‍ക്കും മറ്റു ജീവജാലങ്ങള്‍ക്കും ആവശ്യമായ സൗകര്യങ്ങള്‍ ഏര്‍പ്പെടുത്തുകയും ചെയ്തു. മഹാവിസ്‌ഫോടന സിദ്ധാന്ത (ബിഗ്ബാങ് തിയറി)ത്തിലൂടെ ആധുനിക ശാസ്ത്രം പറയുന്നതും ഇതു തന്നെ. ഏതൊരു ജീവകോശത്തിന്റെയും മുഖ്യഘടകം ജലമാണ്; അതിന്റെ അഭാവത്തില്‍ ഏതു ജീവനും പൊലിഞ്ഞുപോകും. ഇന്ദ്രിയത്തില്‍ നിന്നാണ് മുഴുവന്‍ ജീവികളും ജനിക്കുന്നത് എന്ന് ഇവിടെ വിവക്ഷിച്ചവരും പണ്ഡിതന്മാരിലുണ്ട്. പതിനാല് നൂറ്റാണ്ടു മുമ്പുള്ള ഈ ഖുര്‍ആനിക പ്രതിപാദനങ്ങള്‍ സത്യനിഷേധികള്‍ ഗൗരവചിന്തക്കു വിധേയമാക്കണം.

14. ഭൂചലനം പ്രതിരോധിക്കാനാണ് മലകള്‍ സൃഷ്ടിക്കപ്പെട്ടിരിക്കുന്നത്. ഭൂമിക്ക് അവ ആണിയാണെന്നാണ് മലകളെപറ്റി പലേടത്തും ഖുര്‍ആന്റെ പ്രസ്താവം. ഉദാ: 78:7, 16:15, 21:31, 31:10. സൂര്യന്‍, ചന്ദ്രന്‍, രാപ്പകലുകളുടെ മാറ്റം, ദുര്‍ഘടമായ പര്‍വതങ്ങളിലൂടെ സുഗമസഞ്ചാരത്തിന്നു സഹായകമായ മലമ്പാതകള്‍, തൂണുകളില്ലാതെ സുരക്ഷിതമായി സംവിധാനിക്കപ്പെട്ട ആകാശം മുതലായവയിലൊക്കെ ധാരാളം ദൃഷ്ടാന്തങ്ങളും പാഠങ്ങളുമുണ്ട്. അവമുഖേന സ്രഷ്ടാവിനെ കണ്ടെത്താനാണ് ആഹ്വാനം.

15. അസഹനീയത രൂക്ഷമാകുമ്പോള്‍ 'മുഹമ്മദിനു എന്തെങ്കിലും വിപത്തുവന്ന് കഥാവശേഷനാകുമെന്നാണു പ്രതീക്ഷ' എന്നു നിഷേധികള്‍ തട്ടിവിടുമായിരുന്നു. (ഖുര്‍ആന്‍ 52:30, 23:25) അതിനു മറുപടിയാണിത് - നബിമരിച്ചിട്ട്, തങ്ങളിവിടെ ശാശ്വതരായിരിക്കുമെന്നാണോ ശത്രുക്കളുടെ വിചാരം? ആ വ്യാമോഹം വേണ്ട, സകലരും മരിക്കുമെന്നു ചുരുക്കം. മനുഷ്യരുടെ ജീവിതം പരീക്ഷിക്കാനുള്ള ഒരു വേദി മാത്രമാണ് ഐഹികലോകം.

16. നബി(സ്വ) ബിംബങ്ങളെ അധിക്ഷേപിക്കുന്നത് നിഷേധികള്‍ വലിയ കുറ്റമായി കണുന്നു. എന്നാല്‍ പ്രപഞ്ചനാഥനും സ്രഷ്ടാവും സംരക്ഷകനും അന്നദാതാവുമൊക്കെയായ അല്ലാഹുവിനെ നിഷേധിക്കുന്നതോ കല്ലിനെയും മണ്ണിനെയും ദൈവമാക്കി ആരാധിക്കുന്നതോ ഒരു കുഴപ്പമായി അവര്‍ക്ക് കാണാനാകുന്നുമില്ല. എന്തൊരു വൈരുദ്ധ്യം!

17. ദൈവിക ദൃഷ്ടാന്തങ്ങള്‍ക്കും വാഗ്ദത്തശിക്ഷക്കുമായി നിഷേധികള്‍ ധൃതികൂട്ടേണ്ട, താമസംവിനാ അവ സാക്ഷാല്‍ക്കരിച്ചുകൊടുക്കാം എന്നാണു പറയുന്നത്. പലവിധ ദൃഷ്ടാന്തങ്ങളും ശിക്ഷകളും വന്നു. ബദ്‌റില്‍ അവരുടെ എഴുപത് പ്രമുഖ നേതാക്കള്‍ കൊല്ലപ്പെട്ടു; അത്രയും പേര്‍ മുസ്‌ലിംകളുടെ തടവിലുമായി. അതോടെ ശത്രു നാമാവശേഷമായി.

18. നിഷേധികള്‍ അല്ലാഹുവിന്റെ ദൂതരെ പരിഹസിക്കുകയും അവഹേളിക്കുകയും തള്ളിപ്പറയുകയും ചെയ്യുകയെന്നത് പണ്ടുമുതലേ ഉള്ളതാണ്. അതില്‍ പരിഭവിക്കേണ്ട, ക്ഷമിക്കുക. വാഗ്ദത്ത ശിക്ഷ അവര്‍ക്ക് വന്നെത്തുകതന്നെ ചെയ്യും.

19. ഓരോ നിമിഷത്തിലും അല്ലാഹുവിന്റെ സംരക്ഷണത്തിലാണ് മനുഷ്യന്‍. അതില്ലാതെ പോയാല്‍ ഒരാള്‍ക്കുമവനെ രക്ഷിക്കാനാവില്ല. ജലയാനങ്ങളിലും ശബ്ദാതിവേഗ വിമാനങ്ങളിലും മുങ്ങിക്കപ്പലുകളിലും മറ്റും യാത്രചെയ്യുന്നവരും മറ്റു സാഹസിക സംരംഭങ്ങളിലേര്‍പ്പെടുന്നവരും സുരക്ഷിതരായി തിരിച്ചെത്തുന്നു. പ്രത്യുത ഭൂതലത്തില്‍ നിര്‍ഭയരായി സഞ്ചരിക്കുന്ന പലരും അപകടങ്ങളില്‍ പെടുന്നു. ആരാണീ കാവലേകുന്നവന്‍? സ്വശരീരത്തില്‍ നിന്ന് ഈച്ചയെ ആട്ടാനാകാത്ത ബിംബങ്ങളോ? അല്ലാഹു അല്ലാത്ത ഒരു സംരക്ഷകനും അവര്‍ക്ക് ഉണ്ടാകുന്നതല്ല. (ഖുര്‍ആന്‍: 10:27, 40:33, 13:37, 86:4)

20. അല്ലാഹുവിനെ നിഷേധിച്ച് ധിക്കാര ജീവിതം നയിക്കുന്നവര്‍ നിശ്ശേഷം ദുര്‍ബലരാണ്. അവരുടെ അധീനതയിലുണ്ടായിരുന്ന അറേബ്യന്‍ ഉപദ്വീപിന്റെ പല ഭാഗങ്ങളും ക്രമേണ സത്യവിശ്വാസികളുടെ കൈയിലെത്തുന്നതവര്‍ കാണുന്നില്ലേ? ഖുര്‍ആന്റെ അവതരണാരംഭസമയം പ്രവിശാലമായ അറേബ്യ ബഹുദൈവവിശ്വാസികളുടെ ആധിപത്യത്തിലായിരുന്നു; എന്നാല്‍ രണ്ടുപതിറ്റാണ്ടു പിന്നിട്ടപ്പോഴേക്കത് വിശ്വാസികളുടെ കീഴിലായി-ഇതാണിവിടെ ഉദ്ദേശ്യമെന്നാണ് വ്യാഖ്യാതാക്കള്‍ പറയുന്നത്. മറ്റുചില അഭിപ്രായങ്ങളുമുണ്ട്.

21. ഇസ്‌ലാമിന്റെ സന്ദേശങ്ങളും ഖുര്‍ആനികാധ്യാപനങ്ങളും എന്റ സ്വന്തം വകയല്ല, അല്ലാഹുവിങ്കല്‍ നിന്ന് ലഭിക്കുന്ന ദിവ്യബോധനങ്ങള്‍ മാത്രമാണ് എന്നു ലോകത്തോടു പ്രഖ്യാപിക്കാന്‍ നബിയോടു കല്‍പിക്കുകയാണ്. എന്നാല്‍ നിഷേധത്തിന്റെ മത്തുപിടിച്ച് ബധിരരായവര്‍ അതു ശ്രവിക്കയില്ല. സത്യത്തിനുനേരെ അവരുടെ കണ്ണുകളും കാതുകളുമൊക്കെ പ്രവര്‍ത്തനരഹിതമായിരിക്കും.

22. ഏതു കൊടിയ ധിക്കാരിയും ദൈവികശിക്ഷയുടെ ഒരു കാറ്റടിക്കുമ്പോഴേക്കും പരിഭ്രമിച്ച് നിലവിളിച്ച് വിധേയത്വവും അനുസരണയും പ്രഖ്യാപിക്കും. ഫറോവ പോലും അങ്ങനെയാണു ചെയ്തത്. (സൂറ യൂനുസ് 90-92). ഓരോരുത്തരെയും പരലോകത്ത് അല്ലാഹു വിചാരണചെയ്യുകയും അര്‍ഹിക്കുന്ന പ്രതിഫലം നല്‍കുകയും ചെയ്യം. കടുകിട അനീതി അവിടെ കാണിക്കപ്പെടില്ല. ഓരോരുത്തര്‍ക്കും അര്‍ഹിക്കുന്ന പ്രതിഫലം അല്ലെങ്കില്‍ ശിക്ഷ യഥോചിതം നല്‍കപ്പെടും.

23. മര്‍ത്യകുലത്തിലെ വലിയൊരു ജനവിഭാഗമായ ഇസ്രാഈല്യര്‍ക്ക് തൗറാത്തും മറ്റൊരു മഹാ ജനപഥമായ ഇസ്മാഈല്യര്‍ക്ക് ഖുര്‍ആനും നല്‍കിയത് പരാമര്‍ശിക്കയാണ്. അല്ലാഹുവിങ്കല്‍ നിന്നുള്ള ദിവ്യബോധനമാണ് രണ്ടിലുമുള്ളത്. ഇസ്രയേല്യര്‍ മൂസാനബിയെയും ഹാറൂന്‍നബി(അ)യെയും തൗറാത്തും നിഷേധിക്കാന്‍ പാടില്ലായിരുന്നു; മുഹമ്മദ് നബി(സ്വ)യുടെ ആഗമനാനന്തരം സര്‍വമനുഷ്യരും ഖുര്‍ആന്‍ വിശ്വസിക്കയാണു വേണ്ടത് എന്നു താല്‍പര്യം.

24. മൂസാനബിക്കും ഹാറൂന്‍ നബി(അ)ക്കും പ്രവാചകത്വം നല്‍കിയ കാര്യമാണ് തൊട്ടുമുമ്പ് പരാമര്‍ശിച്ചത്. അതിനുമുമ്പായിരുന്നു ഇബ്രാഹീം നബി(അ)യുടെ നിയോഗം. വിശ്വാസികളുടെ പിതാവ് എന്നും സമുദായ സമാനന്‍ എന്നുമൊക്കെ വിശേഷിപ്പിക്കപ്പെടുന്ന മഹാനും (ഖുര്‍ആന്‍ 16:120, 22:78) അല്ലാഹുവിന്റെ മിത്രവുമാണദ്ദേഹം.

25. കണ്ണും കാതുമില്ലാത്ത, ആര്‍ക്കും യാതൊരു ഉപകാരവും ഉപദ്രവും ചെയ്യാനാകാത്ത ബിംബങ്ങളെ ദൈവമാക്കുകയും ആരാധിക്കുകയും ചെയ്യുന്നതിലെ ബുദ്ധിശൂന്യതയും മൗഢ്യവും സ്വന്തം ജനതയെ ഗുണകാംക്ഷയോടെ മനസ്സിലാക്കാന്‍ നോക്കുകയാണ് ഇബ്രാഹീം നബി(അ). അതിനായി ആരാധനാ കേന്ദ്രത്തില്‍ നിന്ന് ആളുകള്‍ പിരിഞ്ഞുപോയ ശേഷം സുചിന്തിതമായ ഒരു പണിയൊപ്പിച്ചു: ഒരു മഴുവെടുത്തു എല്ലാ ബിംബങ്ങളെയും കൊത്തിനുറുക്കി കഷ്ണിച്ചു തുണ്ടങ്ങളാക്കി. വലിയ ബിംബത്തെ മാത്രം ഒന്നും ചെയ്തില്ല - ദൈവനിന്ദകാട്ടിയ കുറ്റവാളിയെക്കുറിച്ച് പെരിയദൈവത്തോട് അന്വേഷിച്ചറിയാനുള്ള(?) ഒരവസരം അവര്‍ക്കദ്ദേഹം ബാക്കിവെച്ചു!

26. ക്ഷേത്രത്തിലെത്തിയവര്‍ ദൈവങ്ങള്‍ക്കുവന്ന ദുരന്തംകണ്ട് നിലവിളിച്ച് അട്ടഹസിച്ചു. ഏതു ധിക്കാരിയാണിത് ചെയ്തതെന്ന് ചര്‍ച്ചനടത്തി. ഇബ്രാഹീം നബിയുടെ പേര് പൊന്തിവരികയും താന്‍ ഹാജറാക്കപ്പെടുകയും ചെയ്തു. വിചാരണാവേളയില്‍ ജനങ്ങളുടെ ചിന്താശേഷി തൊട്ടുണര്‍ത്താനായി അദ്ദേഹം പറഞ്ഞു: ഈ വലിയ ബിംബമാണിത് ചെയ്തിട്ടുണ്ടാവുക. തെളിവായി അതാ മഴു അതിന്റെ കഴുത്തില്‍. മാത്രമല്ല, പെരിയവനായ തന്നോടൊപ്പം ഈ കൊച്ചുകൊച്ചുദൈവങ്ങള്‍ ആരാധിക്കപ്പെടുന്നത് പെരിയവന്‍ ഇഷ്ടപ്പെടുന്നുമുണ്ടാകില്ല!.. ഇബ്രാഹീം നബിയുടെ ചിന്തോദ്ദീപകമായ സംസാരം ഒരുവേള അവരെ പിടിച്ചുനിര്‍ത്തി. ബിംബാരാധന തികച്ചും ബുദ്ധിശൂന്യമാണ് എന്ന് അവര്‍ക്ക് തോന്നി. പക്ഷേ, വീണ്ടുമവര്‍ പഴയ ചിന്താഗതിയിലേക്ക് മടങ്ങുകയും ഇബ്രാഹീം നബിയെ അഗ്നികുണ്ഡത്തിലിട്ട് കരിച്ചുകളയാന്‍ തീരുമാനിക്കുകയും ചെയ്തു. ഇന്നെത്തെ തുര്‍ക്കിയില്‍പെട്ട ഉര്‍ഫ എന്ന സ്ഥലത്ത് ഈ സംഭവത്തിന്റെ ചില ശേഷിപ്പുകള്‍ ഇന്നും കാണാം.

27. ഉര്‍ഫയിലെ ചെങ്കുത്തായി ഉയര്‍ന്ന് നില്‍ക്കുന്ന ഒരു പാറക്കുന്നില്‍ നിന്നു തൊട്ടുതാഴെ തയ്യാറാക്കിയ വലിയ അഗ്നികുണ്ഡത്തിലേക്ക് തെറ്റുവില്ല് എന്ന ഒരു യന്ത്രത്തിന്റെ സഹായത്തോടെയാണവര്‍ ഇബ്രാഹീം നബി(അ)യെ എറിഞ്ഞത്. തല്‍ക്ഷണം അഗ്നിയോട് അല്ലാഹുവിന്റെ ഉത്തരവുണ്ടായി - നബിയ്ക്ക് തണുപ്പും ശാന്തിയുമാവുക! ഇമാം ഇബ്‌നു അബ്ബാസ്(റ) പറയുന്നു: 'തണുപ്പാവുക എന്ന ശാസനക്കൊപ്പം ശാന്തി(സലാം)യുമാവുക എന്ന് അല്ലാഹു പറഞ്ഞിരുന്നില്ലെങ്കില്‍ അഗ്നിയുടെ അതിശൈത്യം മൂലം നബി മരിച്ചുപോകുമായിരുന്നു!' ഏതായാലും അത്യത്ഭുതകരമാം വിധം ആത്മമിത്രം ഇബ്രാഹീം നബി(അ)യെ അല്ലാഹു രക്ഷപ്പെടുത്തി. ദുഷ്ടലാക്കുവെച്ച പ്രതിയോഗികള്‍ ഇളിഭ്യരും പരാജിതരുമായി.

28. ഇറാഖിലായിരുന്ന ഇബ്രാഹീം നബിയെ സഹോദര പുത്രന്‍ ലൂഥ് നബിയൊന്നിച്ച് അല്ലാഹു ശാമിലേക്ക് രക്ഷപ്പെടുത്തുകയാണുണ്ടായത്. തുടര്‍ന്ന് സാറാബീവിയില്‍ ഇസ്ഹാഖ് നബി ജനിച്ചു. അദ്ദേഹത്തിന് യഅ്ഖൂബ് നബിയുമുണ്ടായി. ഇവരുടെ സന്തതീപരമ്പരയാണ് ഇസ്രയേല്യര്‍. ഒട്ടേറെ പ്രവാചകന്മാരും ദൈവദൂതന്മാരും ഭരണസാരഥികളും ഇവരിലുണ്ടായി. ആ പ്രവാചകര്‍ സദ്‌വൃത്തരും ധര്‍മനിഷ്ഠരും അല്ലാഹുവിനെ മാത്രം ആരാധിക്കുന്നവരുമായിരുന്നു. ശാമിനെകുറിച്ച് 'അനുഗൃഹീത ഭൂമി' എന്ന പ്രയോഗം മറ്റുചില സൂക്തങ്ങളിലുമുണ്ട്.

29. ഫിലസ്ഥീനിലെ ഖുദ്‌സ് നഗരത്തിന്റെ തെക്കു ഭാഗത്തുള്ള സദൂം കേന്ദ്രീകരിച്ചായിരുന്നു ലൂഥ് നബി(അ)യുടെ പ്രവര്‍ത്തനങ്ങള്‍. എന്നാല്‍, ജനങ്ങളുടെ സംസ്‌കാരശൂന്യമായ ജീവിതവും ഹീനമായ ദുര്‍നടപ്പും മൂലം അല്ലാഹു സദൂമും പരിസര സ്ഥലങ്ങളും ഉള്‍പ്പെടെ കീഴ്‌മേല്‍ മറിച്ച് ഗുരുതര ശിക്ഷയിറക്കി അവരെ നശിപ്പിച്ചു. ലൂഥ് നബിയും സത്യവിശ്വാസികളും രക്ഷപ്പെട്ടു. ഈ സ്ഥലത്താണ് ചാവുകടല്‍. (ഖുര്‍: 11:82, 11:74 നോക്കുക).

30. നൂഹ് നബി(അ)യുടെ സമൂഹത്തിന്റെ ചരിത്രം പലേടത്തും ഖുര്‍ആന്‍ പറഞ്ഞിട്ടുണ്ട്. കടുത്ത നിഷേധ മനസ്‌കരായ അവര്‍ -വളരെ തുച്ഛം പേരൊഴിച്ച്- നബിയെ ധിക്കരിച്ചു. ഫലമോ? വലിയ വെള്ളപ്പൊക്കമുണ്ടായി നിഷേധികള്‍ ഉന്മൂലനം ചെയ്യപ്പെട്ടു. ഇവിടെ സൂചിപ്പിക്കപ്പെട്ട പ്രാര്‍ത്ഥന, തന്റെ നിഷേധികളും ധിക്കാരികളുമായ ജനത്തെ വിപാടനം ചെയ്യാന്‍ വേണ്ടി, ഗത്യന്തരമില്ലാതെ നബി ദുആ ചെയ്തതാകുന്നു. സൂറത്തു നൂഹ് 26-28 കാണുക.

31. കൗതുകകരമായ ഒരു സംഭവവും വിധിയുമായിരുന്നു ഇത്. ഇമാം ഇബ്‌നു മസ്ഊദ്(റ) ഉദ്ധരിക്കുന്നതനുസരിച്ച് അതിങ്ങനെയാണ്: രണ്ടു വിഭാഗമാളുകളാണ് നബി സന്നിധിയിലെത്തിയത്. ഒരു വിഭാഗത്തിന്റെ മുന്തിരിത്തോട്ടത്തില്‍ മറുകക്ഷിയുടെ ആട്ടിന്‍കൂട്ടങ്ങള്‍ രാത്രി കടന്ന് നിശ്ശേഷം തിന്നു നശിപ്പിച്ചു. ഈ കേസില്‍ ദാവൂദ് നബി(അ) വിധിപറഞ്ഞത് കര്‍ഷകന്‍ പാപ്പരായതിനാല്‍ ആടുകളെ അദ്ദേഹത്തിന് നല്‍കണമെന്നാണ്. എന്നാല്‍, മടക്കത്തിലവര്‍ സുലൈമാന്‍ നബി(അ)യെ കണ്ടു. അദ്ദേഹം കുട്ടിയാണന്ന്. സംഭവവും വിധിയും വിവരങ്ങളും അവര്‍ പരസ്പരം കൈമാറി.
ഇതു കേട്ട സുലൈമാന്‍ നബി നേരെ ദാവൂദ് നബി(അ)യുടെയടുത്തേക്ക് ചെന്ന് ബോധിപ്പിച്ചു: പിതാവേ, മറ്റൊരു വിധിയാണ് ഈ സംഭവത്തില്‍ കൂടുതല്‍ ആര്‍ദ്രതാപൂര്‍ണമെന്ന് തോന്നുന്നു. ആടുകളും ഭൂമിയും അങ്ങ് പരസ്പരം കൈമാറാന്‍ കല്‍പിക്കുക. ഈ ഘട്ടത്തില്‍ കര്‍ഷകന്‍ ആടുകളുടെ പാല്, കുഞ്ഞുങ്ങള്‍, രോമം മുതലായവ അനുഭവിക്കട്ടെ. തത്സമയം ആടുകളുടെ ഉടമ കൃഷിഭൂമി ഏറ്റെടുത്ത് പുതിയ വിളയിറക്കി ആവശ്യമായ ശുശ്രൂഷകളും മറ്റും ചെയ്ത് പൂര്‍വസ്ഥിതിയിലെത്തിക്കണം. അന്നേരം ഓരോരുത്തരും അവരവരുടേത് തിരിച്ച് ഏറ്റെടുക്കുക. 'ഇതു തന്നെയാണ് മകനേ, ശരിയായ വിധി' എന്നു പറഞ്ഞ് ദാവൂദ് നബി മകനെ പ്രശംസിക്കുകയും ആ വിധി നടപ്പാക്കുകയും ചെയ്തു.

32. പക്ഷികള്‍, പര്‍വതങ്ങള്‍ മുതലായ പലതും ദാവൂദ് നബി(അ)ക്ക് കീഴ്‌പ്പെടുത്തപ്പെട്ടിരുന്നു. ലോകത്ത് ആദ്യമായി ചെറിയ കണ്ണികള്‍ കൊണ്ട് പടയങ്കികള്‍ നിര്‍മിച്ചത് ദാവൂദ് നബിയാണ്. യോദ്ധാവിന് ശാരീരിക ചലനങ്ങള്‍ക്ക് തടസ്സമില്ലാത്ത പടയങ്കിയായിരുന്നു അത്. മെഴുകും ഗോതമ്പുമാവും പോലെ അതിലോലമായി തന്റെ കൈയില്‍ ഇരുമ്പ് പരിണമിക്കുമായിരുന്നു. ഖുര്‍ആന്‍ 34:10ല്‍ ഇത് സ്പഷ്ടമായി പറഞ്ഞിട്ടുണ്ട്.

33. സുലൈമാന്‍ നബി(അ)ക്ക് അസാധാരണമായ പല സവിശേഷതകളും അല്ലാഹു നല്‍കിയിരുന്നു. സവാരിക്കായി കാറ്റ് കീഴ്‌പ്പെടുത്തിയതും രാവിലെയും വൈകുന്നേരവും ഓരോ മാസത്തെ ദൂരം അത് സഞ്ചരിച്ചിരുന്നുവെന്നും സൂറത്ത് സബഅ് 12ല്‍ കാണാം. യമനിലേക്കും അനുഗൃഹീതമായ ശാമിലേക്കും മറ്റും നബി ഇങ്ങനെ കാറ്റിലൂടെ സഞ്ചരിച്ചിരുന്നു. സമുദ്രങ്ങളില്‍ മുങ്ങി മുത്തുകളെടുക്കുക, കെട്ടിട നിര്‍മാണം മുതലായ ആവശ്യമായ ഇതര ജോലികള്‍ ചെയ്യുക തുടങ്ങിയവക്കായി പിശാചുക്കളെയും നബിക്ക് അല്ലാഹു കീഴ്‌പ്പെടുത്തിക്കൊടുത്തിരുന്നു. (ഖുര്‍. 34:12,13 നോക്കുക.)

34. അയ്യൂബ് നബി(അ)ക്ക് സമ്പത്തും സന്താനങ്ങളും സ്ഥാനമാനങ്ങളുമായി ഒട്ടേറെ അനുഗ്രഹങ്ങള്‍ അല്ലാഹു നല്‍കിയിരുന്നു. പരീക്ഷണാര്‍ത്ഥം അവയത്രയും അവന്‍ തിരിച്ചുപിടിച്ചു. നാനാവിധ പ്രതിസന്ധികളും പ്രയാസങ്ങളും കഷ്ടപ്പാടുകളുമുണ്ടായി. എന്നാല്‍, അവയത്രയും കാരിരുമ്പിന്റെ ശക്തിയുള്ള ഹൃദയവുമായി ആ മഹാന്‍ നേരിട്ടു; ക്ഷമയുടെ പ്രതീകവും പര്യായവുമായി മാറി. പരീക്ഷണത്തില്‍ വിജയശ്രീലാളിതനായ നബിശ്രേഷ്ഠന്ന് തന്റെ മഹത്തായ അനുഗ്രഹവും ഔദാര്യവുമായി അവയത്രയും കുറേയധികവും അല്ലാഹു തിരിച്ചു നല്‍കി. അവനെ ആരാധിക്കുകയും ക്ഷമ കൈക്കൊള്ളുകയും ചെയ്യുന്ന സര്‍വര്‍ക്കും ഏറ്റം വലിയ പാഠമാണ് ഇതിലുള്ളത്.

35. പുരാതന ചരിത്രത്തിലെ ഒരു സുപ്രധാന നഗരമായ 'നീനവ'യിലേക്കാണ് യൂനുസ് നബി(അ) നിയുക്തനായിരുന്നത്. ഇറാഖിന്റെ വടക്കുഭാഗത്തുള്ള അല്‍ മൗസ്വിലിനു സമീപമാണിത്. പണ്ട് അസീറിയയുടെ തലസ്ഥാനമായിരുന്നു. തന്റെ സത്യപ്രബോധനം ജനം നിരന്തരം തള്ളിക്കളയുകയും നിഷേധിക്കുകയും ചെയ്തപ്പോള്‍ അവരോടുള്ള അരിശവും ക്രോധവും നിമിത്തം അല്ലാഹുവിന്റെ അനുമതി ലഭിക്കാതെ അദ്ദേഹം നാടുവിട്ടു. ജനങ്ങളോടുള്ള കോപത്താലാണ് നാടുവിട്ടത് എന്നതിനാല്‍ കുടുസ്സായ ഒരവസ്ഥയും അല്ലാഹുവിന്റെ ഭാഗത്തു നിന്ന് തനിക്കുണ്ടാവില്ല എന്നായിരുന്നു നബി(അ)യുടെ ധാരണ. എന്നാല്‍, കടല്‍യാത്രാമധ്യേ പുറത്തേക്കു ചാടിയ അദ്ദേഹത്തെ ഒരു തിമിംഗലം വിഴുങ്ങി. അതിന്റെ വയറ്റില്‍ കഴിഞ്ഞതു കൊണ്ടാണ് ദുന്നൂന്‍ (മത്സ്യത്തിന്റെ ആള്‍) എന്ന മറുപേര് വന്നത്.

36. യൂനുസ് നബി(അ)യെ ഭക്ഷണമാക്കുകയോ പരിക്കേല്‍പിക്കുകയോ ചെയ്യരുതെന്ന് മത്സ്യത്തിന് അല്ലാഹു പ്രത്യേക ബോധനം നല്‍കിയിരുന്നു. അതിന്റെ പ്രവിശാലമായ വയര്‍ നബിക്ക് ഒരു തടവറയാക്കുകയാണ് അല്ലാഹു ചെയ്തത്. തത്സമയം അദ്ദേഹത്തിന് കുറ്റബോധമുണ്ടായി, പശ്ചാത്തപിച്ചു. അത് സ്വീകരിക്കപ്പെടുകയും തിമിംഗലം 'തടവുപുള്ളി'യെ കടല്‍തീരത്തെ ശൂന്യസ്ഥലത്ത് കൊണ്ടുവന്ന് പുറത്തേക്ക് തള്ളുകയുമുണ്ടായി. (37:139-148 നോക്കുക.)

37. സകരിയ്യാ നബി(അ)യുടെയും മര്‍യം ബീവിയുടെയും കഥ അല്‍പം മുമ്പ് 19ാം അധ്യായത്തിന്റെ ആദ്യഭാഗത്ത് പറഞ്ഞുപോയിട്ടുണ്ട്. സഹധര്‍മിണി വന്ധ്യയും വയോവൃദ്ധയായതിനാല്‍ സാധാരണഗതിയില്‍ ഗര്‍ഭധാരണത്തിന് അശക്തയും ആയിരുന്നത് സൂചിപ്പിച്ചാണ് ഗര്‍ഭം ധരിക്കുന്നതിന് 'യോഗ്യയാക്കി' എന്ന് പ്രത്യേകം പരാമര്‍ശിച്ചിരിക്കുന്നത്. ഗര്‍ഭധാരണത്തിനാവശ്യമായ പാകത അവരില്‍ പുതുതായി ഉണ്ടാക്കി എന്നു വിവക്ഷ.

38. വിവിധ പ്രവാചകരുടെ ചരിത്രം പറഞ്ഞുവല്ലോ; അവരൊക്കെയും ഒറ്റ സമുദായമാണ്- അല്ലാഹുവിന്റെ സമുദായം. ഒരേ സ്രഷ്ടാവിന്റെ അടിമകളും ഒരേ ദൈവിക ജീവിതവ്യവസ്ഥയുടെ അനുയായികളും. തങ്ങള്‍ക്കിടയില്‍ ഛിദ്രതയും ഭിന്നിപ്പും അനൈക്യവുമൊക്കെ ഉണ്ടാക്കിയത് മനുഷ്യര്‍ തന്നെയാണ്. എന്നാല്‍, അവസാനം സര്‍വരും ഒരിടത്ത്-പരലോകത്ത്-തന്നെയാണ് അന്തിമ സംഗമത്തിനെത്തുക. ഓരോരുത്തര്‍ക്കും അവരവരുടെ കര്‍മഫലങ്ങള്‍ ഒരുവിധ അനീതിയുമില്ലാതെ നല്‍കപ്പെടും. സല്‍ക്കര്‍മങ്ങള്‍ക്ക് പരലോകത്ത് പ്രതിഫലം ലഭിക്കാന്‍ സത്യവിശ്വാസം കൂടിയേ തീരൂ എന്നാണ് 94-ാം വചനം പഠിപ്പിക്കുന്നത്.

39. സത്യനിഷേധവും ധിക്കാരവും ദുര്‍നടപ്പുമായി കഴിയുന്ന നിഷേധികള്‍ ദൈവിക ശിക്ഷക്കും സംഹരണത്തിനും വിധേയരായാല്‍ പിന്നെ നല്ല നടപ്പിനായി ഭൂമിയിലേക്കവര്‍ക്ക് വരാനാകില്ല. അതിനവര്‍ അപേക്ഷിക്കുകയും ആഗ്രഹിക്കുകയും ചെയ്യും. (26:99-102, 39:57-59) അവസാനം അന്ത്യനാളിന്റെ സുപ്രധാന ലക്ഷണങ്ങളിലൊന്നായ യഅ്ജൂജ്-മഅ്ജൂജിന്റെ വിളയാട്ടവും തേരോട്ടവും കണ്ടുകഴിയുമ്പോള്‍ (അല്‍ കഹ്ഫ് 99,100 നോക്കുക) നിഷേധികള്‍ ഭഗ്നാശരാവുകയും സ്വന്തം നിഷേധാത്മക നിലപാടോര്‍ത്ത് കൊടും സങ്കടത്തിലകപ്പെടുകയും വിലപിക്കുകയും അട്ടഹസിക്കുകയും ചെയ്യും.

40. പരലോകത്ത് നിഷേധികള്‍ നരകം കാണുകയും അതിന്റെ ഭീകരാരവം കേള്‍ക്കുകയും ചെയ്യുമ്പോള്‍ ഉണ്ടാകുന്നതാണ് 'കൊടും സംഭ്രമം'. എന്നാല്‍, സത്യവിശ്വാസികള്‍ സന്തുഷ്ടരാരിയിരിക്കും; മലക്കുകള്‍ അവരെ സ്വാഗതം ചെയ്ത് സ്വര്‍ഗത്തിലേക്ക് ആനയിക്കുകയും 'ഇതാണ് നിങ്ങള്‍ക്കുള്ള വാഗ്ദത്ത സ്വര്‍ഗം' എന്നു പറഞ്ഞ് ആശീര്‍വദിക്കുകയും അഭിനന്ദിക്കുകയും ചെയ്യും.

41. അന്ത്യനാള്‍ സമാഗതമാകുമ്പോള്‍ പ്രപഞ്ചമാകെ തകര്‍ന്ന് തരിപ്പണമാകും; ആകാശം പിളരും; നക്ഷത്രങ്ങളുതിര്‍ന്ന് വീഴും; സമുദ്രങ്ങള്‍ക്കു തീ പിടിക്കും; പര്‍വതങ്ങള്‍ ധൂളീകരിക്കപ്പെടും... മനുഷ്യനും ശാസ്ത്രത്തിനും ഇന്നുവരെ ഒരെത്തും പിടിയും കിട്ടാത്ത ഭീമാകാര വസ്തുക്കളായ ആകാശങ്ങള്‍ കടലാസു തുണ്ടുകള്‍ പോലെ ചുരുട്ടി മടക്കപ്പെടുന്നതാണ്. സൃഷ്ടികളെയൊക്കെ അന്ന് അല്ലാഹു പുനരുല്‍പാദിപ്പിക്കും. നിഷേധികളെ സംബന്ധിച്ചിടത്തോളം ഏറ്റം ദുര്‍ഗ്രഹ സമസ്യയാണല്ലോ ഈ പുനരുത്ഥാനം.
ഇമാം ഇബ്‌നു അബ്ബാസ് (റ) ഉദ്ധരിക്കുന്നു: തിരുമേനി(സ്വ) ഒരിക്കല്‍ പ്രസംഗിക്കവെ പ്രസ്താവിച്ചു: മനുഷ്യരേ, നഗ്നപാദരും വിവസ്ത്രരും ചേലാകര്‍മം ചെയ്യപ്പെടാത്തവരുമായി നിങ്ങള്‍ അല്ലാഹുവിങ്കലേക്ക് സംഗമിപ്പിക്കപ്പെടുന്നതാണ്. എന്നിട്ട് അവിടന്ന് ഈ 104ാം സൂക്തം ഓതി... (ബുഖാരി)

42. മൂലഗ്രന്ഥമെന്നാല്‍ 'ലൗഹുല്‍ മഹ്ഫൂള്' ആണ്. അതിലും ദാവൂദ് നബിക്ക് നല്‍കപ്പെട്ട 'സബൂറി'ലും (സങ്കീര്‍ത്തനങ്ങള്‍) ഉള്ളതാണ് 'ഭൂമിയുടെ അവകാശം സത്യവിശ്വാസികള്‍ക്കാണെ'ന്ന്. ഏതെങ്കിലും കാരണത്താല്‍ നിഷേധികളുടെ പക്കല്‍ അതുണ്ടെങ്കില്‍ തന്നെ താമസിയാതെ അതിന്റെ ആധിപത്യം വിശ്വാസികളുടെ കൈകളിലേക്ക് നീങ്ങും. വിശുദ്ധ ഖുര്‍ആനും ഇക്കാര്യം സംശയാതീതമായി പ്രഖ്യാപിച്ചിട്ടുണ്ട്- നിങ്ങളില്‍ സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്തവരോട്, 'അവരെ നാം ഭൂമിയില്‍ പ്രതിനിധികളാക്കുക തന്നെ ചെയ്യും, തീര്‍ച്ച' എന്ന് അല്ലാഹു വാഗ്ദാനം ചെയ്തിരിക്കുന്നു. (സൂറത്തുന്നൂര്‍ 55)

43. അറേബ്യക്കോ മുസ്‌ലിംകള്‍ക്കോ മാത്രമല്ല, ലോകത്തിനാകമാനം അനുഗ്രഹമാണ് തിരുമേനി (സ്വ). ഒരിക്കല്‍ തന്റെയും അനുയായികളുടെയും ബദ്ധവൈരികളായിരുന്ന ബഹുദൈവ വിശ്വാസികള്‍ക്കു വേണ്ടി സംഹാര പ്രാര്‍ത്ഥന നടത്താന്‍ ഒരാള്‍ നബി(സ്വ)യോട് ആവശ്യപ്പെട്ടു. എങ്കില്‍ അവരെ കൊണ്ടുള്ള ശല്യം അവസാനിച്ചു കിട്ടുമല്ലോ. അവിടന്ന് പ്രതികരിച്ചു: ശപിക്കുന്നവനായല്ല, കാരുണ്യമായിട്ടാണ് ഞാന്‍ നിയുക്തനായിരിക്കുന്നത്. (ബുഖാരി, മുസ്‌ലിം)

44. എല്ലാവര്‍ക്കും ലഭിക്കത്തക്ക വിധം സത്യസന്ദേശങ്ങളുടെ പ്രബോധന-പ്രചാരണ പ്രവര്‍ത്തനങ്ങള്‍ തുല്യമായി ഞാന്‍ നിര്‍വഹിച്ചിട്ടുണ്ടെന്നും അതിനാല്‍ എല്ലാവരും അവയംഗീകരിച്ച് മുസ്‌ലിം (അനുസരിക്കുന്നവന്‍) ആകണമെന്നുമാണ് നബി(സ്വ) ആവശ്യപ്പെടുന്നത്. ഇത്തരം സന്ദര്‍ഭങ്ങളിലൊക്കെ ധിക്കാരം കാട്ടുകയും നീ താക്കീത് ചെയ്യുന്ന ആ ശിക്ഷയിങ്ങ് കൊണ്ടുവാ.. എന്ന് പരിഹസിക്കുകയുമാണവര്‍ ചെയ്തിരുന്നത്. 'വാഗ്ദത്തകാര്യം' എന്നതിന്റെ വിവക്ഷ അതാണ്. 'അത് വരുമെന്ന് തീര്‍ച്ച; പക്ഷേ, എപ്പോഴാണെന്ന് എനിക്കറിയില്ല' എന്നായിരുന്നു നബി(സ്വ)യുടെ മറുപടി. ഒടുവിലത് വന്നു. ബദ്‌റില്‍ അവരുടെ നടുവൊടിഞ്ഞു. ഇസ്‌ലാം വിജയ വൈജയന്തി പറത്തി.

45. നിഷേധികള്‍ കുത്സിതനീക്കങ്ങളും പ്രതിലോമ പ്രവര്‍ത്തനങ്ങളും തുടര്‍ന്നപ്പോള്‍ നബി(സ്വ) അല്ലാഹുവിനോട് പ്രാര്‍ത്ഥിക്കുകയാണ്. നാഥാ, ഞങ്ങള്‍ക്കിടയില്‍ സത്യനിഷ്ഠമായ തീര്‍പ്പുണ്ടാക്കിത്തരേണമേ എന്ന്. ഇസ്‌ലാമും അതിന്റെ മുഴുവന്‍ സിദ്ധാന്തങ്ങളും സത്യത്തിലും നീതിയിലും മാത്രം അധിഷ്ഠിതമാണ്. സത്യമല്ലാത്തതൊക്കെ കേവലം ദുര്‍മാര്‍ഗമത്രേ എന്നാണ് ഖുര്‍ആന്‍ (യൂനുസ്: 32) പഠിപ്പിക്കുന്നത്. നബി(സ്വ)യുടെ പ്രാര്‍ത്ഥന അല്ലാഹു സ്വീകരിച്ചു. അസത്യം ഉന്മൂലനം ചെയ്യപ്പെടുകയും അറേബ്യന്‍ ഉപദ്വീപ് മുഴുവനും താമസമന്യേ ഇസ്‌ലാമിന്റെ കൊടിക്കൂറക്കു കീഴില്‍ വരികയും ചെയ്തു. ഇന്ന് ഭൂതലത്തിലെങ്ങും ഇസ്‌ലാം വ്യാപിച്ചു. അതിന്റെ സാന്നിധ്യമില്ലാത്ത ഒരൊറ്റ രാജ്യവും ഭൂതലത്തില്‍ ഇല്ലെന്ന അവസ്ഥ സംജാതമായി. ലഹുല്‍ ഹംദു വശ്ശുക്ര്‍.