മർയം - مريم - Maryam

1. ഖുര്‍ആനില്‍ പേരെടുത്തുപറഞ്ഞ ഏക വനിതയാണ് മര്‍യം ബീവി. ആ മഹതിയുടെ നാമത്തിലുള്ളതാണ് ഈ അധ്യായം. 16-ാം സൂക്തം മുതല്‍ കുറേ വചനങ്ങളില്‍ തുടര്‍ച്ചയായി അവരുടെയും പുത്രന്‍ ഈസാനബിയുടെയും കഥാകഥനമുണ്ട്. അതാണുനാമകരണത്തിന്നു നിദാനം. ഒന്നാം സൂക്തത്തില്‍ അഞ്ചു ഖണ്ഡിതാക്ഷരങ്ങളാണുള്ളത്. ഖുര്‍ആന്റെ സാഹിതീയ ഔന്നത്യത്തിലേക്കുള്ള ചൂണ്ടുപലകയാണ് ഇത്തരം അക്ഷരസമന്വയങ്ങളെന്ന് നാം പലപ്പോഴും വ്യക്തമാക്കിയിട്ടുണ്ട്. ഓരോ അറബി അക്ഷരത്തിന്റെയും ശരിയായ പ്രഭവസ്ഥാനം പരിഗണിച്ചുകൊണ്ട് കാഫ് ഹാ യാ ഐന്‍ സ്വാദ് എന്നാണതുച്ചരിക്കേണ്ടത്.

2. ഇസ്രയേല്യരിലേക്ക് നിയുക്തനായ റസൂലാണ് സകരിയ്യാനബി(അ). ഖുര്‍ആനില്‍ ഏഴിടത്ത് പരാമര്‍ശമുണ്ട്. ശിശുവായ മര്‍യംബീവിയെ ബൈത്തുല്‍ മഖ്ദിസില്‍ ഏല്‍പ്പിക്കപ്പെട്ടപ്പോള്‍ സകരിയ്യാനബിയായിരുന്നു സംരക്ഷകന്‍. (ആലുഇംറാന്‍: 37:41 കാണുക). തനിക്ക് നൂറും സഹധര്‍മിണിക്ക് തൊണ്ണൂറ്റി ഒമ്പതും വയസ്സുള്ളപ്പോഴായിരുന്നു ഈ പ്രാര്‍ഥനയെന്നു മുഫസ്സിറുകള്‍ രേഖപ്പടുത്തിയിട്ടുണ്ട്. പ്രവാചകത്വവും ദൗത്യവും സത്യസന്ദേശപ്രചാരണവുമൊക്കെ തന്റെ കാലശേഷവും നിര്‍വഹിക്കാന്‍ അനുയോജ്യനും അര്‍ഹനുമായ ഒരു പിന്‍ഗാമിയാണുദ്ദേശ്യം; സമ്പത്ത് ഏറ്റെടുക്കേണ്ടയാളല്ല. വഴിയേവരുന്നവര്‍ ദീന്‍ കളഞ്ഞുകുളിക്കുകയും പ്രവാചകീയ കുടുംബത്തിന്റെ ധാര്‍മിക പൈതൃകം പന്താടുകയും ചെയ്യുമോ എന്നായിരുന്നു തന്റെ ഭയം. യഅ്ഖൂബ് കുടുംബം എന്നാല്‍ ഇസ്രയേല്യരാണ് വിവക്ഷ.

3. വയോവൃദ്ധരായ ദമ്പതികള്‍ക്കു കുഞ്ഞ് ജനിക്കുക എന്നത് അദ്ഭുതകരവും അസാധാരണവുമാണ്; ഇവിടെ തന്റെ സഹധര്‍മിണി ഗര്‍ഭധാരണശേഷിയില്ലാത്തവര്‍കൂടിയാണെന്നത് വിസ്മയവര്‍ധകമാകുന്നു. പ്രത്യുത, അല്ലാഹുവിന്റെ ഖുദ്‌റത്തിനെക്കുറിച്ച സന്ദേഹമല്ല ചോദ്യപശ്ചാത്തലം.

4. അത്യദ്ഭുത സംഭവം നടക്കാന്‍ പോകുന്നു എന്നതിന് ഇപ്പോള്‍ തന്നെ എന്തെങ്കിലുമൊരു ദൃഷ്ടാന്തം കാണിച്ചുതരണമെന്ന ആവശ്യത്തിന്ന്, മൂന്നുനാള്‍ ജനങ്ങളോട് സംസാരിക്കാന്‍ സാധിക്കാതിരിക്കുക എന്നത് അടയാളമാണെന്ന് അല്ലാഹു അറിയിച്ചു. എന്നാല്‍ എന്തെങ്കിലും ശാരീരിക ന്യൂനത വന്നുഭവിക്കുക വഴിയല്ല ഇത്. ദിക്‌റ്, തസ്ബീഹ്, ഗ്രന്ഥപാരായണം തുടങ്ങിയവക്ക് മുടക്കമൊന്നുമില്ലായിരുന്നു.

5. മസ്ജിദുല്‍ അഖ്‌സായുടെ വിശാലമായ അകത്തളത്തില്‍ അല്‍പം ഉയരത്തിലായി പ്രത്യേകം കെട്ടിയുണ്ടാക്കിയിരുന്ന കൊച്ചുമണ്ഡപമാണ് മിഹ്‌റാബ്. അതിലിരുന്ന് താഴെയുള്ള ജനങ്ങളോട് സകരിയ്യാനബി സംസാരിക്കാനൊരുങ്ങിയപ്പോള്‍ അതിനുകഴിയുന്നില്ല. സന്താനലബ്ധിയുടെ അടയാളം ബോധ്യമായി. ആ മൂന്നുനാള്‍ ആംഗ്യത്തിലൂടെയാണ് താന്‍ ജനങ്ങളോട് ആശയവിനിമയം നടത്തിയിരുന്നത്.

6. തികച്ചും അസാധാരണവും അത്ഭുതകരവുമായ പശ്ചാത്തലത്തില്‍ യഹ്‌യാനബി(അ) ജനിച്ചു. വയോവൃദ്ധരായ മാതാപിതാക്കളോടുള്ള പ്രത്യേക കാരുണ്യം പരിഗണിച്ചുകൊണ്ട് കുട്ടിയായിരിക്കെ തന്നെ യഹ്‌യാ നബിക്ക് പ്രവാചകത്വവും ദിവ്യജ്ഞാനവും സമുന്നതപദവികളും അല്ലാഹു നല്‍കി. ബലിഷ്ഠമായി പിടിക്കാന്‍ പറഞ്ഞ ഗ്രന്ഥം തൗറാത്ത് ആണ്. ബൈബിളില്‍ സ്‌നാപകയോഹന്നാന്‍ എന്ന പേരിലറിയപ്പെടുന്ന മഹാനാണ് യഹ്‌യാനബി(അ).

7. വയോവൃദ്ധ ദമ്പതികള്‍ക്കു കുട്ടിയുണ്ടായത് പറഞ്ഞതിനു വഴിയെ, അതിനേക്കാള്‍ അത്യത്ഭുതകരമായ ഒരു ജന്മത്തെപ്പറ്റി, അശേഷം പുരുഷസാന്നിദ്ധ്യമില്ലാതെ ഈസാനബി(അ) ജനിച്ചതിനെക്കുറിച്ച് പ്രതിപാദിക്കുകയാണ്. വീട്ടില്‍ നിന്നു അല്‍പം അകലെ പോയ സമയത്ത് മര്‍യംബീവിയുടെ മുമ്പില്‍ ഒരു മനുഷ്യക്കുഞ്ഞിന്റെപോലും സാന്നിദ്ധ്യമില്ലാത്ത വിജനസ്ഥലത്ത് പൂര്‍ണമനുഷ്യരൂപത്തില്‍ ജിബ്‌രീല്‍(അ) എന്ന മലക്ക് പ്രത്യക്ഷപ്പെടുകയുണ്ടായി. എന്തൊരു ബീഭത്സരംഗമായിരിക്കും അത്!

8. കുലീനകുടുംബത്തില്‍ ജനിച്ച്, പതിവ്രതയായി നാട്ടിലുടനീളം സുപ്രസിദ്ധയായ അവിവാഹിത യുവതിയാണ് പ്രസവിക്കുന്നത്. സമൂഹത്തിന്റെ പ്രതികരണമെന്തായിരിക്കുമെന്ന് പറയേണ്ടതില്ലല്ലോ. ഈ പശ്ചാത്തലത്തിലാണ് ദുഃഖസാന്ദ്രമായ ഈ അഭിലാഷപ്രകടനം.

9. തീര്‍ത്തും നിസ്സഹായയായി സങ്കടക്കടലില്‍ നീന്തുന്ന ബീവിക്ക് അല്ലാഹുതന്നെ സഹായമൊരുക്കുകയാണ്. മാലാഖയാണ് ശുഭവാര്‍ത്തയറിയിക്കുന്നത്. നീരുറവ രൂപപ്പെടുത്തുന്നതും ഉണങ്ങിയ ഈന്തത്തടി പഴുത്തുപാകമായ പഴം നല്‍കുന്നതും ബീവിയുടെ കറാമത്തായിട്ടാണ്. സര്‍വശക്തന്റെ അനുഗ്രഹം തന്റെകൂടെത്തന്നെയുണ്ടെന്ന് അനുഭവബോധ്യമാകുമ്പോള്‍ പിന്നെയെന്തിന്നു സങ്കടപ്പെടണം? ആഹ്ലാദഭരിതയാകാനാണു കല്‍പന!

10. ഹാറൂന്‍ നബി(അ)യെ പോലെ വിശുദ്ധ എന്നോ ഹാറൂനി(ഇസ്രയേലീ) ശ്രേണിയിലെ വനിത എന്നോ ആണ് ഉദ്ദേശ്യം. അറബി ഗോത്രക്കാരന്‍ എന്ന അര്‍ത്ഥത്തില്‍ 'അഖുല്‍ അറബ്' എന്ന പ്രയോഗം സുവിദിതമാണ്. തത്തുല്യമായ ഒരു രീതിയാണിത്.

11. ക്രുദ്ധരും അപമാനിതരുമായ സ്വന്തം ജനത അപസ്വരങ്ങളുയര്‍ത്തി കയര്‍ത്തപ്പോള്‍ മര്‍യംബീവി ശിശുവിലേക്ക് വിരല്‍ ചൂണ്ടുകമാത്രം ചെയ്തു. അങ്ങനെ, മാതാവിന്റെയും തന്റെയും വിശുദ്ധി വിളംബരംചെയ്തുകൊണ്ടതാ ആ പൈതല്‍ സംസാരിക്കുന്നു! 3:46 ലും 5:110 ലും ഈസാനബി(അ) തൊട്ടിലില്‍ സംസാരിച്ച കാര്യം വ്യക്തമാക്കിയിട്ടുണ്ട്. എന്നാല്‍ ബൈബിളില്‍ ഇതില്ല എന്നത് ഏറെ വിചിത്രമത്രേ. ക്രിസ്ത്യാനികളുടെ ത്രിയേകത്വവാദത്തിന്റെ കണ്ഠകോടാലിയാണല്ലോ ഈ വിളംബരം.

12. ദൈവമാണ്, മനുഷ്യനാണ്, ദൈവപുത്രനാണ്, ചിലപ്പോള്‍ ദൈവവും മറ്റുചിലപ്പോള്‍ മനുഷ്യനുമാണ്, ദൈവത്തിന്റെ അവതാരമാണ്, ദൈവ-മാനവ മിശ്രിതമാണ്.. എന്നിങ്ങനെ ഒട്ടേറെ വിചിത്ര വാദങ്ങളും തര്‍ക്കങ്ങളും ഈസാനബി(അ)യെപ്പറ്റി ക്രിസ്ത്യാനികള്‍ക്കുണ്ട്. ജൂതരാകട്ടെ അതീവഗുരുതരമായ ദുരാരോപണം തട്ടിവിടുന്നു. ഈസാനബി(അ)യെപ്പറ്റി സംശയഗ്രസ്തരാണവര്‍ ഇക്കാലമത്രയും.

13. അത്യത്ഭുത പശ്ചാത്തലത്തില്‍, പിതാവില്ലാതെയാണ് ജനിച്ചതെങ്കിലും താന്‍ അല്ലാഹുവിന്റെ അടിമയും പ്രവാചകനുമാണെന്ന് ഈനബി(അ) വ്യക്തമാക്കി. അതാണ് വസ്തുത. എന്നാല്‍ ക്രിസ്ത്യാനികളുടെ വിശ്വാസം എത്രമാത്രം അപകടകരവും മൗഢ്യവുമാണ്! ആദ്യവും അന്ത്യവുമില്ലാത്ത, സര്‍വശക്തനും സ്വയംഭൂവും സ്രഷ്ടാവുമായ അല്ലാഹുവിന്ന് എങ്ങനെയാണ് സന്താനമുണ്ടാവുക! നിരവധി സ്ഥലങ്ങളില്‍ ഈ ജല്‍പനത്തെ ഖുര്‍ആന്‍ അതീവ നിശിതമായി വിമര്‍ശിക്കുകയും തള്ളിക്കളയുകയും ചെയ്തതായി കാണാം.

14. ഒരു കക്ഷി സ്വര്‍ഗത്തിലും മറുകക്ഷി നരകത്തിലുമാകുന്നു(42:7) എന്ന് അന്ത്യനാളില്‍ ദിവ്യവിളംബരമുണ്ടാകുമ്പോള്‍ സത്യനിഷേധികളൊക്കെയും കഠിനമായ ദുഃഖത്തിലും ഖേദത്തിലുമാകും. മോചനത്തിനും മോക്ഷത്തിനുമുള്ള സര്‍വ വാതായനങ്ങളും അടഞ്ഞുപോയെന്ന തരിച്ചറിവുതന്നെ കാരണം. മരണം'അറുക്കപ്പെടുകയും' ഇല്ലാതാവുകയും ചെയ്യുന്നതോടെ വിജയികള്‍ സ്വര്‍ഗത്തിലും പരാജിതര്‍ നരകത്തിലുമായി ശാശ്വതവല്‍കൃതരായിത്തീരും.
തിരുനബി(സ്വ) പ്രസ്താവിച്ചതായി അബൂസഈദിനില്‍ ഖുദ്‌രി(റ) ഉദ്ധരിച്ചു: വെളുപ്പും കറുപ്പുമുള്ള ഒരാടിന്റെ രൂപത്തില്‍ മരണത്തെ ഹാജരാക്കപ്പെടും. എന്നിട്ട് ഒരു വക്താവ് 'ഹേ, സ്വര്‍ഗാവകാശികളേ' എന്നു വിളിക്കുമ്പോള്‍ കഴുത്തുനീട്ടി അവര്‍ എത്തിനോക്കുകയും ഇത് കാണുകയും ചെയ്യും. വക്താവ്: ഇതെന്താണെന്ന് നിങ്ങള്‍ക്ക് അറിയാമോ? അവര്‍: 'അതെ, ഇത് മരണമാകുന്നു.' അവരൊക്കെയും അതിനെ നേരത്തെ കണ്ടിരുന്നു. പിന്നീട് 'നരകാവകാശികളേ' എന്ന് വക്താവ് വിളിക്കുമ്പോള്‍ കഴുത്തുനീട്ടി അവര്‍ എത്തിനോക്കുകയും ഇതിനെ ദര്‍ശിക്കുകയും ചെയ്യും. വക്താവ്: ഇതെന്താണെന്ന് നിങ്ങള്‍ക്കറിയാമോ? അവര്‍: 'ഉവ്വ്, മരണമാണ് ഇത്.' അവരെല്ലാവരുമത് മുമ്പ് ദര്‍ശിച്ചിരുന്നു.
എന്നിട്ട് സ്വര്‍ഗ-നരക മധ്യേ വെച്ച് അതിനെ കശാപ്പ് ചെയ്യപ്പെടും. തുടര്‍ന്ന് വക്താവ് പറയും: സ്വര്‍ഗക്കാരേ, ശാശ്വതത്വം; ഇനി മരണമില്ല. നരകക്കാരേ, ശാശ്വതത്വം; ഇനി മരണമില്ല. എന്നിട്ട്, ഈ 39-ാം സൂക്തം നബി ഓതുകയും അശ്രദ്ധയും അവിശ്വാസവും ഉണ്ടാകുന്നത് ഈ ഐഹിക ലോകത്താണ് എന്ന് ആംഗ്യം കാണിക്കുകയുമുണ്ടായി. (ബുഖാരി, മുസ്‌ലിം).

15. എന്റെ പിതാവേ എന്ന് ആവര്‍ത്തിച്ച് അഭിസംബോധനം ചെയ്ത് ബിംബാരാധനയുടെ ബുദ്ധിശൂന്യത, ദിവ്യജ്ഞാനം ലഭിച്ചത്‌കൊണ്ട് തന്റെ വഴി പിന്‍പറ്റണമെന്ന അപേക്ഷ, ധിക്കാരിയും ദുര്‍മാര്‍ഗിയുമായ പിശാചിനെ പിന്‍പറ്റുന്നതിലെ മൗഢ്യം, പിതാവ് ശിക്ഷാവിധേയനാകുന്നതിലെ അസഹനീയത തുടങ്ങിയ കാര്യങ്ങള്‍ വളരെ ഭവ്യതയോടെയും വിനയത്തോടെയുമാണദ്ദേഹം അവതരിപ്പിക്കുന്നത്.

16. പിതൃസ്‌നേഹവും ആദരവും നിറഞ്ഞ ഇബ്രാഹീം നബി(അ)യുടെ ശൈലിയും ബിംബാരാധകനായ പിതാവിന്റെ ആക്രോശ ശൈലിയും ഭീഷണ സംബോധനയും തമ്മിലെ അന്തരം ഒന്നു താരതമ്യം ചെയ്തുനോക്കൂ. വിശ്വാസത്തിന്റെയും അവിശ്വാസത്തിന്റെയും വ്യത്യാസം ഇവ്വിധമായിരിക്കും.

17. അല്ലാഹുവിന്റെ നിര്‍ദേശാനുസരണം ഇബ്രാഹീം നബി(അ) നാടുവിട്ടു. തുടര്‍ന്ന് പുത്രന്‍ ഇസ്ഹാഖിനെയും പൗത്രന്‍ യഅ്ഖൂബിനെ(അ)യും മറ്റും നല്‍കി. തന്റെ പരമ്പരയില്‍ നിരവധി നബിമാരുണ്ടായിരുന്നു. മുസ്‌ലിം-ക്രിസ്ത്യന്‍-ജൂതസമൂഹങ്ങളെല്ലാം അവരെ സാദരം അനുസ്മരിക്കുന്നു. പിതാവിനെയും ജന്മനാടിനെയും ബിംബാരാധക സമൂഹത്തെയും കൈവെടിഞ്ഞെങ്കിലും ഒട്ടേറെ ദിവ്യാനുഗ്രഹങ്ങള്‍കൊണ്ട് ഇബ്രാഹീംനബി(അ) ധന്യനും ചിരസ്മരണീയനുമായി.

18. മൂസാനബി(അ) മദ്‌യനില്‍ നിന്നു ഈജിപ്തിലേക്കു മടങ്ങുമ്പോള്‍ തന്റെ വലതുവശത്താണ് സീനാമലനിരകള്‍ വരിക. അതാണു സീനായുടെ വലതുഭാഗം എന്നു പ്രയോഗിച്ചത്. സഹോദരന്‍ ഹാറൂനിനുകൂടി പ്രവാചകത്വം നല്‍കണമെന്നു മൂസാനബി(അ) അപേക്ഷിക്കുകയായിരുന്നു (20:29-32). അതാണ് സൂക്തം 53 ന്റെ സൂചന.

19. വാഗ്ദാനപാലനത്തില്‍ വലിയ കാര്‍ക്കശ്യക്കാരനായിരുന്നു ഇസ്മാഈല്‍ നബി(അ). അറുക്കാന്‍ കല്‍പിക്കപ്പെട്ടപ്പോള്‍ അതിനുള്ള സന്നദ്ധത സധൈര്യം പിതാവിനെ അറിയിച്ചതും അല്ലാഹു ശാസന പിന്‍വലിച്ചപ്പോള്‍ പകരം ആടിനെ ബലിനല്‍കിയതുമാണ് സൂചനയെന്നും ചില വ്യാഖ്യാതാക്കള്‍ പ്രസ്താവിച്ചിട്ടുണ്ട്. (ഖുര്‍ആന്‍ 37:101-107)

20. സര്‍വശക്തനായ അല്ലാഹുവിന്റെ ഔന്നത്യവും അജയ്യതയും മനുഷ്യന്റെ എളിമത്വവും നിസ്സഹായതയും യഥായോഗ്യം ഗ്രഹിക്കുന്ന ഏതൊരാളും ആ മഹച്ഛക്തിക്കു മുമ്പില്‍ തലകുനിക്കും; വിശിഷ്യ അവന്റെ സൂക്തങ്ങള്‍ ശ്രവിക്കുമ്പോള്‍ സാഷ്ടാംഗം ചെയ്യും. (സൂറത്തുസ്സജ്ദ 15 കാണുക). പ്രവാചകന്മാരും സച്ചരിതരുമൊക്കെ ഇങ്ങനെയായിരുന്നു.

21. അദൃശ്യമായി വാഗ്ദാനം ചെയ്ത സ്വര്‍ഗം എന്നാല്‍ നേര്‍ക്കുനേരെ കാണുകയോ എന്തെങ്കിലും അടയാളങ്ങളിലൂടെ ബോധ്യപ്പെടുകയോ ചെയ്യാതെ അല്ലാഹുവിന്റെ പ്രവാചകന്മാരുടെ വാക്കുകള്‍ മാത്രം വിശ്വസിച്ച് മനസ്സില്‍ കണ്ട സ്വര്‍ഗം എന്നാണ്. ആ വിശ്വാസം ഒന്നു മാത്രമാണല്ലോ മുസ്‌ലിമിന്റെ പ്രചോദനവും ആവേശവും.

22. ഇവിടെ പ്രഥമപുരുഷന്‍ മലക്ക് ആണ്; ജിബ്‌രീല്‍(അ) ആണ് ഇതുപറയുന്നത്. നബി(സ്വ) പ്രസ്താവിച്ചതായി ഇബ്‌നു അബ്ബാസ്(റ) ഉദ്ധരിക്കുന്നു: ഇപ്പോഴുള്ളതിനെക്കാള്‍ കൂടുതലായി എന്നെ സന്ദര്‍ശിക്കാന്‍ താങ്കള്‍ക്കെന്താണു തടസ്സം എന്ന് ജിബ്‌രീലി(അ)നോട് തിരുമേനി ഒരിക്കല്‍ ചോദിക്കുകയുണ്ടായി. അപ്പോഴായിരുന്നു ഈ സൂക്താവതരണം. (ബുഖാരി)

23. പ്രപഞ്ചവും അതിലുള്ള പരകോടി വസ്തുക്കളും അല്ലാഹു സൃഷ്ടിച്ചതാണ്. അവയുടെ നാഥനും രക്ഷിതാവും നിയന്താവും സംഹാരകനും സംരക്ഷകനുമൊക്കെ അവന്‍ തന്നെ. ആ സര്‍വശക്തന്റെ മഹത്ത്വം ഗ്രഹിക്കാനാകാത്ത ബഹുദൈവ വിശ്വാസികളും നിരീശ്വരരും യുക്തിവാദികളുമൊക്കെ എത്ര വലിയ ബുദ്ധിശൂന്യരും മൂഢരുമാണ്! നാമത്തിലോ വിശേഷണങ്ങളിലോ ആധിപത്യത്തിലോ അവനു സമാനനായി മറ്റാരുണ്ട്?

24. മരണാനന്തര ജീവിതവും സ്വര്‍ഗ-നരകങ്ങളും മറ്റും അവജ്ഞയോടെ തള്ളുന്ന മത-ദൈവ നിഷേധികളുടെ വാദമാണിത്. മരിച്ച് ദ്രവിച്ചുകഴിഞ്ഞാല്‍ പിന്നെയെങ്ങനെയാണ് പുനര്‍ജനിപ്പിക്കുക എന്നാണു ചോദ്യം. എന്നാല്‍ സ്വന്തത്തിന്റെ അവസ്ഥ മാനവന്‍ ചിന്തിച്ചിട്ടുണ്ടോ? നേരത്തെ ഇങ്ങനെ ഒരു വ്യക്തിയേ ഉണ്ടായിരുന്നില്ല. ഇല്ലായ്മയില്‍ നിന്നാണവനെ അല്ലാഹു സൃഷ്ടിച്ചത്. ആ സര്‍വശക്തന് ഇവനെ വീണ്ടും സൃഷ്ടിക്കാന്‍ എന്തു പ്രയാസം? അവനത് സുഗമമാണ് എന്നാണ് ഖുര്‍ആന്‍ ഭാഷ്യം. (30:27)

25. എല്ലാ മനുഷ്യരും നരകത്തിനടുത്തെത്തും. സമ്പൂര്‍ണ സൗഭാഗ്യരായ സത്യവിശ്വാസികള്‍ അതിനുമീതെ സ്ഥാപിതമായ പാലം കടന്ന് സ്വര്‍ഗത്തിലെത്തിച്ചേരും; അല്ലാത്തവര്‍ കാല്‍തെറ്റി താഴെ നരകത്തില്‍ വീഴും. ഇമാം ബുഖാരിയും മുസ്‌ലിമും(റ) ഉദ്ധരിച്ച ഒരു ഹദീസില്‍ ഇതു വ്യക്തമാക്കിയിട്ടുണ്ട്. എന്നാല്‍ ഇമാം ഇബ്‌നു അബ്ബാസി(റ)ന്റെ പക്ഷം, എല്ലാവരും നരകത്തില്‍ പ്രവേശിക്കുമെന്നും പക്ഷേ സത്യവിശ്വാസികള്‍ക്കത് ശാന്തിയും സമാധാനവുമായി പരിണമിക്കുമെന്നും ഉടനെത്തന്നെ അവര്‍ വിമോചിപ്പിക്കപ്പെടുമെന്നുമാണ്.

26. ഐഹിക ലോകത്തെ സുഭിക്ഷതയും അലങ്കാരാര്‍ഭാടങ്ങളുമല്ല പാരത്രികസൗഭാഗ്യത്തിനു നിദാനം. അത്തരം പല ആഢ്യസമൂഹങ്ങളെയും അല്ലാഹു സംഹരിച്ചുകളഞ്ഞിട്ടുണ്ട്. പരലോകത്ത് ശാശ്വതമായ പരാജയത്തിന്ന് അവര്‍ വിധേയരാവുകയും ചെയ്യും. സുഖലോലുപരായിരുന്ന ഇത്തരം നിരവധി ധിക്കാരീസമൂഹങ്ങളെപ്പറ്റി 28:58 ല്‍ അല്ലാഹു പരാമര്‍ശിച്ചതായി കാണാം. അവിടെ നോക്കുക.

27. ദുര്‍മാര്‍ഗികള്‍ ദൈവനിഷേധവും ധിക്കാരവുമായി കൂടുതല്‍ പരാജയത്തിലേക്കാണ് കൂപ്പുകുത്തുക. അല്ലാഹു തങ്ങളെ പരീക്ഷണവിധേയരാക്കുകയാണ് എന്നവര്‍ ഗ്രഹിക്കുകയില്ല. അതേ സമയം, സര്‍വശക്തനോട് വിധേയത്വം പുലര്‍ത്തുകയും അനുസരണശീലനായി കഴിയുകയും ചെയ്യുന്ന സന്മാര്‍ഗചാരിക്ക് കൂടുതല്‍ പുരോഗതിയും വിജയവും സന്മാര്‍ഗനിഷ്ഠയുമൊക്കെ ലഭിക്കും.

28. ആസ്വുബ്‌നു വാഇല്‍ എന്ന മുശ്‌രിക്ക് നേതാവിനോട് ഖബ്ബാബുബ്‌നുല്‍ അറത്ത് എന്ന സ്വഹാബി(റ) തനിക്കു കിട്ടാനുള്ള പണം ചോദിച്ചു. ഞാന്‍ മരിച്ചു പുനര്‍ജനിച്ച ശേഷം തരാം എന്നയാള്‍ പരിഹാസ മറുപടി നല്‍കി. ഈ പശ്ചാത്തലത്തിലവതരിച്ച സൂക്തമാണിത് (ബു.മു.). ഇസ്‌ലാമിലെ പുനരുത്ഥാനവിശ്വാസത്തെ അവഹേളിക്കയായിരുന്നു അയാളുടെ ലക്ഷ്യം. മരണാനന്തരം മക്കളും മുതലുമുണ്ടാകുമെന്ന് ഇവനെങ്ങനെ അറിഞ്ഞു, അല്ലാഹുവുമായി പ്രത്യേക കരാറിലേര്‍പ്പെട്ടതാണോ എന്നു ചോദിച്ച് അവന്റെ മൗഢ്യം വിളംബരം ചെയ്യുകയാണ്.

29. ലാത്ത്, ഉസ്സാ, മനാത്ത് പോലുള്ള ബിംബങ്ങളോ ഈസാനബി, മര്‍യംബീവി തുടങ്ങിയ മഹാത്മാക്കളോ ആരാകട്ടെ അവര്‍ തങ്ങളെ ആരാധിച്ചിരുന്നവരുടെ തെറ്റായ നിലപാട് പരലോകത്ത് തള്ളിപ്പറയുകയും അവരുടെ ശത്രുക്കളായി മാറുകയും ചെയ്യും; അല്ലാഹുവിനെ അര്‍ഹമായ നിലക്ക് ദൈവമായി വരിക്കുകയും ആരാധിക്കുകയും ചെയ്തില്ല എന്നതാണു കാരണം. എത്രവലിയ പരാജയവും അപമാനവുമാണിത്! ഖുര്‍ആന്‍ 46:6, 30:13 ഉം കാണുക.

30. സത്യവിശ്വാസികളെ പ്രകാശത്തേരുകളിലേറ്റി മലക്കുകളുടെ അകമ്പടിയോടെയാണ് മഹ്ശറിലേക്ക് ആനയിക്കപ്പെടുക. നിഷേധികളെ കാലിക്കൂട്ടങ്ങളെപ്പോലെ, ദാഹാര്‍ത്തരും ഭയാക്രാന്തരുമായി തെളിച്ചുകൊണ്ടുപോകും.

31. അല്ലാഹുവുമായി സന്ധിചെയ്തവര്‍ എന്നാല്‍ സത്യവിശ്വാസത്തിലും സല്‍ക്കര്‍മങ്ങളിലും അധിഷ്ഠിതമായ സസൂക്ഷ്മജീവിതം നയിച്ച ഭക്തരും പുണ്യവാന്‍മാരുമാണ്. അത്തരക്കാര്‍ക്ക് പരലോകത്ത് ശുപാര്‍ശക്ക് അധികാരമുണ്ടാകും. (ഖുര്‍ആന്‍ 20:109, 34:23, 21:28, 2:255, 10:3 മുതലായവ നോക്കുക). എന്നാല്‍ അവരൊന്നും തന്നെ അല്ലാഹുവിനെ ധിക്കരിച്ച അനര്‍ഹരായ ആളുകള്‍ക്ക് ശുപാര്‍ശചെയ്യാന്‍ സന്നദ്ധരാവില്ല. പരലോകത്തെ ശഫാഅത്തിനെ നിശ്ശേഷം തള്ളിപ്പറയുന്നവര്‍ ഇത്തരം സൂക്തങ്ങള്‍ മനസ്സിലാക്കാത്തവരാണ്.

32. മലക്കുകള്‍ അല്ലാഹുവിന്റെ പെണ്‍മക്കളാണെന്ന് മക്കയിലെ ബഹുദൈവ വിശ്വാസികള്‍ വാദിച്ചിരുന്നു. ഈസാനബി(അ) ദൈവപുത്രനാണെന്ന് ക്രിസ്ത്യാനികളും എസ്രാ(ഉസൈര്‍) ദൈവപുത്രനാണെന്ന് ജൂതരും വാദിക്കുന്നു. ആധുനിക യുഗത്തില്‍ പലരും ചില ആള്‍ദൈവങ്ങളെ ദൈവത്തിന്റെ പ്രതിപുരുഷന്‍മാരായി അവരോധിക്കുന്നു. എന്തൊരു ബുദ്ധിശൂന്യതയും മൗഢ്യവുമാണിത്!

33. പ്രപഞ്ചസംരക്ഷകനും സ്രഷ്ടാവും നിയന്താവും സര്‍വശക്തനും പരാശ്രയരഹിതനും സ്വയംഭൂവുമായ അല്ലാഹുവിന് ഭാര്യ, മക്കള്‍, വേലക്കാര്‍ തുടങ്ങി യാതൊന്നിന്റെയും ആവശ്യമില്ല. ഉണ്ടെന്ന വാദം അവന്റെ ദിവ്യത്വത്തെ തകര്‍ക്കലാണ്. അതുകൊണ്ടാണ് ഇത്രഗൗരവത്തില്‍, ആകാശഭൂമികളും പര്‍വതങ്ങളുമൊക്കെ പൊട്ടിപ്പിളര്‍ന്ന് തരിപ്പണമാകും വിധം അത്യപകടകരമാണ് അതെന്ന് വ്യക്തമാക്കിയത്. എന്നിട്ടും മനുഷ്യരില്‍ വലിയൊരു വിഭാഗം ആ മുഢധാരണ കൈവെടിയുന്നില്ല.

34. മുര്‍സലുകളും നബിമാരും പുണ്യപുരുഷന്മാരുമെന്നല്ല, ചക്രവര്‍ത്തിമാരും രാജാക്കന്മാരും മന്ത്രിമാരുമൊക്കെ അല്ലാഹുവിന്റെ അടിമകളാണ്. അവരുടെ സ്രഷ്ടാവും സംരക്ഷകനും നിയന്താവുമൊക്കെ അല്ലാഹുവാണല്ലോ. ഖുര്‍ആന്‍ പറയുന്നു: ഹേ ജനങ്ങളേ, നിങ്ങള്‍ അല്ലാഹുവിനെ ആശ്രയിക്കുന്നവരാകുന്നു. അവനാകട്ടെ, ഐശ്വര്യനും സ്തുത്യര്‍ഹനുമത്രേ. (സൂറ. ഫാത്വിര്‍:15) രാജാധിരാജന്റെ ഉത്തരവനുസരിച്ചു അടിമകള്‍ എന്ന നിലക്കുതന്നെ മഹ്ശറില്‍ അവരൊക്കെ ഹാജരാകും. ഇന്നത്തെ ആധിപത്യം ആര്‍ക്കാണെന്ന് അല്ലാഹു വിളിച്ചുചോദിക്കുമ്പോള്‍ ഒരാളും മറുപടിനല്‍കില്ല. അല്ലാഹുവിന് മാത്രമാകുന്നു എന്നും തത്സമയം വിളംബരം ചെയ്യപ്പെടും.(ഗാഫിര്‍: 16) ഓരോരുത്തരും അന്ന് ഒറ്റക്കൊറ്റക്കാണ് രാജാധിരാജനായ നാഥന്റെ മുമ്പില്‍ വരിക.

35. ശരിയായ അര്‍ഥത്തില്‍ സത്യവിശ്വാസം കൈക്കൊള്ളുകയും സല്‍ക്കര്‍മങ്ങളനുഷ്ഠിക്കുകയും ചെയ്യുന്ന സൗഭാഗ്യവാന്മാരുടെ അതിമഹത്തായ പദവിയാണിത്. തിരുനബി(സ്വ) പ്രസ്താവിച്ചതായി അബൂഹുറൈറ(റ) നിവേദനം ചെയ്യുന്നു: അല്ലാഹു ഒരു വ്യക്തിയെ സ്‌നേഹിച്ചാല്‍ ജിബ്‌രീലി(അ)നെ വിളിച്ച് ഇങ്ങനെ പറയും-'ഇന്നമനുഷ്യനെ ഞാന്‍ സ്‌നേഹിക്കുന്നുണ്ടെന്നതിനാല്‍ നിങ്ങളുമവനെ സ്‌നേഹിക്കണം.' ജിബ്‌രീല്‍ അങ്ങനെ ചെയ്യുകയും ആകാശലോകങ്ങളില്‍ ഇപ്രകാരം വിളംബരപ്പെടുത്തുകയും ചെയ്യുന്നതാണ്:
'അല്ലാഹു ഇന്ന വ്യക്തിയെ സ്‌നേഹിക്കുന്നുണ്ട്, അതിനാല്‍ നിങ്ങളെല്ലാം അയാളെ സ്‌നേഹിക്കേണ്ടതാണ്.' ജിബ്‌രീല്‍ ഇങ്ങനെ വിളംബരം ചെയ്തുകഴിയുമ്പോള്‍ വാനലോകങ്ങളിലുള്ളവര്‍ മുഴുക്കെയും അയാളെ സ്‌നേഹിക്കും. പിന്നീട് ഭൂമിയില്‍ അവന്ന് സ്വീകാര്യതയുണ്ടായിത്തീരുന്നതാകുന്നു. ഒരു വ്യക്തിയോട് അല്ലാഹു പ്രകോപിതനായാല്‍ ജിബ്‌രീലിനെ വിളിച്ച് അവന്‍ പറയും: ഇന്നയാളെ ഞാന്‍ വെറുക്കുന്നുണ്ട്; അതുകൊണ്ട് നിങ്ങള്‍ അവനെ വെറുക്കേണ്ടതാകുന്നു. അങ്ങനെ ജിബ്‌രീല്‍ അയാളെ വെറുക്കുന്നതും വാനലോകങ്ങളില്‍ ഇങ്ങനെ വിളംബരം ചെയ്യുന്നതുമാണ്: ഇന്നയാളെപ്പറ്റി അല്ലാഹു പ്രകോപിതനാകുന്നു. അതുകൊണ്ട് നിങ്ങളും അവനോടു കോപംവെച്ചുപുലര്‍ത്തുക. തന്മൂലം ഭൂമിയിലുടനീളം അവനോട് വിദ്വേഷം വെച്ചുപുലര്‍ത്തപ്പെടും. (ബുഖാരി, മുസ്‌ലിം, അഹ്മദ്, തുര്‍മുദി). ചുരുക്കത്തില്‍, സൂക്തത്തില്‍ പറയുന്ന സ്‌നേഹബന്ധം പ്രപഞ്ചത്തിലുടനീളം വ്യാപിച്ചുകിടക്കുന്നതാണ്. എന്തൊരു മഹാഭാഗ്യമാണിത്!

36. മക്കയിലെ മുരടിച്ച മുശ്‌രിക്കുകള്‍ മാത്രമല്ല, മനുഷ്യചരിത്രത്തിലുടനീളവും അധുനാതനയുഗത്തിലുമുള്ള സത്യനിഷേധികളില്‍ മിക്കവരും വസ്തുതകള്‍ മനസ്സിലാകാത്തവരല്ല; ഖുര്‍ആനിക സിദ്ധാന്തങ്ങളോടും ധാര്‍മിക മൂല്യങ്ങളോടും ദുസ്തര്‍ക്കം നടത്തുന്നവരാണവര്‍. അത്തരക്കാരെ താക്കീതുചെയ്യുവാനും സൂക്ഷ്മാലുക്കള്‍ക്കു ശുഭവാര്‍ത്ത നല്‍കാനുമായി സുഗ്രാഹ്യവും ലളിതവുമായാണ് അല്ലാഹു ദിവ്യവേദം തിരുമേനിക്ക് അവതരിപ്പിച്ചുകൊടുത്തിരിക്കുന്നത്.

37. മക്കയിലെ മുശ്‌രിക്കുകള്‍ തിരുനബി(സ്വ)യുടെയും അനുയായികളുടെയും വഴിയില്‍ നിരന്തരമായി ഗുരുതരമായ മാര്‍ഗതടസ്സങ്ങള്‍ സൃഷ്ടിച്ചുകൊണ്ടിരിക്കുകയായിരുന്നു. അങ്ങനെയാണ് ഹിജ്രയുടെ പ്രസക്തി വര്‍ധിച്ചുവന്നത്. എന്നാല്‍ നാടും വീടുമൊഴിഞ്ഞ് മദീനയിലെത്തിയിട്ടും മുസ്‌ലിംകള്‍ക്ക് നിഷേധികള്‍ നില്‍ക്കപ്പൊറുതി കൊടുത്തില്ല. ഈ കൊടിയ ധിക്കാരവും അഹങ്കാരവും വേണ്ട, നിങ്ങളെക്കാള്‍ മുരത്ത ധിക്കാരികളെ പൊടിപോലും ബാക്കിവെക്കാതെ നാം ഉന്മൂലനം ചെയ്തുകളഞ്ഞിട്ടുണ്ട് എന്ന് അവരെ താക്കീതുചെയ്യുകയാണ്. ഈ ഭീഷണി മുപ്പതിലേറെ സ്ഥലങ്ങളില്‍ ഖുര്‍ആന്‍ ഉദ്ധരിച്ചിട്ടുണ്ട്. പക്ഷേ, മക്കക്കാര്‍ പാഠമുള്‍ക്കൊണ്ടില്ല. ഫലമോ, അവര്‍ വേരോടെ പിഴുതെറിയപ്പെട്ടു. ഇന്നത്തെ നിഷേധികള്‍ക്കും ഇതു താക്കീതായിരിക്കേണ്ടതാകുന്നു.