താഹാ - طه - Taha

1. ചില സൂറത്തുകളുടെ തുടക്കത്തിലുള്ള ഖണ്ഡിതാക്ഷരങ്ങളുടെ കൂട്ടത്തില്‍ പെട്ടതാണ് ഥാ ഹാ, ഒറ്റവാക്കല്ല; എന്നാല്‍ രണ്ടക്ഷരങ്ങളും ചേര്‍ത്താണ് എഴുത്ത്. ഈ അധ്യായത്തിന്റെ പേരും അതു തന്നെ. ഇവ്വിധമുള്ള ഖണ്ഡിതാക്ഷരങ്ങളെപ്പറ്റി പലപ്പോഴും പറഞ്ഞുപോയിട്ടുണ്ട്. തിരുനബി(സ്വ)യുടെ വിവിധ നാമങ്ങളിലൊന്ന് ഥാഹാ എന്നാണ്; എന്നാല്‍ ഇവിടെ അതല്ല ഉദ്ദേശ്യം.

2. നീണ്ട സമയം ഖുര്‍ആന്‍ പാരായണം ചെയ്തുകൊണ്ട് നബി(സ്വ) രാത്രിനമസ്‌കാരം നിര്‍വഹിക്കാറുണ്ടായിരുന്നു. ഇതുകണ്ട് മക്കയിലെ നിഷേധികള്‍ നബിയെയും ഖുര്‍ആനെയും പരിഹസിക്കാന്‍ തുടങ്ങി: ഇങ്ങനെ ഉറക്കമൊഴിച്ച് പാരായണം ചെയ്യിച്ച് മുഹമ്മദിനെ കഷ്ടപ്പെടുത്താന്‍ മാത്രമാണ് അല്ലാഹു ഖുര്‍ആന്‍ അവതരിപ്പിച്ചിരിക്കുന്നത് എന്ന് അവര്‍ തട്ടിവിട്ടു. അപ്പോഴാണ് ഈ ആയത്തിറങ്ങിയത്

3. അല്ലാഹു കേള്‍ക്കാനും അറിയാനും വേണ്ടി മാത്രമായി പ്രാര്‍ഥനകളോ മറ്റോ ഉച്ചത്തില്‍ പറയേണ്ടതില്ല. അതീവരഹസ്യങ്ങളും മനുഷ്യന്റെ മനോവ്യാപാരങ്ങള്‍ വരെയും സര്‍വജ്ഞനായ അവനറിയാം. മിതമായ ശബ്ദത്തില്‍ അവ നിര്‍വഹിച്ചാല്‍ മതി. എന്നാല്‍ ഉച്ചത്തിലാക്കാന്‍ അനുശാസിക്കപ്പെട്ടവ-ഉദാഹരണം: ബാങ്ക്, തല്‍ബിയത്ത് തുടങ്ങിയവ-അങ്ങനെ ചെയ്യണം.

4. പത്തുവര്‍ഷക്കാലം ശുഐബ് നബി(അ)മൊന്നിച്ച് മദ്‌യനില്‍ കഴിഞ്ഞ ശേഷം കുടുംബസമേതം മൂസാനബി(അ) ഈജിപ്തിലേക്ക് മടങ്ങും വഴി രാത്രിയാണ് ഈ സംഭവം. കടുത്ത ശൈത്യവും അന്ധകാരവുമുണ്ടായിരുന്നു. അപരിചിതത്വവും ഇരുട്ടും കാരണം വഴിതെറ്റിപ്പോയിരുന്നു എന്നും ചരിത്രങ്ങളില്‍ കാണാം.

5. സീനാ ഉപദ്വീപില്‍ പ്രവിശാലമായിക്കിടക്കുന്ന മലനിരകളിലൊന്നിലാണ് ഇതു സംഭവിക്കുന്നത്. അതിന്റെ പേരാണ് ഥുവാ. ജബല്‍ മൂസാ എന്ന പേരിലാണ് ഇന്നറിയപ്പെടുന്നത്. ഈ മലഞ്ചെരിവ് ഇന്നും നിരവധിയാളുകള്‍ സന്ദര്‍ശിച്ചുകൊണ്ടിരിക്കുന്നുണ്ട്.

6. അന്ത്യനാളിന്റെ കൃത്യസമയം അല്ലാഹു ആര്‍ക്കും അറിയിച്ചുകൊടുത്തിട്ടില്ല. അതേ സമയം അതു സമീപസ്ഥമായിരിക്കുന്നു എന്ന് ഒന്നര സഹസ്രാബ്ദം മുമ്പ് ഖുര്‍ആന്‍ തന്നെ പ്രഖ്യാപിച്ചു (അല്‍ഖമര്‍: 1). അതിന്റെ വ്യത്യസ്തമായ നിരവധി ലക്ഷണങ്ങള്‍ ഖുര്‍ആനിലും ഹദീസിലുമുണ്ട്. അവയില്‍ പലതും പ്രത്യക്ഷപ്പെട്ടു. സുപ്രധാനമായ ചിലത് അധികം വൈകാതെ സാക്ഷാല്‍കൃതമാകും. 'മറച്ചുവെക്കുമാറാവുക' എന്ന സവിശേഷ ശൈലിയുടെ പശ്ചാത്തലം ഇതാണ്.

7. അതീവഗൗരവമായ പശ്ചാത്തലത്തില്‍ മൂസാനബി(അ)യെ സാന്ത്വനിപ്പിക്കുന്നതിനും സന്തോഷിപ്പിക്കുന്നതിനുമാണ് 'കൈയിലെന്താണ്' എന്ന ചോദ്യം. സ്വാഭാവികമായും ഈ സുവര്‍ണാവസരം ഉപയോഗപ്പെടുത്തി അദ്ദേഹം അല്ലാഹുവോട് നീണ്ട സംസാരം നടത്തുകയും ചെയ്യുകയാണ്.

8. മൂസാബി(അ)ക്കു പ്രധാനപ്പെട്ട ഒമ്പത് ദൃഷ്ടാന്തങ്ങള്‍ അല്ലാഹു നല്‍കിയിരുന്നു. ഖുര്‍ആന്‍ പലേടത്തും അത് പ്രസ്താവിച്ചിട്ടുണ്ട്. അവയില്‍ ഏറ്റം മികച്ച രണ്ടെണ്ണം ഇവിടെ വെച്ചു കാണിച്ചുകൊടുക്കുകയാണ്. സാധാരണ ഗതിയില്‍ ആരും സംഭ്രമിച്ചുപോകുന്ന രീതിയിലായതുകൊണ്ടുകൂടിയാണ് ഇത് ആദ്യമേ പ്രദര്‍ശിപ്പിച്ചുകാണിക്കുന്നത്.

9. പ്രവിശാലമായ ഈജിപ്തിന്റെ ബലിഷ്ഠ സിംഹാസനത്തില്‍ നീണ്ടകാലം വാണരുളിയ രാജാക്കന്മാരുടെ പരമ്പരയാണ് ഫറോവമാര്‍. അവരില്‍ മിക്കവരും സ്വേച്ഛാധിപതികളും ധിക്കാരികളും ദൈവനിഷേധികളുമായിരുന്നു. ഞാനാണ് നിങ്ങളുടെ സമുന്നത ദൈവം എന്നുവരെ ഫിര്‍ഔന്‍ പ്രഖ്യാപിച്ചതായി(79:24) ഖുര്‍ആനിലുണ്ട്. ആ ദര്‍ബാറിലേക്കാണ് സത്യത്തിന്റെ പ്രബോധനാര്‍ഥം അല്ലാഹു മൂസാനബി(അ)യെ നിയോഗിക്കുന്നത്. ഈ പശ്ചാത്തലത്തിലാണ് നബിയുടെ അപേക്ഷകള്‍. സൂറത്തുല്‍ അഅ്‌റാഫിലും മറ്റും നബിയുടെ ഫിര്‍ഔനുമായുള്ള പ്രബോധനരംഗങ്ങള്‍ വിശദീകരിച്ചുപോയിട്ടുണ്ട്. (7:103-130 കാണുക) സഹോദരനെ പ്രവാചകനാക്കാനുള്ള മൂസാബി(അ)യുടെ അപേക്ഷ തത്സമയം തന്നെ അല്ലാഹു സ്വീകരിക്കയുണ്ടായി എന്ന് ഇമാം ഇബ്‌നു അബ്ബാസ്(റ) പ്രസ്താവിച്ചതായി കാണാം. മാനവചരിത്രത്തില്‍, ഒരു സഹോദരന്‍ തന്റെ സഹോദരന് ചെയ്ത ഏറ്റവും വലിയ ഉപകാരം ഹാറൂന്‍ നബിക്ക് മൂസാനബി അല്ലാഹുവിനോട് ചോദിച്ച് പ്രവാചകത്വം വാങ്ങിക്കൊടുത്തതാണ് എന്നും ഉദ്ധരിക്കപ്പെട്ടിട്ടുണ്ട്.

10. മൂസാനബി(അ) പ്രസവിക്കപ്പെട്ട സന്ദര്‍ഭത്തില്‍ ഈജിപ്തില്‍ ശിശുഹത്യയുടെ അടിയന്തരാവസ്ഥയായിരുന്നു. ഇസ്രയേല്യരില്‍ ജനിക്കുന്ന ഒരാണ്‍കുട്ടി തന്റെ സിംഹാസനം തകര്‍ക്കുമെന്ന ജ്യോത്സ്യപ്രവചനം വിശ്വസിച്ച് മുഴുവന്‍ ഇസ്രയേലീ നവജാതമക്കളെയും കൊന്നൊടുക്കുകയായിരുന്നു ഫറോവ. എന്നാല്‍ ആ കുഞ്ഞിനെ, മൂസാനബിയെ സുരക്ഷിതമായി വളര്‍ത്താന്‍ അല്ലാഹു ഫറോവയെത്തന്നെ ഏല്‍പിച്ചു; അദ്ദേഹം രാജകുമാരനായി വളര്‍ന്നു! എന്തൊരത്ഭുതകരമായ സംവിധാനം!

11. സൂറത്തുല്‍ ഖസസ് 15-22 ല്‍ ഈ സംഭവം വിവരിച്ചിട്ടുണ്ട്. രാജകുമാരനായ മൂസാനബിയുടെ കൈയാല്‍ ഒരാള്‍ അപ്രതീക്ഷിതമായി കൊല്ലപ്പെടുകയായിരുന്നു. താമസിയാതെ കൊലപാതക വിവരം പരസ്യമായി സംഘര്‍ഷകലുഷമായ പശ്ചാത്തലത്തില്‍ നിന്നു മൂസാനബിയെ അല്ലാഹു രക്ഷിച്ചു.

12. അല്ലാഹുവിന്റെ പ്രത്യേക പരിരക്ഷയും സഹായവും ഉണ്ടാകുമെന്നു വ്യക്തമായറിഞ്ഞിട്ടും ഫറോവയെക്കുറിച്ച ഭയപ്പാട് പ്രകടിപ്പിക്കയാണവര്‍. ഏകാധിപതികളുടെയും സ്വേച്ഛാധിപതികളുടെയും ക്രോധത്തിനും ക്രൗര്യത്തിനും അതിര്‍വരമ്പുകളില്ല എന്നതിനാലാണത്. അത്തരക്കാരുടെ ചോരക്കൊതിയും പൈശാചികതയും മാനസിക കാഠിന്യവും ലോകചരിത്രത്തില്‍ കുപ്രസിദ്ധമാണ്.

13. ഓരോ മനുഷ്യനും ജന്തുവിനും വൃക്ഷത്തിനും സസ്യത്തിനും മറ്റുമെല്ലാം ഓരോ പ്രകൃതിയും സ്വഭാവവും ധര്‍മവും രീതിയും ദൗത്യവുമുണ്ട്. അതു പ്രദാനം ചെയ്തവനാണ് അല്ലാഹു. ആഴത്തില്‍ ചിന്തിച്ചുനോക്കിയാല്‍ അത്യത്ഭുതകരമായ ഒരു കാര്യമാണിതെന്നു കാണാം.

14. നിങ്ങളുടെ വാദമനുസരിച്ചുള്ള ഈ രക്ഷിതാവിനെയും ഈ പുത്തന്‍ മാര്‍ഗവും പരിചയപ്പെടുത്തിക്കൊണ്ട് ഇപ്പോഴല്ലേ നിങ്ങളുടെ എഴുന്നള്ളത്ത് ഉണ്ടായിട്ടുള്ളൂ? അപ്പോള്‍ പൂര്‍വിക സമൂഹങ്ങളുടെ നിലയെന്താണ്? നിങ്ങളെന്തുപറയുന്നു എന്നാണ് ചോദ്യം.

15. മനുഷ്യപിതാവ് ആദം നബി(അ)യെ മണ്ണില്‍ നിന്നാണ് സൃഷ്ടിച്ചത്. സകലമനുഷ്യരും മരിച്ച് മണ്ണോടു ചേരും. അവസാനം ഖിയാമനാളില്‍ മര്‍ത്യകുലത്തിലെ മുഴുവന്‍ അംഗങ്ങളെയും പുനര്‍ജനിപ്പിച്ച് ഹാജരാക്കി വിചാരണ ചെയ്ത്, അവരവരുടെ ജീവിതത്തിലനുവര്‍ത്തിച്ചിരുന്ന കര്‍മങ്ങള്‍ക്കനുസരിച്ച് വിജയമോ പരാജയമോ, സ്വര്‍ഗമോ നരകമോ നല്‍കി അല്ലാഹു നീതിനടപ്പാക്കും.

16. അഹന്തയും ധിക്കാരവും തന്‍പോരിമയും മനുഷ്യനെ അന്ധനാക്കും; ശക്തിയും അധികാരവുമുണ്ടെങ്കില്‍ അത് പരമകാഷ്ഠ പ്രാപിക്കും. അതാണ് ഫറോവയില്‍ കാണുന്നത്. ഒമ്പത് പ്രധാന ദൃഷ്ടാന്തങ്ങല്‍ മൂസാനബി(അ)ക്ക് അല്ലാഹു നല്‍കിയിരുന്നു (ഖുര്‍. 17: 101) അതുമുഴുവന്‍ വ്യത്യസ്ത സന്ദര്‍ഭങ്ങളിലായി അവനെ കാണിച്ച് മൂസാനബി പ്രബോധനം തുടര്‍ന്നു. എന്നാല്‍ ഈ ആഭിചാരം വഴി ഞങ്ങളെ ഇന്നാട്ടില്‍ നിന്നു ബഹിഷ്‌കരിക്കാമെന്നാണോ നിന്റെ വ്യാമോഹം എന്നാണവന്‍ ചോദിച്ചത്! ഒടുവില്‍ അവര്‍ ആഭിചാര മത്സരത്തിനു തീരുമാനിച്ചു. നാട്ടിലെ ഉത്സവദിനം നിശ്ചിത സമയത്ത് സര്‍വരും പ്രവിശാലമായ മൈതാനത്ത് സംഗമിച്ച് ഏറ്റുമുട്ടണം - ഇതാണു വ്യവസ്ഥ.

17. മത്സരം തീരുമാനിച്ച് പിരിഞ്ഞ് പിന്നെയും കുറേ കഴിഞ്ഞാണ് ഏറ്റുമുട്ടാനെത്തുന്നത്. സമ്മേളിച്ച സ്ഥലത്തും മൂസാനബി(അ) ദഅ്‌വത്ത് നിര്‍വഹിച്ചു. അല്ലാഹുവിന്റെ മേല്‍ വ്യാജവാദങ്ങളുന്നയിച്ച് ദുര്‍മാര്‍ഗികളായവര്‍ പരാജിതരും ശിക്ഷാവിധേയരുമാകും. ഇത് കേട്ട് അവര്‍ ഭിന്നാഭിപ്രായക്കാരായി. പിന്നീട് യോജിപ്പിലെത്തി. സര്‍വസജ്ജീകരണങ്ങളുമായി എഴുപത്തിരണ്ട് സര്‍വകലാവല്ലഭരായ ആഭിചാരപടുക്കളാണ് സന്നിഹിതരായതെന്ന് ഇമാം ഇബ്‌നു അബ്ബാസ്(റ) പറഞ്ഞിട്ടുണ്ട്; കാഴ്ചക്കാരായി ഒട്ടേറെ ബഹുജനങ്ങളും.

18. ഫിര്‍ഔനും ശിങ്കിടികളും ജനങ്ങളെ വികാരഭരിതരാക്കി ഇളക്കിവിടാന്‍ നോക്കുകയാണ്. ആഭിചാരമാണ് ഇവരിരുവരുടെയും കൈമുതലെന്നും നിങ്ങളെ നാട്ടില്‍ നിന്ന് ബഹിഷ്‌കരിക്കുകയാണവരുടെ ലക്ഷ്യമെന്നും യാതൊരു പ്രാമാണിക പിന്‍ബലവുമില്ലാതെ തട്ടിവിടുകയാണവര്‍. നിങ്ങളുടെ അത്യുദാത്തമായ പന്ഥാവില്‍ - ഫറോവന്‍ മതം - നിന്നു നിങ്ങളെ വ്യതിചലിപ്പിക്കുകയാണിവിടെ സംഭവിക്കാന്‍ പോകുന്നതെന്നും അവര്‍ തട്ടിവിട്ടു. അതുകൊണ്ട് ഈ വര്‍ഗശത്രുക്കളെ നാം ഒറ്റക്കെട്ടായി പദ്ധതികളാവിഷ്‌കരിച്ച് എതിര്‍ക്കണം. മത്സരദിനം ഒറ്റയണിയായി രംഗത്തെത്തി ഇരുവരെയും തറപറ്റിക്കണം. ഇങ്ങനെ തീരുമാനമെടുത്ത് അവര്‍ പിരിഞ്ഞു.

19. വലിയ ആഭിചാരസംഘത്തിന്റെ ബീഭത്സപ്രകടനങ്ങള്‍ കണ്ടു മൂസാനബി(അ) പരിഭ്രമിച്ചു. എന്നാല്‍ അല്ലാഹു സമാധാനിപ്പിക്കുകയും ഏറ്റം വലിയ ഔന്നത്യം താങ്കള്‍ക്കുതന്നെയാണുണ്ടാവുക എന്നു ശുഭവാര്‍ത്ത നല്‍കുകയുമുണ്ടായി.

20. ഓര്‍ക്കാപുറത്ത് കനത്ത ഇരുട്ടടിയാണ് ഫറോവക്കു കിട്ടിയത്. തന്റെ അനുമതിയോടെ മാത്രമേ പ്രജകള്‍ എന്തെങ്കിലും ചെയ്യാവൂ എന്നാണല്ലോ അവന്റെ നിയമം. ഇവിടെ അതീവ നിര്‍ണായകമായ മത്സരവേദിയില്‍ ബഹുജനങ്ങളുടെ മുമ്പില്‍ പ്രഗദ്ഭരായ ആഭിചാരകന്മാര്‍ നിസ്സങ്കോചം സത്യവിശ്വാസം ഉച്ചൈസ്തരം പ്രഖ്യാപിക്കുകയാണ്. വലതുകൈയും ഇടതുകാലും അല്ലെങ്കില്‍ മറിച്ച് വിച്ഛേദിച്ച ശേഷം നിങ്ങളെ ക്രൂശിക്കും എന്നാണ് അപ്പോള്‍ ഫിര്‍ഔന്‍ ശിക്ഷവിധിച്ചത്.
ഇമാം ഹസനുല്‍ ബസ്വ്‌രി(റ)ക്ക് ഇവിടെ കൗതുകകരവും ശ്രദ്ധേയവുമായ ഒരു നിരീക്ഷണമുണ്ട്. താന്‍ പറയുന്നു: അല്ലാഹു എത്ര പരിശുദ്ധന്‍! നിഷേധികളായിക്കഴിയുകയും പിന്നീട് ജീവിതത്തില്‍ അല്ലാഹുവിനു വേണ്ടി ഒരേയൊരു സുജൂദ് മാത്രം നിര്‍വഹിക്കുകയും ചെയ്ത ഒരു സംഘമാളുകള്‍. ക്ഷണനേരം കൊണ്ട് അവരില്‍ സത്യവിശ്വാസം രൂഢമൂലമായി. എന്നാല്‍ നിങ്ങളില്‍ പലരും അറുപത്‌കൊല്ലം ഖുര്‍ആനുംകൊണ്ടു നടക്കുന്നുണ്ട്; എന്നിട്ടും തുച്ഛവിലക്ക് ദീനിനെ വില്‍ക്കുന്നതാണു കാണുന്നത്. എന്തൊരു വൈചിത്ര്യം, വിസ്മയം!

21. മരിച്ചുകിട്ടിയാല്‍ പിന്നെ ശിക്ഷയുടെ വേദനയറിയുകയില്ലല്ലോ. എന്നാല്‍, നരകവാസികള്‍ക്കു മരണമുണ്ടാകില്ല. സുഖസന്തോഷാഹ്ലാദത്തിലായി ജീവിക്കാനേ ഏതൊരാളും ആഗ്രഹിക്കൂ; അത്തരമൊരു ജീവിതവും ഇവര്‍ക്കുണ്ടാകില്ല. അനന്തമായ ശിക്ഷയും വേദനയും കഷ്ടപ്പാടും മാത്രമാണവര്‍ക്ക് പ്രതിഫലം. ഇത്തരമൊരു ജീവിതം ആഗ്രഹിക്കാത്തതുകൊണ്ടാണല്ലോ പലരും ആത്മഹത്യയില്‍ ചെന്നെത്തുന്നത്.

22. സത്യവിശ്വാസം പുല്‍കിയ ആഭിചാരകരുടെ പ്രഖ്യാപനമാണ് സൂക്തം 76 ന്റെ അവസാനം വരെ. ഫിര്‍ഔനെ ധിക്കരിച്ചുകൊണ്ട് സത്യവിശ്വാസം പുല്‍കുകയും സുജൂദില്‍ വീഴുകയും ചെയ്തപ്പോള്‍ അവരര്‍ഹിക്കുന്ന സ്വര്‍ഗീയ മണിമന്ദിരങ്ങള്‍ അല്ലാഹു കാണിച്ചുകൊടുത്തുവെന്നും തന്മൂലമാണ് കടുകിട വ്യതിചലിക്കാതെ, യാതൊരു ചാഞ്ചല്യവുമില്ലാതെ ഫിര്‍ഔന്റെ മുഖത്തുനോക്കി ഈ ദൃഢപ്രഖ്യാപനം നടത്താന്‍ അവര്‍ക്ക് സാധിച്ചതെന്നും ഇമാം ഇക്‌രിമ(റ) പ്രസ്താവിച്ചതായി കാണാം. ഇമാം ഇബ്‌നു അബ്ബാസ്(റ) പറഞ്ഞു: രാവിലെ അവര്‍ നിഷേധികളായ ആഭിചാരകന്മാരായിരുന്നു. എന്നാല്‍ സന്ധ്യയായപ്പോഴേക്കും പുണ്യവാന്മാരായ രക്തസാക്ഷികളായിത്തീരുകയുണ്ടായി!

23. സന്മാര്‍ഗത്തിലേക്കു മാത്രമാണ് നിങ്ങളെ ഞാന്‍ നയിക്കുന്നത് എന്ന് ഫിര്‍ഔന്‍ പ്രജകളോട് തട്ടിവിടാറുണ്ടായിരുന്നു.(ഖുര്‍ആന്‍ 40:29) ഒടുവില്‍, അവന്റെ പിന്നാലെ പരസ്സഹസ്രങ്ങളായി വന്ന് ഉപ്പുവെള്ളം കുടിച്ചു ചെങ്കടലില്‍ ചെത്തൊടുങ്ങാനായിരുന്നു ആ നിസ്സാഹായരുടെ വിധി! കടല്‍ജലം ഭിത്തികളായി ഉയര്‍ന്നു നില്‍ക്കുക മാത്രമല്ല, സഞ്ചാരമാര്‍ഗ്ഗം ഉണങ്ങി ഉറച്ച് സുഭദ്രമായിരുന്നു എന്നാണ് സൂചന.

24. ഇസ്രയേല്യര്‍ക്ക് നല്‍കിയ സുപ്രധാനമായ മൂന്ന് അമൂല്യാനുഗ്രഹങ്ങളാണിവിടെ അനുസ്മരിപ്പിക്കുന്നത് - ഫിര്‍ഔന്റെ കഠോപീഢനങ്ങളില്‍ നിന്നു രക്ഷപ്പെടുത്തി; സീനാമലയില്‍ വെച്ച് ഇസ്രയേല്യരുടെ ഇഹ-പരമോക്ഷത്തിനായി മൂസാ നബി(അ)ക്ക് പ്രവാചകത്വവും തൗറാത്തും നല്‍കി; മരുഭൂമിയില്‍ അലഞ്ഞു കഴിച്ചുകൂട്ടിയ നാല്‍പത് വര്‍ഷം മന്നും സല്‍വയും കനിഞ്ഞേകി. ഇത് നിരന്തരം അനുസ്മരിച്ച് കൃതജ്ഞരായി, നന്ദികേട് കാട്ടാതെ ജീവിച്ച് അല്ലാഹുവിന്റെ ഇഷ്ടദാസരാകണം-ഇതായിരുന്നു ദിവ്യാനുശാസനം. എന്നാല്‍ സര്‍വ്വം മറന്ന് കടുത്ത കൃതഘ്‌നതയാണവര്‍ കാണിച്ചത്.

25. സീനാ മലയിലേക്ക് പോകാന്‍ എഴുപത് നേതാക്കളെ മൂസാ നബി(അ) തെരഞ്ഞെടുത്തിരുന്നു. (ഖുര്‍ആന്‍ 7:155) യാത്രാമധ്യേ, ലക്ഷ്യത്തിലെത്തുന്നതിന്റെ അല്‍പം മുമ്പ് അവരെ വിട്ടേച്ച് അദ്ദേഹം ഒറ്റക്ക് ധൃതിയില്‍ ചെന്നു. അതാണ് പശ്ചാത്തലം.

26. ഹാറൂന്‍ നബി(അ)യെ ജനങ്ങളുടെ കാര്യങ്ങളൊക്കെ ഏല്‍പിച്ചാണ് മൂസാ നബി(അ) ദൈവിക കൂടിക്കാഴ്ചക്ക് പുറപ്പെട്ടിരുന്നത്. എന്നാല്‍ അവരിലെ കപടവിശ്വാസിയും ആഭിചാരകനുമായ സാമിരി ചില കുതന്ത്രങ്ങളൊപ്പിച്ച് ജനത്തെ വഴിതെറ്റിച്ചു. സ്വര്‍ണം കൊണ്ട് ഒരു കാളക്കുട്ടിയുടെ പ്രതിമയുണ്ടാക്കി ഇതാണ് നിങ്ങളുടെയും മൂസായുടെയും ദൈവമെന്നവന്‍ തട്ടിവിട്ടു. അവരതംഗീകരിക്കുകയും അതിനെ ആരാധിക്കാന്‍ തുടങ്ങുകയും ചെയ്തു! എന്തൊരു മൂഢജനം!!

27. ഞാന്‍ നിങ്ങളെ വിട്ടുപോയിട്ട് അധികം നാളുകളായിട്ടില്ലല്ലോ എന്നാണ് 'ഏറെക്കാലമായോ' എന്ന ചോദ്യത്തിന്റെയര്‍ഥം. മഹത്തായ ഒട്ടേറെ അനുഗ്രഹങ്ങള്‍ക്ക് പാത്രീഭൂതരായിട്ടും ഇത്ര ഹീനമായ നന്ദികേടാണ് നിങ്ങള്‍ ചെയ്യുന്നതെങ്കില്‍ അല്ലാഹുവിന്റെ ക്രോധവും ശാപവുമൊക്കെ നിങ്ങളില്‍ ഇറങ്ങും? വടികൊടുത്ത് അടി വാങ്ങുന്ന ഈ ബുദ്ധിശൂന്യതയാണോ നിങ്ങള്‍ ചെയ്യുന്നതെന്നു താത്പര്യം.

28. ഫറോവയുടെ അനുയായികളായ കോപ്റ്റിക്കുകളില്‍ നിന്നു വായ്പ വാങ്ങിയ ആഭരണങ്ങള്‍ ഇസ്രയേല്യര്‍ വശമുണ്ടായിരുന്നു. അവ നിഷിദ്ധമാണെന്ന കാരണം പറഞ്ഞ് തീയിലെറിഞ്ഞു നശിപ്പിച്ചു കളയാന്‍ സാമിരി കല്‍പിക്കുകയും അങ്ങനെ ഉരുകിയ സ്വര്‍ണത്തില്‍ നിന്ന് ഒരു കാളക്കുട്ടിയുടെ പ്രതിമ അവനുണ്ടാക്കിയെടുക്കുകയും ചെയ്തു. ചില കുതന്ത്രങ്ങളൊപ്പിച്ച് അവന്‍ അതില്‍ നിന്ന് ഒരു ശബദം- കാളകള്‍ മുക്രയിടുന്ന പോലെ- പുറപ്പെടുവിക്കുകയും ഇതു ദൈവമാണെന്ന് തട്ടിവിടുകയും ചെയ്തപ്പോള്‍ അവരതിനെ ആരാധിക്കാന്‍ തുടങ്ങി. ജിബ്‌രീലിന്റെ കുതിരയുടെ പാദസ്പര്‍ശനമേറ്റ അത്ഭുത സിദ്ധിയുള്ള മണ്ണ് സാമിരിയുടെ കൈയിലുണ്ടായിരുന്നുവെന്നും അത് കാളക്കുട്ടിയുടെ പ്രതിമക്കകത്ത് നിക്ഷേപിച്ചതിനാലാണ് മുക്രയിടുന്നതായതെന്നും മിക്ക മുഫസ്സിറുകളും രേഖപ്പെടുത്തിയിട്ടുണ്ട്.

29. മൂസാ നബിയുടെ ദൈവവും ഈ കാളക്കിടാവാണ്; പക്ഷേ, ഇക്കാര്യം മറന്നാണ് അദ്ദേഹം സീനാമലയിലേക്ക് അല്ലാഹുവുമായുള്ള കൂടിക്കാഴ്ചക്ക് പോയിരിക്കുന്നത് എന്നു താത്പര്യം.

30. വിഷയത്തിന്റെ ഗൗരവവും ബിംബത്തെയാരാധിക്കുന്നതിന്റെ നിരര്‍ത്ഥകതയുമൊക്കെ തുടക്കം മുതലേ ഹാറൂന്‍ നബി(അ) ജനത്തെ ഉണര്‍ത്തായ്കയല്ല; അവര്‍ ധിക്കരിച്ചു. മൂസാ നബി(അ) തിരിച്ചെത്തും വരെ ഒരു കാരണവശാലും ഈ പുതിയ നിലപാടില്‍ നിന്നു തങ്ങള്‍ വ്യതിചലിക്കില്ല എന്ന് അവര്‍ ശഠിച്ചു പറഞ്ഞു.

31. ജനം ശിര്‍ക്ക് പുല്‍കിയിരിക്കുന്നുവെന്ന് സീനാമലയില്‍ വെച്ച് അല്ലാഹു മൂസാ നബി(അ)യെ അറിയിച്ചിരുന്നു.(സൂക്തം: 85) അവിടന്നു മടങ്ങിയെത്തിയപ്പോള്‍ സ്ഥിതിഗതികള്‍ കണ്ട് നബി രോഷാകുലനായി. ജനത്തെ താക്കീത് ചെയ്ത് ഉദ്‌ബോധനം നടത്തി. സഹോദരന്‍ ഹാറൂന്‍ നബിയെ തലമുടിയും താടിയും പിടിച്ചു വലിച്ച് ചോദ്യം ചെയ്തു. അല്ലാഹുവിനു വേണ്ടിയുള്ള ക്രോധം തന്നെ മഥിച്ചുകളഞ്ഞിരുന്നു. ഹാറൂന്‍ നബി(അ) പ്രതികരിച്ചത് ഇതാണ്: ഞാന്‍ കര്‍ക്കശ നിലപാട് കൈക്കൊണ്ടിരുന്നുവെങ്കില്‍ ജനം ഛിദ്രിച്ച് ഭിന്ന കക്ഷികളാകും. ഏറ്റുമുട്ടലിലേക്കും യുദ്ധത്തിലേക്കും അതു നയിക്കും; അപ്പോള്‍ അതു പറഞ്ഞ് നിങ്ങള്‍ എന്നെ അധിക്ഷേപിക്കുമെന്നും ഞാന്‍ തിരിച്ചെത്തും വരെ കാത്തുനില്‍ക്കാമായിരുന്നില്ലേ എന്നു ചോദിക്കുമെന്നും പേടിച്ചാണ് ഞാന്‍ നിസ്സംഗനായി നില്‍ക്കേണ്ടി വന്നത്.

32. കടല്‍ പിളര്‍ന്ന് ഇസ്രയേല്യര്‍ അതിലൂടെ നടന്നപ്പോള്‍ ഒരു യോദ്ധാവിന്റെ വേഷത്തില്‍ കുതിരപ്പുറത്തു ജിബ്‌രീല്‍ ഉണ്ടായിരുന്നു. കുതിരയുടെ പാദസ്പര്‍ശമേല്‍ക്കുന്ന മണ്ണില്‍ ഉടനെത്തന്നെ പുല്ലുമുളച്ചുകൊണ്ടിരുന്ന അത്ഭുതം സാമിരി കണ്ടുമനസ്സിലാക്കി. മറ്റൊരാളും ഇത് ശ്രദ്ധിച്ചിട്ടില്ലായിരുന്നു. ഈ അസാധാരണത്വം കണ്ട് സാമിരി ആ മണ്ണെടുത്ത് സൂക്ഷിച്ചിരുന്നു. വ്യാഖ്യാതാക്കളില്‍ പലരും ഇത് പ്രതിപാദിച്ചിട്ടുണ്ട്.

33. ബനൂ ഇസ്‌റായീലിനെ ഒന്നടങ്കം ശിര്‍ക്ക് ചെയ്യിച്ചതിനു ശിക്ഷയാണ് സാമിരിക്കു നല്‍കുന്നത്. ആര്‍ക്കും ബന്ധപ്പെടാന്‍ കഴിയാത്തവിധം അസ്പര്‍ശ്യനായി, തൊട്ടുകൂടാത്തവനും തീണ്ടിക്കൂടാത്തവനുമായി, സമൂഹത്തില്‍ നിന്നു ഭ്രഷ്ട് കല്‍പ്പിക്കപ്പെട്ട് നിന്ദ്യനായിക്കഴിഞ്ഞു അവന്‍. പരലോകത്താകട്ടെ, അലംഘനീയ ശിക്ഷ വേറെയുമുണ്ട്.

34. പൂര്‍വ്വകാല പ്രവാചകന്മാരുടെയും സമൂഹങ്ങളുടെയും സംഭവങ്ങളുടെയും ഉപര്യുദ്ധൃതമാം വിധമുള്ള വിവരണം അല്ലാഹു നല്‍കുന്ന ദിവ്യബോധനത്തിലൂടെയാണ് തിരുമേനി(സ) മാനവികതക്കു മുന്നില്‍ സമര്‍ത്ഥിച്ചുകൊണ്ടിരിക്കുന്നത്. അതുകൊണ്ട് വിശുദ്ധ ഖുര്‍ആനെയും നബി(സ)യെയും ഓരോ മനുഷ്യനും അംഗീകരിക്കുകയും അനുധാവനം ചെയ്യുകയും വേണം. മറിച്ചാണെങ്കിലോ, അസഹനീയവും പരാജയപൂര്‍ണവുമായ പാരത്രിക ജീവിതമാകും ഫലം.

35. നരകം മുന്നില്‍ കണ്ട്, പേടിച്ചരണ്ട്, മുഖം കറുത്ത് കരുവാളിച്ച് നീലക്കണ്ണുമായി-അറബികള്‍ക്ക് നീലക്കണ്ണ് വലിയ വിദ്വേഷജനകമായിരുന്നു-വിവര്‍ണരായാണ് നിഷേധികള്‍ മഹ്ശറില്‍ വരിക-അനന്തമായ പാരത്രിക ജീവിതകാലം ബോധ്യപ്പെടുന്ന അവര്‍ക്ക് ഭൗതിക ലോകത്തെ ആയുഷ്‌കാലം വളരെ തുച്ഛമായാണനുഭവപ്പെടുക. പത്തുദിവസമായിരുന്നു അതെന്നും ഇല്ല, ഒറ്റ ദിവസമേ ഉണ്ടായിരുന്നുള്ളൂ എന്നും പരസ്പരം പതുക്കെ ചര്‍ച്ച നടത്തും. ഒരു മണിക്കൂറേ ദുന്‍യാവില്‍ ജീവിച്ചിട്ടുള്ളൂ എന്ന് അവര്‍ ശപഥം ചെയ്യുമെന്ന് സൂറത്തുര്‍റൂം 55-ല്‍ വ്യക്തമാക്കിയിട്ടുണ്ട്. ഇവയൊന്നും പരസ്പരവിരുദ്ധമല്ല; ഓരോരുത്തരുടെ വ്യത്യസ്ത അഭിപ്രായങ്ങളാണ്.

36. ഇസ്‌ലാമിലെ മൗലിക വിശ്വാസങ്ങളിലൊന്നായ അന്ത്യനാളിനെ നിഷേധികള്‍ അവഹേളിക്കുകയാണ്. അങ്ങനെയൊന്നുണ്ടാകുമെങ്കില്‍ ഭീമാകാരങ്ങളായ ഈ പാറമലകളൊക്കെ എന്താകും എന്നാണവരുടെ ചോദ്യം. അറേബ്യന്‍ ഉപദ്വീപില്‍ നിരവധി സ്ഥലങ്ങളില്‍ കരിമ്പാറയുടെ മലകള്‍ കാണാം. എന്നാല്‍ അന്ത്യനാളില്‍ അവയൊക്കെ ഛിന്നഭിന്നമാക്കപ്പെടുന്നതും മാലോകരത്രയും വിനയാന്വിതരായി ഇസ്രാഫീലി(അ)ന്റെ പിന്നില്‍ സമ്പൂര്‍ണ വിധേയത്വം പ്രകടിപ്പിച്ച് മഹ്ശറില്‍ ഹാജറാകുന്നതുമാണ്. ലോകത്തിന്റെ ആദ്യന്തമുള്ള ജനകോടികളുടെ മഹാസംഗമം.

37. പാരത്രിക ലോകത്ത് ശുപാര്‍ശകള്‍ ഫലപ്പെടില്ല എന്ന് ഖുര്‍ആനില്‍ പലേടത്തുമുണ്ട് (ഉദാഹരണം 2:254) എന്നാല്‍ അല്ലാഹുവിന്റെ അനുമതിയുള്ള ചിലര്‍ അവിടെ ശുപാര്‍ശ ചെയ്യും എന്ന് ഖുര്‍ആനിലും ഹദീസിലും ഒട്ടേറെ സ്ഥലത്ത് വ്യക്തമാക്കിയതായി കാണാം. സത്യവിശ്വാസവും സല്‍ക്കര്‍മാനുഷ്ഠാനവുമായി നാഥന്റെ സംതൃപ്തി കൈവരിച്ച പ്രവാചകരും പുണ്യപുരുഷന്മാരുമാണവര്‍.

38. വിശുദ്ധ ഖുര്‍ആന്‍ പ്രാഥമികമായി സംബോധന ചെയ്തത് അറബികളെയായിരുന്നു. അവരുടെ ഭാഷയില്‍ തന്നെ അവതരിപ്പിച്ചുകൊണ്ട് അതിന്റെ അമാനുഷികത അല്ലാഹു വ്യക്തമാക്കി. മര്‍ത്യകുലമൊന്നടങ്കവും ജിന്നു സമൂഹവും ദോഷബാധസൂക്ഷിക്കുക, സ്രഷ്ടാവിനെയും സ്വര്‍ഗ-നരകങ്ങളെയും മറ്റും സംബന്ധിച്ച ഓര്‍മ്മകള്‍ പുതുക്കിക്കൊണ്ടിരിക്കുക തുടങ്ങിയ ലക്ഷ്യമാണ് ഖുര്‍ആനവതരണത്തിനുള്ളത്.

39. ഖുര്‍ആന്‍ അവതരിച്ചുകൊണ്ടിരിക്കുമ്പോള്‍ തന്നെ, വഴിയെ മറന്നു പോകുമോ എന്നു പേടിച്ച് ജിബ്‌രീലി(അ)നോടൊപ്പം തന്നെ ഓതാന്‍ നബി(സ) ധൃതികാണിച്ചിരുന്നു. അതുവേണ്ട, ശ്രദ്ധിച്ച് കേട്ട് പിന്നീട് ഓതിയാല്‍ മതി എന്നാണിവിടെ ഉണര്‍ത്തുന്നത്. അല്‍ ഖിയാമ 16-19 സൂക്തങ്ങളിലും ഇക്കാര്യം വ്യക്തമാക്കിയിട്ടുണ്ട്. വിജ്ഞാനം വര്‍ധിപ്പിച്ചുതരാനായി ദുആ ചെയ്യാനും ഇവിടെ കല്‍പിച്ചിരിക്കയാണ്.

40. ആദിപിതാവ് ആദം നബി(അ)യെ സൃഷ്ടിച്ച് സ്വര്‍ഗത്തിലാക്കുകയും നിശ്ചിത ഫലം തിന്നുന്നത് അല്ലാഹു നിരോധിക്കുകയും ചെയ്തു. പക്ഷേ, അതു വിസ്മരിക്കുകയും ഇബ്‌ലീസിന്റെ ദുര്‍ബോധനത്തില്‍ പെടുകയും ചെയ്ത അദ്ദേഹം അതു തിന്നുകളഞ്ഞു.

41. ഏതൊരു മനുഷ്യന്റെയും മൗലികാഭിലാഷമാണ് ഇവിടെ പറഞ്ഞ നാലുകാര്യങ്ങള്‍: വിശപ്പു തീര്‍ക്കാന്‍ ഭക്ഷണം ലഭിക്കുക, ദാഹം തീര്‍ക്കാന്‍ ശുദ്ധജലം കിട്ടുക, ആവശ്യമായ ഉടയാടകളുണ്ടാവുക, സൂര്യതാപവും അതിശൈത്യവുമേല്‍ക്കാതെ സമാധാന-സന്തോഷ സമേതം കഴിഞ്ഞുകൂടാനുള്ള ഒരു വീടുണ്ടാവുക - ഇവയത്രയും ഇവിടെ ലഭ്യമാണ് എന്നുണര്‍ത്തുകയാണ്.

42. ആദം നബി(അ)നു സുജൂദ് ചെയ്യാത്തതിന്റെ പേരിലാണല്ലോ ഇബ്‌ലീസ് എന്നെന്നേക്കുമായി അഭിശപ്തനായി ആട്ടപ്പെട്ടത്. ഈ പക വെച്ച് അവന്‍ ആദം നബി(അ)യെ ചതിച്ചു. നിരോധിത വൃക്ഷത്തിന്റെ ഫലഭോജനം കൊണ്ട് കുഴപ്പമൊന്നുമില്ല, മരണത്തെ അതിജയിക്കാനും അജയ്യമായ മേധാവിത്വം നേടാനും ആകുമെന്നേയുള്ളൂ എന്നവന്‍ വ്യക്തമാക്കുകയും അല്ലാഹുവിന്റെ പേരില്‍ കള്ളസത്യം ചെയ്യുകയുമുണ്ടായി. ഒരു ദുര്‍ബല നിമിഷത്തില്‍ അല്ലാഹുവിന്റെ നിരോധനം വിസ്മരിച്ചതുകൊണ്ട് നബി ചതിക്കുഴിയില്‍ വീണുപോയി.

43. തന്റെ വീഴ്ച ആദം നബി(അ)ക്കു ബോധ്യപ്പെട്ടു. കടുത്ത കുറ്റബോധമുണ്ടായി. അപ്പോള്‍ അല്ലാഹു ബോധനം നല്‍കിയ പശ്ചാത്താപ വചനങ്ങള്‍ ഉരുവിട്ടു; അവന്‍ പാപമോചനമേകി. അല്‍-ബഖറ 37-ലും മറ്റും ഇത് വ്യക്തമാക്കിയിട്ടുണ്ട്. ആദം നബി(അ) പശ്ചാത്തപിക്കുകയും അല്ലാഹു പൊറുത്തുകൊടുക്കുകയും ചെയ്തു കഴിഞ്ഞിരിക്കയാല്‍ മനുഷ്യന്റെ ജന്മപാപം എന്ന ഒരു സങ്കല്‍പം തികഞ്ഞ വങ്കത്തമാണ്. ഇന്നു ജനിച്ചു വീഴുന്ന ഒരു ശിശു ജന്മപാപം എന്ന ദുഷിച്ച ഭാണ്ഡവും പേറിക്കൊണ്ടാണ് വരുന്നത് എന്ന ക്രിസ്തീയ വിശ്വാസം തിര്‍ത്തും ദുര്‍ബലവും അടിസ്ഥാനരഹിതവുമാണ്. മറ്റൊരു കുറ്റവാളിയുടെ പാപം ഒരു വ്യക്തിയും വഹിക്കില്ല.

44. ഭൂമിയില്‍ തന്റെ പ്രാതിനിധ്യം വഹിക്കാനണല്ലോ ആദം നബി(അ)യെ സൃഷ്ടിച്ചതു തന്നെ.(ഖുര്‍ആന്‍ 2:30) ഈ കാരണം വെച്ച് സ്വര്‍ഗത്തില്‍ നിന്ന് അങ്ങോട്ട് നബിയെ മാറ്റുകയാണ്. 'നിങ്ങള്‍ പരസ്പരം ശത്രുക്കളാണ്' എന്നതിന്റെ വിവക്ഷ മക്കളാണ്, മര്‍ത്യസമൂഹം. അധികാരം, സമ്പത്ത്, സ്ഥാനമാനങ്ങള്‍, ദേഹേച്ഛകള്‍ തുടങ്ങി നൂറുകൂട്ടം കാര്യങ്ങള്‍ക്കായി എന്നും ശത്രുതയിലാണല്ലോ മനുഷ്യര്‍.
ഇമാം ഇബ്‌നു അബ്ബാസ്(റ) പ്രസ്താവിച്ചു: ഖുര്‍ആന്‍ പഠിച്ചു പാരായണം ചെയ്യുകയും അതനുസരിച്ചു ജീവിക്കുകയും ചെയ്ത ഒരാളും തന്നെ ഭൗതിക ലോകത്ത് വഴിതെറ്റിപ്പോവില്ല, പാരത്രിക ലോകത്ത് നിര്‍ഭാഗ്യനാവില്ല-അല്ലാഹു ഏറ്റെടുത്തതാണ് ഇക്കാര്യം. തുടര്‍ന്നദ്ദേഹം ഈ സൂക്തം ഓതി.

45. കണ്ണും കാതും ബുദ്ധിയും ചിന്താശേഷിയുമൊക്കെ നല്‍കി അല്ലാഹു മനുഷ്യനെ സൃഷ്ടിച്ച ശേഷം അവന്റെ മാര്‍ഗദര്‍ശനത്തിനായി സത്യത്തിന്റെ സന്ദേശം നല്‍കി. പ്രവാചകന്മാരെയും ദിവ്യഗ്രന്ഥങ്ങളും നല്‍കി. അവയൊക്കെ അവഗണിച്ചു ജീവിച്ച നിഷേധി തികഞ്ഞ പരാജിതനും മഹാഭാഗ്യശൂന്യനുമാണ്. കാരണം ഭൗതിക ലോകത്ത് കുടുസ്സായ ജീവിതമാണവനുണ്ടാവുക. പ്രത്യക്ഷത്തില്‍ ആനന്ദപൂര്‍ണമാണെങ്കില്‍ പോലും അവന്റെ മനസ്സ് സംഘര്‍ഷഭരിതമായിരിക്കും. സത്യം കാണാതെ പോയ ഈ അവഗണനക്കു പകരം കണ്ണുകാണാനാകാതെയാണവന്‍ പാരത്രിക ലോകത്ത് സംഗമിപ്പിക്കപ്പെടുക.

46. അറേബ്യന്‍ ഉപദ്വീപിന്റെ വിവിധ ഭാഗങ്ങളില്‍ സത്യനിഷേധികളായ ധിക്കാരീ സമൂഹങ്ങള്‍ വേരോടെ പിഴുതെറിയപ്പെട്ടതിന്റെ ഒട്ടേറെ ദൃഷ്ടാന്തങ്ങള്‍ കാണാം. ഹൂദ്, സമൂദ്, ലൂത്ത് നബിയുടെ ജനത, അബ്‌റഹത്ത് സേന മുതലായവ ഉദാഹരണം. അത്തരം അധര്‍മ്മകാരികളുടെ ഉന്മൂലനസംഭവങ്ങളില്‍ നിന്നു എന്തുകൊണ്ട് ഇവര്‍ പാഠം പഠിക്കുന്നില്ല എന്നു ചോദിക്കുകയാണ്.

47. തിരുമേനി(സ)യുടെ സാന്നിധ്യത്തില്‍ സ്വന്തം ജനത്തെ ശിക്ഷയിറക്കി നശിപ്പിക്കുകയില്ല (അന്‍ഫാല്‍ :33) എന്ന ഒരു തീരുമാനം അല്ലാഹുവിനുണ്ട്. അതാണിവിടെ സൂചിപ്പിച്ച 'വചനം'. ഓരോ വ്യക്തിയുടെയും ആയുസ്സും ഭാഗധേയങ്ങളും അല്ലാഹുവിന്റെ വിധിയനുസരിച്ചു തന്നെ സംഭവിച്ചുകൊണ്ടിരിക്കും. അതൊന്നുമില്ലായിരുന്നെങ്കില്‍ കൂട്ട സംഹരണത്തിനു മതിയായ അക്രമവും ധിക്കാരവും നിഷേധവുമൊക്കെയാണിവര്‍ നടത്തിക്കൊണ്ടിരിക്കുന്നത് എന്നാണു വിവക്ഷ.

48. അഞ്ചുനേരത്തെ നിര്‍ബന്ധ നിസ്‌കാരങ്ങളാണ് ഇവിടെ വിവക്ഷിതമായിട്ടുള്ളതെന്നാണ് വ്യാഖ്യാതാക്കളില്‍ മിക്കവരും പറയുന്നത്. അവതന്നെ യഥായോഗ്യം നിര്‍വ്വഹിക്കുകയാണെങ്കില്‍ വിശ്വാസിക്ക് വിജയം സുനിശ്ചിതമാണ്. നമസ്‌കാരം നിഷിദ്ധ കാര്യങ്ങളെയും ഹീനപ്രവൃത്തികളെയും തടയുമെന്നാണല്ലോ അല്ലാഹു പറഞ്ഞിട്ടുള്ളത്.(അന്‍കബൂത്ത് 45) പക്ഷേ, പലരും കുറ്റമറ്റതായി അവ നിര്‍വ്വഹിക്കുന്നതില്‍ പരാജയപ്പെടുന്നു എന്നതാണു വസ്തുത.

49. നിഷേധീ സമൂഹങ്ങള്‍ വിവിധ തരത്തിലുള്ള ഭൗതിക സൗഭാഗ്യങ്ങള്‍ കൊണ്ട് അനുഗൃഹീതരായി കാണാം. എന്നാല്‍ സത്യവിശ്വാസികള്‍ അതില്‍ വഞ്ചിതരായി പോകരുത്. അല്ലാഹു ഒരാളെ സ്‌നേഹിക്കുന്നതിന്റെ അടയാളമല്ല ഭൗതിക ശ്രേയസ്സ്, മറിച്ച്, അതൊരു പരീക്ഷണമാണ്. ഇവിടെ സംബോധന നബി(സ)യോടാണെങ്കിലും സത്യവിശ്വാസികളായ അനുയായികളാണ് ഉദ്ദേശ്യം. കാരണം, അവിടന്ന് ഭൗതിക പരിത്യാഗിയായിരുന്നു.

50. തഖ്‌വയിലധിഷ്ഠിതമായ ജീവിതം നയിക്കുന്നതാരോ അവര്‍ക്കാണ് പാരത്രിക വിജയവും സ്വര്‍ഗീയ ലോകവും കനിഞ്ഞേകപ്പെടുക; ദുന്‍യാവിലുണ്ടായിരുന്ന അലങ്കാരാര്‍ഭാടങ്ങളോ ക്ഷേമാവസ്ഥകളോ പരിഗണിച്ചല്ല അന്തിമവിജയം.

51. പൂര്‍വ്വ ഗ്രന്ഥങ്ങളിലെ പ്രത്യക്ഷ ദൃഷ്ടാന്തം എന്നതു കൊണ്ടുള്ള വിവക്ഷ മുഹമ്മദ് നബി(സ)യും വിശുദ്ധ ഖുര്‍ആനുമാണ്. അവിടെത്തെക്കുറിച്ച വ്യക്തമായ പ്രസ്താവങ്ങള്‍ പൂര്‍വ്വവേദങ്ങളിലുണ്ടായിരുന്നു. പൂര്‍വ്വികസമൂഹങ്ങളെയും സംഭവങ്ങളെയും കുറിച്ച ധാരാളം പരാമര്‍ശങ്ങളും പ്രസ്താവങ്ങളും ഖുര്‍ആനിലുണ്ട് എന്നതും ശ്രദ്ധേയമാണ്.

52. നബി(സ)യും ഖുര്‍ആനും വരും മുമ്പ് നിഷേധത്തിന്റെയും ധിക്കാരത്തിന്റെയും പേരില്‍ മക്കാമുശ്‌രിക്കുകളെ നശിപ്പിച്ചിരുന്നുവെങ്കില്‍ പരലോകത്ത് അവരുടെ ശൈലിമാറും-നീയെന്തേ നാഥാ, ഞങ്ങളിലേക്ക് പ്രവാചകനെ നിയോഗിച്ചില്ല, സന്മാര്‍ഗദര്‍ശകഗ്രന്ഥമിറക്കിയില്ല? അങ്ങനെ സംഭവിച്ചിരുന്നെങ്കില്‍ ഞങ്ങള്‍ സന്മാര്‍ഗ നിഷ്ഠരായേനെ എന്നവര്‍ തട്ടിവിടും.

53. സത്യം ബോധ്യമാകാത്തവരല്ല നിഷേധികള്‍, ദുര്‍വാശിയും മത്സരമനഃസ്ഥിതിയും ദുശ്ശാഠ്യവും ചിന്താശൂന്യതയുമാണവര്‍ക്ക്. അതുകൊണ്ട്, മരണാനന്തരലോകം പ്രതീക്ഷിച്ചിരിക്കുകയേ ഇനി നിവൃത്തിയുള്ളൂ. ആരാണിവിടെ വിജയിക്കുക, സൗഭാഗ്യരാവുക? പരാജിതരും നരകക്കാരും ആരൊക്കെയായിരിക്കും? ആ കാത്തിരിപ്പു തുടരുക തന്നെ. അന്ന് വിശ്വാസികള്‍ക്കും നിഷേധികള്‍ക്കും എല്ലാം സ്പഷ്ടമായി അനുഭവബോധ്യമായിത്തീരുന്നതാണ്.